//rgya gar skad 115a @#/ /du| AR+Ya bud+d+ha k+She pa na nA ma hA yA na sU tra/ bod skad du/ 'phags pa sangs rgyas mi spang pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong stong nyi sa brgya lnga bcu'i dge slong gi dge 'dun chen po dang / byang chub sems dpa' brgyad khri dang thabs gcig tu bzhugs te/ de'i tshe byang chub sems dpa' sems dpa' chen po mya ngan med kyis byin pa 'khor de nyid du 'dus par gyur te 'dug go /byang chub sems dpa' sems dpa' chen po mya ngan gyi mun pa thams cad nges par 'joms pa dang / byang chub sems dpa' sems dpa' chen po ye shes kyi 'od dang / byang chub sems dpa' sems dpa' chen po tshangs pa las byung ba 'brug dbyangs sprin gyi nga ro dang / byang chub sems dpa' sems dpa' chen po yon tan rin po che'i me tog kun tu rgyas pa'i gzi brjid lta bu dang / byang chub sems dpa' sems dpa' chen po seng ge'i yon tan las byung ba 'brug gi nga ros 'gro ba dang / byang chub sems dpa' sems dpa' chen po 'od kyi gzi brjid rnam par bsgrags pa grags pa dang / byang chub sems dpa' sems dpa' chen po ye shes kyi 115b bkod pa mtha' yas pa bsgrub pa la sems pa dang / byang chub sems dpa' sems dpa' chen po yon tan rin po che mtha' yas pa'i me tog kun tu rgyas pa'i rnam par bsgrags pa grags pa dang / byang chub sems dpa' sems dpa' chen po shes rab kyi snang bas spobs pa bstan pa'i blo gros dang / byang chub sems dpa' sems dpa' chen po bcu po de dag 'khor de nyid du 'dus par gyur te 'khod do/ /de dag ni gzungs thob par bya ba'i phyir lo bdun du brtson par gyur pa dag go /de dag ni lo bdun 'das nas sems mnyam par bzhag pa'ang ma thob na gang gzungs thob par 'gyur ba lta ci smos/ de dag ni lo bdun du rmugs pa dang / gnyid yongs su spangs shing 'dug pa dang / 'chag pa la brtson par byas/ 'dod pa'i rnam par rtog pa yongs su spang ba la brtson par byas kyang bsam pa bzhin ma thob cing gzungs ma thob nas yongs su skyo ba'i yid kyis bslab pa phul nas nyams par gyur la/ thams cad kyang khyim na gnas pa'i skyon khas blangs shing bstan pa 'di las phyir dong ba sha stag go /yang de'i tshe rgyal po ma skyes sgra 'khor de nyid du 'dus par gyur te 'dug go /de'i tshe bcom ldan 'das kyis rgyal po ma skyes dgra'i 'gyod pa bsal to/ /'gyod pa bsal ba des kyang zhag bdun du sbyin pa byin zhing bcings pa thams cad kyang rab tu thar bar byas so/ /de sbyin pa byin te zhag 116a @#/ /bdun po de dag 'das nas srog chags bye ba phrag bdun dang lhan cig tu chos mnyan pa'i phyir bcom ldan 'das kyi thad du lhags so/ /rigs kyi bu bcu po khyim na gnas pa'i skyon khas blangs pa bstan pa 'di las phyir dong ba de dag kyang 'khor de nyid du lhags so/ /de nas byang chub sems dpa' sems dpa' chen po bag tsha ba med par gnas pa zhes bya ba/ gzungs thob pa/ bskal pa grangs med par rjes su mthun pa'i chos kyi bzod pa dang ldan pa/ mi skye ba'i chos la bzod pa thob pa/ spobs pa sna tshogs pa| ye shes kyi sgo dang / chos kyi sgo thams cad sgrub pa la mkhas pa/ chos bshad pa'i phyir sems can rnams kyi bsam pa dang / lhag pa'i bsam pa dang / mos pa la mkhas pa zhig kyang 'khor de nyid du 'ongs so/ /de nas byang chub sems dpa' sems dpa' chen po bag tsha ba med par gnas pa stan las langs te/ chos gos phrag pa gcig tu gzar nas bus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to| |bcom ldan 'das/ rigs kyi bu bcu po 'di dag ni