//rgya gar skad du/ AR+Ya ta thA ga ta pra ti bim+ba pra tiSh+Tha a nu shaM sa sam+ba dan+taM nA ma d+harma paR+YA ya/ bod skad du/ 'phags pa de bzhin gshegs pa'i gzugs brnyan bzhag pa'i phan yon yang dag par brjod pa zhes bya ba'i chos kyi rnam grangs/ thams cad mkhyen pa la phyag 'tshal lo/ /'di skad bdag gis thos pa dus gcig na bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe dge slong rab tu mang po dag cig rim gro'i gnas su lhags te 'dug nas bar 302b skabs der gtam 'di lta bu zhig glengs so/ /khyed cag la bram ze'am/ khyim bdag dad pa can thos pa 'dzin pa/ thos pa bsags pa/ dge ba ji ltar bya zhes tshol ba/ de bzhin gshegs pa'i gzugs brnyan bgyid par spro ba skyed pa dag snang la de dag gal te bdag cag gi drung du lhags na/ btsun pa dag/ de bzhin gshegs pa'i gzugs brnyan bgyid pa'i gang zag sbyin pa po la phan yon ji tsam zhig mchis par rig par bgyi zhes rmed na/ de bzhin gshegs pa'i gzugs brnyan bgyid pa la phan yon ji tsam zhig yod pa bdag cag gis mi shes te/ de'i tshe de dag la bdag cag gis ji ltar chos dang mthun par lan gdab par bya/ gang don 'di dag nyid ni bcom ldan 'das de bzhin gshegs pa dgra bcom pa yang dag par rdzogs pa'i sangs rgyas thams cad mkhyen pa/ thams cad gzigs pa/ the tshom thams cad gcod par mdzad pa/ ston pa de la bdag cag gis zhu'o/ /'on tang bcom ldan 'das da bdag cag la lung ston par mdzad de/ bdag cag gis de bzhin bzung nas bram ze dang / khyim bdag dad pa can rnams la rgya cher bye ste lan gdang par bya'o zhes bgros so/ /de nas dge slong rab tu mang po dag bcom ldan 'das ga la ba der dong ste phyin nas bcom ldan 'das kyi zhabs la mgo bos phyag 303a @#/ /btsal te phyogs gcig tu 'khod do/ /phyogs gcig tu 'khod nas dge slong rab tu mang po dag gis bcom ldan 'das la 'di skad ces gsol to/ /btsun pa| bdag cag dge slong rab tu mang po dag rim gro'i gnas der lhags te 'dus pa dang / bar der bka' mchad 'di lta bu zhig glengs te/ khyed cag la bram ze'am/ khyim bdag dad pa can thos pa 'dzin pa/ thos pa bsags pa/ dge ba ji ltar bgyi zhes tshol ba de bzhin gshegs pa'i gzugs brnyan bgyi bar spro ba skyes pa dag gda' la| de dag gal te bdag cag gi drung du mchis nas/ btsun pa dag /de bzhin gshegs pa'i gzugs brnyan bgyid pa'i gang zag sbyin pa po la phan yon ji tsam zhig mchis par rig par bgyi zhes rmed na/ de bzhin gshegs pa'i gzugs brnyan bgyid pa la phan yon ji tsam zhig mchis pa bdag cag gis ma 'tshal na/ de'i tshe de dag la bdag cag gis ji ltar chos dang mthun par lan gdab par bgyi/ gang don de dag nyid ni bcom ldan 'das de bzhin gshegs pa dgra bcom pa yang dag par rdzogs ba'i sangs rgyas thams cad mkhyen pa/ thams cad gzigs pa/ the tshom thams cad gcod par mdzad pa/ ston pa de la bdag cag gis zhu bar bgyi'o/ /'on tang bcom 303b ldan 'das de bdag cag la lung ston par mdzad de/ bdag gis de bzhin bzung nas bram ze dang / khyim bdag dad pa can rnams la rgya cher bye ste lan gdab par bgyi'o snyam bgyid do/ /btsun pa bcom ldan 'das/ don de dag nyid bdag cag zhu zhing mchis na/ btsun pa bcom ldan 'das/ de bzhin gshegs pa'i gzugs brnyan bgyid pa'i gang zag sbyin pa po la phan yon ji tsam zhig mchis par rig par gyi/ bka' stsal pa/ dge slong dang / skye bo mang po la phan pa dang / skye bo mang po la bde