rKTs


H300

(e-text produced by ACIP)

see text in Tibetan script
551b
//rgya gar skad du/ d+hA tu ba hu ta ka sU tra/ bod skad du/ khams mang po pa'i mdo/ 'jam dpal gzhon nur gyur pa la phyag 'tshal lo/ /'di skad bdag gis thos pa dus gcig na/ bcom ldan 'das
552a
@#/ /mnyan du yod pa na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas tshe dang ldan pa kun dga' bo gcig pu/ dben par song ste nang du yang dag bzhag nas sems la sems kyi rnam par rtog pa 'di lta bu dag skyes te/ 'jigs pa gang dag 'byung zhing skye ba de dag thams cad ni/ byis pa las skye'i/ mkhas pa las ni/ ma yin no/ /yams kyi nad gang dag dang / gnod pa dang / nad 'go ba dang / 'khrug pa gang dag 'byung zhing skye ba de dag thams cad ni| byis pa las skye'i/ mkhas pa las ni/ ma yin no/ /de nas tshe dang ldan pa kun dga' bo/ phyem red nang du yang dag 'jog las langs nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te phyogs gcig tu 'dug go /phyogs gcig tu 'dug nas tshe dang ldan pa kun dga' bos bcom ldan 'das la 'di skad ces gsol to/ /btsun pa/ 'dir bdag gcig pu dben par mchis te nang du yang dag bzhag na sems la sems kyi rnam par rtog pa 'di lta bu dag skyes te| 'jigs pa gang dag 'byung zhing skye ba de dag thams cad ni/ byis ba las skye'i/ mkhas pa las ni/ ma lags so/ /yams kyi nad gang dag dang / gnod pa dang /
552b
nad 'go ba dang / 'khrug pa gang dag 'byung zhing skye ba de dag thams cad ni/ byis pa las skye'i/ mkhas pa las ni/ ma lags so snyam mo/ /kun dga' bo/ de de bzhin no/ /de de bzhin te/ 'jigs pa gang dag 'byung zhing skye ba de dag thams cad ni/ byis pa las skye'i/ mkhas pa las ni/ ma yin no/ /yams kyi nad gang dag dang / gnod pa dang / nad 'go ba dang / 'khrug pa gang dag 'byung zhing skye ba de dag thams cad ni/ byis pa las skye'i/ mkhas pa las ni/ ma yin no/ /kun dga' bo/ dper na/ 'dam bu skam po'i khang pa'am/ rtswa skam po'i khang pa'am/ sog ma skam po'i phung po dag la me btang na de rnams kyang tshig par byed do/ /de bzhin du 'jigs pa gang dag 'byung zhing skye ba de dag thams cad ni/ byis pa las skye'i/ mkhas pa las ni/ ma yin no/ /yams kyi nad gang dag dang / gnod pa dang / nad 'go ba dang / 'khrug pa gang dag 'byung zhing skye ba de dag thams cad ni/ byis pa las skye'i/ mkhas pa las ni/ ma yin no/ /kun dga' bo/ 'das pa'i dus su 'jigs pa gang dag byung zhing skyes pa de dag thams cad ni/ byis pa las skye'i/ mkhas pa las ni/ ma yin no/ /yams kyi nad gang dag dang / gnod pa dang / nad 'go ba dang / 'khrug pa gang dag byung zhing skyes pa de dag thams cad ni/ byis pa las skye'i/ mkhas pa las ni/ ma yin no/ /kun dga'
553a
@#/ /po| ma 'ongs pa'i dus su 'jigs pa gang dag 'byung zhing skye bar 'gyur ba de dag thams cad ni/ byis pa las skye bar 'gyur gyi/ mkhas pa las ni/ ma yin no| |yams kyi nad gang dag dang / gnod pa dang / nad 'go ba dang / 'khrug pa gang dag 'byung zhing skye bar 'gyur ba de dag thams cad ni/ byis pa las skye bar 'gyur gyi/ mkhas pa las ni/ ma yin no/ /kun dga' bo/ de ltar na 'das pa dang / ma 'ongs pa dang / da ltar byung ba'i dus dag tu 'jigs pa dang bcas pa ni/ byis pa'o/ /'jigs pa med pa ni/ mkhas pa'o/ /yams kyi nad dang bcas pa ni/ byis pa'o/ /yams kyi nad med pa ni/ mkhas pa'o/ /gnod pa dang bcas pa ni/ byis pa'o/ /gnod pa med pa ni/ mkhas pa'o| |nad 'go ba dang bcas pa ni/ byis pa'o/ /nad 'go ba med pa ni/ mkhas pa'o/ /'khrug pa dang bcas pa ni/ byis pa'o/ /'khrug pa med pa ni/ mkhas pa'o/ /kun dga' bo/ 'jigs pa dang / yams kyi nad dang / gnod pa dang / nad 'go ba dang / 'khrug pa dag ni/ byis pa las yin gyi/ mkhas pa las ni/ ma yin par shes par bya'o/ /kun dga' bo/ /de lta bas na/ byis pa'i chos dang / mkhas pa'i chos khong du chud par bya'o/ /byis pa'i chos dang / mkhas pa'i chos dag khong du chud nas kyang byis pa'i chos ni/
