rKTs


H277

(e-text produced by ACIP)

see text in Tibetan script
101b
//rgya gar skad du/ AR+Ya bud+d+ha b+hU mi nA ma mahA yA na sU tra/ bod skad du/ 'phags pa sangs rgyas kyi sa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus cig na/ bcom ldan 'das gzhal med
102a
@#/ /khang chen po rin po che sna bdun mchog tu 'bar ba bkod pa/ 'jig rten khams dpag tu med pa rgyas par 'gengs pa'i 'od zer chen po rab tu 'byung ba/ gnas tha dad pa shin tu rnam par phye ba tshad med pa rnam par gnas pa/ rgya yongs su mchod pa/ khams gsum pa thams cad las yang dag par 'das pa'i spyod yul/ 'jig rten las 'das pa'i de'i bla ma'i dge ba'i rtsa ba las byung ba/ shin tu rnam par dag cing dbang sgyur ba'i rnam par rig pa'i mtshan nyid/ de bzhin gshegs pa'i gnas/ byang chub sems dpa' dpag tu med pa'i dge 'dun rjes su song ba/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / brgya byin dang / tshangs pa dang / 'jig rten skyong ba dang / mi dang / mi ma yin pa tshad med pa rnam par rgyu ba/ chos kyi ro'i dga' ba dang / bde ba chen pos brtan pa/ sems can thams cad kyi don thams cad yang dag par thob par byed par nye bar gnas pa/ nyon mongs pa'i gnod pa thams cad dang bral ba/ bdud thams cad yongs su spangs pa/ thams cad kyi bkod pa las lhag pa/ de bzhin gshegs pa'i byin gyi rlabs kyi bkod pa/ dran pa dang / blo gros dang / rtogs pa chen pos nges par 'byung ba yin pa/ zhi gnas
102b
dang| lhag mthong chen po'i bzhon pa yin pa/ rnam par thar ba'i sgo chen po stong pa nyid dang / mtshan ma med pa dang / smon pa med pa nas 'jug pa| rin po che chen po'i pad+ma'i rgyal po yon tan gyi tshogs tshad med pas brgyan pa'i bkod pa la brten pa na bzhugs te/ bcom ldan 'das/ legs par thugs su chud pa'i blo dang ldan pa/ kun tu spyod pa gnyis mi mnga' ba/ mtshan nyid med pa'i chos la mchog tu gzhol bar mdzad pa/ sangs rgyas kyi gnas pas gnas pa/ sangs rgyas thams cad dang mnyam pa nyid brnyes pa/ sgrib pa med pa'i rtogs pa brnyes pa| phyir mi zlog pa'i chos dang ldan pa/ spyod yul gyis mi 'phrogs pa/ bsam gyis mi khyab pa rnam par 'jog pa/ dus gsum la mnyam pa nyid tshar phyin pa/ 'jig rten gyi khams thams cad du zhugs pa'i sku dang ldan pa/ chos thams cad la the tshom med pa'i mkhyen pa mnga' ba/ spyod pa thams cad dang ldan pa'i blo mnga' ba/ chos mkhyen pa la nem nur mi mnga' ba/ rnam pa ma brtags pa'i sku mnga' ba/ byang chub sems dpa' thams cad kyis ye shes yang dag par blangs pa/ sangs rgyas kyi gnas pa gnyis su med pa dam pa'i pha rol tu byon pa/ de bzhin gshegs pa ma 'dres pa rnam par thar par mdzad pa'i ye shes kyi mthar phyin par mtha' dang / dbus med pa'i sangs rgyas kyis mnyam pa nyid thugs su chud pa/ chos kyi
103a
@#/ /dbyings dam pa can/ nam mkha'i khams kyi mthas gtugs pa/ phyi ma'i mtha'i mur thug pa de nyan thos kyi dge 'dun tshad med pa thams cad kyang cang shes pa/ sangs rgyas kyi sras/ sems shin tu rnam par grol ba/ shes rab shin tu rnam par grol ba/ tshul khrims shin tu rnam par dag pa/ chos 'dod pa rnams bde ba dang phrad pa/ mang du thos pa/ thos pa 'dzin pa/ thos pa bsags pa/ legs par bsam pa sems pa/ legs par smra brjod pa/ legs par bya ba'i las byed pa/ shes rab myur ba/ shes rab mgyogs pa/ shes rab rno ba/ nges par 'byung ba'i shes rab can/ nges par rtogs pa'i shes rab can/ shes rab che ba/ shes rab yangs pa/ shes rab zab pa/ shes rab mnyam pa med pa/ shes rab rin po che dang ldan pa/ rig pa gsum dang ldan pa/ tshe 'di la bde bar gnas pa'i mchog thob pa/ yon yongs su sbyong ba chen po/ spyod lam rab tu zhi ba/ phun sum tshogs pa/ bzod pa dang / nges pa chen po dang ldan pa/ de bzhin gshegs pa'i bka' la shin tu zhugs pa sha stag dang / byang chub sems dpa' shin tu 'dus pa la sogs pa sangs rgyas kyi zhing tha dad pa nas 'dus pa'i byang chub sems dpa' sems dpa' chen po dpag tu med pa thams cad kyang gnas chen po la yang dag par zhugs pa/ theg pa
103b
