//rgya gar skad du/ AR+Ya pra dz+nyA pa ra mi tA sa man+ta b+ha dra ma hA yA na sU tra/ bod skad du/ 'phags pa shes rab kyi pha rol tu phyin pa kun tu bzang po theg pa chen po'i mdo/ sangs rgyas dang / byang chub sems dpa' thams 265a @#/ /cad la phyag 'tshal lo/ /'di skad bdag gis thos pa dus gcig na/ bcom ldan 'das yul ma ga d+ha'i dgon pa chos kyi snying po na bzhugs te/ phyogs bcu'i sangs rgyas kyi zhing tshad med grangs med pa nas 'dus pa'i byang chub sems dpa' sangs rgyas kyi zhing rdul phra mo dang mnyam pa dang thabs cig go/ thams cad kyang kun tu bzang po'i smon lam la mnga' brnyes pa/ spyod pa la gnas pa'o/ /de nas byang chub sems dpa' kun tu bzang pos chos thams cad rnam par mi rtog pa brtan pa zhes bya ba'i ting nge 'dzin la snyoms par zhugs so/ /ting nge 'dzin de'i mthus 'jig rten gyi khams sangs rgyas kyi zhing gi rdul phra mo dang mnyam pa thams cad g.yos so/ /de nas bcom ldan 'das kyis byang chub sems dpa' kun tu bzang po la phyag gis dbu la reg par gyur to/ /de ltar reg pas sangs rgyas kyi zhing rnams kyang rab tu g.yos par gyur/ lha rnams kyis mthun par tshigs su bcad pas bstod pa/ 'jig rten sgron ma lha mi'i dpe las 'das/ /yon tan rgya mtsho lta bu'i pha rol phyin/ /srid pa'i mtsho las 'gro ba khyod kyis sgrol| |ded dpon khyod kyis rab tu bskyab par gsol/ /de nas byang chub sems dpa' kun tu bzang pos bcom ldan 'das la 'di skad ces gsol to/ /bcom ldan 'das 265b ji ltar bslab par bya ba'i don shes rab 'dra ba dang / shes rab yin pa la bslab par bya/ bcom ldan 'das kyis bka' stsal pa/ kun tu bzang po/ shes rab 'dra ba ni/ 'jig rten tshogs kyi lam pa rnams kyi shes rab gang yin pa'o/ /shes rab yin pa ni/ sa dang po yan chad kyi shes rab gang yin pa'o/ /bcom ldan 'das kyis de skad ces bka' stsal pa dang / byang chub sems dpa' kun tu bzang po dang / lha dang mir bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa kun tu bzang po theg pa chen po'i mdo rdzogs so// |