rgya gar skad du/ yo gi nI sany+tsA R+YaM/ bod skad du/ rnal 'byor ma'i kun tu spyod pa/ bcom ldan 'das rdo rje sems dpa' la phyag 'tshal lo/ /gang gi drin gyis bde chen gnas// skad cig gis ni thob gyur pa/ /bla ma rin chen lta bu yi/ /rdo rje can zhabs pad la 'dud/ /de nas yang dag bshad bya ba/ /kun tu spyod pa'i cho ga mchog /'khor lo gsum bdag 'di sgom pa/ /rnal 'byor lam la gnas pa yin/ /lugs 'byung lugs las bzlog par ni/ /rgyud du sbas par gnas gang de/ /bstan pa 'di ru ji skad gsungs/ / bshad pa yang ni de bzhin no/ /so sor bstan pa ma lus nyid/ /brda yi cho ga rgyas pa yin/ /gang gis shes pa tsam gyis ni/ /sgrub pa po yis grub thob pa/ /sum cu rtsa bdun tshul gyis ni/ /byang chub phyogs la gnas pa yin/ /'jig rten du ni bsgom byar bshad/ /he ru ka dpal 'gro ba'i mchog /de la thog mar rnal 'byor gyi dbang phyug gis phung po lnga la lha'i nga rgyal bskyed par bya ste/ gzugs kyi phung po la ni rnam par snang mdzad do/ /tshor ba'i phung po la ni rdo rje nyi ma'o/ /'du shes kyi phung po la ni pad+ma gar gyi 327a @#/ /dbang phyug go /'du byed kyi phung po la ni rdo rje rgyal po'o/ /rnam par shes pa'i phung po la ni rdo rje sems dpa' ste/ de bzhin gshegs pa thams cad kyi bdag nyid ni/ shrI he ru ka rdo rje'o/ /mig gnyis la ni gti mug rdo rje'o/ /rna ba gnyis la ni zhe sdang rdo rje'o/ /sna dag la ni phrag dog rdo rje'o/ /lce la ni 'dod chags rdo rje'o/ / lus la ni ser sna rdo rje'o/ /skye mched thams cad la ni dbang phyug rdo rje'i dbyings so/ /sa'i khams la ni ltung byed ma'o/ /chu'i khams la ni gsod byed ma'o/ /me'i khams la ni 'gugs ma'o/ /rlung gi khams la ni gar dbang ma'o/ /nam mkha'i khams la ni pad+ma'i dra ba mo ste/ de ltar phung po dang / khams dang / skye mched rnams la lha nyid kyi nga rgyal bskyed par bya'o/ /rnal 'byor pa'i kun tu spyod pa las/ lha rnams kyi gnas kyi rnam par dag pa gnas pa ste dang po'o// //de nas byang chub kyi phyogs kyi chos sum cu rtsa bdun lha'i sbyor bas sbyar bar bya ste/ de thams cad kyang gang zhe na/ lus dran pa nye bar gzhag pa dang / tshor ba dran pa nye bar gzhag pa dang / chos dran pa nye bar gzhag pa dang / sems dran pa nye bar gzhag pa dang / 'dun pa'i rdzu 'phrul gyi rkang pa dang / brtson 'grus kyi rdzu 'phrul gyi rkang pa dang / dpyod pa'i rdzu 327b 'phrul gyi rkang pa dang / sems kyi rdzu 'phrul gyi rkang pa dang / dad pa'i dbang po dang / brtson 'grus kyi dbang po dang / dran pa'i dbang po dang / ting nge 'dzin gyi dbang po dang / shes rab kyi dbang po dang / dad pa'i stobs dang / brtson 'grus kyi stobs dang / dran pa'i stobs dang / ting nge 'dzin gyi stobs dang / shes rab kyi stobs dang / ting nge 'dzin yang dag byang chub kyi yan lag dang / brtson 'grus yang dag byang chub kyi yan lag dang / dga' ba yang dag byang chub kyi yan lag dang / shin tu sbyangs pa yang dag byang chub kyi yan lag dang / chos rnam par 'byed pa yang dag byang chub kyi yan lag dang / dran pa yang dag byang chub kyi yan lag dang / btang snyoms yang dag byang chub kyi yan lag dang / yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin dang / dge ba'i chos ma skyes pa rnams bskyed pa dang / dge ba'i chos skyes pa rnams yang dag par srung ba dang / mi dge ba'i chos skyes pa rnams spong ba dang / mi dge ba'i chos ma skyes pa rnams mi bskyed pa'o/ /de ltar na dran pa nye bar gzhag pa dang / yang dag par spong ba dang / rdzu 'phrul gyi 328a @#/ /rkang pa dang / dbang po dang / stobs dang / byang chub kyi yan lag dang / 'phags pa'i lam yan lag brgyad pa'i mthar thug pa rnams ni byang chub kyi phyogs kyi chos sum cu rtsa bdun yin no/ /rnal 'byor ma'i kun tu spyod pa las/ byang chub kyi phyogs kyi chos sum cu rtsa bdun bstan pa ste gnyis pa'o// // de la de rnams kyi lha'i sbyor ba grangs ji lta bar mdor bsdus nas bshad par bya ste lus dran pa nye bar gzhag pa ni mkha' 'gro ma'o/ /tshor ba dran pa nye bar gzhag pa ni lA ma'o/ /chos dran pa nye bar gzhag pa ni khaN+Da ro hi'o/ /sems dran pa nye bar gzhag pa ni gzugs can ma'o/ /'dun pa'i rdzu 'phrul gyi rkang pa ni rab gtum ma'o| |brtson 'grus kyi rdzu 'phrul gyi rkang pa ni gtum pa'i mig can ma'o/ /dpyod pa'i rdzu 'phrul gyi rkang pa ni 'od ldan ma'o/ /sems kyi rdzu 'phrul gyi rkang pa ni sna chen ma'o| |dad pa'i dbang po ni dpa' bo'i blo gros ma'o/ /brtson 'grus kyi dbang po ni mi'u thung ma'o/ /dran pa'i dbang po ni lang ka'i dbang phyug ma'o/ /ting nge 'dzin gyi dbang po ni shing grib ma'o/ /shes rab kyi dbang po ni sa srung ma'o/ /dad pa'i stobs ni 'jigs byed chen mo'o/ /brtson 'grus kyi stobs ni rlung gi shugs can ma'o// 328b dran pa'i stobs ni chang 'thung ma'o/ /ting nge 'dzin gyi stobs ni sngo bsangs lha mo'o/ /shes rab kyi stobs ni shin tu bzang mo'o/ /ting nge 'dzin yang dag byang chub kyi yan lag ni rta rna ma'o/ /brtson 'grus yang dag byang chub kyi yan lag ni bya gdong ma'o/ /dga' ba yang dag byang chub kyi yan lag ni 'khor lo'i shugs can ma'o/ /shin tu sbyangs pa yang dag byang chub kyi yan lag ni khaN+Da ro hi'o/ /chos rnam par 'byed pa yang dag byang chub kyi yan lag ni chang tshong ma'o/ /dran pa yang dag byang chub kyi yan lag ni 'khor lo'i go cha ma'o/ /btang snyoms yang dag byang chub kyi yan lag ni shin tu dpa' mo'o/ /yang dag pa'i lta ba ni stobs chen ma'o/ /yang dag pa'i rtog pa ni 'khor los bsgyur ma'o/ / yang dag pa'i ngag ni brtson 'grus chen mo'o/ /yang dag pa'i las kyi mtha' ni khwa gdong ma'o/ /yang dag pa'i 'tsho ba ni 'ug gdong ma'o/ /yang dag pa'i rtsol ba ni khyi gdong ma'o/ /yang dag pa'i dran pa ni phag gdong ma'o/ /yang dag pa'i ting nge 'dzin ni bcom ldan 'das dpal he ru ka ka'o/ /dge ba'i chos ma skyes pa rnams bskyed pa ni gshin rje brtan ma'o/ /dge ba'i chos skyes pa rnams yang dag par srung ba ni gshin rje pho nya ma'o/ /mi dge ba'i chos skyes pa rnams spong ba ni gshin rje mche ba ma'o/ /mi dge 329a @#/ /pa'i chos ma skyes pa rnams mi skyed pa ni gshin rje 'joms ma'o/ /rnal 'byor ma'i kun tu spyod pa las/ byang chub kyi phyogs kyi chos sum cu rtsa bdun lha rnams kyi rnam par dag pa bstan pa ste gsum pa'o// //de nas yang dag bshad bya ba/ /dpa' bo gnyis med dam pa ste/ /he ru ka dpal sku'i yan lag |yan lag kun ni cha shas gnas/ /sen mo dang / /so la na thod pa phyed pa'o/ /skra dang / kha spu la ni keng rus chen po'o/ /pags pa dang dri ma la ni keng rus so/ /sha la ni mche ba rnam par gtsigs pa'o/ /rgyus pa la ni lha dgra'o/ /rus pa la ni 'od dpag med do/ /mkhal ma la ni rdo rje 'od do/ /snying la ni rdo rje sku'o/ /mig gnyis la myu gu can no/ /mkhris pa la ni rdo rje ral pa can no/ /glo ba la ni dpa' bo chen po'o/ /rgyu ma la ni rdo rje hUM mdzad do/ /gnye ma la ni rab bzang ngo / /lto ba la ni rdo rje bzang po'o/ /bshang ba la ni 'jigs byed chen po'o/ /mtshog ma'i sbu bas la ni mig mi bzang ngo / /bad kan la ni stobs po che'o/ /rnag la ni rin chen rdo rje'o/ /khrag la ni rta mgrin no/ /rdul la ni nam mkha'i snying po'o/ /tshil la ni dpal he ru ka'o/ /mchi ma la ni pad+ma gar gyi dbang phyug go/ /mchil ma la ni rnam par snang mdzad do/ /snabs la ni rdo rje sems 329b dpa'o/ /rnal 'byor ma'i kun tu spyod pa las/ dpa' bo'i yan lag rnam par dag pa bstan pa ste bzhi pa'o// //de nas gzhan yang bshad bya ba/ /dngos grub thams cad sgrub byed pa/ /gang zhig shes pa tsam gyis ni/ /sgrub pos dngos grub thob 'gyur ba'o/ /ji ltar nang gi bdag nyid shes/ /phyi yi dkyil 'khor dam pa yin/ /rnam dgod ji ltar sbyar ba ni/ /snying po thams cad bsdus pa ste/ /rten dang brten pa'i tshul gyis ni/ /b+hai raM b+ha sogs yang dag gnas/ /bla ma las brgyud rim bzhin du/ /gang zhig cho ga 'di shes pas/ /ri steng pad+ma ge sar gyi/ /sna tshogs 'dab ma 'jam pa la/ /de yi dbus bzhugs dpa' bo ni/ /'dod pa'i don kun sgrub mdzad pa/ /mkha' 'gro ma dang lA ma dang| |khaN+Da ro hi gzugs can ma/ /pad+ma'i phyogs kyi gnas la dgod/ /dngos grub thams cad sgrub byed yin/ /phyag gnyis pa la zhal gcig pa/ /sna tshogs gzugs dang rnam rol ma'o/ /mtshams kyi bzhi po dag la ni/ /lnga pas gang ba'i thod pa bzhag /pU l+la sogs dang yang dag sbyar/ /yul dang yul du gnas pa yin/ /spyan drang 'khor lo'i dbus gnas la/ /rnal 'byor rig pas rtag tu mchod/ /pu zhes bya ba ni pU l+lir ma la yan lag khaN+Da ka pA la dang / pra tsaN+Da'o/ /dzA zhes bya ba ni dzA lan d+ha ra na ma hA kang+kA la dang / 330a @#/ /tsaN+DA k+ShI'o/ /o zhes bya ba ni oD+yan na kang+kA la dang / pra b+hA ba tI'o/ /a zhes bya ba ni ar bu da na bi ka Ta daM Sh+Ti Na dang / mahA nA sA ste gnas so/ /go zhes bya ba ni go dA ba ri na su rA bai ri Na dang / bI ra ma tI'o/ /rA zhes bya ba ni rA me shwa ri na a mi tA b+ha dang / kha ra wa rI'o/ /de zhes bya ba ni de wi ko Ta ni badzra pra b+ha dang / lang ke shwa rI'o| |mA zhes bya ba ni mA la ba na badzra de ha dang / dru mats+tsha ya'o/ /nye ba'i gnas so/ thugs kyi 'khor lo ste/ nam mkha' la rgyu ba'o/ /ka zhes bya ba ni kA ma ru pa na ang ku ri dang / ai rA ba tI'o/ /o zhes bya ba ni/ o Di na badzra dza tI la dang / mahA b+hai ra bA'o/ /zhing ngo / /tri zhes bya ba ni tri sha ku ni na ma na mahA bI ra dang / bA yu be gA'o/ /ko zhes bya ba ni ko sa la na badzra hUM kA ra dang / su rA b+hak+Shi'o/ /nye ba'i zhing ngo / /ka zhes ya ba ni ka l-im ga na su b+ha dra dang / sh+ya mA de bI'o/ /la zhes bya ba ni laM pA ka na badzra b+ha dra dang / su b+ha dra'o/ /ts+tshan+do ha'o/ /kA zhes bya ba ni kAny+tsi na mahA be ra ba dang / ha ya kar+NA 'o/ /hi zhes bya ba ni hi mA la ya na bi rU pak+Sha dang / kha gA na nI'o/ /nye ba'i ts+tshan+do ha'o/ /gsung gi 'khor lo ste/ sa la rgyu ba'o/ /pre zhes bya ba ni pre ta pu rin ma hA ba la dang / tsakra be gA'o/ /gr-i zhes bya ba ni gr-iha de tI na rat+na badzra dang / khaN+Da ro hA'o/ /'du ba can 330b