rKTs


H268

(e-text produced by ACIP)

see text in Tibetan script
1b
@##/ /rgya gar skad du/ AR+Ya ku su ma sany+tsa ya nA ma ma hA yA na sU tra/ bod skad du/ 'phags pa me tog gi tshogs zhes bya ba theg pa chen po'i mdo/ bam po dang po/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod
2a
@##/ /kyi phung po'i ri la dge slong gi dge 'dun chen po brgya phrag phyed dang bcu gsum gyi dge slong dang thabs gcig tu bzhugs te/ de nas tshe dang ldan pa shA ri'i bu stan las langs nas bla gos phyogs gcig tu gzar te/ pus mo g.yas pa'i lha nga sa la btsugs nas/ bcom ldan 'das ga la bde logs su thal mo sbyar ba btud nas/ bcom ldan 'das la 'di skad ces gsol to/ /yang bcom ldan 'das/ da ltar sangs rgyas bcom ldan 'das bzhugs la 'tsho zhing gzhes te chos kyang ston pa
2b
ji snyed cig bzhugs/ de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to| |shA ri'i bu/ de'i phyir legs par shin tu nyon la yid la zungs shig dang bshad do/ /bcom ldan 'das/ legs so zhes gsol nas| tshe dang ldan pa shA ri'i bu bcom ldan 'das kyi ltar nyan to/ /bcom ldan 'das kyis bka' stsal pa/ shA ri'i bu/ sangs rgyas kyi zhing 'di nas shar phyogs su bye ba brgya phrag stong gi'ang tha ma na sangs rgyas kyi zhing mar me can zhes bya ba'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas rin chen 'byung gnas zhes bya ba bzhugs te/ shA ri'i bu/ yang de bzhin gshegs pa rin chen 'byung gnas kyi mtshan gang dag nyan par 'gyur ba dang / dad pa'ang skyed par byed pa de dag thams cad yang dag
3a
@##/ /pa'i byang chub kyi yan lag rin po che bdun rnams yongs su 'dzin par 'gyur ba dang / bla na med pa yang dag par rdzogs pa'i byang chub las phyir mi ldog par 'gyur ro/ /bskal pa drug cur 'khor ba la rgyab kyis phyogs par byas par 'gyur ro/ /'jig rten gyi khams mar me can gyi mi'i nyi ma sangs rgyas rin chen 'byung gnas de'i mtshan thos par dga' ba ni bskal pa drug cur 'khor bar mi 'gyur ro| |shA ri'i bu| de la sogs pa shar phyogs na sangs rgyas bcom ldan 'das gang+gA'i klung gi bye ma snyed kyi mtshan rin chen 'byung gnas zhes bya ba da ltar bzhugs te 'tsho zhing gzhes la chos kyang ston to/ /'di nas sangs rgyas kyi zhing brgya'i 'ang tha ma na 'jig rten gyi khams rin po che dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas rin chen dam pa zhes bya ba
3b
bzhugs te/ yang shA ri'i bu/ de bzhin gshegs pa rin chen dam pa'i mtshan gang dag nyan par 'gyur ba dang / dad pa'ang skyed cing thal mo sbyor bar byed pa ni/ yang shA ri'i bu/ gang gis stong gsum gyi stong chen po'i 'jig rten gyi khams 'di rin po che sna bdun gyis rab tu gang bar byas te/ sangs rgyas bcom ldan 'das la nyin gcig bzhin du sbyin pa phul ba de bzhin du bskal pa gang+gA'i klung gi bye ma snyed du phul ba'i bsod nams kyi phung po des bsod nams kyi phung po 'di'i brgya'i char yang nye bar mi 'gro'o/ /grangs su'am/ cha'am/ dper ram| rgyur yang nye bar mi 'gro'o/ /de bzhin du 'jig rten gyi khams rin po che dang ldan pa na sangs rgyas rin chen dam pa gtso bo bzhugs te/ de'i mtshan thos pas 'dir sangs rgyas 'byung ba yin no/ /'di nas sangs rgyas kyi zhing brgya phrag drug cu na 'jig rten gyi khams spos ldan zhes bya ba na de bzhin gshegs pa dgra bcom pa yang dag par rdzogs pa'i sangs rgyas rin chen 'byung ba zhes bya ba bzhugs te/ yang shA ri'i bu/ de bzhin gshegs pa rin chen 'byung ba'i mtshan gang dag gis thos pa de dag ni bskal pa bco lngar 'khor ba la rgyab kyis phyogs pa byas par 'gyur ro/ /'di nas sangs rgyas kyi zhing stong gi'ang tha ma na 'jig rten gyi khams 'od zer can zhes bya ba na de bzhin gshegs pa dgra bcom pa
4a
@#/ /yang dag par rdzogs pa'i sangs rgyas rin chen snang ba zhes bya ba bzhugs te/ yang shA ri'i bu/ de bzhin gshegs pa rin chen snang ba zhes bya ba'i mtshan gang dag thos pa dang / dad pa bskyed pa de dag ni ngan song gsum du 'gro bar mi 'gyur ro/ /'di nas sangs rgyas kyi zhing stong lnga brgya bas ches rig ba 'jig rten gyi khams tog gi rgyal mtshan zhes bya ba na de bzhin gshegs pa dgra bcom pa yang dag par rdzogs pa'i sangs rgyas rin chen tog ces bya ba bzhugs te/ yang shA ri'i bu/ de bzhin gshegs pa rin chen tog gi mtshan gang dag thos pa dang / dad pa bskyed cing de bzhin gshegs pa de la rjes su dran par byed pa de dag thams cad dkon mchog dang 'dra bar 'gyur ro/ /'di nas sangs rgyas kyi zhing stong gnyis kyi ches pha rol na 'jig rten gyi khams yon tan thams cad rab tu snang ba dang ldan pa zhes bya ba na de bzhin gshegs pa dgra bcom pa yang dag par rdzogs pa'i sangs rgyas rin chen rab snang zhes bya ba bzhugs te/ yang shA ri'i bu/ de bzhin gshegs pa rin chen rab snang gi mtshan gang dag thos pa dang / thos nas kyang lhag pa'i bsam pas mos par byed cing yan lag lngas phyag 'tshal bar 'gyur ba de dag ni bskal pa nyi shur 'khor ba la rgyab kyis phyogs pa byas par 'gyur ro/ /'di nas sangs rgyas kyi
4b
zhing stong bas ches ring ba 'jig rten gyi khams mngon par dga' ba zhes bya ba na de bzhin gshegs pa dgra bcom pa yang dag par rdzogs pa'i sangs rgyas mi 'khrugs pa zhes bya ba bzhugs te| yang shA ri'i bu/ de bzhin gshegs pa mi 'khrugs pa de'i mtshan gang dag thos pa dang / dad pa bskyed par 'gyur ba de dag thams cad bla na med pa yang dag par rdzogs pa'i byang chub las phyir mi ldog cing bdud sdig can rnams kyis kyang mi 'khrugs par 'gyur ro/ /yang shA ri'i bu/ de bzhin gshegs pa mi 'khrugs pa de'i mtshan dang / yon tan brjod pa bshad pa na/ bdud sdig can gyis thos nas dpung gi tshogs thams cad dang bcas te nga'i drung du 'ongs nas tshig 'di skad du smras so/ /yang bcom ldan 'das sangs rgyas stong gi mtshan yongs su brjod pa ni mi dong yi/ de bzhin gshegs pa mi 'khrugs pa'i mtshan ni de lta ma lags so/ /de ci'i slad du zhe na/ de ni bdag gi yul du 'gyur ba ma lags so/ /de bzhin gshegs pa de'i mtshan gang dag nyan par 'gyur ba de la'ang bdag gis bar chad bgyi'o/ /de skad ces gsol pa dang / bcom ldan 'das kyis bdud sdig can la 'di skad ces bka' stsal to/ /sdig can/ khyod kyis gang zag gang dag la bar chad bya ba de dag gang yin/ gsol pa/ bcom ldan 'das/ theg pa chen po la zhugs pa gang dag de bzhin gshegs pa de'i mtshan thos par 'gyur ba
5a
@#/ /de dag lags te/ bcom ldan 'das/ 'jig rten gyi khams 'dir gang bcom ldan 'das de'i mtshan dang / yon tan yongs su brjod pas bag tsha zhing yongs su gdungs so/ /'on kyang bdag gis mtshan nyan pa de rnams la bar chad bgyi ba'i slad du go bgo bar bgyi'o/ /de ci'i slad du zhe na/ de bzhin gshegs pa'i mtshan gang gang zag gang dag gis thos pa bdag gi dbang du mchi bar 'gyur ba de na ma mchis so/ /de skad ces gsol pa dang / bcom ldan 'das kyis bdud sdig can la 'di skad ces bka' stsal to/ /sdig can/ khyod go bgo bar ma byed cig /khyod kyis ni skyes bu dam pa de dag la bar chad bya bar mi nus so/ /de ci'i phyir zhe na/ de dag ni ngas de bzhin gshegs pa mi 'khrugs pa la gtad pa dang / de bzhin gshegs pa gzhan dag la'ang gtad pas/ de dag de bzhin gshegs pa mi 'khrugs pas dgongs shing byin gyis rlob par 'gyur ro/ /de nas tshe dang ldan pa shA ri'i bus/ bcom ldan 'das la 'di skad ces gsol to/ /bcom ldan 'das/ bdud sdig can de bzhin gshegs pa'i spyan snga na sngar mchis nas/ 'di skad du /seng+ge'i sgra sgrogs na| de bzhin gshegs pa mi 'khrugs pa'i mtshan thos la bdud sdig can 'di'i dbang du mchi bar 'gyur ba gang dag la bar chad bgyi ba'i slad du bdud sdig can gyis go bgos
5b
pa'i gang zag de dag gang lags/ de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu/ 'di lta ste/ de bzhin gshegs pa mi 'khrugs pa de dang / de'i yon tan yongs su brjod pa sems can gang dag gis thos nas da ltar spong bar byed pa rnams sems can dmyal bar 'gyur ba'i chos dam du 'dzin par 'gyur ba ngas mthong ngo / /gsol pa/ bcom ldan 'das/ yongs su spong bar bgyid pa'i sems can du zhig mchis pa legs par bshad du gsol/ bka' stsal pa/ shA ri'i bu/ phyogs bcur de bzhin gshegs pa de'i mtshan thos par 'gyur ba dang / de ltar 'jig rten gyi khams gzhan na de bzhin gshegs pa de dag gis de dag las brtsams te chos ston na sems can de dag ni shes rab che zhing shes rab rgya che bas de'i yon tan yongs su rdzogs pa bshad kyang ngoms par mi 'gyur ro/ /shA ri'i bu/ gang dag gis de bzhin gshegs pa mngon sum du mthong bar gyur pa de dag gis de'i yon tan yongs su brjod pa la spong bar 'gyur ba 'di ni gnas ma yin/ skabs med do/ /sangs rgyas bcom ldan 'das de dag ni nyon mongs pa'i snyigs ma'i dus su 'byung ba ni gnas ma yin no/ /'di lta ste/ dper na/ da ltar snyigs ma lnga'i dus su nga byung na mi mjed kyi 'jig rten gyi khams kyi sems can rnams shes rab
6a
@#/ /rab tu zhan pa de 'dra ba dag gis kyang ngas bshad pa'i yon tan khong du chud na gang de bzhin gshegs pa mi 'khrugs pa'i stong gi 'jig rten gyi khams na gnas pas shes par 'gyur pa lta ci smos/ shA ri'i bu/ de lta mod kyi yon tan 'di yongs su brjod pa'i chos kyi rnam grangs 'di ni mthar gyis byang phyogs su 'gro bas 'gyur te/ de na skyes bu dam pa gang dag theg pa chen po la zhugs pa de dag gis chos kyi rnam grangs 'di rgyas par byed par 'gyur ro/ /de na shA ri'i bu/ chos kyi rnam grangs 'di nyan to/ /thos nas kyang spong bar 'gyur te/ skyes bu dam pa ma yin pa de dag ci 'dra ba nyon cig/ bcom ldan 'das/ legs so/ /zhes gsol nas/ tshe dang ldan pa shA ri'i bu bcom ldan 'das kyi ltar nyan pa dang / bcom ldan 'das kyis 'di skad ces bka' stsal to/ /byang phyogs na yul khams gan+d+ha ra zhes bya bar de na lo 'bum du mnar med pa'i las yongs su 'dzin par 'gyur ba yod do/ /byang phyogs kyi rgyud de nyid nas kha che yul gyi ljongs kyi phyogs gang na dam pa'i chos 'di ches shin tu stobs dang ldan par 'bar bar 'gyur ba de na spong bar byed pa khri phrag lnga 'byung ngo / /spangs nas kyang rigs kyi bu de dag gang du gnod par 'gyur ba'i mtshams med par 'gyur ro/ /gang du phal cher tshogs nas mdo 'di la mngon du dmod par byed pa de
6b
dag thams cad mtshams med par 'gro bar 'gyur ro/ /byang phyogs su mdo 'di la bye ba phrag brgyad dang lnga 'bum spong bar 'gyur te/ spangs nas mnar med par rab tu ltung bar 'gyur ro/ / shar phyogs na ni dad par 'gyur ba nyung zad cig yod de/ mnar med pa'i las phal cher 'dzin par 'gyur zhing de na brgya stong phrag mang po mnar med pa'i sems can dmyal bar 'gro bar 'gyur ro/ /lho phyogs su sems can nyis 'bum gyis chos kyi rnam grangs 'di spong bar 'gyur te/ spangs nas mnar med pa'i sems can dmyal ba chen por 'gro bar 'gyur ro/ /nub phyogs nas sems can 'bum rnams kyis chos kyi rnam grangs 'di spangs nas mnar med par 'gro bar 'gyur ro/ /shA ri'i bu/ sangs rgyas kyi chos ni rang sangs rgyas rnams kyis kyang ma yin na nyan thos rnams kyis lta ci smos/ so so'i skye bo 'khor ba 'phel bar byed pa lta'ang ci smos/ shA ri'i bu/ 'di dang 'tshams pa ni 'di yin te/ sangs rgyas ni bsam gyis mi khyab bo/ /sangs rgyas kyi chos rnams kyang bsam gyis mi khyab ste/ sangs rgyas kyi chos rnams ni sangs rgyas kyi chos nyid kyis rab tu mkhyen gyi bdag gis mi shes so/ /mi shes pa ni spang bar mi bya ste/ mdo sde'i tshul 'di lta bu'i tshig bzhi pa'i tshigs su bcad pa tsam la'ang spang ba byas na de snga ma ji tsam du gyur pa bzhin du bsod nams ma yin pa'i phung po yongs su 'dzin par 'gyur ro//
7a
@#/ /shA ri'i bu/ de bas na rigs kyi bu'am/ rigs kyi bu mos spang bar mi bya'o/ /dga' bar bya'o/ /mdo sde 'di lta bu la gang bdag gis ma spangs pas bdag bskal bar gnas pa'i las las grol bar 'gyur te/ dam pa'i chos spong bar byed pa sems can dmyal ba de dag gi drung du ni bdag gnas par mi bya'o snyam du sems te/ gang chos kyi rnam grangs 'di nyan ba de dag gis sangs rgyas kyi gsungs dbyangs rab tu 'dzin par 'gyur ro/ /'di nas sangs rgyas kyi zhing stong phrag bcu na 'jig rten gyi khams dpag tu med ldan zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas 'od chen po zhes bya ba bzhugs te/ yang shA ri'i bu/ 'od chen po'i mtshan gang dag nyan par 'gyur ba dang / dad pa'ang skyed pa de dag thams cad sangs rgyas bcom ldan 'das dang mi 'bral bar 'gyur zhing / bla na med pa yang dag par rdzogs pa'i byang chub las kyang phyir mi ldog par 'gyur ro/ /'di nas sangs rgyas kyi zhing stong phrag drug na 'jig rten gyi khams me tog can zhes bya ba na de bzhin gshegs pa dgra bcom pa yang dag par rdzogs pa'i sangs rgyas dbyangs dpag med ces bya ba bzhugs te/ yang shA ri'i bu/ de bzhin gshegs pa dbyangs dpag med kyi mtshan gang dag nyan pa dang / thos nas kyang dad pa skyed cing de
7b
bzhin gshegs pa dgra bcom pa yang dag par rdzogs pa'i sangs rgyas de la phyag 'tshal lo zhes ched du brjod pa lan gsum brjod pa de dag/ 'di lta ste/ sangs rgyas kyi gsung dbyangs dpag tu med pa'i dbyangs 'dzin par 'gyur ro/ /'di nas sangs rgyas kyi zhing stong phrag bzhin 'jig rten gyi khams rdul med ces bya ba na/ de bzhin gshegs pa dgra bcom pa yang dag par rdzogs pa'i sangs rgyas bdud rtsi dbyangs zhes bya ba bzhugs te/ yang shA ri'i bu/ de bzhin gshegs pa bdud rtsi dbyangs kyi mtshan gang dag thos par gyur la thos nas kyang mos par byed pa de dag ni bskal ba bcu gnyis kyi bar du 'khor ba la rgyab kyis phyogs pa byas par 'gyur ro/ /'di nas sangs rgyas kyi zhing stong phrag nyi shu'i pha rol na 'jig rten gyi khams gdul dka' zhes bya ba de na de bzhin gshegs pa dgra bcom pa yang dag par rdzogs pa'i sangs rgyas grags pa chen po zhes bya ba bzhugs te/ yang shA ri'i bu/ de bzhin gshegs pa grags pa chen po'i mtshan gang dag nyan par 'gyur ba dang / yongs su sgrogs shing 'dzin pa ni bdud sdig can gyis rab tu gdul dka' bar 'gyur ro/ /'di nas sangs rgyas kyi zhing stong phrag bcu gnyis na 'jig rten gyi khams bde ba can na de bzhin gshegs pa dgra bcom pa yang dag par rdzogs pa'i sangs rgyas grags pa mtha' yas zhes bya ba bzhugs te/ yang shA ri'i bu/ de bzhin gshegs pa grags
8a
@#/ /pa mtha' yas de'i mtshan gang dag nyan pa dang / thal mo sbyor zhing de bzhin gshegs pa dgra bcom pa yang dag par rdzogs pa'i sangs rgyas grags pa mtha' yas la phyag 'tshal lo zhes tshig tu smra ba de dag ni bsod nams kyi phung po tshad med pa dang ldan par 'gyur ro/ /rin po che'i phung po ri rab dang mnyam pa lo brgyar sbyin pa byin pa'i bsod nams kyi phung po 'dis snga ma de'i brgya'i char yang nye bar mi 'gro ba nas rgyu'i bar du'ang mi bzod do/ /'di nas sangs rgyas kyi zhing stong phrag gsum na 'jig rten gyi khams man shel can zhes bya ba na de bzhin gshegs pa dgra bcom pa yang dag par rdzogs pa'i sangs rgyas rin chen snang zhes bya ba bzhugs te/ yang shA ri'i bu/ de bzhin gshegs pa rin chen snang 'di'i mtshan gang dag 'dzin pa de dag ni bskal pa bcur 'khor ba la rgyab kyis phyogs pa byas par 'gyur ro/ /bla na med pa yang dag par rdzogs pa'i byang chub las kyang phyir mi ldog bar 'gyur ro/ /yang gang dag dad par mi byed pa de dag ni bskal par mtshams med par gnas pa'i las yongs su 'dzin par 'gyur ro/ /'di nas sangs rgyas kyi zhing stong phrag bco lnga na 'jig rten gyi khams 'od gsal zhes bya ba na de bzhin gshegs pa dgra bcom pa yang dag par rdzogs pa'i sangs rgyas bde ba chen po thob pa zhes bya ba bzhugs te/ yang shA ri'i
8b
bu| de bzhin gshegs pa bde ba chen po thob pa'i mtshan gang dag nyan par 'gyur ba de dag thams cad kyis sems can thams cad bde bar sgrol bar byed do/ /bsod nams kyi phung po tshad med pa'ang yongs su 'dzin par 'gyur ro/ /'di nas sangs rgyas kyi zhing stong phrag bdun na 'jig rten gyi khams nor bu snang ba zhes bya ba na de bzhin gshegs pa dgra bcom pa yang dag par rdzogs pa'i sangs rgyas skar ma mar me snang ba zhes bya ba bzhugs te/ yang shA ri'i bu/ de bzhin gshegs pa skar ma mar me snang ba de'i mtshan gang dag nyan pa dang / dad par gyur pa de dag gang 'di de bzhin gshegs pa'i stobs zhes bya ba'i stobs de dag rab tu 'dzin par 'gyur ro/ /'di nas sangs rgyas zhing stong phrag brgyad na 'jig rten gyi khams bden ldan zhes bya ba na de bzhin gshegs pa dgra bcom pa yang dag par rdzogs pa'i sangs rgyas bden pa'i dbyangs zhes bya ba bzhugs te/ yang shA ri'i bu/ de bzhin gshegs pa bden pa'i dbyangs de'i mtshan gang dag nyan par 'gyur ba de dag thams cad kyis bla na med pa yang dag par rdzogs pa'i byang chub 'thob par 'gyur ro/ /'di nas sangs rgyas kyi zhing brgya phrag nyi shu na 'jig rten gyi khams gser can zhes bya ba na| de bzhin gshegs pa dgra bcom pa yang dag par rdzogs pa'i sangs rgyas dri med mtha' yas zhes bya ba bzhugs te/ yang shA ri'i bu/ gang gis stong gsum gyi stong chen po'i
