//rgya gar skad du/ shrI dz+nyA na gar+b+ha nA ma yo gi nI ma hA tan+t+ra rA dza ya ti rA dza/ bod skad du/ dpal ye shes snying po zhes bya ba rnal 'byor ma chen mo'i rgyud kyi 473a @#/ /rgyal po'i rgyal po/ /dpal rdo rje sems dpa' la phyag 'tshal lo/ /'di skad bdag gis thos pa'i dus gcig na/ bcom ldan 'das ri rab kyi rtse mor bye ba phrag bdun cu rtsa gnyis kyi grangs kyi mkha' 'gro dang / mkha' 'gro mas yongs su bskor nas b+ha gu la chen po'i skyed mos tshal na bzhugs so/ /der bcom ldan 'das kyis lha mo legs dgyes dbang mo dang lhan cig rol pa mdzad pa'i tshe rje btsun la ba spu langs so/ /de'i dus su bcom ldan 'das ma legs dgyes kyi sbyor ba las langs te/ lan gsum du bskor ba byas nas zhabs la mgo bos phyag btsal te/ 'di skad ces gsol to/ /kye bcom ldan 'das/ ci'i phyir nyid kyi sku la ba spu langs lags/ bcom ldan 'das kyis bka' stsal pa/ kye bcom ldan 'das ma/ de dgos pa ci zhig yod/ gang gi don gyi phyir nga'i sku la ba spu langs pa de ni/ gsang ba chen po'o/ /bcom ldan 'das mas gsol pa/ gsang ba chen po lags mod kyang mchog gi dbang phyug bka' stsol cig /bcom ldan 'das kyis bka' stsal pa/ nga yis legs dgyes kyi bde ba nyams su myong zhing steng dang 'og gnas pa'i skyed byed ma rnams la 'dus pa las ba spu langs so/ /bcom ldan 'das ma sa gsol pa/ steng dang 'og na gnas pa'i dga' pa 473b skyed byed ma rnams la 'dus pa ji ltar lags/ bcom ldan 'das kyis bka' stsal pa/ steng dang 'og na gnas pa'i dga' ba skyed byed ma rnams la gang zhig 'dus pa de ci'i phyir mi shes so/ /bcom ldan 'das mas gsol pa/ bcom ldan 'das/ de skad du de ltar ni lags mod kyi/ 'on kyang mi shes pa'i phyir bcom ldan 'das kyi drung du bdag gis ni zhus so/ /bcom ldan 'das kyis bka' stsal pa/ /'di ni/ so so rang gi nyams su myong ba yin mod kyang / 'on kyang khyod kyi ngor ngas bshad par bya ste/ dga' bral gyi dga' ba 'byung ba'i stong phrag bdun cu rtsa gnyis kyi bdag nyid kyi rtsa yi dra ba 'dar zhing g.yos pa tsam gyis tshul shar ro/ /tshul shar bas thig le'i rgyal po zhu'o/ /thig le'i rgyal po zhu pa las steng dang 'og na gnas pa'i dga' ba skyed byed ma rnams la 'dus pa'o/ /de skad ces thos nas bcom ldan 'das kyi zhabs la mgo bos phyag 'tshal te dam du 'khyud pa byas nas ma mchu'i bdud rtsi'i btung bas dgyes par byas te phyin nas yang zhu ba mdzad do/ /kye bcom ldan 'das/ dga' bral gyi dga' pa'i dus su 'dus pa lags na/ de la sbyor ba med pa gang gi dus lags/ bcom ldan 'das kyis bka' stsal pa/ dris pa yang dag dgyes pa mchog /sangs rgyas rnams kyis rnyed dka' ba/ /dga' bral dus su sbyor ba med// 474a @#/ /de ni dga' bral dga' ba min/ /bcom ldan 'das mas gsol pa/ kye bcom ldan 'das/ dga' bral gyi dga' ba dang / dga' bral la khyad par ci lags/ bcom ldan 'das kyis bka' stsal pa/ dga' mo/ khyod ci'i phyir de skad ces smra/ dga' bral gyi dga' ba dang / dga' bral gnyis la khyad par cher yod pa de brjod par bya'o/ /gang zhig dga' bral gyi dga' ba de zhu ba gnas pa ste/ 'pho ba la sogs pa dang bral ba'o/ /gang zhig dga' bral de ni/ dga' ba dang bral ba 'pho zhing 'jig pa'o/ /dga' bral gyi dga' ba ni/ zhu ba gnas pa ste/ 'pho ba la sogs pa dang bral ba'i phyir rang gis nyams su myong ba'i ngo bo'o/ /bcom ldan 'das mas gsol pa| rang gi nyams su myong ba'i mtshan nyid dga' bral gyi dga' ba dang / lhan cig skyes pa'i dga' ba'i khyad par ci lags/ bcom ldan 'das kyis bka' stsal pa/ lhan cig skyes pa'i dga' ba ni/ dngos po yang ma yin/ dngos po ma yin pa yang ma yin/ gsang ba yang ma yin/ ye shes kyang ma yin/ ye shes las byung ba yang ma yin/ srid pa yang ma yin/ mya ngan las 'das pa yang ma yin/ char yang ma yin/ thig le yang ma yin/ tshul yang ma yin/ tshul tsam yang ma yin/ mchog kyang ma yin/ gzhan 474b mchog kyang ma yin/ shar ba yang ma yin/ nub pa yang ma yin/ gzugs kyang ma yin/ sgra yang ma yin/ dri yang ma yin/ ro yang ma yin/ reg bya yang ma yin/ yi ge yang ma yin/ rten yang ma yin/ brten pa yang ma yin/ khams kyang ma yin/ shes rab kyang ma yin/ thabs kyang ma yin/ thim pa yang ma yin/ longs spyod kyang ma yin/ dbang yang ma yin/ sprul pa yang ma yin/ chos kyang ma yin/ longs spyod kyang ma yin/ lus kyang ma yin/ ngag kyang ma yin/ yid kyang ma yin/ rnam pa thams cad dang rnam par bral ba/ mi bzad pa/ dri ma med pa/ skye ba med pa/ 'gag pa med pa/ rtag tu shar ba'o/ /bcom ldan 'das mas gsol pa/ de lta bu'i lhan cig skyes pa'i dga' ba gang las rnyed/ bcom ldan 'das kyis bka' stsal pa| dga' bral gyi dga' ba nyams su myong ba las rnyed de/ de bzhin du bsam gtan la sogs pas ma yin no/ /bcom ldan 'das mas gsol ba/ lhan cig skyes pa'i dga' ba de| dga' bral gyi dga' ba'i nyams su myong ba'i rgyu lags sam/ 'bras bu lags/ bcom ldan 'das kyis bka' stsal pa/ lhan cig skyes pa'i dga' ba'i rgyu yin te/ 'bras bu ni| ma yin no/ /bcom ldan 'das mas gsol pa/ lhun gyis grub pa'i lhan cig skyes pa'i dga' ba 'byung ba la rgyu'i dngos pos dgos pa ci mchis/ rang bzhin med pa'i 475a @#/ /phyir ro| |ji ltar sreg pa la dud pa bzhin no/ /bcom ldan 'das kyis bka' stsal pa/ de skad du smra ba ni/ tshad ma ma yin te/ dang por sreg pa med par der dud pa 'byung ba gang las 'ong / de lta bu'i rigs las lhan cig skyes pa'o/ /bcom ldan 'das mas gsol pa/ de ltar lags na lhan cig skyes pa las dga' bral gyi dga' ba ni/ rgyu yang yin la 'bras bu yang yin na/ 'on kyang 'dir rgyu ni/ gnyis su dbye ba dang / 'bras bu yang gnyis su dbye ste/ gsal ba'i rgyu dang / 'byung ba'i rgyu'o// 'bras bu yang de bzhin no/ /bcom ldan 'das mas gsol pa/ kye bcom ldan 'das/ gsal ba'i rgyu ci 'dra ba