no| |sau zhes bya ba ni sau rASh+Ta na ha ya gr-i ba dang / shauN+Di nI'o/ /su zhes bya ba ni su bar+Na dI pa na A kA sha gar+b+ha dang / tsakra barmi NI'o/ /nye bar 'du ba can no/ /nA zhes bya ba ni nA ga ra na shrI he ru ka dang / su bI rA'o/ /si zhes bya ba ni sin+d+hu de sha na/ pad+ma nar+t+te shwa ri dang / mahA ba lA'o/ /dur khrod de/ /ma zhes bya ba ni ma ru de sha na/ bai ro tsa na dang / tsakra brti nI'o/ / ku zhes bya ba ni ku lu tA na badzra satwa dang / mahA bI R+YA'o/ /nye ba'i dur khrod do/ /sku'i 'khor lo ste/ sa 'og na spyod pa'o/ /kA kA s+yA dang / u lU kA s+ya dang / shwa nA s+ya dang / sU ka rA s+yA ni phyogs su'o/ /ya ma dang / ya ma dU tI dang / ya ma daMSh+Ti NI dang / ya ma ma tha nI ni mtshams su'o/ /de ltar phyi dang nang gi bdag nyid ji srid nges par rtogs pa'i spyod yul du gyur gyi bar du dmigs par bya'o/ /rnal 'byor ma'i kun tu spyod pa las/ /lha'i gnas kyis bstan pa ste lnga pa'o// //de nas bdag po sogs kun gyi/ /mtshan ma phyag rgya'i tshogs rnams dang / /rang mdog phyag mtshan bzhugs tshul rnams/ /rgyud du sbas pa nges par bya/ /rgyal chen shrI he ru ka ni/ bdug pa thams cad rab 'joms pa/ / phyag gnyis yang dag 'khyud pa dang / /gnyis kyis glang po'i pags pa 'dzin/ /g.yas pa'i lhag mar dgra sta mdung / /rtse gsum gri gug DA ma ru/ /g.yon gyi lhag mar kha 331a @#/ /T+wAM sgreng / /thod pa dmar chen zhags pa dang / /tshangs ba'i mgo bo rnams bshad de/ /bcu gnyis kyis ni brgyan pa yin/ /thod pa'i phreng ba'i mchod phyir thogs/ /brgya phyed par ni shes par bya/ /bcom ldan yum ni mdun zhu bzhugs/ /zhal gcig 'bar ba chen bo ste/ /'khyud pa yis ni thod pa dag /gdug pa'i bdud kyi khrag bkang bsnams/ /g.yas pas rtag tu sdigs mdzub dang / /ma rungs pa yi gri gug bsnams/ /sku mdog dmar zhing cher 'bar ba/ /thod dum brgyan pa'i sku rags can| |dbu skra grol zhing sbyan gsum sku/ /mche ba gtsigs pa 'jigs su rung / /byin pa zhabs kyis legs par 'khyud/ /gnyis ka kha sbyar tshul gyis bzhugs/ / mkha' 'gro ma sogs bzhi po ni/ /kha T+wAM ga snod gri gug bsnams/ /sku la spyan gsum rgya lnga sogs/ /skra grol bas ni rnam par brgyan/ /dpa' bo nyi shu rtsa bzhi ni/ /phyag rgya lnga la sogs pas brgyan/ /phyag gnyis zhal gcig spyan gsum pa/ /ral pa'i cod pan dar gyis bcings/ /rdo rje dril bus legs 'khyud cing / /chags pa chen po rjes chags mdzad/ /rnal 'byor ma ni nyi shu bzhi/ /dbu skra grol bas rnam par brgyan/ /phyag rgya lnga la sogs pa dang / /spyi bor nor bus rnam par brgyan/ /rnal 'byor snod 331b dang bcas pas 'khyud/ /sdigs mdzub kyis ni gri gug bsnams/ /he ru ka dpal la sogs kun/ /g.yas brkyang pa yi gnas pas bzhugs/ /mgur chu dbung rgyan rna cha dang // thod pa'i phreng bas rnam par brgyan/ /mchod phyir thogs dang thal ba ni/ /phyag rgya drug par rab tu bshad/ /pha rol phyin drug rnam dag pas/ /phyag rgya drug gis brgyan pa yin// sku gsung thugs kyi rdo rje ni/ /spyan gsum 'og phag dag gis brgyan/ /sku gsung thugs kyi dbye ba yis/ /yi ge gsum gyi dngos grub kyi/ /ngo bor bdag nyid bsgom bya zhing / / dngos grub 'dod pas gzhan mi bya/ /de yi bsod nams gang 'gyur ba/ /sgrub pa'i yon tan rgya chen po/ /lce ni brgya stong du ma yis/ /bsod nams brjod par nus ma yin// khwa gdong la sogs rnam pa bzhi/ /thams cad kyang ni sgo skyong ste/ /kha T+wAM ga dang thod pa thogs/ /sku la phyag rgya lnga sogs ldan/ /gshin rje brtan sogs mtshams bzhir te/ / de dag zhabs gnyis brkyang ba dang / /gzugs gnyis ldan zhing yid 'phrog ma/ /mkha' 'gro ma bskyed ji bzhin du/ /khwa gdong la sogs dbye ba nyid/ /de ltar ma lus 'khor lo gnas/ /mdog dbye'i cho ga'i rim bzhin no/ /rnal 'byor ma'i kun tu spyod pa las/ /rang gi mtshan ma dang / zhal dang / phyag rgya dang / sku mdog dang / mtshon cha bstan 332a @#/ /ba ste drug pa'o// //de nas go cha gnyis po ni/ /gang shes pas ni myur ba ru/ /sgrub pa po yis grub thob pa/ /rgyud du sbas pa nges bshad bya/ /oM ha/ na ma hi/ swA hA hu/ bau Sha Ta he/ hUM hUM ho/ phaT haM/ snying ga spyi bo spyi gtsug dang / /dpung pa mig gnyis go cha sbyar/ /dang po rdo rje sems dpa' ste/ /gnyis pa rnam par snang mdzad gnas/ /gsum pa pad+ma gar dbang rgyal/ /bzhi pa he ru ka dpal bshad/ /lnga pa rdo rje nyi ma ste/ /drug pa la ni rta mchog yin/ /de ni go cha rnam drug gis| |shin tu bsrungs pa nyid yin no/ /oM baM/ haM yoM/ hriM moM/ hriM hriM/ hUM hUM/ phaT phaT/ lte ba snying ga de bzhin kha/ /spyi bo spyi gtsug go cha nyid/ /dang po rdo rje phag mo'o/ / gnyis pa ya mi nI ru brjod/ /gsum pa rmongs byed ma nyid de/ /bzhi pa sbyin ma yin par bshad/ /lnga pa kun tu skrag par grags/ /drug pa gtum mo yin par bshad// go cha drug nyid phag mo dang / /dpa' bo gnyis med rnal 'byor ma'o/ /rnal 'byor ma'i kun tu spyod pa las/ /go cha gnyis bstan pa ste bdun pa'o// //de nas go cha gnyis shes nas/ /ye shes 'khor lo rnam bsgoms nas/ /sngags dang phyag rgya'i