9a
@#/ /'jig rten gyi khams 'di rin po che sna bdun gyis yongs su bkang ste sbyin pa byin pa bas/ de bzhin gshegs pa dri med mtha' yas kyi mtshan nyan cing dad pa'ang skyed par 'gyur ba de dag ni de bas ches bsod nams 'di mang du 'phel lo/ /bsod nams chung ngus ni de bzhin gshegs pa dri med mtha' yas kyi mtshan thos par mi nus so// gang dag de bzhin gshegs pa dri med mtha' yas kyi mtshan thos pa de dag ni sangs rgyas gcig la dge ba'i rtsa ba bskyed pa ma yin/ gnyis dang / gsum dang / bzhi dang / lnga nas bcu'i bar du ma yin gyi/ sems can de dag gis ni sangs rgyas brgya la dge ba'i rtsa ba bskyed pa yin no/ /de dag ni bskal pa lnga bcu rtsa brgyad kyi bar du 'khor ba la rgyab kyis phyogs pa byas par 'gyur ro/ /'di nas sangs rgyas kyi zhing stong phrag dgu na 'jig rten gyi khams dbyangs can zhes bya ba na de bzhin gshegs pa dgra bcom pa yang dag par rdzogs pa'i sangs rgyas zla ba ltar dkar ba zhes bya ba bzhugs te/ yang shA ri'i bu/ de bzhin gshegs pa zla ba ltar dkar ba'i mtshan gang dag nyan pa de dag thams cad kyi chos dkar po'ang zla ba lta bur 'gyur zhing thams cad bla na med pa yang dag par rdzogs pa'i byang chub las phyir mi ldog par 'gyur ro/ /'di nas sangs rgyas kyi zhing stong gi tha ma na 'jig rten gyi khams nyi ma
9b
can na de bzhin gshegs pa dgra bcom pa yang dag par rdzogs pa'i sangs rgyas zla 'od ces bya ba bzhugs te/ yang shA ri'i bu/ de bzhin gshegs pa zla 'od kyi mtshan gang dag nyan cing thos nas kyang pus mo g.yas pa'i lha nga sa la btsugs te de bzhin gshegs pa zla 'od de la phyag 'tshal lo zhes ched du brjod pa lan gsum du brjod pa dang / yang gang dag gis ched du brjod par bya brjod par byed na myur du bla na med pa yang dag par rdzogs pa'i byang chub tu nges par 'byung bar 'gyur ro/ /'di nas sangs rgyas kyi zhing stong phrag sum cu na 'jig rten gyi khams dri ma med pa can na de bzhin gshegs pa dgra bcom pa yang dag par rdzogs pa'i sangs rgyas dri ma med pa'i 'od ces bya ba bzhugs te/ yang shA ri'i bu/ de bzhin gshegs pa dri ma med pa'i 'od kyi mtshan lha'am/ klu'am/ mi gang dag nyan par 'gyur ba de dag thams cad bla na med pa yang dag par rdzogs pa'i byang chub las phyir mi ldog par 'gyur ro/ /de dag log par ltung ba'i 'jigs pa'ang dogs par mi bya'o/ /'di nas sangs rgyas kyi zhing nyis stong lnga brgya na 'jig rten gyi khams bai DUR+Ya'i snang ba can zhes bya ba na de bzhin gshegs pa dgra bcom pa yang dag par rdzogs pa'i sangs rgyas 'od dag pa zhes bya ba bzhugs te/ yang shA ri'i bu/ de bzhin gshegs pa 'od dag pa'i mtshan lha'am/ klu'am/ gnod sbyin nam/ dri za'am/ mi 'am/
10a
@#/ /ci'am/ lto 'phye chen po'am/ mi'am/ mi ma yin pa gang dag nyan par 'gyur ba de dag thams cad mir 'gyur ba 'thob par 'gyur ro/ /'dod chags dang| zhe sdang dang / gti mug kyang yongs su sbyong bar byed do/ /shA ri'i bu/ gang dag de bzhin gshegs pa 'od dag pa de'i mtshan thos pa dang ldan pa'i dge ba'i rtsa ba la de dag dad par mi byed cing yid mches pa las byung ba mi dge ba'i las kyis de lta bur ga la 'gyur zhes tshig tu 'ang smras na/ lo stong phrag drug cur dmyal ba chen po 'o dod 'bod pa zhes bya bar btso bar 'gyur ro/ /'di nas sangs rgyas kyi zhing brgya srid na 'jig rten gyi khams legs par thob pa dang ldan pa zhes bya ba na de bzhin gshegs pa dgra bcom pa yang dag par rdzogs pa'i sangs rgyas nyi 'od ces bya ba bzhugs te/ yang shA ri'i bu/ gang dag de bzhin gshegs pa nyi 'od la rjes su dran par byed na de dag thams cad kyi chos dkar po nyi ma'i dkyil 'khor lta bur 'gyur ro/ /bdud kyi sde thams cad kyang rnam par 'jig par byed do/ /mu stegs gzhan yang pham par byed do/ /bskal pa sum cur 'khor ba la rgyab kyis phyogs par 'gyur ro/ /'di nas sangs rgyas kyi zhing stong phrag drug cu pas ches ring bar 'jig rten gyi khams byang chub kyi yan lag rab tu brgyan pa zhes bya
10b
ba na de bzhin gshegs pa dgra bcom pa yang dag par rdzogs pa'i sangs rgyas rin chen mtha' yas zhes bya ba bzhugs te/ yang shA ri'i bu/ de bzhin gshegs pa rin chen mtha' yas kyi mtshan gang dag nyan pa de dag thams cad kyis byang chub kyi yan lag 'thob par 'gyur ro/ /sems can yang dkon mchog dam pa la 'god par byed do/ /de dag nyin mtshan du'ang bsod nams kyi phung po tshad med par 'gyur ro/ /'di nas sangs rgyas kyi zhing lnga brgya snyed na 'jig rten gyi khams pad mo can zhes bya ba na de bzhin gshegs pa dgra bcom pa yang dag par rdzogs pa'i sangs rgyas pad mo'i bla ma zhes bya ba bzhugs te/ yang shA ri'i bu/ de bzhin gshegs pa pad mo'i bla ma'i mtshan gang dag nyan pa dang / dad pa'ang skyed pa ni 'jig rten na de dag thams cad pad mo dang 'dra bar 'gyur te/ dge ba'i chos kyis mngon par 'phags par 'gyur ro/ /pad mo chu'i nang nas skyes kyang chu mi chags pa bzhin du bskal pa lnga bcu rtsa lngar 'khor ba la rgyab kyis phyogs pa byas par 'gyur ro/ /'di nas sangs rgyas kyi zhing bye ba brgya phrag stong pas ches ring ba 'jig rten gyi khams mya ngan dang / gnod pa thams cad las 'das pa zhes bya ba na de bzhin gshegs pa dgra bcom pa yang dag par rdzogs pa'i sangs rgyas yan lag bla ma zhes bya ba bzhugs te/ yang shA ri'i bu/ de bzhin gshegs pa yan lag bla ma'i mtshan gang dag nyan
11a
@#/ /par 'gyur ba de dag thams cad kyis srid pa'i chu'i rgya mtsho chen po las 'jig rten gyi khams mya ngan dang / gnod pa thams cad las sgrol ba zhes bya bar sgrol bar byed do/ /'jig rten thams cad kyi sbyin gnas su'ang 'gyur ro/ /gang dag thos nas dad pa skyed pa de dag thams cad me tog dang 'dra bar gyur te/ 'jig rten thams cad kyi slob dpon du 'gyur ro/ /mthu bo che'i lus ltar mkhregs par 'gyur ro/ /bla na med pa yang dag par rdzogs pa'i byang chub las kyang phyir ldog par mi 'gyur ro/ /yang bud med gang dag de bzhin gshegs pa yan lag bla ma'i mtshan nyan cing thos nas kyang dad pa skyed pa ni des bud med las bsgyur bar 'gyur ro/ /shA ri'i bu/ de bas na rigs kyi bu'am/ rigs kyi bu mos phan yon 'di dag 'dod pa dang / sems can sdug bsngal ba rnams dgrol bar bya ba'i phyir bla na med pa yang dag par rdzogs pa'i byang chub tu sems bskyed par bya na/ de bzhin gshegs pa yan lag gi bla ma'i mtshan mnyan par bya'o/ /'di nas sangs rgyas kyi zhing brgya phrag nyi shu na 'jig rten gyi khams snying po can zhes bya ba na de bzhin gshegs pa dgra bcom pa yang dag par rdzogs pa'i sangs rgyas gser 'od dam pa zhes bya ba bzhugs te/ yang shA ri'i bu/ de bzhin gshegs pa gser 'od dam pa'i mtshan gang dag
11b
nyan cing thos nas kyang dad pa skyed pa de dag thams cad kyis 'od 'thob par 'gyur te/ gang 'di sangs rgyas kyi 'od dang / stobs rnams kyang rab tu 'dzin par 'gyur ro/ /mi 'jigs pa rnams dang| sangs rgyas kyi phan yon rnams kyang rab tu thob par 'gyur ro/ /sangs rgyas thams cad la dad par bya ba dang / bsod nams rgya chen po'ang bya'o/ /bsod nams chung ngus ni 'di la re bar mi bya ste| de bzhin gshegs pa'i bstan pa 'di 'dra bas rdo rje lta bu'i sems bskyed nas byang chub par bya ba'i phyir byang chub tu sems skyed par byed pa ni mtshan 'di thos par mi dka'o/ /bskal pa bcu gnyis su 'khor ba la rgyab kyi phyogs pa byas par 'gyur ro/ /'di nas sangs rgyas kyi zhing bco brgyad na 'jig rten gyi khams mu tig gi dra ba yongs su dag pa na de bzhin gshegs pa dgra bcom pa yang dag par rdzogs pa'i sangs rgyas tshangs pa'i dbang phyug rgyal po zhes bya ba bzhugs te/ yang shA ri'i bu/ de bzhin gshegs pa tshangs pa'i dbang phyug rgyal po'i mtshan gang dag thos par 'gyur zhing thos nas kyang dad pa rab tu 'thob pa dang / thal mo sbyor bar byed pa de dag thams cad de bzhin gshegs pa dang 'bral bar mi 'gyur zhing de nas 'khor los bsgyur ba'i rgyal po byed par 'gyur te/ thams cad kyang bla na med pa yang dag par rdzogs pa'i byang chub las phyir mi ldog par 'gyur ro/ /'di nas sangs rgyas kyi zhing brgya phrag nyi shu na 'jig rten gyi
12a
@#/ /khams zla ba can zhes bya ba na de bzhin gshegs pa dgra bcom pa yang dag par rdzogs pa'i sangs rgyas gser ltar snang ba zhes bya ba bzhugs te/ yang shA ri'i bu| de bzhin gshegs pa gser ltar snang ba'i mtshan gang dag thos par 'gyur ba de dag thams cad tha na rmi lam na'ang chos kyi rang bzhin mig yor dang 'dra bar rgya cher ston par 'gyur ro/ / log par ltung ba'ang mi 'gyur te/ bsod nams kyi phung po chen po dang ldan par 'gyur ro/ /sems can tshad med pa rnams la'ang bde ba dang / yid bde bar byed par 'gyur/ 'jig rten 'dzin par byed/ theg pa chen pos kyang nges par 'byung bar 'gyur ro/ /sangs rgyas kyi zhing bcu'i tha ma na 'jig rten gyi khams me sgron zhes bya ba na de bzhin gshegs pa dgra bcom pa yang dag par rdzogs pa'i sangs rgyas gser gyi 'byung gnas zhes bya ba bzhugs te/ yang shA ri'i bu/ de bzhin gshegs pa gser gyi 'byung gnas kyis sngon byang chub sems dpa'i spyad pa spyod pa na/ bdag bla na med pa yang dag par rdzogs pa'i byang chub tu sangs rgyas pa'i sangs rgyas kyi zhing du sems can gang dag skye bar 'gyur ba dang / 'jig rten gyi khams gzhan dag gi sems can gang dag gis bdag gi ming thos par gyur pa de thams cad bla na med pa yang dag par rdzogs pa'i byang chub las phyir mi ldog par bya ba'i phyir/ de ltar bdag gis sangs rgyas kyi chos/
12b
thams cad yongs su rdzogs par bya'o zhes de snyam du bsams so/ /'di nas sangs rgyas kyi zhing bco brgyad na 'jig rten gyi khams sprang rtsi can na de bzhin gshegs pa dgra bcom pa yang dag par rdzogs pa'i sangs rgyas klu'i dbang phyug rgyal po zhes bya ba bzhugs te/ yang shA ri'i bu/ /de bzhin gshegs pa klu'i dbang phyug rgyal po de'i mtshan gang dag thos par 'gyur ba ni klu rnams kyis gang gi tshe na grong ngam/ phyogs su lce 'bab pa de'i tshe na/ pus mo g.yas pa'i lha nga sa la btsugs te/ 'di skad du smra bar bya'o/ /bden pa gang dang / bden pa'i tshig gis de bzhin gshegs pa klu'i dbang phyug rgyal pos sngon byang chub sems dpa'i spyad pa spyod pa na klur gyur pas/ gang klu rnams kyi nyam nga ba las byung ba de dang / de las thar bar byas/ klu mang po dang / klu mang po brgya dang| klu mang po stong dang / klu mang po brgya stong rnams nyam nga ba las thar bar byas pas/ dge ba'i rtsa ba 'dis bdag bla na med pa yang dag par rdzogs pa'i byang chub mngon par rdzogs par sangs rgyas nas gnas pa'am/ yongs su mya ngan las 'das kyang rung ste/ 'jig rten gyis khams gzhan dag tu'ang klu gang dag gis lce 'bebs pa'am/ gnod pa'i ser ba 'bebs par 'gyur ba'am/ 'jigs pa'am/ nad dam/ gnod pa'am/ nad 'og ba gtong ba der bdag gi ming brjod na gnod pa de dag thams cad med par gyur cig /bden pa'i tshig des bde bar
13a
@#/ /gyur cig ces smon lam btab ste/ shA ri'i bu/ bden pa dang / bden pa'i tshig des sems can de rnams kyi rnam par smin pa'ang bde ba la gzhag go /klu rnams lce gtong ba'ang mtshan brjod pa tsam gyis med par 'gyur te/ klu'i skye gnas de las shi 'phos nas kyang sangs rgyas kyi zhing der skye bar 'gyur zhing bla na med pa yang dag par rdzogs pa'i byang chub las phyir mi ldog par 'gyur ro/ /gang dag yang mos pa dang / mngon par dad par byed pa de dag kyang nyin mtshan du bsod nams kyi phung po dpag tu med par 'gyur ro/ /de dag la sangs rgyas kyi ye shes rnyed dka' ba ma yin no/ /'di nas sangs rgyas kyi zhing bye ba brgya phrag stong gi pha rol na/ 'jig rten gyi khams zla ba lta bu zhes bya ba na de bzhin gshegs pa dgra bcom pa yang dag par rdzogs pa'i sangs rgyas me tog thams cad kyi dri'i dbang phyug rgyal po zhes bya ba bzhugs te/ yang shA ri'i bu/ gang dag de bzhin gshegs pa me tog thams cad kyi dri'i dbang phyug rgyal po de'i mtshan thos par 'gyur ba de dag ni 'jig rten gyi khams gang+gA'i klung gi bye ma snyed du/ 'di lta ste/ tshul khrims kyi spos kyi ngad ldang bar 'gyur ro/ /yang shA ri'i bu/ de bzhin gshegs pa bzhugs sam/ mya ngan las 'das kyang rung / de'i mtshan gang dag thos par 'gyur ba de dag thams cad de dag gis chos/ 'di lta ste/ sangs rgyas kyi chos thams
13b
cad thob pa dang ldan par 'gyur ro/ /de ci'i phyir zhe na/ gang 'di lta ste/ de bzhin gshegs pa de nyid kyi sngon gyi smon lam yin no/ /de bas na sangs rgyas bcom ldan 'das rnams la lhag pa'i bsam pas dad par bya'o/ /'di ltar sangs rgyas bcom ldan 'das rnams la dad par byed pa ni don chen po dang ldan par 'gyur ro/ /sems dad pa gcig gis gang 'dod pa de thob par 'gyur te/ gang 'di 'dra ba'i de bzhin gshegs pa dag gtams pa 'dzin par mdzad pa rnams la gang dag sems dad pa gcig gis thal mo sbyar te/ sangs rgyas la phyag 'tshal lo zhes tshig tu smras nas byams pa la gnas par byed pa ni bla na med pa yang dag par rdzogs pa'i byang chub las phyir mi ldog par 'gyur ro/ /lhag pa'i bsam pas sems dad na chos 'di dag yongs su rdzogs par 'gyur ro/ /de bas na de bzhin gshegs pa'i mtshan rgyun mi 'chad par brjod par bya'o/ /theg pa des 'gro bar 'dod pas de bzhin gshegs pa de'i yon tan rjes su dran par byas nas bskal pa bcu bzhir 'khor ba la rgyab kyis phyogs pa byas par 'gyur ro/ /'di nas sangs rgyas kyi zhing bye ba phrag nyis stong na 'jig rten gyi khams skar ma'i rgyal po dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas sA la'i rgyal po zhes bya ba bzhugs te/ yang shA ri'i bu/ de bzhin gshegs pa sA la'i rgyal po'i mtshan gang dag thos nas
14a
@#/ /dad par mi byed cing 'phya ba dang / sting pa de dag ni lo stong phrag drug cur sems can dmyal ba chen po bsdus gzhom du btso bar 'gyur/ ma dad do zhes tshig tu smras pas lo stong phrag bdun du yi dwags me mdag za ba'i sdug bsngal myong bar 'gyur ro/ /'di nas sangs rgyas kyi zhing lnga bcu rtsa lnga na 'jig rten kyi khams stobs ldan zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas dpa' brtan pa'i sde mtshon chas nyon mongs pa sel ba zhes bya ba bzhugs te/ yang shA ri'i bu/ de bzhin gshegs pa dpa' brtan pa'i sde mtshon chas nyon mongs pa sel pa'i mtshan gang dag thos par 'gyur ba ni tha na rmi lam gyi tshe na'ang rdo rje lta bur 'gyur/ bdud dang / bdud kyi 'khor gyis gdul dka' bar 'gyur/ g.yul chen po las kyang sgrol bar byed pa dang / gang 'di thams cad mkhyen pa'i ye shes kyang 'thob bo/ /yang shA ri'i bu/ gang dag de bzhin gshegs pa de'i mtshan dran pa tsam gyis dad pa skyed pa dang / dga' bar byed pa'i rigs kyi bu'am/ rigs kyi bu mo de dag byang chub kyi phyir spyad pa spyod pa na/ bdag cag gis de bzhin gshegs pa mthong ba dang / mthar phyin par shes par bya'o/ /yang de dag gis byang chub kyi sems 'di ltar bskyed par bya ste/ bdag cag gis bla na med pa yang dag par rdzogs pa'i byang chub las phyir mi
14b
ldog par bya/ rgya cher sems yang dag par rab tu dga' bar bya'o/ /gang dag las bdag cag gis mtshan 'di rna lam du grag cing thos pa dang / dga' ba yang dag par bskyad nas sems can mang po'i don byed par 'gyur te/ de ltar rdzu 'phrul che'o/ /yang shA ri'i bu/ de bzhin gshegs pa'i mtshan gang dag nyan cing thos nas kyang mos par byed pa de'i bsod nams kyi phung po ci yod pa de'i phyogs tsam zhig bshad par bya'o/ /gang la la zhig gis 'jig rten gyi khams gang+gA'i klung gi bye ma snyed rin po ches rab tu gang bar byas te/ sangs rgyas bcom ldan 'das gang+gA'i klung gi bye ma snyed la nyin re zhing sbyin pa phul ba de ltar gang+gA'i klung gi bye ma snyed dang mnyam pa'i bskal par phul ba'i bsod nams kyi phung po des/ mtshan thos pa las byung ba'i bsod nams kyi phung po 'di'i cha 'ga' tsam du'ang brjod par mi bya'o/ /gal te la la zhig gis mtshan 'di mnyan par bya'o snyam nas 'jig rten gyi khams de snyed rin po che sna bdun gyis rab tu gang bar byas te sbyin pa byin na/ de 'ang bsod nams ma byas pas de thos par mi nus so/ /de ci'i phyir zhe na/ ji ste bsod nams ma byas par thos par 'gyur na ni sems can dmyal ba dang / dud 'gro'i skye gnas dang / gshin rje'i 'jig rten pa rnams dang / lha tshe ring po rnams kyis kyang thos pa dang / yon tan brjod pa 'di shes par 'gyur te/ de dag thams cad bsod nams