chen po'i chos kyis nges par byung ba/ sems can thams cad la sems mnyam pa/ bskal pa dang / bskal pa ma yin par rnam par rtog pa thams cad dang bral ba/ bdud phyir rgol ba thams cad nges par bcom pa/ nyan thos dang / rang sangs rgyas kyi yid la byed pa thams cad las ring du gyur ba/ chos chen po'i ro'i dga' ba dang / bde bas nye bar brtan pa/ 'jigs pa lnga las yang dag par 'das pa/ phyir mi ldog pa'i sa bgrod pa gcig par gyur pa can/ sems can thams cad kyi gnod pa thams cad rab tu zhi bar byed pa'i sa mngon du gyur pa sha stag dang thabs gcig go /de nas bcom ldan 'das kyis byang chub sems dpa' shin tu 'dus la bka' stsal pa/ shin tu 'dus/ sangs rgyas kyi sa ni chos lngas bsdus pa yin te/ lnga gang zhe na/ 'di lta ste/ chos kyi dbyings rnam par dag pa dang / me long lta bu'i ye shes dang / mnyam pa nyid kyi ye shes dang / so sor rtog pa'i ye shes dang / bya ba bsgrub pa'i ye shes kyis so/ /shin tu 'dus/ de la chos kyi dbyings rnam par dag pa ni/ 'di lta ste/ dper na/ nam mkha' ni gzugs su gyur pa sna tshogs kyi rnam pa thams cad na kun na yod kyang des brjod par bya ba'ang ma yin/ sna tshogs kyang ma yin te ro gcig go /de bzhin du de bzhin gshegs pa rnams kyi chos kyi dbyings rnam par dag pa'ang shes
104a
@#/ /bya sna tshogs kyi rnam pa thams cad la kun na yod kyang des brjod par bya ba'ang ma yin/ sna tshogs kyang ma yin te ro gcig go /shin tu 'dus/ 'di lta ste/ dper na/ nam mkha' ni gzugs su gyur pa thams cad tha mi dad par zhugs kyang gzugs kyi nyes pa rnams kyis kyang mi gos so/ /de bzhin du de bzhin gshegs pa rnams kyi chos kyi dbyings rnam par dag pa'ang sems can thams cad dang sems mnyam pa nyid kyi yongs su grub pas tha mi dad par zhugs kyang sems can gyi nyes pa rnams kyis kyang mi gos so/ /shin tu 'dus/ 'di lta ste/ dper na/ nam mkha' ni lus dang / ngag dang / yid kyi las su gyur pa thams cad la go 'byed kyang nam mkha' ni rtsol pa'ang med/ mngon par 'du byed pa'ang med do/ /de bzhin du de bzhin gshegs pa rnams kyi chos kyi dbyings rnam par dag pa'ang ye shes dang / sprul pa dang / sems can gyi bya ba sgrub pa thams cad kyi go 'byed kyang chos kyi dbyings rnam par dag pa ni rtsol ba'ang med/ mngon par 'du byed pa'ang med do/ /shin tu 'dus/ 'di lta ste/ dper na/ nam mkha' la gzugs rnam pa tha dad pa rnams kyi skye ba'ang snang / 'jigs pa'ang snang yang nam mkha' ni skye ba'ang med/ 'jigs pa'ang med do/ /de bzhin du de bzhin
104b
gshegs pa rnams kyi chos kyi dbyings rnam par dag pa la yang ye shes dang / sprul pa dang / sems can gyi bya ba sgrub pa thams cad kyi skye ba'ang snang / 'jig pa'ang snang yang chos kyi dbyings rnam par dag pa ni skye ba'ang med/ 'jig pa'ang med do/ /shin tu 'dus/ 'di lta ste/ dper na/ nam mkha' la gzugs rnam pa sna tshogs du ma dag gi 'phel ba'ang snang / 'grib pa'ang snang yang nam mkha' la ni 'phel ba'ang med/ 'grib pa'ang med do/ /de bzhin du de bzhin gshegs pa rnams kyi chos kyi dbyings rnam par dag pa la de bzhin gshegs pa'i bstan pa nying khu 'phel ba'ang snang / nub par 'gyur ba'ang snang yang chos kyi dbyings rnam par dag pa ni 'phel ba'ang med/ 'bri ba'ang med do/ shin tu 'dus/ 'di lta ste/ dper na/ nam mkha' thug pa med pa'i phyir nam mkha' la phyogs bcu na gzugs su gyur pa rnams mtha' yas mu med kyang nam mkha' ni 'gro ba'am/ 'ong ba'am/ g.yo ba'am/ 'gul ba med do/ /de bzhin du chos kyi dbyings rnam par dag pa mtha' thug pa med pa'i phyir de bzhin gshegs pa rnams kyi chos kyi dbyings rnam par dag pa la phyogs bcu dag na sems can thams cad la phan pa dang / bde pa so sor nye bar gnas par bya ba dag mtha' yas mu med kyang chos kyi dbyings rnam par dag pa ni 'gro ba'am/ 'ong ba'am/ g.yo ba'am/
105a
