rgya gar skad du/ AR+Ya tri kA ya nA ma mahA yA na sU tra/ bod skad du/ 'phags pa sku gsum zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khang bya rgod phung po'i ri la bzhugs so/ /byang chub sems dpa' tshad med grangs med pa dang / lha dang / klu dang / 'khor thams cad dang thabs gcig tu bzhugs te/ bcom ldan 'das la bkur stir bgyid cing mchod do/ /de'i tshe 'khor der byang chub sems dpa' sa'i snying po 'dug pa stan las langs nas/ bcom ldan 'das la 'di skad ces gsol to/ /bcom ldan 'das la sku du mnga'/ bcom ldan 'das kyis bka' stsal pa/ sa'i snying po/ bcom ldan 'das de bzhin gshegs pa la sku gsum mnga' ste/ chos kyi sku dang / longs spyod rdzogs pa'i sku dang / sprul pa'i sku'o/ /rigs kyi bu/ de bzhin gshegs pa'i sku gsum ni rang bzhin rnam par dag pa ni chos kyi sku'o/ /ting nge 'dzin rnam par dag pa ni longs spyod rdzogs pa'i sku'o/ /spyod pa rnam par dag pa ni sangs rgyas thams cad kyi sprul pa'i sku'o/ /rigs kyi bu/ de bzhin gshegs pa'i chos kyi sku ni nam mkha' ltar rang bzhin med pa'i don no/ /longs spyod rdzogs pa'i sku ni sprin ltar 'byung ba'i 133a @#/ /don no/ /sprul pa'i sku ni sangs rgyas thams cad kyi 'phrin las te/ char pa lta bu ste thams cad bangs pa'i don no/ /bcom ldan 'das la byang chub sems dpa' sa'i snying pos 'di skad ces gsol to/ /bcom ldan 'das kyi sku gsum gyi bshad pa ji ltar blta bar bgyi/ bcom ldan 'das kyis byang chub sems dpa' sa'i snying po la bka' stsal pa/ rigs kyi bu/ de bzhin gshegs pa'i sku gsum ni 'di ltar blta bar bya'o/ /chos kyi sku ni de bzhin gshegs pa'i ngo gang la blta bar bya'o/ /longs spyod rdzogs pa'i sku ni byang chub sems dpa'i ngo gang la blta bar bya'o/ /sprul pa'i sku ni mos pas spyod pa'i so so skye bo'i ro gang la blta bar bya'o/ /rigs kyi bu/ chos kyi sku ni sangs rgyas thams cad dang rang bzhin mthun par gnas so/ /longs spyod rdzogs pa'i sku ni sangs rgyas thams cad dang ting nge 'dzin mthun par gnas so/ /sprul pa'i sku ni sangs rgyas thams cad dang 'phrin las mthun par gnas so/ /rigs kyi bu/ kun gzhi gnas su dag pa ni me long lta bu'i ye shes te chos kyi sku'o/ /nyon mongs pa'i yid gnas su dag pa ni mnyam pa nyid kyi ye shes so/ /yid kyi rnam par shes pa gnas su dag pa ni so sor kun tu rtog pa'i ye shes te longs spyod rdzogs pa'i sku'o/ /sgo lnga'i rnam 133b par shes pa gnas su dag pa ni bya ba grub pa'i ye shes te sprul pa'i sku'o/ /de nas byang chub sems dpa' sa'i snying pos bcom ldan 'das la 'di skad ces gsol to/ /bcom ldan 'das| bdag gis bcom ldan 'das la dam pa'i chos thos pa ni rab tu legs so/ /bde bar gshegs pa/ rab tu legs so/ /bcom ldan 'das kyis bka' stsal pa/ rigs kyi bu| bcom ldan 'das la chos kyi rnam grangs 'di gang gis rab tu 'dzin pa des bsod nams tshad med brjod du med grangs med cing dpag tu med pa thob bo/ /bcom ldan 'das kyis de skad ces bka' stsal pa dang / byang chub sems dpa' sa'i snying po dang / lha dang / klu dang / gnod sbyin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa sku gsum zhes bya ba theg pa chen po'i mdo rdzogs so// |