15a
@#/ /kyi phung po de snyed dang ldan par 'gyur ro/ /sangs rgyas kyi zhing bcu pa'i 'jig rten gyi khams dpal ldan na de bzhin gshegs pa dgra bcom pa yang dag par rdzogs pa'i sangs rgyas dpal gyi snying po snang ba zhes bya ba bzhugs te/ shA ri'i bu/ gang dag de bzhin gshegs pa de'i mtshan nyan pa dang / lhag pa'i bsam pa la gnas pa'i sems kyi rgyud kyis mos pa de dag thams cad bsod nams kyi phung po dpag tu med pa 'dzin par 'gyur ro/ /de dag ni ngan song gis 'jigs par mi 'gyur te smon lam ci 'dra bar smon lam 'debs pa de 'dra bas sangs rgyas kyi theg pa bla na med pas yongs su mya ngan las 'da' bar 'gyur ro/ /de bzhin gshegs pa bzhugs kyang rung / mya ngan las 'das kyang rung / gang gis mtshan thos pa de dag thams cad theg pa chen po'i bde ba dang / yid bde ba dang ldan par 'gyur ro/ /lha dang / mi'i nang na 'khor ba na'ang smon lam ji ltar btab pa bzhin du sangs rgyas kyi zhing gi yon tan bkod pa chen pos yongs su mya ngan las 'da' bar 'gyur ro/ /sangs rgyas las byung ba'i bsod nams kyi phung po ni de lta bu ste/ gang dag bskal pa gang+gA'i klung gi bye ma snyed du log par ltung bar 'gyur ba de dag tu 'gro bar mi 'gyur te/ de ltar sangs rgyas la dge ba'i rtsa ba bskyed pa bsam gyis mi khyab bo/ /mtshams med pa
15b
las byung ba dang / 'phags pa la skur pa ma gtogs te/ de dag kyang yun ring po 'das nas ji ltar smon lam btab pa bzhin du yongs su mya ngan las 'da' bar 'gyur ro/ /shA ri'i bu/ sdig pa'i las thams cad ni mi bya ste/ yang ngas sdong dum tshig pa la'ang gnod sems bskyed par mi bya na mir gyur pa lta la ci smos zhes bstan pa yin te/ de dag la'ang zhe sdang bskyed na sems can dmyal ba chen po'i sdug bsngal rnam pa du ma'i lus len par 'gyur na/ de bzhin gshegs pa'i bstan pa la mos pa dang ba'i rjes su 'brang ba dang ldan pa lta la ci smos/ gang de bzhin gshegs pa ye shes mtha' yas pa dang ldan pa la zhe sdang skyed pa lta ci smos te/ skyes bu glen pa de dag bskal pa gcig gam/ gnyis sam/ gsum nas/ bskal pa brgya'i bar du'ang de dag ldang bar ma mthong ste/ de dag ni bskal pa bye ba brgya stong du'ang de las ldang ba med do/ /gang sangs rgyas kyi byang chub 'di la spong ba de dag ni sdug bsngal bar 'gyur ro zhes ngas bshad do/ /gang dag yang gnyis su mi gsung ba'i tshig chos kyi tshul rnam par dag pa la spong bar mi byed pa de dag thams cad kyi phyir mi ldog par byas nas gdod sangs rgyas kyi ye shes su 'gyur ro zhes de ltar sems bskyed par bya'o/ /sangs rgyas kyi zhing brgyad cu pa na 'jig rten gyi khams rgya mtsho'i spos kyis bdugs pa zhes bya ba na de bzhin gshegs pa dgra bcom
16a
@#/ /pa yang dag par rdzogs pa'i sangs rgyas spos dpag med snang ba zhes bya ba bzhugs te/ shA ri'i bu/ yang de bzhin gshegs pa spos dpag med snang ba zhes bya ba'i mtshan gang dag thos par 'gyur zhing thos nas kyang lhag pa'i bsam pas mos pa dang / yid la byed na/ de dag thams cad bla na med pa yang dag par rdzogs pa'i byang chub las phyir mi ldog par 'gyur ro/ /de dag bla na med pa yang dag par rdzogs pa'i byang chub thob nas kyang ba spu'i gseb thams cad nas dri yid du 'ong zhing phyogs su snang bar byed pa 'byung bar 'gyur ro/ /yang shes rab dman pas ni ye shes chen po 'di la smon par mi nus so/ /gang dag shes rab rgya che ba de dag gis ni mtshan 'di yongs su brjod pa thos nas dad par 'gyur ba de dag ngas mthong ngo / /de dag ni sangs rgyas gzhan dag las bskal pa du mar shes rab yang dag par bsgrubs par 'gyur ro/ /shA ri'i bu/ gang dag gis sangs rgyas gzhan dag las chos 'di thos nas/ de dag lnga brgya'i tha ma la 'di thos na ma dad pa dang / yid mi ches par 'gyur ba dang / khong du mi chud par 'gyur ba'i gnas ma yin/ go skabs med do/ /de dag ni bskal pa bzhi bcu rtsa lngar 'khor ba la rgyab kyis phyogs par 'gyur bas 'di ni gnas ma yin zhing skabs med do/ /gang dag 'di la mngon par dad par 'gyur
16b
ba de dag ni shes rab zla ba lta bu dang ldan pa dang / de dag lha dang bcas pa'i 'jig rten thams cad kyi sbyin gnas su 'gyur ro/ /sangs rgyas kyi zhing bco lnga pa 'jig rten gyi khams klu dang ldan pa snang ba zhes bya ba na de bzhin gshegs pa dgra bcom pa yang dag par rdzogs pa'i sangs rgyas seng ge'i dbyangs zhes bya ba bzhugs te/ yang shA ri'i bu/ de bzhin gshegs pa seng ge'i dbyangs de'i mtshan gang dag thos par 'gyur zhing tshul khrims rjes su dran par byed pa dang / mos pa dang / yid ches par byed na/ de dag thams cad dge ba'i chos rnams las mi bskyod pa dang / bskal pa nyi shur 'khor ba la rgyab kyis phyogs pa byas par 'gyur ro/ /de bzhin gshegs pa de'i mtshan bud med gang gis thos par 'gyur ba de mtshan 'gyur zhing 'jig rten na mchod rten dang 'dra bar 'gyur ro/ /sangs rgyas kyi zhing sum cu pa yang ga ra ba ti'i 'jig rten gyi khams na de bzhin gshegs pa dgra bcom pa yang dag par rdzogs pa'i sangs rgyas mthu chen po'i brtson 'grus kyis nges par 'byung ba zhes bya ba bzhugs te/ yang shA ri'i bu/ de bzhin gshegs pa mthu chen po'i brtson 'grus kyis nges par 'byung ba'i mtshan gang dag nyan cing dad pa'ang skyed/ bus mo g.yas pa'i lha nga sa la btsugs te/ de bzhin gshegs pa mthu chen po'i brtson 'grus nges par 'byung ba de la phyag 'tshal lo zhes thal mo sbyar na/ 'khor
17a
@#/ /ba na tshe rabs gzhan du de dag rmongs par mi 'gyur ba dang / bdud dang / mu stegs gzhan du bcas pa dang / pha rol rgol ba thams cad la mtshon cha sra bar 'gyur ro/ /bskal pa nyi shu rtsa lngar 'khor ba la rgyab kyis phyogs pa byas par 'gyur ro/ /sangs rgyas kyi zhing bzhi bcu pa rgya mtsho rab tu gnas pa zhes bya ba'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas snying po zil gyis gnon pa zhes bya ba bzhugs te/ yang shA ri'i bu/ gang dag de bzhin gshegs pa snying po zil gyis gnon pa de'i mtshan nyan pa dang / thos nas kyang dad cing mos pa de dag thams cad snying po la rab tu gnas par 'gyur ro/ /theg pa mchog thob par 'gyur ro/ /'di ltar chos kyi sbyin pa thob pa dang ldan pa ni nyin mtshan du chos kyi sbyin pa'i bsod nams kyi phung po tshad med par 'gyur ro/ /sangs rgyas kyi zhing sum cu rtsa drug gi pha rol na 'jig rten gyi khams snang ba dang ldan pa zhes bya ba na de bzhin gshegs pa dgra bcom pa yang dag par rdzogs pa'i sangs rgyas rnga dbyangs rgyal po zhes bya ba bzhugs te/ yang shA ri'i bu/ gang gis de bzhin gshegs pa rnga dbyangs rgyal po'i mtshan nyan cing sor mo bcu'i thal mo sbyar te/ de bzhin gshegs pa dgra bcom pa yang dag par rdzogs pa'i sangs rgyas rnga dbyangs
17b
dbyangs rgyal po la phyag 'tshal lo zhes zer na gang gis stong gsum gyi stong chen po'i 'jig rten gyi khams 'di rin po che sna bdun gyis rab tu gang bar byas te/ rang sangs rgyas la nyin re zhing sbyin pa byin pa de ltar bskal pa gang+gA'i klung gi bye ma snyed du byin pa'i bsod nams kyi phung pos ni de'i brgya'i char yang nye bar mi 'gro ba nas/ dpe'i bar du'ang mi bzod do/ /sangs rgyas kyi zhing brgya lnga bcu'i pha rol na 'jig rten gyi khams zla ba can zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas zla ba'i bla ma zhes bya ba bzhugs te/ yang shA ri'i bu/ de bzhin gshegs pa zla ba'i bla ma zhes bya ba'i mtshan gang dag nyan pa lha dang / klu dang / gnod sbyin dang / mi dang / mi ma yin pa de dag thams cad mi dge ba'i chos kyis mi gos shing 'jig rten na pad+ma lta bur 'gyur ro/ /gal te bud med nyan par byed dam/ mngon par dad dam/ lhag pa'i bsam pas mos par byed na de'i bud med kyi lus kyi mtha' mar 'gyur ro/ /gang dag yid mi ches shing yongs su spong na de dag sangs rgyas kyi stobs spangs par 'gyur te/ bskal pa nyi shu tshang bar mtshams med pa'i dmyal ba chen por btso bar 'gyur ro/ /yang shA ri'i bu/ gang dag sangs rgyas bcom ldan 'das rnams kyi bsam gyis mi khyab pa nyid la yid ches pa dang / sems pa dang / mos par byed na de nyid kyis bskal pa
18a
@#/ /bcu dgur 'khor ba la rgyab kyis phyogs pa byas par 'gyur ro/ /sangs rgyas kyi zhing bye ba brgya stong phrag gsum gyi pha rol na 'jig rten gyis khams tsan+dan gyi ka ba rab tu gnas pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas me tog zil gyis gnon pa zhes bya ba bzhugs te/ yang shA ri'i bu| gang gis de bzhin gshegs pa me tog zil gyis gnon pa zhes bya ba sngon byang chub sems dpa'i spyad pa spyod pa na/ de 'di snyam du gyur te/ bdag bla na med pa yang dag par rdzogs pa'i byang chub tu mngon par rdzogs par sangs rgyas pa'i sangs rgyas kyi zhing du mi khom pa brgyad po thams cad 'byung bar ma gyur cig ces ji ltar smon lam btab pa bzhin du/ de bzhin gshegs pa de'i sangs rgyas kyi zhing yongs su dag ste/ sangs rgyas de'i zhing gi sems can rnams shin tu bde ba dang ldan no/ /yang shA ri'i bu/ gang dag de bzhin gshegs pa'i mtshan nyan cing dad pa'ang skyed par byed pa ni 'jig rten na ngo mtshar du gyur te/ mngon par rdzogs par sangs rgyas na'ang / sangs rgyas kyi zhing mi khom pa brgyad med par 'gyur ro/ /sangs rgyas kyi zhing bye ba brgya stong phrag gnyis kyi pha rol na 'jig rten gyi khams dzam+bu'i chu bo rab tu gnas pa zhes bya ba na/ de bzhin gshegs pa dgra bcom pa
18b
yang dag par rdzogs pa'i sangs rgyas/ 'jig rten gyi sgron ma zhes bya ba bzhugs te/ yang shA ri'i bu/ gang dag de bzhin gshegs pa 'jig rten gyi sgron ma'i mtshan nyan na/ mtshams med pa'i las byas pa dang / 'phags pa la skur pa 'debs pa ma gtogs par de dag thams cad ngan song gi gzhi las thar bar 'gyur ro/ /dkon mchog dam pa 'thob pa'i rgyur yang 'gyur ro/ /gang dag mtshams med pa'i las byed pa dang / 'phags pa la skur pa 'debs pas thos na'ang de dag kyang de'i las zad nas mthar gyis sangs rgyas su 'gyur ro/ /bskal pa nyi shur 'khor ba la rgyab kyis phyogs pa byas par 'gyur ro// //bam po gnyis pa/ sangs rgyas kyi zhing bye ba brgya stong phrag brgyad 'das pa ni/ 'jig rten gyi khams 'od gsal zhes bya ba na de bzhin gshegs pa dgra bcom pa yang dag par rdzogs pa'i sangs rgyas me zhes bya ba bzhugs te/ shA ri'i bu/ de ji snyam du sems/ ci'i phyir 'jig rten gyi khams 'od gsal zhes bya zhe na/ stong gsum gyi stong chen po'i 'jig rten gyi khams de thams cad lag mthil ltar mnyam la pad+mo ltar snang ste/ shA ri'i bu/ 'jig rten gyi khams de na'ang mun pa'i nang na me'i phung po ltar gzi brjid 'bar zhing lham me/ lhan ne/ lhang nges zhing chos ston pas stong sum gyi stong chen po'i 'jig rten gyi khams dbyangs kyis go/
19a
@#/ /bar mdzad do/ /gang yang 'di stong gsum gyi stong chen po'i 'jig rten gyi khams gser gyi spang leb kyis g.yogs pa/ shing thams cad gos kyis brgyan nas sangs rgyas bcom ldan 'das gang+gA'i klung gi bye ma snyed du grangs med pa la nyin re zhing sbyin pa 'bul zhing de bzhin du bskal pa gang+gA'i klung gi bye ma snyed du mnyam par phul ba bas| gang gis de bzhin gshegs pa de'i mtshan thos na de'i bsod nams kyi phung po de la bsod nams kyi phung po 'dis brgya'i char yang nye bar mi 'gro ba nas rgyu'i bar du'ang nye par mi 'gro'o/ /gang dag thos nas dga' ba rnyed cing gang 'dod pa de la nan tan byed pa/ bskal pa drug cur 'khor ba la rgyab kyis phyogs pa byas par 'gyur ro/ /bla na med pa'i sangs rgyas kyi zhing yang 'dzin par 'gyur ro/ /shA ri'i bu/ shar phyogs na 'jig rten gyi khams kun tu bkod pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rin po che'i smang zhes bya ba bzhugs so/ /shA ri'i bu/ shar phyogs na 'jig rten gyi khams sangs rgyas zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rtag par yongs su mya ngan las 'das pa zhes bya ba bzhugs te/ phyir mi ldog pa'i chos kyi 'khor lo rab tu bskor
19b
ro| |shA ri'i bu/ shar phyogs na 'jig rten gyi khams ri rab kyi ngos zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas zug rngu med pa'i blo zhes bya ba bzhugs so/ /shA ri'i bu/ shar phyogs na 'jig rten gyi khams phongs pa dang bral ba zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas sprul pa tshad med par snang ba zhes bya ba bzhugs so/ /shA ri'i bu/ shar phyogs na 'jig rten gyi khams gos ka ca lind ltar reg na 'jam pa zhe bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas ri rab rnam par gnon pa zhes bya ba bzhugs so/ /shA ri'i bu/ shar phyogs na 'jig rten gyi khams mnyam pa dam pa'i dpal dang ldan pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rin po che'i glang po dam pa zhes bya ba bzhugs so/ /shA ri'i bu/ shar phyogs na 'jig rten gyi khams rin po che 'byung ba zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rin po che 'dus pa'i dpal zhes bya ba bzhugs so/ /shA ri'i bu/ shar phyogs na 'jig rten gyi khams rnam par ma dag pa dang bral ba zhes bya ba yod de/ /de na de bzhin gshegs pa dgra bcom pa yang dag
20a
@#/ /par rdzogs pa'i sangs rgyas phyir mi ldog pa'i 'khor lo rin po che rtag tu don dpal zhes bya ba bzhugs te/ byang chub sems dpa'i dge 'dun gyis bskor nas phyir mi ldog pa'i 'khor lo bskor ro/ /shA ri'i bu/ shar phyogs na 'jig rten gyi khams rnam par dag pa gnas pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas kun tu rnam par snang mdzad rnam par dag pa thob pa zhes bya ba bzhugs te/ shA ri'i bu/ shar phyogs na de dag la sogs pa tshad med pa'i sangs rgyas bcom ldan 'das rnams da ltar bzhugs te 'tsho zhing gzhes la chos kyang ston to/ /bus mo g.yas pa'i lha nga sa la btsugs nas sor mo bcu'i thal mo sbyar te/ de rnams kyi mtshan nas yongs su brjod cing yon tan tshad med pa dang ldan pa'i sangs rgyas bcom ldan 'das de dag la phyag 'tshal lo zhes ched du brjod pa la na gsum du brjod par bya'o/ /shar phyogs na gang dag snang bar mdzad pa de dag gi mtshan nas yongs su brjod par byas na bsod nams kyi phung po tshad med par 'gyur ro/ /lho phyogs na sangs rgyas kyi zhing bye ba brgya phrag stong gi tha ma na 'jig rten gyi khams grol ba can na/ de bzhin gshegs pa dgra bcom pa yang dag par rdzogs pa'i sangs rgyas nyi zla sgron ma zhes
20b
bya ba bzhugs te/ shA ri'i bu/ yang gang dag nyi zla sgron ma de'i mtshan nyan cing thos nas kyang dga' ba cher skyed cing mos par byed pa dang / de bzhin gshegs pa'i bka' la rnam pa brgya stong du bsams nas pa spu zing zhes byed pa dang / mchi ma'ang blags na rigs kyi bu'am/ rigs kyi bu mo de dag gis 'di ltar de bzhin gshegs pa de ni byang chub sems dpa'i spyad pa spyod pa na bdag cag gis mthong ngo snyam du rtogs par bya'o/ /bud med kyis kyang bcom ldan 'das de bzhin gshegs pa nyi zla sgron ma de'i mtshan bdag gis thos kyi/ bdag gi bud med kyi lus kyi mtha' mar 'gyur ro snyam du sems rab tu dga' bar bya ste/ de dag thams cad kyang bla na med pa yang dag par rdzogs pa'i byang chub tu 'gyur ro/ /phyogs bcu'i sems can ji snyed kyis thos pa de dag thams cad bla na med pa yang dag par rdzogs pa'i byang chub las phyir mi ldog par 'gyur te/ sems can 'di dag la ji lta ba bzhin du sems can de dag la sgrib par mi 'gyur ro/ /mi mjed kyi 'jig rten gyi khams na gang yod pa de dag kyang / rtsis pa'am rtsis pa chen po sus kyang rtsi ba'am bsdom par bya sla ba ma yin no/ /'jig rten gyi khams ji snyed du de'i mtshan grags pa'i 'jig rten gyi khams de dag tu bdud sdig can bar chad byed par mi 'gyur te/ de bzhin gshegs pa nyi zla sgron ma de'i mtshan ji snyed kyis thos shing
21a
