rKTs


H262

(e-text produced by ACIP)

see text in Tibetan script
30b
rgya gar skad du/ AR+Ya A ka sha gar+b+ha nA ma ma hA yA na sU tra/ bod skad du/
31a
@#/ /'phags pa nam mkha'i snying po zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das ri kha la ti ka na gnas thub pa'i drang srong rnams kyi gnas na nyan thos chen po bgrang ba las 'das pa'i dge slong gi dge 'dun chen po dang yang thabs cig go /'di lta ste/ byang chub sems dpa' sems dpa' chen po gang+gA'i klung gi bye ma snyed dpag tu med/ grangs med pa'i byang chub sems dpa'i dge 'dun chen po dang yang thabs cig tu bzhugs te/ de bzhin gshegs pa'i dpal gyi dam tshig lung bstan pa'i mthar phyin ma thag tu'ang de'i tshe na nub phyogs na brgya byin thogs pa'i nor bu rin po che 'bum phrag du mas bskor cing mdun du bdar ba'i yid bzhin gyi nor bu rin po che snang ste/ yang nor bu rin po che de'i 'od kyis stong gsum gyi stong chen po'i 'jig rten gyi khams 'di na gzugs su snang ba thams cad ma lus par mi snang bar gyur te/ de bzhin gshegs pa ma gtogs par gang lha dang / mi rnams dang / gang nyan thos rnams dang / gang byang chub sems dpa' rnams dang / gang sa dang / chu dang / me dang / rlung rnams kyi gzugs su snang ba'i 'byung ba
31b
chen po ji snyed pa'i 'byung ba chen po snang ba de dag thams cad ma lus par spangs par gyur cing nor bu rin po che snang ngo / /lhag ma dag kyang mtha' yas mu med pa/ brjod du med pa| nam mkha' bzhin du snang ngo / /bcom ldan 'das kyang shin tu lham me/ lhan ne/ lhang nger gyur to/ /sems can gang dag der 'dus pa de dag kyang bdag kyang mi mthong ngo / / gcig gis gcig kyang mi mthong ngo / /de dag la 'byung ba chen po'i gzugs su snang ba thams cad 'gags nas yang mig tu snang bar ma gyur to/ /bdag bdag gi lus kyi gzugs dang / mtshan dang / dbyibs dang / rig pa'ang mi dmigs par gyur te/ gang dang gang gis brtags pa de dang de dag stong par mthong ngo / /nyi ma dang zla ba'i dkyil 'khor yang mi mthong / skar ma'i gzugs dang / sa'i khams dang / chu'i khams dang / me'i khams dang / rlung gi khams kyang mig tu snang bar ma gyur to/ /sgra dag kyang rna lam du grag par ma gyur to/ /dri dag kyang sna la bro bar ma gyur to/ /sems dang sems las byung ba rnams la'ang ngar 'dzin pa dang / nga yir 'dzin pa dang / skye mched drug gi 'du shes mi 'byung bar gyur to/ /yang 'byung ba chen po dag kyang mi dmigs par gyur te/ phyogs gang dang gang du brtags pa de dang / de'i phyogs thams cad du de bzhin gshegs pa'i
32a
@#/ /sku'i mtshan dang / kha dog dang / dbyibs dang / gzugs su mthong bar gyur to/ /rgyang ma nas kyang brgya byin thogs pa'i rin po ches bskor ba'i yid bzhin gyi nor bu rin po che snang ba las gzhan cung zad kyang mi snang bar gyur to/ /gang de na byang chub sems dpa' sa bcu la gnas pa/ dpa' bar 'gro ba'i ting nge 'dzin thob pa/ skye ba gcig gis thogs pa/ srid pa tha ma pa de dag gis ltas de mthong nas 'jigs par mi byed/ dngangs par mi byed/ skrag par mi byed de/ chos thams cad rang bzhin gyi sa yang dag pa'i mtha' dang / de bzhin nyid dang / stong pa nyid dang ldan par rtogs pas/ de'i phyir de dag 'jigs par mi byed/ dngangs par mi byed/ skrag par mi byed do| |gang lhag ma byang chub sems dpa' sems dpa' chen po de dag dang / nyan thos dag dang / lha dag dang / klu dang / gnod sbyin dag dang / dri za dag dang / lha ma yin dag dang / nam mkha' lding dag dang / mi 'am ci dag dang / lto 'phye chen po dag dang / grul bum dang / yi dwags dang / sha za dang / srul po dang / lus srul po dang / mi dang / mi ma yin pa 'dus pa de dag ma lus par 'jigs par gyur/ dngangs par gyur/ skyo bar gyur nas tshu rol dang pha rol la rmongs shing sems 'khrugs nas de dag
32b
gcig gis gcig kyang mi mthong / de na 'di ci zhig /'di ji lta bu zhig /'di ci'i rang bzhin zhes dri ba'ang gang yang mi snang ngo / /yang de'i tshe na byang chub sems dpa' sems dpa' chen po tshangs pa'i gzer bu chen po zhes bya bas bcom ldan 'das ga la ba de logs su thal mo sbyar ba btud de gsol pa/ chos kun gyi ni rang bzhin la/ /gang zag gang dag ma 'tshal ba/ /gzugs phung la ni gnas gyur nas/ /dbang po drug la rmongs par gyur/ /phung po gcig ni mi mthong zhing / /gzugs kyi phung la rtog bgyid de/ /'di la gang zag kha cig ni| |sangs rgyas chos la the tshom 'tshal/ /bcom ldan 'das kyis 'di dag la/ /chos kyi de bzhin mtshan nyid gsungs/ /de dag tshu rol pha rol la/ /bzod pa'i nam mkha'i mtshan 'tshal to/ /'di ni mnyam bzhag dpa' ba ste/ /brjod du med pa'i gnas lags so/ /yid bzhin nor bu rin chen che/ /spyi bo la ni mchis par gda'/ /nor bu rin chen brgya byin thogs/ /gang dag la ni rgyang nas gda'/ /sems can de dag skal pa che/ /dpa' 'gro'i pha rol shin tu phyin/ /ston pa lta bar mchis pa rnams/ /de dag thams cad shes rab che/ /de ring 'dir ni zab mo'i gtam/ /mchi bar 'gyur ba gdon mi 'tshal/ /bcom ldan gang dag 'dir phyin pa'i/ /sems can dag la dbugs dbyung mdzod/
33a
@#/ /sems can yongs smin bgyi slad du/ /'di ni dpa' bo' spyod yul lags/ /bcom ldan 'das kyis bka' stsal pa/ ji skad smras pa de bzhin te/ /gang na kun gzhi thos gyur cing / /shes rab kyis ni sems can gnas/ /de ni ting 'dzin spyod yul lo/ /de ni nam mkha'i snying po yi/ /byang chub sems dpa'i spyod yul te/ /snang ba med cing smros med pa'i/ /ting nge 'dzin ni de yis bstan/ /lta ba gnyis la gang chags pa/ /phyi phyir zhing ni rmongs par 'gyur/ /rtag dang chad la chags pa ni/ /pha rol tshu rol shin tu rmongs| |lta ba gnyis po 'di dag las/ /rab tu grol bar su 'dod pa/ /brjod pa med pa sgom par gyis/ /de ni myur du sa thob 'gyur/ /kye grogs po dag /gzhan yang byang chub sems dpa' sems dpa' chen po las thog ma pa la de nyid brjod du yod pa'i 'du shes kyi tshul gyis dmigs pa dang bcas pa'i pha rol tu phyin pa drug brjod par bya ste| 'di lta ste/ ci nas kyang 'byung ba chen po rnams kyi rang bzhin skye zhing 'jigs pa shes par byas nas de'i 'og tu gzod chos thams cad brjod du med pa'i ngo bo nyid mi skye mi 'gag pa/ mi dmigs pa/ cung zad kyang med pa'i 'du byed thams cad bsgom par bya ste/ ci nas kyang rtag ba dang chad pa spangs par 'gyur ba dang / mi 'jigs/
33b
mi dngangs/ mi skrag par 'gyur ba dang / chos thams cad la chags par dmigs pa'i sems su ma gyur par byas na/ de myur du pha rol tu phyin pa drug yongs su rdzogs shing phyin chad kyang chad pa dang rtag pa la mi gnas par 'gyur ro/ /zhes bcom ldan 'das kyis bka' stsal nas 'khor der lhags pa thams cad kyang sngon gzugs kyi snang ba ji ltar mthong ba dang / thos pa dang / rtogs pa dang / shes pa de bzhin du 'khor der mthong bar gyur to/ /de nas bcom ldan 'das kyis phyag g.yas pa brkyang ste 'di skad ces bka' stsal to| |nam mkha'i snying po zhes bya ba'i byang chub sems dpa' sems dpa' chen po ting nge 'dzin rgya mtsho dang mtshungs pa/ byang chub sems dpa' bslab pa ri rab dang mtshungs pa| ye shes nam mkha' dang mtshungs pa/ brtson 'grus rlung dang mtshungs pa/ bzod pa rdo rje dang mtshungs pa/ byang chub sems dpa' thams cad kyi ni/ rgyal mtshan gyi mchog lta bu/ mya ngan las 'da' ba'i gnas su 'gro ba rnams kyi ni/ ded dbon lta bu/ dge ba'i rtsa ba thams cad kyi ni/ gter lta bu/ sdug bsngal ba thams cad kyi ni/ bum pa bzang po lta bu/ mun par bcug pa rnams kyi ni/ nyi ma lta bu/ lam stor pa rnams kyi ni/ zla ba lta bu/ 'jigs pa rnams kyi ni/ ri rab lta bu/ nyon mongs pa'i nad
34a
@#/ /kyis yongs su gdungs pa rnams kyi ni/ sman bcud kyis len pa lta bu/ dge ba'i rtsa ba chad de ltung ba rnams kyi ni/ 'khar ba lta bu/ phreng bas 'tsho ba rnams kyi ni| me tog lta bu/ sdom pa spyod pa rnams kyi ni/ me long lta bu/ ngo tsha shes pa dang khrel yu do pa rnams kyi ni/ gos lta bu/ mya ngan las 'da' bar 'gro ba rnams kyi ni/ stegs lta bu| pha rol tu 'gro ba rnams kyi ni/ gu lta bu/ mtho ris su 'gro ba rnams kyi ni/ them skas lta bu/ tshigs ngan pa dang skur pas gdungs pa rnams kyi ni /gdugs lta bu/ pha rol gyi rgol ba rnams kyi ni/ seng+ge lta bu/ char pa rnams kyi ni/ chu lta bu/ bdud kyi dgra rnams kyi ni/ go cha lta bu/ slabs pa 'khrul pa rnams kyi ni/ mig 'byed pa lta bu/ dge ba'i rtsa ba'i lo tog thams cad kyi ni/ sa lta bu/ nad pa rnams kyi ni/ smad pa lta bu/ bkres pa rnams kyi ni/ 'bru lta bu/ skom pa rnams kyi ni/ chu shel lta bu/ ngad pa rnams kyi ni| mal lta bu/ ting nge 'dzin dang ldan pa rnams kyi ni/ me shel lta bu/ byang chub kyi lam du zhugs pa rnams kyi ni/ shing rta lta bu/ skyed mos tshal na rtse ba rnams kyi ni/ rdzing bu lta bu/ byang chub kyi phyogs la brtson pa rnams kyi ni/ phrang ba lta bu de tshur 'ong ste/ rigs kyi bu de pha rol tu phyin pa rnams kyi ni/ 'bras bu lta bu/ rigs kyi bu de
34b
