//rgya gar skad du/ kU TA gA ra sU tra/ bod skad du/ khang bu brtsegs pa'i mdo/ thams cad mkhyen pa la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas tshe dang ldan pa kun dga' bo bcom ldan 'das gang na ba der song ste phyin nas/ bcom ldan 'das kyi zhabs gnyis la spyi bos phyag btsal te phyogs gcig tu 'dug go/ phyogs gcig tu 'dug nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ phyag dar bgyis pas 398a @#/ /dge ba'i rtsa ba cir 'gyur lags/ dkyil 'khor bgyis pas cir 'gyur lags/ /skyabs su mchi ba dang / bslab pa'i gzhi rnams kyi dge bas ni cir 'gyur lags/ de bzhin gshegs pa la phyag 'tshal ba'i thal mo sbyar ba'i sug las kyis ni cir 'gyur lags/ bcom ldan 'das/ dge ba'i rtsa ba 'khor bar bas par mi 'gyur zhing yongs su gtugs par mi 'gyur la/ bas ma 'tshal pa'i mya ngan las 'das pa thob par 'gyur ba ni gang lags/ de bzhin gshegs pa'i sku gzugs bgyis pas ni cir 'gyur lags/ /bcom ldan 'das kyis bka' stsal pa/ kun dga' bo/ phyag dar byas pa'i phan yon ni lngar 'gyur te/ lnga gang zhe na/ kun dga' bo/ 'di lta ste/ bdag gi sems dang bar 'gyur ba dang / gzhan gyi sems dang bar 'gyur ba dang / lha rnams dga' bar 'gyur ba dang / mdzes pa'i las byas shing bsags pa dang / lus zhig nas bde 'gro mtho ris kyi 'jig rten gyi lha rnams su skye bar 'gyur bo/ kun dga' bo/ gang la la zhig gis de bzhin gshegs pa'i ched du dkyil 'khor gru bzhi pa byed na de byang gi sgra mi snyan gyi gling gi dbang phyug gi bdag por 'byung ba'i lus kyi gnas sum cu rtsa gsum gyi lha rnams su skye bar 'gyur bar nga 398b smra'o/ /kun dga' bo/ gang la la zhig gis de bzhin gshegs pa'i ched du dkyil 'khor zlum po byed na de nub kyi bal glang spyod kyi gling gi dbang phyug gi bdag por 'gyur zhing lus zhig nas 'thab bral gyi lha rnams su skye bar 'gyur bar nga smra'o/ /kun dga' bo/ gang la la zhig gis sangs rgyas bcom ldan 'das la sems dad pas dkyil 'khor zla gam lta bu byed na de shar gyi lus 'phags gling gi dbang phyug gi bdag por 'gyur zhing lus zhig nas dga' ldan gyi lha rnams su skye bar 'gyur bar nga smra'o/ /kun dga' bo/ gang la la zhig gis sangs rgyas bcom ldan 'das la sems dad pas dkyil 'khor shing rta'i dbyibs lta bur byed na dzam+bu'i gling gi dbang phyug gi bdag por 'gyur zhing lus zhig nas 'phrul dga'i lha rnams su skye bar 'gyur bar nga smra'o/ /kun dga' bo/ gang la la zhig gis sangs rgyas la skyabs su 'gro ba dang / gang chos dang / dge 'dun la skyabs su 'gro zhing bslab pa'i gzhi rnams kyang mnos nas yongs su srung bar byed na/ kun dga' bo/ dge ba'i rtsa ba de'i bsod nams ni dpag tu med cing grangs med par nga smra ste/ nyan thos dang / rang sangs rgyas thams cad kyis mya ngan las 'das pa'i mthar thug pa'i bar du mtha' gzung bar mi nus par nga smra'o/ /de nas bcom ldan 'das kyis tshe dang ldan 399a @#/ /pa kun dga' bo'i sems thugs su chud nas ljags pad+ma dmar po'i 'dab ma dri ma med cing lo ma 'jam pa dang / mtshal dmar po dang / shing mya ngan 'tshang gi lo ma dang / zangs kyi glegs ma srab mo dang 'dra la chu zheng gab