rKTs


H352

(e-text produced by ACIP)

see text in Tibetan script
446a
||rgyar skad du/ AR+Ya dz+nyA na ka sU tra bud d+d+hA a ba dA na/ bod skad du/ 'phags pa sangs rgyas kyi rtogs pa brjod pa/ shes ldan gyi mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus cig na bcom ldan 'das yum gyi don du lha rnams kyi gnas su sum cu rtsa gsum na/ shing yongs 'dus brtol gyi drung na/ la ba dkar po lta bu'i rdo leb la bzhugs so/ /der lha'i bu zhig la 'chi ba'i snga ltas ngan pa lnga byung ste/ phreng rgyan rnyis pa dang / gos rnyings pa dang / lus dri nga bar gyur pa dang / mchan khung nas rdul 'dzag pa dang / rang gi stan la dga' ba med par gyur to/ /skye ba yang mthong ste/ yangs pa'i phag gi mngal du skye ba mthong ngo / /des de mthong nas mya ngan gyis thebs/ smre sngags 'don/ brang rdung zhing du la/ shin tu mong mong por gyur to/ /de nas lha'i bu gzhan zhig/ lha'i bu de ga la bder song song ste/ 'di skad ces smras so/ /lha'i bu/ khyod 'chi bas 'jigs sam/ smras pa/ lha'i bu/ bdag 'chi bas 'jigs so/ /lha'i bu/ de ci'i phyir zhe na/ bdag lha rnams kyi nang du sum cu rtsa gsum 'dir lha'i bza' ba ni zos/ lha'i btung ba ni 'thungs/ lha'i bgo ba ni bgos na/ de nas phyir yangs pa'i phag gi mngal du skye ba mthong ste/ der bdag
446b
bshang ba za zhing mtshon gyi 'chi bar 'gyur te/ lha'i bu/ de lta bas na bdag 'chi bas 'jigs so/ /smras pa/ lha'i bu/ khyod 'chi bas ma 'jigs shig/ de ci'i phyir zhe na/ lha'i bu/ 'di ltar de bzhin gshegs pa dgra bcom pa yang dag par rdzogs pa'i sangs rgyas bcom ldan 'das de/ yum gyi don du sum cu rtsa gsum gyi gnas 'di na/ shing yongs 'dus brtol gyi drung na/ la ba dkar po lta bu'i rdo leb la bzhugs te/ ji ste lha'i bu khyod kyis bcom ldan 'das de la phyag 'tshal dang / bcom ldan 'das de 'dir gshegs te/ des khyod ngan song rnams las grol bar mdzad do/ /de ci'i phyir zhe na/ lha'i bu/ sangs rgyas bcom ldan 'das ni thugs rje chen pos sems can yongs su ma btang ba yin no/ /de nas lha'i bu de stan las langs te/ bla gos phrag pa gcig tu gzar nas/ pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas ched du brjod pa 'di ched du lan gsum brjod de/ bcom ldan 'das de bzhin gshegs pa la phyag 'tshal lo/ /bcom ldan 'das de bzhin gshegs pa la phyag 'tshal lo/ /bdag la thugs brtse ba'i slad du bcom ldan 'das de 'dir gshegs su gsol/ bdag ngan song du skye ba rnams las grol bar mdzad du gsol/ de nas bcom ldan 'das kyis lha'i bu de'i lhag pa'i bsam pa thugs su chud
447a
@#/ /nas/ lha'i bu de ga la ba der gshegs te/ gdan bshams pa de la bzhugs so/ /bzhugs nas bcom ldan 'das kyis lha'i bu de la 'di skad ces bka' stsal to/ /lha'i bu/ khyod 'chi bas 'jigs sam/ gsol pa/ bcom ldan 'das/ bdag 'gum pas 'jigs lags so/ /de ci'i slad du zhe na/ yangs pa'i phag gi mngal mi sdug par skye ba mthong lags te/ der bdag skyes nas bshang ba 'tshal zhing mtshon gyis 'gum par 'gyur lags te/ bcom ldan 'das/ de'i slad du bdag 'gum pas 'jigs lags so/ /de nas bcom ldan 'das kyis lha'i bu de la 'di skad ces bka' stsal to/ /lha'i bu/ khyod 'chi bas ma 'jigs shig/ de ci'i phyir zhe na/ lha'i bu/ sa'i khams dang / chu'i khams mi 'gro mi 'ong gi bdag nyid kyi las kyis 'ong zhing 'gro ste/ lha'i bu/ khyod tshur shog/ sangs rgyas la skyabs su song zhig/ chos dang / dge 'dun la skyabs su song zhig/ de nas lha'i bu de stan las langs te/ bcom ldan 'das la 'di skad ces gsol to/ /bcom ldan 'das/ de ltar 'tshal lo/ /bdag sangs rgyas la skyabs su mchi'o/ /chos dang dge 'dun la skyabs su mchi'o/ /de nas bcom ldan 'das kyis lha'i bu de la tshigs su bcad de bka' stsal pa/ gang zhig sangs rgyas la ni skyabs song ba/ /de ni ngan 'gror 'dir