sa bcu dang ldan pa rnams kyi ni/ nor bu yid bzhin lta bu/ rigs kyi bu de dpa' bar 'gro ba'i ting nge 'dzin dang ldan pa rnams kyi ni/ shing yongs 'du dang 'dra ba/ gcod pa'i phyir lta ba ngan pa'i sbyor ba thams cad kyi ni/ mtshon lta bu/ 'joms pa'i phyir bag chags kyi mtshams sbyor ba'i nyon mongs pa thams cad kyi ni/ rdo rje lta bu/ bdud rnams kyis ni/ thub par dka' ba/ thabs dang ldan pa rnams la ni/ tshes grangs/ ye shes kyi ni/ 'byed pa/ sangs rgyas kyi chos thams cad kyi ni/ gnas/ rang rgyal ba rnams kyi ni/ phreng ba dang mtshungs pa/ nyan thos thams cad kyi ni/ gos dang mtshungs pa/ lha rnams kyi ni/ mig lta bu/ mi rnams kyi ni/ lam lta bu/ dud 'gro'i skye gnas su skyes pa rnams kyi ni/ skyabs/ yi dwags rnams kyi ni/ rten/ sems can dmyal ba pa rnams kyi ni/ mgon/ sbyin gnas kyi sems can thams cad kyi ni/ snod du gyur ba/ byang chub sems dpa' thams cad kyi ni| shing rta lta bu/ rigs kyi bu de dus gsum du gshegs pa'i de bzhin gshegs pa dgra bcom pa yang dag par rdzogs pa'i sangs rgyas thams cad kyi ni/ blon po lta bu/ chos kyi grong khyer gyi ni/ sgo srung yin te/ rigs kyi bu de sangs rgyas kyi chos ma 'dres pa bco brgyad kyi bar gyis ni/ brgyan pa/ thams cad rdzogs pa'i sangs rgyas kyi ye shes
35a
@#/ /dang ni| ldan/ rigs kyi bu de de bzhin gshegs pa ma gtogs par sems can thams cad kyis mchod pa'i dam pa thams cad kyis mchod par bya ba yin gyi| da khyed 'dir lhags pa thams cad kyis bsu bar gyis shig /mchod pa dang bkur sti thams cad kyis de la ci nus par rin po che'i gdugs dang / rgyal mtshan dang / ba dan dang / me tog dang / spos dang / phreng ba dang / byug ba dang / lha'i gos dang / rgyan dang / snod sna tshogs kyis bkur stir gyis shig/ rim gror gyis shig/ bsti stang gyis shig /mchod par gyis shig /lam byi dor gyis shig/ rgyan par gyis shig/ bstod pa sna tshogs kyis bstod par gyis shig /khyed thams cad kyang de lta bu'i yon tan thos pa dang / snod du gyur par ring po mi thogs par 'gyur ro/ /de nas 'khor lhags pa ma lus pa mtha' dag stan las langs nas byang chub sems dpa' sems dpa' chen po nam mkha'i snying po phyogs gang logs na snang ba'i phyogs de logs su mngon du phyogs nas thal mo sbyar te snying ni/ rab tu dga'/ bzhin ni/ rab tu 'dzum/ mig kyang rab tu dang bas lta zhing 'dug par gyur pa dang / 'khor de na byang chub sems dpa' sems dpa' chen po dang / nyan thos chen po dang / lha'i dbang po dang
35b
klu'i dbang po dang / gnod sbyin gyi dbang po dang / dri za'i dbang po dang / lha ma yin gyi dbang po dang / nam mkha' lding gi dbang po dang / mi'am ci'i dbang po dang / lto 'phye chen po'i dbang po dang / drang srong mngon par shes pa lnga dang ldan pa de dag thams cad 'di snyam du sems par gyur te/ bdag cag gis rigs kyi bu 'di la bkod pa'i mchog ji lta bu zhig gis bkur sti bya snyam mo/ /de nas de'i tshe byang chub sems dpa' sems dpa' chen po nam mkha'i snying pos sangs rgyas kyi zhing mi mjed 'di thams cad ma lus par rin po che sna bdun las byas shing / ri dang| 'brog dang / ri skam dang / phug dang / grog po dang / g.yang sa dang / rtswa dang| rtsig pa dang / bong ba dang / gseg ma dang / dri nga ba la sogs pa/ med la lag mthil lta bur mnyam par sprul to/ /des dpal dri za'i skad du brjod pa'i glu dbyangs dang / shing thams cad kyang rin po che sna bdun las byas te/ dri zhim pa dang / 'dab ma dang / me tog dang / 'bras bu dang ldan par sprul to/ /shing ljon pa dang / rtswa dang / skam shing dang / 'dab ma sa la brten pa thams cad kyang rin po che sna bdun las byas pa sprul to/ /mi mjed kyi 'jig rten gyi khams 'di thams cad na'ang nad ni/ rab tu zhi/ sems can dmyal ba pa dang| dud 'gro'i skye gnas pa dang / gshin rje'i 'jig
36a
@#/ /rten pa rnams kyi sdug bsngal thams cad kyang rab tu zhi/ sems can dag gis kyang zas dang / skom dang / gos dang / chos gos dang / rgyan dag thong bar gyur to| |de'i tshe gang dag mi mjed kyi 'jig rten gyi khams su gtogs pa'i sems can de dag thams cad kyang bsam pa yongs su rdzogs par gyur te/ gzugs bzang ba/ mdzes pa| blta na sdug pa/ kha dog bzang po rgyas pa mchog dang ldan zhing yan lag thams cad ni/ yongs su rdzogs/ rdul med pa rab rib dang bral ba'i snang ba'i dkyil 'khor gyi 'od kyis ni/ mdzes par byas/ nyon mongs pa rnams dang ni/ bral/ sems ni/ rab tu zhi/ dge ba thams cad la ni/ sems mos/ dkon mchog gsum la ni/ sems rab tu dad par gyur nas 'khor der lhags pa'i sems can de re re'i lag pa gnyis ka na'ang nor bu rin po che thogs par mngon par sprul nas nor bu rin po che de re re las kyang so so dang 'tsham pa'i 'od zer gyi snang ba byung bar gyur te/ mi mjed kyi 'jig rten gyi khams 'di thams cad ma lus par snang ba chen po des khyab par gyur to/ /nor bu rin po che de dag las kyang rol mo'i sgra sna tshogs byung bar gyur to/ /nor bu rin po che sna tshogs kyi char yang mngon par bab par gyur to/ /gos bzang po sna tshogs kyi char dang
36b
rgyan sna tshogs kyi char dang / me tog sna tshogs kyi char dang / spos sna tshogs kyi char dang / phreng ba sna tshogs kyi char dang / gdugs sna tshogs kyi char dang / snod sna tshogs kyi char dang / 'bras bu sna tshogs kyi char yang bab par gyur to/ /lha'i gos dang / gser gyi skud pa dang / mu tig gi se mo do dang / me tog pad+ma dang / ut+pa la dang / ku mu da dang / pad+ma dkar po dang| u ra ga sa la dang / tsan+dan sbrul gyi snying po dang / shing ta ma la'i 'dab ma dang / tsan+dan sa mchog pa'i phye mas lam der bkram par mngon par sprul to/ /lam de'i g.yas g.yon gnyis kar rnam par rgyal byed kyi khang ba dang 'dra ba/ rin po che sna bdun gyi khang bzang yang mngon par sprul nas khang pa de na 'dod pa'i dbang phyug gi chung ma dam pa dang / slas dang 'dra ba dang / yan lag lnga dang ldan pa'i sil snyan sgrog cing rtse dga' zhing dga' mgur spyod pa de 'dra ba dag der sprul to/ /bcom ldan 'das kyi dbu'i steng gi nam mkha' la lha'i nor bu rin po che las byas pa'i tshangs pa chen po'i gdugs lta bu dpag tshad brgya tsam la rin po che'i dra ba'i skud pa dang / mu tig gi rgyan phreng gis legs par brgyan pa mngon par sprul te/ rgyan de dag las kyang lha las 'das pa'i sil snyan man lag lnga dang ldan pa'i glu'i dbyangs kyi sgra 'byung ngo / /rtswa dang / shing dang / 'dab ma
37a
@#/ /dang / me tog dang / 'bras bu la sogs pa gang ci'ang rung ste sa la brten pa de dag thams cad las kyang lha las 'das pa'i yan lag lnga dang ldan pa'i sil snyen las bstod pa'i sgra 'byung bar grag ste/ sgra de gang gi rnar thos pa'i sems can de dag bla na med pa yang dag par rdzogs pa'i byang chub las phyir mi ldog par gyur to/ /de nas 'khor de dag thams cad kyis byang chub sems dpa' sems dpa' chen po nam mkha'i snying po'i bkod pa chen po de mthong ste/ shin tu ngo mtshar dang / rmad du byung ba'i chos thob nas de dag 'di snyam du sems te/ bcom ldan 'das kyi spyan sngar skyes bu dam pa de'i stan ji lta bur bsham snyam mo/ /de nas de'i tshe bcom ldan 'das kyi spyan sngar rin po che las byas pa'i me tog pad+ma sdong bu ni/ dngul/ lo ma ni/ gser/ snying po ni/ rin po che rngo'i snying po/ /ze ba ni/ nor bu rin po che tshangs pa'i 'od zer las byas pa/ rgyar ni| rgyang phrags gcig tsam yod pa/ me tog pad+ma'i ze ba'i stan rnam pa 'bum phrag dums yongs su bskor cing mdun du bdar ba'i pad+ma byung nas pad+ma'i steng de la byang chub sems dpa' sems dpa' chen po nam mkha'i snying po skyil mo krung bcas te 'dug par snang ngo / /de'i spyi bo la'ang nor bu rin po che 'dug par snang ngo / /de bzhin
37b
du byang chub sems dpa' sems dpa' chen po nam mkha'i snying po'i g.yog byang chub sems dpa' sems dpa' chen po dpa' bar 'gro ba'i ting nge 'dzin thob pa brgya byin thogs pa'i nor bu rin po ches brgyan pa 'bum phrag mang po rnams kyang rang rang gi pad+ma'i ze ba'i stan la 'khod par snang ngo / /de nas de'i tshe byang chub sems dpa' sems dpa' chen bo byams pas byang chub sems dpa' sems dpa' chen po sman gyi rgyal po la 'di skad ces smras so/ /byang chub sems dpa' grags chen rnams/ /gang dag sngon du 'ongs pa ni| |gus dang ldan pas phyag byas te/ /phyi nas stan la 'dug byed na/ /skyes bu dam pa 'di 'ongs nas/ /bkod chen dag kyang bstan gyur na/ /ston la phyag kyang ma btsal bar/ / stan la 'dug pa lta bur snang / /sman gyi rgyal pos smras pa/ skyes bu dam pa 'di nyid ni/ /sangs rgyas chos la rab gnas mthong / /rtog pa kun la mi gnas pas/ /sems can du ni mi mthong ngo / /byang chub sems dpa' byams pas smras pa/ yang dag mtha' la gnas pa'i phyir/ /de ltar sems can mi mthong na/ /bkod pa che 'di ci phyir bstan/ /the tshom gyur pa bshad pa mdzod/ /sman gyi rgyal pos smras pa/ kun tu rtog pa'i spyod yul can/ /byis pas don dam mi shes te/ /sems can yongs smin bya ba'i phyir/ /'di ni
38a
@#/ /dpa' bo'i thabs yin no/ /don dam gyis ni sdug bsngal ba/ /de dag rab tu dgrol ba'i phyir/ /mkhas pas kun rdzob bden pa yis/ /'di 'dra ba yi bkod pa bstan/ /de nas bcom ldan 'das kyis byang chub sems dpa' sems dpa' chen po sman gyi rgyal po la legs so/ /zhes bya ba byin te legs so legs so/ /skyes bu dam pa khyod kyis ji skad smras pa de bzhin te/ byis pa so so'i skye bo sems can thams cad ji snyed pa de dag thams cad kyis kyang rgyun tu zhugs pa gcig gis spyod yul dang / sbyor ba dang / rnam par grol ba mi shes so/ /yongs su brtag pa bzung na gal te sems can thams cad rgyun tu zhugs par gyur na'ang de dag gis lan gcig phyir 'ong ba gcig gi spyod yul dang / sbyor ba dang / rnam par grol ba mi shes so/ /de bzhin du lan gcig phyir 'ong ba rnams kyis kyang phyir mi 'ong ba dang / phyir mi 'ong ba rnams kyis kyang dgra bcom pa dang / dgra bcom pa rnams kyis kyang rang sangs rgyas kyi mi shes te/ gal te sems can thams cad bse ru lta bu'i rang sangs rgyas su gyur kyang de dag thams cad kyis byang chub sems dpa'i mi skye ba'i chos la bzod pa thob pa gcig gi spyod yul dang / rnam par grol ba dang / don dam pa la brtag pa dang / sems can yongs su smin par bya ba'i
