//rgya gar skad du/ d+harma tsakra sU tra/ bod skad du/ chos kyi 'khor lo'i mdo/ thams cad mkhyen pa la phyag 'tshal lo/ /'di skad bdag gis thos pa'i dus gcig na/ sangs rgyas bcom ldan 'das wA ra NA si drang srong smra ba'i ri dwags kyi nags na bzhugs te/ de nas bcom ldan 'das kyis lnga sde'i dge slong rnams la bka' stsal pa/ dge slong dag/ nga sngon ma thos pa'i chos rnams la / 'di ni sdug bsngal 'phags pa'i bden pa'o zhes tshul bzhin yid la byed pa na mig skyes so/ /shes pa dang / rig pa dang / blo dang / rtogs pa skyes so/ /dge slong dag /nga sngon ma thos pa'i chos rnams la/ 'di ni sdug bsngal lo/ /'di ni sdug bsngal kun 'byung ba'o/ /'di ni sdug bsngal 'gog pa'o/ /'di ni sdug bsngal 'gog par 'gro ba'i lam mo zhes tshul bzhin yid la byed pa na mig skyes so/ /shes pa dang / rig pa dang / blo dang / rtogs pa skyes so/ /dge slong dag /nga sngon ma thos pa'i 420b chos rnams la sdug bsngal 'phags pa'i bden pa de ngas mngon par shes pas yongs su shes par bya'o zhes tshul bzhin yid la byed pa na mig skyes so/ /shes pa dang / rig pa dang / blo dang / rtogs pa skyes so/ /dge slong dag /nga sngon ma thos pa'i chos rnams la sdug bsngal kun 'byung ba 'phags pa'i bden pa de ngas mngon par shes pas spang bar bya'o zhes tshul bzhin yid la byed pa na mig skyes so/ /shes pa dang / rig pa dang / blo dang / rtogs pa skyes so/ /dge slong dag /nga sngon ma thos pa'i chos rnams la sdug bsngal 'gog pa shes pa 'phags pa'i bden pa de ngas mngon par shes pas mngon sum du bya'o zhes tshul bzhin yid la byed pa na mig skyes so/ /shes pa dang / rig pa dang / blo dang / rtogs pa skyes so/ /dge slong dag /nga sngon ma thos pa'i chos rnams la sdug bsngal 'gog par 'gro ba'i lam 'phags pa'i bden pa de ngas mngon par shes pas bsgom par bya'o zhes tshul bzhin yid la byed pa na mig skyes so/ /shes pa dang / rig pa dang / blo dang / rtogs pa skyes so/ /dge slong dag/ nga sngon ma thos pa'i chos rnams la sdug bsngal 'phags pa'i bden pa de ngas mngon par shes pas yongs su shes so zhes tshul bzhin yid la byed pa na mig skyes so/ /shes pa dang / rig 421a @#/ /pa dang / blo dang / rtogs pa skyes so/ /dge slong dag /nga sngon ma thos pa'i chos rnams la sdug bsngal kun 'byung ba 'phags pa'i bden pa de ngas mngon par shes pas spangs so zhes tshul bzhin yid la byed pa na mig skyes so/ /shes pa dang / rig pa dang / blo dang / rtogs pa skyes so/ /dge slong dag /nga sngon ma thos pa'i chos rnams la sdug bsngal la 'gog pa shes pa'i 'phags pa'i bden pa de ngas mngon par shes pas mngon sum du byas so zhes tshul bzhin yid la byed pa na mig skyes so| |shes pa dang / rig pa dang / blo dang / rtogs pa skyes so/ /dge slong dag /nga sngon ma thos pa'i chos rnams la sdug bsngal 'gog par 'gro ba'i lam 'phags pa'i bden pa de ngas mngon par shes pas bsgoms so zhes tshul bzhin yid la byed pa na mig skyes so/ /shes pa dang / rig pa dang / blo dang / rtogs pa skyes so| |dge slong dag /nga ji srid du 'phags pa'i bden pa bzhi po 'di rnams la de ltar lan gsum du bzlas te rnam pa bcu gnyis su bskor ba'i mig ma skyes/ shes pa ma yin/ rig ba ma yin/ blo ma yin/ rtogs pa ma skyes pa de srid du/ nga lha dang bcas pa'i 'jig rten bdud dang bcas/ tshangs pa dang bcas dge sbyong dang 421b bram zer bcas pa'i skye dgu dang / lha dang / mir bcas pa 'di las grol ba dang / nges par 'byung ba dang mi ldan pa dang / rab tu grol ba dang / phyin ci log dang bral ba'i sems kyis mang du gnas par ma gyur cing / dge slong dag/ ngas bla na med pa yang dag par rdzogs pa'i byang chub mngon par rdzogs par sangs rgyas so zhes bya bar ma shes so| |dge slong dag /ngas gang nas 'phags pa'i bden pa bzhi po 'di rnams la de ltar lan gsum du bzlas te/ rnam pa bcu gnyis su bskor ba'i mig skyes shing / shes pa dang / rig pa dang / blo dang / rtogs pa skyes pa de nas nga lha dang bcas pa'i 'jig rten/ bdud dang bcas/ tshangs pa dang bcas/ dge sbyong dang / bram zer bcas pa'i skye dgu dang / lha dang / mir bcas pa 'di las grol ba dang / nges par 'byung ba dang mi ldan pa dang / rab tu grol ba dang / phyin ci log dang bral ba'i sems kyis mang du gnas par gyur cing / dge slong dag /ngas de nas bla na med pa yang dag par rdzogs pa'i byang chub mngon par rdzogs par sangs rgyas so zhes bya bar shes so/ /chos kyi rnam grangs de bka' stsal pa na tshe dang ldan pa kauN+Di n+yi dang / lha brgyad khri chos rnams la chos kyi mig rdul med cing dri ma dang bral ba skyes so/ /de nas bcom ldan 'das 422a @#/ /kyis tshe dang ldan pa kauN+Di n+ya la bka' stsal pa/ kauN+Di n+ya/ khyod kyis chos kun shes sam/ bcom ldan 'das/ kun 'tshal lo/ /kauN+Di n+ya/ khyod kyis kun shes sam/ kun shes sam/ bde bar gshegs pa/ kun 'tshal lags so/ /kun 'tshal lags so/ /tshe dang ldan pa kauN+Di n+yas chos kun shes pas de'i phyir tshe dang ldan pa kauN+Di n+ya kun shes kauN+Di n+ya zhes tshig bla dwags su btags so/ /tshe dang ldan pa kauN+Di n+yas chos kun shes so zhes sa bla'i gnod sbyin rnams sgra sgrogs par byed de/ grogs po dag/ bcom ldan 'das kyis wA ra NA sir drang srong smra ba'i ri dwags kyi nags su lan gsum bzlas te rnam pa bcu gnyis su chos kyi 'khor lo chos dang ldan pa dge sbyong ngam/ bram ze'am/ lha'am/ bdud dam/ tshangs pa'am/ sus kyang 'jig rten du chos dang mthun par ma bskor ba/ skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang / mi rnams kyi don dang / phan pa dang / bde ba'i phyir bskor bas lha'i ris mngon par 'phel zhing lha ma yin gyi ris yongs su nyams so zhes dbyangs sgrags so/ /sa bla'i gnod sbyin rnams kyi sgra thos nas nam mkha' la rgyu ba'i gnod sbyin dang / rgyal chen bzhi po'i 422b ris dang / sum cu rtsa gsum po'i lha dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rnams nas/ skad cig de dang / thang cig de dang / yud tsam de dang / skad cig dang / thang cig dang / yud tsam de la tshangs pa'i 'jig rten gyi bar du sgra sgrags so/ /tshangs ris kyi lha rnams kyis kyang sgra sgrogs par byed de/ grogs po dag /bcom ldan 'das kyis wA ra NA sir drang srong smra ba'i ri dwags kyi gnas su lan gsum du bzlas te rnam pa bcu gnyis kyi chos kyi 'khor lo chos dang ldan pa dge sbyong ngam/ bram ze'am/ lha'am/ bdud dam/ tshangs pa'am/ sus kyang 'jig rten du chos dang mthun par 'ga' yang ma bskor ba/ skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang / mi rnams kyi don dang / phan pa dang / bde ba'i phyir bskor bas lha'i ris mngon par 'phel zhing lha ma yin gyi ris yongs su nyams so zhes dbyangs bsgrags so/ /bcom ldan 'das kyis wA ra NA sir drang srong smra ba'i ri dwags kyi nags su lan gsum du bzlas te rnam pa bcu gnyis su chos kyi 'khor lo chos dang ldan pa bskor bas de'i phyir chos kyi rnam grangs 'di la chos kyi 'khor lo bskor ba zhes tshig bla dwags su btags so/ /chos kyi 'khor 423a @#/ /lo'i mdo rdzogs so// |