//rgya gar skad du/ AR+Ya a tsin+t+ya rA dza sU tra nA ma mahA yA na sU tra/ bod skad du/ 'phags pa bsam gyis mi khyab pa'i rgyal po'i mdo zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis 58b thos pa dus gcig na/ bcom ldan 'das yul ma ga d+ha na chos kyi dbye dgon pa na/ byang chub kyi snying po na seng ge'i khri rdo rje dang / nor bu rin po ches spras pa'i pad+ma'i snying po'i gdan la bzhugs te/ byang chub sems dpa' chen po'i dge 'dun phyogs bcu'i sangs rgyas kyi zhing brjod du med pa'i yang brjod du med pa bye ba khrag khrig phrag 'bum gyi rdul phra rab snyed kyi byang chub sems dpa' sems dpa' chen po rnams dang thabs gcig tu bzhugs so/ /de nas byang chub sems dpa' sems dpa' chen po bsam gyis mi khyab pa'i rgyal po zhes bya bas/ byang chub sems dpa' sems dpa' chen po de dag la smras pa/ kye rgyal ba'i sras dag/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa'i sangs rgyas kyi zhing mi mjed kyi 'jig rten gyi khams 'di'i bskal pa gcig gang yin pa de ni de bzhin gshegs pa dgra bcom pa yang dag par rdzogs pa'i sangs rgyas tshe dpag med kyi sangs rgyas kyi zhing bde ba can gyi 'jig rten gyi khams kyi nyin zhag gcig go /kye rgyal ba'i sras dag /de bzhin gshegs pa dgra bcom pa yang dag par rdzogs pa'i sangs rgyas tshe dpag med kyi sangs rgyas kyi zhing bde ba can gyi 'jig rten gyi khams kyi bskal pa gcig gang yin pa de ni de bzhin gshegs 59a @#/ /pa dgra bcom pa yang dag par rdzogs pa'i sangs rgyas rdo rje rab tu 'joms pa'i sangs rgyas kyi zhing gi nyin zhag gcig go /kye rgyal ba'i sras dag / de bzhin gshegs pa dgra bcom pa yang dag par rdzogs pa'i sangs rgyas rdo rje rab tu 'joms pa'i sangs rgyas kyi zhing gi bskal pa gcig gang yin pa de ni de bzhin gshegs pa dgra bcom pa yang dag par rdzogs pa'i sangs rgyas 'od zer shin tu stug po pad+ma rab tu rgyas pa'i sku'i sangs rgyas kyi zhing gi nyin zhag gcig go /kye rgyal ba'i sras dag / de bzhin gshegs pa dgra bcom pa yang dag par rdzogs pa'i sangs rgyas 'od zer shin tu stug po pad+ma rab tu rgyas pa'i sku'i sangs rgyas kyi zhing gi bska pa gcig gan gyin pa de ni de bzhin gshegs pa dgra bcom pa yang dag par rdzogs pa'i sangs rgyas chos kyi rgyal mtshan gyi sangs rgyas kyi zhing gi nyin zhag gcig go /kye rgyal ba'i sras dag| de bzhin gshegs pa dgra bcom pa yang dag par rdzogs pa'i sangs rgyas chos kyi rgyal mtshan gyi sangs rgyas kyi zhing gi bskal pa gcig gang yin pa de ni de bzhin gshegs pa dgra bcom pa yang dag par rdzogs pa'i sangs rgyas seng ge'i sangs rgyas kyi zhing gi nyin zhag gcig go /kye rgyal ba'i sras dag /de bzhin gshegs 59b pa dgra bcom pa yang dag par rdzogs pa'i sangs rgyas seng ge'i sangs rgyas kyi zhing gi bskal pa gcig gang yin pa de ni de bzhin gshegs pa dgra bcom pa yang dag par rdzogs pa'i sangs rgyas rnam par snang mdzad kyi sangs rgyas kyi zhing gi nyin zhag gcig go /kye rgyal ba'i sras dag /de bzhin gshegs pa dgra bcom pa yang dag par rdzogs pa'i sangs rgyas rnam par snang mdzad kyi sangs rgyas kyi zhing gi bskal pa gcig gang yin pa de ni de bzhin gshegs pa dgra bcom pa yang dag par rdzogs pa'i sangs rgyas chos kyi 'od zer me tog rab tu rgyas pa'i sku'i sangs rgyas kyi zhing gi nyin zhag gcig go /kye rgyal ba'i sras dag/ de bzhin gshegs pa dgra bcom pa yang dag par rdzogs pa'i sangs rgyas chos kyi 'od zer me tog rab tu rgyas pa'i sku'i sangs rgyas kyi zhing gi bskal pa gcig gang yin pa de ni de bzhin gshegs pa dgra bcom pa yang dag par rdzogs pa'i sangs rgyas ye shes 'od zer rgyal po'i sangs rgyas kyi zhing gi nyin zhag gcig go /kye rgyal ba'i sras dag /de bzhin gshegs pa dgra bcom pa yang dag par rdzogs pa'i sangs rgyas ye shes 'od zer rgyal po'i sangs rgyas kyi zhing gi bskal pa gcig gang yin pa de ni de bzhin gshegs pa dgra bcom pa yang dag par rdzogs pa'i sangs rgyas zla ba'i blo gros kyi sangs rgyas 60a @#/ /kyi zhing gi nyin zhag gcig go /kye rgyal ba'i sras dag /'di ltar bskal pa bgrang ba'i thabs 'di lta bu'i tshul gyis rtsis pa'i 'jig rten gyi khams sangs rgyas kyi zhing bcu'i rgya mtsho'i rdul phra rab snyed kyi sangs rgyas kyi zhing 'das pa'i tha ma 'jig rten gyi khams pad+ma'i dpal zhes bya ba na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rgyal ba bzang po'i dpal bzhugs pa'i sangs rgyas kyi zhing gi nyin zhag gcig go /kye rgyal ba'i sras dag| de bzhin gshegs pa dgra bcom pa yang dag par rdzogs pa'i sangs rgyas rnams kyi mtshan 'di dag ni byang chub sems dpa' sems dpa' chen po kun tu bzang po'i spyod pa can/ dge ba'i bshes gnyen gyis yongs su zin pa'i byang chub sems dpa' sems dpa' chen po rnams kyis thos par 'gyur gyi/ gzhan dag gis ni thos par mi 'gyur ro/ /bcom ldan 'das kyis de skad ces bka' stsal nas/ byang chub sems dpa' sems dpa' chen po bsam gyis mi khyab pa'i rgyal po dang / thams cad dang ldan pa'i 'khor de dag dang / byang chub sems dpa' sems dpa' chen po de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 60b 'das dang / byang chub sems dpa' sems dpa' chen po bsam gyis mi khyab pa'i rgyal pos gsungs pa la mngon par bstod do/ /'phags pa bsam gyis mi khyab pa'i rgyal po'i mdo zhes bya ba theg pa chen po'i mdo rdzogs so// |