38b
sbyor ba ma shes so/ /yongs su brtag pa bzung na/ gal te sems can thams cad mi skye ba'i chos la bzod pa thob par gyur kyang de dag gis byang chub sems dpa' so so rig pa thob pa| dpa' bar 'gro ba'i ting nge 'dzin thob pa gcig gi spyod yul dang / mos pa dang / don dam pa'i bden pa la brtag pa'i byin gyi rlabs mi shes so/ /rigs kyi bu byang chub sems dpa' sems dpa' chen po nam mkha'i snying po 'di'ang mi skye ba'i chos la bzod pa thob/ so sor rig pa thob/ dpa' bar 'gro ba'i ting nge 'dzin thob nas bskal pa dpag tu med pa 'das te/ ji ltar da ltar nga'i 'dus pa chen po na 'khod pa'i sems can rnams kyi bsam pa dang bag la nyal shes nas ji ltar 'di na sems can kha cig bkod pa chen po 'di'i phyir 'ong zhing ting nge 'dzin dang / bkod pa chen po blta ba'i phyir 'dod chags dang bral ba'i sa la gnas par 'gyur ba dang / ji ltar rigs kyi bu de 'di nyid du mi snang bar gyur nas nub phyogs nas 'ong zhing / nyan thos dang / rang sangs rgyas rnams dang thun mongs ma yin pa/ mtha' yas pa'i nam mkha' mtha' yas skye mched kyi mngon par shes pa dang / ting nge 'dzin kyang bstan/ sems can thams cad kyang skyo bar byas nas de'i 'og tu sems can dpag tu med pa yongs su smin par bya ba'i phyir kun rdzob kyi bden pas sgrub pa'i
39a
@#/ /bkod pa chen po'ang bstan/ ting nge 'dzin gyi bkod pa chen pa'ang bstan pa bzhin no/ /gal te rigs kyi bu de don dam pa'i bden pa mi skye ba'i bkod pa ston du zin na| lha ngang bcas pa'i 'jig rten rmongs par 'gyur/ bslad par 'gyur ro/ /byang chub sems dpa' sa brgyad pa la gnas pa'i bar du'ang bslad par 'gyur bas 'di'i spyod yul dang / sbyor ba'i mtshan ma ston par mi nus te/ de ltar chos zab mo'i yon tan la gnas so/ /rigs kyi bu de ni/ thabs shes pa la gnas so/ /sangs rgyas kyi chos rgya mtsho thams cad la gnas so/ /the tshom med do/ /ye shes gzhan la rag ma las pa la mkhas so/ /byang chub sems dpa' thams cad kyi rgyal mtshan gyi mchog rgyal po la 'os pa dang 'dra'o| |rigs kyi bu byang chub sems dpa' nam mkha' snying po de ni/ sems can thams cad mtho ris dang / thar par skye bar ston pa'o/ /sems can thams cad kyi sems kyi nyon mongs pa'i nad las yongs su thar par byed pa'o/ /lus kyi dug 'byung ba chen po'i nang gsol bar byed pa'o/ /sems can gang dag lta ba ngan pas sdug bsngal bar gyur pa'i 'khor ba'i 'brog slad nas mtho ris dang thar par gnas pa'i thabs mi shes pa de dag kyang gal te byang chub sems dpa' nam mkha'i snying po'i ming rjod
39b
par byed pa'o/ /phyag 'tshal bar byed/ dri 'bul/ a ga ru'i bdug pas bdug par byed na/ rigs kyi bu de na/ de dag gi bsam pa dang / bag la nyal ba dang / de dag gi nyon mongs pa dang ldan pa'i lta ba sems dang 'brel ba ci 'dra ba dang / sngon gyi dge ba'i rtsa ba bskyed pa 'dra ba la'ang rtog cing sems sbyang ba ji lta bur bya ba'i rigs pa dge ba'i rtsa ba sangs rgyas la bskyed pa'am/ chos la bskyed pa'am/ dge 'dun la bskyed pa'am/ bsod nams bya ba'i dngos po sbyin pa'i rang bzhin nam/ tshul khrims kyi rang bzhin nam| sgom pa'i rang bzhin yang rung ste/ de dag thams cad rmi lam ma'ang rung / sad pa'i tshe'ang rung ste/ de bzhin du thabs mkhas pas mngon sum du lam drang po'i thabs kyis ston te| thabs des lta ba ngan pa dang / byed pa dang / smon lam ngan pa'i bsam pa dang / skyabs ngan pa dang / ngan par 'jug pa'i sems las myur du thar par byed do/ /ci nas kyang de'i lus dang / ngag dang / yid kyi sbyor ba drang por 'gyur ba dang / smon lam drang po dang / dge ba'i bshes gnyen drang po dang bsten par 'gyur ba dang / myur du dri mi zhim pa dang / nyon mongs pa dang / sdig pa'i lta ba las yongs su thar par 'gyur ba dang / de dag gi ngan song du 'gro ba'i sdig pa'i lam thams cad smon lam gyi dbang dang /
40a
@#/ /legs par spyad pa'i las kyis myur du byang bar 'gyur ba dang / de dag myur du bdag gi sems la dbang thob par 'gyur ba dang / zab mo'i bzod pa la gnas par 'gyur ba'i thabs ston to/ /gang yang sems can lus la nad sna tshogs kyis gzir ba dang / gang yang sems g.yengs pa dang / gang dag gi mig gi bar chad byas pa dang / lce bcings pa dang / gang dag gi yan lag gang yang rung ba zhig nyams par gyur na/ gal te de dag gi nad rab tu zhi bar byed pa dang / nad med pa thob par bya ba'i phyir snying thag pa nas byang chub sems dpa' sems dpa' chen po nam mkha'i snying po'i ming nas rjod par byed cing a ga ru dang / rgya spos kyis bdugs nas skyes bu dam pa nam mkha'i snying po la phyag btsal nas rigs kyi bu de ni/ de dag gi rmi lam na bram ze'i gzugs kyis mdun du 'dug gam/ brgya byin gyi gzugs sam/ dpal gyi gzugs sam/ dbyangs can gyi gzugs sam/ rgyal rigs kyi gzugs sam/ blon po'i gzugs sam/ dpa' bo'i gzugs sam/ sman pa'i gzugs sam/ pha'i gzugs sam/ ma'i gzugs sam/ khye'u'i gzugs sam/ bu mo'i gzugs kyis rmi lam na nad pa'i mdun du 'dug ste/ de'i nad zhi bar bya ba'i phyir sman dang yo byad du gyur pa thams cad de bzhin du ston cing
40b
nad pa'i sbyor ba gcig gis nad thams cad zhi bar 'gyur ro/ /de bzhin du gang zhal ta dang / longs spyod 'dod pa dang / gang kha ton dang thos par 'dod pa dang / gang dben par 'dod pa dang / gang bsam gtan la bsam gtan byed pa dang / shes rab 'dod pa dang / gang yang grags pa 'dod pa dang / gang bzo sbyong bar 'dod pa dang / gang dbang phyug 'dod pa dang / gang gzugs 'dod pa dang / gang nor 'dod pa dang / gang dam pa 'dod pa dang / gang rigs 'dod pa dang / gang bu 'dod pa dang / gang g.yog 'dod pa dang / gang yon tan 'dod pa dang / gang sbyin pa 'dod pa dang / gang tshul khrims 'dod pa nas gang shes rab kyi bar du 'dod pa dang / gang tshig 'jam po 'dod pa dang / gang sems can rnams dang mthun par 'dod pa dang / gang sdig pa las thar par bya bar 'dod pa dang / gang sbyin pa la gzhog par 'dod pa nas shes rab la gzhog pa'i bar du 'dod pa dang / tshe ring bar 'dod pa dang / longs spyod 'dod pa dang mi 'bral bar 'dod pa dang / sems can ser sna can rnams gtong ba la gzhog par 'dod pa dang / tshul khrims 'chal pa dag tshul khrims la gzhog par 'dod pa dang / le lo can dag brtson 'grus la gzhog par 'dod na/ de dag la rigs kyi bu 'di ni/ thabs ston par byed do/ /gang snying rje chen po dang ma bral zhing bdag la
41a
@#/ /lta zhing sems can thams cad la btang snyoms su byed la/ bdag gis thabs gang gis sems can 'di dag bla na med pa yang dag par rdzogs pa'i byang chub la sems gzhag pa dang / thabs mkhas pa la dgod pa dang / tshangs pa'i gnas bzhi nas snying rje chen po'i bar la dgod par bya snyam du sems pa des byang chub sems dpa' nam mkha'i snying po la phyag bya'o/ /dgon pa'am/ dbye'am/ bla gab med par a ga ru dang / rgya spos dang / dus kyi rjes su 'brang bas bdug par bya'o/ /thal mo sbyar te phyogs mtshams kun tu yang lag lngas phyag 'tshal nas sngags kyi tshig 'di bzlas par bya'o/ /tad+ya thA/ su mri sha/ su mri sha/ kA ru Ni ka/ tsa ra tsa ra/ bi tsa ra/ saM tsa ra/ kA ru Ni ka/ mu ra mu ra/ be ga d+ha ri/ ma tsa me/ b+hu dza pA da/ ma hA kA ru Ni ka/ tsin+ta ma ni pU rA ya/ kA ru Ni ka /sarba sha me s+tha pA ya/ a dz+nyA d+hA ri/ spu gung s+phu gung / ru ti bi be ka gung dri Sh+Ti bi be ka gung / pU ra ya kA ru Ni ka/ pU rA ya na tu ma ma/ a sha sarba pa na tha tsa/ a sho ka ga ti swAhA/ sngags 'di lan du mar bzlas te nyal bar bya'o/ /rigs kyi bu de ni/ de la ma'i gzugs sam/ ri dwags kyi gzugs sam/ bya'i gzugs sam/ bdag nyid du ston pa'am/ de'i bsod nams kyi skal pa ji lta ba de 'dra ba'i gzugs sam/
41b
chag gas de la tshul gcig pa de 'dra ba'i thabs ston par byed de/ thabs gcig po des sems can khrag khrig brgya phrag stong du ma dag yongs su smin par byed nus so/ /gang theg pa la mi gnas pa dang / gang nyan thos kyi theg pa la gnas pa dang / rang sangs rgyas kyi theg pa la gnas pa'i sems can dag des thang gcig yud tsam dang ldan pa'i shes rab dang / thabs cung zad kyis kyang bla na med pa'i theg pa chen po la phyir mi ldog par gzhog pa nas ting nge 'dzin dang / gzungs dang / bzod pa sna tshogs dang / sa bcu la gzhog pa'i bar du nus te| de ltar byang chub sems dpa' sems dpa' chen po nam mkha'i snying po de ni/ thabs dang / ye shes dang / snying rje chen po bsam gyis mi khyab pa dang ldan no/ /rigs kyi bu/ nam mkha'i tshad ni/ la las gzung nus kyi/ rigs kyi bu de'i thabs dang / ye shes dang / byams pa chen po dang / snying rje chen po dang / ting nge 'dzin gyi stobs bskyed pa dang / sems can yongs su smin par byed pa'i tshad gzung bar ni/ mi nus te/ de ltar byang chub sems dpa' sems dpa' chen po nam mkha'i snying po de ni/ yon tan bsam gyis mi khyab pa dang ldan no/ /rigs kyi bu sems can gang g.yo med pa/ sgyu med pa/ yang dag pa'i nan tan dang ldan pa/ lta ba rang po dang ldan pa/ gzhan mi smod pa/ bdag mi bstod pa/
