rgya gar skad du/ shU n+ya tA nA ma ma hA sU tra/ bod skad du/ mdo chen po stong pa nyid ces bya ba/ dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod kyi shar gyi kun dga' ra ba na ri dwags 'dzin gyi ma'i khang bzang na bzhugs so| |de nas tshe dang ldan pa kun dga' bo phyi dro nang du yang dag 'jog las langs nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te phyogs gcig tu 'dug go /phyogs gcig tu 'dug nas bcom ldan 'das la tshe dang ldan pa kun dga' bos 'di skad ces gsol to/ /btsun pa/ dus gcig na bcom ldan 'das shAkya rnams kyi nang na shAkya rnams kyi grong rdal grong khyer zhes bgyi ba na bzhugs pa de'i tshe de nas bcom ldan 'das kyis 'di skad ces kun dga' bo/ nga ni/ stong pa nyid kyis lan mang du gnas so/ /zhes bka' stsal pa'i don bdag gis 'tshal lags na/ btsun pa/ ci bcom ldan 'das kyis bka' stsal pa/ bdag gis legs par mnyan 477a @#/ /cing legs par bzung / legs par yid la bgyis/ legs par bsten/ legs par rtogs pa de bzhin du lags shing de kho na bzhin lags sam/ bka' stsal pa| kun dga' bo/ de de bzhin te/ ngas bshad pa khyod kyis legs par mnyan cing legs par bzung / legs par bsten/ legs par rtogs pa de ni/ gzhan du ma yin te/ de kho na bzhin yin no/ /de ci'i phyir zhe na/ kun dga' bo/ da ni/ de'i tshe dang / da ltar yang stong ba nyid kyis lan mang du gnas pa'i phyir ro/ /kun dga' bo/ 'di lta ste/ dper na| ri dwags 'dzin gyi ma'i khang bzang 'di glang po che dang / rta dang / ba lang dang / lug dang / bya gag dang / phag gis stong zhing / nor dang / 'bru dang / 'gron bu dang / gser gyis stong la/ bran dang / bran mo dang / las byed pa dang / zho shas 'tsho ba dag dang / skyes pa dang / bud med dang / khye'u dang / bu mo dag gis stong yang 'di na 'di lta ste/ dge slong gi dge 'dun kho na'am/ de las kha cig la brten nas mi stong ba yang yod do/ /kun dga' bo/ de bzhin du gang la gang med pa de des stong ngo / /zhes bya bar yang dag par rjes su mthong yang / de la lhag ma gang yod pa de de la yod do/ /zhes bya bar yang dag pa ji lta ba bzhin du rab tu shes te/ kun dga' bo/ stong pa nyid la 'jug pa 'di ni/ yang dag pa 477b ji lta ba bzhin te/ phyin ci ma log pa yin no/ /kun dga' bo/ de lta bas na/ dge slong yang kye ma bdag stong pa nyid kyis lan mang du gnas par bya'o/ /zhes 'dod par gyur na/ kun dga' bo| dge slong des grong du 'du shes pa dang / mir 'du shes pa yid la mi bya bar dgon par 'du shes pa'am/ de las kha cig yid la bya'o/ /de 'di snyam du sems te 'du shes kyi rnam pa 'di lta ste/ grong du 'du shes pa dang / mir 'du shes pas stong yang 'di la 'di lta ste/ dgon par 'du shes pa kho na'am/ de las kha cig la brten nas mi stong ba yang yod do snyam mo| |de la grong du 'du shes pa dang / mir 'du shes pa la brten pa nyon mongs pa'i gnas gang dag yin pa de dag med kyang de la 'di lta ste/ dgon par 'du shes pa kho na'am/ de las kha cig la brten pa tsam gyi nyon mongs pa'i gnas ni/ yod do/ /kun dga' bo/ de lta bas na/ gang la gang med pa de des stong ngo / /zhes bya bar yang dag par rjes su mthong yang / de la lhag ma gang yod pa de de la yod do/ /zhes bya bar yang dag pa ji lta ba bzhin du rab tu shes te/ kun dga' bo/ stong pa nyid la 'jug pa 'di ni/ yang dag pa ji lta ba bzhin te/ phyin ci ma log pa yin no/ /kun dga' bo/ gzhan yang dge slong zhig kye ma bdag stong pa nyid kyis lan mang du gnas par bya'o/ /zhes 'dod par gyur na/ kun dga' bo/ dge slong 478a @#/ /des mir 'du shes pa dang / dgon par 'du shes pa yid la mi