//rgya gar skad du/ d+harma sa mu dra nA ma ma hA yA na sU tra/ bod skad du/ theg pa chen po'i mdo chos rgya mtsho zhes bya ba/ 'di skad bdag gis thos pa dus gcig na/ bcom ldan 'das rgya mtsho'i gling phran po Ta la ka'i ri la rgyal ba'i sras phyir mi ldog pa phal po ches bskor cing mdun du byas te bzhugs so/ /de nas bcom ldan 'das kyis 'jig rten gyi dbang po byang chub sems dpa' sems dpa' chen po la bka' stsal pa| skyes bu dam pa/ chos kyi gtam ci 'dod pa dri bar gyis shig /ces pa dang / brtse ba la bsgribs pa med pas rnam par grol ba thob pa/ 'jig rten gyi dbang po byang chub sems dpas bcom ldan 'das la gsol pa/ btsun pa/ ji ltar na/ gzhon nur gyur pas bdud las rgyal ba lags/ gang gis byang chub kyi sems bskyed ma thag gis 'dod pa la rtog cing mi sten pa dang / mi 'chang ba dang / nga rgyal med pa dang / shes rab dang / thabs la mkhas pa dang / stong pa nyid la shin tu mos pa dang ldan te/ yod pa dang med pa spangs pa dang / yang dag pa ma yin pa la brlags pas grangs med par 'khor bar gyur/ ji ltar na 110a @#/ /dge bar gsungs pa'i chos dang 'dul bar rab tu byung zhing yang dag par rdzogs pa'i bsnyen par rdzogs pa lags/ 'gro ba tha dad pa'i ches rnams las 'das pa dang / gnas ngan len la brten cing 'jug pa'i sems dang / yid dang / yid kyi rnam par shes pa las 'das te mi gnyis pa'i chos thos pa ni/ shin tu rab tu byung ba'o/ /sems can gang tha dad pa 'di lta bus rab tu byung ba de ni/ yang dag par rab tu byung ba'o/ /gang rab tu byung yang tshul khrims dang / spyod yul dang / 'tsho ba dang / lta ba dang / bsam pa nyams pa ste/ de ni/ mgo dang kha spu bregs kyang don med pa ste/ rnyog pa 'chang bas rang rnyog pa des ngan song du gzhol ba yin no| /ngas dad bas byin pa spyod du gnang ba ni/ rigs pas grol ba ste/ dge slong gang brtson pa mi 'dor ba des gzugs mi 'dor/ tshor ba dang / 'du shes dang / 'du byed dang / rnam par shes pa mi 'dor/ phung po lnga tha dad pa dang / ril gyis brtags pa'i rang bzhin bas na/ mi rtag pa dang / sdug bsngal ba dang / stong pa dang / bdag med par lta ba de dag kyang mi dmigs pa'i tsul gyis khams dang / skye mched rnams ma yin par spro ba dam par byed pas 110b rtag tu sgom mo/ /snying po med pa dang / 'brum pa can/ zug rdu can dang ldan pas skyon can/ pha rol po slu ba'i chos nyid ces sun 'byin pa de dag kyang mi dmigs pa'i tshul du sbyor bas/ gang lus kyis lus la sred pa dang / lus la byasma pa dang / lus la bdag yid ches pa dang / lus la zhen pa de dag rab tu spong ngo / /gang 'di lta bu'i dge slong ni/ dge bar gsungs pa'i chos dang 'du las la rab tu byung bar gyur/ dad pas bsnyen par rdzogs pa'i yang dag par rdzogs pa yin te| 'di lta bu'i dge slong ni/ lha dang 'jig rten du bcas pa rnams kyi sbyin gnas su gyur pa'o/ /de nas byams pa byang chub sems dpas 'jig rten gyi dbang po byang chub sems dpa' la smras pa/ bcom ldan 'das kyis ci las dgongs te 'gro ba tha dad pa'i chos rnams las 'das shing 'jig