42a
@#/ /phrag dog dang ser sna spangs pa/ tshul 'chos pa med pa/ lhag pa'i bsam pa dang ldan pa de dag la ni/ rigs kyi bu 'di snying brtse bar byed de/ thabs dang / ye shes dang / brtson 'grus dang / rtul bas thabs kyang ston cing sems can de thabs dang / ye shes dang / brtson 'grus dang / rtul ba des de 'dra ba'i sdug bsngal las yongs su thar pa dang / bla na med pa yang dag par rdzogs pa'i byang chub tu sems skye bar byed do/ /dge ba'i rtsa ba thams cad kyang byang chub tu bsngo bar byed de/ bla na med pa yang dag par rdzogs pa'i byang chub las kyang phyir mi ldog par 'gyur ro/ /mthu dang / brtson 'grus dang / rtul ba chen po de sa pha rol tu phyin pa drug yongs su rdzogs par bya ba'i phyir spro ba dang / rtul ba chen por 'gyur/ myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur te/ de ltar byang chub sems dpa' sems dpa' chen po nam mkha'i snying po de ni/ yon tan gyi chos dang rtul ba bsam gyis mi khyab pa dang ldan pa sems can thams cad yongs su smin par byed pa'o/ /de nas bcom ldan 'das la byang chub sems dpa' byams pas 'di skad ces gsol to/ /bcom ldan 'das/ rigs kyi bu 'di ci'i slad du yan lag
42b
gi dam pa mgo bo la yid bzhin gyi nor bu rin po che 'chang zhing de shin tu lha ma me/ lhang nger dga' la byang chub sems dpa' gzhan dag la de ltar ma lags/ bcom ldan 'das kyis bka' stsal pa/ rigs kyi bu/ byang chub sems dpa' sems dpa' chen po nam mkha'i snying po 'di ni/ snying rje chen po dang ldan pa/ sems can la phan pa'i phyir zhugs pa/ sdug bsngal chen po las thar par byed pa ste/ sems can gang dag ltung ba'i rtsa ba 'byung ba/ ngan song du 'gro ba/ dge ba'i rtsa ba thams cad sprug par byed pa| 'jig par byed pa'i sems can de dag la rigs kyi bu 'di ni/ smad du gyur pa'o/ /ma rig pa'i mun pa mun nag dang / lta ba ngan ba'i sdug bsngal bar gyur pa rnams la ni| 'di nyi ma dang mtshungs pa'o/ /ltung ba'i rtsa ba 'chags su 'jug pa'o/ /de dag gi snying la the tshom yod pa dang 'bral bar byed pa'o/ /gang dag gi snying gi snod chag par gyur pa| ltung bar gyur pa thas pha ma pa'i sems can dge ba'i chos thams cad zhig par gyur pa/ ngan song du 'gro ba/ mgon med pa/ rten med pa/ mkhas pa thams cad kyis spangs pa rnams la ni/ rigs kyi bu 'di mkhar ba dang mtshungs pa'o/ /lam ston pa'o/ /sdig pa thams cad dang / dri mi zhim pa thams cad ston par byed pa 'khru bar byed pa'o/ /'gro
43a
@#/ /ba ngan ba'i lam las zlog par byed pa'o/ /shing rta dang mtshungs pa'o/ /mtho ris dang thar pa la 'jog par byed pa'o/ /rigs kyi bu 'di ni/ sems can gang dag sems shin tu 'dod par 'jug pa dang / gang dag shin tu khro ba dang / gnod sems dang / gnod ba 'chab pa dang / ser snas sems 'khrugs par gyur pa dang / gang dag shin tu gti mug gis mun par song ba dang / rgyu med par smra ba dang / 'jig rten pha rol gyis mi 'jigs par lta ba dang / gang dag nor gsog pas chog mi shes pa dang / gang dag mi dge ba'i chos bcu'i bar dang rtag tu shin tu ldan pa'i sems can de dag gi ngan song gi sgo gcod par byed pa nas shing rta dang mtshungs pa'i bar du yin te/ sems can rnams mtho ris dang thar pa la gzhog par byed pa'o/ /de bas na/ de bzhin gshegs pa dgra bcom pa yang dag par rdzogs pa'i sangs rgyas rnams ma gtogs par rigs kyi bu 'di ni/ lha dang bcas pa'i 'jig rten gyis mchod par bya ba yin/ byang chub sems dpa' byams pas gsol pa/ bcom ldan 'das/ ltung ba'i rtsa ba gang dang ldan na/ sems can rnams dge ba'i rtsa pa \?\sprug par bgyid cing ngan song du mchi bar 'gyur ba dang / ltung ba'i dngos por 'gyur zhing lha dang mi'i
43b
bde ba thams cad las phas pham pa de la rigs kyi bu 'di mtho ris dang thar pa'i bde bas tshim par bgyid pa'i ltung ba'i rtsa ba de dag gang lags/ bcom ldan 'das kyis bka' stsal pa/ rigs kyi bu/ rgyal rigs rgyal thabs spyi bo nas dbang bskur ba'i ltung ba'i rtsa ba ni/ lnga ste/ ltung ba'i rtsa ba de dang ldan na/ rgyal rigs rgyal thabs spyi bo nas dbang bskur ba'i sngon gyi dge ba'i rtsa ba thams cad sprug par 'gyur/ ltung ba'i dngos por 'gyur/ lha dang mi'i bde ba thams cad las phas pham par 'gyur/ ngan song du 'gro bar 'gyur ro/ /lnga gang zhe na/ rigs kyi bu/ rgyal rigs rgyal thabs spyi bo nas dbang bskur ba mchod rten gyi rdzas 'phrog par byed/ dge 'dun gyi'am/ phyogs bzhi'i dge 'dun la phul ba 'phrog par byed dam/ 'phrog tu 'jug par byed pa 'di ni/ ltung ba'i rtsa ba dang po'o/ /gang yang chos spong bar byed de/ nyan thos kyi nges par 'byung ba bshad pa'am/ rang sangs rgyas kyi nges par 'byung ba bshad pa'am/ theg pa chen po'i nges par 'byung ba bshad pa spong bar byed/ 'gog par byed/ sbed par byed pa 'di ni| ltung ba'i rtsa ba gnyis pa'o/ /gang yang nga'i phyir skra dang kha spu bregs nas gos ngur smrig bgos pa bslab pa 'dzin kyang rung / bslab pa mi 'dzin kyang rung / tshul khrims
44a
@#/ /'chal kyang rung / tshul khrims dang ldan yang rung ste/ de'i gos ngur smrig dag 'phrog cing khyim par byed dam/ lus la chad pas gcod par byed dam/ btson rar 'jug par byed/ srog dang 'bral bar byed pa 'di ni/ ltung ba'i rtsa ba gsum pa'o/ /yang rgyal rigs gang gis ched du bsam ste ma'i srog gcod /pha \?\ dang / bcom ldan 'das kyi nyan thos dgra bcom pa'i srog gcod par byed/ dge 'dun 'dus pa 'byed par byed/ ched du bsam nas de bzhin gshegs pa dgra bcom pa yang dag par rdzogs pa'i sangs rgyas la ngan sems kyis khrag 'byin par byed na/ mtshams med pa'i las lnga po 'di dag las las gang yang rung bzhig 'byung bar byed pa 'di ni/ ltung ba'i rtsa ba bzhi pa'o/ /yang rgyal rigs gang rgyu med par smra bar 'gyur/ 'jig rten pha rol yal bar 'dor bar byed/ mi dge ba'i las kyi lam bcu blangs shing 'jug par byed/ sems can mang po gzhan dag kyang mi dge ba'i las kyi lam bcu yang dag par 'dzin du 'jug /'dul bar byed/ 'jug par byed/ 'jog par byed pa 'di ni/ ltung ba'i rtsa ba lnga ba ste/ rigs kyi bu/ gang yang rgyal rigs rgyal thabs spyi bo nas dbang bskur ba la ltung ba'i rtsa ba 'di lnga las ltung ba'i rtsa
44b
ba gang yang rung ba zhig byung na/ rgyal rigs rgyal thabs spyi bo nas dbang bskur ba de sngon dge ba'i rtsa ba bskyed pa de thams cad sprug par 'gyur/ ltung ba'i dngos por 'gyur zhing| lha dang mi'i bde ba thams cad las phas pham par 'gyur/ ngan song du 'gro bar 'gyur te/ byang chub sems dpa' nam mkha'i snying po kla klo'i yul de lta bu gzhan dag tu skye zhing 'byung bar ston te/ la lar ni/ dge sbyong gi gzugs dang / cha lugs dang / spyod lam dang / la lar ni/ bram ze'i gzugs dang / cha lugs dang / spyong lam ston to/ /gang dang gang gis bdag gi skye ba 'byung bar ston pa de dang de dag tu rgyal rigs de 'dra ba dag la chos 'chad par byed de/ sngon ma byung ba/ sngon chad ma byung ba/ thams cad mkhyen pa'i bshad pa zab mo zab pa'i mdo sde dang / gzungs dang / bzod pa dang / sa dag 'chad par byed/ stan par byed de/ de'i phyir rgyal rigs rgyal thabs spyi bo nas dbang bskur bde sngon gyi sdig pa mi dge ba'i las la ngo tsha bar byed/ smod par byed/ 'chags par byed/ gtong bar byed/ spong bar byed cing / de sbyin pa dang / dul ba dang / sdom pa dang / rtul ba'i spro ba chen po la gnas shing mtho ris la gzhol bar 'gyur ro/ /byams pa/ blon po'i ltung ba'i rtsa ba'ang lnga ste/ lnga gang zhe na/ gang yang blon po mchod rten gyi
45a
@#/ /rdzas 'phrog par byed dam/ phyogs bzhi'i dge 'dun gyi rdzas 'phrog par byed pa 'di ni/ ltung ba'i rtsa ba dang po'o/ /gang yang grong 'joms par byed pa dang / ljongs 'joms pa dang / grong khyer 'joms par byed pa 'di ni/ ltung ba'i rtsa ba gnyis pa'o/ /yang blon po gang chos spong bar byed de/ nyan thos kyi nges par 'byung ba bshad pa'am| rang sangs rgyas kyi nges par 'byung ba bshad pa'am/ thams cad mkhyen pa'i nges par 'byung ba bshad pa spong bar byed/ 'gog par byed/ sped par byed pa 'di ni| ltung ba'i rtsa ba gsum pa'o/ /yang blon po gang bcom ldan 'das kyi phyir rab tu byung ba la gtse bar byed na/ bslab pa 'dzin kyang rung / mi 'dzin kyang rung / tshul khrims dang ldan yang rung / mi ldan yang rung ste/ de dag gi gos ngur smrig dag 'phrog par byed/ khyim par byed dam/ lus la chad pas gcod dam/ btson rar 'jug par byed dam| srog gcod par byed pa 'di ni/ blon po'i ltung ba'i rtsa ba bzhi pa'o/ /yang blon po gang mtshams med pa lnga las mtshams med pa gang yang rung ba'i las byed cing gsog pa 'di ni/ ltung ba'i rtsa ba lnga pa ste/ rigs kyi bu/ blon po gang la ltung ba'i rtsa ba lnga po 'di dag las ltung ba'i rtsa ba gang yang rung ba zhig byung na/ blon po de sngon
45b
