//rgya gar skad du/ shrI la saM yuk+ta sU tra/ bod skad du/ tshul khrims yang dag par ldan pa'i mdo/ thams cad mkhyen pa la phyag 'tshal lo/ /'di skad bdag gis thos pa dus gcig na/ bcom ldan 'das mnyan du yod pa na rgyal bu rgyal byed kyi tshal mgon na med zas sbyin gyi kun dga' ra ba na/ dge slong gi dge 'dun chen po brgya phrag phyed dang bcu gsum dang thabs gcig tu bzhugs te/ de'i tshe bcom ldan 'das kyis dge slong rnams la bka' stsal pa/ dge slong dag| shes pa ni 'grib/ srog ni cha da/ tshe'i 'du byed ni nges par 'joms par 'gyur na/ ci'i phyir brtson 'grus dang / brtul ba brtan pos sgrub par mi byed/ mi'i lus ni shin tu rnyed par dka' na de thob nas des rnyed pa'i rgyal ba'i bstan pa la rab tu byung ba'ang rnyed na thar pa'i don dang mi mthun pa dag gis bslus te sdug bsngal bar gyur ta re/ dge slong dag /srog dang bral zhing shi ba ni sla yi/ tshul khrims nyams pa ni de lta ma yin no/ /de ci'i phyir zhe na/ srog dang bral ba ni tshe 'di nyid kyi skye ba zad 196b par 'gyur gyi/ tshul khrims nyams shing zhig pa ni skye ba 'bum phrag brgya'i bar du rigs dang bral zhing bde ba spangs te rnam par ltung ba nyams su myong bar 'gyur ro/ /de phyir ston pas tshul khrims rab bsngags bshad/ /tshul khrims ldan pa sangs rgyas 'byung dang phrad/ /tshul khrims ldan pa rgyan rnams kun gyi mchog /tshul khrims 'byor ba dri dang byug pa yin/ /tshul khrims ldan pa dga' ba kun gyi gnas/ /tshul khrims ldan pa gdung ba sel ba'i chu/ /tshul khrims ldan pa 'jig rten kun gyis bstod/ /tshul khrims dag gis 'gro ba dam pa mnos/ /ji ltar sprul pa gdug klu chen nag po yang / /tshul khrims can la gnod med gzhan ci smos/ /tshul khrims ldan pa'i dge slong 'od dang ldan/ /tshul khrims ldan pa grags 'gyur bde ba thob/ /tshul khrims ldan pa mtho ris 'gro ba'i rgyu/ /tshul khrims bsrungs pas mya ngan 'da' thob 'gyur/ /ji ltar mig med gzugs mthong mi rung ltar/ /de bzhin tshul khrims med na chos mi mthong / /ji ltar rkang med lam 'jug ga la nus/ /de bzhin tshul khrims med na thar mi 'gyur/ /ji ltar bum pa bzang po rin chen snod/ /de bzhin tshul khrims chos rnams skyed pa'i gzhi/ /ji ltar bum chag rin chen snod mi rung / /de bzhin tshul khrims ral pas chos kun gtugs/ 197a @#/ /dang po tshul khrims med par gyur pa des/ /phyi nas mya ngan 'das pa thob snyam mam/ /sna dang rna rdum la sogs pa gang yin pa/ de la me long dag ni dgos mi 'gyur/ /rna bas ma thos mig sngar ma mthong bzhin/ /bstan srung mi de mtho ris 'gro bar 'gyur/ /thos mang thos ldan thos srung mtho ris nyid/ /bud med bstan du ga la rung / /rgyal po'i pho brang ga la dga'/ /dbu ba snying po ga la yod/ /longs spyod rtag pa ga la yin/ /bud med dag la rung ba med/ /rgyal srid dag la dga' ba med/ / dbu ba dag la snying po med/ /longs spyod dag la rtag pa med/ /longs spyod dag ni 'bab chu bzhin/ /gru de ci 'dra khyim de 'dra/ /me tog ci 'dra gzugs de bzhin/ /srog ni chu bur 'dra ba yin/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do/ / tshul khrims yang dag par ldan pa'i mdo rdzogs so// |