rten las 'das pa'i chos rnams thob pa de ni/ dge bar gsungs pa'i chos dang 'dul ba la rab tu byung bar gyur/ bsnyen par rdzogs pa'i yang dag par rdzogs pa zhes gsungs/ gzhan gang zhig rab tu byung zhing bsnyen par rdzogs kyang bdag bslus pa ste/ pha bang ltar byi ba'ang ma yin/ bya'ang ma yin pa bzhin du de ni/ khyim pa'ang ma yin/ rab tu 111a @#/ /byung ba'ang ma yin pas na glen pa'i skyes bu de de lta bu'i tshul du zungs shig /skyes bu dam pa 'gro ba tha dad pa'i chos de dag ni/ sgyu ma lta bu ste| de las 'da' bar yang mi nus/ 'gro ba tha dad pa'i chos ni/ yongs su ma rdzogs pas na de las 'da' bar yang dka'/ sems can gyi khams ni/ phyi na'ang med/ nang na'ang med de/ gnyis kar yang dmigs su med pas na/ gang sems can gyi khams kyi dngos po de ni/ 'gro ba tha dad pa'i chos kyi dngos po ste/ de las 'da' bar yang dka' ba de la kye rgyal ba'i sras/ bcom ldan 'das kyis 'gro ba tha dad pa'i chos las 'das shing 'jig rten las 'das pa'i chos thob pa'i dge slong de ni/ rab tu byung bar gyur/ bsnyen par rdzogs par yang dag par rdzogs pa ste/ de ni/ dad pas byin pa spyod pa'i mchod gnas su gyur pa'o| |zhes gsungs pa'ang kye rgyal ba'i sras/ rten pa'i gnas med na de la thob pa gang ci ste 'jig rten las 'das pa'i chos rnams 'thob par 'gyur na/ de ni| dmigs par gyur pa'o/ /de bzhin gshegs pa dgra bcom pa yang dag par rdzogs pa'i sangs rgyas kyi chos nyid ni/ mi dmigs pa ste/ bcom ldan 111b 'das kyis kyang 'di ltar dgongs nas 'gro ba tha dad pa'i chos las 'das shing 'jig rten las 'das pa'i chos thob pa de ni/ dge slong yang dag par gyur pa steg dad pas byin pa spyod pa'i mchod gnas so/ /de nas byams pa byang chub sems dpas 'jig rten gyi dbang po byang chub sems dpa' la smras pa/ bcom ldan 'das kyis ci las dgongs te brtson pa mi 'dor ba'i dge slong gang gis gzugs mi 'dor/ tshor ba dang / 'du shes dang / 'du byed dang / rnam par shes pa mi 'dor ba de ni/ rab tu byung ba'i dge slong ste/ de ni/ dge bar gsungs pa'i chos kyi 'dul ba la shin tu rab tu byung bar gyur pas na/ 'di lta bu'i dge slong ni| dad pas byin pa spyod pa'i mchod gnas su gyur pa'o/ /zhes gsungs/ 'jig rten gyi dbang pos smras pa/ kye rgyal ba'i sras/ bcom ldan 'das kyis chos nyid la dgongs te chos kyi dbyings nang na'ang med/ phyi na'ang med de/ gnyi gar yang dmigs su med pas na/ nad med par btags pa dang / mi skye bar btags pa dang / mi 'gag par btags pa rnams gdags su med pa ste/ sems can gyi khams mnyam pa bzhin du chos kyi dbyings mnyam pa nyid/ 112a @#/ /chos kyi dbyings mnyam pa bzhin du sems can gyi khams mnyam pa nyid de/ sems can gyi khams mnyam pa nyid dang / chos kyi dbyings mnyam pa nyid du mi gnyis ste/ gnyis su med do/ /de mi gnyis te gnyis su med pas na/ de la dor ba'ang med/ mi dor ba'ang med/ gang dor ba'ang med| mi dor ba'ang med pas na/ de la 'da' ba dang / thob par mi nus te/ bcom ldan 'das kyis kyang 'di ltar dgongs nas gdags su med pa'i dge slong btags pa la