dang / 'byung ba'i rgyu ci 'dra ba bstan du gsol/ bcom ldan 'das kyis bka' stsal pa/ gsal ba'i rgyu ni/ dga' bral gyi dga' ba ste/ ji ltar mar me bzhin no/ /'byung ba'i rgyu ni/ dga' pa las mchog gi dga' ba ste/ ji ltar sa bon las myu gu bzhin no/ /dga' bral gyi dga' ba ni/ gzhan rnams dang mi 'dra ba'i phyir 'byung ba'i rgyu ma yin te/ dga' ba gzhan dang mi 'dra ba las 'byung ba yin no| |dpal ye shes snying po las/ lhan cig skyes pa'i dga' ba'i don zhes bya ba'i le'u ste dang po'o// //bcom ldan 'das mas gsol pa/ gang zhig 475b dpal phyag rgya chen po'i thig le'i rgyud kyi rgyal po las phyag rgya chen po'i don bstan pa de thob par bya ba'i don du de'i thabs bcom ldan 'das kyis bdag la bka' stsal du gsol bcom ldan 'das kyis bka' stsal pa/ khyod kyis bdag la zhus pa gang / /nyon cig lha mo rab tu bshad/ /phyag rgya chen po ni/ 'dir bzhir dbye ba ste/ las kyi phyag rgya dang / dam tshig gi phyag rgya dang / ye shes kyi phyag rgya dang / chos kyi phyag rgya'o/ /gang zhig las kyi phyag rgya ni/ snang ba'i rang bzhin dga' ba'i lo dang ldan pa'o/ /gang zhig dam tshig gi phyag rgya de ni/ snang ba mched pa'i rang bzhin skye mched kyi lo dang ldan pa'o/ /gang zhig ye shes kyi phyag rgya de ni/ snang ba thob pa'i rang bzhin khams kyi lo dang ldan pa'o/ /gang zhig chos kyi phyag rgya de ni/ 'od gsal gyi rang bzhin no/ /phyag rgya chen po de yang 'od gsal ma yin pa gzhan las mi rnyed do/ /bcom ldan 'das mas gsol pa/ bcom ldan 'das/ 'od gsal zhes bgyi pa ji ltar lags/ gang du gnas pa yin/ bcom ldan 'das kyis bka' stsal pa/ 'od gsal ni/ nam mkha'i dbus su gnas pa'i thig le'i ngo bo ste| des ni/ phyag rgya chen po rnyed par 'gyur ro/ /bcom ldan 'das mas gsol pa/ re zhig 'od gsal ni/ ji ltar rnyed pa lags/ bcom ldan 'das kyis bka' stsal pa 476a @#/ /las dang dam tshig dang ye shes dang chos kyi phyag rgyas so/ /bcom ldan 'das mas gsol pa/ phyag rgya rnams nyid ni/ gang las rnyed par 'gyur lags bcom ldan 'das kyis bka' stsal pa/ dbang bskur ba'i phyi'i phyag rgya la brten nas nang gi phyag rgya rnams rnyed do/ /bcom ldan 'das mas gsol pa/ phyi dang nang gi phyag rgya de gnas gang du gnas par 'gyur/ mtshan ni/ ji lta bu/ rang gi ngo bo ni/ ji lta bu/ der dbang ni/ ji lta bu lags/ bcom ldan 'das kyis bka' stsal pa/ 'dir dbang ni| bzhi ste/ slob dpon dang / gsang ba dang / shes rab ye shes dang / de ltar de bzhin bzhi pa'o/ /slob dpon gyi dbang ni/ dga' ba'i lo dang ldan pa gzhon nu ma la rdo rje dang dril bu mnyam par ldan pas nu ma dang 'dza' gu ni reg par byas pas so/ /gsang ba'i dbang ni/ skye mched kyi lo dang ldan pa'i gzhon nu ma la nang gi rkan yongs su 'jibs pa las so/ /shes rab ye shes ni/ khams kyi lo dang ldan pa'i gzhon nu ma la lhan cig srub dang srub pa'i thabs chen