rgya gar skad du/ shrI kriSh+Na ya mA ri tan+t+ra rA dza tri kalpa nA ma/ bod skad du/ dpal gshin rje'i gshed nag po'i rgyud kyi rgyal po rtog ba gsum pa zhes bya ba/ bcom ldan 'das dpal gshin rje gshed la phyag 'tshal lo/ /don dam chos sku zhi ba nyid/ /gang 'dir khams gsum rnam rgyal te/ /gshin rje dgra zhes grags pa yi/ /'khor lo bskor ba'i 417a @#/ /cho ga bshad/ /yon tan ldan pa'i sngags pa yis/ /cho ga bzhin du bsnyen byas nas/ /dur khrod dben pa la sogs par/ /dkyil 'khor khru do tshad du bya/ /dri dang ba yi rnam lnga dang / /nyi zla sogs pas byi dor bya/ /ba lang la sogs dam rdzas lnga/ /gzhan yang tshogs kyi 'khor lo dang / /phyi nang phyed pa'i bye brag gis/ /legs par mchod pa byas nas ni/ / 'khor lo bri dang btu ba dang / /drang dang bsre dang spo ba brtsams/ /sngags pa rnal 'byor ldan pa yis/ /lho yi phyogs su kha bltas te/ /dam tshig rjes su dran pa yis/ /oM badz+ra sa ma ya s+t+waM| gsang sngags 'di ni rjes dran byed/ /'khor lo bri ba brtsam par bya/ /dbus nas sor tshad bcu drug par/ /kun nas zlum pos bskor na ni/ /'di ni nang gi dkyil 'khor te/ / rim pa gsum du bskor ba la/ /sgo med lcags mkhar bcu drug bya/ /'di ni gshin rje'i grong khyer te/ /srid pa gsum gyi 'jug sa yin/ /de yi phyi rim mu khyud gsum/ /kun tu lcags ris bskor ba ste/ /mu khyud de dag re re yang / /khang pa sum cu gnyis dang ldan/ /'gro ba chos bzhin spyod pa yi/ /'khor lo 'di ltar bris nas ni/ /phyi rol mu khyud tha ma la/ / yi ge ka sogs da yig mthar/ /nga nya bsal nas dgod par bya/ /yi ge d+ha sogs k+Sha yig mthar/ /de yi rjes su bri bar bya/ /mu khyud dbus ma dag la ni/ /dbyangs yig bcu drug 417b nyis 'gyur dgod/ /btu dang dgod sogs rtsom pa na/ /mtshan ma 'di dag shes par bya/ /zla ba mig dang yon tan dang / /rig byed mda' dang dbang po dang / /rgya mtsho bkra shis gza' dang phyogs| |drag po nyi ma yan lag sa/ /tshes zhes bya bar rab tu grags/ /phyi rol mu khyud tha ma la/ /shar gyi tshangs thig nas brtsams nas/ /rim min gza' can khang pa nas/ /yi ge bkra shis tsam blangs te/ /nang gi ngos kyi mu khyud kyi/ /tshangs thig gi ni ngos dag la/ /phyogs bzhir mig gi tshad du sbyin/ /rim min phyogs can khang ba pa nas/ /yi ge mig gi tshad blangs te/ / shar du de yi g.yas g.yon gzhag /rim min bkra shis khang pa nas/ /dbyangs yig gnyis pa can blangs nas/ /mig gi tshad du byas nas ni/ /de yi ngos la re re gzhag /nub kyi tshangs thig nas grangs pa'i/ /rgya mtsho can gyi khang pa nas/ /dbyangs yig bcu gcig dang ldan pa/ /mig gi tshad du blangs nas ni/ /lho yi ngos su de bzhin sbyin/ /nub nas rim pa min pa yi/ / zla ba can gyi khyim nas ni/ /dbyangs yig bcu gsum dang ldan pa/ /mig gi tshad du blangs nas ni/ /lho ngos de rjes sbyin par bya/ /de nyid dbyangs yig gsal ba ni/ /mig gi tshad du blangs nas kyang / /sngon bzhin nub kyi ngos su sbyin/ /nub nas bkra shis khang pa nas/ /dbyangs yig bcu gsum pa ldan pa/ /mig gi tshad du blangs nas ni/ /nub kyi ngos su de bzhin sbyin/ / 418a @#/ /byang nas bkra shis khang pa nas/ /dbyangs yig bcu gcig pa ldan pa/ /mig gi tshad du blangs nas ni/ /byang gi ngos la de bzhin sbyin/ /rlung gi sa bon zhes bya ba| |mig gi tshad blangs de bzhin sbyin/ /mda' can khang pa nang gnas pa'i/ /'od kyi gong bur byas pa dang / /de nyid nas ni bgrangs pa yi/ /gza' can khang pa la gnas pa/ /dbyangs yig gsum par ldan pa dag /zla ba'i tshad du blangs nas ni/ /byang shar mtshams su re re sbyin/ /rgya mtsho'i khang pa la gnas pa/ /dbyangs yig gnyis pa ldan pa dag /rim min yon tan khang pa nas/ /zla ba'i tshad du blangs nas ni/ /shar lho mtshams su de bzhin sbyin/ /rim min bkra shis khang pa nas/ /dbyangs yig lnga pa ldan pa dag /yan lag can gyi khang pa nas// zla ba'i tshad du blangs nas ni/ /lho nub mtshams su de bzhin sbyin/ /rim min tshes can khang pa nas/ /dbyangs yig gsum pa ldan pa dang / /rim min bkra shis khang pa nas/ /zla ba'i tshad du blangs nas ni/ /nub byang mtshams su de bzhin sbyin/ /de ltar dgod par byas nas ni/ /de nas drang ba brtsam par bya/ /dam tshig rjes su dran byed cing / /rdo rje shugs dang ldan pa yi/ /shar gyi tshangs thig ngos gnyis nas/ /yi ge zung ldan drangs nas ni/ /dbus kyi khang par gzhag par bya/ /phyogs gzhan tshangs thig ngos dag na/ /de bzhin zung 418b ldan drangs nas ni/ /de bzhin dbus kyi khang par gzhag /de nas shar gyi yi ger yang / /zung ldan gnyis pa drangs nas ni/ /rim pa gnyis pa'i khang par gzhag /phyogs gzhan du yang de bzhin no/ /shar gyi zung ldan gsum pa yang / /rim pa gsum pa'i khang par drang / /phyogs gzhan du yang de bzhin no/ /mtshams kyi yi ge ya bral ni/ /rang rang nang gi mtshams su drang / /de dag phyung ba'i khang steng du/ /dbyangs kyi yi ge drang bar bya/ /dbyangs kyi yi ge gzhi la ni/ /ming gi yi ge drang bar bya/ /ming gi yi ge bzhi la ni/ /so so'i las dang mthun pa yi/ /skul ba'i yi ge dgod par bya/ /bsad dang bskrad dang dbye ba la/ /yi ge phaT ni gzhag par bya/ /mnan pa la yang yi ge laM/ /zhi ba la ni yi ge oM/ /rgyas pa de bzhin yi ge swa| |dbang la baM gyis brgyan pa ste/ /dgug pa la ni yi ge dza/ /de la las kyi 'od zer ni/ /zhi ba chu ste rgyas pas/ /dbang ni rlung ste drag po me/ /dbye dgug bskrad pa dbang dang mthun| |mnan pa dag ni rgyas pa bzhin/ /drang ba'i sbyor ba byas nas ni/ /bsre ba'i sbyor ba brtsam par bya/ /gnyis med sngags dang ldan pa yis/ /dbus kyi bkra shis yi ge yang / / zla ltar 'od kyi gong bur bya/ /sngags kyi rgyal po bcu pa yang / /'od kyi gong bu de nang du/ /'dod pa'i bsgrub bya gzhag par bya/ /de dkyil rang ming dang bor gzhag /phyogs kyi khyim 419a @#/ /na gnas pa yi/ /yi ge zung ma thams cad dang / /de tshe 'od kyi gong bur bya/ /sngags kyi rgyal po bcu pa yang / /bcu gnyis khyim du spel te bri/ /byin rlob hUM zhes bya ba yang / /khang pa re la zur re mdzes/ /yongs su dag pa dgod byas nas/ /mchod dang gtor ma byas nas ni/ /spo ba dag ni brtsam par bya/ /las kyi dbye ba ji lta bar| |'khor lo'i ras ni blang bya ste/ /zhi ba