//rgya gar skad du/ nan+do pa nand nA ga rA dza da ma na sU tra/ bod skad du/ klu'i rgyal po 435a @#/ /dga' bo nyer dga' 'dul ba'i mdo/ 'phags pa dkon mchog gsum la gus pas phyag 'tshal lo/ /'di skad bdag gis thos pa'i dus gcig na| bcom ldan 'das mnyan yod na rgyal byed tshal mgon med zas sbyin gyi kun dga' ra ba na bzhugs so/ /khyim bdag mgon med zas sbyin dus gcig na/ bcom ldan 'das kyis chos bstan pa thos nas/ btsun pa dge slong lnga brgya dang bcas pa sang nang par bdag gi khyim du gdugs tshod la 'byon par zhu zhes mgron du gnyer to/ / bcom ldan 'das kyis de la gnang nas/ de'i nyin mo'i lhag ma dang / mtshan mo'i mtha' 'das nas tho rangs kyi dus su stong phrag bcu'i 'jig rten gyi khams la thugs kyis rnam par dgongs so/ /de nas klu'i rgyal po dga' bo nyer dga' zhes bya ba ye shes kyi sgo nas mngon du byas so/ /de la nges par legs pa'i sa bon yod dam zhes brtags pa na/ 'di ni log par lta ba can dkon mchog gsum la dad pa med par gzigs so/ /gzigs nas gang zhig 'di ni log bar lta ba las rnam par grol bar bya ba'i phyir/ 'dul bar byed pa gnas brtan chen po mau dgal gzigs so/ /de nas mtshan mo tho rangs kyi dus su sku'i byi dor mdzad nas/ tshe dang ldan pa kun dga' bo bos 435b te bka' stsal pa/ kun dga' bo/ dge slong lnga brgya dang bcas pa'i bcom ldan 'das lha'i 'jig rten du gshegs so zhes ston cig/ des btsun pa bka' bzhin 'tshal lo zhes gsol nas dge slong rnams la don de smras so/ /de'i nyi ma la dga' bo nyer dgas nyer bsdogs byas so/ /de lha'i rin po che'i steng du skyil krung gis gnas te/ lha'i gdugs dkar po bzung ngo / /klu dang / klu mo gar byed cing klu'i 'khor g.yog du mas bskor te lha'i snod nye bar bzhag nas bza' ba dang / btung ba rnam pa sna tshogs pa la rtog par byed do/ / de nas bcom ldan 'das kyis klu'i rgyal po ji lta bar gzigs so/ /de ltar byas pa gzigs nas de'i mgo bo'i steng gi bla bres kyi steng nyid nas/ bcom ldan 'das dge slong lnga brgya dang bcas pas gshegs te/ sum cu rtsa gsum gyi lha'i bar mngon sum du gyur to/ /de'i tshe de'i dus na klu'i rgyal po dga' bo nyer dga' de lta bu'i gzugs kyis sdig pa'i lta bar lhung ba lta ba ngan pa'i sems skyes so/ /dge sbyong mgo reg 'di nga'i steng nas sum cu rtsa gsum gyi lha'i 'jig rten gyi gnas su gshegs par 'gyur ro/ /'di ni de lta nas nga'i mgo bo la rkang pa'i rdul mgo bo'i steng du lhung bar byed pas 'gro du mi ster ro snyam ste/ langs nas ri rab kyi rtsa bar song ngo / /rang gi gzugs bor te ri bo mchog 436a @#/ /rab steng 'og thams cad rang gi lus kyis lan bdun bkris nas/ steng du gdengs ka byas te/ sum cu rtsa gsum pa rnams kyis mi mthong bar bya ba'i phyir ro/ /de nas tshe dang ldan pa yul 'khor skyong gis bcom ldan 'das la 'di skad ces gsol to/ /btsun pa/ sngar bzhin gnas 'di'i phyogs su 'dug na ri'i mchog rab mthong ngo / /ri bo mchog rab 'khor dang bcas pa mthong ngo / /sum cu rtsa gsum mthong ngo / /rnam par rgyal ba'i khang bzang mthong ngo / /rnam par rgyal ba'i khang bzang gi