dge ba'i rtsa ba bskyed pa thams cad sprug par 'gyur/ ltung ba'i dngos por 'gyur/ lha dang mi'i bde ba thams cad las phas pham par 'gyur/ sems can dmyal ba la gzhol bar 'gyur te/ de dag gi don gyi phyir byang chub sems dpa' nam mkha'i snying po kla klo'i yul de lta bu gzhan dag tu gnas shing skye ba 'byung ba'ang ston te/ la lar ni/ dge sbyong gi gzugs dang / cha lugs dang / spyod lam gyis sems can rnams la chos 'chad/ la lar ni/ bu mo'i bar gyi gzugs kyis chos 'chad de/ gang dang gang dag tu skye bar 'byung bar ston pa de dang de dag tu'ang blon po de dag la chos 'chad de sngon ma byung ba/ sngon chad ma byung ba/ thams cad mkhyen pas bshad pa/ zab mo zab pa'i mdo sde dang / gzungs dang / bzod pa dang / sa dag 'chad par byed/ ston par byed de/ de'i phyir blon po de sngon byas pa'i mi dge ba'i sdig pa'i las la ngo tsha bar byed/ smod par byed| las kyi sgrib pa de'ang 'chags par byed/ gtong bar byed/ spong bar byed do/ /de sbyin pa dang / dul ba dang / sdom pa la rtul ba'i nan tan la gnas shing mtho ris la gzhol bar 'gyur ro/ /rigs kyi bu/ nyan thos rnams kyi ltung ba'i rtsa ba ni/ lnga'o/ /lnga gang zhe na/ srog gcod pa dang / ma byin par len pa dang / mi tshangs par spyod pa dang /
46a
@#/ /brdzun du smra ba dang / gang de bzhin gshegs pa'i sku 'joms shing khrag 'byin par byed pa ste/ lnga po de dag go /gang nga'i nyan thos ltung ba'i rtsa ba lnga po de dag las ltung ba'i rtsa ba gang yang rung ba zhig byung na/ rtag tu ji ltar bshad pa bzhin du de dag gi don gyi phyir byang chub sems dpa' nam mkha'i snying po de lta bu'i yul gzhan dag tu skye ba 'byung bar ston cing la lar ni/ dge sbyong gi gzugs dang / cha lugs dang / spyod lam gyis 'chad de/ snga ma bzhin gyi bar du mtho ris la gzhol bar 'gyur ro/ /theg pa chen po la yang dag par zhugs pa'i rigs kyi bu las dang po pa dag gi ltung ba'i rtsa ba ni/ brgyad de/ ltung ba'i rtsa ba de dag gis 'khrul bar gyur pa theg pa chen po la yang dag par zhugs pa las dang po pa dag ni/ sngon dge ba'i rtsa ba bskyed pa thams cad sprug par 'gyur/ ltung ba'i dngos por 'gyur zhing / lha dang / mi dang / theg pa chen po'i bde ba las phas pham par 'gyur/ ngan song du 'gro bar 'gyur/ dge ba'i bshes gnyen dang 'bral zhing 'khor ba na yun ring du gnas par 'gyur ro/ /brgyad gang zhe na/ sems can gang dag sngon ngan par spyad pa'i rgyus nyon mongs pa snyigs ma lnga dang ldan pa'i 'jig rten gyi khams
46b
'dir skyes nas de dag dge ba'i rtsa ba chung ngu dang ldan pa las dge ba'i bshes gnyen la brten te theg pa chen po shin tu zab pa 'di nyan cing rigs kyi bu de dag blo chung du zin gyis kyang bla na med pa yang dag par rdzogs pa'i byang chub tu sems bskyed do/ /de dag gi nang nas byang chub sems dpa' las dang po pa shin tu zab pa'i stong pa dang ldan pa'i mdo sde 'di nyan par byed/ lung sbyin par byed/ klog par byed de/ de dag ji ltar thos pa dang / de dag ji ltar kun chub pa bzhin du sems can gzhan sngon gyi blo dang 'dra ba dag gi mdun du don dang bcas/ tshig 'bru dang bcas par rgya cher dran par byed/ ston par byed pa dang / dka' ba ma byas pa'i byis pa so so'i skye bo de dag thos nas 'jigs par 'gyur/ dngangs par 'gyur/ skrag par 'gyur te/ skrag pas bla na med pa yang dag par rdzogs pa'i byang chub las ldog cing nyan thos kyi theg pa la sems smon par 'gyur ba de ni/ byang chub sems dpa' las dang po pa'i ltung ba'i rtsa ba dang po ste/ rigs kyi bu/ ltung ba'i rtsa ba des dge ba'i rtsa ba sngon bskyed pa thams cad sprug par 'gyur| ltung ba'i dngos por 'gyur/ mtho ris dang thar pa'i bde ba las phas pham par 'gyur/ de'i byang chub kyi sems bslus shing ngan song du 'gro bar 'gyur ro/ /de
47a
@#/ /bas na/ 'di lta ste/ dper na/ rgya mtsho chen po bags kyis gzhol ba de bzhin du byang chub sems dpa' sems can pha rol dang / gang zag pha rol gyi bsam pa dang / bag la nyal thog mar shes par bya ste/ byang chub sems dpa' rnams kyi bsam pa ji lta ba bzhin du rim gyis chos bshad par bya'o/ /byang chub sems dpa' nam mkha'i snying po'ang de dag gi phyir de lta bu'i yul gzhan dag tu skye zhing 'byung bar ston te/ de'i phyir byang chub sems dpa' las dang po pa de lta bu'i ltung ba'i rtsa ba byung bar gyur la ngan song gis 'jigs skrag nas de dag gal te byang chub sems dpa' nam mkha'i snying po'i mding thos nas ltung ba de dag bshags pa'i phyir mthong bar 'dod na/ des tho rangs kyi thun la a ga ru'am/ rgya spos sam/ bdug pas bdugs nas thal mo sbyar te byang chub sems dpa' nam mkha'i snying po'i ming brjod par bya'o| |de'i skal pa ji lta ba bzhin du rigs kyi bu des sems can de mthong nas de ltar 'di lta bu'i gzugs su ston to/ /la la'i mdun du ni/ tha mal bar 'dug ste chos 'chad de/ la la'i mdun du ni/ bram ze'i gzugs kyis/ la la'i mdun du ni/ bu mo'i gzugs kyi bar du 'dug ste/ byang chub sems dpa' las dang po pa de'i ltung ba'i
47b
rtsa ba ji ltar byung ba de dag 'chags su 'jug go /bla na med pa theg pa chen po'i spyod pa zab pa thabs mkhas pa'ang de la ston par byed do/ /ting nge 'dzin dang / bzod pa dang / gzungs dang / sa'i bar du'ang 'jog par byed do/ /de'i phyir ngan song thams cad las yongs su thar cing bla na med pa yang dag par rdzogs pa'i byang chub las kyang phyir mi ldog par 'gyur to \?\ / de pha rol tu phyin pa drug la rdo rje bzhin du mthu che zhing rtul ba brtan par 'gyur/ myur du bla na med pa yang dag par rdzogs pa'i byang chub tu mngon par rdzogs par 'tshang rgya bar yang 'gyur ro/ /gal te des bdag nyid mdun du mngon sum du ma bstan na/ byang chub sems dpa' des skya rengs 'byung ba'i dus kyi tshe langs te skya rengs la gsol ba gdab par bya ste/ 'di skad du brjod par bya'o/ /skya rengs skya rengs thugs rje chen po dang ldan pa/ skya rengs khyod dzam+bu'i gling 'dir shar ma thag tu bdag la thugs rjes dgab par mdzod cig /nam mkha'i snying po thugs rje chen po la bdag gi tshig gis gsungs te/ ci nas kyang de bdag gi rmi lam du ston cing de'i slad du bdag ltung ba'i rtsa ba 'chags par 'gyur ba dang / 'phags pa'i theg pa chen po las thabs dang ldan pa'i ye shes kyi mig chen po thob par 'gyur bar mdzod ces byas te/ des de'i tshe mal du gnyid log par bya'o/ /skya
48a
@#/ /rengs shar ma thag tu'ang byang chub sems dpa' nam mkha'i snying po byang chub sems dpa' las dang po pa ltung ba byung ba de'i rmi lam du ston par byed de/ ye shes kyi thabs chen pos de'i ltung ba'i rtsa ba'ang 'chags su 'jug go /thabs dang ldan pa'i ye shes kyang ston par byed de/ de'i phyir byang chub sems dpa' las dang po pa de de nyid du byang chub kyi sems mi brjed pa zhes bya ba'i ting nge 'dzin 'thob par 'gyur ro/ /theg pa chen po la'ang shin tu gnas par 'gyur/ pha rol tu phyin pa drug kyang myur du yongs su rdzogs par 'gyur ro/ /gzhan yang byang chub sems dpa' las dang po pa dag la la zhig la khyod kyis pha rol tu phyin pa drug la spyod mi nus/ khyod bla na med pa yang dag par rdzogs pa'i byang chub mngon par rdzogs par 'tshang rgya bar mi nus kyi/ khyod myur du nyan thos kyi theg pa'am/ rang sangs rgyas kyi theg pa la sems skyed cig dang / de'i phyir khyod myur du 'khor ba las nges par 'byung bar 'gyur ro/ /zhes ji ltar sngar bshad pa'i bar du de skad zer na/ de ni/ byang chub sems dpa' las dang po ba'i ltung ba'i rtsa ba gnyis pa'o/ /gzhan yang byang chub sems dpa' las dang po pa la la zhig la kye khyod kyi so sor thar pa'i 'dul ba dang / tshul khrims dang /
48b
legs par spyad pas ci zhig bya/ khyod myur du bla na med pa yang dag par rdzogs pa'i byang chub tu sems bskyed cing / theg pa chen po lhogs shig /de'i phyir nyon mongs pa'i rkyen gyis khyod kyi lus dang / ngag dang / yid kyis mi dge ba'i las gang cung zad bsgrubs pa de dag de'i phyir dag cing rnam par smin par 'gyur ba med do/ /zhes ji ltar sngar bshad pa bzhin gyi bar du de skad zer na/ de ni/ byang chub sems dpa' las dang po pa'i ltung ba'i rtsa ba gsum pa'o/ /gzhan yang rigs kyi bu byang chub sems dpa' las dang po pa la la zhig la rigs kyi bu khyod kyis nyan thos kyi theg pa'i gtam spongs shig /ma nyan cig /ma klog cig /gzhan la ma ston cig / rigs kyi bu khyod kyis nyan thos kyi theg pa'i gtam spang bar gyis shig /khyod ni/ de'i phyir 'bras bu chen po 'thob par mi 'gyur ro/ /khyod ni/ de'i phyir nyon mongs pa rnams mthar 'byin par byed mi nus kyi/ khyod theg pa chen po'i gtam la dad par gyis shig /theg pa chen po nyon cig /khyod theg pa chen po lhogs shig/ gzhan la ston cig dang / de'i phyir khyod ngan 'gro dang / ngan song gi lam thams cad du 'gro bar mi 'gyur zhing / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /zhes de skad smras nas gal te de
49a
@#/ /de'i tshig bzhin du byed cing lta ba'i rnam pa de lta bu len par byed na/ gnyis ka'ang ltung ba'i rtsa bar 'gyur te/ 'di ni/ byang chub sems dpa' las dang po pa'i ltung ba'i rtsa ba bzhi pa'o/ /gzhan yang byang chub sems dpa' las dang po pa dag lce gnyis par 'gyur te/ gzhan du sems la gzhan du ston cing theg pa chen po 'di'ang sgra grags pa dang / tshigs su bcad pa dang / rnyed pa dang / bkur sti'i phyir 'don par byed/ kha ton byed/ 'dzin par byed/ klog par byed/ 'chad par byed/ pha rol la'ang thos pa tsam ston par byed cing bdag ni/ theg pa chen po pa yin gyi/ gzhan ni/ ma yin no/ /zhes de skad zer zhing rnyed pa dang bkur sti'i phyir gzhan la phrag dog tu byed la/ pha rol gang las nye bar spyod pa dang / yongs su spyod pa thob par 'gyur ba la de'i rkyen gyis de dag 'khrug par 'gyur/ de dag gi ming brjod par byas te smod par byed/ brnyas par byed/ ngan du brjed par byed/ bdag bstod par byed cing de dag phrag dog gi rgyus bdag mi'i chos bla ma dang ldan par 'chad par byed de/ de'i phyir dngos po des ltung bar 'gyur/ theg pa chen po'i bde ba las pas pham par gyur nas de'i phyir yang theg pa chen po las lci ba chen po'i ltung ba 'byung bar 'gyur te/ de'i phyir ngan song du