bya bar sar 'du shes pa'am/ de las kha cig yid la bya zhing / des 'di ltar sa'i phyogs gang dag mtho dma' dang / sdong dum dang / tsher ma'i gzhi dang / rngo ba dang / gseg ma dang / gyo dum dang bcas pa dang / tshwa rgo can dang / dgon dung dang / tha chad dang / sdig pa can gyis de dag yid la mi bya bar sa'i phyogs gang dag mnyam pa dang / mi mnyam pa med pa dang / lag mthil lta bu dang / gtsang ba dang / nags tshal dang ldan pa dang / nyams dga' ba de lta bu'i sa'i phyogs de dag yid la bya ste/ 'di lta bu dper na/ khyu mchog gi ko pa 'phur bu brgyas shin tu brgyangs gnyer ma rangs shing / kham khum med pa de bzhin du sa'i phyogs gang dag mtho dma' dang / sdong dum dang / tsher ma'i gzhi dang / rngo ba dang / gseg ma dang / gyo dum dang bcas pa dang / ch+we rgo can dang / dgon dung dang / tha chad dang / sdig pa can gyis de dag yid la mi bya bar sa'i phyogs gang dag mnyam pa dang / mi mnyam pa med pa dang / lag mthil lta bu dang / gtsang ba dang / nags tshal dang / blta ba dang / nyams dga' ba de lta bu'i sa'i phyogs de dag yid la bya'o/ /de 'di snyam du sems te/ 'du shes kyi rnam pa 'di lta ste/ mir 'du shes pa dang / dgon par 'du shes pas stong 478b yang 'di la 'di lta ste/ sar 'du shes pa kho na'am/ de las kha cig la brten nas mi stong ba'ang yod do snyam mo/ /de la mir 'du shes pa dang / dgon par 'du shes pa la brten pa nyon mongs pa'i gnas gang dag yin pa de dag med kyang de la 'di lta ste/ sar 'du shes pa kho na'am/ de las kha cig la brten pa tsam gyi nyon mongs pa'i gnas ni/ yod do/ /kun dga' bo| de lta bas na/ gang la gang med pa de des stong ngo / /zhes bya bar yang dag par rjes su mthong yang / de la lhag ma gang yod pa de de la yod do/ /zhes bya bar yang dag pa ji lta ba bzhin du rab tu shes te/ kun dga' bo/ stong pa nyid la 'jug pa 'di ni/ yang dag pa ji lta ba bzhin te/ phyin ci ma log pa yin no/ /kun dga' bo/ gzhan yang dge slong zhig kye ma bdag stong pa nyid kyis lan mang du gnas par bya'o/ /zhes 'dod par gyur na/ kun dga' bo/ dge slong des dgon par 'du shes pa dang / sar 'du shes pa yid la mi bya bar nam mkha' mtha' yas skye mched du 'du shes pa'am/ de las kha cig yid la bya'o/ /de 'di snyam du sems te/ 'du shes kyi rnam pa 'di lta ste/ dgon par 'du shes pa'am/ sar 'du shes pas stong yang 'di la 'di lta ste/ nam mkha' mtha' yas skye mched du 'du shes pa kho na'am/ de las kha cig la brten nas mi stong pa'ang yod do snyam mo/ /de la dgon par 479a @#/ /'du shes pa dang / sar 'du shes pa la brten pa nyon mongs pa'i gnas gang dag yin pa de dag med kyang de la 'di lta ste/ nam mkha' mtha' yas skye mched du 'du shes pa kho na'am/ de las kha cig la brten pa tsam gyi nyon mongs pa'i gnas ni/ yod do/ /kun dga' bo/ de lta bas na/ gang la gang med pa des stong ngo / /zhes bya bar yang dag par rjes su mthong yang / de la lhag ma gang yod pa de de la yod do/ /zhes bya bar yang dag pa ji lta ba bzhin rab tu shes te/ kun dga' bo/ stong pa nyid la 'jug pa 'di ni/ yang dag pa ji lta ba bzhin te/ phyin ci ma log pa yin no/ /kun dga' bo/ gzhan yang dge slong zhig kye ma bdag stong pa nyid kyis lan mang du gnas par bya'o// zhes 'dod par gyur na/ kun dga' bo/ dge slong des sar 'du shes pa dang / nam mkha' mtha' yas skye mched du 'du shes pa yid la mi bya bar rnam shes mtha' yas skye mched du 'du shes pa'am/ de las kha cig yid la bya'o/ /de 'di snyam du sems te/ 'du shes kyi rnam pa 'di lta ste/ sar 'du shes pa dang / nam mkha' mtha' yas