@#/ /dad pa'ang rnyed pa de dag gi mthar rtogs par sla ba ma yin no/ /yang shA ri'i bu/ mdo sde 'di lta bu nyan pa'i sems can rnams la 'jig rten gyi khams 'di'i bdud sdig can rnams kyis bar chad bya ba'i phyir dpung dang / bzhon par bcas pas brtson par byed de/ de ni sgrib par 'gyur ba'i las byas shing bsags pa'i phyir ro/ /shA ri'i bu/ dus phyi ma 'di lta bu 'byung ste/ de'i tshe sems can gang mtshan brjod pa'i bsod nams 'di la mos shing dad pa'i sems can de dag ni u dum+bA ra'i me tog dang 'dra ste / 'jig rten gyi sbyin par 'os par 'gyur ro/ /de skad ces bka' stsal pa dang / tshe dang ldan pa shA ri'i bus/ bcom ldan 'das la 'di skad ces gsol to/ /bcom ldan 'das / slad ma'i dus na 'di rab tu dka' ba lags na/ de na sems can ji snyed cig gis de bzhin gshegs pa nyi zla sgron ma de'i mtshan thos par 'gyur ba dang / sangs rgyas bcom ldan 'das gzhan gyi mtshan kyang thos nas dad pa yang dag par bskyed par 'gyur ba ji snyed cig mchis/ de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu/ gang gis thos par 'gyur ba de dag ngas mthong ste/ 'di lta ste/ dper na/ de ltar gyi sems can dag mthong
21b
bzhin te| shA ri'i bu/ dper na/ da ltar gyi dge slong gi dge 'dun gos ngur smrig bgos pa'i drung na/ khyim pa gos dkar po gyon pa gcig yod pa de bzhin du gang 'di mtshan thos par 'gyur ba'i sems can de dag rnyed par dka'o/ /thos nas kyang dad par 'gyur ba de dag ni/ shA ri'i bu/ bsod nams kyi phung po dpag tu med pa yongs su 'dzin par 'gyur ro/ /gang dag thos nas dad par 'gyur ba de dag ni/ shA ri'i bu/ phyi ma'i dus na de dag la rnam par ltung ba'i 'jigs pa mi 'byung ngo / /sangs rgyas bcom ldan 'das rnams dang me 'bral par 'gyur ro/ /'jig rten thams cad las bye brag tu 'phags par 'gyur ro/ /sangs rgyas bcom ldan 'das kyis kyang de dag la brtsams nas chos ston par 'gyur te/ de dag sems can mang po'i don byed par 'gyur ro/ /chos bstan pa de la'ang gang dag nyan pa dang / dad pa yang dag par bskyed par 'gyur ba de dag nga'i sangs rgyas kyi byang chub bsam pa thag pa nas 'dzin par 'gyur te/ bskal pa brgyar 'khor ba la rgyab kyis phyogs pa byas par 'gyur ro/ /yang gang dag dad par mi byed pa de dag kyang ngas mthong ste| dper na/ da ltar khyod mthong ba bzhin no/ /de skad ces bka' stsal pa dang / tshe dang ldan pa shA ri'i bus/ bcom ldan 'das la 'di skad ces gsol to/ /bcom ldan
22a
@#/ /'das/ sangs rgyas bcom ldan 'das de dag gi mtshan gang dag thos nas de dag dad par mi bgyid cing sangs rgyas kyi byang chub 'di'ang spong bar bgyid pa de dag la bsod nams ma lags pa'i phung po ji tsam du 'gyur/ bcom ldan 'das kyis bka' stsal pa/ shA ri'i bu/ de dag ni sems can dmyal bar lo bye ba drug cur gnas shing de na sdug bsngal chen po'i tshor ba myong bar 'gyur ro/ /shA ri'i bu/ phyogs gang du bstan pa rab tu 'bar bar gyur pa de na/ dam pa'i chos spong ba'i skyes bu blun po shin tu mang bar gyur te/ de bas na/ shA ri'i bu/ chos kyi rnam grangs 'di la spong bar mi byed pa'i rigs kyi bu'am/ rigs kyi bu mo de dag gis dga' ba rgya chen po yang dag par bskyed cing / bdag ni ngan song thams cad las thar to snyam nas ba dan bsgreng bar bya'o/ /gal te la la zhig gis/ 'di skad du/ stong gsum gyi stong chen po'i 'jig rten gyi khams rin po ches gang bar byas nas mtshan 'di mnyan par bya'o zhes de skad zer na/ des chung du zhig smras pa yin te/ thams cad mkhyen pa'i ye shes khong du chud pa la gnas par 'dod pas/ 'jig rten gyi khams gang+gA'i klung gi bye ma snyed grangs med pa rin po ches yongs su gang bar byas nas mnyan par bya'o/ /sangs rgyas kyi zhing stong phrag bcu pa na 'jig rten gyi khams
22b
tshul khrims kyi 'od dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas ri rab ces bya ba bzhugs te/ yang shA ri'i bu/ gang gis de bzhin gshegs pa ri rab de'i mtshan thos par 'gyur ba de dag ni tha na rmi lam na'ang 'phags pa la skur pa 'debs par mi 'gyur ro/ /lhag pa'i bsam pa yang dag par 'gyur ro/ /de dag bla na med pa yang dag par rdzogs pa'i byang chub las phyir mi ldog cing chos rnams la'ang rmi lam lta bur myur du rab tu shes par gyur te/ bskal pa brgyad du 'khor ba la rgyab kyis phyogs pa byas par 'gyur ro/ /sangs rgyas kyi zhing lnga stong pa na 'jig rten gyi khams gzugs gser mdog bzang po zhes bya ba na de bzhin gshegs pa dgra bcom pa yang dag par rdzogs pa'i sangs rgyas ri rab mngon pa zhes bya ba bzhugs te/ yang shA ri'i bu/ gang gis de bzhin gshegs pa ri rab mngon pa'i mtshan thos par 'gyur ba dang / mtshan rgyun mi 'chad par 'dzin pa de dag ni bskal pa bcur 'khor ba la rgyab kyis phyogs pa byas par 'gyur ro/ /sangs rgyas kyi zhing stong phrag nyi shu na 'jig rten gyi khams snang ba can zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas ri rab 'dra ba zhes bya ba bzhugs te/ shA ri'i bu/ yang gang dag de bzhin gshegs pa ri rab 'dra ba de'i mtshan nyan
23a
@#/ /cing thos nas kyang tha na se gol gtogs pa tsam yang ri mor bskyed nas yid la byed pa ni/ shA ri'i bu/ gang gis stong gsum gyi stong chen po'i 'jig rten gyi khams 'di dzam+bu'i chu bo'i gser gyi spang leb bting nas sbyin pa byin pa bas/ gang gis de bzhin gshegs pa 'di yid la byed na/ bsod nams kyi phung po 'dis snga ma'i bsod nams kyi phung po'i brgya'i char yang nye bar mi 'gro ba nas/ rgyu'i bar du gang mi bzod do/ /de ci'i phyir zhe na/ de ltar sangs rgyas kyi sgra ni mthu chen po yin te/ gang de bzhin gshegs pa bzhugs pa la bsti stang byad pa dang / mya ngan las 'das pa'i sku gdung la mchod pa byed pa lta ci smos/ sangs rgyas kyi zhing stong phrag grangs med pa 'das nas 'jig rten gyi khams stobs kyi shugs thams cad thob pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas kun tu spos zhes bya ba bzhugs te/ yang shA ri'i bu/ de bzhin gshegs pa kun tu spos de byang chub sems dpa'i spyad pa spyod pa na smon lam 'di ltar btab ste/ gang bdag gis sangs rgyas la bkur sti byas pa dang / gang yang de bzhin gshegs pa sprin stug po la bdug spos kyi ril bu yungs 'bru tsam bsregs pas dge ba'i rtsa ba bsgrubs pa/ dge ba'i rtsa ba des bla na med pa yang dag
23b
par rdzogs pa'i byang chub mngon par rdzogs par sangs rgyas pa na/ ba spu'i khung bu thams cad nas dri yid du 'ong ba 'byung bar gyur cig/ byung nas kyang phyogs bcu'i 'jig rten gyi khams gang+gA'i klung gi bye ma snyed spos kyi sprin gyis rgyas par gyur te/ gang 'jig rten gyi khams de dag gi sems can rnams kyis/ dri ma bsnoms shing mtshan kyang thos par gyur pa de dag thams cad byang chub thob pa'i tshe ba spu'i khung bu nas dri yid du 'ong ba 'byung bar gyur cig ces byas so/ /shA ri'i bu/ yang dag par blangs pa gang gis de bzhin gshegs pa kun tu spos nges par byung ba'i yang dag par blangs pa des nges par 'byung bar 'dod pa'i rigs kyi bu'am/ rigs kyi bu mos zhag bdun du zan chad de kha zas ma zos kyang mtshan nyan pa de lta bu ni yon tan yongs su brjod par 'gyur ro/ /de ci'i phyir zhe na/ de thos ma thag tu bsod nams kyi phung po tshad med pa yongs su 'dzin par 'gyur ro/ /de nas tshe dang ldan pa shA ri'i bus/ bcom ldan 'das la 'di skad ces gsol to/ /de bzhin gshegs pa kun tu spos kyi yon tan brjod pa nyan pa'i bsod nams kyi tshogs bcom ldan 'das kyis brjod du gsol/ de la slad ma'i dus kyi tshe rigs kyi bu'am/ rigs kyi bu mos de dag thos nas dga' ba dang / rangs pa rgya chen po 'thob par 'gyur ro/ /gang ji lta ji lta
24a
@#/ /bur sangs rgyas kyi chos nyan pa de lta de lta bur bdud sdig can gyis glags mi rnyed par 'gyur ro/ /de ci'i slad du zhe na/ 'di ltar de dag sangs rgyas kyis dgongs par 'gyur te/ de'i tshe de dag bla na med pa yang dag par rdzogs pa'i byang chub ma spangs par 'gyur ro/ /bcom ldan 'das kyis bka' stsal pa/ shA ri'i bu/ de bzhin gshegs pa kun tu spos kyi bsod nams kyi tshogs gang ci yod pa thams cad ngas khyod la bshad na sems can rnams myos par 'gyur te/ de dag mtshan thos pa'i dge ba'i rtsa ba la mos pa'am/ dad par 'gyur ba'i bsod nams dang ldan pa med do/ /shA ri'i bu/ gang dag mos pa dang / dad pa dang / de bzhin du sems yang dag par dga' bar byed cing bdag ni sangs rgyas kyi chos las phyir ma log pa'o snyam du sems na/ shA ri'i bu/ bsod nams kyi phung po de'i phyogs tsam zhig bstan par bya'o/ / mkhas pa dag ye shes chen po dang ldan par gyur pa dgongs te gsungs pa la 'jug par 'gyur ro/ /yang shA ri'i bu/ sangs rgyas kyi zhing mi mdzed tsam gyi 'jig rten gyi khams bcu rin po che sna bdun gyis yongs su gang bar byas te/ tshad med pa'i sangs rgyas la bskal pa tshad med nyin re zhing sbyin pa byin pa bas snga ma'i bsod nams kyi
24b
phung po'i cha gang du'ang brjod du mi rung ngo / /gang gis tshad med pa dang ldan pa'i de bzhin gshegs pa la rjes su dran nas yan lag lngas phyag byas pa'i bsod nams kyi phung po ni bsod nams kyi phung po de bas ches tshad med/ ches grangs med par 'gyur te/ de dag bskal pa brgyar 'khor ba la rgyab kyis phyogs pa byas par 'gyur ro/ /sangs rgyas kyi zhing bye ba phrag bcu 'das nas 'jig rten gyi khams dri ma med pa'i 'od dang ldan pa na/ de bzhin gshegs pa dgra bcom pa yang dag par rdzogs pa'i sangs rgyas snang ba yongs su dag pa zhes bya ba bzhugs te/ yang shA ri'i bu/ gang dag gi de bzhin gshegs pa 'od yongs su dag pa de'i mtshan nyan pa dang / se gol gtogs pa srid du'ang byams pa'i sems sgom zhing mngon par dad par byed pa dang / mos par byed cing bdag gis de bzhin gshegs pa'i mtshan thos pa dang / byams pa'i sems bsgoms pa'i bdag gi dge ba'i rtsa ba 'dis sems can thams cad sangs rgyas kyi ye shes dang ldan par gyur cig ces tshig 'di skad du smra na/ shA ri'i bu/ de'i bsod nams kyi phung po ni/ shA ri'i bu/ gang gi 'jig rten gyi khams gang+gA'i klung gi bye ma snyed rin po che sna bdun gyis rab tu gang bar byas te/ gang+gA'i klung gi bye ma snyed kyi sangs rgyas la nyin re zhing sbyin pa phul
25a
@#/ /ba de bzhin du bskal pa gang+gA'i klung gi bye ma snyed du sbyin pa phul ba 'di bas snga ma'i bsod nams kyi phung po la/ bsod nams kyi phung po 'dis ci'i cha tsam du'ang mi bzod do/ /de ci'i phyir zhe na/ bsod nams kyi phung po snga mas ni byang chub thob par 'gyur ro/ /de ci'i phyir zhe na/ shA ri'i bu/ gang dag chos kyi sbyin pa la 'dzud par byed pa'i byang chub sems dpa' chos kyi sbyin pa la dpa' ba de ni bla na med pa yang dag par rdzogs pa'i byang chub tu nye bar gyur pa yin no/ /de bas na/ shA ri'i bu/ chos kyi sbyin pa mchog la gzud par bya yi zang zing gi sbyin pa la gzud par mi bya'o/ /gang dag skyes bu dam pa de dag la sbyin pa sbyin par byed pa de dag gis chos kyi sbyin pa nyid sbyin par bya yi/ zang zing gi sbyin pa ni ma yin te/ de dag bla na med pa yang dag par rdzogs pa'i byang chub tu bsnyen par 'gyur ro/ /bskal pa brgyad cu'i bar du 'khor ba la rgyab kyis phyogs pa byas par 'gyur ro/ /sangs rgyas kyi zhing stong phrag brgya na 'jig rten gyi khams chos ldan zhes bya ba na de bzhin gshegs pa dgra bcom pa yang dag par rdzogs pa'i sangs rgyas chos kyi bla ma zhes bya ba bzhugs te/ yang shA ri'i bu/ gang dag de bzhin gshegs pa chos kyi bla ma de'i mtshan nyan pa dang / dad pa'ang
25b
skyed pa dang / thal mo sbyor bar byed cing de dag thams cad/ 'di lta ste/ sangs rgyas kyi chos 'di la chos grub par bya ba'i phyir slob par 'gyur ro/ /phan yon 'di dag 'dod pas ri mor byas te mos par bya'o/ /de bzhin gshegs pa rnams kyi yon tan yongs su brjod pa la so so'i skye bo'i shes pas de bzhin gshegs pa'i ye shes la tshad gzung bar mi bya ste/ gang sangs rgyas bcom ldan 'das rnams kyi ye shes de ni rang sangs rgyas rnams kyis kyang ma yin pas na/ dpe 'di dag thos pa las sangs rgyas kyi ye shes la brnyas par mi bya ste/ sems bskyed pa gcig gam/ ngag gi las gcig gis sems can dmyal ba chen po'i lus rnam pa du mar 'gyur ba'i las yongs su gzung bar mi bya'o/ /de ci'i phyir zhe na/ sangs rgyas bcom ldan 'das rnams 'jig rten du 'byung ba'ang dka'/ mir 'gyur ba dang / dal ba phul sum sogs pa bsgrub pa'ang shin tu dka'o/ /de'i phyir dpe zhig bstan par bya ste/ shA ri'i bu/ dper na/ sa chen po 'di rgya mtsho chen po gcig tu gyur te/ de'i nang na gnya' shing bug gcig pa zhig yod la/ rus sbral zhar ba zhig kyang yod de/ rgya mtsho chen po de la rlung yar ldang ba mar ldang ba zhes bya ba ldang ba la/ rus sbal zhar ba de'ang lo brgya brgya zhing lan gcig phyir 'byung ba rab tu myur bar gnya' shing gi bug gcig pa der/ rus sbal zhar ba lo
26a
@#/ /brgya brgya zhing phyir byung ba'i mgul pa chud par smra yi/ log par ltung ba las phyir yang mir 'gyur ba ni de lta ma yin te/ de ltar log par ltung ba rnams kyi mir 'gyur ba rab tu dka' ba yin no/ /gang yang mi khom pa la sogs pa spangs te/ da ltar mir 'gyur ba thob nas sangs rgyas byung ba la'ang mnyes par byas te/ de bzhin gshegs pa 'jig rten thams cad kyi mchog gi ye shes dam pa mnga' ba la dad pa thob nas bdag gis mir 'gyur ba legs par thob kyi/ de bzhin gshegs pa thams cad mkhyen pa'i ye shes chen po dang ldan pa la bdag gis sems bskyed pa gcig tsam yang mos par bya'o snyam nas bdag nyid yang dag par dga' bar bya'o/ /de dag gis bskal pa sum cur 'khor ba la rgyab kyis phyogs pa byas par 'gyur ro/ /sangs rgyas kyi zhing stong phrag lnga bcu rtsa ldan 'jig rten gyi khams rgyu ba'i dbang po zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas spos kyi dbang phyug rgyal po zhes bya ba bzhugs te/ yang shA ri'i bu/ gang de bzhin gshegs pa spos kyi dbang phyug rgyal po'i mtshan nyan pa dang / dad pa bskyed par 'gyur pa dang / mos par byed cing thal mo sbyar te/ tshig 'di skad du/ bcom ldan 'das de bzhin gshegs pa spos kyi dbang phyug rgyal po la phyag
26b
'tshal lo zhes zer na de dag gi bsod nams kyi phung po tshad med par 'gyur te/ de'i phyogs tsam zhig bstan par bya'o/ /yang shA ri'i bu/ gang gis stong gsum gyi stong chen po'i 'jig rten gyi khams 'di rin po che sna bdun gyis rab tu gang bar byas nas sangs rgyas bcom ldan 'das la nyin re zhing sbyin pa phul te/ de bzhin du 'bul zhing lo stong du phul ba bas/ gang gis de bzhin gshegs pa'i mtshan thos nas dad pa yang dag par bskyed pa dang / mos par byed cing thal mo sbyar te/ bcom ldan 'das de bzhin gshegs pa spos kyi dbang phyug rgyal po la phyag 'tshal lo zhes tshig de skad du smra ba 'di'i bsod nams kyi phung po la snga ma'i bsod nams kyi phung pos brgya'i char yang nye bar mi 'gro ba nas/ dper yang mi bzod de| bskal pa sum cur 'khor ba la rgyab kyis phyogs pa byas par 'gyur ro/ /sangs rgyas kyi zhing stong phrag bcu na 'jig rten gyi khams bden pa dang ldan pa zhes bya ba ni/ de bzhin gshegs pa dgra bcom pa yang dag par rdzogs pa'i sangs rgyas yon tan chen po zhes bya ba bzhugs te/ yang shA ri'i bu/ gang de bzhin gshegs pa yon tan chen po de'i mtshan nyid par 'gyur ba nges pa la zhugs pa ma gtogs par de dag thams cad sangs rgyas kyi chos thams cad grub par byed par 'gyur ro/ /sangs rgyas kyi zhing stong phrag
27a
@#/ /brgyad na 'jig rten gyi khams rgyan chen po dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas spos 'od ces bya ba bzhugs te/ shA ri'i bu/ de bzhin gshegs pa spos 'od byang chub sems dpa'i spyad pa spyod pa na bdag bla na med pa yang dag par rdzogs pa'i byang chub mngon par rdzogs par sangs rgyas pa'i ming gang gis nyan pa dang / gang nyan pa dang / thos nas kyang mos par 'gyur ba de dag thams cad bla na med pa yang dag par rdzogs pa'i byang chub las phyir mi ldog par 'gyur cig /de dag phyi ma la ngan song du 'gro bar ma gyur cig ces smon lam de ltar btab par gyur to/ /yang shA ri'i bu/ de bzhin gshegs pa de'i mtshan gang nyan cing thos nas kyang / lhag pa'i bsam pas mos par byed pa ni sngon gyi smon lam des de dag thams cad bla na med pa yang dag par rdzogs pa'i byang chub las phyir mi ldog par 'gyur ro/ /sangs rgyas kyi zhing du sum cu na 'jig rten gyi khams dri ma med pa dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas 'od 'phro zhes bya ba bzhugs te/ shA ri'i bu/ de bzhin gshegs pa 'od 'phro de'i mtshan thos par 'gyur ba nyung ste/ thos nas mos pa dang / dad par
27b