553b
spang bar bya'i mkhas pa'i chos ni/ yang dag par blang bar bya ste/ kun dga' bo/ de ltar de bzhin du bslab par bya'o/ /btsun pa/ ji tsam gyis na byis pa byis pa zhes bgyi ba'i grangs su mchi ba lags/ kun dga' bo/ byis pa ni/ khams la mkhas pa ma yin pa dang / skye mched la mkhas pa ma yin pa dang / rten cing 'brel par 'byung ba la mkhas pa ma yin pa dang / gnas dang gnas ma yin pa la mkhas pa ma yin pa ste/ kun dga' bo/ /de tsam gyis na byis pa byis pa zhes bya ba'i grangs su 'gro ba yin no/ /btsun pa/ ji tsam gyis na mkhas pa mkhas pa zhes bgyi ba'i grangs su mchi ba lags/ kun dga' bo/ mkhas pa ni/ khams la mkhas pa dang / skye mched la mkhas pa dang / rten cing 'brel par 'byung ba la mkhas pa dang / gnas dang gnas ma yin pa la mkhas pa yin te/ kun dga' bo/ de tsam gyis na mkhas pa mkhas pa zhes bya ba'i grangs su 'gro ba yin no/ / btsun pa/ ji tsam gyis na mkhas pa khams la mkhas pa lags/ kun dga' bo/ mkhas pa ni/ khams bco brgyad po mig gi khams dang / gzugs kyi khams dang / mig gi rnam par shes pa'i khams dang / rna ba'i khams dang / sgra'i khams dang / rna ba'i rnam par shes pa'i khams dang / sna'i khams dang / dri'i khams dang / sna'i
554a
@#/ /rnam par shes pa'i khams dang / lce'i khams dang / ro'i khams dang / lce'i rnam par shes pa'i khams dang / lus kyi khams dang / reg bya'i khams dang / lus kyi rnam par shes pa'i khams dang / yid kyi khams dang / chos kyi khams dang / yid kyi rnam par shes pa'i khams dag yang dag pa ji lta ba bzhin shes shing mthong ba ste/ kun dga' bo/ de ltar na khams bco brgyad po yang dag pa ji lta ba bzhin shes shing mthong ba yin no/ /gzhan yang khams drug po sa'i khams dang| chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams dag yang dag pa ji lta ba bzhin shes shing mthong ba ste| de ltar na khams drug po yang dag pa ji lta ba bzhin shes shing mthong ba yin no/ /gzhan yang khams drug po 'dod pa'i khams dang / gnod sems kyi khams dang / rnam par 'tshe ba'i khams dang / nges par 'byung ba'i khams dang / gnod sems med pa'i khams dang / rnam par 'tshe ba med pa'i khams dag yang dag pa ji lta ba bzhin shes shing mthong ba ste/ de ltar na khams drug po yang dag pa ji lta ba bzhin shes shing mthong ba yin no/ /gzhan yang khams drug po bde ba'i khams dang / sdug bsngal gyi
554b
khams dang / yid bde ba'i khams dang / yid mi bde ba'i khams dang / btang snyoms kyi khams dang / ma rig pa'i khams dag yang dag pa ji lta ba bzhin shes shing mthong ba ste/ / de ltar na khams drug po yang dag pa ji lta ba bzhin shes shing mthong ba yin no/ /gzhan yang khams bzhi po tshor ba'i khams dang / 'du shes kyi khams dang / 'du byed kyi khams dang / rnam par shes pa'i khams dag yang dag pa ji lta ba bzhin shes shing mthong ba yin no/ /gzhan yang khams gsum po 'dod pa'i khams dang / gzugs kyi khams dang / gzugs med pa'i khams dag yang dag pa ji lta ba bzhin shes shing mthong ba yin no/ /gzhan yang khams gsum po gzugs