skye mched du 'du shes pas stong yang 'di la 'di lta ste/ rnam shes mtha' yas skye mched du 'du shes pa kho na'am/ de las kha cig la brten nas mi stong pa'ang yod do snyam mo// 479b de la sar 'du shes pa dang / nam mkha' mtha' yas skye mched du 'du shes pa la brten pa nyon mongs pa'i gnas gang dag yin pa de dag med kyang de la 'di lta ste/ rnam shes mtha' yas skye mched du 'du shes pa kho na'am/ de las kha cig la brten pa tsam gyi nyon mongs pa'i gnas ni/ yod do/ /kun dga' bo/ de lta bas na/ gang la gang med pa des stong ngo / /zhes bya bar yang dag par rjes su mthong yang / de la lhag ma gang yod pa de de la yod do/ /zhes bya bar yang dag pa ji lta ba bzhin du rab tu shes te/ kun dga' bo/ stong pa nyid la 'jug pa 'di ni| yang dag pa ji lta ba bzhin te/ phyin ci ma log pa yin no/ /kun dga' bo/ gzhan yang dge slong zhes kye ma bdag stong pa nyid kyis lan mang du gnas par bya'o/ /zhes 'dod par gyur na| kun dga' bo/ dge slong des nam mkha' mtha' yas skye mched du 'du shes pa dang / rnam shes mtha' yas skye mched du 'du shes pa yid la mi bya bar ci'ang med pa'i skye mched du 'du shes pa'am/ de las kha cig yid la bya'o/ /de 'di ji snyam du sems te/ 'du shes kyi rnam pa 'di lta ste/ nam mkha' mtha' yas skye mched du 'du shes pa dang / rnam shes mtha' yas skye mched du 'du shes pas stong yang de la 'di lta ste/ ci'ang med pa'i skye mched du 'du shes pa kho na'am/ de las kha cig la brten nas mi stong pa'ang yod do snyam mo/ /de 480a @#/ /la nam mkha' mtha' yas skye mched du 'du shes pa dang / rnam shes mtha' yas skye mched du 'du shes pa la brten pa nyon mongs pa'i gnas gang dag yin pa de dag med kyang de la 'di lta ste/ ci'ang med pa'i skye mched du 'du shes pa kho na'am/ de las kha cig la brten pa tsam gyi nyon mongs pa'i gnas ni/ yod do/ /kun dga' bo/ de lta bas na/ gang la gang med pa des stong ngo / /zhes bya bar yang dag par rjes su mthong yang / de la lhag ma gang yod pa de de la yod do/ /zhes bya bar yang dag pa ji lta ba bzhin du rab tu shes te/ kun dga' bo/ stong pa nyid la 'jug pa 'di ni/ yang dag pa ji lta ba bzhin te/ phyin ci ma log pa yin no/ /kun dga' bo/ gzhan yang dge slong zhig kye ma bdag stong pa nyid kyis lan mang du gnas par bya'o/ /zhes 'dod par gyur na/ kun dga' bo/ dge slong des rnam shes mtha' yas skye mched du 'du shes pa dang / ci'ang med pa'i skye mched du 'du shes pa yid la mi bya bar mtshan ma med pa'i dbyings sam/ de las kha cig yid la bya'o/ /de 'di snyam du sems te/ 'du shes kyi rnam pa 'di lta ste/ rnam shes mtha' yas skye mched du 'du shes pa dang / ci'ang med pa'i skye mched du 'du shes pas stong yang 'di lta ste/ mtshan ma med pa'i dbyings kho 480b na'am| de las kha cig la brten nas mi stong ba'ang yod do snyam mo/ /de la rnam shes mtha' yas skye mche du 'du shes pa dang / ci'ang med pa'i skye mched du 'du shes pa la brten pa nyon mongs pa'i gnas gang dag yin pa de dag med kyang de la 'di lta ste/ mtshan ma med pa'i dbyings kho na'am/ de las kha cig la brten pa tsam gyi nyon mongs pa'i gnas ni/ yod do| |kun dga' bo/ de lta bas na/ gang la gang med pa des stong ngo / /zhes bya bar yang dag par rjes su mthong yang / de la lhag ma gang yod pa de de la yod do/ /zhes bya bar yang dag pa ji lta ba bzhin du rab tu 'du shes te/ kun dga' bo/ stong pa nyid la 'jug pa 'di ni/ yang dag pa ji lta ba bzhin te/ phyin ci ma log pa yin no/ /de 'di snyam du sems te/ mtshan ma med pa'i dbyings kyang mngon par 'dus byas shing