steng gi rgyal mtshan mthong ngo / /btsun pa/ ci'i rgyu ci'i rkyen lags/ da ni ri bo mchog rab mi mthong bar 'gyur/ bcom ldan 'das kyis bka' stsal pa/ yul 'khor skyong / 'di ni klu'i rgyal po dga' bo nyer dga' zhes bya ba khyed rnams la khros par gyur te/ ri bo mchog rab lan bdun du lus kyi dkris nas steng du gdengs kas bsgribs so/ /mun pa mun nag tu byas nas gnas so/ /gsol pa/ btsun pa/ bdag gis 'dul bar bgyi'am/ bcom ldan 'das kyis gnang ba ma byin no/ /de nas tshe dang ldan pa bzang ldan dang / tshe dang ldan pa sgra gcan 'dzin te/ gro rim bzhin du dge slong thams cad kyis zhus so/ /bcom ldan 'das kyis rjes su gnang ba ma byin no/ /thams 436b cad kyis rjes su gnas brtan chen po mau dgal gyi bus btsun pa bdag gis gdul bar bgyi'am/ zhes zhus pa dang / mau dgal gyi bu/ thul cig/ ces bcom ldan 'das kyis gnang ba byin no/ /gnas brtan rang gi lus bor la klu'i rgyal po'i lus chen por sprul te/ dga' bo nyer dga'i lus kyi steng du lan bcu bzhi lus kyis dkri ba dang / de'i gdengs ka'i steng du rang gi gdengs ka bya'o/ /ri bo mchog rab dang bcas pa thams cad non cig /ces bka' stsal pa dang / gnas brtan mau dgal gyi bus de bzhin du byas so/ /de nas klu'i rgyal po dga' bo nyer dgas kha rlangs kyi du ba btang ngo / /gnas brtan gyis kyang khyed kyi lus la kha rlangs kyi du ba yod la nged la med pa yin nam zhes kha rlangs btang ngo / / klu'i rgyal po dga' bo nyer dga'i du bas gnas brtan la gnod par ma gyur ro/ /gnas brtan gyi kha rlangs kyi du bas klu'i rgyal po la gnod par gyur to/ /klu'i rgyal po rab tu 'bar/ gnas brtan gyis khyed kyi lus la 'bar ba yod pa bzhin nged la med dam zhes 'bar bar byas so/ /klu'i rgyal po'i me 'od kyis gnas brtan la gnod par ma gyur to/ /gnas brtan gyi me 'od kyis klu'i rgyal po la gnod par gyur to/ /klu'i rgyal pos bsams pa/ 'di ni bdag gi lus ri bo mchog rab dar bcas pa nges par mnan nas du ba dang / me 'bar bar 437a @#/ /byed do snyam nas/ khyed gang yin zhes dris so/ /bdag mau dgal zhes bya ba'o/ /btsun pa rang gi gzugs kyis gnas par gyis shig /gnas brtan gyis klu'i lus dor nas/ de'i rna ba g.yas pa'i bu ga nas zhugs te/ rna ba g.yon pa'i bu ga nas 'thon no/ /yang rna ba g.yon pa'i bu ga nas zhugs nas/ rnab g.yas pa'i bu ga nas 'thon no/ /de bzhin du sna g.yas pa'i bu ga nas zhugs nas/ sna g.yon pa'i bu ga nas 'thon te/ yang sna g.yon pa'i bu ga nas zhugs nas/ sna g.yas pa'i bu ga nas 'thon no| |de nas klu'i rgyal po'i kha gdangs so/ /gnas brtan khar zhugs nas/ gsus pa'i nang du mdun rgyab tu yang dang / yang du rgyus so/ /bcom ldan 'das kyis mau dgal rdzu 'phrul cher yid la gyis shig/ klu rdzu 'phrul chen po dang ldan pa yin no zhes bka' stsal to/ /gnas brtan gyis/ btsun pa/ bdag gis rdzu 'phrul gyi rkang pa bzhi bsgom pa dang| mang du byas pa dang / brtson par byas pa dang / gzhir byas pa dang / rjes su bsgrubs pa dang / 'dris par byas pas legs par brtsams so/ /btsun pa/ dga' bo nyer dga' lta zhog/ dga' bo nyer dga' dang