dang ni rgyas pa la/ /shin tu dge ba'i ras la bya/ /dbang dang dgug la smad 'tshong sogs/ /bsad dang dbye dang bskrad pa dang / /mnan pa la ni dur khrod ras/ /gi wang gur gum zhi rgyas la/ /dbang dang dgug la tsan+dan dmar/ /mnan pa la ni ldong ros sogs/ /bskrad la bya rog khrag gis te/ /dbye ba rta dang ma he sogs| |bsad la dug la sogs pas bri/ /dge ba'i las la bzang po'i shing / /dge min la ni rus pa dang / /lcags la sogs pas bri bar bya/ /zhi la shar blta dbang la nub| |rgyas la byang ste drag por lho/ /gzhan ni ci rigs sbyar bar bya/ /zhi rgyas dbang dang dgug pa la/ /sa bskor rim bzhin dgod par bya/ /gnam bskor dag ni rim las bzlog /bsad bskrad dbye ba mnan pa la/ /sa bskor rim las bzlog pa ste/ /gnam bskor dag ni rim bzhin bri/ /'di ltar legs par ma bris na/ /'khor lo rang la ldog 419b par 'gyur/ /de bas nan tan bskyed de bya/ /ras kyi 'khor lo legs zin nas/ /dkyil 'khor la gnas dkyil 'khor te/ /ras kyi 'khor lor spyan drangs te/ /rdo rje bsdu ba'i sbyor ba yis| |dkyil 'khor 'khor lo btu bar bya/ /ras kyi 'khor lo mchod nas ni/ /bden pa'i byin brlabs dmigs par bya/ /ji ltar gsungs pa'i cho ga bzhin/ /'khor lo spo ba byas nas ni/ /gsang sngags bzlas pa brtsam par bya/ /oM badz+ra sa ma ya s+t+waM/ dam tshig gi sngags so/ /oM badz+ra be ga /rdo rje shugs kyi sngags so/ /oM badz+ra a sa me tri sa me ma hA sa ma ye swAhA/ yi ge bsre ba'i sngags so/ /oM badz+ra sa mA dza/ 'khor lo spo ba'i sngags so/ /oM ya ma rA dzA sa do me ya/ ya me do ru Na yo da ya/ ya da yo na ri yak+She ya/ yak+She yats+tsha ni ra ma ya phaT phaT/ 'di ni/ rtsa ba'i gsang sngags te/ las thams cad pa'o/ /oM hrIHSh+T+rIHwi kri tA na na hUM phaT/ 'di ni/ las kyi gsang sngags te/ las thams cad pa'o/ /shAn+tiM ku ru swAhA/ zhi bar bskul ba'o/ /puSh+TiM ku ru swAhA/ rgyas pa'i 'o/ /ba shaM ku ru swAhA/ dbang gi'o/ /ma ra ya phaT/ bsad pa'i 'o/ /bi dwe Sha ya phaT/ dbye ba'i 'o/ /uts+tsha Ta ya phaT/ bskrad pa'i 'o/ /staM b+ha ya hUM laM/ mnan pa'i 'o/ /A kaR+Sha ya hUM/ dgug pa'i 'o/ /oM muM/ slar dgrol ba'i sngags so/ /A li kA li'i grong khyer ni/ /gsang sngags 'byung ba'i rtsa ba ste/ /las kyi brtson ra dag kyang 420a @#/ /yin| |yi ge btu ba med na ni/ /gsang sngags sgra ni log par 'gyur/ /yi ge tshong bar ma bkod na/ /gsang sngags sgra ni log par 'gyur/ /yi ge tshang bar ma bkod na/ /gsang sngags sgra ni log par 'gyur/ /gsang sngags brda yis ma brjod na/ /sngags ni dngos grub med par 'gyur/ /drang ba dag ni ma byas na/ /shin tu 'khor bar mi 'gyur ro/ /yi ge bsre ba ma byas na/ /bcu drug khang pa don med 'gyur/ /bskor phyogs log na don mi 'grub/ /rig sngags nyams dang log pa ni/ /lha min g.yul las pham pa dang / /dbang po'i dgra yis dgra bsad bzhin/ /'khor lo spo ba ma byas na/ /cho ga ngag ni nyams par 'gyur/ /rgyu yin pa dang sbyor ba dang / /dad pa brtan pas 'grub par 'gyur/ /de bas nan tan bskyed de bya/ /dpal gshin rje gshed nag po'i 'khor lo bri ba'i cho ga rgyas pa'i rtog pa ste