mi 'jug go /gang yi ge med pa'i dge slong yi ge las 'das pa ste/ de la grangs kyis bstan par yang mi rung ste/ de ni/ mi 'ong / mi 'gro/ /mi gnas| mi 'dug /nyal bar yang mi rtog go/ zhi ba dang / nye bar zhi ba rnams mi dmigs pa'i dge slong la brtags pa ste/ spyod pa rnams kyang brtags pa'o/ / log pa la rnam pa mang du rtog pa'i dge slong spyod pa ni/ ma brtags pa'o/ /bcom ldan 'das kyis 'di ltar dgongs nas 'di lta bu'i dge slong ni/ dad pas spyin pa spyod pa'i sbyin gnas su gyur pa'o/ /de nas bcom ldan 'das kyis spyan ras gzigs kyi dbang po byang chub sems dpa' la dge ba byin te/ ngas dgongs 112b te bshad pa bzhin du skyes bu dam pa khyod kyis bstan pa ni/ dge'o dge'o/ /dge bar gsungs pa'i chos kyi 'dul ba la rab tu byung ba 'di bla na med pa dam pa'i chos kyi phyag rgya ste/ 'di tshul khrims nyams pa dang / ma dul ba dang / nga rgyal mngon par byed pa rnams kyi mdun du mi bshad par gyis shig /de lta bu de dag/ rnams kyi snyems pa spang pa'i phyir phyag rgya 'di la gang gis yang dag pa ji lta ba bzhin du shes rab kyis bltas shing mi dmigs pa'i lus mngon du byas na/ des yid kyi lus myur du 'thob bo/ /gang gi yid kyi lus des grangs med pa'i sems can rnams byang chub tu smin par byed do/ /de nas chos kyi gzhung 'di bshad pa'i tshe dge slong bdun stong zag pa med par mi skye ba'i sems rnam par grol bar gyur/ byang chub sems dpa' stong phrag bcu mi skye ba'i chos la bzod pa thob par gyur/ dmigs pa can gyi dge slong lnga brgya chos kyi gzhung 'di mi sgrub cing mi 'jug pa dang / ma dad pas na stan las langs te dong ngo / /bcom ldan 'das ngas dgongs te gsungs pa 'di dag 'jig rten thams cad yid mi ches pa'i gnyen po yin pas na/ chos kyi gzhung 'di dmigs pa dang bcas pa rnams mi mthun pa'o/ /yod pa ma 113a @#/ /yin pa la brten pa rnams dang mi 'gal te/ dge ba'i bshes gnyen gyis bzung ba rnams dang / zab mo'i chos la mos pa rnams dang / skyo zhing chog shes pas bsnyungs te dben pa la mngon par dga' ba rnams dang / sngon gyi sangs rgyas rnams la dge ba'i rtsa ba bskrun pa rnams kyis nga'i chos kyi gzhung 'di la ston par shes so/ /kye rgyal ba'i sras/ 'di lta ste/ dper na/ skyes bu gang zhig gnyid kyis log pa'i rmi lam na 'gro ba mang po'i mdun na smra zhing chos 'chad kyang chos de 'jig rten thams cad las ma grags na/ kye rgyal ba'i sras/ ci 'gro ba mang po de rnams yod de/ gang des sangs rgyas kyi chos bshad pa dang mi 'gal ba snyam du sems sam/ byams pas smras pa/ rmi lam ni/ yang dag par ma mchis pa ste/ 'khrul ba tsam zhing mchis par bas na/ de ngan 'gro phal po che la chos 'chad par gyur pa lta ga la zhig mchis/ kye rgyal ba'i sras/ de ltar de bzhin du chos thams cad ni/ rmi lam dang mtshungs te/ yang dag pa ma yin par 'byung bar byung nas kyang med par gyur pa ste/ kun rdzob kyang 'khrul pa tsam zhig yod kyi don dam par ni/ ma yin no/ /'phags pa'i shes rab kyis ji lta ba 113b mngon du byas na bsam gtan sems pa'i bsam gtan pa'ang mi