//rgya gar skad du/ AR+Ya sa dzA na pu ru Sha sU tra/ bod skad du/ 'phags pa skyes bu dam pa'i mdo/ 'phags pa 'jam dpal gzhon nur gyur pa la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te| de nas bcom ldan 'das kyis dge slong rnams la bka' stsal pa/ dge slong dag/ lnga po 'di dag ni skyes bu dam pa'i sbyin pa dag yin te/ lnga gang zhe na/ dge slong dag / skyes bu dam pa ni dad pas sbyin pa sbyin par byed pa yin/ gus par byas te rang gi lag pa nas dang / dus su gzhan dag la mi gnod par sbyin pa sbyin par byed pa yin no/ /dge slong dag/ dad pas sbyin pa byin pa'i 'bras bu rnam par smin par 'dod par bya ba gang zhe na/ dad pas sbyin pa byin pas phyug por 'gyur ba yin/ nor mang ba dang / longs spyod che ba yin/ nor gyi yo byad mang ba yin/ bdag dbang pa'i slong che ba yin/ nor dang / 'bru dang / dbyig dang / gser dang / mdzed dang / bde ba'i tshogs mang ba yin/ bran dang / bran mo 388a @#/ /dang / las byed pa dang / zho shas 'tsho ba mang ba yin/ mdza' bo dang / blon po dang / nye du dang / snag gi gnyen mtshams mang ba yin te/ dge slong dag/ dad pas sbyin pa byin pa'i 'bras bu rnam par smin pa de lta bu 'dod par bya'o/ /dge slong dag/ gus par byas te sbyin pa byin pa'i 'bras bu rnam par smin pa 'dod par bya ba gang zhe na/ /gus par byas te sbyin pa byin pas phyug por 'gyur ba yin/ mdza' bo dang / blon po dang / nye du dang / snag gi gnyen mtshams mang ba yin pa'i bar snga ma bzhin no/ bu dang / chung ma dag dang / bran dang / bran mo dang / las byed pa dang / zho shas 'tsho ba dang / mdza' bo dang / blon po dang / nye du dang / snag gi gnyen mtshams dag gis kyang gus par byas par 'gyur ba yin te/ dge slong dag/ gus par byas te sbyin pa byin pa'i 'bras bu rnam par smin pa de lta bu 'dod par bya'o/ /dge slong dag/ rang gi lag pa nas sbyin/ pa byin pa'i 'bras bu rnam par smin pa 'dod par bya ba gang zhe na/ rang gi lag pa nas sbyin pa byin pas phyug por gyur pa nas mdza' bo dang / blon po dang / nye du dang / snag gi gnyen mtshams mang ba yin pa'i bar snga ma bzhin no/ /de'i khyim gyi longs spyod rgya chen po dag la'ang sems 'jug pa yin/ zas kyi longs spyod rgya chen po dag dang / 388b theg pa'i longs spyod rgya chen po dag dang / gos kyi longs spyod rgya chen po dag dang / mal cha'i longs spyod rgya chen po dag dang / gzugs dang / sgra dang / dri dang / ro dang / reg bya rgya chen dag la'ang sems 'jug pa yin no/ /dge slong dag/ rang gi lag pa nas sbyin pa byin pa'i 'bras bu rnam par smin pa de lta bu 'dod par bya'o/ /dge song dag/ dus su byin pa byin pa'i 'bras bu rnam par smin pa 'dod par bya ba gang zhe na/ dus su byin pa byin pas phyug por 'gyur ba yin pa nas/ mdza' bo dang / blon po dang / nye du dang / snag gi gnyen mtshams mang po'i bar snga ma bzhin no/ /de'i nor dag kyang dus su thob pa dang / mang zhing mthun pa mngon du byung ba yin te/ dge slong dag/ dus su byin pa byin pa'i 'bras bu rnam par smin pa de lta bu 'dod par bya'o/ /dge slong dag/ gzhan la mi gnod par sbyin pa byin pa'i 'bras bu rnam par smin pa 'dod par bya ba gang zhe na/ gzhan la mi gnod par sbyin pa byin pas phyug por 'gyur ba yin pa nas/ mdza' bo dang / blon po dang / nye du dang / snag gi gnyen mtshams mang ba'i bar snga ma bzhin no/ /de'i longs spyod gang dag brtson 'grus brtsoms pas thob pa lags/ mthus bsgrubs pa rdul zhing dri ma chags chags su bsgrubs pa/ chos dang ldan pa chos kyis thob pa de dag la'ang rgyal po'am/ 389a @#/ /rkun po'am/ me'am/ chu'am/ mi 'dza' ba bgo skal la spyod pa'am/ gang las kyang bar chad mi 'byung ba yin te/ gzhan la mi gnod par sbyin pa byin pa'i 'bras bu rnam par smin pa 'di la 'dod par bya'o/ /bcom ldan 'das kyis de skad ces bka' stsal te/ bde bar gshegs pas 'di skad ces gsungs nas/ 'di ltar ston pas gzhan yang 'di skad ces bka' stsal to/ /dad cing gus par byas te rang gi lag pa nas/ /dus su gnod pa med par mkhas pa sbyin pa byed/ /sbyin pa rgya che ba dang| chen po 'dir byin nas/ /kun bged byed pa de ni bzang 'gror 'gro ba yin/ /bcom ldan 'das kyis de skad ces bka' stsal nas dge slong de dag yi rangs te/ bcom ldan 'das kyis gsungs pa la mngon par bstod do/ /'phags pa skyes bu dam pa'i mdo rdzogs so// //rgya gar gyi mkhan po d+ha rmA ga ra dang / lo ts+tsha ba ban+de bzang skyong gis bsgyur/ ban+de dpal brtsegs kyis zhus chen bgyis// |