pas zhal gyi dkyil 'khor dbu'i skra mtshams la thug pa'i bar thams cad du brkyang nas kun dga' bo la bka' stsal pa/ kun dga' bo/ khyod kyis brdzun du smra ba dang / phra ma dang / tshig rtsub po dang / tshig kyal pa smra ba la lce 'di lta bu mthong ngam/ btsun pa/ ma lags so/ /kun dga' bo/ de bzhin gshegs pa dgra bcom pa yang dag par rdzogs pa'i sangs rgyas rnams ni bden pa gsung ba yin no/ /kun dga' bo/ gang la la thal mo sbyar te/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de la phyag 'tshal lo/ /phyag 'tshal lo zhes phyag 'tshal bar byed na sems can de dag ngas yongs su bzung zhing yongs su mya ngan las 'das pa yin no/ /sems can de rnams la ni nga thugs khral chung ba yin no/ /de ci'i phyir zhe na/ kun dga' bo/ 'di ltar de bzhin gshegs pa'i chos kyi dbyings ni shin tu rab tu gnas pa yin no/ /de shin tu rab tu gnas pa'i phyir thal mo sbyar ba'ang chud za bar mi 'gyur na sbyin pa la sogs 399b pa byed pa lta smos kyang ci dgos/ kun dga' bo/ ltos shig/ skyes bu zhig la rang gi gzar bu bkrus pa tsam mam/ phor bu bkrus pa tsam pa'am/ phru ldog bkrus pa tsam gang yin pa de'ang yod la/ gal te de 'di snyam du/ 'di na gnas pa'i srog chags thams cad 'dis bde bar gyur snyam du sems shing gtor khung du 'bor bar byed na/ kun dga' bo/ 'on kyang bsod nams skye ba'i sgor 'gyur bar nga smra na mir gyur pa lta smos kyang ci dgos/ kun dga' bo/ gsum po 'di dag ni bar gyi bskal pa dag yin no/ /gsum gang zhe na/ mtshan gyi bar gyi bskal pa dang / nad kyi bar gyi bskal pa dang / mu ge'i bar gyi bskal pa'o/ /kun dga' bo/ de la gang gis nyi ma gcig cig srog gcod pa spong zhing yang dag par blangs te| gnas par byed na de mtshon gyi bar gyi bskal par mi skye bar 'gyur ro/ /gang zhig gis a ru ra gcig tsam yang dge 'dun la dbul bar byed na de nad kyi bar gyi bskal par mi skye bar 'gyur ro/ /gang zhig gis zas nal tse gang tsam dge 'dun la phul na de mu ge'i bar gyi bskal par mi skye bar 'gyur ro/ /kun dga' bo/ dge ba'i rtsa ba gsum po 'di dag bskyed pa ni 'khor bar zad par mi 'gyur zhing yongs su gtugs par mi 'gyur la zad mi shes pa'i mya ngan las 'das pa thob par 'gyur bar byed pa yin no/ / 400a @#/ /gsum po gang dag ce na/ kun dga' bo/ sangs rgyas la dge ba'i rtsa ba bskyed pa ni 'khor bar zad par mi 'gyur zhing yongs su gtugs par mi 'gyur la zad mi shes pa'i mya ngan las 'das pa thob par byed pa yin no/ /chos la dge ba'i rtsa ba bskyed pa dang / dge 'dun la bskyed pa ni 'khor bar zad par mi 'gyur zhing yongs su gtugs par mi 'gyur la zad mi shes pa'i mya ngan las 'das pa thob par byed pa yin no/ /de nas bcom ldan 'das kyis de bzhin gshegs pa'i yon tan bstan pa'i phyir kun dga' bo la bka' stsal pa/ kun dga' bo/ /khyod kyi dzam+bu'i gling gi gling mthong ngam/ kye btsun pa/ mthong lags so/ /kun dga' bo/ dzam+bu'i gling gi gling ni zheng du ni dpag tshad bdun stong / chur yang dpag tshad bdun stong ste/ byang gi zhing ni che/ lho'i ni shing rta'i dbyibs so/ /de rigs kyi bu'am/ rigs kyi bu mo dad pa can la las rin po che