rgya gar skad du/ alpa de ba tA sU tra/ bod skad du/ lha'i mdo nyung du/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas lha zhig bcom ldan 'das ga la ba der song ste phyin nas bcom ldan 'das kyi zhabs la mgo bos phyag btsal te phyogs gcig tu 'dug go/ phyogs gcig tu 'dug nas lha des bcom ldan 'das la zhu ba zhus 396a @#/ /pa| tshul khrims gang lags spyod pa gang / /yon tan gang lags las gang gis/ /gnas pa ji ltar shes rab gang / /skye bo gang dag mtho ris mchi// lha la thugs pa rtse nyer bzung nas/ /ston pas de la lung bstan pa/ /skye bo mtho ris gang 'gro ba/ /lha khyod nga la rab tu nyon/ /srog gcod pa las phyir ldog cing / /khrims bzung yang dag sdom la dga'/ /gang dag 'byung po mi 'tshe ba/ /skye bo de dag mtho ris 'gro/ gang dag ma byin len spong zhing / /sbyin pa gtong la rtag dga' ste/ /rku ba spong zhing mi rku ba/ /skye bo de dag mtho ris 'gro/ gzhan gyi chung ma'i thad mi 'gro/ log par g.yem pa rnam par spong / /bdag gi chung mas chog sems pa/ /skye bo de dag mtho ris 'gro/ /gzhan gyi don la rku byed dang / /bdag gi phyir dang 'jigs pa'i phyir/ /rdzun gyi tshig rnams mi smra ba/ /skye bo de dag mtho ris 'gro/ grogs po rtag par 'byed byed pa/ /phra ma'i tshig rnams rab spong zhing / /gang dag 'dun par rab dga' ba/ /skye bo de dag mtho ris 'gro/ rgyags la rten cing zhe gcod pa/ /tshig rtsub dag ni rnam spong zhing / /'jam po'i tshig tu gang smra ba/ /skye bo de dag mtho ris 'gro/ don med gnas dang ldan pa yi/ /kyal ba'i tshig rnams rab spong zhing / /gang yang dus su chos 396b smra ba/ /skye bo de dag mtho ris 'gro| grong ngam 'on te dgon pa na/ /gzhan gyis bdag gir byas pa la/ /de la chags sems gang med la/ /skye bo de dag mtho ris 'gro/ byams pa'i sems kyis mi 'tshe zhing / /gnod par sems pa med pa yis/ /skye bo kun la mi gnod pa/ /skye bo de dag mtho ris 'gro/ las dang las kyi rnam smin dang / /gnyis ka la yang gang dad cing / /yang dag lta ba yang dag 'dzin/ /skye bo de dag mtho ris 'gro/ dge ba'i chos rnams 'di dag ni/ /dkar po chos kyi lam bcu ste/ /gang dag yang dag 'dzin 'gyur ba| |skye bo de dag mtho ris 'gro /bram ze mya ngan 'das pa dang / /dgra dang 'jigs pa kun 'das shing / /'jig rten chags med brgal ba ni/ /mang po yod par ma mthong ngo // bcom ldan 'das kyis de skad ces bka' stsal nas lha de yi rangs te/ bcom ldan 'das kyis gsungs pa la mngon par bstod do/ /lha'i mdo nyung du rdzogs so// // zhus chen gyi lo tsA ba ban+de ye shes sdes bsgyur cing zhus te gtan la phab pa// |