po las zhu ba 'pho ba'i dus su ye shes nyams su myong bas so/ /de ltar de bzhin bzhi pa ni/ shes rab ye shes de nyid brtan par byed pa ste/ de'i phyir de ltar de bzhin zhes bstan pa yin no/ /brtan par byas pa tsam gyis 476b drug cu rtsa bzhi 'dab ma'i nang du phyag rgya bzhi mnyam par sbyor bar 'gyur ba yin no/ /de yang 'jug pa dang / gnas pa dang / 'gro ba dang / rten pa'i ngo bos so/ /'jug pa ni/ gtum mo'o| |gnas pa ni/ rang bzhin gyi rtog pa med pa'o/ /'gro ba ni/ phyag dong ma'i rtsa'o/ /rten pa'i ngo bos sgrog ma'i rtsa'o/ /don dam par phyag rgya chen po gcig pu ste/ 'on kyang las kyi rang bzhin gyis bzhir dbye'o/ /bcom ldan 'das mas gsol pa/ bcom ldan 'das/ de rnams la las kyi rang bzhin gyi bye brag ji ltar lags/ bcom ldan 'das kyis bka' stsal pa/ zhi ba dang / rgyas pa dang / dbang dang / drag po ste/ las kyi bye brag gis phyag rgya chen po thob pa'o/ /bcom ldan 'das mas gsol pa/ bcom ldan 'das/ zhi ba dang / rgyas pa dang / dbang dang / drag po rnams kyi ming dang / spyod pa ji ltar lags/ bcom ldan 'das kyis bka' stsal pa/ zhi ba ni/ dgod pa'o/ /rgyas pa ni/ lta ba'o/ /dbang ni/ lag pas 'khyud pa'o/ /drag po ni/ gnyis kyi gnyis snyoms par 'jug pa'o/ /de rnams la spyod pa'i tshangs pa'i gnas pa'i spyod pa dang / brtul zhugs chen po'i spyod pa dang / gos bral gyi brtul zhugs kyi spyod pa dang / rang dbang gi spyod pas so/ /dpal ye shes snying po las/ phyag rgya chen po dang / dbang bskur ba'i don zhes bya ba'i le'u ste gnyis pa'o// // 477a @#/ /bcom ldan 'das mas gsol ba/ dbang bskur ba'i dus su dkyil 'khor rnams ji lta bu/ slob dpon ni/ ji lta bus bya/ bcom ldan 'das kyis bka' stsal pa/ slob dpon gyi dbang bskur ba'i dus su rdul tshon la sogs pa'i dkyil 'khor ro/ /gsang ba'i dbang la bla ma la dbul ba'i dkyil 'khor ni/ rang byung gi me tog dang ldan pa'i me tog gis so/ /shes rab ye shes kyi dbang gi dus su byang chub kyi sems dang ldan pa'i bzhi mnyam gyis so/ /bzhi pa'i dus su gzhan ma yin pa byang chub kyi sems 'ba' zhig dkyil 'khor gyis so/ /de la slob dpon ni/ mtshan thams cad kyis brgyan pa dang / rgyud thams cad mkhyen pa dang / dbang bskur ba la mkhas pa dang / thugs rje dang ldan pa dang / rgya che ba la mos pa dang / sngags la sogs pa dang / rab tu sbyor ba la mkhas pa dang / dngos grub thob pa'i slob dpon la sogs pas dbang bskur ba dang / dngos grub thob pa'i bla ma'i bka'i gnang ba thob pa dang / yang na rang nyid dngos grub thob pa des ni/ dkyil 'khor dang / dbang bskur ba'i rim pa dang| sgrub thabs la sogs pa bya'o/ /de bzhin du rtog ge pa la sogs pas ni/ ma yin no/ /bcom ldan 'das mas gsol pa/ kye bcom ldan 'das slob dpon gyi ni dbang 477b bskur pa'i/ /dkyil 'khor mtshan ma ji ltar lags/ /dkyil 'khor gyi ni tshad ji tsam/ /gtso bo bdag