sbyor ba yis/ /dam tshig 'khor lor myur gzhug bya/ /rkang pa mnan la steng du 332b blta| |stang du phaiM gyi sgra sgrogs la/ /phyogs bcu'i 'jig rten khams gnas pa'o/ /dpa' bo rnal 'byor ma rnams dgug /sngags kyis yang dag bskul ba dang / /skad cig de la spyan drang bya/ /mdzub mo dgug byas gung mo nges par sbyar/ /mthe bong rdo rje brtan por yang dag sbyar/ /de ni dpral ba'i phyogs kyi dbus gzhag la/ /bcu zhing bcu zhing bskor ba byas pa yis/ /sngags pas dpa' bo rnal 'byor ma byin brlab/ /yi ge d+yA ni sna rtser yang dag sbyar/ /byA ni mtshan gyi lte bar yang dag dgod/ /lte ba snying ga kha dang dpral ba ru| |sngags kyi tshogs dang bcas pas byin gyis brlab/ /lte ba snying ga dag tu rnal 'byor ma/ /sangs rgyas mkha' 'gro ma yi sngags kyis ni/ /a ba d+hU tI gnyis kyis dpa' byin brlab/ /rnal 'byor ma dang dpa' bo gnyis med yin/ /dang po dga' ba dpa' bo ste/ /mchog tu dga' ba rnal 'byor ma/ /rab tu dga' ba ma lus nyid/ /bde ba'i thabs te kun rig pa'o/ /lha yul sa steng sa 'og tu/ /skad cig gis ni gzugs gcig 'gyur/ /sgom pa bdag gis bshad pa yi/ /bsdu ba de nyid bshad pa ni/ /g.yas dang g.yon gyi lag gnyis kyis/ /bskor ba mkha' 'gro'i bde de yin/ /rnal 'byor ma'i kun tu spyod pa las/ /ye shes kyi 'khor lo spyan drang ba dang / bsdu ba bstan pa ste brgyad pa'o// // 333a @#/ /de nas sprul par shes bya dang / /longs spyod rdzogs par 'dod pa nyon/ /theg pa chen po phyag rgya che/ /rnal 'byor ma yi grub ster bshad/ /phyag rgya chen po las lhag pa'i/ /rnal 'byor kun las mchog gzhan med/ /he ru ka dpal rgyal po che/ /rnal 'byor kun dbang dbang phyug yin/ /mkha' 'gro ma yi dra ba sdom/ /nam mkha' dang mnyam las blangs pa/ /kun mkhyen ye shes de'i rang bzhin/ /he ru ka pa dpa' bo mchog /skye bo dam pa kun 'dus pa/ /zhi ba'i btung bas grub 'gyur ba/ /rtag pa'i go 'phang mcho ga yin te/ /skyon med pa ni rtag pa'i gnas/ /pu la sogs pa yang dag sbyar/ /yul dang yul du rnam par gnas/ /he ru ka dpal bdag nyid dgod// yi ge nyi shu rtsa bzhi ni/ /longs spyod rdzogs par shes bya ste/ /rnal 'byor che la gnas pa yin/ /mdor bsdus nas ni rab 'jug pa/ /blo gros brtson pas shes par bya/ / ldog pa'ang ji ltar bstan pa ni/ /bshad bya sgrub pa po rnams nyon/ /shri ni gnyis med ye shes te/ /he ni rgyu sogs stong pa nyid/ /ru ni bkod dang bral ba ste/ /ka ni gang du yang mi gnas pa'o/ /de ni rang bzhin stong pa ste/ /kun tu 'gro zhing ming shigs par/ /mdor bsdus nas ni sgom byed pa/ /'dod pa'i dngos grub thob par 'gyur/ / 333b chos dang longs spyod sprul pa yi/ /sku gsum dag ni rnam sgom pa/ /byang chub phyogs ni sum cu bdun/ /der ni nges par bsgom par bya/ /rnal 'byor ma'i kun tu spyod pa las/ / 'jug pa bstan pa ste dgu pa'o// //de nas bsgoms pas dub gyur na/ /bsdus pa spyod tshul khyad par gyis/ /sbyor dang bral bar mi bya ste/ /spyod pa'i rnal 'byor pa 'di yin/ /sngar ni ji skad bshad pa bzhin/ /bsam gtan cho ga rgyas byas la/ /rang 'dod las la gtor ma ni/ /khyad par du yang sbyin par bya/ /zla ba mar ngo'i tshes bcu dang| |zla ba yar ngo'i de nyid la/ /'bad pas dpa' bo chang sogs dang / /rdo rje lha mo rab mchod cing / /sngar bshad sngags dang rgya sbyar ba/ /cho ga bzhin du yang dag sung / /oM A ra li ho/ dzaH hUM baM hoH/ badzra DA ki n+ya/ sa ma ya s+t+waM dr-i sh+ya hoH/ de ltar las gsum bzhi lngar brjod/ /dam tshig sogs rdzas legs gnas par/ /rdo rje thal mo gyen kha phye/ /dpa' po rnal 'byor mas mngon bzla/ /oM kha kha/ khA hi khA hi/ sarba yak+Sha/ rAk+Sha sa/ b+hu ta/ pre ta/ pi shA tsi/ un+mA da/ a pasmAr badzra DA kaDA ki n+yA da ya/ i maM ba liM gr-ih+Nan+tu sa ma ya rak+Shan+tu ma sarba sid+d+him me pra mats+tshan+tu/ ya thai baM ya theSh+TaM b+hu ny+dza tha/ dzi g+h+ra tha/ pi pa tha/ mA ti kra ma tha/ ma ma sar+b+bA kAr+t+ta ya/ sa ta su khaM bi shudad d+ha ye/ sa ha yi kA b+ha baM tu hUM hUM phaT phaT swAhA/ dpa' 334a @#/ /bo'i 'khor lo la sogs sngags/ /dur khrod la sogs kyis kyang brgyan/ /lho phyogs kha bltas rnal 'byor pas/ /gnas ni mthon por rab tu mchod/ /nye bar mtshon pa ji lta bar/ /bdag gis nus pas dbul bar bya/ /dgun zla 'bring po la sogs pa'i/ /tshes bcu la ni dad pas mchod/ /skye bo dam pa kun 'dus la/ /bde ba thams cad dbul bar bya/ /der ni bshos rnams bza' bya ste/ /lhag ma snod du gzhag par bya/ /de yi lag tu 'ongs pa'i dpal/ /gang gis kyang ni gzhom mi nus/ /de ni skye bo dad ldan rnams kyis mchod/ /he ru ka dpal mngon par dgyes gyur nas/ /kun tu dgyes pas mchog ni stsol 'gyur te/ /gang phyir mchog ni de yi lag na gnas/ / mtshan mo skra ni grol gyur pas/ /brtul zhugs gos med gtor sbyin na/ /he ru ka dpal rnal 'byor bdag /des ni ma mo dga' bar 'gyur/ /rnal 'byor ma'i kun tu spyod pa las/ gtor ma dang / mchod pa tshes bcur bya ba srung ba bstan pa ste bcu pa'o// //de nas pha rol phyin drug dang / /byang chub phyogs ni sum cu bdun/ / gnas sogs sa ni bcu po rnams/ /che mchog lha yi bdag nyid can/ /dngos po gang dang gang gis ni/ /mi rnams yid ni yang dag sbyor/ /de yis de yi dngos 'gyur te// 334b sna tshogs gzugs can nor bu 'dra/ /de bzhin 'jigs dang bcas pa 'am/ /'jigs med ji lta ji ltar gnas/ /bsam gtan dag gam sems can gyis/ /las rnams thams cad rab sgrub byed/ /spyod dang grol ba'i 'bras rab stsol/ /tshe 'di nyid la thob 'gyur ba/ /sgom pa bdag gis bshad par bgyi/ /snying po kun las btus pa yin/ /log pa'i shes pa shes pa can/ /gang yang khyod kyis bshad mi bya/ /bla ma'i rim las ji ltar bstan/ /gang gis myur du shes 'gyur ba/ /skye ba bye ba stong phrag tu/ /sgyu 'phrul ye shes kyis bskul ba/ /dad pa yang dag skyes pa dang / /rnal 'byor spyod tshul gnas pa yin/ /lkug cing glen la thabs ngan ldan/ /byis pa'i shes pa'i shes pa can/ /sems can yongs su ma smin dang / /phyi rol bstan bcos kyis 'chal ba/ /de dag kun gyis mi shes te/ /mi shes mun pas khebs pa dang / /khengs pa la ni rten par dga'/ /nga rgyal la sogs bdun sems ldan/ /de kun gyis kyang sangs rgyas kyi/ /spyod yul gsang ba mi shes so/ /he ru ka dpal yang dag 'jug /slob dpon bdag nyid chen po yis/ /myur du dngos grub skyed byed de/ /'phral du yid ches byed pa yin/ /kun spyod cho ga'i rnal 'byor shes/ /cho ga'i bya ba bstan par bya/ /srid pa gsum po ma lus na/ /de ni kun mkhyen 335a @#/ /bstan pa shes/ /mthong ba dang ni reg pa dang / /thos pa dang ni dran pa yis/ /sdig pa kun las grol 'gyur ba/ /de ltar de ni the tshom med/ /lha rnams bzlog ste dgod pa dang / /sngags kyi dbye ba bzlog pa dang / /sgom pa gsang ba bzlog pa ni/ /snying po thams cad sgrub pa yin/ /rgyud rnams kun gyi spyi yi ni/ /sems ni yongs su smin ba dag /'dir ni sbyor sogs sngags rnams kyis/ /dam tshig de ltar bstan pa yin/ /bde gshegs dbugs 'byin gsungs pa ni/ /dag pa'i lus ni skyon med pa/ /bsod nams chung ba'i sngags pas kyang / /nga dga' bas ni rnyed par 'gyur/ /rnal 'byor ma'i kun tu spyod pa las/ thams cad rnam par dag pa bstan pa ste bcu gcig pa'o// //de nas bsrung min bza' min dang / /dkyil 'khor pa min dkyil 'khor min/ /bzlas brtul sbyin sreg med mod kyi/ /mdor na sems 'dul tshul can yin/ /gzung bya rnam shes ye shes ni/ /bla mas bstan la rtsol bya ste/ /phyi rol gyi ni bstan bcos pa/ /lam de shin tu ring ba yin/ /rnal 'byor pa rnams thabs kyis ni/ /bla ma'i bsnyen bkur la brtson pa/ /ston pa'i mtshan nyid bstan pa dang / /dpa' bos de nyid bstan pa yin/ /skad cig rnam pa'i rnal 'byor 335b bdag /skad cig rnam pa'i phyag rgyar ldan/ /kun nas thams cad skad cig ste/ /skad cig gis ni gsang sngags brjod/ /spas dang lta dang lag bcangs dang / /'khyud dang gnyis gnyis la sogs pa/ /de bzhin gshegs pas dbugs 'byin gsungs/ /gong nas gong du bsten par bya/ /thams cad 'dir ni bstan pa yin/ /rnam pa gzhan dag rtswa dang 'dra| |de nyid srog chags rnams kyi srog /de nyid mi 'gyur dam pa yin/ /de nyid thams cad khyab byed de/ /lus kun la ni rnam par gnas/ /de nyid sangs rgyas ye shes te| |he ru ka dpal yin par bshad/ /skyes pa ma ning la sogs nyid/ /phra ba'i snying po'ang 'dzin pa yin/ /ye shes dag tu byung de la/ /gang zhig sa la gnas rnams dang // bstan bcos dag ni ma lus dang / /rig byed grub mthar gnas pa rnams/ /'jig rten 'di dang gzhan dag tu/ /de med par ni grub mi 'gyur/ /rig byed grub pa'i mtha' rnams las| |'di ni snying por rab tu bshad/ /'gro ba 'di kun sangs rgyas lnga'i bdag nyid/ /gar mkhan dag dang ri mo bzang ltar snang / /gang du bde chen zhes bya gcig pu nyid/ / gcig pu'i nyams ni du mas gar mdzad do/ /'dug dang ldan pa nyid dag dang / /'jug dang rdzogs pa nyid dag dang / /byin gyis brlab dang dbang bskur dang / /ting nge 'dzin mcho 336a @#/ /bsdus pa yin/ /de nas cho ga'i ming gzhan pa/ /thabs dang shes rab gnyis med pa/ /de nyid du ni kun skyes pa/ /'byin dang sdud par byed pa yin// a A/ i I/ u U/ r-i r-I/ l-i l-I/ e ai/ o au/ aM aH ka kha ga g+ha nga / tsa tsha dza dz+ha nya/ Ta Tha Da D+ha Na/ ta tha da d+ha na/ pa pha ba b+ha ma/ ya ra la wa/ sha Sha sa ha/ k+Sha/ 'di ni bcom ldan lha de yin/ /mchog nyid lhag par gnas pa yin/ /lha kun gyi ni bskyed pa dang / /sngags rnams kyi ni rgyud nyid yin/ /gang zhig 'di rtag sgom pa dang / / rtag tu klog dang sems pa dang / /rnal 'byor pa yis dang por brjod/ /he ru ka dpal gnyis med 'gyur/ /der ni lag sogs rgyan yin te/ /ska rags gnas rnams thams cad yin/ /'di ni rtag tu 'dzin byed pa/ /chos kun rtogs par byed pa yin/ /A li kA li mdun bsams te/ /rnal 'byor chen pos rnams gnas la/ /zla ba'i dkyil 'khor legs rdzogs pa/ /lte ba'i rtsa bar gnas par sgom/ /de yi dbus gnas bsam pa ni/ /dam pa'i gnas mchog yi ge ste/ /sku gsung thugs kyi rdo rje ste/ /lha yi sku ni bsgom par bya/ /de ni gzugs las 'das pa ste/ /dngos po med pa'i sems nyid yin/ /bsam mi khyab pa nyid bsams te/ /bsam de mtshan 336b par brtag mi bya/ /yang na bdag nyid sems