mtshungs par brgya'i tshogs dang / stong gi tshogs dang / 'bum gyi tshogs kyang bdag gis gdul bar nus so zhes gsol to/ / 437b klu'i rgyal pos bsams pa/ nang na rgyu ba bdag gis ma mthong ngo / /phyir 'byung ba'i tshe mche ba gnyis kyi bar du bza' 'o snyam nas/ btsun pa/ phyir shog /nga'i lto ba'i nang du yang dang / yang du rgyu ba dang / sngod pas ci bya zhes pas gnas brtan phyir byon nas gnas so/ /klu'i rgyal pos mthong nas/ 'di yin nam/ zhes smras te/ sna'i rlung phyir btang ngo / /gnas brtan bsam gtan bzhi po mnyam par thob pas ba spu'i bu ga gcig tu yang sna'i rlung gis bskyod par ma nus so/ /de las gzhan pa'i dge slong rnams kyis dang po rnams kyis cho 'phrul thams cad byed par nus kyi/ gnas 'di rnams la rab tu zhugs nas/ bsam gtan bzhi po myur du bsgrub par mi nus so/ /de'i phyir bcom ldan 'das kyis klu'i rgyal po 'dul ba de rnams la gnang ba ma yin no/ /klu'i rgyal po bdag gis dge slong 'di'i ba spu'i bu ga tsam yang sna'i rlung gis bskyod par ma nus pas rdzu 'phrul chen por bsams so| |gnas brtan gyis dge slong gi gzugs dor nas/ 'dab bzang bya khyung gi gzugs su mngon par sprul to/ /'dab bzang gi lus de mthong nas klu'i rgyal po bros par gyur to| |'dab bzang gi rjes su 'brel par klu'i rgyal pos rang gi gzugs dor nas bram ze'i khye'u yi gzugs su sprul to/ /btsun pa/ khyed la skyabs su 'gro'o zhes rjed par byed cing 438a @#/ /gnas brtan gyi zhabs la phyag btsal to/ /gnas brtan gyis ston pa'i thad du shog cig/ 'gro ba yin no zhes klu'i rgyal po btul nas dug med par byas te/ bcom ldan 'das kyi drung du phyin no/ /klu'i rgyal pos bcom ldan 'das la phyag byas te/ btsun pa/ khyed la skyabs su 'gro'o zhes gsol to/ /bcom ldan 'das kyis legs so zhes bka' stsal nas/ dge slong 'khor dang bcas pa mgon med zas sbyin gyi gnas su gshegs so/ /mgon med zas sbyin gyis/ btsun pa yun ring por mi 'byon pa ci zhes gsol pa dang / bcom ldan 'das kyis/ mau dgal gyi bu dang / dga' bo nyer dga' gnyis g.yul bkye'o zhes bka' stsal to/ /btsun pa/ su zhig pham| su zhig rgyal bar gyur zhes gsol pas/ khyim bdag/ mau dgal gyi bu rgyal bar gyur/ dga' bo nyer dga' pham par gyur to/ /zhes bka' stsal to/ /mgon med zas sbyin gyis btsun pa bcom ldan 'das la zhag bdun du rim pa bzhin du gdugs tshod gsol bar zhus/ gnas brtan la bkur sti dang / bsti btang bgyid par zhus so| |sangs rgyas la sogs pa'i dge slong lnga brgya po rnams la bkur sti dang / bsti btang zhag bdun du bgyid par 'tshal lo/ /bcom ldan 'das kyis de skad ces bka' stsal 438b pa dang / dge slong de rnams bcom ldan 'das kyis gsungs pa la mngon par bstod do/ /klu'i rgyal po dga' bo nyer dga' 'dul ba'i mdo rdzogs so// //paN+Di ta chen po a nan+ta shrI'i zhal snga nas/ mang du thos pa'i lo ts+tsha ba shAkya'i dge slong nyi ma rgyal mtshan dpal bzang pos skad gnyis smra ba rnams kyis gdan sa/ gtsug lag khang chen po dpal thar pa gling du bsgyur cing zhus te gtan la phab pa'o// sa'i steng du nyi ma dang / zla ba ltar gyur cig/ |