447b
ni mi 'gro ste/ /lha yi bdag nyid dngos po spangs nas su/ /mi yi bdag nyid dngos po len par 'gyur/ /de nas bcom ldan 'das kyis lha'i bu de la chos dang ldan pa'i gtam yang dag par bstan/ yang dag par 'dzin du bcug/ yang dag par gzengs bstod/ yang dag par dga' ba'i bar du mdzad nas/ gdan las bzhengs te bzhud do/ /bcom ldan 'das bzhud nas ring po ma lon par lha'i bu de 'chi ba'i dus byas so/ /dus byas nas de ma thag tu yangs pa der tshong dpon zhig gi chung ma dam pa'i mngal du skyes so/ /de zla ba dgu 'das nas/ khye'u gzugs bzang ba mdzes pa/ blta na sdug pa/ kha dog bzang po/ rgyas pa mchog dang ldan pa zhig btsas par gyur to/ /de btsas ma thag tu tshig 'di skad ces sangs rgyas la phyag 'tshal lo/ /chos la phyag 'tshal lo/ /dge 'dun la phyag 'tshal lo zhes brjod do/ /de nas de'i pha dang / ma 'di snyam du sems te/ khye'u 'di ni sangs rgyas shes/ chos shes/ dge 'dun shes te/ 'di ni shes pa dang ldan no snyam du 'du shes skyes so/ /de nas khye'u shes ldan gang gi tshe/ lo brgyad lon pa lta bur gyur pa de'i tshe/ li tsa ba'i gzhon nu rab tu mang po rnams kyis lhan cig tu mdun du bdar nas skyed mos tshal gyi bzhi mdo nas byung ngo / /de'i tshe bcom ldan 'das yangs pa'i tshal chen po na khang pa brtsegs pa'i khang bzang na bzhugs
448a
@#/ /te| de nas bcom ldan 'das snga dro'i dus kyi tshe/ smad g.yogs dang / chos gos gsol/ lhung bzed bsnams te/ yangs par bsod snyoms la phyir gshegs so// bcom ldan 'das de mdzes pa nas/ 'dod dang ldan pa'i bar du gyur pa/ khye'u shes ldan gyis mthong ngo / /mthong nas de bcom ldan 'das la sems rab tu dga' bar gyur to/ /sems dga' nas bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag btsal te lan gsum bskor ba byas nas/ phyogs gcig tu 'dug go/ phyogs gcig tu 'dug nas khye'u shes ldan gyis bcom ldan 'das la tshigs su bcad de gsol pa/ bdag gi sngon gyi tshe dran te/ /sdug bsngal rnams las rab bkrol zhing / / ngan song ltung ba las ni bdag /'jig rten mgon gyis grol bar mdzad/ /mi mchog thugs ni brtser dgongs te/ /bsod snyoms 'di ni bzhes par mdzod/ /bdag gis gdugs tshod 'di dag ni/ /grol bar mdzad nas deng bzhes la/ /sang ni bdag gi pha ma yi/ /sdum par 'dren pas brtser dgongs te/ /dge slong kun dang thabs gcig tu/ /gdugs tshod dag ni gsol bar mdzod/ /bcom ldan 'das cang mi gsungs par gyur pas/ khye'u shes ldan gyis gsol pa gnang ngo / /de nas khye'u shes ldan bcom ldan 'das cang mi
448b
gsung bas gnang bar rig nas/ pha ma ga la ba der song ste/ pha ma la 'di skad ces smras so/ /yab yum/ bdag gis ni bcom ldan 'das la bsod snyoms phul lags te/ sang yang gdugs tshod la spyan drangs so/ /de nas khye'u shes ldan gyi pha ma mgu zhing dga' la/ yid rangs shing rab tu dga' ste/ dga' ba dang / yid bde ba skyes nas/ de'i mtshan mo bza' ba dang / bca' ba ro dang ldan pa zhim pa mang po mngon par bshams nas yangs pa'i grong khyer chen po thams cad phyag dar byas te/ dar gyi lda