//rgya gar skad du/ gaN+DI sU tra| bod skad du/ gaN+DI'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab 'od ma'i tshal bya ka land ka gnas pa na dge slong stong du tshang ba'i dge slong gi dge 'dun chen po dang / byang chub sems dpa' tshogs chen po dang thabs cig tu bzhugs te/ thams cad kyang dgra bcom pa/ zag pa zad pa/ bya ba byas pa/ byed pa byas pa/ khur bor ba/ bdag gi don rjes su thob pa/ srid par sbyor ba yongs su zad pa/ yang dag pa'i shes pas sems shin tu rnam par grol ba rnams dang bcom ldan 'das thabs cig tu'o/ /de'i tshe rgyal po gsal rgyal zhes bya ba stan las langs nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te bcom ldan 'das la 'di skad ces gsol to/ /bcom ldan 'das/ ma 'ongs pa'i dus su rtsod pa'i dus kyi tshe sems can thams cad sdig pa'i sems dang / 'thab pa'i sems dang / 'dod chags dang / zhe sdang dang / gti mug dang kun tu ldan pa/ pha rol gyi yul 559b rnams la mchog tu zhen pa/ gcig la gcig za ba la brtson pa/ bcom ldan 'das kyis sngon gsungs pa'i dus 'jig par byed pa/ dam pa'i chos spong bar byed pa/ sangs rgyas dang / chos dang / 'dod chags dang bral ba rnams sun 'byin pa de rnams gzhig pa'i thabs gang gis byang chub la mchog tu gzhol bar 'gyur ba'i thabs bstan du gsol/ de skad ces gsol ba dang / bcom ldan 'das kyis bka' stsal pa/ rgyal po khyod sems can thams cad kyi don dang / phan pa dang / bde ba'i phyir dang / sangs rgyas dang / dge 'dun yang dag par bsrung ba'i phyir 'dri bar byed pa legs so legs so/ /de'i phyir legs par rab tu nyon la yid la zungs shig ngas bshad par bya'o/ /de nas bcom ldan 'das de'i tshe kun tu sgra sgrog pa zhes bya ba'i ting nge 'dzin la snyoms par zhugs so/ /bcom ldan 'das ting nge 'dzin gang la snyoms par zhugs pa de'i tshe dmyal ba thams cad rgyun chad pa dang / sdang pa'i sems dang ldan pa thams cad kyang sdang ba'i sems dang bral zhing byang chub kyi sems la rab tu gzhol bar gyur pa dang / bcom ldan 'das kyis bka' stsal pa/ gsal rgyal/ khyod kyis mthong ngam/ kun tu thos sam/ shes sam/ rtogs sam/ bcom ldan 'das/ mthong lags so/ /bde bar gshegs pa/ mthong lags so/ /'khums shing kun tu 'khums 560a @#/ /la 'tshal zhing rtogs so/ /bcom ldan 'das kyis bka' stsal pa/ gsal rgyal/ 'di ni/ sems can thams cad kyi ma/ sangs rgyas dang byang chub sems dpa' skyed pa/ nyan thos dang / rang sangs rgyas dang / yang dag par rdzogs pa'i sangs rgyas thams cad kyis phyag byas pa/ mchod pa/ bsams pa/ bsgoms pa| shes rab kyi pha rol tu phyin pa sgra'i gzugs kyis sems can thams cad yongs su skyong bar byed pa/ mu stegs pa thams cad rnam par 'jig par byed pa/ sdang ba'i sems 'dus par byed pa/ sdig pa'i sems 'joms par byed pa/ zhe sdang ba'i sems rnam par sel bar byed pa/ gti mug gi sems rab tu 'jig par byed pa/ 'dod chags kyi sems rnam par spong bar byed pa/ byang chub kyi sems yongs su skyong bar byed pa/ sangs rgyas kyi sems 'phel