dgung lo bdun du gzungs kyi don la brtson par gyur na de dag bsam pa ma grub cing bstan pa 'di las slar mchis 116b pa khyim na gnas par g.yar gyis blangs pa lags na/ de'i slad du bcom ldan 'das kyis rigs kyi bu de dag la ci nas myur ba kho nar ye shes thob par 'gyur ba de ltar legs par lung dbog par mdzad du gsol/ de nas bcom ldan 'das kyis byang chub sems dpa' sems dpa' chen po bag tsha ba med par gnas pa la 'di skad ces bka' stsal to/ / rigs kyi bu/ 'di ltar de dag gis sangs rgyas mi spang ba zhes bya ba'i chos kyi rnam grangs 'di ma thos la/ sangs rgyas spong ba ni rjes su thob ste/ des na rigs kyi bu de dag myur du shes pa 'di la ma skyes so/ /de nas bcom ldan 'das la byang chub sems dpa' sems dpa' chen po bag tsha ba med par gnas pas tshigs su bcad pa 'di dag gis zhus so// chos kyi rgyal po 'od mdzad pa/ /mi yi nyi ma khyod la zhu/ /byang chub sems dpa'i las spyod pa/ /spyod pa gang lags de bstan gsol/ /dpag med khyad par 'phags pa'i blo grags pa| |sangs rgyas thogs med stobs bcu mtshungs ma mchis/ /srid gsum 'byung ba rnam grol spros mi mnga'/ /sangs rgyas byang chub spyod pa dri med gsungs/ /dpag med ye shes mnga' ba khyod la zhu/ /yid gnyis gcod par mdzad pa khyod la zhu/ /bcom ldan mtshungs pa mi mnga' khyod la zhu/ /byang chub sems dpa'i spyod pa'i tshul gang lags/ /rgyal 117a @#/ /ba bdud thul bde gshegs gang gis na/ /nyon mongs kun las rnam par grol bar 'gyur/ /thugs rjes nyon mongs thul la byang chub lam/ /'phags pa de ni rab tu bshad du gsol/ /legs gsal legs byung legs 'brel gsung ba po/ /srid sel srid 'gro rnam 'joms lhur mdzad pa/ /dge sbyong bzang po smra mchog yid gnyis sel| |rgyal ba bde gshegs dri med spyod kun gsungs/ /sngon gyi srid brgyar legs spyad yon tan dge /'gro ba phan bder bsngo la brtson pa po/ /rin chen glang po rta spangs yun kyang ring / /bud med tshogs dang bu yang spangs mdzad pa/ /bzod dang dul dgyes tshul khrims yon tan gzhol/ /blo gros dgyes gzhol brtul zhugs dka' thub brtsams/ /yon tan tshol bas sdug bsngal brgya bzod pa/ /rgyal ba khyod kyis de brnyes yid gnyis bral/ /spyod lam mkhas pa yid gnyis rnam spangs pa/ /skyon tshogs dri ma gsum gyi tha ba bral| |'gro ba thams cad du yang rab gshegs pa/ /mgon po byang chub mchog gi tshul bshad gsol/ /de nas bcom ldan 'das kyis byang chub sems dpa' sems dpa' chen po bag tsha ba med par gnas pa la 'di skad ces bka' stsal to/ /rigs kyi bu/ byang chub sems dpa' bcu po 'di dag thams cad kyis ni sangs rgyas mi spang ba byas so/ / 117b gsol pa/ bcom ldan 'das/ sangs rgyas mi spang ba zhes bgyi ba de gang lags/ bka' stsal pa/ rigs kyi bu/ sngon byung ba 'das pa'i dus na bskal pa sum cu 'das pa de'i tshe de'i dus na 'jig rten gyi khams smig rgyu can du de bzhin gshegs pa rnam par gzigs pa'i nga ro zhes bya ba byung bar gyur pa de'i tshe de bzhin gshegs pa de yongs su mya ngan las 'das pa'i phyi ma'i dus phyi ma'i tshe na rigs kyi bu bcu po 'di dag khyim bdag shing sA la chen po lta bu'i gzhon nur gyur to/ /de'i tshe rigs kyi bu bcu po de dag thams cad kyis gtsug lag khang lnga brgya byed du bcug go /gtsug lag khang re rer yang dge slong stong stong gnas par gyur to/ /rigs kyi bu/ de'i tshe chos smra ba spobs pa brtsegs pa zhes bya ba gzungs thob pa zhig chos ston to/ /rigs kyi bu/ chos smra ba spobs pa brtsegs pa de chos