@#/ /'gul ba med do/ /shin tu 'dus/ 'di lta ste/ dper na/ nam mkha' la stong gsum gyi stong chen po 'jig pa dag kyang snang / 'chags pa dag kyang snang yang nam mkha' ni 'jig pa'ang ma yin/ 'chags pa'ang ma yin no/ /de bzhin du de bzhin gshegs pa rnams kyi chos kyi dbyings rnam par dag pa la rnam pa thams cad mngon par rdzogs par byang chub pa dang / yongs su mya ngan las 'das pa dpag tu med pa dag snang yang chos kyi dbyings rnam par dag pa la mngon par rdzogs par 'tshang rgya ba'ang med/ yongs su mya ngan las 'da' ba'ang med do/ /shin tu 'dus/ 'di lta ste/ dper na/ nam mkha' la rten pa gzugs su gyur pa dag la snang ba dang / 'drul ba dang / 'tshig pa dang / skam pa dang| 'gyur ba rnam pa sna tshogs snang yang nam mkha' la ni de dag gis 'gyur ba'ang med/ yongs su skyo ba'ang med do/ /de bzhin du de bzhin gshegs pa rnams kyi chos kyi dbyings rnam par dag pa la rten pa'i sems can gyi khams la bslab pa dang / lus dang / ngag dang / yid kyi las log par grub pa rnam pa mang po snang yang chos kyi dbyings rnam par dag pa ni de dag gis 'gyur ba'ang med/ yongs su skyo ba'ang med do/ /shin tu 'dus/ 'di lta ste/ dper na/ nam mkha' la rten pa'i sa chen po'ang
105b
snang| ri chen po dang / me dang / snang ba dang / bya rgyu ba dag dang / nyi ma dang / zla ba rgyu ba dag kyang snang yang nam mkha' ni de dag gi mtshan nyid ma yin no/ /de bzhin du de bzhin gshegs pa rnams kyi chos kyi dbyings rnam par dag pa la tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba'i phung po dag snang yang chos kyi dbyings rnam par dag pa ni de dag gi mtshan nyid ma yin no/ /shin tu 'dus/ 'di lta ste/ dper na/ nam mkha' la rgyu dang / rkyen gzhan dang gzhan 'dus pa'i stong gsum gyi stong chen po'i 'jig rten gyi khams kyi dkyil 'khor dpag tu med pa dag snang yang de la nam mkha' ni rtsol ba'ang med/ mngon par 'du byed pa'ang med do/ /de bzhin du de bzhin gshegs pa rnams kyi chos kyi dbyings rnam par dag pa la sangs rgyas kyi 'khor gyi dkyil 'khor rnam pa thams cad phun sum tshogs pa dpag tu med pa dag snang yang chos kyi dbyings rnam par dag pa la ni rtsol ba'ang med/ mngon par 'du byed pa'ang med do/ /shin tu 'dus/ me long lta bu'i ye shes ni 'di lta ste/ dper na/ ma long gi dkyil 'khor la rten nas/ gzugs brnyan dag snang ngo / /de bzhin du de bzhin gshegs pa rnams kyi me long lta bu'i ye shes kyi dkyil 'khor la rten nas skye mched dang / de'i yul la rnam par shes pa'i gzugs brnyan dag
106a
@#/ /snang ngo / /de bas na me long gi dkyil 'khor dang / me long lta bu'i ye shes kyi dkyil 'khor mnyam pas mnyam pa ste/ des na me long lta bu'i ye shes de me long lta bu'i ye shes zhes bya'o/ /de lta bas na me long gi dkyil 'khor ni de'i dper rig par bya'o/ /shin tu 'dus/ 'di lta ste/ dper na/ mi bsod nams 'dod pa la la zhig gis skye bo phal bo che ji snyed 'ongs shing lhags pa dag rang gi lus kyi skyon dang / yon tan la so sor rtog par bya ba'i phyir me long gi dkyil 'khor chen po gnas bzang por mi 'gul bar bzhag na skyon sel cing yon tan bskyed par 'gyur ro/ /de bzhin du de bzhin gshegs pa rnams kyi me long lta bu'i ye shes kyi dkyil 'khor yang sems can dpag tu med grangs med pa ji snyed pa dag kun nas nyon mongs pa dang / rnam par byang ba la so sor rtog par bya ba'i phyir rgyun mi 'chad pas mi g.yo bar chos kyi dbyings rnam par dag pa'i gnas su bzhag na kun nas nyon mongs pa dang / rnam par byang ba sel ba dang / bskyed par 'gyur ba'i phyir ro/ /shin tu 'dus/ 'di lta ste/ dper na/ me long gi dkyil 'khor shin tu phyis pa gsal zhing rnam par dag la g.ya' med pa ni kun tu lam me thal le lhang nge'o/ /de bzhin du de bzhin gshegs pa rnams kyi me long lta bu'i ye shes kyi dkyil
106b
'khor sangs rgyas kyi ye shes nyon mongs pa dang / shes bya'i sgrib pa'i dri ma bsal ba shin tu sbyangs pa'ang de la rten pa'i ting nge 'dzin yongs su bzung bas gsal zhing rnam par dag la g.ya' med de/ sems can thams cad kyi bya ba sgrub pa nyid kyi phyir lam me thal le lhang nge'o/ /shin tu 'dus/ 'di lta ste/ dper na/ me long gi dkyil 'khor ni gzugs kyi rkyen la ltos nas gzugs brnyan sna tshogs 'byung ba'i rgyur 'gyur ro/ /de bzhin du de bzhin gshegs pa rnams kyi me long lta bu'i ye shes kyi dkyil 'khor yang sems can gyi dus kyi rkyen la ltos nas ye shes kyi gzugs brnyan sna tshogs 'byung ba'i rgyur 'gyur ro/ /shin tu 'dus/ 'di lta ste/ dper na/ me long gi dkyil 'khor la gzugs brnyan rnam pa du ma rnam pa sna tshogs mang po snang yang me long gi dkyil 'khor de la de dag yod pa ma yin te/ de la me long gi dkyil 'khor de ni rtsol ba'ang med/ mngon par 'du byed pa'ang med do/ /de bzhin du de bzhin gshegs pa rnams kyi me long lta bu'i ye shes kyi dkyil 'khor la shes pa'i gzugs brnyan rnam pa du ma rnam pa sna tshogs mang po 'byung yang me long lta bu'i ye shes kyi dkyil 'khor de la shes pa'i gzugs brnyan de dag yod pa ma yin te/ de la me long lta bu'i ye shes kyi dkyil 'khor de rtsol ba'ang med/ mngon par 'du byed pa'ang med do/ /shin tu 'dus/ 'di lta ste/ dper na/ me long