sems pas mngon par bsam pa yin te/ gang mngon par 'dus byas shing sems pas mngon par bsam pa de la ni| mngon par dga' bar bya ba'am/ mngon par brjod par bya ba'am/ lhag par chags par bya ba'am/ lhag par chags shing gnas par bya bar mi rigs so snyam mo/ /des de ltar shes shing de ltar mthong bas 'dod pa'i zag pa las sems rnam par grol zhing srid pa'i zag pa dang / ma rig pa'i zag pa las kyang sems rnam par grol lo/ /rnam par 481a @#/ /grol bas bdag ni/ skye ba zad do/ /tshangs par spyad pa bstan to/ /bya ba byas so/ /srid pa 'di las gzhan mi shes so/ /zhes rnam par grol ba ye shes mthong ba kho nar 'gyur ro/ /de 'di snyam du sems te/ 'du shes kyi rnam pa 'di 'di lta ste/ 'dod pa'i zag pa dang / srid pa'i zag pa dang / ma rig pa'i zag pas stong yang 'di la 'di lta ste/ srog rkyen du byas pa'i skye mched drug gi lus 'di kho na la brten nas mi stong pa yang yod do snyam mo/ /de la 'dod pa'i zag pa dang / srid pa'i zag pa dang / ma rigs pa'i zag pa la brten pa nyon mongs pa'i gnas gang dag yin pa de dag med kyang de la 'di lta ste/ srog rkyen du byas pa'i skye mched drug gi lus de kho na la brten pa tsam gyi nyon mongs pa'i gnas ni/ yod do/ /kun dga' bo/ de lta bas na/ gang la gang med pa de des stong ngo / /zhes bya bar yang dag par rjes su mthong yang / de la lhag ma gang yod pa de de la yod do/ /zhes bya bar yang dag pa ji lta ba bzhin du rab tu shes te/ kun dga' bo/ 'di lta ste/ zag pa rnams zad pas zag pa med cing mngon par 'dus ma byas pa rnam par grol ba gang yin pa 'di ni/ stong pa nyid la 'jug pa bla na med pa yin no/ /kun dga' bo/ de bzhin gshegs pa dgra bcom pa yang dag par rdzogs pa'i 481b sangs rgyas gang dag 'das pa'i dus na byung bar gyur pa'i sangs rgyas bcom ldan 'das de dag gis kyang 'di lta ste/ zag pa rnams zad pas zag pa med cing mngon par 'dus ma byas pa rnam par grol ba'i stong pa nyid la 'jug pa bla na med pa 'di nyid skus mngon sum du mdzad nas bsgrubs te bzhugs par gyur to/ /kun dga' bo/ de bzhin gshegs pa dgra bcom pa yang dag par rdzogs pa'i sangs rgyas gang dag ma 'ongs pa'i dus na 'byung bar 'gyur ba'i sangs rgyas bcom ldan 'das de dag kyang 'di lta ste/ zag pa rnams zad pas zag pa med cing mngon par 'dus ma byas pa rnam par grol ba'i stong pa nyid la 'jug pa bla na med pa 'di nyid skus mngon sum du mdzad nas bsgrubs te bzhugs par 'gyur ro/ /kun dga' bo/ de ltar de bzhin gshegs pa dgra bcom pa yang dag par rdzogs pa'i sangs rgyas da da ltar byung ba'i dus na 'di lta ste/ zag pa rnam zad pas zag pa med cing 'dus ma byas pa/ rnam par grol ba'i stong pa nyid la 'jug pa bla na med pa 'di nyid skus mngon sum du mdzad nas bsgrubs te bzhugs so/ /kun dga' bo/ de lta bas na/ 'di lta ste/ zag pa rnams zad pas zag pa med cing mngon par 'dus ma byas pa/ rnam par grol ba'i stong pa nyid la 'jug pa bla na med pa gang yin pa 'di nyid lus kyis mngon 482a @#/ /sum du byas nas bsgrubs te gnas par bya'o/ /zhes de ltar bslab par bya ste/ kun dga' bo/ khyod kyis kyang de bzhin du bslab par bya'o/ /de nas tshe dang ldan pa kun dga' bos bcom ldan 'das kyis bka' stsal pa la mngon par bstod cing rjes su yi rang bar byas nas bcom ldan 'das kyi zhabs la mgo bos phyag btsal te bcom ldan 'das kyi spyan snga nas phyir song ngo / /mdo chen po stong pa nyid ces bya ba rdzogs so// //rgya gar gyi mkhan po dzi na mi tra dang / pra dz+nyA warma dang / zhu chen gyi lo tsA ba ban+d+he ye shes sde la sogs pas bsgyur cing zhus te gtan la phab pa/ |