'gyur ba de dag gi bsod nams kyi phung po tshad med par 'gyur ro/ /gang nyan par mi byed pa de dag ni bsod nams ma yin pa'i phung po tshad med pa yongs su 'dzin par 'gyur ro/ /sangs rgyas kyi zhing stong phrag bco lnga na 'jig rten khams kun tu dga' ba dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas 'od tshad med ces bya ba bzhugs te/ yang shA ri'i bu/ gang de bzhin gshegs pa 'od tshad med de'i mtshan nyan par 'gyur ba dang / lhag pa'i bsam pas dad par byed pa de dag thams cad de bzhin gshegs pa de'i 'od thob par 'gyur ro/ /gang dad par mi byed pa de dag bskal pa nyi shur tsha ba'i sems can dmyal bar btso bar 'gyur ro/ /sangs rgyas kyi zhing stong phrag nyi shu na/ 'jig rten gyi khams snying po dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas 'od btang ba zhes bya ba bzhugs te/ yang shA ri'i bu/ gang de bzhin gshegs pa 'od btang ba de'i mtshan nyan par 'gyur ba dang / thos ma thag tu'ang dad pa skyed par byed pa de dag thams cad bdud sdig can gyis thub par dka' bar 'gyur ro/ /sangs rgyas kyi zhing nyis stong lnga brgya na 'jig rten gyi khams spug gi shing tog dang ldan pa zhes bya ba na/ de bzhin gshegs pa
28a
@#/ /dgra bcom pa yang dag par rdzogs pa'i sangs rgyas zla ba'i sgron ma zhes bya ba bzhugs te/ shA ri'i bu/ yang gang de bzhin gshegs pa zla ba'i sgron ma de'i mtshan nyan par 'gyur ba de dag lha dang bcas pa'i 'jig rten gyi sbyin gnas su 'gyur ro/ /de dag yul gang na gnas pa'i yul de'ang mchod rten du 'gyur ro/ /de ci'i phyir zhe na/ phyi ma'i dus na de bzhin gshegs pa'i mtshan nyan par 'gyur ba'i skyes bu dam pa de dag ni dkon to/ /sangs rgyas kyi zhing stong phrag brgyad na 'jig rten gyi khams dri mchog ces bya ba na/ de bzhin gshegs pa zla 'od ces bya ba bzhugs te/ shA ri'i bu/ gang de bzhin gshegs pa zla 'od de mtshan nyan par 'gyur ba dang / tha na rmi lam gyi tshe thos na'ang dad pa yang dag par skyed pa de dag thams cad bsod nams kyi phung po chen por skyed par 'gyur ro/ /ri dang 'dra bar bdud thams cad kyis mi bskyod par 'gyur ro/ / sangs rgyas kyi zhing stong phrag bcu gnyis na 'jig rten gyi khams nyi ma dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas zla ba snang ba zhes bya ba bzhugs te/ shA ri'i bu/ de bzhin gshegs pa zla ba snang ba'i sangs rgyas kyi zhing na ngan song gi gzhi med do/ /shA ri'i bu/ de bzhin gshegs pa de'i
28b
smon lam sngon 'di ltar btab ste/ byang chub thob pa'i mtshan dang / mya ngan las 'das pa thos pa de dag thams cad kyis bla na med pa yang dag par rdzogs pa'i byang chub las phyir mi ldog par gyur cig /bdag gi sangs rgyas kyi zhing gi bkod pa de dag gi sangs rgyas kyi zhing gi bkod pa'ang / da ltar gyi bdag gi ci 'dra ba de 'dra bar gyur cig ces byas so/ /shA ri'i bu/ gang la la zhig gis de bzhin gshegs pa zla ba snang ba'i mtshan nyan par 'gyur ba de dag thams cad kyang sngon byang chub sems dpa'i spyad pa spyod pa na ji ltar smon lam btab pa de bzhin du 'gyur ro/ /sangs rgyas kyi zhing stong phrag bco brgyad na 'jig rten gyi khams gser gyi nor bu snang ba dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas me 'od ces bya ba bzhugs te/ shA ri'i bu/ gang de bzhin gshegs pa me 'od kyi mtshan nyan par 'gyur ba de dag thams cad chos kyi sgron ma thogs par 'gyur/ 'jig rten thams cad dang / sems can rnams 'khor ba'i rgya mtsho las sgrol bar 'gyur ro/ /de dag gi nyin mtshan sems can rnams la phan 'dogs pa la zhugs pas 'da' bar 'gyur ro/ /de dag chos kyi sbyin pa mngon par gtong ngo / /de dag ni bdud thams cad dang / mu stegs can gzhan gyis mi thub par 'gyur ro/ /sangs
29a
@#/ /rgyas kyi zhing stong phrag bcu na 'jig rten gyi khams gzugs snang ba dang ldan pa zhes bya ba na/ de bzhin gshegs pa rnam par rgyal ba'i dbyangs zhes bya ba bzhugs te/ ci'i phyir 'jig rten gyi khams de gzugs snang ba dang ldan pa zhes bya zhe na/ 'jig rten gyi khams der sems can gang su dag skyes pa dang / skye ba dang| skye bar 'gyur ba de dag thams cad mi'i kha dog las 'das par 'gyur ba yin/ sems can de dag thams cad gzugs bzang zhing mdzes par 'gyur ba yin no| |shA ri'i bu/ gang dag de bzhin gshegs pa rnam par rgyal ba'i mtshan nyan pa de dag thams cad bla na med pa'i sangs rgyas kyi chos kyis gzugs bzang por 'gyur ro/ /sangs rgyas kyi zhing stong phrag bcu gsum na 'jig rten gyi khams rnam par rgyal ba dang ldan pa na de bzhin gshegs pa mchog mdzad ces bya ba bzhugs te/ yang shA ri'i bu/ gang de bzhin gshegs pa mchog mdzad de'i mtshan nyan par 'gyur ba dang / dad pa'ang skyed par 'gyur ba ni lha dang / mi dang / lha ma yin du bcas pa'i 'jig rten gyi mchog tu 'gyur ro/ / bskal pa nyi shur 'khor ba la rgyab kyis phyogs pa byas par 'gyur ro/ /sangs rgyas kyi zhing bye ba brgya stong gi tha ma na 'jig rten gyi khams g.yul las rnam par rgyal te rgal
29b
ba zhes bya ba na de bzhin gshegs pa dgra bcom pa yang dag par rdzogs pa'i sangs rgyas mang po'i bla ma zhes bya ba bzhugs te/ shA ri'i bu/ gang de bzhin gshegs pa mang po'i bla ma'i mtshan lha'am/ klu'am/ gnod sbyin nam/ mi'am/ mi ma yin pa nyan par 'gyur ba de nyid de dag thams cad kyi bla na med pa yang dag par rdzogs pa'i byang chub kyi rgyur 'gyur ro| |de dag gis bskal pa sum cur 'khor ba la rgyab kyis phyogs pa byas par 'gyur ro/ /gang dag mtshan 'di la dad par mi byed pa de dag ni bskal pa nyid shu dang / lo stong du dmyal bar btso bar 'gyur ro/ /sangs rgyas kyi zhing lnga stong na 'jig rten gyi khams rin po che sna bdun zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas pad+ma'i sde zhes bya ba bzhugs te/ shA ri'i bu/ gang dag stong gsum gyi stong chen po'i 'jig rten gyi khams rin po ches rab tu gang bar byas te/ sangs rgyas bcom ldan 'das pa nyin re zhing spyin pa phul la de bzhin du bskal pa gang+gA'i klung gi bye ma snyad dang mnyam par sbyin pa phul nas de 'di snyam du sems te/ bdag gis rin po che 'di yongs su btang ba 'dis de bzhin gshegs pa pad+ma'i sde de'i mtshan thos par gyur cig snyam ste/ gang sangs rgyas mthong ba de dag gis thos par nus so/ /de ci'i phyir zhe na/ shA ri'i bu/
30a
@#/ /de bzhin gshegs pa de ni spyod pa bsam gyis mi khyab pa las nges par byung ba ste/ gang dag de bzhin gshegs pa de'i mtshan nyan par 'gyur ba dang| dad pa'ang skyed par 'gyur ba de dag ni pad+ma chu las byung ba bzhin khams gsum thams cad las mngon par 'phags par 'gyur ro/ /sangs rgyas kyi zhing stong phrag sum cu na 'jig rten gyi khams zla ba can na de bzhin gshegs pa dgra bcom pa yang dag par rdzogs pa'i sangs rgyas pad mo'i dbyangs zhes bya ba bzhugs te/ shA ri'i bu/ de yid la ji snyam du sems/ ci'i phyir pad+mo'i dbyangs zhes bya zhe na/ de bzhin gshegs pa de pad+ma la bzhugs nas bla na med pa yang dag par rdzogs pa'i byang chub mngon par rdzogs par sangs rgyas pa dang / sum cu rtsa gsum pa'i lha rnams kyis/ kye ma/ de bzhin gshegs pa dgra bcom pa yang dag par rdzogs pa'i sangs rgyas pad mo'i dbyangs byung ngo zhes sgra bsgrags so/ /shA ri'i bu/ gang de bzhin gshegs pa pad+mo'i dbyangs kyi mtshan nyan pa dang / dad pa bskyed par 'gyur ba dang / pus mo g.yas pa'i lha nga sa la btsugs nas de bzhin gshegs pa de la phyag 'tshal lo zhes tshig de skad du smra na mtshams med pa las byung ba dang / 'phags pa la skur ba 'debs pa ma gtogs
30b
par de dag thams cad log par mi ltung ba'i chos can du 'gyur ro/ /sangs rgyas kyi zhing stong phrag sum cu na 'jig rten gyi khams mthu po che dang ldan pa'i sa na/ de bzhin gshegs pa dgra bcom pa yang dag par rdzogs pa'i sangs rgyas rin chen mang zhes bya ba bzhugs te/ ci'i phyir rin chen mang zhes bya zhe na/ sangs rgyas kyi zhing de na byang chub sems dpa' shin tu mang ste| nyan thos kyi theg pa can mang ba ma yin la nyin re zhing yang de'i bstan pa tshad med par phyung ste/ de'i phyir de bzhin gshegs pa rin chen mang zhes bya'o/ /shA ri'i bu/ rigs kyi bu'am/ rigs kyi bu mo gang pus mo g.yas pa'i lha nga sa la btsugs te/ thal mo sbyar nas de bzhin gshegs pa rin chen mang de la phyag 'tshal lo zhes ched du brjod pa lan gsum du rjod par byed na/ de dag ni de bzhin gshegs pa'i sngon gyi smon lam gyi spyod pa yongs su rdzogs par 'gyur te/ de ni g.yog rin po che dang ldan par 'gyur ro/ /sangs rgyas kyi zhing stong phrag nyi shu na 'jig rten gyi khams me tog can zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas seng ge'i nga ro zhes bya ba bzhugs te/ shA ri'i bu/ gang dag de bzhin gshegs pa seng ge'i nga ro'i mtshan nyan pa dang / pus mo g.yas pa'i lha nga sa la btsugs nas/ de bzhin gshegs pa
31a
@#/ /dgra bcom pa yang dag par rdzogs pa'i sangs rgyas seng ge'i nga ro de la phyag 'tshal lo zhes ched du brjod pa lan gsum du rjod par byed na/ de dag thams cad sems can dgrol ba'i phyir 'jig rten gsum zil gyis mnan nas seng ge'i sgrar sgrogs so/ /bskal pa lngar 'khor ba la rgyab kyis phyogs pa byas par 'gyur ro/ / sangs rgyas kyi zhing stong phrag bcu na 'jig rten gyi khams dgon pa can na/ de bzhin gshegs pa dgra bcom pa yang dag par rdzogs pa'i sangs rgyas seng ge'i dbyangs zhes bya ba bzhugs te/ shA ri'i bu/ gang de bzhin gshegs pa seng ge'i dbyangs la rjes su dran par byed cing tha na nam mkha' la'ang me tog gis 'thor ba dang / gang gis de bzhin gshegs pa'i mchod rten btsugs nas sbyin pa yongs su gtong bas de bzhin gshegs pa de la mchod par gyur cig ces mos pa lta ci smos te/ de dag thams cad 'jig rten na me tog lta bur 'gyur ro/ /gsung dbyangs de thob par 'gyur te de nas sangs rgyas kyi gsung dbyangs so/ /sangs rgyas kyi zhing stong phrag bco lnga na 'jig rten gyi khams mya ngan med pa na/ de bzhin gshegs pa dgra bcom pa yang dag par rdzogs pa'i sangs rgyas dpa' bo'i sde zhes bya ba bzhugs te/ shA ri'i bu/ gang de bzhin gshegs pa dpa'
31b
bo'i sde'i mtshan nyan pa dang / dad pa bskyed par 'gyur ba dang / lhag pa'i bsams pas 'jig rten gyi khams mya ngan med pa la'ang mos par byed pa dang / de bzhin gshegs pa de la lhag pa'i bsam pas sems bskyed pa tsam yang dad pa skyed na de dag thams cad kyis de bzhin gshegs pa chos ston pa mthong bar 'gyur ro/ /de ci'i phyir zhe na/ bcom ldan 'das/ de'i sngon gyi smon lam gyis te/ 'jig rten gzhan du byang chub thob pa'i ming thos na de nas shi 'phos nas de dag bdag gi sangs rgyas kyi zhing du sangs rgyas kyi chos thams cad yongs su rdzogs par gyur cig ces smon lam de ltar btab par gyur to/ /gang de bzhin gshegs pa de'i mtshan thos nas dad par mi byed cing spong ba dang / rna ba blags te nyan par mi byed pa de dag ni lo bye ba snyed du sems can dmyal ba'i las yongs su bzung bar 'gyur ro/ /sangs rgyas kyi zhing stong phrag drug cu'i tha ma na 'jig rten gyi khams 'jam dbyangs zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas yang dag par blangs pa thams cad las rgal ba the tshom gcod pa zhes bya ba bzhugs te/ shA ri'i bu/ gang de bzhin gshegs pa yang dag par blangs pa thams cad las rgal ba the tshom gcod pa de'i mtshan nyan pa dang / dad pa bskyed par 'gyur ba dang / mos par byed pa de dag ni gang yang
32a
@#/ /dag par blangs nas tshig tu smra ba de la ji ltar smras pa de ltar byed par 'gyur ro/ /bdud thams cad dang / pha rol rgol ba thams cad btul nas the tshom thams cad gcod pa dang / de bzhin gshegs pa dgra bcom pa yang dag par rdzogs pa'i sangs rgyas su 'gyur ro/ /sangs rgyas kyi zhing stong phrag bco brgyad na 'jig rten gyi khams me tog gi dris bsgos pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas 'khor rin po che dang / me lta bu zhes bya ba bzhugs te/ shA ri'i bu/ gang de bzhin gshegs pa 'khor rin po che dang / me lta bu de'i mtshan nyan pa dang / mtshan thos ma thag tu dad pa bskyed par 'gyur ba de dag thams cad 'khor rin po che dang / me lta bur 'gyur zhing / 'jig rten la'ang chos kyi 'khor lo myur du bskor bar 'gyur ro/ /de ltar na sangs rgyas rnams la dad pa 'di ni rdzu 'phrul che ste/ de dag nyan thos kyi theg pas sam/ rang sangs rgyas kyi theg pas sam/ bla na med pa'i theg pa chen pos kyang rung / bsod nams kyi phung po ji ltar bsngos pa de ltar 'grub ste/ de la gang dag shes rab rgya che ba de dag ni sangs rgyas su 'grub par bya ba'i phyir theg pa chen po bla na med pa yongs su 'dzin to/ /mos pa dman pa'i shes rab can dag ni sangs rgyas su 'grub pa tshad med pa de lta bu btang ste/
32b
de'i 'bras bu 'grub par bya ba'i phyir nyan thos dang / rang sangs rgyas kyi theg pa yongs su 'dzin to/ /gter chen po de lta bu rnyed nas ser sna mi skyed ba dang / de bzhin gshegs pa la yon phul ba la mos par byas nas bla na med pa yang dag par rdzogs pa'i byang chub tu sems bskyed cing bsod nams de thams cad kyang sems can thams cad la phan pa dang / bde bar bya ba'i phyir yongs su bsngo ba 'di ni ngo mtshar du rig par gyis shig /shA ri'i bu/ gang de bzhin gshegs pa de'am/ sangs rgyas gzhan rnams kyi yon tan yongs su brjod pa la dad par mi byed pa de dag thams cad lo stong phrag bzhi bcur sems can dmyal ba chen po thig nag por gnas par 'gyur ro/ /sangs rgyas kyi zhing stong phrag drug cu'i tha ma na 'jig rten gyi khams dga' ba dang bcas par skyed pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas mya ngan med pa zhes bya ba bzhugs te/ shA ri'i bu/ gang de bzhin gshegs pa de'i mtshan thos pa tsam gyis gang dag dga' ba rab tu rnyed pa de dag thams cad nye ba'i nyon mongs pas mi gos shing mya ngan med par 'gyur ro/ /byang chub rjes su thob nas sems can mang po yang mya ngan med par byed do/ /de bzhin gshegs pa bzhugs sam/ mya ngan las 'das kyang rung / de la dad par byed pa'i sems can de dag ni 'jig rten
33a
@#/ /thams cad kyi mchog ngo mtshar du gyur ba ste/ de dag gis bsod nams kyi phung po dpag tu med pa yongs su bzung bar 'gyur ro/ /sangs rgyas bcom ldan 'das rnams dang mi 'bral bar 'gyur ro/ /sangs rgyas kyi zhing stong phrag bcu bzhi na 'jig rten gyi khams 'tsho ba dang ldan pa na/ de bzhin gshegs pa dgra bcom pa yang dag par rdzogs pa'i sangs rgyas dam pa'i dga' ldan zhes bya ba bzhugs te/ shA ri'i bu/ gang dag de bzhin gshegs pa dam pa'i dga' ldan de'i mtshan nyan cing thos nas kyang dga' ba dang / rab tu dga' ba chen po thob nas/ pus mo g.yas pa'i lha nga sa la btsugs te thal mo sbyar nas/ de bzhin gshegs pa dam pa'i dga' ldan de la phyag 'tshal lo zhes tshig tu smra ba de dag thams cad theg pa dam pa 'thob par 'gyur ro/ /sems can mang po'i don kyang byed par 'gyur ro/ /de dag la log par ltung ba'i 'jigs pa mi 'byung ngo / / sangs rgyas kyi zhing stong phrag brgyad na 'jig rten gyi khams zla ba snang ba zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas dbang po'i 'byung gnas zhes bya ba bzhugs te/ shA ri'i bu/ gang dag de bzhin gshegs pa dbang po'i 'byung gnas kyi mtshan gcig nas gcig tu brgyud pa las nyan pa de dag kyang bsod nams
33b
kyi phung po tshad med pa yongs su 'dzin par 'gyur ro/ /mtshan ji tsam du bsgrags pa la lha'am/ klu'am/ gnod sbyin nam/ mi 'am/ mi ma yin pa nyan par 'gyur ba de dag thams cad ye shes chen po las phyir mi ldog par 'gyur ro/ /sangs rgyas kyi zhing bye ba brgya stong phrag gnyis na 'jig rten gyi khams sil snyan thams cad kun nas mtho ba na/ de bzhin gshegs pa dgra bcom pa yang dag par rdzogs pa'i sangs rgyas dbyangs tshad med pa zhes bya ba bzhugs te/ shA ri'i bu/ gang dag de bzhin gshegs pa dbyangs tshad med kyi mtshan nyan cing bdag gi dge ba'i rtsa ba 'dis ye shes dam pa de thob par gyur cig ces de ltar sems pa de dag thams cad bla na med pa yang dag par rdzogs pa'i byang chub tu 'gyur ro/ /'di la dad par mi byed pa de dag sangs rgyas la mi mnyes par byed pa'i rnam par smin pa sems can dmyal ba na gnas pa'i las byed par 'gyur ro/ /'jig rten gyi khams de ci'i phyir sil snyan thams cad kun nas mtho ba zhes bya zhe na/ shA ri'i bu/ de bzhin gshegs pa dbyangs tshad med de dga' ldan gyi gnas nas 'chi 'pho ba nas mya ngan las 'das pa chen po'i bar du/ stong gsum gyi stong chen po'i 'jig rten gyi khams 'di'i lha dang / mi rnams kyi sil snyan de dag rab tu dkrol cing blangs so/ /de'i phyir 'jig rten gyi khams de sil snyan thams cad kun nas mtho ba
34a