107a
@#/ /gi dkyil 'khor ni gzugs brnyan rnam pa du ma sna tshogs mang po de dag dang ldan pa'ang ma yin/ mi ldan pa'ang ma yin te/ de dag dang mi nye ba dang / de'i rgyu yin pa'i phyir ro/ /de bzhin du de bzhin gshegs pa rnams kyi me long lta bu'i ye shes kyi dkyil 'khor yang shes pa'i gzugs brnyan rnam pa du ma sna tshogs mang po de dag dang ldan pa'ang ma yin| mi ldan pa'ang ma yin te/ de dag dang mi nye pa dang / bsnyel ba mi mnga' ba'i chos nyid kyi phyir ro/ /shin tu 'dus/ 'di lta ste/ dper na/ me long gi dkyil 'khor ngos thams cad nas legs par phyis pa ni mdun dang / zur dang / rgyab dang / kun nas kyang gzugs brnyan 'byung ba'i rgyur 'gyur ro/ /de bzhin du de bzhin gshegs pa rnams kyi me long lta bu'i ye shes kyi dkyil 'khor yongs su mchad pa dang / tshad med pa'i rnam par shin tu sbyangs pa'ang kun nas shes pa'i gzugs brnyan rnams 'byung ba'i rgyur 'gyur te/ 'di lta ste/ nyan thos kyi theg pa pa rnams nyan thos kyi theg pas nges par 'byung bar bya ba dang / rang sangs rgyas kyi theg pa pa rnams rang sangs rgyas kyi theg pas nges par 'byung bar bya ba dang / theg pa chen po pa rnams theg pa chen pos nges par 'byung bar bya ba'i phyir nyan thos kyi theg pa shes pa'i gzugs brnyan rnams dang / rang sangs rgyas kyi theg pa shes pa'i gzugs brnyan rnams
107b
dang| theg pa chen po shes pa'i gzugs brnyan rnams kyi rgyur 'gyur ro/ /shin tu 'dus/ 'di lta ste/ dper na/ me long gi dkyil 'khor la/ 'di lta ste/ sa dang / ri dang / shing dang / khyim dang| gzhal med khang chen po'i gzugs brnyan snang ste/ gzugs brnyan chen po dag snang yang me long gi dkyil 'khor ni de'i tshad du ma yin no/ /de bzhin du de bzhin gshegs pa rnams kyi me long lta bu'i ye shes kyi dkyil 'khor la'ang byang chub sems dpa'i sa dang po nas bzung ste sangs rgyas kyi sa'i bar dag gi ye shes kyi gzugs brnyan dag kyang snang / 'jig rten pa dang / 'jig rten las 'das pa'i chos thams cad shes pa'i gzugs brnyan dag kyang snang ste/ me long lta bu'i ye shes la ni tshad yongs su chad pa gang yang med do/ /shin tu 'dus/ 'di lta ste| dper na/ me long gi dkyil 'khor ni gzugs gzhan gyis bsgribs pa'i gzugs rnams la gzugs brnyan 'byung ba'i rgyur mi 'gyur ro/ /de bzhin du de bzhin gshegs pa rnams kyi me long lta bu'i ye shes kyi dkyil 'khor yang sems can yi dge ba'i grogs pos zin pa dam pa'i chos ma yin pa nyan pas bsgribs pa dag la ye shes kyi gzugs brnyan 'byung ba'i rgyur mi 'gyur te/ snod ma yin pa'i phyir ro/ /shin tu 'dus/ 'di lta ste/ dper na/ me long gi dkyil 'khor ni gzugs mun pa'i nang du bzhag pa rnams kyi gzugs brnyan 'byung ba'i rgyur
108a
@#/ /mi 'gyur ro/ /de bzhin du de bzhin gshegs pa rnams kyi me long lta bu'i ye shes kyi dkyil 'khor yang sems can nyes par spyod pa la dga' pa ma rig pa'i mun par zhugs pa rnams la ye shes kyi gzugs brnyan 'byung ba'i rgyur mi 'gyur te/ snod ma yin pa'i phyir ro/ /shin tu 'dus/ 'di lta ste/ dper na/ me long gi dkyil 'khor ni yul bskal pa rnams na gnas pa'i gzugs rnams kyi gzugs brnyan 'byung ba'i rgyur mi 'gyur ro/ /de bzhin du de bzhin gshegs pa rnams kyi me long lta bu'i ye shes kyi dkyil 'khor yang sems can dam pa'i chos kyis phongs par 'gyur pa'i las rnam par dag pa ma yin pa la gnas pa 'dod chen po ma yin pa dag la ye shes kyi gzugs brnyan 'byung ba'i rgyur mi 'gyur te/ snod ma yin pa'i phyir ro/ /shin tu 'dus/ mnyam pa nyid kyi ye shes ni yongs su grub pa rnam pa bcu las rig par bya ste/ mtshan dang / bdag po dang / dga' ba mnyam pa nyid khong du chud pa yongs su grub pa las dang / rten cing 'brel bar 'byung ba nyams su myong ba mnyam pa nyid khong du chud pa yongs su grub pa las dang / mtshan nyid dben pa mtshan nyid med par mnyam par nyid khong du chud pa'i yongs su grub pa las dang / yongs su skyab pa'i rnam pa'i byams pa chen po mnyam pa nyid khong du chud pa'i yongs su grub pa las dang /