po yang ni gang / /ngo bo gang gis slob ma gzung / /las kyi slob dpon ji lta bu| |mchod pa rnams ni ji ltar lags/ /bla ma'i yon ni ji ltar lags/ /bcom ldan 'das kyis bka' stsal pa/ /khyod kyis bdag la gang zhus pa/ /lha mo nyon cig bdag gis bshad| |mtshan ma'i slob ma'i mos pas so/ /yang na ji ltar dkyil 'khor gyi/ /slob dpon gyi yid dpa'o/ /de bzhin mthe bo'i sor gsum lhag pa'i khru phyed dang do'i dkyil 'khor bya'o/ /de ni/ re zhig mtshan ma'i dkyil 'khor yin te/ de'ang rnal 'byor ma'i rgyud kyi go rim gyis bya'o/ /de yang yan lag thams cad tshang ba'o/ /de yi dbus su nyi ma'i dkyil 'khor bri'o/ /de'i steng du sna tshogs rdo rje ste/ sna tshogs rdo rje'i lte ba'i nang du hUM gaM rnam pa/ phyi rol tu sna tshogs pad+ma 'dab ma brgyad dang ldan pa/ rdo rje'i phreng bas rnam par brgyan par bya'o/ /de'i shar gyi 'dab ma la 'khor lo mdog dkar po dang / lhor rin po che mdog ser po dang / nub tu pad+ma mdog dmar po dang / byang du ral gri mdog ljang gu dang / me'i mtshams su rin po che'i shing dang / chu'i mtshams su ze'u 'bru dang / rlung gi mtshams su rgyal mtshan dang / dbang ldan gyi mtshams su ka pA la'o/ /shar sgor rdo rje lcags kyu dang / lhor zhags pa 478a @#/ /dang / nub tu rdo rje lcags sgrog dang / byang du rdo rje dril bu'o/ /mtshams rnams su me tog gi chun 'phyang dang / bdug spos kyi reng bu dang / mar me dang / dri'i dung chos so| |de'i phyi rol tu rdo rje phreng ba'o/ /sna tshogs rdo rje'i lte ba'i nang du hUM gi rnam pa yongs su gyur pa las rdo rje 'dzin pa chen po zhal gsum pa/ spyan gsum pa/ phyag bzhi pa| rgyal po'i bzhugs thabs kyis gnas pa/ rang 'od kyi rig mas 'khyud pa/ nam mkha' sngon po'i mdog can/ rgyan thams cad kyis brgyan pa/ brgyad gnyis kyi lo dang ldan pa| nyi ma bye ba'i 'od dang ldan pa/ ral pa'i dbu rgyan gyis brgyan pa/ rdo rje dang / dril bu dang / rnge'u chung dang / ka pA la dang / kha T+wAM ga 'dzin pa'i bdag po'o/ /mtshan ma'i skabs su dbus su rdo rje dang / dril bus bya'o/ /de nas slob ma sta gon byas la sman sna tshogs kyis khrus byas pa/ rnam par snang mdzad kyi ngo bos slob ma gzung bar bya'o/ / las kyi slob dpon ni/ bstan bcos thams cad la mkhas / ser n+sa med pa/ mtshan ma cung zad thob pa'o/ /der mchod pa po rnams shin tu mkhas pa/ chags pa la sogs pa dang bral ba/ mtshan ma rnyed pa/ dbang gsum thob pa'o/ /slob dpon la dbang bskur ba'i dus su'am/ rgyud thos pa'i dus su shin tu gces pa'i chung ma dang / bu mo dang / 478b gzhan yang gser dang / mu tig dang / nor bu dang / glang po che dang / rta dang / zhing dang / bran dang / bran mo dang / /na bza' du ma la sogs pa ci tsam nus pa dbal bar bya'o/ /nor la sogs pa yod nas gang zhig mi 'bul na/ de ni/ bskal pa stong gi bar du dmyal bar skye bar 'gyur ro/ /longs spyod