kyi stan la 'dug pa la sangs rgyas lnga stong spobs pa sgrub par mdzad de/ lha dung phyur phrag brgyad kyang lus yongs su spyad pa'i phyir brtson par gyur to/ /de'i chos bshad pa gcig gis srog chags bdun khri bla na med pa yang dag par rdzogs pa'i byang chub las phyir mi ldog par 'gyur to/ / srog chags khri ni rgyun du zhugs pa'i 'bras bu thob bo/ /rigs kyi bu/ de'i tshe rgyal po zla bas byin pa zhes bya ba zhig byung ngo / /des chos la gus pas chos smra ba de la mchod pa'i phyir 118a @#/ /bud med lnga brgya dang / glu dbyangs dang / rol mo byas so/ /dge slong de la rin po che'i me tog sna tshogs kyis kyang mngon par gtor te/ tsan+dan gyi byug pas kyang byugs so/ /ras bcos bu lnga brgyas kyang bkab bo/ /bde ba'i rim gro thams cad kyis mchod pa/ 'di lta ste/ chos smra ba la mchod pa'i mchod pa mchog gis zhag bdun du rim gro byas so/ /de nas dge slong de la khyim bdag gi bu de dag gis 'chal pa'i tshul khrims kyis glengs so/ /las de'i rnam par smin pas de dag lo dgu khrir sems can dmyal ba rnams su skyes so/ /tshe rabs lnga brgyar ni mi rnams kyi nang du za ma dang / kla klo dang / log par lta ba'i khyim rnams su skyes so/ /tshe rabs drug brgyar ni dmus long dang| lce med par gyur to/ /tshe rabs bdun brgyar ni rab tu byung nas ji srid 'tsho'i mthar thug gi bar du gzungs ma thob par 'chi ba'i dus byas te/ las kyi sgrib pa de nyid kyis rigs kyi bu de dag bsgribs so/ /rigs kyi bu/ de lta bas na khyod mos par bya'o/ /khyod kyi khong du chud par bya'o/ /chos kyi rnam grangs 'di thos nas chos smra ba la mngon sum du mthong yang 'chal pa'i tshul khrims kyis brjod par mi bya na thos pas lta ci smos/ rigs kyi bu/ gang zhig sems can thams cad kyi mig 'byin par byed pa bas 118b ni gang zhig chos smra ba la gshe ba'i bsam pas lta bar byed na/ de ni de bas ches kha na ma tho ba'i las che ba yin no/ /gang zhig sems can thams cad 'ching bar byed la/ gang zhig chos smra ba mthong na rgyab kyis phyegs te 'dug par byed na/ bsod nams ma yin pa 'di la bsod nams ma yin pa snga ma des brgya'i char yang nye bar mi 'gro/ stong gi cha dang / 'bum gyi cha dang / grangs dang / cha dang / bgrang ba dang / dpe dang / rgyur yang nye bar mi 'gro'o/ /de ci'i phyir zhe na/ gang chos smra ba la skur pa 'debs pa des ni sangs rgyas la skur pa btab par 'gyur ba'i phyir ro/ /sangs rgyas la bsnyen bkur bya bar 'dod pas chos smra ba la bsnyen bkur bya'o/ /sangs rgyas la mchod par 'dod pas chos smra ba la mchod par bya'o/ / sangs rgyas la phyag 'tshal bar 'dod pas chos smra ba la phyag bya'o/ /de ci'i phyir zhe na/ thams cad mkhyen pa nyid ni byang chub sems dpa' las byung ba'i phyir dang / sangs rgyas bcom ldan 'das rnams byang chub sems dpa' las byung ba'i phyir ro/ /gang las brten te byang chub sems dpa'i byang chub tu sems skyes pa de las brten nas de ni nyon mongs pa rnams kyi 'dod pa'i longs spyod la gnas par brjod par mi bya/ de ni nam du'ang tshangs par spyod pa la mi gnas par brjod par mi bya/ de ni gzugs med pa'i ting nge 119a @#/ /'dzin la snyoms par zhugs kyang gzugs med par nye bar 'gro bar brjod par mi bya'o/ /de ci'i phyir zhe na/ byang chub sems dpa' de ni nyon mongs pa'i dbang gis mi skye ste/ byang chub sems dpa' ni smon lam gyi dbang gis skye ba'i phyir ro/ /de ni byis pa'i spyod pa thams cad las grol ba'o/ /gang byang