rKTs


H279

(e-text produced by ACIP)

see text in Tibetan script
123a
@#/ /rgya gar skad du/ AR+Ya aSh+Ta maN+Da la kaM nA ma mahA yA na sU tra/ bod skad du/ 'phags pa dkyil 'khor brgyad pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na/ dge slong lnga brgya tsam gyi dge slong gi dge 'dun chen po dang thabs gcig tu bzhugs so/ /byang chub sems dpa' rab tu mang po la/ 'di lta ste| byang chub sems dpa' sems dpa' chen po rdo rje sgra dbyangs dang / byang chub sems dpa' sems dpa' chen po mi pham pa dang / ngag mchog dang / blo gros mtha' yas dang / dri med snying po dang / ye shes rgyal po dang / mtha' yas sde dang / ye shes snang ba dang / ye shes sgron ma dang / shes rab snang ba dang / tshangs pas byin dang / byang chub sems dpa' sems dpa' chen po lha'i cod pan dang / de dag dang / gzhan yang / byang chub sems dpa' sems dpa' chen po dbang che ba dbang che bar grags pa sha stag dang yang thabs gcig go /de nas bcom ldan 'das kyis tshe dang ldan pa shA ri'i bu la bka' stsal pa/ shA ri'i bu/ sangs rgyas kyi zhing 'di nas shar phyogs logs su 'jig
123b
rten gyi khams gang+gA'i klung gi bye ma snyed 'das pa na 'jig rten gyi khams gzhan gyis mi thub pa'i rgyal mtshan zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas mtshan shin tu yongs bsgrags dpal zhes bya ba da ltar yang bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su 'jig rten gyi khams gang+gA'i klung gnyis kyi bye ma snyed 'das pa na 'jig rten gyi khams mthong dga' zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas kun tu snang ba zhes bya ba da ltar yang bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su 'jig rten gyi khams gang+gA'i klung gsum gyi bye ma snyed 'das pa na 'jig rten gyi khams mngon par dga' ba med pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas g.yul las rnam par rgyal ba'i dpal zhes bya ba da ltar yang bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su 'jig rten gyi khams gang+gA'i klung bzhi'i bye ma snyed 'das pa na 'jig rten gyi khams shin tu rnam par dag pa'i tshogs zhes bya ba yod de/ de na
124a
@#/ /de bzhin gshegs pa dgra bcom pa yang dag par rdzogs pa'i sangs rgyas dbang po'i tog gi rgyal mtshan gyi rgyal po zhes bya ba da ltar yang bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su 'jig rten gyi khams gang+gA'i klung lnga'i bye ma snyed 'das pa na 'jig rten gyi khams rdul bral tshogs zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas yon tan mtha' yas pa snang ba'i dbang phyug rgyal po zhes bya ba da ltar yang bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su 'jig rten gyi khams gang+gA'i klung drug gi bye ma snyed 'das pa na 'jig rten gyi khams slu ba med pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas thogs pa med par ston pa'i dpal zhes bya ba da ltar yang bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su 'jig rten gyi khams gang+gA'i klung bdun gyi bye ma snyed 'das pa na 'jig rten gyi khams gser gyi tshogs zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rin
124b