@#/ /zhes bya'o/ /ci'i phyir de bzhin gshegs pa de dbyangs tshad med ces bya zhe na/ shA ri'i bu/ de bzhin gshegs pa dbyangs tshad med de chos ston pa na phyogs bcu'i 'jig rten gyi khams brgya phrag nyi shu snyed du dbyangs kyis go bar mdzad pas na/ de bzhin gshegs pa de dbyangs tshad med pa zhes bya'o/ /sangs rgyas kyi zhing bye ba phrag sum brgya'i tha ma na 'jig rten gyi khams rnam par rgyal ba'i 'od ces bya ba na/ de bzhin gshegs pa dgra bcom pa yang dag par rdzogs pa'i sangs rgyas mar me mdzad ces bya ba bzhugs te/ shA ri'i bu/ de bzhin gshegs pa mar me mdzad de'i 'od kyis phyogs bcu'i sangs rgyas kyi zhing bye ba brgya stong kun tu 'od kyi snang bas khyab pas na de'i phyir de bzhin gshegs pa de mar me mdzad ces bya'o/ /shA ri'i bu/ gang dag de bzhin gshegs pa de'i mtshan thos nas dad pa skyed pa dang / dga' ba dang / rab tu dga' ba rgya chen po rnyed cing 'byung ba la g.yo dang ldan par mi 'gyur ro/ /de dag thams cad kyis 'od de thob par 'gyur ro/ /sangs rgyas kyi zhing stong phrag brgyad cu'i pha rol na 'jig rten gyi khams spos thams cad snang ba dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas rin po che snang ba zhes bya ba bzhugs te/ shA
34b
ri'i bu/ gang dag de bzhin gshegs pa rin po che snang ba de'i mtshan nyan pa dang / thos nas kyang dad pa bskyed par 'gyur ba dang / lhag pa'i bsam pas dad par 'gyur ba de dag thams cad rin po che lta bur 'gyur ba dang / sangs rgyas kyi chos las phyir mi ldog pa dang / sangs rgyas bcom ldan 'das dang mi 'bral bar 'gyur ro/ /byang chub sems dpa'i spyad pa spyod pa na bskal pa lngar 'khor ba la rgyab kyis phyogs pa byas par 'gyur ro/ /de bas na/ shA ri'i bu/ de bzhin gshegs pa dang / theg pa chen po la zhugs pa'i skyes bu chen po rnams la tha ba'i zhe sdang gi sems bskyed par mi bya'o| |shA ri'i bu/ gang dag de bzhin gshegs pa dang / theg pa chen po la zhugs pa'i skyes bu chen po sras thu bo pa rnams la yid mi ches pa bskyed pa de dag gi nges pa la zhugs pa dang / me tog gi tshogs la mos pa ma gtogs par sangs rgyas kyi byang chub nye bar gyur kyang ring du byed par 'gyur ro/ /byang chub sems dpa' sems dpa' chen po'i thad tu 'gro bar mi bya ste/ skyes bu dam pa de dag la gnod sems bskyed pa de dag ni lo bye bar dmyal ba chen po'i sdug bsngal yongs su 'dzin par 'gyur ro/ /dud 'gro'i skye gnas su gyur pa la'ang gnod sems mi skyed do zhes gsungs na skyes bu dam pa de dag lta la ci smos/ shA ri'i bu/ gang dag skyes bu chen po de dag me tog gi tshogs la mos pa de dag la
35a
@#/ /gnod par byed pa dang / yid ches pa mi skyed pa dang / 'khrug par byed pa dang / brnyas par byed pa de dag thams cad sems can dmyal ba'i las shin tu mi bzang pa yongs su 'dzin par 'gyur ro/ /de ci'i phyir zhe na/ skyes bu dam pa de dag byang chub tu sems bskyed nas de las phyir mi ldog pa'i byang chub sems dpa' de dag ni 'jig rten du 'byung ba rab tu rnyed par dka'o/ /de bas na gang dag yang dag par blangs pa la brtan zhing byang chub tu sems bskyed nas zhum par mi byed la/ byang chub mngon par rdzogs par sangs rgyas nas ji ltar gnyer ba rnams la chos kyi sbyin pas tshim par byed pa de dag ni u dum+bA ra'i me tog dang 'dra'o zhes ngas bshad do/ /shA ri'i bu/ de dag la sogs pa tshad med grangs med pa'i sangs rgyas bcom ldan 'das rnams lho phyogs na da ltar bzhugs te 'tsho zhing gzhes la chos kyang ston pa'i phyogs de logs su yan lag lngas phyag byas te mchod la ming ji skad du bstan pa nyan cing / yon tan yongs su bsgrags pa yid la byas na bsod nams kyi phung po tshad med pa yongs su 'dzin par 'gyur ro/ /nub phyogs kyi sangs rgyas kyi zhing bye ba brgya stong gi tha ma na 'jig rten gyi khams bde ba can na/ de bzhin gshegs pa dgra bcom pa yang dag par rdzogs pa'i sangs rgyas tshe dpag med ces bya ba bzhugs te/ shA ri'i bu/ gang
35b
dag de bzhin gshegs pa tshe dpag med de'i mtshan thos pa tsam gyis dga' ba chen po skyed pa dang / rnam pa brgya stong du yang dag par mos par 'gyur ba de dag thams cad bsod nams tshad med pa yongs su 'dzin par 'gyur ro/ /de dag la log par ltung ba'i 'jigs pa mi 'byung ste/ 'di nas shi 'phos nas sangs rgyas kyi zhing du skye bar 'gyur ro/ /gang dag rgyun du yid la byed pa de dag ni 'chi ba'i tshe de bzhin gshegs pa 'od dpag med dge slong gi dge 'dun dang thabs gcig tu mdun na bzhugs par 'gyur ro/ /de ci'i phyir zhe na/ de bzhin gshegs pa thugs rje chen po de ni sems can rnams la phan par dgongs pa'i phyir 'jig rten gyi khams gzhan na bzhugs kyang sems can rnams la bdud sdig can gyis bar chad byed par 'gyur zhes nas kun nas srung bar mdzad de/ de nas shi 'phos pa dang 'jig rten gyi khams bde ba can du skye bar 'gyur te/ de dag thams cad kyis de nyid du sangs rgyas kyi chos rnams yongs su rdzogs par 'gyur ro/ /de ci'i phyir zhe na/ 'di ltar de bzhin gshegs pa des bdag byang chub thob pa'i sangs rgyas kyi zhing du sems can skye ba theg pa chen po la zhugs pa de dag gi bsam pa thams cad bdag gis bkang bar bya ste/ de ni gang la la byang chub kyi phyogs kyi chos byang chub byed pa gang ci yod pa'o/ /nyan thos kyi theg pa can gang dag sangs
36a
@#/ /rgyas kyi zhing du skye bar 'gyur ba de nyid du dgra bcom par gyur cig ces smon lam de ltar btab bo/ /shA ri'i bu/ rigs kyi bu'am/ rigs kyi bu mo gang la la zhig phyi ma'i dus na 'od dpag med kyi yon tan brjod pa la dad par byed pa dang / lhag pa'i bsam pas dga' ba skyed pa dang / de bzhin gshegs pa de la lhag pa'i bsam pas rangs par byed pa ni sangs rgyas kyi zhing der skyes te/ de na gnas pa rnams bsam pa thams cad yongs su rdzogs par 'gyur zhing de dag ji ltar brjod pa bzhin byang chub tu nye bar 'gyur ro/ /de bzhin gshegs pa 'dus pa de'ang mthong bar 'gyur ro/ /sangs rgyas kyi zhing der sems can skyes pa de dag mthong bar 'gyur ro/ /de bzhin gshegs pa'i yon tan brjod pa de la yid ches par mi byed pa dang / 'phya ba dang / spong bar 'gyur ba de dag ni bskal pa lngar sems can dmyal ba'i las yongs su bzung bar 'gyur ro/ /sangs rgyas kyi zhing brgya phrag stong gi tha ma na 'jig rten gyi khams bdud thams cad rab tu bcom pa dang ldan pa na/ de bzhin gshegs pa dgra bcom pa yang dag par rdzogs pa'i sangs rgyas rnam par rgyal ba mnga' ba zhes bya ba bzhugs te/ shA ri'i bu/ gang dag de bzhin gshegs pa rnam par rgyal pa mnga' ba de'i mtshan nyan par 'gyur ba de dag ni bdud kyi zhags pa thams cad bcad
36b
par 'gyur/ bskal pa drug cur 'khor ba la rgyab kyis phyogs pa byas par 'gyur ro/ /sangs rgyas kyi zhing brgya phrag stong gi tha ma na 'jig rten gyi khams bdud thams cad rab tu 'joms pa na/ de bzhin gshegs pa dgra bcom pa yang dag par rdzogs pa'i sangs rgyas rnam par rgyal ba'i dbyangs zhes bya ba bzhugs te/ gang dag de bzhin gshegs pa de'i mtshan nyan par 'gyur ba de dag ni sgra dbyangs thams cad kyi smra ba dang ldan par 'gyur/ bdud sdig can yang rgyang ring por yongs su spong bar 'gyur ro/ /de dag bskal pa brgyad du 'khor ba la rgyab kyis phyogs pa byas pa 'gyur ro// //bam po gsum pa ste tha ma/ de nas bcom ldan 'das la byang chub sems dpa' sems dpa' chen po ma pham pas 'di skad ces gsol to/ /bcom ldan 'das byang chub sems dpa' sems dpa' chen po chos gcig dang ldan na/ bla na med pa yang dag par rdzogs pa'i byang chub las phyir mi ldog par 'gyur zhing / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba de lta bu'i chos 'ga' mchis sam/ de skad ces gsol pa dang / bcom ldan 'das kyis byang chub sems dpa' sems dpa' chen po ma pham pa la 'di skad ces bka' stsal to/ /ma pham pa/ yod do/ /byang phyogs kyi logs na 'jig rten gyis khams dpal brtsegs pa na/ de bzhin gshegs pa dgra
37a
@#/ /bcom pa yang dag par rdzogs pa'i sangs rgyas dpal gyi snying po brtsegs pa rnam par bsgrags pa'i rgyal po zhes bya ba bzhugs te/ ma pham pa/ gang dag de bzhin gshegs pa dpal gyi snying po brtsegs pa rnam par bsgrags pa'i rgyal po'i mtshan nyan par 'gyur ba de dag thams cad bla na med pa yang dag par rdzogs pa'i byang chub las phyir mi ldog par 'gyur te/ myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /bskal pa bye ba tshang bar 'khor ba la rgyab kyis phyogs pa byas par 'gyur ro/ /ma pham pa/ gang dag de bzhin gshegs pa dpal gyi snying po brtsegs pa rnam par bsgrags pa'i rgyal po'i mtshan nyan pa ni sangs rgyas lnga bcu'i drung du spyad pa yin te/ de nas shi 'phos nas kyang nam du'ang rdzu 'phrul dang bral bar mi 'gyur/ mya ngan las yongs su ma 'das kyi bar du rna ba dang nam yang bral bar mi 'gyur/ nam du'ang gzugs phun sum tshogs pa dang bral bar mi 'gyur/ nam du'ang gsad pa dang / bcing bar mi 'gyur/ rna ba'i nad mi 'byung / sna nad mi 'byung / lce nad mi 'byung / lus kyi nad mi 'byung ste/ mya ngan las ma 'das kyi bar du de dag nam du'ang 'jig rten gyi khams sangs rgyas med pa dang / sangs rgyas 'byung ba dang bral bar mi skye ste/ nam du'ang
37b
chos dang 'bral bar mi 'gyur/ nam du 'ang mi khom par skye bar mi 'gyur/ nam du'ang bslab pa dang bral bar mi 'gyur/ nam du'ang dran pa dang bral bar mi 'gyur/ mya ngan las ma 'das kyi bar du nam du'ang ye shes dang bral bar mi 'gyur ro/ /ma pham pa/ gang de bzhin gshegs pa'i mtshan nyan par 'gyur ba dang / nga'i thams cad mkhyen pa nyid la'ang yid ches shing mos pa dang / mngon par dad pa de dag thams cad gnas yongs su gzung bar 'gyur/ 'jig rten thams cad kyis mchog dang / dam pa dang / rab mchog dang / bla na med pa yang 'gyur ro/ / de bas na gnas thams cad yongs su 'dzin par 'dod pa dang / 'jig rten thams cad las mchog tu gyur par gnas par 'dod pa dang / dam pa dang / rab mchog tu gyur par gnas bar 'dod pa des/ de bzhin gshegs pa 'jig rten thams cad kyi mchog tu gyur pa'i mtshan mnyan par bya'o/ /thos nas kyang bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dpal gyi snying po brtsegs pa rnam par bsgrags pa'i rgyal po de la phyag 'tshal lo zhes phyag bya'o/ /de skad ces bka' stsal nas/ byang chub sems dpa' sems dpa' chen po ma pham pas bcom ldan 'das la 'di skad ces gsol to/ /bcom ldan 'das/ de bzhin gshegs pa de bzhugs pa'i 'jig rten gyi khams de ji tsam du ring /
38a
@#/ /de bzhin gshegs pa de byung nas ji srid lags/ de skad ces gsol pa dang / bcom ldan 'das kyis byang chub sems dpa' sems dpa' chen po ma pham pa la 'di skad ces bka' stsal to/ /ma pham pa/ 'di lta ste/ dpag tshad brgya khor yug tu bye ma'i phung por gyur pa de las bye ma'i 'bru re re blangs te/ sangs rgyas kyi zhing re rer bzhag pa rnam grangs des bye ma de dag thams cad rnam par phye la 'jig rten gyi khams gang du bye ma bzhag pa ji snyed yod pa thams cad bye mas yongs su gang bar gyur te/ 'jig rten gyi khams bye mas gang ba de dag gi bye ma'i rdul phra rab ji snyed yod pa de bas ches mang zhing ches grangs med pa'i 'jig rten gyi khams 'das pa na/ 'jig rten gyi khams dpal gyi snying po brtsegs pa zhes bya ba de yod de/ de na de bzhin gshegs pa dgra bcom pa yang dag par rdzogs pa'i sangs rgyas dpal gyi snying po brtsegs pa rnam par bsgrags pa'i rgyal po de bzhugs te/ 'tsho zhing gzhes la chos kyang ston to/ /ma pham pa/ de bzhin gshegs pa dpal gyi snying po brtsegs pa rnam par bsgrags pa'i rgyal po de mngon par rdzogs par sangs rgyas nas bskal par lon te/ ma pham pa/ de bzhin gshegs pa de nyan thos kyi dge 'dun dang bcas pa dang / 'jig rten gyi khams de'ang gdan 'di nyid la 'dug
38b
bzhin du ngas lhan cig skyes pa'i sha'i mig gis mthong ngo / /de bzhin gshegs pa des kyang 'jig rten gyi khams de na gdan la bzhugs bzhin du lhan cig skyes pa'i sha'i spyan gyis mi mjed kyi 'jig rten gyi khams 'di dang / nga dang / 'khor du bcas pa gzigs so/ /ma pham pa/ gang de bzhin gshegs pa'i lhan cig skyes pa'i sha'i spyan 'di la yid ches pa dang / mos par byed pa dang / mngon par dad par byed pa dang / nga'i thams cad mkhyen pa nyid la'ang dad par byed pa dang / mngon par dad par byed pa dang / de bzhin gshegs pa de'i smon lam gyis byin gyis rlabs yongs su rdzogs pa la yid ches par byed pa dang / mos par byed pa dang / nem nur mi byed pa dang / the tshom mi za ba de dag gis 'jig rten thams cad las bye brag tu 'phags pa'i chos thams cad yongs su bzung bar 'gyur ro/ /de dag bla na med pa yang dag par rdzogs pa'i byang chub las kyang phyir mi ldog par 'gyur ro/ /de bas na/ ma pham pa/ rigs kyi bu'am/ rigs kyi bu mos de bzhin gshegs pa de'i mtshan dang / de bzhin gshegs pa de'i smon lam gyi byin gyi rlabs mnyan pa'i phyir stong gsum gyi stong chen po'i 'jig rten gyi khams 'di mes yongs su gang pa las kyang brgal te 'gro bar bya'o/ /de skad ces bka' stsal pa t+dang / bcom ldan 'das la byang chub sems dpa' sems dpa' chen po ma pham pas 'di skad ces gsol to/ /yang
39a
@#/ /bcom ldan 'das/ gzhan yang / byang chub sems dpa' sems dpa' chen po gang chos gcig dang ldan na bla na med pa yang dag par rdzogs pa'i byang chub las phyir mi ldog par 'gyur zhing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba mchis sam/ de skad ces gsol pa dang / bcom ldan 'das kyis byang chub sems dpa' sems dpa' chen po ma pham pa la 'di skad ces bka' stsal to/ /ma pham pa/ byang chub sems dpa' sems dpa' chen po chos gcig dang ldan na bla na med pa yang dag par rdzogs pa'i byang chub las phyir ldog par mi 'gyur zhing / myur du bla na med pa yang dag par rdzogs pa'i byang chub mngon par rdzogs par 'tshang rgya ba'i chos gcig po yod do/ /ma pham pa/ byang phyogs logs su 'jig rten gyi khams tshad med pa 'das nas 'jig rten gyi khams rdo rje'i snying po can zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas rdo rje rab tu 'joms pa zhes bya ba bzhugs te 'tsho zhing gzhes la chos kyang ston to/ /ma pham pa/ gang dag de bzhin gshegs pa rdo rjes rab tu 'joms pa de'i mtshan nyan par 'gyur pa de dag bla na med pa yang dag par rdzogs pa'i byang chub las phyir mi ldog cing / bla na med pa yang dag
39b
par rdzogs pa'i byang chub mngon par rdzogs par 'tshang rgya bar 'gyur ro/ /bskal pa bye ba khrag khrig brgya stong phrag bcur 'khor ba la rgyab kyis phyogs par byas par 'gyur ro/ /de ltar na de bzhin gshegs pa dgra bcom pa yang dag par rdzogs pa'i sangs rgyas 'di mthu che'o/ /ma pham pa/ ngas mngon par shes pa de bzhin gshegs pa mar me mdzad las de bzhin gshegs pa de'i mtshan thos nas bskal pa bye ba khrag khrig brgya stong phrag bcur 'khor ba la rgyab kyis phyogs par byas par gyur to/ /ma pham pa/ gal te ngas de bzhin gshegs pa mar me mdzad de las de bzhin gshegs pa de'i mtshan thos par ma gyur na/ nga 'di ltar bla na med pa yang dag par rdzogs pa'i byang chub mngon par rdzogs par 'tshang rgya bar mi 'gyur ro/ /rdo rjes rab tu 'joms pa zhes bya ba'i tshig gi don ji lta bu zhe na/ ma pham pa/ 'di lta ste/ dper na/ nor bu'am/ rdo ba'am/ bong ba'am/ gseg ma'am/ gyo mo'am/ sa'ang rung rdo rjes bcom ste nang du 'gro ba de bzhin du/ ma pham pa/ de bzhin gshegs pa de'i mtshan nyan par 'gyur ba dang / 'di'i byin gyi rlabs pa dang / nga'i thams cad mkhyen pa nyid la dad par 'gyur ba de dag so so'i skye bo'i sa dang / rang sangs rgyas kyi sa thams cad kyang rnam par gtor cing rnam par bshig/ mngon par bcom zhing dral te thams cad mkhyen pa nyid rjes su 'thob
40a
@#/ /par 'gyur ro/ /de'i phyir de'i ming rdo rjes rab tu 'joms pa zhes bya ste/ de ltar smon lam phun sum tshogs shing de bzhin gshegs pa de bsam gyis mi khyab pa'i yon tan dang ldan no/ /byang phyogs su sangs rgyas kyi zhing bye ba brgya stong gi tha ma na 'jig rten gyi khams nor bu snang ba can zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas rin chen me zhes bya ba bzhugs te/ gang de bzhin gshegs pa de'i mtshan nyan par 'gyur ba nges pa la zhugs pa de dag bla na med pa yang dag par rdzogs pa'i byang chub las phyir mi ldog par 'gyur ro/ /'jig rten gyi khams de na nyan thos kyi theg pa can nam/ rang sangs rgyas kyi theg pa can gang yang med de/ de dag thams cad byang chub sems dpa' sems dpa' chen po ste/ de bzhin gshegs pa rin chen me la bsnyen bkur byed do/ /de nas bcom ldan 'das kyis tshe dang ldan pa 'od srung chen po la bka' stsal pa/ 'od srung / sangs rgyas bcom ldan 'das ni mthu bsam gyis mi khyab pa mnga' pa'o/ /'od srung / sangs rgyas kyi zhing stong phrag lnga bcu rtsa lnga'i tha ma na 'jig rten gyi khams a ga ru'i dri zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas zla ba'i 'od ces bya ba bzhugs te/ 'od srung / gang de bzhin gshegs pa de'i