bar byed pa/ sangs rgyas 'byung ba sten par byed pa| 'thab pa dang / 'gyed pa dang / 'khrug pa dang / rtsod pa dang / sdug bsngal ba dang / rmi lam ngan pa dang / kun 'dul ba thams cad 'jig pa/ glo bur gyi nad dang / 'chi ba zhi bar byed pa dang / dus ma yin par 'chi ba dang / rims la sogs pa zhi bar byed pa/ pha rol gyi dpung 'dul bar byed pa/ bdud rnam par 'jig par byed pa/ gdung 560b ba sel bar byed pa/ skal pa bzang po yang dag par 'phel bar byed pa/ tshe dang nad med pa ster bar byed pa/ 'chi ba'i 'jigs pa zhi bar byed pa/ thar pa dang dpal 'phel bar byed pa| gang gis thos nas rjes su yi rang ba de la yid bzhin gyi nor bu ltar 'bras bu rab tu ster ba/ yum shes rab kyi pha rol tu phyin pa gaN+DI'i gzugs kyis bzhugs so/ /zhes thos pa dang / gsal rgyal sems dang ba skyes nas yang bcom ldan 'das la 'di skad ces gsol to/ /bcom ldan 'das/ 'di'i tshad ni/ ji tsam lags/ mdog ni/ ci 'dra ba lags/ bye brag ni/ du zhig lags/ brdung ba ni/ ci 'dra ba lags/ gang gis brdung bar bgyi/ gang gis tshe gang gi dus na ji srid du brdung bar bgyi/ ji ltar gzhag par bgyi/ de skad ces gsol pa dang / bcom ldan 'das kyis bka' stsal pa/ 'byor bar 'dod pas shing rnams ni/ /rab tu 'bad de brtag par bya/ /tsan+dan bil ba pa la sha /a shwad+tha dang tsan+dan dmar| |rgya star ta la kid+shu ka /shiM sha ba dang ta ma la/ /a mra star bu skyu ru ra/ /ting ti sa ra a shau ka /'di dag thams cad med na yang / /'o se las ni 'bad de bya/ /rgyal po 'bad pas thams cad du/ /'di dag med na mi bya'o/ /tshad med shing ngan las byas dang / /brdungs dang sgra ni mi 'byung ba'i/ /sangs rgyas yum 'di brdungs na ni/ /yul 'khor 'tshe ba nges par 561a @#/ /'byung / /gtsug lag khang du dge slong rnams/ /de bzhin blo ni mi mthun dang / /nye bar gdung ba 'byung 'gyur zhing / /rnam pa du mar rtsod par 'gyur/ /mu stegs can gyi dbang 'gyur zhing / /bdud kyang 'byung bar 'gyur ba yin/ /gdug pa'i klu ni du ma yis/ /'bru rnams kyang ni nyams par byed/ /rgyal khams 'dir mang sems can rnams/ /rnam par 'jig pa nyid du 'gyur/ /gtsug lag khang yang 'jig 'gyur zhing / /chos kyang nub par 'gyur ba yin/ /bdud kyi lha rnams dge slong gi /dge 'dun shin tu ma bsdams byed/ /de ltar yang dag shes nas kyang / /legs par yongs su brtags te bya/ /tshad ni chung ngu sor brgyad kyi/ /brgyad cu rtsa bzhi nyid bya zhing / /zheng du sor ni drug bya ste// 'phangs su yang ni gnyis bya'o/ /sor mo'i tshigs kyi tshad dag gis/ /zur bzhir tshad ni gnyis pa yin/ /legs mnyam nyid ni shin tu gsal/ /rtse gnyis sbal pa'i mgo bzhin no| |de nas rdung bar byed pa yang / /shing de nyid las bcad de bya/ /sor bcu gnyis kyi tshad dag la/ /zlum zhing rtse gnyis ne'u le'i mgo /chang zungs tshad kyang de bzhin te/ /shin tu 'jam dang rtsibs mnyam par/ /gang phyir de brdungs gzhan dgongs pa/ /'og tu'ang de yi khri bya ba/ /gtsug lag khang gi sgo steng ngam/ /yang na dbus ma'i steng