chub sems dpa'i nyon mongs pa rnams ston par 'dod pa des ni nam mkha'i khams kyi gzugs bstan par 'dod du zad do/ /rigs kyi bu/ 'di lta ste/ dper na/ klu thams cad klu nyid du spyir song ba yin pas klu'i rgyal po ma dros pa ni klu'i bgrang bar yang 'gro la klu'i nyes pa gsum gyis kyang gos par mi 'gyur ro/ /gsum gang zhe na/ mgo la bye tshan mi 'bab pa dang / skyob po'i lus dang lhan cig tu kun tu mi gnas pa dang / de la nam mkha' lding gi 'jigs pa mi 'byung ba ste/ rigs kyi bu/ klu'i skyon gsum po de dag gis gos par mi 'gyur ro/ /rigs kyi bu/ de bzhin du byang chub sems dpa' sems dpa' chen po rtsed mo dang / dga' ba thams cad nyams su myong bar byed kyang srid pa gsum du 'dod pa dang| nyon mongs pa dang / sdug bsngal rnams kyis zil gyis mi non par brjod par bya'o/ /rigs kyi bu/ 'di lta ste/ dper na/ sems can gyi ris nya pa zhes bya ba yod 119b do| |de ni chu la spyod/ chu la blta'ang der 'chi ba'i dus byed par mi 'gyur ro/ /rigs kyi bu/ de bzhin du byang chub sems dpa' sems dpa' chen po 'khor ba na spyod kyang de nyid du byis pa'i spyod pa la gnas nas ye shes kyi spyod pa tshol lo/ /chos yang dag par blangs pas kyang rmongs par mi 'gyur ro/ /byis pa dang lhan cig tu gnas pas srid pa gsum gyi sdug bsngal nyams su myong bar yang mi 'gyur ro/ /de bas na byang chub sems dpa' sems dpa' chen pos bdag bsrung bar bya'o/ /de nas de'i tshe bcom ldan 'das kyis tshigs su bcad pa 'di dag bka' stsal to/ /bde bar gshegs pa gang zhig mchod bya dang / /de la gang zhig phyag kyang 'tshal 'dod pa/ /des 'dir bde gshegs sras rnams mchod par bya/ / 'di ni rgyal ba rnams la mchod pa mchog /nga yi gos dang lhung gzed gding ba dang / /mal cha dang ni 'chags gang yin pa/ /gang dag byang chub don du brtson byed pa/ /de dag la ni nga yis gnang ba yin/ /'di ltar mi mchog sangs rgyas thams cad kyang / /de las nges par shin tu byung ba'i phyir/ /sangs rgyas rnams la ji ltar mchod bya ba/ /de bzhin de dag la yang mchod par bya/ /de dang de dag mgon dang mkhas pa ste/ /long ba rnams la mig kyang sbyin par byed/ /lam la rmongs pa rnams kyi ston pa ste/ /'chi ba med pa'i phyogs su 120a @#/ /'dren pa yin/ /gal te sems can rnams kyis de dag la/ /rtag tu dga' bas longs spyod kun byin yang / /de dag rnams kyi dang po'i sems brten pa/ /de la'ang lan glan byas par mi 'gyur ro/ /de nas bcom ldan 'das la byang chub sems dpa' sems dpa' chen po bag tsha ba med par gnas pas 'di skad ces gsol to/ /bcom ldan 'das/ byang chub sems dpa' de dag gi las kyi sgrib pa de gang gis rnam par dag par 'gyur ba'i rnam grangs 'ga' zhig mchis lags sam/ bka' stsal pa/ yod de/ bag tsha ba med par gnas pa/ gal te rig kyi bu de dag rab tu byung nas gzungs sngags kyi gzhi dag zlos par byed na'o/ /s+yAd ya thed na/ a dats+tsha/ a da ts+tsha ba ti/ a nA bi le/ a kA+e She/ a kri te/ a nA yU he/ a be/ a pa dzi ra te/ b+ha ba tu/ aM ga mi/ yu tA dz+nyA pa/ pra k+shi be/ ni rga te/ u gra he/ hu hu me/ tsa ba le/ sa de/ sa me/ sa ma de/ yo ti/ na yo/ pa ri sho d+hi/ rigs kyi bu'am/ rigs kyi bu mo de dag gis gzungs sngags kyi gzhi 'di dag bzlas la/ zhag bdun du 'dzin pa med pa dang / 'jog pa med pa dang / gzugs med pa dang / rnam par rtog pa med pa dang / rab tu dang ba med pa dang / yun ring du 'gro ba med pa dang / byed pa med pa dang / gos pa med pa dang| mnyam pa'i