40b
mtshan rigs kyi bu'am/ rigs kyi bu mos thos na skye ba las rnam par log pa'i byin gyi rlabs zhes bya ba'i ting nge 'dzin rab tu thob ste/ de la gnas na gang+gA'i bye ma snyed kyi sangs rgyas grangs med pa rnams mthong ba dang / de dag gis bshad pa kun 'dzin pa dang / chos ci 'dra ba nyan cing smra bar 'dod pa de 'dra bar thos shing smra bar 'gyur ro/ /de ci'i phyir zhe na/ de ni bcom ldan 'das de'i sngon gyi smon lam gyi stobs bskyed pa yin te/ gang dag gis bdag gi ming thos na des ting nge 'dzin 'di thob par gyur cig ces de'i smon lam de ltar btab bo/ /de nas bcom ldan 'das kyis tshigs su bcad pa 'di dag gsungs so/ /'di nas stong phrag lnga bcu na/ /'jig rten khams ni legs sprul pa/ /a ga ru yi dri zhes bya/ /spos ngad rtag tu ldang ba na/ /rin chen zla ba dam pa'i 'od/ /rdzogs pa'i sangs rgyas de na bzhugs/ /'jig rten mgon po skyob pa yi/ /gang gis de yi mtshan thos pa/ /skye ba gcig gis thogs gyur cing / /byin gyis rlob ces bya ba yi/ /ting 'dzin dam pa thob par 'gyur/ /rtag par kun tu snang bar byed/ /ting nge 'dzin 'di thob nas ni/ /srog chags kun la phan pa'i phyir/ /gzhal med chos kyang ston pa yi/ / 'jig rten 'dren pa rnams kyang mthong / /chos kun snying po med par ni/ /'jig rten mgon pos rab tu bstan/ /tshig 'di yang dag 'dzin pa rnams/ /sems can dag ni dge ba skyes/ /khams
41a
@#/ /kun dngos po med par yang / /de yi khams la rnam par lta/ /chos gang mtshan nyid med pa la/ /dngos po med par yongs su smra/ /dngos po de ni mi rnyed de/ / dngos po med pa'ang de 'dra zhing / /bdag med pas na snying po med/ /de ltar de ni chos rnams ston/ /chos gang rab tu ston pa yang / /de ni bden pa bla med de/ /de phyir de yi ye shes 'jug / mi shes pa la'ang de bzhin no/ /mi shes pa dang ye shes dang / /gnyis po 'di ni yod ma yin/ /'di la chos ni rnam byang med/ /nyon mongs pa yang yod ma yin/ /chos kun gtan la bab par ni/ /de ltar mgon po rab tu ston/ /gnas pa med par rab bshad nas/ /sangs rgyas gnas pa med par 'gyur/ /gang tshe byang chub 'gyur ba la/ /chos rnams de yis mi rnyed cing / /byang chub sems dpa' mi gnas pa/ /de ltar mang du thos pa yin/ /sgra dang don kyang med pa ste/ /mkhas pa de la mi rtog go /mang du thos pas de rgyags shing / /'jig rten dag na mi rtsod do/ / 'od srung / byang phyogs logs su sangs rgyas kyi zhing stong phrag drug cu 'das nas/ 'jig rten gyi khams rab tu dga' ba zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas bzang po dam pa'i dpal zhes bya ba bzhugs te/ 'od srung / de bzhin gshegs pa de'i mtshan thos nas rigs kyi bu'am/ rigs kyi bu mo dag phyir mi
41b
ldog cing skye bo thams cad la sdug par 'gyur ba dang / 'du bar 'gyur ba dang / tshigs 'dzin par 'gyur ba'i las de dag gis yongs su bzung bar 'gyur ro/ /spobs pa'ang zab mor 'gyur ro/ /sems can gang dag la chos ston pa de dag chos ston pa de la mos par 'gyur ro/ /bud med kyis kyang thos na de bud med kyi dngos po'i mtha' mar 'gyur ro/ /de nas bcom ldan 'das kyis de'i tshe tshigs su bcad pa 'di dag gsungs so/ /stong phrag dag ni drug cur yang / /tshang zhing chad pa med pa'i zhing / /rab tu dga' zhes bya ba yi/ /'jig rten khams ni legs par gnas/ /de nas sangs rgyas bzhugs pa ni/ /chos rnams kun gyi pha rol phyin/ /bzang mchog dpal zhes bya ba yi/ /'jig rten mgon po bla na med/ /lhar gyur pa yi skyob pa ste/ /de yi mtshan ni thos nas su/ /gang dang gang du skyes par yang / /sdug cing yid du 'ong bar 'gyur/ /tshig btsun shes rab mchog dang ldan/ /srog chags rnams la chos ston te/ /chos de rab tu thos nas kyang / /dga' ba dam pa thob par 'gyur/ /sangs rgyas dag ni mtshan 'di ni/ /bud med dag gis thos na yang / /bud med skye gnas 'jigs chen gyi/ /skye gnas las ni yongs su thar/ /gang la 'jig rten ma rtogs pa/ /zab cing shin tu mkhas pa dang / /ji ltar dri med go 'phang bzhin/ /de lta bu yi sems su 'gyur/ /ji bzhin pa dang ji bzhin min/ /de dag
42a
@#/ /gnyis ka dngos po med/ /chos gang skyo bar gyur pa la/ /de la brjod pa ga la yod/ /'od srung / 'di nas byang phyogs logs su sangs rgyas kyi zhing stong phrag brgyad cu'i pha rol na 'jig rten gyi khams legs par 'jug pa zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas pad mo la bzhud pa zhes bya ba bzhugs te/ rigs kyi bu'am/ rigs kyi bu mos de'i mtshan thos na/ tshe 'phos nas gzugs bzang zhing mdzes pa dang / sems can rnams mthong na dga' ba dang / sdug cing yid du 'ong bar 'gyur ro| |bskal pa grangs med pa rjes su dran zhing yang dag pa ji lta ba bzhin du rab tu shes so/ /'gro ba thams cad dang / skye ba thams cad du bla na med pa'i spobs pa dang ldan par 'gyur zhing rtag tu rgyun mi 'chad par chos ston to/ /de'i smon lam dang / mig kyang rnam par dag par 'gyur ro/ /de nas bcom ldan 'das kyis tshigs su bcad pa 'di dag gsungs so/ /stong phrag dag ni brgyad cu yi/ /sangs rgyas zhing ni tshang pa na/ /bde bar 'jug pa'i 'jig rten khams/ /de ni shin tu bzang ba ste/ /de na sangs rgyas bzhugs pa ni/ /'jig rten mgon po bla na med pa/ / rin chen pad mo bzhud ces bya/ /'jig rten mgon po 'od mdzad pa/ /de yi mtshan kyang thos nas ni/ /de yi mig ni rnam dag cing / /gzugs kyang shin tu bzang por 'gyur/ /blta na
42b
sdug pa'ang de bzhin no/ /mnyam par bzhag pa'i sangs rgyas kyi/ /nyan thos rnams kyang gnas pa ni/ /rnam par thar pas zhi bar gyur/ /de la 'jig rten rtogs mi 'gyur/ /lo stong du yang tshang ba dang| |ting nge 'dzin las langs nas kyang / /sangs rgyas de yi nyan thos rnams/ /ji ltar gnas pas gnas par byed/ /bzang mchog sangs rgyas de yi mtshan/ /thos nas de 'dra de ltar 'gyur/ / de yi mtshan 'di 'dir thos nas/ /de dag bskal pa grangs med par/ /yon tan rjes su myong bar 'gyur/ /de tshe dpa' bos yon tan shes/ /spobs pa phun sum tshogs pa yis/ /mdo sde shin tu bzang po rnams/ /ma chags thogs pa med pa'i tshig /srog chags rnams la chos ston to/ /yang 'od srung / de bzhin gshegs pa dgra bcom pa yang dag par rdzogs pa'i sangs rgyas de dag gi mtshan rnams rigs kyi bu'am/ rigs kyi bu mo gang dag nyan pa/ 'od srung / bud med kyis de bzhin gshegs pa'i mtshan thos na/ bud med kyi dngos po las 'gyur ba ngas sngar bshad pa dang 'dra bas re zhig gzhag go /ji ltar yon tan bye brag med par bshad pa de dag thams cad kyi go skabs su 'gyur te/ mtshan 'di dag thos na yon tan gyi khyad par ji skad du bshad pa rnams 'dzin to| /de nas bcom ldan 'das kyis tshigs su bcad pa 'di dag gsungs so/ /'dod pa'i sred pa chad pa dang / /kun tu sbyor ba zad pa yi/ /sangs rgyas rnams kyi mtshan 'di dag /mnyan cing rtogs
43a
@#/ /par byed pa ni/ /yon tan khyad par shin tu mang / /tshe 'phos yon tan 'di dag 'byung / /'jig rten mgon po skyob pa yi/ /mtshan rnams thos par gyur nas ni/ bud med smon lam 'di 'debs na/ /de tshe skyes bu mchog tu 'gyur/ /bud med dngos po 'dir 'dod pas/ /'jig rten ma rung 'gyur ba yi/ /bud med dngos po rnam par ldog/ myur du sems can rnams kyi ni/ /bla med dge ba'i bshes gnyen 'gyur/ /mi gang 'dod pa spong ba ni/ /bsod nams rnam pa mang po skyed/ /bdag nyid dang ni pha rol dag /dge ba la ni 'jog byed pa/ / sdug bsngal dag las yongs su thar/ /bud med yang dang yang du ni/ /bud med dngos po spang ba dang / /yongs su thar par 'dod pa ni/ /ji ltar grong khyer dbus su yang / /dug gi shing chen yod pa las/ /de yang shin tu gcad gyur na/ /srog chags rnams ni bde bar 'gyur/ /de bzhin dug gi dngos po yi/ /bud med dngos po sdig pa la/ /sdig pa de ni rab spangs na/ / sangs rgyas lam la rab tu gnas/ /bdag gis dngos dang sems can dngos/ /'di dag gnyis ka mi rnyed de/ /gang la sdom pa mi rnyed pa/ /de ni bla na med pa'i lam/ /skyes pa'am yang na bud med kyang / /dam pa'i don du yod ma yin/ /gang la dngos po mi rnyed pa/ /der ni smon lam sbyangs pa yin/ /smon lam dag ni med pa la/ /rnam par shes pa 'byung ba med/ /de
43b
ni dam pa'i mtha' yin te/ /dmigs pa med pa nyid du 'gyur/ /bud med dngos po sems kyis brtags/ /sems de nyid kyang ma rnyed de/ /sems nyid de ni mi rnyed na/ /bla na med pa'i smon lam yin/ /bud med dngos po spang ba'i phyir/ /gang su mngon par brtson byed pa/ /kun tu rtog la spyod pa ste/ /kun nas ldang la de gnas so/ /bud med dngos por gang brjod pa/ /dngos po de ni yod ma zin/ /de ltar rab tu shes pa ni/ /bstan pa dag la de sbyor ro/ /sbyor ba dang ni mi sbyor dang / /de dag gnyis ka ci yang med/ /chos rnams yod pa ma yin pa/ /de ni sbyor ba zhes kyang bya/ / 'jig rten mgon po skyob pa yi/ /mtshan 'di rab tu thos nas ni/ /sangs rgyas kun gyi drung du yang / /dge ba mang po skyed par byed/ /thams cad gzigs kyi mtshan kun dang / /de lta bu yi ming thos nas/ /gang dang gang du skyed par yang / /yon tan 'di dag yongs su 'dzin/ /gang nyan de dag ngas mthongs te/ /lung nod pa yang ngas mthong ngo / /ngas ni de dag mang mthong ba/ /de la gang dag ma mos shing / /'di ni sangs rgyas ma bshad ces/ /de skad gang smra ngas mthong ste/ /sangs rgyas chos rnams spangs nas su/ /sems can dmyal ba mang por 'gro/ /'jig rten gnyen gyi chos rnams ni/ /rab tu spang ba byas nas kyang / /sdig pa'i las rnams byas pas na/ /sdig pa'i 'gro ba dag tu 'gro /glen zhing lkugs la blun pa dang / /dbang po nyams pa'ang de bzhin
44a
@#/ /te| |byang chub sems ni rnam spangs nas/ /de dag sems kyang g.yengs par 'gyur/ /dbang thang chung zhing mdog kyang ngan/ /gzi brjid nyams zhing blta mi sdug/ sdig pa dman pa'i skye gnas su/ /mi de skye bar 'gyur ba yin/ /yang dag rdzogs pa'i sangs rgyas kyis/ /bshad pa'i chos ni de mi shes/ /zab mo la yang mi 'jug ste/ /'bras bu chos kyis phongs par 'gyur/ /chos kyis phongs pa thos nas ni/ /mi de shes rab 'chal bar 'gyur/ /'jig rten mgon po 'od mdzad pa/ /ye shes chen po mi mnyes byed/ /dge slong rnams dang de bzhin du/ /dge bsnyen rnams la go bar bya/ /chos la 'gal bar gang byed pa/ /phongs pa 'di ni sdug bsngal lo/ /phyogs bcu yi ni 'jig rten na/ /sangs rgyas 'dren pa rnams bzhugs shing| |gang na skye bo yod pa der/ /zab mo yi ni chos ston to/ /de phyir 'jig rten mgon po la/ /mos pa dag kyang rab tu skyed/ /rdzogs pa'i sangs rgyas chags med chos/ /'dren pa dag ni chos gsungs te/ /de dag gi ni mtshan 'di la/ /su dag mos par 'gyur ba ni/ /mkhas pa de dag bsod nams kyang / /dpag tu med dang ldan par 'gyur/ /mi gang 'dir ni 'di lta yis/ /mtshan rnams 'dzin par 'gyur ba ni/ /spobs pa phun sum tshogs pa dang / /mkhas par yang ni rab tu 'gyur/ /'di lta bu yi mtshan rnams kyang / /chags med gyur nas
44b
rab ston na/ /'jig rten kun gyis bkur ba dang / /tshig btsun par yang rtag tu 'gyur/ /phyogs bzhir de yi mtshan 'di rnams/ /gang dag rab tu brjod pa ni/ /gang dang / gang du skyes par yang| |de ni 'jigs pa med par 'gyur/ /sangs rgyas mtshan rnams thos nas kyang / /mi gang 'dir ni 'di lta yi/ /mtshan rnams mchod par byed pa ni/ /de la byang chub rgyang mi ring / /su dag 'di lta'i mtshan rnams la/ /skye bo mang po 'dzud byed pa/ /'jig rten mgon po'i spyod yul ni/ /de la rnyed par dka' ma yin/ /'od srung / chos bzhi dang ldan pa'i dge slong ni mtshan 'di dag la mos par 'gyur ro/ /bzhi gang zhe na/ des sngon sangs rgyas bcom ldan 'das la bsnyen bkur byas pa yin/ zab mo la mos pa yin/ dben par mos pa yin/ dge ba'i bshes gnyen la bsten cing dam pa'i chos kyis phongs par 'gyur ba'i las ma byas ma bsags pa yin no/ /'od srung / chos bzhi po de dag dang ldan pa'i dge slong ni de bzhin gshegs pa dgra bcom pa yang dag par rdzogs pa'i sangs rgyas dag gi mtshan rnams la mos par byed do/ /de nas bcom ldan 'das kyis de'i tshe tshigs su bcad pa 'di dag gsungs so/ / des sngon rdzogs pa'i sangs rgyas rnams/ /mthong zhing mchod par byas pa yin/ /dge ba'i rtsa ba de nyid kyis/ /de dag mtshan rnams thos par 'gyur/ /zab mo la yang rab mos shing / /
45a
@#/ /nga yi sangs rgyas chos la nyan/ /sngon gyi las rnams yongs dag pas/ /de nas 'dir ni 'ongs pa ste/ /sngon yang mdo sde bshad pa la/ /de dag yid gnyis yong med de/ /yang dag rdzogs pas bshad pa yi/ /mdo sde de la 'gal mi byed/ /nyi tshe ba yi bzod pa la/ /'dren pa dag ni mos par byed/ /shin tu dang ba'i sems kyis kyang / /ngas bshad pa la mnyan par gyis/ /gdams pa dag la mngon dga' zhing / /chos nyid la ni 'brang bar bya/ /de dag chos su 'du shes pas/ /chos de thams cad sdud par byed/ /'du shes pa dang 'dus shes med/ /de dag yod pa ma yin no/ /sangs rgyas kun gyi yul rnams ni/ /bsam gyis mi khyab rtog par byed/ /de dag gi ni chos nyid 'di/ /zab mo la ni gang mos shing / /mos pa dag ni mang gyur ba/ /de dag la ni rtsod pa med/ /zab mo spyod pa de dag la/ /yid gnyis dag ni yong med do/ /nor la sred pa gter dang yang / /'dra bar 'gyur ba ma yin no/ /'jig rten gyi ni mgon po la/ /su dag nem nur skye ba ni/ /dbang po rtul zhing myos pa dang / /mi brtson par ni rig par bya/ /gang dag mos par gyur pa ni/ /de dag la yang yid gnyis med/ /'di dag 'gog par byed pa ni/ /mngon par brtson pa'i 'bras bu med/ /sangs rgyas mtshan ni legs bshad pa/ /de lta bu yi mtshan thos nas/ /sangs rgyas dag gi
45b
bsngags ba smra/ /phyogs bcu dag na 'jig rten mgon/ /rdzogs pa'i sangs rgyas mtshan bstod de/ /yang dang yang du sangs rgyas kyi/ /mtshan rnams mi gang dran byed pa/ /de ni myur du dri med 'gyur/ /srog chags rnams kyis bkur ba yin/ /chags pa med pa'i spobs pa yis/ /sangs rgyas byang chub rab tu ston/ /'od srung / steng gi phyogs na 'jig rten gyi khams zla ba'i bla ma zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas gser snang bas rnam par gnon pa zhes bya ba bzhugs so/ /'od srung / sangs rgyas kyi zhing 'di nas steng gi phyogs na 'jig rten gyi khams rtsod pa la dga' ba mdog ngan brtsegs pa zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas ma pham pa'i dpal zhes bya ba bzhugs so/ /steng gi phyogs na 'jig rten gyi khams slob dpon dang ldan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas tshad med pa'i bla ma bde bar gshegs pa rgyal po zhes bya ba bzhugs so/ /steng gi phyogs na 'jig rten gyi khams ri rab rgyal mtshan zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas ma rlan pa'i glang po dam pa zhes bya ba bzhugs so/ /steng gi phyogs na 'jig rten gyi khams shin tu mdzes pa rtog pa'i byang chub ces bya ba de na/ de bzhin
46a
@#/ /gshegs pa dgra bcom pa yang dag par rdzogs pa'i sangs rgyas brtson 'grus grangs med pa la zhugs pa'i dpal zhes bya ba bzhugs so/ /steng gi phyogs na 'jig rten gyi khams yongs su 'dzin pa med pa de na/ de bzhin gshegs pa dgra bcom pa yang dag par rdzogs pa'i sangs rgyas dgongs pa brjod kyis mi lang ba zhes bya ba bzhugs so| |steng gi phyogs na 'jig rten gyi khams tshangs par spyod pas brgyan pa zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas gti mug med pa'i spos dpal zhes bya ba bzhugs so/ /steng gi phyogs na 'jig rten gyi khams nyi ma snang ba zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas zla ba dpal zhes bya ba bzhugs so/ /steng gi phyogs na 'jig rten gyi khams chos mchog ces bya ba de na/ de bzhin gshegs pa dgra bcom pa yang dag par rdzogs pa'i sangs rgyas rnam par mi rtog pa'i 'od ces bya ba bzhugs so/ /steng gi phyogs na 'jig rten gyi khams chos spyod ces bya ba de na/ de bzhin gshegs pa dgra bcom pa yang dag par rdzogs pa'i sangs rgyas nam mkha' snang ba zhes bya ba bzhugs so/ /steng gi phyogs na 'jig rten gyi khams dge ba gsog pa zhes bya ba de na/ de bzhin gshegs pa dgra bcom pa yang
46b