po che'i pad+ma la rnam par gnon pas bzhud pa zhes bya ba da ltar yang bzhugs te 'tsho zhing gzhes la chos kyang ston to/ /shA ri'i bu/ sangs rgyas kyi zhing 'di nas shar phyogs logs su 'jig rten gyi khams gang+gA'i klung brgyad kyi bye ma snyed 'das pa na 'jig rten gyi khams sgra dbyangs snyan pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rin po che'i pad+ma la rab tu gnas pa'i ri dbang rgyal po zhes bya ba da ltar yang bzhugs te 'tsho zhing gzhes la chos kyang ston to/ /shA ri'i bu/ de bzhin gshegs pa dgra bcom pa yang dag par rdzogs pa'i sangs rgyas brgyad po de dag gi sangs rgyas kyi zhing de dag ni yongs su dag pa ste/ bud med med do/ /snyigs ma lnga med do/ /shA ri'i bu/ rigs kyi bu'am/ rigs kyi bu mo theg pa chen po la yang dag par zhugs pa gang la la zhig de bzhin gshegs pa dgra bcom pa yang dag par rdzogs pa'i sangs rgyas brgyad po de dag gi mtshan thos nas len cing 'dzin la klog cing kun chub par byed de/ 'jug par byed cing gzhan dag la'ang rgya cher rab tu ston na/ shA ri'i bu/ rigs kyi bu'am/ rigs kyi bu mo de sems can dmyal bar 'gro'am/ dud 'gro'i skye gnas sam/ yi dwags kyi yul lam/ lha ma yin gyi yul gyi nang du 'gro bar 'gyur ba de'i gnas med de/ go skabs ma yin no/ /mi khom pa rnams
125a
@#/ /su skye ba de'i gnas med do/ /shA ri'i bu/ bud med kyis kyang de bzhin gshegs pa dgra bcom pa yang dag par rdzogs pa'i sangs rgyas de dag gi mtshan thos nas/ blangs shing bzung la bklags shing kun chub par byas te 'jug par byas shing / gzhan dag la'ang rgya cher yang dag par rab tu bshad na/ shA ri'i bu/ de bud med kyi dngos po lan gnyis len pa'i gnas de med cing go skabs ma yin te/ de'i gnas med do/ /shA ri'i bu/ rigs kyi bu'am/ rigs kyi bu mo theg pa chen po la yang dag par zhugs pa gang la la zhig gis/ de bzhin gshegs pa dgra bcom pa yang dag par rdzogs pa'i sangs rgyas de dag gi mtshan thos nas blangs shing bzung la bklags shing kun chub par byas te 'jug par byas shing / gzhan dag la'ang rgya cher yang dag par rab tu ston na/ de la lha dang / klu dang / gnod sbyin dang / srin po dang / mi dang / mi ma yin pa dang / rgyal po dang / chom rkun dang / me dang / chu dang / dug dang / mtshon cha las 'jigs pa mi 'byung bar shes par bya'o/ /shA ri'i bu/ rigs kyi bu'am/ rigs kyi bu mo theg pa chen po la yang dag par zhugs pa gang la la zhig gis de bzhin gshegs pa dgra bcom pa yang dag par rdzogs pa'i sangs rgyas de dag gi mtshan brjod de/ nub mo srod la nyal na de bde bar
125b
gnyid kyis log par 'gyur/ bde bar sad par 'gyur zhing sdig pa can gyi rmi lam rmi bar mi 'gyur te/ de gnyid kyis log pa na'ang lha rnams bsrung bar 'gyur ro/ /shA ri'i bu/ rigs kyi bu'am/ rigs kyi bu mo theg pa chen po la yang dag par zhugs pa gang la la zhig gis de bzhin gshegs pa dgra bcom pa yang dag par rdzogs pa'i sangs rgyas de dag gi mtshan brjod nas mtshan mo tho rangs 'jig rten pa'i bya ba rnams rtsol na 'phel ba nyid du 'gyur gyi 'grib par mi 'gyur ro/ /shA ri'i bu/ rigs kyi bu'am/ rigs kyi bu mo theg pa chen po la yang dag par zhugs pa gang la la zhig de bzhin gshegs pa dgra bcom pa yang dag par rdzogs pa'i sangs rgyas de dag gi mtshan thos nas len cing 'dzin la klog cing kun chub par byed de/ 'jug par byed cing gzhan dag la'ang rgya cher yang dag par rab tu ston na/ de 'di nas bzung ste byang chub kyi bar du nam yang mngon par shes pa dang bral bar mi 'gyur/ nam yang gzungs dang bral bar mi 'gyur/ nam yang dbang po ma tshang bar mi 'gyur/ nam yang mtshan dang bral bar mi 'gyur/ nam yang shes rab shin tu rgyas pa dang bral bar mi 'gyur/ nam yang sangs rgyas dang / byang chub sems dpa' dang / rang sangs rgyas dang / nyan thos dang bral bar mi 'gyur ro/ /de 'di nas bzung ste byang chub kyi bar du
126a