kyi khams dang / gzugs med pa'i khams dang / 'gog pa'i khams dag yang dag pa ji lta ba bzhin shes shing mthong ba yin no/ /gzhan yang khams gsum po 'das pa'i khams dang / ma 'ongs pa'i khams dang / da ltar byung ba'i khams dag yang dag pa ji lta ba bzhin shes shing mthong ba yin no/ /gzhan yang khams gsum po dman pa'i khams dang / bar ma'i khams dang / gya nom pa'i khams dag yang dag pa ji lta ba bzhin shes shing mthong ba yin no/ /gzhan yang khams gsum po dge ba'i khams dang / mi dge ba'i khams dang / lung du ma bstan pa'i khams dag yang dag pa ji lta
555a
@#/ /ba bzhin shes shing mthong ba yin no/ /gzhan yang khams gsum po slob pa'i khams dang / mi slob pa'i khams dang / slob pa'ang ma yin mi slob pa'ang ma yin pa'i khams dag yang dag pa ji lta ba bzhin shes shing mthong ba yin no/ /gzhan yang khams gnyis po zag pa dang bcas pa'i khams dang / zag pa med pa'i khams dag yang dag pa ji lta ba bzhin shes shing mthong ba yin no/ /gzhan yang khams gnyis po 'dus byas kyi khams dang / 'dus ma byas kyi khams dag yang dag pa ji lta ba bzhin shes shing mthong ba yin te/ kun dga' bo/ de tsam gyis na mkhas pa khams la mkhas pa yin no/ /btsun pa/ ji tsam gyis na mkhas pa skye mched la mkhas pa lags/ kun dga' bo/ mkhas pa ni/ skye mched bcu gnyis po mig gi skye mched dang / gzugs kyi skye mched dang / rna ba'i skye mched dang / sgra'i skye mched dang / sna'i skye mched dang / dri'i skye mched dang / lce'i skye mched dang / ro'i skye mched dang / lus kyi skye mched dang / reg bya'i skye mched dang / yid kyi skye mched dang / chos kyi skye mched dag yang dag pa ji lta ba bzhin shes shing mthong ba ste/ kun dga' bo/ de tsam gyis na/ mkhas pa skye mched la mkhas pa yin no/ /btsun pa/ ji tsam gyis na
555b
mkhas pa rten cing 'brel bar 'byung ba la mkhas pa lags/ kun dga' bo/ mkhas pa ni/ rten cing 'brel bar 'byung ba 'di nyid lugs bzhin 'byung ba dang / lugs las ldog pa 'di lta ste/ 'di yod pas 'di 'byung / 'di skyes pas 'di skye ste/ 'di ltar ma rig pa'i rkyen gyis 'du byed/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa dag 'byung zhing sdug bsngal gyi phung po chen po 'ba' zhig 'byung bar 'gyur ro/ /'di lta ste/ 'di med pas 'di mi 'byung / 'di 'gags pas 'di 'gag ste/ 'di ltar ma rig pa 'gags pas 'du byed 'gag /'du byed 'gags pas rnam par shes pa 'gag /rnam par shes pa 'gags pas ming dang gzugs 'gag / ming dang gzugs 'gags pas skye mched drug 'gag /skye mched drug 'gags pas reg pa 'gag /reg pa 'gags pas tshor ba 'gag /tshor ba 'gags pas sred pa
556a
@#/ /'gag /sred pa 'gags pas len pa 'gag /len pa 'gags pas srid pa 'gag /srid pa 'gags pas skye ba 'gag /skye ba 'gags pas rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa dag 'gag cing sdug bsngal gyi phung po chen po 'di 'ba' zhig 'gag par 'gyur ba dag yang dag pa ji lta ba bzhin shes shing mthong ba yin te/ kun dga' bo/ de tsam gyis na mkhas pa rten cing 'brel bar 'byung ba la mkhas pa yin no/ /btsun pa/ ji tsam gyis na mkhas pa gnas dang gnas ma yin pa la mkhas pa lags/ kun dga' bo/ mkhas pa ni/ gnas la gnas dang / gnas ma yin pa la gnas ma yin pa dag yang dag pa ji lta ba bzhin shes shing mthong ba yin no/ /kun dga' bo/ 'di ni/ gnas ma yin zhing go skabs med pa ste/ gang lus kyis nyes par spyad pa dang / ngag dang yid kyis nyes par spyad pa'i rnam par smin pa 'dod pa dang / sdug pa dang / dga' ba dang / yid du 'ong ba dag mngon par 'grub par 'gyur ba 'di ni/ gnas ma yin no| |'di ni/ gnas yin te/ gang lus kyis nyes par spyad pa dang / ngag dang yid kyis nyes par spyad pa'i rnam par smin pa 'dod pa ma yin pa dang / sdug pa ma yin pa