ba dang snying brtse ba dang / lha dang mi rnams la phan pa dang bde ba'i phyir zhus te/ khyed gang de bzhin gshegs pa dgra bcom pa yang dag par rdzogs pa'i sangs rgyas la don de nyid zhu bar sems pa legs so/ /legs so/ / dge slong dag /de'i phyir legs par rab tu nyon la yid la zungs shig dang bstan par bya'o/ /dge slong dag /de bzhin gshegs pa'i gzugs brnyan byed pa'i gang zag sbyin pa po la phan yon 'di lnga yod de/ lnga gang zhe na/ gzhal med khang chen por gnas pa dang / bong steng bzang por grags pa dang / spro ba mang ba dang / tshe ring ba dang / grags pa dad ldan pa dang / bde ba mang ba ste/ dge slong dag/ 'di ni de bzhin gshegs pa'i gzugs brnyan byed pa'i gang zag sbyin pa po'i phan yon dang po yin no/ /gzhan yang / phyug 304a @#/ /po dang / nor mang ba dang / longs spyod che ba dang / nor rdzas dang / yo byad mang ba dang / bdag dbang ba bdag gir bya ba mang ba dang / nor dang / 'bru dang / dbyig dang / gser dang / mdzod dang / bang ba'i tshogs mang ba dang / rta dang / glang po che dang / ba lang dang / lug dang / bran dang / bran mo dang / las byed pa dang / zho shas 'tsho ba mang ba dang / blon po dang / mdza' bshes dang / gnyen dang / snag gi gnyen mtshams mang por 'gyur te/ dge slong dag/ 'di ni de bzhin gshegs pa'i gzugs brnyan byed pa'i gang zag sbyin pa po'i phan yon gnyis pa yin no/ /dge slong dag /gzhan yang / gzugs bzang po dang / blta na sdug pa dang / mdzes pa dang / mdog gser ltar bzang ba dang / mgo gdugs ltar zlum pa dang / lag pa ring ba dang / dpral ba dbyes che ba dang / smin mtshams bar ma chad pa dang / yan lag dang / nying lag thams cad dang ldan pa dang / rgyan thams cad kyis brgyan par 'gyur te/ dge slong dag/ 'di dag ni de bzhin gshegs pa'i gzugs brnyan byed pa'i gang zag sbyin pa po'i phan yon gsum pa yin no/ /dge slong dag /gzhan yang / 'khor los bsgyur ba'i rgyal po 'khor bzang po rin po che sna bdun dang ldan pa dang / bu stong gis bskor bar 'gyur te/ 304b de'i bu'am/ chung ma'am/ bran nam/ nye bar 'tsho ba gang yin pa de dag thams cad de la gus par nyan pa dang / bka' nyan par byed de/ dge slong dag/ 'di ni de bzhin gshegs pa'i gzugs brnyan byed pa'i gang zag sbyin pa po'i phan yon bzhi pa yin no/ /dge slong dag /gzhan yang / de lus dang bral nas bde 'gro mtho ris kyi 'jig rten gyi lha rnams kyi nang du skye bar 'gyur te/ der skyes nas lha'i rgyal po khyad par can lha dang / lha'i bu dang / lha'i bu mo rnams kyi rten du 'gyur la/ gnas bcu po lha'i tshe dang / lha'i mdog dang / lha'i stobs dang / lha'i bde ba dang / lha'i dbang phyug la dbang byed pa dang / lha'i gzugs dang / sgra dang / dri dang / ro dang / reg bya rnams kyis dga' bar byed de/ dge slong dag /'di ni de bzhin gshegs pa'i gzugs brnyan byed pa'i gang zag sbyin pa po'i phan yon lnga pa yin no/ /bcom ldan 'das kyis de skad ces bka' stsal pa dang / dge slong de dag bcom ldan 'das kyis gsungs pa la yi rangs te mngon par bstod do/ /'phags pa de bzhin gshegs pa'i gzugs brnyan bzhag pa'i phan yon yang dag par bstan pa zhes bya ba'i chos kyi rnam grangs rdzogs so// //rgya gar gyi mkhan po d+harmA ka ra dang / lo ts+tsha ba ban+de ye shes snying pos 305a @#/ /bsgyur/ ban+de dpal brtsegs kyis zhus chen bgyis te gtan la phab pa// |