@#/ /nam yang shes rab phun sum tshogs pa shin tu rgyas pa dang bral bar mi 'gyur ro/ /bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad ces bka' stsal to/ /'jig rten mgon po 'di dag gi /mtshan rnams mi gang 'dzin byed pa/ /de ni ngan 'gro kun zlog nas/ /ring po mi thogs bde 'gror 'gro/ /rdzogs pa'i sangs rgyas mnyes par byed/ /de yi sems ni dad par 'gyur/ /rtag tu 'jig rten mgon mthong nas/ /mchod pa dam pa byed par 'gyur/ /mtshan rnams 'di dag 'dzin byed pa/ /bskal pa bye ba grangs med du/ /de ni 'du ba'i sgo rnyed cing / /de ni rtag tu bkur bar 'gyur/ /mtshan rnams 'di dag 'dzin byed pa/ /bskal pa bye ba grangs med du/ /lha rnams kyis ni rtag tu mchod/ /myur du byang chub 'tshang rgyar 'gyur/ /mtshan rnams 'di dag 'dzin byed pa/ /de ni shes rab 'chal ba'am/ /blun pa'am 'on par yong mi 'gyur/ /kun tu sangs rgyas mthong bar 'gyur/ /sangs rgyas rnams kyi mtshan 'dzin pa/ /de la lha klu gnod sbyin dang / /gsang ba lha dang lha min rnams/ /nyin dang mtshan du srung bar byed/ /mtshan rnams 'di dag 'dzin byed pa/ /de ni gzugs mtshan phun sum tshogs/ /'byor ba'i rigs su skye 'gyur zhing / /
126b
de ni sbyin pa'i bdag por 'gyur/ /thub pa rnams kyi mtshan 'dzin pas/ /bskal pa bye ba brgya mang du/ /de yi kha nas dri 'byung ba/ /dri bsung zhim po 'byung bar 'gyur/ /thub pa rnams kyi mtshan 'dzin pa/ /rdzu 'phrul che zhing yid gzhungs la/ /'dab ma bye ba stong ldan pa'i/ /rin chen pad+ma skye bar 'gyur/ /mtshan rnams 'di dag 'dzin byed pa/ /pha dang ma dang rtsa lag dang / /spun rnams kyi ni yid 'ong zhing / /nam yang phongs pa mthong mi 'gyur/ /bud med kyis kyang blo ldan pa/ /de dag rnams kyi mtshan thos na/ /bud med lus la yid byung nas/ /mkhas shing skyes par skye bar 'gyur/ /lus can kun la phan pa'i phyir/ /myur du byang chub 'tshang rgya ste/ /lha dang bcas pa'i 'jig rten gyi/ /rten dang skyabs su 'byung bar 'gyur/ /de la mtshon gyis mi tshugs te/ /dug gis mi tshugs mes ma yin/ /g.yon can dag dang chom rkun dang / /rgyal po'ang de la gnod mi 'gyur/ /thub pa rnams kyi mtshan 'dzin pa| |de la sdig dang ldan pa'i bdud/ /nag po'i rtsa lag bzhon bcas pas/ /glags ni rnyed par yong mi 'gyur/ /zhing rnams bye ba bsam yas su/ /de ni mkha' las 'gro 'gyur te| |phun sum tshogs pa'i zhing der ni/ /'jig rten mgon po rnams la blta/ /brtan pa sangs rgyas rnams mthong nas/ /dad pa brtan po thob par 'gyur/ /de yi bsam pa mkhyen
127a
@#/ /nas su/ /mi mchog rnams ni lung ston te/ /thub pa rnams las mngon sum bdag /byang chub lung bstan thos nas su/ /rtag tu dga' dang ldan 'gyur zhing / /de ni dogs pa med par 'gyur/ /mkhas pa gang zhig mtshan 'di dag /thos nas rab tu 'dzin byed pa/ /de ni yon tan 'di dag dang / /rgya chen gzhan yang los kyang 'thob/ /thub pa drang srong che gyur pa/ /'di dag rnams kyi mtshan thos nas/ /mi gang mtshan rnams 'dzin byed pa/ /rdzu 'phrul che mkhas bsod nams 'dod/ /de lta bas na bdag nyid che/ /de dag rnams kyi mtshan thos na/ /skyes bu mkhas pas gzung bya zhing / /gzhan dag la yang bshad par bya/ /bcom ldan 'das kyis de skad ces bka' stsal nas/ /tshe dang ldan pa shA ri'i bu dang / dge slong de dag dang / byang chub sems dpa' de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkyil 'khor brgyad pa zhes bya ba theg pa chen po'i mdo rdzogs so// //rgya gar gyi mkhan po su ren+d+ra b+ho d+hi dang / zhus chen gyi lo tsA ba ban+de ye shes sdes bsgyur cing zhus te gtan la phab pa//