dmigs pa ste/ de la chos kyi tshul tsam zhig yod kyi kun tu btags pa dang / gzhan gyi dbang las kyi rnams ni/ yod pa ma yin no/ /de ltar de bzhin du chos 'di ni/ 'jig rten pa thams cad dang mi mthun pa'o/ /chos 'di dag la dmigs pa rnams kyis ni/ don dam par 'dzin gyi 'phags pa'i rnams ni/ mi dmigs so/ /byis pa rnams mi shes pas de la mngon par zhen pas na/ dmyal ba dang / yi dwags rnams kyis sdug bsngal gyis nyon mongs pa myong bar 'gyur ro/ /chos kyi gzhung 'di ji lta ba de ni/ dmigs pa'o/ /ji ltar dmigs pa de ni/ chos thams cad do/ /de ltar dus gsum gyi chos thams cad mnyam pa nyid de/ mi dmigs pas na gang dmigs pa de ni/ rtags pa'o/ /gang rtogs pa de ni/ thob pa/ gang thob pa de ni/ byang chub/ gang byang chub pa de ni/ de bzhin nyid/ gang de bzhin nyid pa de ni/ yang dag pa'i mtha'/ gang yang dag pa'i mtha' de ni/ stong pa nyid/ gang stong pa nyid de ni/ mtshan ma med pa| gang mtshan ma med pa de ni/ smon pa med pa/ gang smon pa med pa de ni/ don dam pa/ gang don dam pa de ni/ chos kyi dbyings/ gang chos kyi dbyings de ni/ 114a @#/ /gnyis su med pa'i mtha'/ gang gnyis su med pa'i mtha' de ni/ dbu mar sgrub pa/ gang dbu mar sgrub pa de ni/ yang dag par rdzogs pa'i sangs rgyas kyi chos kyi sku rtag pa/ brtan pa/ mi 'gyur ba ste/ rtag pa'ang ma yin/ mi rtag pa'ang ma yin te/ de ni/ gdags pa'ang ma yin/ mi gdags pa'ang ma yin/ gang gdags pa'ang ma yin/ mi gdags pa'ang ma yin pa de ni/ 'jig rten pa'ang ma yin/ 'jig rten las 'das pa'ang ma yin| gang 'jig rten pa'ang ma yin/ 'jig rten las 'das pa'ang ma yin pa de ni/ brjod du med pa/ gang brjod du med pa de ni/ cung zad kyang med pa / gang cung zad kyang med pa de ni/ sems can rnams kyi bsod nams kyi zhing / gang sems can rnams kyi bsod nams kyi zhing de ni/ ston pa/ gang ston pa de ni/ rnam par mi rtog pa/ gang rnam par mi rtog pa de ni/ dmigs pa med pa/ gang dmigs pa med pa de ni/ mi 'gyur ba grub pa/ gang mi 'gyur ba grub pa de ni/ yid bzhin nor bu rin po che ste/ 'dul ba'i sems can rnams kyi bsam pa thams cad yongs su rdzogs par bya ba'i phyir ji ltar mos pa thams cad byed do/ /de nas byang 114b chub sems dpa' mang po de dag gi tshig mthun par smras pa/ chos kyi gzhung 'di gang na spyod pa'i sa phyogs de rdo rje lta bu ste/ sangs rgyas dang / byang chub sems dpa' rnams bzhugs pas na/ sems can de myur du mngon par shes pa dang / dbang po rnon por 'gyur bar rig par bya'o/ /gang zhig chos kyi gzhung 'di la brjod dam| 'dzin tam/ klog gam/ chub par byed dam/ kha ton du byed dam/ tshul bzhin du yid la byed na/ de bdud kyi dbang du mi 'gyur ro/ /bcom ldan 'das kyis dgongs pa 'di bshad nas 'jig rten gyi dbang po dang / byams pa la sogs pa byang chub sems dpa' rnams dang / nyan thos chen po rnams dang / lha dang mir bcas pa dang / lha ma yin dang / dri za'i 'jig rten rnams bcom ldan 'das kyis bshad pa la mngon par dga'o/ /theg pa chen po'i mdo chos rgya mtsho zhes bya ba rdzogs so|| |