bsam pa/ /de la gzugs ni thob par 'gyur/ /rnal 'byor ma'i kun tu spyod pa las/ /rgyud thams cad las nges par byas pa'i de kho na nyid kyi gnas gcig pu bstan pa ste bcu gnyis pa'o// //de nas gzhan yang bshad bya ba/ /dpa' bo rnal 'byor ma gnyis med/ /he ru ka dpal rnal 'byor che'i/ /gnas ni yi ge'i sa pa yin/ /pul+lI ra ma ya mgo bo la/ /dzA lan d+ha ra spyi gtsug nyid/ /urgyan rna ba g.yas pa ste/ /ar bu da ni rgyab phyogs la'o/ /gnas so/ / go ngA ba ri rna ba g.yon/ /rA me shwa ri smin ma'i mtshams/ /de bI ko Ta mig gnyis te/ /mA la ya ni dpung mgor ro/ /nye ba'i gnas so/ /kA ma rU pa mchan khung dgod/ /o Te nu ma gnyis la'o/ /zhing ngo / /tri sha ku ni lte ba'i dbus/ /ko sa la ni sna rtser ro/ /nye ba'i zhing ngo / /kA ling+ka ni kha la dgod/ /lam pa ka ni mgrin dbus nyid/ /tshan+do ha'o/ /kany+tsi snying la dgod par bya/ /hi ma la ya mtshan rtsar ro/ /u pa tshan+do ha'o/ /pre ta pu ri mtshan la ste/ /gr-i ha de ba bshang lam la'o/ /'du ba can no/ /so rASh+Ta brla gnyis sam/ /gser gling \?\ ngar gnyis la'o/ /nye bar 'du ba can no/ /nA ga ra ni sor mor ro/ /sin+d+hu rkang pa'i bol gnyis la'o/ /dur khrod do/ /ma ru mthe bong gnyis la dgod/ /ku lu ta ni pus 337a @#/ /mor gnas/ /nye ba'i dur khrod de/ /pu dza o a go rA de ma/ /kA o tri ko ka la kA hi/ /bre gr-i sau su nA si ma ku/ /gnyid log ma log ldang pa dang / /bza' 'am 'gro ba'i chos spyod pa'am/ /gang yin der ni rnam bkod na/ /'jig rten gsum gyis mi g.yo 'o/ /ming gi rgyud ni 'bum sde las/ /snying po bsdus par gyur pa yin/ / nam mkha' dang ni mnyam pa'i rgyud/ /'bum gcig nang nas de bzhin bshad/ /shes rab rgyud ni gsang ba ste/ /ming 'byung ba la gnas pa yin/ /bstan pa yis ni sprul pa yin/ /bshad pas longs spyod rdzogs par 'dod/ /so sor bstan pa ma lus nyid/ /mya ngan 'das pa'i de nyid bstan/ /sku gsum 'khor lo gsum du bshad/ /chos sogs longs spyod rdzogs pa nyid/ /bsod nams ye shes tshogs dag ni/ /bden pa gnyis la gnas pa yin/ /blo ngan glen zhing lkugs pa dang / /shes rab dman zhing log lta can/ /phyi rol bstan bcos kyis 'tshal ba/ /bla ma la ni sun 'byin yin/ /de dag kun kyang rnam spangs te/ /gus kyang bshad par mi bya 'o/ /cha dang cha yi khyad par la/ /der ni gnyis su med par bshad/ /dag byed dbang gi lha mo dang / /bka' bsgo'i lha mo dpa' bo skyes/ /de 'og ma lus kun spyod pa/ /'khor ba las 337b grol gtso bo yin/ /ma lus rig byed las sprul pa/ /grub pa'i mthar ni de rab bsgrags/ /dpa' bo khyod kyi sa nga la bshad/ /sangs rgyas mu stegs can la sba/ /sgra dang sgra nyams brda rnams kyi/ /lam 'di nyid kyi rjes su 'brang / /bsdus don yang dag blangs pa dang / /brda yi tshig ni rgyas pa yin/ /gang gis kun spyod mi shes par/ /rnal 'byor pa ni rnal 'byor ston/ /de yi ngal ba don med de/ /'bras bu de ni thob mi 'gyur/ /'gro la phan pas sngon gsungs pa/ /sbas te gzhan du gsungs pa yin/ /kun spyod 'dir ni bshad pa las| |sgrub pa pos ni rab mnyam gzhag /rgyal bas sngon ni rgyud chen po'i/ /sngags kyi yi ge sgrub mdzad pa/ /las kyi bya ba gang yang rung / /dge dang mi dge brtags te bya/ /yi ge mtha' dang dbus dag tu/ /der ni thams cad rab tu grub/ /rnal 'byor ma'i kun tu spyod pa las/ A li kA li dang / las thams cad kyi nges pa gnyis su med par bstan pa ste bcu gsum pa'o// //de nas rgyud rnams thams cad du/ /sbas gsang cho ga bshad bya ste/ /sangs rgyas bzhi yi gdan bzhugs pa/ /rdo rje la sogs dpa' rnal 'byor/ /mkha' 'gro la sogs rdo rje yi/ /dpa' bo rnal 'byor dbang phyug gtso/ /me long la sogs rnam pa bzhi/ /gnyis med gnyis su med sbyor nyid/ /gnyis 338a @#/ /med rdzas ni me tog sogs/ /re re nas ni dbul bar bya/ /phyag rgya lnga sogs mchog lus kyi/ /pha rol son pas phar phyin drug /lag pa'i mchod sogs ye shes can/ /blo ldan dpa' bos shes par bya/ /rnal 'byor ma drug go rims bzhin/ /rdo rje sems sogs bcu gnyis dang / /dpa' bo chen por sbyar bya la/ / lag pa'i mchod la sogs pas bstod/ /lnga po lnga dang yang dag bsre/ /'o ma dang yang bsre bar bya/ /mchod pa des ni legs gnas la/ /spyod dang grol ba'i 'dod dang ldan// lag pa'i mchod pas rnal 'byor pa/ /dbul ba'i 'dod don 'grub par 'gyur/ /sems ni gzhan du gyur pa dang / /bza' btung gos sogs thob par 'gyur/ /lha yi mchod pa byas na ni/ /de la bsam pa rnam grub 'gyur/ /dpa' bo 'di ni dpa' chen po/ /sa steng rnal 'byor ma rnyed dka'/ /rnal 'byor pa yi spyod brtul zhugs/ /rnal 'byor dbang phyug kun gyi gtso/ /gang zhig rtag tu 'dir rang mchod/ /'dod pa'i 'bras bu kun rab ster/ /rnal 'byor ma'i kun tu spyod pa las/ /dpa' bo bzhi dang yang dag par sbyor ba'i lag pa'i mchod pa bstan pa ste bcu bzhi pa'o// //de nas dpa' bo rnal 'byor ma/ /gnyis med spyod pa'i cho ga bshad/ /dang 338b por mnyam gzhag rnal 'byor pas/ /'bad de nus pa bskyed par bya/ /nus pa bskyed pa'i rjes thogs la/ /yid 'dod pa yi brtul zhugs spyad/ /sems can rjes su gzung don phyir| |dpa' bo chen po 