med par gyur pas kyang rang gi lus po dbul bar bya ste/ bran du bya'o| |des ni/ tshe 'di nyid la sangs rgyas nyid dam/ yang na rdo rje 'dzin pa nyid thob par 'gyur ro/ /lha mos gsol pa/ bcom ldan 'das/ sbyin pa la sogs pa tsam gyis sangs rgyas sam/ rdo rje 'dzin par 'gyur ram ci/ bcom ldan 'das kyis bka' stsal pa/ lha mo/ sbyin pa la sogs pa tsam gyis sangs rgyas sam/ rdo rje 'dzin par mi 'gyur te/ 'on kyang bla ma la mchod pas bsod nams chen po'i tshogs skye'o/ /bsod nams chen po'i tshogs bsags pa las sdig pa'i phung po zad de/ bla ma'i mchog sangs rgyas thams cad kyi rang bzhin rang gi lha'i sku yang dag pa dang phrad pa thob bo/ /phrad pas yang dag pa'i man ngag gnang bar 'gyur ro/ /man ngag thob pa las brtson 'grus chen po dang ldan pa yin na/ des tshe 'di nyid la sangs rgyas sam/ rdo rje 'dzin pa thob par 'gyur ro/ /dpal ye shes snying po las/ dbang bskur ba dang / dkyil 'khor gyi don zhes bya ba'i le'u ste gsum 479a @#/ /pa'o|| //bcom ldan 'das mas gsol pa/ khyod kyi dkyil 'khor ji ltar lags/ /mnga' bdag chen po bka' stsol cig /bcom ldan 'das kyis bka' stsal pa/ /bdag gi dkyil 'khor dge ba ni/ /nyon cig lha mo rab tu bshad/ /gru bzhi pa la sgo bzhi pa/ /rta babs bzhis ni rnam par brgyan/ /dra ba dre phyed chun 'phyang dang / /'dod yon rin chen la sogs brgyan/ /de yi dbus su gzhan min bdag /zhal bzang khyod dang lhan cig go /phyag bzhi pa la zhal bzhi pa/ /spyan gsum ut+pal sngon po'i mdog /phyag rgya drug dang ldan pa dang / /sna tshogs rus pa'i rgyan dang ldan/ /zhi ba chen po'i rang bzhin can/ /sna tshogs pad+ma'i steng du ni/ /'jigs byed dus mtshan zhabs kyis mnan/ /rgyal po'i bzhugs thabs kyis ni bzhugs/ /rdo rje dril bu rde'u chung dang / /ka pA la dang kha T+wAM bsnams/ /zhal gzhan ser dpad mar dang ljang // lha mo khyod kyang bdag gi mdog /zhal gsum ma la spyan gsum pa/ /phyag gnyis gri gug pad snod 'dzin/ /sna tshogs rgyan gyis brgyan pa'o/ /bcom ldan 'das mas gsol pa/ 'di yi dkyil 'khor 'khor lo la/ /'khor ni gang lags grangs du mchis/ /bcom ldan 'das kyis bka' stsal pa/ gang zhig khyod kyis bdag la zhus// 479b nyon cig lha mo bdag gis bshad/ /dkyil 'khor phyogs bzhir dpa' chen po/ /shes rab yan lag mas 'khyud cing / /mtshams su rdo rje ma mo bzhi/ /sgor ni khros pa'i lha mo bzhi| |bcom ldan 'das mas gsol pa/ de rnams la skyed pa'i cho ga ni/ gang / mdog dang phyag rgya dang bzhugs thabs la sogs ji ltar lags/ bcom ldan 'das kyis bka' stsal pa| khyod dang bdag rol pa mdzad cing / srub pa dang srub pa'i thabs chen po'i sbyor ba'i dga' ba'i rtags las dpa' bo chen po tshangs pa zhes bya ba phyag bzhi pa/ zhal gsum pa| spyan gsum pa/ gser gyi mdog nyi ma'i dkyil 'khor gyi steng du rgyal po'i bzhugs thabs kyis gnas pa/ ral pa'i cod pan gyis brgyan pa/ shes rab ma'i yan lag gis 'khyud pa/ phyag rgya lnga 'dzin pa/ rgyan sna tshogs kyis brgyan pa'o/ /rdo rje dang / dril bu dang / rde'u chung dang / ka pa'i la dang / kha T+wAM ga bsnams pa/ shar gyi 'dab mar ro/ /yang srub pa dang srub pa'i thabs kyis mchog gi dga' ba'i rtags las dpa' bo chen po khyab 'jug ces bya ba ma ra ka ta'i mdog /lhag ma ni/ tshangs pa bzhin du byang du'o/ /yang srub pa dang srub pa'i thabs kyis dga' bral gyi dga' ba'i rtags las dpa' bo chen po drag po zhes bya ba mdog nag po/ /khyab 'jug bzhin nub tu'o/ /yang srub pa dang srub pa'i thabs kyis 480a @#/ /lhan cig skyes pa'i dga' ba'i rtags las dpa' bo chen po dbang phyug ces bya ba mdog dkar po/ /khyab 'jug bzhin lho phyogs su'o/ /pad+ma'i mtshams su dri zhim pa dang ldan pa'i chus gang ba'i bum pa'i steng du bdud rtsi lngas bkang ba'i ka pA la bzhi'o/ /yang srub pa dang srub pa'i thabs kyis ro brgyad las me'i mtshams su dpa' mo chen mo dkar mo'o/ /chu'i mtshams su gzhan gyis mi thub ma bai DUR+Ya'i mdog go /rlung gi mtshams su dus mtshan ma nam mkha' sngon po'i mdog go/ dbang ldan gyi mtshams su gau rI mdog ser po'o/ /thams cad kyang shin tu lang tsho la bab pa/ zhal gcig pa/ spyan gsum pa/ phyag bzhi pa/ nyi ma'i dkyil 'khor gyi steng du rgyal po'i bzhugs thabs kyis bzhugs pa/ phyag rgya lnga 'dzin pa/ phyogs kyi gos can/ gri gug dang / ka pA la dang / kha T+wAM ga dang / rde'u chung bsnams pa'o/ /shar phyogs kyi sgor rdo rje gtum mo ni/ nag mo chen mo'i mdog go /byang sgor rdo rje 'jigs byed ma ser mo'i mdog go /nub sgor rdo rje sgra ma dmar mo chen mo'i mdog go /lho sgor rdo rje rtsa rtsi ka ljang gu'i mdog go /phyag bzhi pa/ zhal gcig pa/ spyan gsum pa/ g.yon brkyang ba/ na bza' spangs pa rim pa bzhin du nam mkha' lding dang / seng+ge dang / stag dang / 480b ma he'i steng na gnas pa'o/ /phyag rgya lngas brgyan pa/ mgo chen po'i chun po 'phyang ba 'dzin pa/ 'jigs byed chen po mche ba gtsigs pa/ ljags 'dril ba/ dbu skyes 'bar ba/ sgra chen po'i sgra sgrog pa/ ral gri dang / rtse gsum pa dang / ka pA la dang / kha T+wAM ga bsnams pa/ rang 'od kyi thabs dang 'khyud pa'o/ /bcom ldan 'das mas gsol pa/ bcom ldan 'das| dpa' bo chen po rnams la shes rab ma'i yan lag ji ltar lags/ bcom ldan 'das kyis bka' stsal pa/ dpa' bo chen po rnams la shes rab ma'i yan lag rang rang gi mdog dang mtshungs pa ste/ 'on kyang khyod bzhin du zhal gcig pa'o/ /de lta'i dkyil 'khor rgyal po ni/ /rnal 'byor rgyud du rnyed par dka'/ /dgyes pa thams cad grub byed cing // sdig pa thams cad 'jig par mdzad/ /bcom ldan 'das mas gsol pa/ bcom ldan khyod dang bdag skyed pa'i/ /sa bon gang lags snying po ci/ /nye ba'i snying po ci lta bu/ /'khor gyi sngags ni ji ltar lags/ /bcom ldan 'das kyis bka' stsal pa/ /khyod kyi