sems dang bral ba dang / phung po lnga dang bral ba dang / mi bzod pa med pa'i tshul gyis sangs rgyas rjes su dran pa'i ting nge 'dzin bsgom par bya dgos te/ de ni de dag phyogs bcu'i sangs 120b rgyas stong gi zhal mthong bar byed pa dang / nyes pa 'chags su 'jug par byed pa'o/ /de nas rigs kyi bu de dag gis rab tu byung ste/ gsang sngags kyi gzhi 'di dag bzlas nas zhag bdun du brtson par 'dzin pa med pa dang / gzugs med pa dang / rnam par rtog pa med pa dang / rab tu dang ba med pa dang / yun ring du 'gro ba med pa dang / byed pa med pa dang / gos pa med pa dang / mnyam pa'i sems dang bral ba dang / phung po lnga dang bral ba dang / mi bzod pa med pa'i tshul gyis sangs rgyas rjes su dran pa'i ting nge 'dzin bsgom par bya dgos te de dag ni phyogs bcu'i sangs rgyas stong gi zhal mthong bar byed pa dang / nyes pa 'chags su 'jug par byed pa'o/ /de nas rigs kyi bu de dag gis rab tu byung ste gsang sngags kyi gzhi 'di dag bzlas nas zhag bdun du brtson par 'dzin pa med pa la sogs pas sangs rgyas rjes su dran pa'i ting nge 'dzin bsgoms te/ sangs rgyas stong yang mthong ngo / /las kyi sgrib pa de'ang bshags so/ /de nyid kyi tshe thams cad sgrub pa'i ye shes kyi sgo zhes bya ba'i gzungs kyang thob bo/ /'khor ba las bskal pa sum cu'ang phyir bsnyil lo/ /bla na med pa yang dag par rdzogs pa'i byang chub las kyang phyir mi ldog par gyur to/ /bag tsha ba med par gnas pa/ de la gang rgyal po zla bas byin zhes bya ba gang gis chos smra ba de la mchod pa byas par gyur pa de ni de bzhin gshegs pa dgra bcom pa yang dag par rdzogs pa'i sangs rgyas tshe dpag tu med pa yin te/ de'i tshe de'i dus na rgyal po zla bas byin par gyur to/ /gang 121a @#/ /spobs pa brtsegs pa zhes bya ba chos smra ba byung ba de ni de bzhin gshegs pa dgra bcom pa yang dag par rdzogs pa'i sangs rgyas mi 'khrugs pa yin te/ de'i tshe de'i dus na chos smra ba spobs pa brtsegs pa zhes bya bar gyur to/ /gang dag khyim pa shing sA la chen po lta bu'i gzhon nur gyur pa bcu po de dag ni rigs kyi bu 'di dag yin te/ de'i tshe de'i dus na gang dag gis chos smra ba spobs pa brtsegs pa de la 'chal pa'i tshul khrims kyis glengs pa ste/ khyim bdag shing sA la chen po lta bu'i gzhon nu bcu por gyur to/ /rigs kyi bu/ de lta bas na byang chub sems dpa' ji ltar gnas pas gnas kyang rung ste/ byang chub sems dpas srog gi phyir yang 'khrul pa la lta bar mi bya'o/ /de ci'i phyir zhe na/ rigs kyi bu/ chos bzhi po 'di dag ni byang chub sems dpa' rnams kyi byang chub yongs su spyod par byed pa'i phyir ro/ /bzhi gang zhe na/ stong pa nyid sgom pa dang / sems can thams cad la zhe 'dras pa med pa'i sems dang / byang chub sems dpa' rnams la rtag tu phan pa nye bar sgrub pa dang / zang zing med pa'i sems kyis chos sbyin pa yang dag par bstan pa ste/ rigs kyi bu/ chos bzhi po de dag ni/ byang chub sems dpa' sems dpa' chen po rnams kyis byang chub yongs su sbyong bar byed pa'o/ /de nas bcom ldan 'das kyis don de nyid tshigs su bcad pa 'di dag gis bka' stsal to/ /rgyal bas gang gis de dag rnam dag pa/ /stong la mos pa lam gyi 121b dang por gsungs/ /de la rtag tu bag yod gang gnas pa/ /de ni sangs rgyas thob nas 'jig rten snang / /sems can kun la rtag tu dang ba dang / /gang la'ang kwa zhes brjod par mi 'dod cing / /nga rgyal spangs nas skye bo rnams la bzod/ /'di ni sbyong