ldi btags/ pog phor nas spos kyis bdugs/ spos chus chag chag btab/ me tog gis mdzes par bkram ste/ de'i mtshan mo 'das nas dus la bab pa dang / bcom ldan 'das ga la ba der song ste/ btsun pa bcom ldan 'das/ gdugs tshod la bab ste/ gdugs tshod sbyar lags so zhes gsol to/ /de nas bcom ldan 'das de'i snga dro smad g.yogs dang / chos gos gsol/ lhud bzed bsnams nas/ dge slong gi tshogs kyis mdun du bdar cing / dge slong gi tshogs kyis yongs su bskor te/ shes ldan gyi pha ma'i khyim ga la ba der gshegs nas gdan bshams pa de la bzhugs so| |de nas khye'u shes ldan bcom ldan 'das dge slong gi dge 'dun dang gdan la bzhugs par rig nas/ rang gi lag gis bza' ba dang / bca' ba ro dang ldan pa zhim zhing mang
449a
@#/ /bdag legs par brims/ legs par gsol to/ /bcom ldan 'das gdugs tshod gsol bar rig nas/ so so so so la ras bcos bu zung dang / so so la lham zung dag phul lo/ /bcom ldan 'das la chos gos sar pa gsum dang / chag sar pa zung dag gsol to/ /gser gyi me tog dang / dngul gyi me tog rnams kyis gtor to| |gang mngon par gtor ba de dag gtor ma thag tu sangs rgyas kyi mthus bcom ldan 'das kyi spyi gtsug gi thad kar khang pa brtsegs pa bkra ba/ blta na sdug pa/ gru bzhi ba/ gnas bzhi dang ldan pa zhig 'dug par gyur to/ /khang pa brtsegs pa der de bzhin gshegs pa'i sku skyil mo krung bcas te chos 'chad cing bzhugs pa des mthong ngo / /de nas khye'u shes ldan gyis/ bcom ldan 'das kyis gzugs dang / rdzu 'phrul dang / cho 'phrul bsam gyis mi khyab pa de 'dra ba mthong nas/ mgu zhing dga' ba nas yid bde ba skyes pa'i bar du gyur nas/ bcom ldan 'das la 'di skad ces gsol to/ /bcom ldan 'das/ bdag gi dge ba'i rtsa ba 'di bla na ma mchis pa yang dag par rdzogs pa'i byang chub tu bsngo ste/ dge ba'i rtsa ba des na/ bdag da ltar gyi bcom ldan 'das bzhin du sangs rgyas su gyur cig /chos ston par yang gyur cig /dge 'dun yongs su skyong bar yang
449b
gyur cig/ de nas bcom ldan 'das kyis khye'u shes ldan gyi lhag pa'i bsam pa thugs su chud de/ 'dzum pa mdzad pa nas spyi bo'i gtsug gi nang du nub pa'i bar du mdzad pa/ tshe dang ldan pa kun dga' bos mthong ste/ don med pa mi mdzad do snyam pa'i bar du'o/ /de nas bcom ldan 'das kyis tshe dang ldan pa kun dga' bo la tshigs su bcad de slar bka' stsal pa/ kun dga' 'di lta shes ldan gyis ni de bzhin gshegs pa mchod pas na/ /bskal pa bye ba dgu bcu dag tu log par ltung bar mi 'gyur la/ /de nas de ma thag tu rnam par 'dren par nye bar skye 'gyur te/ mtshan ni mkhyen gtso rgyal po zhes bya sangs rgyas 'jig rten 'byung bar 'gyur/ /sangs rgyas kyi ni rtogs pa brjod pas mkhas rnams yang dag dga' byed cing / /mi yi mkhas pa gang gis thos nas dge ba mang po byed 'gyur te/ /rgya mtsho mthas gtugs dpag med lta bu'i de bzhin gshegs pa sangs rgyas la/ /rab tu dang bas yon rnams phul ba'i 'bras bu chung bar mi 'gyur ro/ /bcom ldan 'das kyis de skad ces bka' stsal nas/ khye'u shes ldan dang / dge slong de dag dang / lha dang bcas pa'i 'jig rten yid rangs te/ bcom ldan 'das kyis gsungs pa la mngon par bstod do/ /'phags pa sangs rgyas kyi rtogs pa brjod pa shes ldan gyi mdo rdzogs so// //rgya gar gyi mkhan po bid+yA ka ra sid ha dang / sarba dz+nyA
450a
@#/ /de ba dang / zhus chen gyi lo tsA ba ban+de dpal brtsegs kyis bsgyur cing zhus te gtan la phab pa//