bdag la gang zhig zhus/ /nyon cig lha mo bdag gis bshad/ /sa bon ya sde'i bdun pa ni/ /dbyangs yig lnga pa dang ldan pa/ /lha mo chen mo thig le ldan/ /khyod kyi sa bon rab mchog gi /ya sde'i sa bon brgyad pa ni/ /dbyangs yig drug pa dang ldan pa/ /dbu ni thig le yis ni brgyan// 481a @#/ /bdag gi sa bon rab mchog go /de ni sa bon gnyis ka rab/ /thams cad dbang du byed pa ni/ /lus can gsum gyi snying la bzhugs skye ba dang ni sdud byed do/ /drug pa brgyad pa bzhi pa dang / /bcu gnyis pa dang bcu dang nyi/ /dang por oM dang hUM phaT mthar/ /bdag gi snying po rab tu mchog /nyi shu pa dang bcu gnyis mkha'/ /dang po dang ni bcu drug nyi/ /dbang po tshangs pa hUM phaT mthar/ /khyod kyi snying po dgyes pa mchog /dang por oM dang hUM phaT mthar/ /dbus su ming dang spel ba ni| |tshogs kun gyi ni sngags yin te/ /mchod pa'i dus su mchod par bya/ /oM sarba mA ra bi mard na mahA bi ra rA dza hUM hUM phaT phaT/ skal ldan mo de khyod kyi ni/ /nye ba'i snying po drag po che/ /oM haM haM haM haM haM/ ke le ke le sarba do sta pra b+hA dza ka hUM h+'+aum phaT phaT/ pad+mI zhal de dag gi ni/ /'od chen nye ba'i snying po'o/ /bcom ldan 'das mas gsol pa| sngags 'di la nus pa'i mthu ci tsam zhig mchis lags/ bcom ldan 'das kyis bka' stsal pa/ grub pa tsam gyis khams gsum thams cad dbang du byed par 'gyur ro/ /rnal 'byor pa khro ba'i lta bas 'bum phrag gcig bzlas pa byas na/ lha ma yin gyi dbang po lta bu la 'bum phrag gcig gis gsod par byed do/ /zhi ba'i 481b \?\ gyis bzlas pa byas nas/ grangs med pa'i nad dang / nyon mongs pa dang / dbul po dang / mdze dang / phol mig 'jig par byed do/ /phra mo'i grub pa brgyad skad cig gis byed do/ /gzhan yang las du ma rjes su 'brang bar byed do/ /bcom ldan 'das kyis de skad ces bka' stsal nas/ bcom ldan 'das ma legs dgyes dbang mo stan las langs nas mgo pos phyag 'tshal te/ 'khor thams cad dang lhan cig tu lan gsum du bskor ba byas nas rang rang gi rdzu 'phrul gyis mchod pa byas te/ bcom ldan 'das mchog gi dbang phyug legs so legs so zhes brjod nas yang gnyis su med pa'i sbyor bas bzhugs so/ /de'i dus su nam mkha' la me tog rnam pa sna tshogs ba'i char dang / rin po che sna tshogs kyi char chen po bcom ldan 'das kyi zhabs kyi drung du 'babs par gyur to/ /de nas bcom ldan 'das me tog dang rin po che de dag gis thog tu bcibs te 'khor dang bcas pa mi snang bar gyur to/ /dpal ye shes snying po las/ gsang ba'i dkyil 'khor 'byung ba'i don zhes bya ba'i le'u ste bzhi pa'o// //dpal ye shes snying po zhes bya ba rnal 'byor ma chen mo'i rgyud kyi rgyal po'i rgyal po rdzogs so// //rgya gar gyi mkhan po dpal 482a @#/ /shes rab gsang ba'i zhal snga nas bsgyur ba'o/ /dpal phyag rgya chen po'i thig le rnal 'byor ma'i rgyud kyi rgyal po'i phyi ma'i phyi ma'o// |