sna bdun gyis bkang ste rgyun du zhugs pa rnams dang / lan gcig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnams dang / phyogs bzhi'i dge slong gi dge 'dun la 'bul bar byed pa dang / gang zhig de bzhin gshegs pa dgra bcom pa yang dag par rdzogs pa'i sangs rgyas yongs 400b su mya ngan las 'das pa'i mchod rten 'jim pa las skyu ru ra tsam byed du 'jug/ srog shing khab tsam 'dzugs su 'jug /gdugs ni rgya shug gi lo ma tsam 'gebs su 'jug cing sku gzugs nas 'bru tsam byed du 'jug la/ sku gdung yungs kar gyi 'bru tsam 'jug par byed na/ kun dga' bo/ 'di nyid de bas bsod nams shin tu mang bar nga smra'o// kun dga' bo/ dzam+bu'i gling gi gling lta zhog gi /kun dga' bo/ shar gyi lus 'phags zhes bya ba'i gling zheng du'ang dpag tshad brgyad stong / chur yang dag tshad brgyad stong kun nas zla ba gam pa lta bu zhig yod de/ de rigs kyi bu'am/ de rigs kyi bu mo dad pa can la las rin po che sna bdun gyis bkang ste/ rgyun du zhugs pa rnams dang / lan gcig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnams dang / phyogs bzhi'i dge slong gi dge 'dun la dbul bar byed pa dang / gang zhig de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra tsam byed du 'jug/ srog shing kha ba tsam 'dzugs su 'jug /gdugs ni rgya shug gi lo ma tsam 'gebs su 'jug cing sku gzugs nas 'bru tsam byed du 'jug /sku gdung yungs kar gyi 'bru tsam 401a @#/ /'jug par byed na/ kun dga' bo/ 'di nyid da bas bsod nams shin tu mang bar nga smra'o/ /kun dga' bo/ dzam+bu'i gling gi gling lta'ang zhog/ shar gyi lus 'phags kyi gling lta'ang zhog gi/ kun dga' bo/ nub kyi ba glang spyod ces bya ba'i gling zheng du dpag tshad dgu stong / chur yang dpag tshad dgu stong pa kun nas zla ba nya ba lta bu zhig yod de/ de rigs kyi bu'am/ rigs kyi bu mo dad pa can la las rin po che sna bdun gyis bkang ste/ rgyun du zhugs pa rnams dang / lan gcig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnams sam/ phyogs bzhi'i dge slong gi dge 'dun la 'bul bar byed pa dang / gang de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra tsam du byed du 'jug/ srog shing khab tsam 'dzugs su 'jug/ gdugs ni rgya shug gi lo ma tsam 'gebs su 'jug cing sku gzugs nas 'bru tsam byed du 'jug la/ sku gdung yungs kar gyi 'bru tsam 'jug par byed na/ kun dga' bo/ 'di nyid de bas bsod nams shin tu mang nga smra'o/ /kun dga' bo/ dzam+bu'i gling gi gling lta'ang zhog/ shar gyi lus 'phags 401b po'i gling lta'ang zhog/ nub kyi ba glang spyod kyi gling lta'ang zhog gi /kun dga' bo/ byang gi sgra mi snyan zhes bya ba'i gling zheng du dpag tshad khri/ chur yang dpag tshad khri pa kun nas gru bzhi pa zhig yod de/ de rigs kyi bu'am /rigs kyi bu mo dad pa can la las rin po che sna bdun gyis bkang ste/ rgyun du zhugs pa rnams dang / lan gcig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnams sam/ phyogs bzhi'i dge slong gi dge 'dun la 'bul bar byed pa dang / gang de bzhin gshegs pa dgra bcom pa yang dag par rdzogs pa'i sangs rgyas yongs su mya ngan 'das pa'i mchod rten 'jim pa las