du bya/ /de yi rab gnas 561b bya ba ni| |shin tu brtan pa'i chos kyi sku/ /skyed pa ma yin 'jig byed min/ /gdod nas ma skyes pa dge ba/ /de ltar rab gnas byas nas ni/ /de ni spyan dbyer gyur pa yin/ /gaN+DI'i spyan dbye byas nas kyang / /de 'og gtsug lag khang kun tu/ /klu bdun gyis ni brgyan pa ltar/ /bskyed pa'i rim gyis brdung bar bya/ /de 'og dkon mchog gsum la ni/ /phyag byas nas ni brdung bya zhing / / shangs tsha lan gsum brjod pas ni/ /chos kyi rnga rnams brdung bar bya/ /me tog gis ni de bzhin khrus/ /zan za nyi ma 'char nub tshe/ /dus gsum la ni lan gsum ste/ /sku khrus tshen lan gnyis bsngags/ /glo bur gnod pa char mi 'bab/ /de bzhin 'thab dang rtsod pa dang / /glog dang gnod pa chen po dang / /gnas brtan rnams ni spyan 'dren dang / /nad dang ma ge zhi ba'i phyir| |ma 'tshal rim gyis brdung bar bya/ /dge slong rnams dang dge tshul gyis/ /dus rnams rtag tu brdung ba ste/ /gso sbyong la ni gnas tshe yi/ /dge bsnyen gyis kyang brdung bar bya/ / mtshan nyid thams cad rdzogs pa dang / /klu bdun gyis ni brgyan par bya/ /rgyal po gang tshe yul 'khor du/ /gaN+DI'i de ni grags gyur pa/ /der ni dpal dang grags pa dang / /'dod pa dang ni lo legs 'gyur/ /pha rol dpung gis 'jigs med cing / /'bru rnams kyang ni nyams mi 'gyur/ /sangs rgyas byin brlabs 'byor pa yis/ /der ni bdud rnams 'dul bar 'gyur/ / 562a @#/ /chos kyi rnga ni srid rtser bcas/ /kun nas rab tu g.yo bar 'gyur/ /dmyal dang yi dwags 'jig rten rnams/ /'jig par 'gyur bar the tshom med/ /thams cad sangs rgyas rtag dad cing / /thams cad chos la gzhol bar 'gyur/ /der ni dge 'dun 'dul bar ldan/ /mkhas pa rnams kyang 'phel bar 'gyur/ /'dod chags zhe sdang gti mug rnams/ /der ni nub par 'gyur ba yin/ /rgyal po tshe ring chos ldan zhing / /bde ba dag dang ldan par 'gyur/ /rgyal po gtsug lag khang kun tu/ /chos kyi rnga ni brdungs pa yis| |sgra ni gang gi rna ba yi/ /lam dag tu ni grags gyur cing / /dus bzhi dag tu thos pa ni/ /de rnams byang chub thob par 'gyur/ /gang zhig snying nas yi rang ba/ /de ni grol 'gyur the tshom med/ /gaN+DI'i mdo ni lan gcig thos/ /mi de skye ba dran par 'gyur/ /gang na mdo sde'i mchog 'di gnas/ /yul 'khor der yang 'byor bar 'gyur/ / dus kun tu ni gnas pa dang / /klog gam yang na mchod par byed/ /'di ni yid la 'dzin byed pa/ /sdig pa las ni grol bar 'gyur/ /bcom ldan 'das kyis de skad ces bka' stsal pa dang / rgyal po gsal rgyal bcom ldan 'das la yang dang yang du phyag byas nas song ngo / /bcom ldan 'das kyis de skad ces bka' stsal nas thams 562b cad dang ldan pa'i 'khor de dang / lha dang / mi dang / lha ma yin dang / nam mkha' lding dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /gaN+DI'i mdo rdzogs so// //rgya gar gyi mkhan po d+har+m+ma shrI b+ha dra dang / lo tsA ba dge slong tshul khrims yon tan gyis bsgyur/ zhu chen gyi lo tsA ba dge slong rin chen bzang pos bcos te gtan la phab pa/ |