108b
yal bar mi 'dor ba'i rnam pa'i snying rje chen po mnyam pa nyid khong du chud pa'i yongs su grub pa las dang / sems can thams cad la mos pa ji lta ba bzhin du gzugs kyi lus kun tu ston pa mnyam pa nyid yongs su grub pa las dang / sems can thams cad kyis gzung bar 'os pa'i tshig mnyam pa nyid yongs su grub pa las dang / 'jig rten nye bar zhi ba dang ro gcig pa mnyam pa nyid yongs su grub pa las dang / 'jig rten gyi chos bde ba dang / sdug bsngal ro gcig pa mnyam pa nyid yongs su grub pa las dang / yon tan shin tu bskyed pa mnyam pa nyid yongs su grub pa las so/ /shin tu 'dus/ so sor rtog pa'i ye shes ni 'di lta ste/ dper na/ 'jig rten gyi khams ni sems can gyi khams kyi gnas yin no/ /de bzhin du de bzhin gshegs pa rnams kyi so sor rtog pa'i ye shes kyang ting nge 'dzin dang / gzungs kyi sgo dang / so so yang dag par rig pa dang / spobs pa dang / bstan pa dang / sangs rgyas kyi chos thams cad kyi gnas yin no/ /shin tu 'dus/ 'di lta ste/ dper na/ 'jig rten gyi khams ni sems can rnams kyi rnam par rig pa rnam pa sna tshogs can gcig car 'byung ba'i rgyu yin no/ /de bzhin du de bzhin gshegs pa rnams kyi so sor rtog pa'i ye shes kyang shes bya thams cad la thogs pa med pa'i ye shes kyi rnam pa rig pa rnam pa sna tshogs can gcig car 'jug pa'i
109a
@#/ /rgyu yin no/ /shin tu 'dus/ 'di lta ste/ dper na/ 'jig rten gyi khams ni kun dga' ra ba dang / nags tshal dang / rdzing bu nyams dga' ba rnam pa sna tshogs pa dag gis lam ma thal le lhang nge'o/ /de bzhin du de bzhin gshegs pa rnams kyi so sor rtog pa'i ye shes kyang pha rol tu phyin pa dang / byang chub kyi phyogs dang mthun pa'i chos dang / stobs dang / mi 'jigs pa dang / sangs rgyas kyi chos ma 'dres pa rnams kyis rnam pa sna tshogs nyams dga' ba dag gis lam me thal le lhang nge'o/ /shin tu 'dus/ 'di lta ste/ dper na/ 'jig rten gyi khams ni 'di lta ste/ gling dang / zla ba dang / nyi ma dang / rgyal chen bzhi'i ris dang / sum cu rtsa gsum dang / 'thab bral dang / dga' ldan dang| 'phrul dga' dang / gzhan 'phrul dbang byed dang / tshangs ris la sogs pas shin tu rnam par phye ba'i rnam pa yin no/ /de bzhin du de bzhin gshegs pa rnams kyi so sor rtog pa'i ye shes kyang / 'di lta ste/ 'jig rten pa dang / 'jig rten las 'das pa'i phun sum tshogs pa dang / rgud ba dang / rgyu dang / 'bras bur bcas pa dang / nyan thos dang / rang sangs rgyas dang / byang chub sems dpa'i yang dag par 'grub pa ma lus pa la so sor rtog pas shin tu rnam par phye ba'i rnam pa yin no/ /shin tu 'dus/ 'di lta ste/ dper na/
109b
'jig rten gyi khams ni sems can rnams kyi longs spyod chen por 'gyur ro/ /de bzhin du de bzhin gshegs pa rnams kyi so sor rtog pa'i ye shes kyang sangs rgyas kyi 'khor gyi dkyil 'khor rnam pa thams cad phun sum tshogs pa kun tu ston pas chos kyi longs spyod chen por 'gyur ba'o/ /shin tu 'dus/ 'di lta ste/ dper na/ 'jig rten gyi khams na 'gro ba lnga po sems can dmyal ba dang / dud 'gro dang / yi dwags dang / lha dang / mi'i 'gro ba dag snang ngo / /de bzhin du de bzhin gshegs pa rnams kyi so sor rtog pa'i ye shes la'ang rgyu dang / 'bras bur bcas pa'i rnam pa rab tu dbye ba mtha' yas pa dang ldan pa'i 'gro ba lnga dag snang ngo / /shin tu 'dus/ 'di lta ste/ dper na/ 'jig rten gyi khams na 'dod pa dang / gzugs dang / gzugs med pa'i khams dag snang ngo / /de bzhin du de bzhin gshegs pa rnams kyi so sor rtog pa'i ye shes la'ang rgyu dang 'bras bur bcas pa'i rnam pa rab tu dbye ba mtha' yas pa dang ldan pa'i khams gsum po dag snang ngo / /shin tu 'dus/ 'di lta ste/ dper na/ 'jig rten gyi khams na ri rab la sogs pa rin po che'i ri bo chen po dag snang ngo / /de bzhin du de bzhin gshegs pa rnams kyi so sor rtog pa'i ye shes la'ang sangs rgyas dang / byang chub sems dpa'i mthu dang ldan pa'i chos rgya chen po ston pa dag snang ngo / /shin tu 'dus/ 'di