49b
'gro bar 'gyur ro/ /dper na/ mi la la zhig rin po che'i gling du 'gro 'dod de/ rgya mtsho chen por gru las song ba las rgya mtsho chen por gru nyid zhig par gyur pa de bzhin du/ byang chub sems dpa' las dang po pa'ang theg pa chen po'i rgya mtsho rgyal bar 'dod pa las phrag dog gi phyir brdzun du smras nas de'i rkye gnyis de dag dad pa'i gru zhig cing shes rab kyi srog dang bral ba 'thob par 'gyur ro/ /de lta bas na/ byang chub sems dpa' las dang po pa phrag dog gi phyir brdzun du smras pa'i rkyen gyis ltung ba lci ba chen po 'byung bar 'gyur te/ de ni/ byang chub sems dpa' las dang po pa'i ltung ba'i rtsa ba lnga pa'o/ /gzhan yang rigs kyi bu/ ma 'ongs pa'i dus na las dang po pa'i byang chub sems dpa' khyim pa'am/ rab tu byung ba dag zab pa nyid la stong pa nyid dang ldan pa'i mdo sde gzungs dang / bzod pa dang / ting nge 'dzin dang / sas brgyan pa'i skyes bu rig pa chen po dang ldan pa/ tshegs chung ba'i byang chub sems dpa' rnams kyi spyod yul gyi theg pa chen po'i mdo sde de klog par byed/ 'don par byed/ kha ton byed/ bklags nas gzhan la rgya cher ston par byed/ de bdag gis chos 'di dag rang gi blos rtogs nas nga snying rje ba'i phyir de ltar khyod la ston gyi/ khyod kyis ci nas kyang chos zab mo 'di la mngon sum du 'gyur ba de ltar sgoms shig dang / da ltar gyi nga bzhin du khyed
50a
@#/ /kyang ye shes mthong bar 'gyur ro/ /zhes smra zhing / chos 'di lta bu zab mo zab pa dag mngon par ni/ ma byas kyi/ bklags pa tsam gyis bstan to/ /zhes ni/ mi zer bar rnyed pa dang / bkur sti'i phyir bdag 'tshong bar byed de/ de'i rkyen gyis dus gsum gyi de bzhin gshegs pa dgra bcom pa yang dag par rdzogs pa'i sangs rgyas rnams dang / byang chub sems dpa' sems dpa' chen po dag dang / 'phags pa'i gang zag dag gi spyan sngar nyes pa dang bcas par 'gyur/ ltung ba lci ba 'byung bar 'gyur/ lha dang mi rnams theg pa chen pos bslus par 'gyur te/ de ni/ de'i nyan thos kyi theg par yang mi 'gyur na/ theg pa chen po lta ci smos/ theg pa chen po la 'jug pa'i rtogs pa'i khyad par lta ci smos/ bla na med pa yang dag par rdzogs pa'i byang chub lta ci smos/ 'di lta ste/ dper na/ mi zhig 'brog dong pa chen por song ba las bkres pa dang skom pas nyen cing ngal bar gyur nas de 'bras bu chen po dang ldan pa'i shing gi drung du zas kyi phyir 'dug nas des shing 'bras bu chen po dang ldan pa/ dri dang ldan pa/ ro dang ldan pa bor te dug gi shing ro med pa la 'dzogs nas dug gi 'bras bu za'o/ /zos nas 'chi ba'i dus byed de/ gang zag de'ang dpe de dang 'dra bar brjod do/ /de bas na/ mir rnyed pa shin tu
50b
dkon pa rnyed nas dge ba'i bshes gnyen la gnas te theg pa chen po la 'jug par 'dod pa las rnyed pa dang / bkur sti dang / grags pa'i phyir bdag la bstod/ gzhan la smod par byed pas ltung ba'i lci ba de 'dra ba byung bar gyur nas ltung ba'i rtsa ba de'i phyir shes pa thams cad kyis shin tu smad cing ngan song du 'gro bar 'gyur te/ gang zag de 'dra ba ni/ rgyal rigs dang / bram ze dang / rje'u rigs dang / dmangs rigs thams cad kyis mi bsten par bya'o/ /gang de sten par byed pa de ni/ shes pa thams cad kyi 'das pa dang bcas pa yin te| de'ang byang chub sems dpa' las dang po pa'i ltung ba'i rtsa ba drug pa'o/ /gzhan yang rigs kyi bu/ ma 'ongs pa'i dus na rgyal rigs rnams kyi mdun na 'don gyi phyag dar ba'am/ blon po'i phyag dar ba'am/ dpa' bo'i phyag dar ba'am/ sman pa'i phyag dar ba/ blun pa/ mkhas pas snyems pa/ nor che ba/ longs spyod che ba dag 'byung ste/ de dag spyin pa'i bsod nams kyi dngos po rnam pa mang po dag byed par snang ste/ de dag gtong bas rgyags shing dregs nas snyems pa dang / rgyags pas rgyal rigs dag kyang 'byed bar byed/ dge sbyong dag kyang rgyal rigs dang 'byed par byed cing / de dag rgyal rigs la brten nas dge sbyong dag kyang chad pas gcod par byed de/ nor gyi chad pas 'phrog
51a
@#/ /par byed pas gnod pa de'i phyir dge slong de dag gis gang zag gi'ang rung / dge 'dun gyi'ang rung / phyogs bzhi'i dge 'dun gyi'ang rung / mchod rten gyi'ang rung ste| 'phrog nas de dag la skyes su 'bul bar byed/ phyag dar ba de dag kyang rgyal rigs la 'bul bar byed de/ de gnyis ka ltung ba'i rtsa bar 'gyur ro/ /'di ni/ ltung ba'i rtsa ba bdun pa'o/ /gzhan yang rgyal rigs kyi phyag dar ba de dge sbyong dang bcas te nyes par 'gyur/ chos de lta bu dag kyang chos ma yin par 'dogs/ chos ma yin par ni chos su 'dogs te chos spangs/ mdo sde dang 'dul ba'i bslab pa la mi lta/ nag po bstan pa la mi lta/ chen po bstan pa la mi lta/ byams pa dang / snying rje chen po dang / shes rab kyi pha rol tu phyin pa'i bslab pa dang / thabs kyi bslab pa dang / gang yang mdo sde gzhan dag las bslab pa bshad pa de'ang spangs nas dge slong dag gtse ba'i phyir de 'dra ba'i chos dang mi ldan pa'i bya ba 'cha' bar byed de/ bya ba 'cha' ba de dag gis dge slong dag gtse bar 'gyur/ zhi gnas dang lhag mthong la sbyor pa'i yid la byed pa gtong bar 'gyur/ bsam gtan pa de dag gnod sems mang bar 'gyur bas de'i phyir dge slong dag gi nyon mongs pa ma zhi ba zhi bar mi byed/ srab mor mi 'gyur
51b
te| de'i tshe dge slong dag bsam pa nyams par 'gyur/ tshul khrims nyams par 'gyur/ spyod pa nyams pa dang / lta ba nyams par 'gyur te/ de'i phyir lhod par 'gyur/ phal cher lhod par 'gyur/ tshul khrims nyams par 'gyur/ dge sbyong ma yin na dge sbyong du khas 'che/ tshangs par spyod pa ma yin na tshangs par spyod par khas 'che zhing bong bu dang mtshungs pa dang / chos shin tu gsal bar 'chad par 'gyur te/ de dag la rgyal rigs 'khor dang bcas pas shin tu bkur sti byas pa dang / rim gro byas pa dang / mchod pa byas par 'gyur/ de dag gis dge slong spong ba la brtson pa rnams kyi bsngags pa ma yin pa khyim pa la brjod pa dang / rgyal rigs 'khor dang bcas pa de'ang dge slong spong ba la brtson pa de dag la zhe sdang zhing 'phya bar 'gyur te/ gang de na dge slong spong ba la brtson pa rnams kyi phan pa dang longs spyod du bya ba de kha ton la brtson pa'i dge slong la 'bul bar byed pas de gnyis ka ltung ba'i rtsa bar 'gyur ro/ /de ci'i phyir zhe na/ dge slong bsam gtan pa ni/ zhing dam pa yin gyi/ kha ton pa dang / zhal ta la gnas pa ni/ ma yin pa'i phyir te/ dge slong bsam gtan pa dag ni/ ting nge 'dzin dang / gzungs dang / bzod pa dang / sa dag la snod du gyur pa/ sbyin gnas dam pa/ snod dam par
52a
@#/ /gyur pa| 'jig rten gyi snang bar byed pa/ lam ston par byed pa/ las kyi zhing dang nyon mongs pa'i zhing las sems can rnams sgrol bar byed pa/ mya ngan las 'da' bar 'gro ba'i lam la gzhog par byed pa'o/ /rigs kyi bu/ de ni/ tshegs ma phyung ba/ 'jigs pa dang phral ba'i phyir byang chub sems dpa' las dang po pa rnams kyi ltung ba'i rtsa ba brgyad pa ste/ ltung ba'i rtsa ba de dag dang ldan na/ byang chub sems dpa' las dang po pa sngon dge ba'i rtsa ba bskyed pa thams cad sprug par 'gyur/ ngan song du 'gro bar 'gyur/ ltung ba'i dngos por 'gyur/ lha dang mi'i bde ba thams cad las phas pham par 'gyur/ byang chub sems dpa' bslus par 'gyur te/ rigs kyi bu/ de 'dra ba dag gi phyir byang chub sems dpa' nam mkha'i snying po ni/ de lta bu dag gi yul du skye zhing 'byung bar 'gyur te/ la lar ni/ dge sbyong gi gzugs dang / cha lugs dang / spyod lam gyis/ la lar ni/ bram ze'i gzugs dang / cha lugs dang / spyod lam nas dud 'gro'i mtshan ma dang / spyod lam gyi bar du gzugs sna tshogs ston te/ rgya cher ji ltar dpa' bar 'gro ba'i ting nge 'dzin las 'byung ba bzhin du bklag par bya ste/ de dang de dag tu sems can de dang de dag la ji ltar mthun pa bzhin du chos
52b
'chad par byed de/ sngon ma byung ba/ sngon chad ma byung ba thams cad mkhyen pas bshad pa'i mdo sde dang / ting nge 'dzin dang / bzod pa dang / sa 'chad de/ de'i phyir byang chub sems dpa' las dang po pa thabs mi shes pa ltung ba byung ba dag ngo tsha bar byed/ ltung ba des 'jigs par byed/ dngangs par byed/ skrag par byed/ ltung ba de dag 'chags par byed/ gtong bar byed/ spong bar byed do/ /gal te sems can de dag byang chub sems dpa' nam mkha'i snying po'i ming thos nas mthong bar 'dod cing ngan song du ltung bas 'jigs te/ ltung ba'i rtsa ba bshags par 'dod na/ gal te de dag byang chub sems dpa' nam mkha'i snying po la phyag 'tshal zhing de'i ming nas brjod na/ rigs kyi bu de dag gi skal ba ji lta ba bzhin du sems can de'i mdun du tha mal pa'i tshul du 'dug pa'am/ bram ze'i gzugs nas bu mo'i gzugs kyi bar gyis byang chub sems dpa' las dang po la de'i mdun du 'dug ste/ ltung ba'i rtsa ba de ji ltar byung ba la chags su 'jug go /de'i thabs mkhas pa zab mo dang / bla na med pa'i theg pa chen po la spyod pa'ang ston| sa dang sa dag tu'ang ting nge 'dzin dang / gzungs dang / bzod pa la gzhog par byed de/ rim gyis lam yan lag brgyad pa'i bar gyis gzhog par byed do/ /de nas de
53a
