rgya gar skad du/ ku mA ra dr-iSh+DAn+ta sU tra/ bod skad du/ gzhon nu dpe'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das ko sa la'i ljongs rgyu zhing gshegs pa dang mnyan yod du byon nas mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /ko sa la'i rgyal po gsal rgyal gyis dge sbyong gau ta ma ko sa la'i ljongs rgyu zhing \?\ gshegs pa dang mnyan yod du byon nas mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ shes ldan gau ta ma de bla na med pa yang dag par rdzogs pa'i byang chub mngon par sangs rgyas par bdag nyid zhal gyis 'che'o/ /zhes thos so/ /thos nas kyang bcom ldan 'das gang na ba der song ste phyin nas bcom ldan 'das dang lhan cig mngon du yang dag par dga' ba dang / yang dag par mgu bar 'gyur ba'i gtam rnam pa sna tshogs byas te phyogs gcig tu 'dug go /phyogs gcig tu 'dug nas kau sa la'i rgyal po gsal rgyal gyis bcom ldan 'das la 'di skad ces gsol to/ /kye gau ta ma/ bdag gis shes ldan gau ta ma bla na med pa yang dag par rdzogs pa'i byang 550a @#/ /chub mngon par sangs rgyas par bdag nyid zhal gyis 'che'o/ /zhes thos lags na/ gau ta ma gang dag de skad ces lung bstan pa de dag ji ga dge sbyong gau ta ma la skur ba 'debs pa ma lags sam/ thal bar smra ba ma lags sam/ shes ldan gau ta mas gsungs pa bzhin smra ba lags sam/ chos smra ba lags sam| chos dang mthun pa'i chos lung ston pa lags sam/ ji ga de dag gi drung du pha rol po chos dang mthun par rtsod pa'i rjes su rtsod pa mchis na/ smod pa'i chos kyi gnas su mi 'gyur lags sam/ rgyal po chen po/ gang dag de skad du smra ba de dag ni/ de skad du lung stong pa bden te/ nga la skur ba 'di 'debs pa ma yin/ thal par smra ba ma yin/ de ni/ gsungs pa bzhin smra ba yin/ chos dang mthun pa'i chos lung ston pa yin te/ de dag gi drung du pha rol po chos dang mthun pa'i rtsod pa'i rjes su rtsod pa 'ongs nas smod pa'i chos kyi gnas su mi 'gyur ro/ /rgyal po chen po/ de ci'i phyir zhe na/ ngas bla na med pa yang dag par rdzogs pa'i byang chub mngon par sangs rgyas so| |shes ldan gau ta ma/ de skad mod kyi/ shes ldan gau ta ma/ bdag yid mi ches lags so/ /de ci'i slad du zhe na/ kye gau ta ma/ re zhig rgan zhing rgan pa'i dge sbyong 550b dang / bram ze ni/ 'di dag lags te/ 'di lta ste/ 'od srung rdzogs byed dang / kun tu rgyu gnag lhas kyi bu dang / smra 'dod kyi bu mo'i bu yang dag rgyal ba can dang / mi pham skra'i la ba can dang / ka t+ya'i bu nog can dang / gcer bu pa gnyen gyi bu gang lags pa de dag kyang da dung bla na med pa yang dag par rdzogs pa'i byang chub mngon par rdzogs par sangs rgyas par bdag nyid g.yar gyis mi 'che lags na/ shes ldan gau ta ma 'khrungs nas ring po ma lags pa gsar du rab tu byung bas lta smos kyang ci 'tshal/ rgyal po chen po/ gzhon nu bzhi po 'di dag la khyad du gsad par mi bya/ zil gyis mnan par mi bya ste/ bzhi gang zhe na/ rgyal po chen po/ rgyal rigs gzhon nu khyad du gsad par mi bya| gzhon nu la zil gyis mnan par mi bya'o/ /rgyal po chen po/ sbrul gzhon nu la khyad du gsad par mi bya/ gzhon nu la zil gyis mnan par mi bya'o/ /rgyal po chen po/ me chung ngu la khyad du gsad par mi bya/ zil gyis mnan par mi bya'o/ /rgyal po chen po/ dge slong gzhon nu la khyad du gsad par mi bya/ gzhon nu la zil gyis mnan par mi bya'o/ /de ci'i phyir zhe na/ dge slong gzhon nur gyur kyang de rdzu 'phrul che zhing mthu che ba'i dgra bcom par 'gyur ro/ /bcom ldan 'das kyis de skad ces/ /bka' stsal nas ni bde gshegs 551a @#/ /kyis| |de skad ces ni bka' stsal nas/ /ston pas gzhan yang 'di skad gsungs/ /rgyal rigs dpe med ldan pa dang / /rigs btsun grags par ldan pa la| |blo dang ldan pas de gzhon zhes/ /khyad du mi gsad zil mi mnan/ /rgyal po rgyal rigs mkhas pa yis/ /rgyal srid dag ni thob gyur nas/ /chad pas gsod pa'i gnas de yod| |de bas de la shin tu gdung / /de ltar rang gi srog srung zhing / /rang gi don la lta bas ni/ /de ni khyad du mi gsad cing / /de la legs par bag kyang bya/ /gal te grong ngam dgon pa'ang rung / /gang du sbrul ni mthong gyur na/ /blo dang ldan pas de gzhon zhes/ /khyad du mi gsad zil mi mnan/ /'di ltar sbrul ni rgyu ba na/ /rigs ni rnam pa sna tshogs la/ /glags rnyed nas ni gzhon nus kyang / /skyes pa bud med du ma zin/ /de ltas rang gi srog srung zhing / /rang gi don la lta bas ni/ /de ni khyad du mi gsad cing / /de la legs par bag kyang bya| |'bar ba mang ba za byed pa/ /byin za lam sngon ldan pa de/ /chung yang khyad du mi gsad cing / /mkhas pas zil gyis mnan mi bya/ /nye bar len pas byin za ni/ /chung ngur gyur las chen por 'gyur/ /me lce 'bar bas myur bar ni/ /grong dang grong khyer sreg par byed/ /de phyir bdag srog srung byed pas/ /de ni khyad du mi gsad cing / /bdag nyid don la 551b legs lta bas/ /de la legs par bag kyang bya/ /byin za lam sngon ldan gyur pa'i/ /me yis tshang tshing gang bsregs pa/ /de la nyin mtshan 'das gyur pas/ /la lar lo ma skye bar 'gyur// gang gis tshul khrims ldan pa yi/ /dge slong rnyed nas sreg byed pa/ /de la bu dang tsha bo dang / /mgo skal yod par mi 'gyur te/ /ta la'i mgo bzhin mi ring bar/ /rigs rgyud dang yang bral bar 'gyur/ /de phyir bdag srog srung byed pas/ /de na khyad du gsad mi bya/ /bdag nyid don la legs lta bas/ /de la legs par bag kyang bya/ /rgyal rigs dpe byad ldan pa dang / / brang 'gro me dang de bzhin du/ /dge slong tshul khrims ldan pa de/ /mkhas pas zil gyis mnan mi bya/ /de phyir bdag srog srung byed pas/ /de ni khyad du gsad mi bya/ /bdag nyid don la legs lnga pas/ /de ni legs par spang bar bya/ /de nas ko sa la'i rgyal po gsal rgyal gyis bcom ldan 'das kyis bka' stsal pa la mngon par bstod cing rjes su yi rang ba byas nas bcom ldan 'das kyi zhabs la mgo bos phyag btsal te bcom ldan 'das kyi spyan snga nas phyir song ngo / /gzhon nu dpe'i mdo rdzogs so// |