556b
dang / dga' ba ma yin pa dang / yid du 'ong ba ma yin pa dag mngon par 'grub par 'gyur ba 'di ni/ gnas yin no/ /kun dga' bo/ 'di ni/ gnas ma yin zhing go skabs med pa ste| gang lus kyis legs par spyad pa dang / ngag dang yid kyis legs par spyad pa'i rnam par smin pa 'dod pa ma yin pa dang / sdug pa ma yin pa dang / dga' ba ma yin pa dang / yid du 'ong ba ma yin pa dag mngon par 'grub par 'gyur ba 'di ni/ gnas ma yin no/ /'di ni/ gnas yin te/ gang lus kyis legs par spyad pa dang / ngag dang yid kyis legs par spyad pa'i rnam par smin pa 'dod pa dang / sdug pa dang / dga' ba dang / yid du 'ong ba dag mngon par 'grub par 'gyur ba 'di ni/ gnas yin no/ /gnas ma yin zhing go skabs med pa ni/ gang lus kyis nyes par spyad pa spyad/ ngag dang yid kyis nyes par spyad pa spyad nas rgyu de dag dang rkyen des lus zhig nas bde 'gro mtho ris kyi 'jig rten lha rnams kyi nang du skye bar 'gyur ba 'di ni/ gnas ma yin no/ /'di ni/ gnas yin te/ gang lus kyis nyes par spyad pa spyad/ ngag dang yid kyis nyes par spyad pa spyad nas rgyu de dang rkyen des lus zhig nas shi phan chad ngan song ngan 'gro log par ltung ba sems can dmyal ba dag gi nang du skye bar 'gyur ba 'di ni/ gnas yin no/ /gnas ma yin zhing go skabs med pa ni/ gang lus kyis legs
557a
@#/ /par spyad pa spyad/ ngag dang yid kyis legs par spyad pa spyad nas rgyu de dang rkyen des lus zhig nas shi phan chad ngan song ngan 'gro log par ltung ba sems can dmyal ba dag gi nang du skye bar 'gyur ba 'di ni/ gnas ma yin no/ /'di ni/ gnas yin te/ gang lus kyis legs par spyad pa spyad/ ngag dang yid kyis legs par spyad pa spyad nas rgyu de dang rkyen des lus zhig nas bde 'gro mtho ris kyi 'jig rten lha rnams kyi nang du skye bar 'gyur ba 'di ni/ gnas yin no/ /gnas ma yin zhing go skabs med pa ni/ yang dag par rdzogs pa'i sangs rgyas gnyis 'jig rten du gang snga phyi med par 'byung ba 'di ni/ gnas ma yin te/ gang gcig 'byung ba 'di ni/ gnas yin no/ /gnas ma yin zhing go skabs med pa ni| 'khor los bsgyur ba gnyis 'jig rten du gang snga phyi med par 'byung ba 'di ni/ gnas ma yin te/ gang gcig 'byung ba 'di ni/ gnas yin no/ /gnas ma yin zhing go skabs med pa ni/ gang bud med 'khor los bsgyur ba'i rgyal srid dang / brgya byin nyid dang / tshangs pa nyid dang / bdud nyid byed bar 'gyur ba dang / rang byang chub mngon du byed par 'gyur ba dang / bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba 'di ni/ gnas ma yin no/ /'di ni/ gnas yin te/ skyes pa gang yin pa'o/ /gnas ma yin zhing go skabs
557b
med pa ni/ gang lta ba phun sum tshogs pa'i gang zag bsam bzhin du pha dang / ma dang / dgra bcom pa gsod par 'gyur ba dang / dge 'dun gyi dbyen byed par 'gyur ba dang / de bzhin gshegs pa la ngan sems kyis khrag 'byin par 'gyur ba ni/ gnas ma yin no/ /'di ni/ gnas yin te/ so so'i skye bo gang yin pa'o/ /gnas ma yin zhing go skabs med pa ni/ gang lta ba phun sum tshogs pa'i gang zag bsam bzhin du srog chags kyi srog gcod par 'gyur ba dang / bslab pa btang nas nyams pa la 'jug par 'gyur ba dang / 'di las phyi rol pa gzhan dag la yon gnas su tshol bar 'gyur ba dang / 'di las phyi rol pa