dag par rdzogs pa'i sangs rgyas spyod pa yongs su dag pa'i tog ces bya ba bzhugs so/ /steng gi phyogs na 'jig rten gyi khams rnam par rgyal ba zhes bya bde na/ de bzhin gshegs pa dgra bcom pa yang dag par rdzogs pa'i sangs rgyas gter legs par gnas pa zhi ba rgyal po zhes bya ba bzhugs so/ /steng gi phyogs na 'jig rten gyi khams brtson 'grus skyes pa zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas don thams cad grub pa zhes bya ba bzhugs so/ /steng gi phyogs na 'jig rten gyi khams smon lam gyi stobs zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas shes rab kyis sped pa'i dpal zhes bya bzhugs so/ /steng gi phyogs na 'jig rten gyi khams mdangs dga' ba'i phyogs zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas gtam shin tu yongs su dag pa mdzad pa zhes bya ba bzhugs so/ /steng gi phyogs na 'jig rten gyi khams tsan+dan gyi dri'i phug ces bya ba de na/ de bzhin gshegs pa dgra bcom pa yang dag par rdzogs pa'i sangs rgyas bai DUR+Ya'i snying po zhes bya ba bzhugs so/ /steng gi phyogs na 'jig rten gyi khams rin po che dang ldan pa zhes bya de na/ de bzhin gshegs pa dgra bcom pa yang dag par rdzogs pa'i sangs
47a
@#/ /rgyas kun tu yon tan rin po ches rnam par gnon pa zhes bya ba bzhugs so/ /steng gi phyogs na 'jig rten gyi khams yon tan tshad med dpal zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas yon tan shin tu yongs su dag pa rab tu gnas pa zhes bya ba bzhugs so/ /steng gi phyogs na 'jig rten gyi khams nyan thos ma 'ongs pa zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas rin chen snang bas rnam par gnon pa'i mchod rten zhes bya ba bzhugs so| |steng gi phyogs na 'jig rten gyi khams gnyid med pa'i mig ces bya ba de na/ de bzhin gshegs pa dgra bcom pa yang dag par rdzogs pa'i sangs rgyas tshad med pa'i khrel yod pa gser dam pa'i dpal zhes bya ba bzhugs so/ /de nas de'i tshe bcom ldan 'das kyis tshigs su bcad pa 'di dag gsungs so/ /sangs rgyas dpal gyi zla ba can/ /rgyal chen mi yi khyu mchog ste/ /sangs rgyas khyu mchog de dag ni/ /chos kun rnam par spyod pa mdzad/ /sangs rgyas de dag ming rnams kyis/ /sangs rgyas zhing ni rnam par spyod/ /mi gang de yi mtshan rnams ni/ /bskal pa 'dir ni nyan 'gyur zhing / /gang dag dad par 'gyur ba dang / /de la ri mor bcas pa dag /de dag dpa' bo shes rab che/ /de dag sangs rgyas dam par 'gyur
47b
de dag ye shes mtha' yas te/ de la ne ma nur ma byed cig / /steng gi phyogs na 'jig rten gyi khams shin tu mdzes pa'i pad+ma zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas pad+ma dam pa rnam par 'phrul pa'i dpal zhes bya ba bzhugs te/ de'i mtshan thos na ngan song gsum yang bcad par 'gyur/ sangs rgyas kyi chos kyi me tog kyang legs par rgyas par 'gyur ro/ /de dag bskal pa sum cu rtsa drug tu 'khor ba la rgyab kyis phyogs par 'gyur ro/ /de nas bcom ldan 'das kyis tshigs su bcad pa 'di dag gsungs so| |'jig rten khams ni legs brgyan pa/ /pad+ma shin tu mdzes zhes bya/ /lha yi dga' ba'i tshal bzhin du/ /rtag par shin tu brgyan pa ste/ /de nas sangs rgyas bzhugs pa ni/ / pad+ma bla dpal mkhas pa ste/ /sangs rgyas zhing der rnam par 'phrul/ /srog chags rnams la chos kyang ston/ /skyes pa dang ni bud med kyis/ /de yi mtshan kyang thos nas ni/ /ngan song gsum ni rnam spong zhing / /sangs rgyas dag kyang mang po mthong / /bskal pa sum cu rtsa drug 'dor/ /'dus byas rnams kyang rnam par bzlog /sangs rgyas kyi ni byang chub las/ /phyir yang ldog par mi 'gyur ro/ /long ba zha bor mi 'gyur te/ /blun por rtag tu de mi 'gyur/ /'jig rten kun na rnam par dag cing / /shes rab bsod nams shin tu 'phel/ /de bzhin
48a
@#/ /gshegs la phyag byas na/ /sdig pa'i grogs po mi 'phel zhing / /gsod dang phyir rgol de bzhin te/ /dge ba'i bshes gnyen rnyed par 'gyur/ / sangs rgyas de dang 'jig rten gyi/ /mchod rten gzhan la phyag byas na/ /chos kun rtogs par rig pa yis/ /byang chub la ni nem nur med/ /steng gi phyogs na 'jig rten gyi khams rin po che sgrol ma zhes bya ba de na/ de bzhin gshegs pa dgra bcom pa yang dag par rdzogs pa'i sangs rgyas rin chen dam pa 'byung ba'i dpal zhes bya ba bzhugs te/ de'i mtshan thos na byang chub kyi yan lag rin chen bdun thob par 'gyur ro/ /bskal pa sum cur 'khor ba la rgyab kyis phyogs pa byas par 'gyur ro/ /de nas bcom ldan 'das kyis de'i tshe tshigs su bcad pa 'di dag gsungs so/ /rin chen sgrol ma 'jig ten khams mchog na/ /rin chen 'byung zhes bya ba'i sangs rgyas te/ /de yi mtshan mchog dam pa thos nas ni/ / srog chags rnams kyis byang chub yan lag thob/ /bskal pa sum cu dag ni 'dor bar byed/ /byang chub la yang shin tu legs par gnas/ /smra ba dpa' bo rab tu mi bskyod pa/ / skyes bu dam pa dag kyang mang du mthong / /steng gi phyogs na 'jig rten gyi khams glog gi 'od ces bya ba na/ de bzhin gshegs pa dgra bcom pa yang dag par rdzogs pa'i sangs
48b
rgyas glog gi sgron ma tog gi rgyal po zhes bya ba bzhugs te/ de'i mtshan thos na mi khom pa thams cad yongs su spong bar 'gyur ro/ /de dag bskal pa nyi shur 'khor ba la rgyab kyis phyogs pa byas par 'gyur ro/ /de nas bcom ldan 'das kyis de'i tshe yang rgya/ /steng gi phyogs na 'jig rten gyi khams gser gyi zhing de na/ /sangs rgyas rdzu 'phrul chen po ni/ /glog 'od tog gi rgyal zhes bya/ /pad+mo dam pa legs par byung / /de yi mtshan yang thos nas ni/ /mi khom thams cad rnam par spong / /bskal pa nyid shur 'dor bar byed/ /myur du byang chub 'tshang yang rgya/ /steng gi phyogs na 'jig rten gyi khams gser gyi shing ta la rab tu brgyan pa zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas ta la'i rgyal po mngon par 'phags pa'i dpal zhes bya ba bzhugs te/ de'i mtshan thos na sems can thams cad las mngon par 'phags par 'gyur ro/ /steng gi phyogs na 'jig rten gyi khams ta la nam mkha' la nye ba zhes bya ba na/ de bzhin gshegs pa dgra bcom pa yang dag par rdzogs pa'i sangs rgyas chos nam mkha'i sgron ma zhes bya ba bzhugs te/ de'i mtshan thos na bskal pa drug cur 'khor ba la rgyab kyi phyogs pa byas par 'gyur ro/ /sangs rgyas kyi zhing yang dag par 'gro ba las kyang phyir mi ldog go /tshe 'di la de bzhin gshegs
49a
@#/ /pa mthong ba'ang thob par 'gyur ro/ /tha na rmi lam na'ang de bzhin gshegs pa de la yan lag lngas phyag 'tshal lo/ /sangs rgyas bcom ldan 'das rnams la lhag pa'i bsam pas ri mo byed par 'gyur ro/ /blta bar bya ba dang / phyag bya ba dang / bsnyen bkur bya ba'i phyir bla na med pa mkhas pa dang ldan pa'i sems can yang rnyed par 'gyur ro/ /tshe 'di la yon tan 'di dag thob par 'gyur te/ shA ri'i bu/ de bzhin gshegs pa de ni yon tan dang / phan yon tshad med do/ /de nas bcom ldan 'das kyis de'i tshe tshigs su bcad pa 'di dag gsungs so/ /nam mkha' yongs su brgyan pa'i zhing / /de na grags chen sangs rgyas ni/ /chos kyi nam mkha' sgron ma'i mtshan/ /skyes bu dag ni khyu mchog ste/ /de yi mtshan kyang thos nas ni/ /bskal pa drug cu phyir bzlog cing / /bla med sangs rgyas chos rnams dang / /sangs rgyas 'gro ba'ang thob par 'gyur/ / sangs rgyas dpa' bo chen po dag /tshe 'di nyid la mthong bar 'gyur/ /lhag pa'i bsam pas byams pa'i sems/ /dkyil 'khor lnga yis phyag byas te/ /rmi lam na yang rdzogs sangs rgyas/ /kun tu bzang po mthong bar 'gyur/ /yid kyi rtog pa gzhan gyis sems/ /chos kyi rgyal po dran nas su/ /shes la mkhas pa'i sems can rnams/ /bsnyen bkur bya
49b
ba rnyed par 'gyur/ /de ni tshe 'di'i yon tan te/ /ston pa yon tan tshad med cing / /chos kun gyi yang pha rol phyin/ /phun sum tshogs pa kun gnyer bas/ /byams pa'i sems kyis phyag gyis shig/ steng gi phyogs na shin tu rnam par phye ba'i 'jig rten gyi khams na/ de bzhin gshegs pa dgra bcom pa yang dag par rdzogs pa'i sangs rgyas yon tan thams cad 'byung ba zhes bya ba bzhugs so/ /ci'i phyir 'jig rten gyi khams de shin tu rnam par phye ba zhes bya zhe na/ 'jig rte gyi khams de gzhi gser la bai DUR+Yas mig mangs ris su bris pa| mig mangs ris thams cad nas me tog gi shing dang / rin po che'i shing dang / tsan+dan la sogs pa spos kyi shing dag gis shin tu rnam par phye zhing de dag las dri byung bas sangs rgyas kyi zhing thams cad gdugs gcig tu khyab par 'gyur ro/ /de bzhin gshegs pa yon tan thams cad 'byung ba de chos kyi gdan la bzhugs pa'i mtshan thos nas dbang po thams cad rab tu rnam par phye ba yongs su 'dzin to/ /sangs rgyas kyi chos rab tu rnam par phye ba'ang yongs su 'dzin to/ /bskal pa brgyad cur 'khor ba la rgyab kyis phyogs par yang byas par 'gyur ro/ /de nas de'i tshe bcom ldan 'das kyis tshigs su bcad pa 'di dag gsungs so/ /'jig rten gyi khams ni bla med pa/ /shin tu rna par phye zhes bya/ /shing gis
50a
@#/ /mig mangs ris su byas/ /spos kyi shing gis shin tu mdzes/ /de dag las ni dri byung bas/ /sa kun tu yang rgyas par 'gyur/ /gdugs gcig tu ni byas nas su/ /bar snang la yang de gnas so/ /de la sangs rgyas bzhugs pa ni/ /yon tan yan lag thams cad 'byung / /ming mtshan shin tu phun sum tshogs/ /chos kyi rgyal po 'jigs med de/ /de yi mtshan kyang thos nas ni/ /yan lag thams cad mdzes par 'gyur/ /byad bzhin bzang zhing blta na sdug/ gzugs mdzes mthong na dga' ba dang / /shin tu phye ba'i lus su 'gyur/ /chu zheng gab pa n+ya gro bzhin/ /dpal gyis shin tu 'bar gyur cing / /sangs rgyas dag gi zhing du 'gro /bskal pa brgyad cur 'dor bar byed/ /'dus byas rnams kyang rnam par zlog /sangs rgyas chos rnams phye ba yang / /rnam pa thams cad myur du 'thob/ /yon tan yan lag kun 'byung ba/ /sangs rgyas rjes su dran byas na/ /yon tan phan yon dag pa ni/ /sangs rgyas chos kyi go 'phang gnas/ /steng gi phyogs na 'jig rten gyi khams bzang po'i mchog ces bya ba na/ de bzhin gshegs pa bzang po'i tog gi rgyal mtshan rgyal po zhes bya ba bzhugs te/ de'i mtshan thos na sangs rgyas kyi chos rnams las phyir mi ldog par 'gyur ro/ /de dag gis bskal pa lnga bcur 'khor ba brgyab kyis phyogs pa byas
50b
par 'gyur ro/ /de nas de'i tshe bcom ldan 'das kyis tshigs su bcad pa 'di dag gsungs so/ /'jig rten khams ni bzang mchog ste/ /bzang po dga' ba zhes kyang bya/ /de na rdzogs pa'i sangs rgyas ni/ /bzang tog rgyal mtshan drang srong ste/ /rgyal mchog chos kyi rgyal po yin/ /mtshan mchog sum cu rtsa gnyis ldan/ /de yi mtshan kyang thos nas ni/ /sangs rgyas chos rnams mi 'bri zhing / /bskal pa dag ni lnga bcur yang / /'khor ba dag ni rnam par spong / /'jig rten du yang myur bar ni/ /grags chen lha yi lhar 'gyur ro/ /steng gi phyogs na 'jig rten gyis khams rin po che'i rigs zhes bya ba na/ de bzhin gshegs pa rin po che thams cad kyis brgyan pa'i gzugs 'dzin pa zhes bya ba bzhugs so/ /ci'i phyir 'jig rten gyi khams de rin po che'i rigs zhes bya zhe na/ 'od srung / sangs rgyas kyi zhing de'i sems can rnams bla na med pa yang dag pa rdzogs pa'i byang chub tu yang dag par rab tu zhugs te/ sangs rgyas kyi zhing de nas se gol gtogs pa tsam gyis byang chub sems dpa' bye ba khrag khrig brgya stong mang po phyogs bcu'i 'jig rten gyi khams gang+gA'i klung gi bye ma snyed kyi sems can rnams byang chub tu yongs su smin par byed/ sangs rgyas bcom ldan 'das la mchod pa byed cing phyir yang 'jig rten gyi khams der 'ong ngo / /de skad ces bka' stsal pa dang / bcom ldan 'das la 'od
51a
@#/ /srung chen pos 'di skad ces gsol to/ /bcom ldan 'das/ byang chub sems dpa' sems dpa' chen po de'i ming ji skad bgyi ba dag mchis/ bcom ldan 'das kyis bka' stsal pa/ 'di lta ste/ seng ge rnam par rol pa dang / seng ge rnam par bsgyings dang / seng ge'i tog dang / seng ge rnam par sprul pa dang / shin tu brtan pa'i mthu rtul dang / rdo rje'i blo gros mtshon cha dang / 'od srung / de lta bu la sogs pa rtag tu brtson 'grus brtsams pa'i byang chub sems dpa' dag gi ming gang su dag gis thos par 'gyur ba de dag thams cad de bzhin gshegs pa rin po che thams cad kyis brgyan pa'i gzugs 'dzin pa de'i sangs rgyas kyi chos ma 'dres pa bco brgyad rnams thob par 'gyur ro/ /rin po che'i rigs kyang rjes su thob par 'gyur ro/ /phyir mi ldog pa'i chos kyi 'khor lo'ang rnyed par 'gyur ro/ /bskal pa brgya tshang bar 'khor ba la rgyab kyis phyogs pa byas par 'gyur ro/ /de nas bcom ldan 'das kyis de'i tshe tshigs su bcad pa 'di dag gsungs so/ /'jig rten khams ni rin chen rigs/ /rigs chen kun gyis brgyan pa ste/ /de na sangs rgyas bzhugs pa ni/ /dpa' bo dag gis yongs su bskor/ /'jig rten sgron ma de mtshan ni/ /rin chen kun gyis 'phags pa ste/ /rab tu
51b
brgyan pa'i gzugs 'dzin pa/ /chos tog rgyal mtshan drang srong ste/ /byang chub sems dpas yongs bskor cing / /'dren pa chos rnams ston pa mdzad/ /'jig rten du ni ma bskor ba/ /phyir mi ldog pa'i 'khor lo bskor/ /de yi mtshan kyang thos nas ni/ /bskal pa brgyar yang mi 'khor zhing / /phyir mi ldog pa'i 'khor lo yang / /bla na med pa thob par 'gyur/ /gang dag gis ni mtshan brjod pa/ /chos kyi rgyal po de dag dang / /rab 'byung dag na bzhugs pa dang / /'jig rten dag gis khams kyang rung / /ming dang rigs ni rnam par dag /spyod pa dag kyang rnam dag pa/ /chos kyi spyan ni rnam par dag /chos rnams kun kyang rnam sbyangs pa/ /shes rab ldan pa'i spyod yul gyis/ /bla na med pa'i ye shes la/ /skye bo mang po gang dag ni| /shin tu 'dod pa'i shA ri'i bu/ /gang dag phyi ma'i dus byung ba/ /shin tu 'jigs par gyur pa'i tshe/ /chos 'di rab tu nyan 'gyur zhing / /thos nas dad par byed pa ni/ /the tshom med par de dag gis/ /shA ris nga la bsnyen bkur byas/ /ji ltar rin chen rin thang med/ /dbul pos mthong na zhum gyur te/ /gang gis rin chen rnyed 'gyur ba/ /de lta'i nor ni ga las 'ong / /de bzhin bla med sangs rgyas kyang / /bsod nams chung ngus thos nas ni/ /mig la gnod byed blo can rnams/ /de dag dad par ga la 'gyur/ /nor dang mdzod rnams
52a
@#/ /mang po dag /nor bu rin chen thos nas ni/ /shin tu brgyan par bya'o zhes/ /de dag yang dang yang tshol lo/ /de bzhin shes rab chen po yang / /sangs rgyas kyis ni mtshan thos nas/ /ji ltar byang chub reg 'gyur zhes/ /de dag yongs su tshol bar byed/ /dman pa'i las dang ldan pa dang / /sdig pa 'dod dang g.yo can dang / /shes rab bsod nams med pa la/ /'di lta bu yi thos pa med/ /'dod chags kyis ni chags gyur dang / /gti mug gis ni rmongs pa'am/ /chags pas zil gyis mnon pa la/ /'di lta bu yi thos pa med/ /nga rgyal can dang khengs pa dang / /le lo can dang blo chung dang / /mu stegs gzhan la brtson pa la/ /'di lta bu yi thos pa med/ /bye ba stong gi lha rnams ni/ /kye ma sangs rgyas kye ma chos/ /kye ma dge 'dun bla na med/ /de zhes de tshe sgra yang sgrog /me tog gi yang char 'bebs shing / /stong gsum 'dir ni rab tu gtor/ /sil snyan bye ba dkrol bar byed/ /spos kyis sa la chag chag btab/ /zhing 'di snang bar byed nas ni/ /rnam pa drug tu g.yo bar byas/ /me tog bsags pa dam pa yi/ /mdo sde 'di ni rab bshad pa/ / de ni 'khor su gang dag ni/ /sangs rgyas mtshams gnas ma gtogs par/ /gang gzhan thos pa thams cad ni/ /sangs rgyas bla na med par 'gyur/ phyogs bcu dag ni thams
52b
cad du/ /gang+gA'i bye snyed zhing nas ni/ /byang chub sems dpa' lhags nas su/ /mnyan nas phyir yang so sor dong / /mdo sde 'di ni bshad pa'i tshe/ /dge slong bye ba mang tshang pa/ /de dag thams cad dgra bcom 'gyur/ /de dag gis ni 'dren pa mthong / /dge slong dag ni brgya stong dang / /dge slong ma yang de bzhin te/ /stong phrag drug cur tshang ba yis/ /de tshe chos la bzod pa thob/ / mi skye ba yi chos rnams la/ /bzod pa bla na med thob nas/ /de dag sangs rgyas rnams blta zhing / /srog chags rnams la chos kyang 'chad/ /dge slong ma ni lnga brgya dang / /dge bsnyen ma ni bzhi bcu dag/ rang rang gi ni gos rnams kyis/ /de bzhin gshegs kyi sku la gsol/ /bcom ldan 'das kyis de skad ces bka' stsal nas/ tshe dang ldan pa shA ri'i bu yi rangs so| |byang chub sems dpa' sems dpa' chen po de dag dang / dge slong de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis bshad pa la mngon par bstod do/ /'phags pa me tog gi tshogs zhes bya ba theg pa chen po'i mdo rdzogs so// //rgya gar gyi mkhan po dz+nyA na sid+d+hi dang / zhus chen gyi lo tsA ba ban+d+he d+harma tA shI la la sogs pas zhus chen bgyis te gtan la phab pa//