@#/ /dag ngan song gi 'jigs pa chen po las shin tu thar par byed de bla na med pa yang dag par rdzogs pa'i byang chub las phyir mi ldog pa'i sa la 'jog par byed do| |de ltar de glog dang mtshungs pa dang / pha rol tu phyin pa drug gi spyod pa la mthu che zhing rtul bar 'gyur ro/ /de bas na myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /gal te de dag la mngon sum du bdag ston par mi byed na/ gang de la gsol bar byed pa'i byang chub sems dpa' las dang po pa nyes pa dang bcas pa tho rangs kyi thun la langs te kha shar phyogs su bstan te 'dug la lha'i bu skya rengs la gsol ba gdab par bya ba 'di skad du brjod do| |skya rengs skya rengs thugs rje chen po can/ skal pa chen po can khyod dzam+bu'i gling du shar ma thag tu bdag la thugs rjes dgab par mdzod cig /byang chub sems dpa' nam mkha'i snying po thugs rje chen po can la bdag gi tshig gis sbron te/ bdag gi rmi lam du'ang de ston par 'gyur zhing bdag gis thabs des ltung ba bshags par 'gyur ba dang / 'phags pa'i theg pa chen po la thabs dang ye shes thob par mdzod cig ces smras nas des de'i tshe mal du gnyid log par bya ste/ skya rengs dzam+bu'i
53b
gling 'dir shar ma thag tu byang chub sems dpa' nam mkha'i snying po 'dir 'ong bar 'gyur te/ byang chub sems dpa' las dang po pa de'i rmi lam na tha mal par mdun du 'dug ste| ltung ba'i rtsa ba de'ang 'chags su 'jug /ye shes dang thabs chen pos thabs dang ye shes la mkhas pa gang dag gis byang chub sems dpa' las dang po pa de de nyid du byang chub kyi sems mi brjed pa zhes bya ba'i ting nge 'dzin 'thob par 'gyur ba dang / theg pa chen po la shin tu brtan por gnas par 'gyur ba dang / de myur du pha rol tu phyin pa drug yongs su rdzogs par 'gyur ba dang / ring po mi thogs par bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba de lta bu'i thabs dang shes rab kyang de la ston to/ /de bas na/ rigs kyi bu byang chub sems dpa' sems dpa' chen po nam mkha'i snying po 'di ni/ shin tu dpa' ba las byung ba'i yid bzhin gyi nor bu rin po che yan lag gi dam pa mgo la 'dug par snang ngo / /de lta bas na/ byang chub sems dpa' sems dpa' chen po nam mkha'i snying po ni/ yon tan bsam gyis mi khyab pa dang ldan no/ /rigs kyi bu/ gzhan yang sems can gang byang chub sems dpa' nam mkha'i snying po'i ming thos sam/ gzugs 'brir 'jug gam/ de
54a
@#/ /la mchod pa byed dam/ rim gro byed/ bsti stang byed/ bkur sti byed/ mchod pa byed cing / me tog dang / spos dang / phreng ba dang / byug pa dang / gdugs dang / rgyal mtshan dang / ba dan rnam pa du ma dag gis bkur stir byed/ phyag 'tshal bar byed/ bdag gi srog kyang de la 'bul bar byed na/ sems can de dag ni/ mes 'chi ba'i dus byed par mi 'gyur/ chus ma yin/ mtshon gyis ma yin/ dug gis 'chi bar mi byed de/ de dag tshe zad pa ma gtogs par mi'am mi ma yin pa sus kyang de dag gi srog dbrog par mi nus/ dus ma yin par mi 'chi/ nad bu can du mi 'gyur/ bkres pa dang skom pas 'chi ba'i dus byed par mi 'gyur/ rgyal po'i chad pas chod par mi 'gyur/ 'chi ba'i dus la bab kyi bar du ltung ba'i rtsa ba 'byung bar mi 'gyur/ de dag mig gis gzugs mi mthong / rna bas sgra mi thos/ snas dri mi tshor/ lces ro mo myong / lus kyis reg bya mi shes shing / da dung du dbugs phra mo 'byung ba dang 'jug par byed/ da dung du de'i lus la tshe dang / drod dang / rnam par shes pa 'jug par 'gyur pa de'i tshe de dag la byang chub sems dpa' nam mkha'i snying po tha mal par ston par byed de/ sems can gang sngon bram ze la gus par gyur pa de dag gi rnam par
54b
shes pa la ni/ rigs kyi bu bram ze'i gzugs su ston to/ /gang 'dod pa'i dbang phyug la gus pa de dag la ni/ 'dod pa'i dbang phyug gi bar du ston pa nas gang sred med kyi bu la gus pa dang / gang dbang phyug chen po la gus pa dang / brgya byin la gus pa dang / 'khor los bsgyur ba la gus pa dang / nyi ma dang / zla ba dang / yul 'khor srung dang / 'phags skyes po dang / mig mi bzang dang / rnam thos kyi \?\ bu la gus pa dang / gang dag lha dang / ri dang / shing dang / chi mig dang / mtshe'u dang / lteng ka sna tshogs la gus pa'i bar du gang dbang gi skyabs su song ba'i sems can de dag la de lta de ltar sems can de dag gi mdun du bstan nas gang gi bsam pa ci 'dra ba bzhin du de'i gzugs kyis 'di skad ces smras so/ /'phags pa'i bden pa bzhi dag la/ /gang dag shes rab kyis mthong ba/ /'khor ba'i srid pa sgrol ba'i phyir/ /'khor ba na ni de kun shes/ /sems can de dag gis chos 'di dag rnam par shes pas shes par byas nas mtho ris la gzhol bar 'gyur ro/ /sems can gang dag sangs rgyas la mngon par dad pa de dag gi mdun du 'dug ste sangs rgyas kyi gzugs bstan nas 'di skad ces smra'o/ /sangs rgyas ye shes bden pa yis/ /srid pa'i rgya mtsho gang sgrol ba/ /ye shes de la myur du reg /sdug
55a
@#/ /bsngal kun las 'grol bar 'gyur/ /de tshe sems can de dag sangs rgyas yid la byed pa'i sgras dga' zhing rangs nas 'chi ba'i dus byas te sangs rgyas kyi zhing rnyog pa med pa/ yongs su dag pa gang na sangs rgyas bcom ldan 'das bzhugs pa/ 'tsho ba/ gzhes pa/ chos kyang ston pa der skye bar 'gyur ro/ /de bzhin du chos dang / dge 'dun la brjod par bya'o/ /de lta bas na/ byang chub sems dpa' nam mkha'i snying po ni/ yon tan gyi chos bsam gyis mi khyab pa dang ldan no/ /gang yang ting nge 'dzin dam pa sna tshogs la sems kyis shin tu dbang bya bar 'dod na/ des tho rangs kyi thun la byang chub sems dpa' nam mkha'i snying po la phyag 'tshal te mchod pa ci nus kyis bya'o/ /sems can thams cad la byams pa'i sems nye bar bzhag ste 'di skad ces brjod do/ /dgongs shig dgongs shig/ nam mkha'i snying po thugs rje chen po brnyes pa/ bdag la dran pa dang / ting nge 'dzin gyi rnal 'byor stsol cig /'di lta ste/ u mu ra Na khe/ bak+Sha ma ni le/ sa mu dra/ a ba da re na/ na ya na ya/ ma hA kA ru Ni kA/ a nu pa ma dzam+b+ha smr-i ti/ a kra dzam+b+ha smr-i ti/ badzra dzam+b+ha smr-i ti/ ko Sha smr-i ti/ a nu ba ma smr-i ti/ b+hu ta ko Ti smr-i ti swAhA/ de la dran pa dang ting nge 'dzin la 'jug pa
55b
sbyin par byed do/ /gang yang sangs rgyas kyi bka' yang rung / nyan thos kyis bshad pa'ang rung ste/ bstan bcos sna tshogs klog par 'dod na/ des khrus byas te skya rengs 'byung ba'i tshe byang chub sems dpa' nam mkha'i snying po la phyag bya'o/ /mchod pa ci nus kyis bya'o/ /sems can thams cad la byams pa'i sems su bya'o/ /'di skad kyang brjod par bya'o| |dgongs shig dgongs shig /mkhas pa chen po sems can thams cad kyi nang na bsam gyis mi khyab pa'i rigs kyi bu nam mkha'i snying po gang zag gi mchog /dran pa dang ting nge 'dzin gyi rnal 'byor bdag la stsol cig /'di lta ste/ i nI la dza/ bi Shan du Sha dza/ bi ya ba na dza/ pi bak+Shi su me/ pA sha la dza si/ s+thA na sha ra be/ shas+t+ra kar+N+Ne/ hu ma hu ma/ ma hA kA ru Ni ka swAhA/ gang rgya mtsho chen por 'jug 'dod pa dang / gang khung du 'jug 'dod pa dang / gang bcud dam pa spyod par 'dod par gyur pa dang / gang btson rar bcug pa dang / gang mdza' ba dang bral ba dang / gang mi mdza' ba dang phrad pa dang / gang dag mes 'jigs pa dang / chu dang mtshon dang / dug dang / byad dang / stag dang / seng+ge dang / dug drag po dang / rkun po dang / g.yon can gyis 'jigs par gyur pa dang / gang dam du bcings pa dang / gang chad pas bcad pa dang / gang gsad pa la
56a
@#/ /thug pa dang / gang nad kyis btab pa dang / nad kyis 'jigs pa dang / gang dag chos gos dang / bsod snyoms dang / mal cha dang / stan dang / na ba'i gsos sman dang / yo byad kyis phongs pa de dag gal te byang chub sems dpa' nam mkha'i snying po'i ming nas brjod cing mchod pa ci nus kyis byed la sems can thams cad la byams pa'i sems kyis gzhog cing 'di skad du'ang smra ste/ dgongs shig dgongs shig /thugs rje chen po dang ldan pa grags pa chen po nam mkha'i snying po 'gro ba'i don bzhed pa/ thugs rje chen po dang ldan pa bdag la gzigs shig /bdag 'di lta bu las rab tu thar par mdzod cig /skal pa stsol cig /mthu chen po/ bdag ni/ sdug bsngal gyis nyam thag go /shin tu dbul lo/ /bdag ni/ khyod la brten nas zhi ba dang bde ba tshe 'di dang / tshe rabs gzhan du thob par 'gyur ro/ /zhes smras pa dang / byang chub sems dpa' nam mkha'i snying po gzugs tha mal ba nas bu mo'i gzugs kyi bar gyis sems can de dag gi mdun du 'dug ste dbugs 'byin par byed do/ /gang dag ci las 'jigs pa de dag de las rab tu thar bar byed do/ /gang dag dbul ba gos med pa nas gang dag yo byad kyis brel ba dag gi bar du de dag la de lta de ltar bsam pa yongs
56b
su rdzogs par byed do/ /yo byad thams cad phun sum tshogs pa'i bar du 'gyur ro/ /rgyal po'i bu la la zhig gnas chen po'i dbang bskur ba thob par sems pa de gal te byang chub sems dpa' nam mkha'i snying po'i ming brjod cing phyag 'tshal la mchod pa dang / rim gro byed pa la sogs te/ bram ze'i gnas chen po dang / khyim bdag gi gnas chen po dang / bzo'i gnas chen po dang / thos pa'i gnas chen po dang / sgom pa'i gnas chen po dang / gang mos pa'i gnas chen po'i bar du 'dod pa de dag gal te byang chub sems dpa' nam mkha'i snying po'i ming thos nas phyag 'tshal bar byed/ khrus byas te gos gtsang ma bgos nas tho rangs kyi thun la byang chub sems dpa' nam mkha' snying po la skyabs su song nas gsol pa gdab pa 'di skad du rjod par byed de/ nam mkha'i snying po thugs rje chen po dang ldan pa bdag la skal ba stsol cig /bsam pa dang / sems pa thams cad dang / bsam pa yid bzhin du rab tu rdzogs par mdzod cig /gang sems shing gang gsol ba thugs rje chen po dang ldan pa khyod kyis mdzod cig ces brjod na/ de nas byang chub sems dpa' nam mkha'i snying pos lha'i rna ba'i khams rnam par dag pa/ mi'i las 'das pas sgra de thos nas sems can de dag la bdag ci rigs par ston te/