bar byed pa'i lam gnyis pa'o/ /sdug pa'i dngos po dri med gang ci'ang rung / /byang chub mchog brtson rnams la de sbyin zhing / /de dag las ni lan 'dod mi bya ste/ /byang chub rab mchog gi ni lam gsum pa'o/ /snying rje can gyis nges par skye bo la/ /zang zing med par rtag tu chos spyan zhing| |lhag pa'i bsam pa yis ni snying brtse ba/ /de bzhin mkhas pas spyod pa'i lam bzhi pa'o/ /rigs kyi bu/ gzhan yang / byang chub sems dpa' sems dpa' chen po gzungs la sbyor bar byas pas ni dgon pa la bstan par bya/ chos nyan du 'gro bar bya/ gos gtsang ma dag bcang bar bya/ gcig pu gnas par bya/ spyod lam bzhis gnas par bya/ /chos smra ba rnams la sna tshogs sbyin pa bsgrub pa'i bsam pa la sbyor ba dang / mos par bya/ dkon mchog gsum la gus pa dang bcas par bya/ gzhan gyi dbang du mi 'gyur bar bya/ yongs su mi skyo ba dang / rtag tu brtson 'grus brtsams pa dang / g.yo med pa dang / sangs rgyas rjes su dran pa dang ma bral ba dang / mi dmigs pa dang / mtshan ma med pa legs 122a @#/ /par bsgom pa dang / ji skad smras pa de bzhin du byed par bya/ sangs rgyas la gsol ba gdab par mos par bya/ nyes pa bshags pa dang / rjes su yi rang ba dang / yongs su bsngo ba la mkhas par bya/ ma brtags pa'i spyod lam du mi bya/ mi skrag pa dang / ston pa dang / bla ma la gnas bca' bas gnas par bya'o/ /mthun par 'dzin par bya'o/ /chos de dag la yongs su mi skyo bas bsten par bya'o/ /bcom ldan 'das kyis chos kyi rnam grangs 'di bshad pa na srog chags sku mkhri ni sngon sems ma bskyed pa las byang chub tu sems skyes so/ /srog chags lnga stong ni chos rnams la chos kyi mig rdul med cing dri ma dang bral ba rnam par dag go /byang chub sems dpa' sum khri ni mi skye ba'i chos la bzod pa skyes so/ /chos kyi rnam grangs 'di thos pa ni byang chub sems dpa' sems dpa' chen po gces spras byed pa'o/ /gang gis bskal pa gang+gA'i klung gi bye ma snyed du stong gsum gyi stong chen po'i 'jig rten gyi khams rin po che sna bdun gyis bkang nas dkon mchog gsum la sbyin pa byin par byed la gang zhig chos kyi rnam grangs 'di nyan par byed na/ de ni de dag las mchog tu bkrabs pa'o/ /gang zhig bskal pa stong du shes rab kyi pha rol tu phyin pa ma gtogs par pha rol tu phyin pa lnga la 122b spyod par byed la/ gang zhig chos kyi rnam grangs 'di nyan par byed na 'di ni de dag las mchog tu bkrabs pa'o/ /gang zhig sangs rgyas stong la snga dro dang / nyi ma phyed dang nga / phye ma red kyi dus su bsnyen bkur byed/ gus par byed/ rjed par byed/ mchod par byed la/ gang zhig chos kyi rnam grangs 'di nyan par byed na/ 'di ni de dag las mchog tu bkrabs pa'o/ / rigs kyi bu dag /de lta bas na chos kyi rnam grangs 'di bsrung ba dang / bcang ba dang / bklags pa dang / bstan pa dang / yi ger bri bar bya ba'i phyir khyed cag la gtad kyi/ nga'i bstan pa 'di lus dang / srog yongs su gtang ba dang / yang bsngo zhing yongs su bsrung bar bya'o/ /bcom ldan 'das kyis de skad ces bka' stsal nas/ byang chub sems dpa' bag tsha ba med par gnas pa dang / byang chub sems dpa' de dag dang / dge slong de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa sangs rgyas mi spang ba zhes bya ba theg pa chen po'i mdo rdzogs so// //rgya gar gyi mkhan po dzin mi tra dang / pra dz+nyA barma dang / zhus chen gyi lo tsA ba ban+de ye shes sde la sogs pas bsgyur cing zhus te gtan la phab pa// // |