'gro bya zhing / /srog chags yan lag go bgos la/ /bde don gnyer bas bde ba srung / /mchod phyir thogs ni kun spangs la/ /he ru ka dpal gtsang sbrar gnas/ /grol ba'i 'bras bu 'dod pa yis/ /rnal 'byor ma kun mnyes par bya/ /rtsa ba'i sngags kyi dpa' bo gang / /tshangs pa'i skud pa la sogs brtag /lha yi snying po'i gsang sngags kyi/ /brgya phyed phreng bas brgyan pa yi/ /thod pa'i dum bu la sogs kun/ /lus kyi khams su brtag par bya/ /dpa' bo'i go cha drug gi ni/ /rgya 'dis lus ni mdzes pa yin/ /rdo rje phag mo sogs sngags gang / /mgur chus rked pa mdzes pa yin/ /sangs rgyas kun gyi mkha' 'gro ma'i/ /pags pa'i gos ni 'dzin pa'i mchog / kha T+wAM ga ni lha yi sku/ /shes rab DA ma ru ru brtag /thod pa dril bu la sogs kun/ /lus kyi khams su brtag par bya/ /yi ge bdun gyi gsang sngags kyis/ /rna bcas snyan ni mdzes pa yin/ /rnal 'byor ma drug gsang sngags gang / /ska rags byas pa brgyan pa yin/ /'khor lo kun gyi rnal 'byor ma'i/ /sngags ni lag pa'i thod pa yin/ /rnam 339a @#/ /par snang mdzad yul sngags dang / /thod pas mgo bo brgyan pa yin/ /de ltar bdag nyid rnam bsams nas/ /tsham ngam sngags kyis legs par srung // rtag tu tshangs par spyod 'gyur ba/ /gsang sngags rkang pa brgyad mchod ba'o/ /nyin mo bcom ldan dpa' bo ste/ /mtshan mo bcom ldan ma brtag bya/ /mi bya ci yang yod min te| |rtag tu mi bsam yod ma yin/ /mi bza' ci yang yod min la/ /dge dang mi dge mi smra med/ /bdag nyid ji bzhin 'gro de bzhin/ /bdag ci 'dra ba gzhan de bzhin/ /de ltar rnam bsam rnal 'byor bdag /'jigs pa thams cad yongs spangs te/ /dpa' bo seng ge bzhin du spyod/ /bsam pa thams cad rdzogs byed yin/ /he ru ka dpal gzhir gnas pa'i/ /yan lag bskyod pa ji snyed dang / /tshig tu brjod pa ji snyed pa/ /de snyed phyag rgya gsang sngags yin/ /rigs lnga'i kun tu spyod pa ni/ /rigs gcig nyid du spyad par bya/ /de ltar shes pa'i bdag nyid can/ /go 'phang mchog tu 'gro bar 'gyur/ /gnyis med ye shes sems ldan la/ /mi bya ba ni ci yang med/ /mi rtog bdag nyid sems kyis ni/ /'dod pa'i yon tan lnga rnams spyad/ /rnal 'byor ma'i kun tu spyod pa las/ gnyis su med pa'i brtul zhugs dang / /gsang sngags bstan pa ste/ 339b bco lnga ba'o// //gzhan yang phyi ma'i dus kyi tshe/ /dus mthar dngos grub mi thob ste/ /blo ni gzhan du rnam 'khrugs pas/ /phyag rgya dkyil 'khor bzlas pa yis/ /bde bar 'grub par mi 'gyur gyi/ /bkres dang skom gyi sdug bsngal 'gyur/ /'bad de 'dod bya dmigs nas ni/ /de nyid kyis bdag rnal 'byor ba/ /ji ltar he ru ka'i ye shes/ /ji 'dod par ni yongs su rgyu/ /rna bas ring nas thos pa dang / /skad cig gis mthong rnal 'byor pas/ /chos 'di de ltar shes nas ni/ /bsam pa thams cad rdzogs byed yin/ / shes rab chen por byas pa nyid/ /gnyis med ye shes brtul zhugs bzang / /A li kA li ma gtogs par/ /gal te chos 'di 'dod na ni/ /de yi ngal ba don med de/ /'bras bu thob par mi 'gyur ro/ /mdo dang bya ba'i spyod pa rnams/ /rnal 'byor gsang sogs dbye ba nyid/ /'jig rten kun la bshad pa ni/ /byang chub don gyi rgyu nyid yin/ /nga yis 'jug par bshad pa ni/ /tshogs gnyis gnyis su med pa yin/ /de nyid chos kyi rang bzhin zhes/ /mya ngan 'das pa 'ba' zhig 'dod/ /thams cad bden pa gnyis la ni// brten par ngas ni sngon bshad pa/ /rnal 'byor pa yi dngos grub kyis/ /sgom pa mngon dgar gyur pa yin/ /spros pa kun la dmigs nas ni/ /spros pas spros pa med par 340a @#/ /bya| |rgyud rnams kun tu gsang ba gang / /sprul pa rnams kyi de nyid bstan/ /rgyu 'di yis ni rnal 'byor pa/ /bden pa gnyis la yang dag rten/ /sems rnams thams cad gsal nas ni/ /longs spyod kun la nyer spyod bya/ /blo ldan chen po 'khor lo sdom/ /sdom pa la ni rnam par spyod/ /rnal 'byor ma yi mtshan ma gang / / gzugs dang brda dang tha snyad dag /khyim lnga la sogs yul rnams su/ /rnal 'byor ma ni lnga nyid gnas/ /bsgrub par bya ba'i gnas kun tu/ /g.yon nas bskor ba la rab brtson/ /ji ltar sngar bshad 'khor lo yi/ /grangs kyi cho gas brtul zhugs can/ /dpa' bo'i sngags sogs rnal 'byor ma'i/ /yid la 'dod pa dgod par bya/ / shar gyi 'dab mar mkha' 'gro ma/ /bong bu'i rnam par bsgom par bya/ /he ru ka dpal zhes bya ba/ /las rnams thams cad byed pa yin/ /he ru ka dpal go 'phang gnas/ /lus ngag yid kyi las rnams la/ /bshad dang ma bshad gang bsams pa/ /de dag thams cad myur du 'grub/ /rnal 'byor ma'i kun tu spyod pa las/ dngos grub kyi nges pa dang / /dpal he ru ka'i mdzad pa bstan pa ste bcu drug pa'o// //de nas he ru ka dpal rgyud/ /sems ni dri med yin par bshad/ /dag pa'i 340b chos kyi sprul pa ni/ /phag mo'i gzugs su bstan pa yin/ /thabs dang shes rab sbyor ba las/ /de nyid dang ni thams cad 'byung / /me long la sogs rnam pa bzhi/ /pad+ma'i 'dab gnas rnal 'byor ma/ /mkha' 'gro ma bzhi pad+mar gnas/ /mA ma kI sogs bzang mo yin/ /thod pa'i dum sogs 'khor lor gnas/ /nyi shu rtsa bzhi gnyis med yin/ / sems can 'khor ba las grol ba/ /dpa' bo nyid ni yin par