110a
@#/ /lta ste/ dper na/ 'jig rten gyi khams na rgya mtsho chen po zab pa mi 'khrugs pa dag snang ngo / /de bzhin du de bzhin gshegs pa rnams kyi so sor rtog pa'i ye shes la'ang chos kyi dbyings zab mo mu stegs can dang / phas kyi rgol ba thams cad kyis mi 'khrugs pa'i chos bstan pa dag snang ngo / /shin tu 'dus/ 'di lta ste/ dper na/ 'jig rten gyi khams ni ri khor yug dang / khor yug chen po rnams kyis kun nas bskor to/ /de bzhin du de bzhin gshegs pa rnams kyi so sor rtog pa'i ye shes kyang chos thams cad kyi rang gi mtshan nyid dang / spyi'i mtshan nyid kyi rnam pa thams cad la kun tu rmongs pa med pas yongs su bskor to/ /shin tu 'dus/ bya ba sgrub pa'i ye shes ni/ 'di lta ste/ dper na/ sems can rnams kyi lus kyi las rtsol ba las byung ba des sems can rnams zhing las dang / tshong byed pa dang / rgyal po'i zhabs 'bring byed pa la sogs pas yongs su tshol bar byed do/ /de bzhin du de bzhin gshegs pa rnams kyi bya ba sgrub pa'i ye shes rtsol ba las byung ba lus sprul pa'i las des de bzhin gshegs pa rnams sems can las dang / bzo'i gnas thams cad kyis rgyags shing dregs pa rnams la las dang / bzo'i gnas thams cad nye bar bstan te/ zil gyis mnan nas thabs la mkhas pa
110b
des kyang sems can rnams bstan pa la 'dun par byed/ yongs su smin par byed/ rnam par grol bar byed do/ /shin tu 'dus/ 'di lta ste/ dper na/ sems can rnams kyi lus kyi las yongs su spyod par byed pa des sems can rnams gzugs la sogs pa yul rnams la yongs su spyod do/ /de bzhin du de bzhin gshegs pa rnams kyi bya ba sgrub pa'i ye shes yongs su spyod par byed pa lus sprul pa'i las des de bzhin gshegs pa rnams skye ba'i gnas so sor skyes par gyur pa'i sems can rnams la skye ba mtshungs pa nyid du nye bar ston te| ris mthun pa mtshungs pa nyid du bstan pas kyang dbang byas nas thabs la mkhas pa des kyang sems can rnams bstan pa la 'dzud par byed/ yongs su smin par byed/ rnam par grol bar byed do/ /shin tu 'dus/ 'di lta ste/ dper na/ sems can rnams kyi lus kyi las nyams su myong bar byed pa sems can rnams legs par byas pa dang / nyes par byas pa'i las rnams kyi 'bras bu so sor myong bar byed do/ /de bzhin du de bzhin gshegs pa rnams kyi bya ba sgrub pa'i ye shes nyams su myong bar byed pa lus sprul pa'i las des de bzhin gshegs pa rnams de lta bu byung ba'i sde dang / skyes pa rabs kyi sde dang / dka' ba spyad pa thams cad nyams su myong ba yang dag par bstan te/ sems can rnams 'dun par byas nas thabs la mkhas pa
111a
@#/ /des kyang sems can rnams bstan pa la 'dzud par byed/ yongs su smin par byed/ rnam par grol bar byed do/ /shin tu 'dus/ 'di lta ste/ dper na/ sems can rnams kyi ngag gi las yang dag par dga' bar byed pa des sems can rnams phan tshun smra la/ kun tu smra zhing rab tu dga' bar byed do/ /de bzhin du de bzhin gshegs pa rnams kyi bya ba sgrub pa'i ye shes yang dag par dga' bar byed pa dag sprul pa'i las des de bzhin gshegs pa rnams kyi don bzang po/ tshig 'bru bzang po/ thos pa tsam kho nas kyang sems can byis pa'i shes rab can dad par byed pa'i chos ston par rab tu 'jug cing thabs la mkhas pa des kyang sems can rnams bstan pa la 'dzud par byed/ yongs su smin par byed| rnam par grol bar byed do/ /shin tu 'dus/ 'di lta ste/ dper na/ sems can rnams kyi ngag gi las sbyor bar byed pa des sems can rnams phan tshun du bya ba dag la rnam par sbyor bar byed de/ 'khrul pa la smod/ ma 'khrul pa la bstod cing 'bod do/ /de bzhin du de bzhin gshegs pa rnams kyi bya ba sgrub pa'i ye shes sbyor bar byed pa dag sprul pa'i las des de bzhin gshegs pa rnams yang dag par bslab pa'i gnas 'cha' ste/ bag yod pa la ni bstod cing dad pas rjes su 'brang ba dang / chos kyi rjes su
111b