gzhan dag la ston par lta bar 'gyur ba dang / dge mtshan dang / bkra shis dag gis dag par yid ches par 'gyur ba dang / dge sbyong dang bram ze shes pa dang ldan pa de dag shes par bya ba shes shing blta bar bya ba mthong ngo snyam nas dge sbyong dang bram ze gzhan dag gi ngor rtog cing ngor lta bar 'gyur ba dang / srid pa brgyad pa mngon par 'grub par 'gyur ba 'di ni/ gnas ma yin no/ /'di ni/ gnas yin te/ so so'i skye bo gang yin pa'o/ /gnas ma yin zhing go skabs med pa ni/ sems kun nas nyon mongs par byed pa dang / shes rab nyam chung bar byed pa dang / rgud pa'i phyogs su gyur pa dang / mya ngan las 'da' bar mi 'gyur ba sgrib pa lnga po ma spangs pa ni/ dran pa nye bar gzhag pa bzhi dang sems shin tu
558a
@#/ /nye bar bzhag nas gnas par 'gyur ba 'di ni/ gnas ma yin no/ /'di ni/ gnas yin te/ sems kun nas nyon mongs par byed pa dang / shes rab nyam chung bar byed pa dang / rgud pa'i phyogs su gyur ba dang / mya ngan las 'da' bar mi 'gyur ba gang sgrib pa lnga po spangs pas ni/ dran pa nye bar gzhag pa bzhi dag la sems shin tu nye bar bzhag nas gnas par 'gyur ba 'di ni/ gnas yin no/ /gnas ma yin zhing go skabs med pa ni/ sems kun nas nyon mongs par byed pa dang / shes rab nyam chung bar byed pa dang / rgud pa'i phyogs su gyur pa dang / mya ngan las 'da' bar mi 'gyur ba gang sgrib pa lnga po ma spangs pas ni/ dran pa nye bar gzhag pa bzhi dag la sems shin tu nye bar bzhag pa na byang chub kyi yan lag bdun sgom pa 'di ni/ gnas ma yin no/ /'di ni/ gnas yin te/ sems kun nas nyon mongs par byed pa dang / shes rab nyam chung bar byed pa dang / rgud pa'i phyogs su gyur pa dang / mya ngan las 'das par mi 'gyur ba gang sgrib pa lnga po spangs pas ni/ dran pa nye bar gzhag pa bzhi dag la sems shin tu nye bar bzhag nas gnas pa na byang chub kyi yan lag bdun sgom par 'gyur ba 'di ni/ gnas yin no/ /gnas ma yin zhing go skabs med pa ni/ sems kun nas nyon mongs par byed pa dang / shes rab nyam chung byed pa dang / rgud pa'i phyogs su gyur
558b
pa dang / mya ngan las 'da' bar mi 'gyur ba gang sgrib pa lnga po ma spangs pas ni/ dran pa nye bar gzhag pa bzhi dag la sems shin tu nye bar bzhag pas gnas pa na byang chub kyi yan lag bdun bsgoms te rang byang chub mngon du byed par 'gyur ba dang / bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba 'di ni/ gnas ma yin no/ /'di ni gnas yin te/ sems can kun nas nyon mongs par byed pa dang / shes rab nyam chung bar byed pa dang / rgud pa'i phyogs su gyur pa dang / mya ngan las 'da' par mi 'gyur ba gang sgrib pa lnga po spangs nas ni/ dran pa nye bar gzhag pa bzhi dag la sems shin tu nye bar bzhag nas gnas pa na byang chub kyi yan lag bdun bsgoms te rang byang chub mngon du byed par 'gyur ba dang / bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba 'di ni/ gnas te/ kun dga' bo/ de tsam gyis na mkhas pa gnas dang gnas ma yin pa la mkhas pa yin no/ /btsun pa/ chos kyi rnam grangs 'di'i ming ci lags/ 'di ji ltar gzung bar bgyi/ kun dga' bo/ de'i phyir chos kyi rnam grangs 'di ni/ le'u bzhi pa zhes bya bar yang zungs shig /chos kyi me long zhes bya bar yang zungs shig /bdud rtsi'i rnga po che zhes bya bar yang zungs shig /khams mang po pa zhes bya bar yang zungs shig /de bas na khams
559a
@#/ /mang po zhes bya ba ni/ chos kyi rnam grangs 'di'i tshig bla dwags yin no/ /khams mang po pa zhes bya ba'i mdo rdzogs so//