brtag /khro bo rnam rgyal la sogs kun/ /sgo dang mtha' yi mtshams rnams su/ /sna tshogs gdul ba'i thabs chen gyis/ /sems can don la brtson par mdzad/ /gsang ba'i gnas kyi rnam gnas pa/ /rab tu 'bad de sba bar bya/ /rnal 'byor ma dang dpa' bo yis/ /ji ltar 'dod pa'i dngos grub ster/ /rnal 'byor 'bras bu thob nas ni/ /srid mtshor ltung bar mi 'gyur ro/ /'khor ba las ni sgrol ba'i thabs/ /rgyud kyi snying po bsdus pa yin/ /bla ma slob mas rtogs sla'i phyir/ /cho ga rgya cher ma bshad de/ /sems ni ngal gso rnal 'byor pa/ /mya ngan 'das pa bstan mi bya/ /de ltar spyod pa'i skyes mchog 'di/ /sdig pa thams cad rnam dag 'gyur/ /'jig rten 'di 'am pha rol tu/ /'dis ni sangs rgyas nyid mthong 'gyur/ /ji ltar sngar bshad sdig pa rnams/ /spang bar bya ba'i mtshan nyid yin/ /gang zhig 341a @#/ /'di sgom rnal 'byor pa/ /'dod pa'i bde ba thams cad ster/ /he ru ka dpal mtshan brjod pas/ /lha sogs kun gyi gsang gang dang / /mi la sogs la gang zhig yod/ /de yi bsod nams des 'thob bo/ /bsam gtan gyis ni bsams tsam mam/ /'dod cing klog gam bris pa yis/ /mtho ris longs spyod 'thob 'gyur te/ /yang na 'khor los bsgyur nyid 'gyur/ /rnal 'byor pa ni 'pho ba'i tshe/ /dpal ldan he ru ka la sogs/ /dpa' bo dag ni thams cad dang / /rnal 'byor ma ni ji snyed pa/ /lag na sna tshogs me tog bsnams/ /ba dan rgyal mtshan sna tshogs dang / /rol mo'i sgra ni sna tshogs dang / /sna tshogs glus ni nye bar mchod/ /'chi ba zhes bya rnam rtog ste/ /mkha' la spyod pa'i gnas su 'khyer/ /de lta'i dpa' po chen po dang / /rnal 'byor ma ni sa steng dkon/ /ji ltar bud med byis gtam rjes yi rang / /kun smra bsten pa'i gtam yang rjod par byed/ /lam yang bshad cing 'chi bar 'gyur ba yin/ /rnal 'byor lam ngan de dang 'dra bar bshad/ /de nas gzhan yang bshad bya ba/ / gnas sogs rnal 'byor ma yi gnas/ /he ru ka dpal sogs rnal 'byor/ /dpa' bo gnyis med rnal 'byor ma/ /pUl+lI ma la yar rab gtum/ /dzA lan d+ha 341b rar gtum pa'i mig /oD+yan na ni 'od ldan ma/ /ar bu dar ni sna chen mo/ /go dA ba rir dpa' blo ma/ /rA me shwa rar mi'u thung ngam/ /de bi ko Tar lang dbang phyug /mA la bar ni shing grib ma/ /kA ma rU par sa srung mo/ /o trer 'jigs byed chen mo yin/ /tri sha ku nir rlung shugs ma/ /ko sa lar ni chang 'thung ma/ /ka ling lha mo sngo bsang ma/ /lam pa kar ni rab bzang mo/ /kany+tsi nar ni rta rna mo/ /hi ma la yar bya gdong ma/ /pre ta pu rir 'khor lo'i shugs/ /gr-i ha de bar dum skyes ma/ /sau raSh+Tar chang 'tshong ma/ /gser gling 'khor lo'i go cha mo/ /nA ga rar ni rab dpa' mo/ /sin+d+hu'i yul du stobs chen mo/ /mya ngan yul du 'khor bsgyur ma/ /ku lu tAr ni brtson chen mo/ /yul 'di rnams kyi bu mo gang / /dpa' mo gnyis med rnal 'byor ma'o/ /gsang ba'i sngags la rtag gnas nas/ /rab tu 'bad de bsgrub par bya/ /rnal 'byor ma ni re re zhing / /bye ba grangs snyed dag gis bskor/ /mtshan ma mtshan nyid phyag rgya sogs/ /g.yon pa'i sgrub pa po yis sba/ /mi bzad las ni gang gang gis/ /skye bo rnams ni 'chir 'gyur ba/ /thabs dang bcas na de nyid kyis/ /srid pa'i 'ching ba las grol 'gyur/ /'khor ba'i pha rol brgal nas 'di/ /ci 'dod ye shes can du 'gyur/ /mgur chu gtsug rgyan dpung rgyan dang / /rna rgyan 342a @#/ /tshangs pa'i skud pa dang / /mgul pa brgyan cing spyi bor phreng / /ska rags rkang gdub sgra nyid do/ /ri steng sna tshogs pad+ma yi/ /ge sar A li kA li las/ /nyi shu rtsa bzhir yang dag ldan/ /dpa' bo rnal 'byor ma tshogs bcas/ /u ma'i bdag po yang dag mnan/ /rdo rje dril bu sku la 'khyud/ /he ru ka dpal rgyal po che/ /go 'phang mchog ni bsgom par bya/ /de nas rtag tu spos chus 'dir/ /rtag tu lus ni yan lag dril/ /dri zhim yan lag gis brgyan cing / /thal ba'i phyag rgya sogs pas bsgos/ /kha dog la sogs g.yogs pa'i gzugs/ /rang gi lus ni yongs su bsgyur/ /spyod pa'i brtul zhugs la zhugs par/ /shes nas rnal 'byor la legs gnas/ /yan lag can dang tshigs can dang / /sdud dang de bzhin snying stobs dang / /gar gyi tshul ni bzhi po 'di/ /de nyid mthong bas shes par bya/ /btung ba'i tshul zhes bya ba ni/ /rnal 'byor shes pa yin par bshad/ /de la 'bad de bya ba ni/ /skal ba bzang po'i gar chen yin/ /gar gyi gnas su gnas pa kun/ /rgyan rnams de ni yin zhes bya/ /kun tu dgug dang bcing bya dang / /gzhug dang de bzhin bskyod pa dang / /'bebs dang 'di ni 'khyil ba dang / /de bzhin 'dir ni brgyan pa dang / /tshangs skud lus las dgrol ba dang / /rnam pa kun tu 342b bcing ba dang / /rkang gdub rab tu zhugs pa dang / /lag pa'i rgyan ni nyid dag dang / /srog shing gcig gyur srad bu yin/ /'og pag drug cu rtsa brgyad dang / /rol ldan bcu drug par shes bya/ /phreng ba nyi shu rtsa lnga yin/ /rnal 'byor ma'i kun tu spyod pa las/ de kho na nyid dag pa la sogs pa bstan pa ste bcu bdun pa'o// //rnal 'byor ma'i kun tu spyod pa rdzogs so// //zhu chen gyi lots+tsha ba 'gos lhas btsas kyis bsgyur cing zhus te gtan la phab pa'o// |