'brang ba la sogs pa'i gang zag rnams kyang rnam par gzhog par byed la thabs la mkhas pa des kyang sems can rnams bstan pa la 'dzud par byed/ yongs su smin par byed/ rnam par grol bar byed do/ /shin tu 'dus/ 'di lta ste/ dper na/ sems can rnams ngag gi las yang dag par go bar byed pa des sems can rnams phan tshun du don mi shes pa rnams shes par byed de/ snyan dngags dang / bstan bcos rnams kyang rjod do/ /de bzhin du de bzhin gshegs pa rnams kyi bya ba sgrub pa'i ye shes yang dag par go bar byed pa dag sprul pa'i las des de bzhin gshegs pa rnams sems can dpag tu med pa rnams kyi the tshom gyi rnam pa dpag tu med pa dag zlog cing thabs la mkhas pa des kyang sems can rnams bstan pa la 'dzud par byed/ yongs su smin par byed/ rnam par grol bar byed do/ /shin tu 'dus/ 'di lta ste/ dper na/ sems can rnams kyi yid kyi las rnam par nges par byed pa des sems can rnams bya ba dang / mi bya ba dag rnam par sems so/ /de bzhin du de bzhin gshegs pa rnams kyi bya ba sgrub pa'i ye shes rnam par nges par byed pa yid sprul pa'i las des de bzhin gshegs pa rnams sems can rnams kyi sems kyi spyod pa brgyad khri bzhi stong dag rnams par sems shing thabs la mkhas pa des kyang sems can rnams bstan pa la 'dzud
112a
@#/ /par byed/ yongs su smin par byed/ rnam par grol bar byed do/ /shin tu 'dus/ 'di lta ste/ dper na/ sems can rnams kyi yid kyi las mngon par 'du byed pa byed pa des sems can dag rnam par bsam nas las kun tu 'byung bar mngon par 'du byed do/ /de bzhin du de bzhin gshegs pa rnams kyi bya ba sgrub pa'i ye shes mngon par 'du byed par byed pa yid sprul pa'i las des de bzhin gshegs pa rnams sems can gyi spyod pa de dag gi kun tu spyod pa dang / kun tu mi spyod pa yon tan dang / nyes pa dag kyang dpyad nas/ de dor ba dang / bskyed pa'i phyir gnyen po rnams mngon par 'du byed cing thabs la mkhas pa des kyang sems can rnams bstan pa la 'dzud par byed/ yongs su smin par byed/ rnam par grol bar byed do/ /shin tu 'dus/ 'di lta ste/ dper na/ sems can rnams kyi yid kyi las kun tu 'byung bar byed pa des sems can rnams las kun nas slong bar byed do/ /de bzhin du de bzhin gshegs pa rnams kyi bya ba sgrub pa'i ye shes kun tu 'byung bar byed pa yid sprul pa'i las des de bzhin gshegs pa rnams de'i gnyen po'i chos bstan pa'i phyir ming gi tshogs dang / tshig gi tshogs dang / yi ge'i tshogs rnams brjod cing thabs la mkhas pa des kyang sems can rnams
112b
bstan pa la 'dzud par byed/ yongs su smin par byed/ rnam par grol bar byed do/ /shin tu 'dus/ 'di lta ste/ dper na/ sems can rnams kyi yid kyi las nyams su myong bar byed pa des sems can rnams bde ba dang / sdug bsngal so sor myong bar byed do/ /de bzhin du de bzhin gshegs pa rnams kyi bya ba sgrub pa'i ye shes nyams su myong bar byed pa yid sprul pa'i las des de bzhin gshegs pa rnams mgo gcig dang / rnam par dbye ba dang / dri ba dang / gzhag pa 'dri ba la lan gdab pa dag la ci rigs par lan gdab par bya ba'i phyir byung ba dang / 'byung ba dang / da ltar gyi don rnams rab tu myong bar byed do/ /de nas bcom ldan 'das la byang chub sems dpa' shin tu 'dus kyis 'di skad ces gsol to/ /bcom ldan 'das/ chos kyi dbyings rnam par dag na ye shes kyi rdzogs par longs spyad pa/ dgos pa/ ro gcig pa/ 'dres pa/ nye bar 'dres pa/ ci de bzhin gshegs pa rnams nyid kyi lags sam| 'on te byang chub sems dpa' rnams kyi'ang legs/ bcom ldan 'das kyis bka' stsal pa/ shin tu 'dus/ ye shes kyi rdzogs par longs spyad pa/ dgos pa/ ro gcig pa/ 'dres pa/ nye bar 'dres pa ni byang chub sems dpa' rnams kyi yin par yang blta'o/ /gsol pa/ ye shes kyi rdzogs par longs spyad pa/ dgos pa/ ro gcig pa/
113a
@#/ /'dres pa/ nye bar 'dres pa byang chub sems dpa' gang dag gi legs par blta bar bgyi/ bka' stsal pa/ byang chub sems dpa' mi skye ba'i chos la bzod pa thob pa rnams kyi ste/ mi skye ba'i chos la bzod pa thob pa de dag ni gnyis su 'du shes pa'i gnyen por sems mnyam pa nyid thob ste/ 'di ltar bdag dang / gzhan du 'du shes pa'i gnyen po'o/ /de dag de yan chad bdag dang / gzhan du 'du shes mi 'byung ste/ ye shes kyi rdzogs par longs spyad pa/ dgos pa/ ro gcig pa/ 'dres pa/ nye bar 'dres par 'gyur ro| |gsol pa/ bcom ldan 'das/ ci nas kyang byang chub sems dpa' 'di dag gis bcom ldan 'das kyis gsungs pa'i don 'tshal nas byang chub sems dpa' rnams la rgya cher yang dag par rab tu ston par 'gyur ba'i dpe mdzad du gsol/ bcom ldan 'das kyis bka' stsal pa/ shin tu 'dus/ 'di lta ste/ dper na/ sum cu rtsa gsum pa'i lha dag ji srid du 'dres pa'i tshal du bzhugs par ma gyur pa de srid du de dag gi lha'i longs spyod rnams dngos po dang / nyams su myong ba dang / nga yir 'dzin pa'i sgo nas 'dres pa/ nye bar 'dres par mi gnas kyi/ gang tshun chad 'dres pa'i tshal du shugs par gyur pa de'i tshe 'dres pa'i tshal gyi mthu 'di 'dra ste/ sum cu rtsa gsum pa'i lha der zhugs pa