skyu ru ra tsam byed du 'jug/ srog shing ni khab tsam 'dzugs su 'jug/ gdugs ni rgya shug gi lo ma tsam 'gebs su 'jug cing sku gzugs nas 'bru tsam byed du 'jug la/ sku gdungs yungs kar gyi 'bru tsam 'jug par byed na/ kun dga' bo| 'di nyid de bas bsod nams shin tu mang bar nga smra'o/ /kun dga' bo/ dzam+bu'i gling gi gling lta'ang zhog/ shar gyi lus 'phags kyi gling lta'ang zhog/ nub kyi ba glang spyod kyi gling yang lta zhog/ byang gi sgra mi snyan gyi gling lta'ang zhog gi/ kun dga' bo/ lha rnams kyi dbang po brgya byin gyi khang bzang rnam par rgyal ba zhes bya ba yod de/ de rigs kyi 402a @#/ /bu'am/ rigs kyi bu mo dad pa can la las rin po che sna bdun gyis bkang ste/ rgyun du zhugs pa rnams dang / lan gcig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnams dang / phyogs bzhi'i dge slong gi dge 'dun la 'bul bar byed pa dang / gang de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra tsam byed du 'jug/ srog shing khab tsam 'dzugs su 'jug/ gdugs ni rgya shug gi lo ma tsam 'gebs su 'jug cing sku gzugs nas 'bru tsam byed du 'jug la/ sku gdung yungs kar gyi 'bru tsam 'jug par byed na/ kun dga' bo/ 'di nyid de bas bsod nams shin tu rab tu mang bar nga smra'o/ /kun dga' bo/ dzam+bu'i gling gi gling lta'ang zhog/ shar gyi lus 'phags kyi gling lta'ang zhog// nub kyi ba glang spyod kyi gling lta'ang zhog/ byang gi sgra mi snyan gyi gling lta'ang zhog/ lha rnams kyi dbang po brgya byin gyi khang bzang rnam par rgyal ba lta'ang zhog gi/ kun dga' bo| stong gsum gyi stong chen po'i 'jig rten gyi khams yod de/ de rigs kyi du'am/ rigs kyi bu mo gang la las rin po che sna bdun gyis bkang ste/ rgyun du zhugs pa rnams 402b dang / lan gcig phyir 'ong ba'i rnams dang / phyir mi 'ong ba rnams dang / dgra bcom pa rnams dang / rang sangs rgyas rnams sam/ phyogs bzhi'i dge slong gi dge 'dun la 'bul bar byed pa dang / gang zhig de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra tsam byed du 'jug/ srog shing ni khab tsam 'dzugs su 'jug/ gdugs ni rgya shug gi lo ma tsam 'gebs su 'jug cing sku gzugs nas 'bru tsam byed du 'jug la/ sku gdung yungs kar gyi 'bru tsam 'jug par byed na/ kun dga' bo/ 'di nyid de bas bsod nams shin tu rab tu mang bar nga smra'o/ /de ci'i phyir zhe na/ kun dga' bo/ 'di ltar de bzhin gshegs pa dgra bcom pa yang dag par rdzogs pa'i sangs rgyas ni sbyin pa dpag tu med pa/ tshul khrims dpag tu med pa/ bzod pa dpag tu med pa/ brtson 'grus dpag tu med pa/ bsam gtan dpag tu med pa/ shes rab dpag tu med pa/ byams pa nas/ btang snyoms kyi bar du dpag tu med de/ kun dga' bo/ de bzhin gshegs pa dgra bcom pa yang dag par rdzogs pa'i sangs rgyas ni yon tan dpag tu med pa dang ldan pa'i phyir ro/ /bcom ldan 'das kyis de skad ces bka' stsal nas tshe dang ldan pa 403a @#/ /kun dga' bo dang / dge slong de dag bcom ldan 'das kyis gsungs pa la rjes su yi rangs nas mngon par bstod do/ /khang bu brtsegs pa'i mdo rdzogs so|| ||zhus chen gyi lots+tsha ba rat+na rak+Shi tas bsgyur cing zhus te gtan la phab pa// |