57a
@#/ /de dag la de ltar thabs kyang ston to/ /byang chub sems dpa' sems dpa' chen po nam mkha'i snying po de ni/ de lta bu'i thabs kyi yon tan gyi chos dang ldan no| |blo rgya mtsho chen po dang ldan no/ /rigs kyi bu/ rgya mtsho chen po'i chu'i thigs pa ni/ la la zhig gis tshad gzung bar nus srid kyi/ byang chub sems dpa' sems dpa' chen po nam mkha'i snying po thabs dang ye shes la mkhas pa dang / thabs kyis sems can yongs su smin par bya ba'i tshad ni/ gzung mi nus so/ /rigs kyi bu/ phyogs bcu'i nam mkha' mtha' yas mu med pa thams cad kyi tshad ni/ la las gzung bar nus srid kyi/ byang chub sems dpa' sems dpa' chen po nam mkha'i snying po sems can yongs su smin par bya ba'i phyir rnam pa sna tshogs su sprul bar byed pa ni/ tshad gzung mi nus te/ la lar ni/ sems can yongs su smin par bya ba'i phyir sangs rgyas kyi gzugs su sprul bar byed do/ /la lar ni/ bram ze'i gzugs su byed cing / sems can ji lta bus 'dul ba de lta bu'i gzugs kyi bar du sprul bar byed de| de dud 'gro'i skye gnas su skyes pa rnams kyi nang du ni/ dud 'gro'i gzugs su sprul par byed do/ /sems can dmyal ba pa rnams kyi nang du ni/ sems can dmyal
57b
ba pa'i gzugs su sprul par byed pa nas gshin rje'i 'jig rten pa rnams la gshin rje'i 'jig rten gyi gzugs kyi bar du sprul par byed do/ /kha cig la ni/ mngon sum du sprul pa sprul par byed/ kha cig la ni/ rmi lam du sprul par byed/ kha cig la ni/ sdig pa'i las sprug pa'i phyir/ ngan song las bsgral ba'i phyir/ mtho ris la dgod pa'i phyir| sems can rnams kyi don gyi phyir 'chi 'pho'i dus kyi tshe rnam par shes pa tha ma rgyu ba'i tshe gzugs sna tshogs su sprul par byed de/ de dag la thog mar skyabs su song zhing mthong ste/ bde ba thob nas mtho ris kyi 'jig rten du gnas pa'i bde ba thob pa'i bar du 'gyur bas de'i phyir sus kyang de'i sprul ba thams cad kyi tshad gzung bar mi nus so| |de lta bas na/ byang chub sems dpa' sems dpa' chen po nam mkha'i snying po 'di ni/ thabs dang ye shes kyi yon tan gyi chos bsam gyis mi khyab pa dang ldan no/ /sangs rgyas kyi yon tan chen po dang ldan no/ /de bas na/ rigs kyi bu de'i yan lag gi mchog mgo bo la yid bzhin gyi nor bu rin po che 'dug par snang ngo / /de nas de'i tshe 'khor 'dus pa thams cad kyis byang chub sems dpa' sems dpa' chen po nam mkha'i snying po la ngo mtshar thob/ rmad du byung ba thob/ bla ma la bkur sti dang / bsti stang du bya ba
58a
@#/ /thob par gyur nas thams cad kyis thal mo sbyar te byang chub sems dpa' sems dpa' chen po nam mkha'i snying po la mchod pa dang / bkur sti sna tshogs kyis bkur stir byed/ me tog dang / spos dang / phreng ba dang / byug pa dang / mar me dang / bdug pa dang / gdugs dang / rgyal mtshan dang / ba dan dang / chos gos dang / rgyan dang / gos dang / bstod pa dang / glu dang / sil snyan dag gis mchod pa byed do/ /byang chub sems dpa' nam mkha'i snying po des kyang de dag thams cad bcom ldan 'das la phul lo| |phul nas bcom ldan 'das kyi zhabs la phyag btsal nas 'di skad ces gsol to/ /btsun pa bcom ldan 'das/ nyon mongs pa can snyigs ma lnga dang ldan pa'i sangs rgyas kyi zhing 'dir sems can ma rig pa'i mun pa chen pos rmongs pa rnams la sangs rgyas kyi don bgyi bar ji ltar rngo thogs lags/ bcom ldan 'das kyis bka' stsal pa| 'di lta ste/ rigs kyi bu/ nam mkha' ni/ ma bcings pa/ ma grol ba/ nyon mongs pa can ma yin pa/ ma rmongs pa/ rang bzhin gyis dag pa'o/ /nam mkha' la rlung gi rkyen gyis rdul 'thul zhing rlung gis dkrugs pas yongs su ma dag pa'i mtshan du snang ste/ chus ni/ zhi bar byed cing dri ma med la yongs su dag par 'gyur ro/ /
58b
de la skar ma dang / gza' dang / nyi ma dang / zla ba'i bye brag mi mngon na ni/ skad cig dang / thang cig dang / yud tsam dang / nyin mo dang / mtshan mo dang / dus dang / lo rnams kyi bgrang ba'ang mi mngon no/ /rigs kyi bu/ de bzhin du de bzhin gshegs pa'i don dam pa stong pa nyid kyi dbang du song ba'i sems ni/ rang bzhin gyis dang ba'i yongs su dag pa yin mod kyi/ sems can rnams kyi glo bur du byung ba'i nye ba'i nyon mongs pa rnams kyis sems nye bar nyon mongs par byas te/ de dag gi phyir de bzhin gshegs pa'i thugs rje chen po chu dang mtshungs pas chos 'chad par mdzad do/ /sems nyon mongs pa can du gyur pa'i sems can rnams kyi sems yongs su sbyong bar mdzad pas yongs su dag pa dang / de dag gi sems dri ma med par 'gyur te/ de'i phyir sems can de dag de bzhin gshegs pa'i nyi ma shar nas ye shes kyi 'od zer gyis tshi ma par 'gyur ro/ /sangs rgyas kyi yon tan bsam gyis mi khyab pa la mngon sum du 'gyur te/ 'di lta ste/ dran pa nye bar gzhag pa bzhi nas 'phags pa'i lam yan lag brgyad pa'i bar la gnas par 'gyur ro/ / sangs rgyas kyi chos ma 'dres pa bco brgyad kyi bar la gnas par 'gyur ro/ /sems can thams cad snying rje nyid la shin tu gnas par 'gyur ro/ /de dag las kyang 'jig rten
59a
@#/ /du dgra bcom pa rnams 'byung bar 'gyur ro/ /rang sangs rgyas rnams dang / byang chub sems dpa' sems dpa' chen po rnams 'jig rten du 'byung bar 'gyur ro/ /de bzhin gshegs pa dgra bcom pa yang dag par rdzogs pa'i sangs rgyas rnams 'jig rten du 'byung bar 'gyur ro/ /rigs kyi bu/ 'di ji snyam du sems/ nam mkha' mig la gnas sam/ gsol pa/ bcom ldan 'das/ de ma lags so/ /ci mig gi rnam par shes pa la gnas sam/ bcom ldan 'das/ de la lags so/ /ci mig gis kun tu reg pa la gnas sam/ bcom ldan 'das/ de ma lags so/ /gang yang nang du mig gis kun tu reg pa'i rkyen gyis tshor ba gsum 'byung ba de la nam mkha' gnas sam/ gsol pa/ bcom ldan 'das/ de ma lags so/ /de bzhin du rna ba dang / sna dang / lce dang / lus la'ang brjod par bya'o/ /rigs kyi bu/ 'di ji snyam du sems/ nam mkha' yid la gnas pa nas yid kyis kun tu rig pa'i rkyen gyis tshor ba gsum 'byung ba de la nam mkha' gnas sam/ gsol pa/ bcom ldan 'das| de ma lags so/ /rigs kyi bu/ 'di ji snyam du sems/ sems can nam mkha' la gnas sam/ gsol pa/ bcom ldan 'das/ de ma lags so/ /rigs
59b
kyi bu| 'di ji snyam du sems/ nam mkha' sems can la gnas sam/ gsol pa/ bcom ldan 'das/ de ma lags so/ /de skad cig bka' stsal pa dang / bcom ldan 'das la byang chub sems dpa' sems dpa' chen po nam mkha'i snying pos 'di skad ces gsol to/ /bcom ldan 'das/ gcig la gcig mi rten to/ /gcig la gcig spyod yul ma lags so/ /bcom ldan 'das/ chos thams cad ni/ rtog pa ma mchis pa/ stong pa nyid de/ sgro ma btags pa/ yang dag pa'i mtha'/ de bzhin nyid du rtogs par bgyi'o| |bcom ldan 'das /nam mkha'i snying po ni/ 'di lta ste/ rang gi mtshan nyid tha mi dad pa/ mi rtog pa/ rnam par mi rtog pa/ mi g.yo ba/ gsob lags te/ myu gu ma mchis pa/ sa bon ma mchis pa/ 'bras bu ma mchis pa/ rnam par smin pa ma mchis pa/ yi ge ma mchis pa/ rlom sems ma mchis pa lags so/ /bcom ldan 'das/ de bzhin du byang chub sems dpa' sems dpa' chen pos chos thams cad la de ltar rtogs na/ mi skye ba'i chos la bzod pa thob par 'gyur ro/ /'di lta ste/ bcom ldan 'das| bya ba rA dza/ man tak+ShA ya/ dzi na dza ya/ dza na ni ma mu ni ha ra/ a na ya pha la/ gu Na gar+b+ha/ ni ya ma su ri nA ya/ bu ba sha/ sha ta sha pa/ sha ma sha na/ ta ha ka ma/ sha
60a
@#/ /ma gu/ mA tu shi Sha/ sha ma tse ta nA ya/ kle shAn+ta saM sho Sha Ne swA hA/ bcom ldan 'das kyis bka' stsal pa/ legs so legs so/ /rigs kyi bu/ khyod kyis mig las rgyal bar byed pa'i seng+ge'i 'gros kyi phyir bsgyings pa'i gzungs 'dis sems can dag 'chi ba'i tshe tha ma'i rnam par shes pa la nyon mongs pa'i sgrib pa dang / las kyi sgrib pa dang / chos kyi sgrib pa yod pa sbrug pa dang / sangs rgyas kyi zhing yongs su dag par gtong nus so/ /khyod ni/ 'jig rten gyi khams dpag tu med/ grangs med par 'gro ba dang / sems can rnams la snying rje'i dbang gis grong dang / grong khyer dang / grong rdal dang / ljongs dang / yul 'khor dang / rgyal po'i pho brang du gzugs dang / cha lugs dang / spyod lam sna tshogs kyis theg pa chen po'i mdos de sna tshogs 'chad pa dang / sems can yongs su smin par bya ba dang / rgyal rigs gdol pa nas dge sbyong gdol ba'i bar du sdig pa'i chos las spang ba dang / thams cad dge ba'i chos la gzhag par nus so/ /bcom ldan 'das kyis 'di bstan pa'i tshe lha dang / mi'i skye rgu dpag tu med/ grangs med pa dag gis ting nge 'dzin dang / gzungs dang / bzod pa sna tshogs thob par gyur to/ /gzhan dag kyang sa bcu la
60b
ye shes skyes par gyur to/ /srog chags khri ni/ mi skye ba'i chos la bzod pa thob par gyur to/ /sems can dag gi gang dag rtsod 'gyur ba/ /de dag gi ni gzhi yi rtsa ba spongs// myur du mthong bar 'gyur ba dag gis ni/ /rtsa ba'i gzhi por thams cad 'gyur bar gyis/ /bcom ldan 'das kyis de skad ces bka' stsal nas thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa nam mkha'i snying po zhes bya ba theg pa chen po'i mdo rdzogs so//