113b
rnams kyi lha'i longs spyod rnams dngos po dang / nyams su myong ba dang / nga yir 'dzin pa med par 'dres pa/ nye bar 'dres par gnas so/ /de bzhin du byang chub sems dpa' rnams ji srid du mi skye ba'i chos la bzod pa thob par ma gyur pa de srid du/ nyan thos dang / rang sangs rgyas thams cad la med pa/ sems mnyam pa de thob nas btang snyoms pa de thob par mi 'gyur te/ gnyis su 'du shes pa de dag ye shes kyi rdzogs par longs spyod pa/ dgos pa/ ro gcig pa/ 'dres pa/ nye bar 'dres par mi gnas kyi/ gang tshun chad mi skye ba'i chos la bzod pa thob par gyur pa de phan chad gnyis su 'du shes pa'i gnyen pos sems mnyam pa thob nas/ de'i 'og tu nyan thos dang / rang sangs rgyas thams cad dang thun mong ma yin pa'i btang snyoms thob ste/ de phan chad de dag gi ye shes kyi rdzogs par longs spyod pa/ dgos pa/ ro gcig pa/ 'dres pa/ nye bar 'dres par gnas so/ /shin tu 'dus 'di lta ste/ dper na/ chu bo dang / chu bran rnam pa mang po dag ji srid du rgya mtsho chen por zhugs par ma gyur pa de srid du gnas tha dad pa dang / chu tha dad pa dang / chu chung ba dang / chu skye 'grib yod pa dang / so so rang gi bya ba sgrub pa'i las can gyi chu dang / srog chags chu nas skyes pa brul bu dag gi 'tsho ba nye bar ston pa'i gnas yin no/ /gang tshun chad rgya mtsho
114a
@#/ /chen por zhugs par gyur pa de'i tshe gnas tha dad pa ma yin pa dang / chu tha dad pa ma yin pa dang / chu tshad med pa dang / skye 'grib med pa'i chu dang / bya ba sgrub pa gcig pa'i las can gyi chu dang / srog chags chu nas skyes pa phal po che chen po rnams kyi 'tsho ba nye bar ston pa'i gnas yin no/ /de bzhin du byang chub sems dpa' rnams ji srid du de bzhin gshegs pa rnams kyi chos kyi dbyings rnam par dag pa'i rgya mtsho chen por zhugs par ma gyur pa de srid du gnas tha dad pa dang / ye shes tha dad pa dang / ye shes chung ba dang| ye shes skye 'grib yod pa dang / so so rang gi bya ba sgrub pa'i las can gyi ye shes dang / sems can nyung du dag yongs su smin par 'gyur ba'i dge ba'i rtsa ba'i gnas yin no| |gang tshun chad de bzhin gshegs pa rnams kyi chos kyi dbyings rnam par dag pa'i rgya mtsho chen por zhugs par gyur pa de'i tshe gnas tha dad pa ma yin pa dang / ye shes tha dad pa ma yin pa dang / ye shes tshad med pa dang / ye shes skye 'grib med pa dang / ye shes kyi rdzogs par longs spyad pa/ dgos pa/ ro gcig pa/ 'dres pa/ nye bar 'dres par 'gyur te/ sems can tshad med pa dang / yongs su smin par byed pa'i dge ba'i rtsa ba'i gnas su 'gyur ro/ /de nas bcom ldan 'das kyis de'i tshe tshigs su bcad pa 'di dag
114b
bka' stsal to/ /chos rnams kun gyi de bzhin nyid/ /sgrib gnyis ldan dag mtshan nyid can/ /dngos po shes pa de dmigs pa/ /dbang tshad mi shes mtshan nyid can/ /de bzhin nyid shes thams cad nas/ /bsgoms las yang dag 'grub pa can/ /sems can kun la gnyis skyed pa/ /rnam kun mi zad 'bras bu can/ /lus dang ngag dang sems sprul pa'i/ /sbyor ba'i thabs kyi las can yin/ /ting nge 'dzin dang gzungs sgo dang / /dpag tu med pa gnyis dang ldan/ /rang bzhin chos rdzogs longs spyod dang / /sprul pas tha dad 'jug pa can/ /sangs rgyas rnams kyi chos kyi dbyings/ /rnam dag 'di ni yang dag brjod/ /bcom ldan 'das kyis de skad ces bka' stsal nas byang chub sems dpa' shin tu 'dus dang / byang chub sems dpa' de dag dang / nyan thos chen po de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa sangs rgyas kyi sa zhes bya ba theg pa chen po'i mdo rdzogs so// //rgya gar gyi mkhan po dzi na mi tra dang| shI len+d+ra po d+hi dang / pra dz+nyA barma dang / zhus chen gyi lo tsA ba ban+de ye shes sdes TI ka dang sbyar te gsar du bsgyur cing zhus te gtan la phab pa//