dang po'o// //de nas gzhan yang bshad bya ba/ /sngags pas rtag tu bsten pa ni/ /rus sbal 'o ma zhes bya dang / /de bzhin 'od kyi lo ma dang / /'jim pa skam po nyid dang ni/ /de bzhin me yi khu ba dang / /sgra snyan gyi ni rdzas dag dang / /'di rnams rtag tu dpyad na ni/ /rang bzhin gyis ni nad med cing / /tshe ring dbang po rgyas pa dang / /rtag tu lang tsho dar la bab/ /lha rnams kun gyis byin gyis rlob/ /'di la dpyad par mi bya ste/ /mthu dang ngo bo nyid kyis grub/ /ting 'dzin sngags kyis byin brlabs na/ /las kyi rnam smin sbyong par byed/ /rig pa 420b 'dzin pa'i sa la gnas/ /de phyir cho ga bzhin du bsten/ /tshes gcig skya rengs shar ba ni/ /snod la ma reg rus spal zho/ /drod ma yal bar btung ba'am// yang na nyi ma'i sbu gus btud/ /mar gyi ngo yi tshes gcig la/ /'od kyi lo ma btsal nas ni/ /den yid nas ni gzung bar bya/ /zhag gsum skya rengs shar ba na/ /la ma de bcad bza' bar bya/ /yang na nyi ma'i spu gsum btung / /'jim pa bzang po sbyar nas ni/ / zhag gsum chu yi nang du sbang / /de blangs nas ni yang bskams nas/ /phyi ma byi la'i spar chad re/ /ba yi 'o ma dang sbyar nas/ /sngags pas rtag tu btung bar bya/ /me yi sdong po sar pa ni/ /sa yi mar gyis dril nas ni/ /kha sbyar sbyor dang ldan byas na/ /me chu sa yis btsir nas ni/ /btung ngam nyi ma'i sbu gus btung / /lan tshwa bral ba dag la ni/ /zhag gsum 'chi ba'i sgra brnyan rdzas/ /nam gyi dus la sngags pas blangs/ /cha gsum snod du zhag gsum bzhag /kha yi cha ni byugs pa ste/ /dbus ma'i cha ni bdud rtsi nyid/ /rtsa ba'i cha ni dor ba ste/ /'di rnams so sor brtan pa na/ /tha mal 'bras bu gsum gyi phye/ /byi la'i spar tshad de dang sbyar/ /ma sbyar na yang nyes pa med/ /tshogs par brten na bza' bar bya/ /re re bsten kyang nyes pa med/ /'jam dpal gyi rtog pa las/ /dam rdzas sman du bsgyur te bstan pa'i cho ga'i rtog pa ste gnyis pa'o// //de nas gzhan yang bshad pa ni/ /las kyi grogs kyi bye brag ste/ /zhi ba'i las ni zla ba yin/ /rgyas pa de bzhin mig 421a @#/ /tu bsgrags/ /dbye ba yon tan zhes bya ste/ /dbang du bya ba rig byed yin/ /dgug ba'i las la de bzhin mda'/ /bskrad dang mnan pa dbang po yin/ /mnan ba rjes su 'brangs pa yis/ /bsad pa'i las ni rgya mtshor 'dod/ /las rnams de dag re re yang / /'phags tshogs mchod sbyin dang po ste/ /nyi ma gnyis par gtor ma sbyin/ /gsum pa bzlas pa rnam par 'bad/ /bzhi pa sbyin sreg tshang bar bya/ /lnga pa las kyi 'khor lo bskor/ /drug pa bsam gtan rtse gcig bya/ /bdun pa las kyi lhag chad bskrad/ /grogs kyi las la khyad par du/ /las kyi gtsor ni gang sgrub de'i/ /'khor lo bskor ba nyi ma bzhi/ /las kyi bye brag 'di shes na/ /zhi bas 'jigs pa brgyad las skyob/ /rgyas pas yon tan drug dang 'byor/ /dbang gis mos pa rnam bzhir bsgyur/ /dbye bas gsang sde brgyad dang 'byed/ /mnan pas dbang po drug 'ching byed/ /gzhan yang ji lta de bzhin du/ /sngags dang rdzas kyi sbyor ba la/ /dpyad na dngos grub mi 'grub ste/ /gal te yid gnyis za gyur tam/ /bsam pa 'gyur ram dad pa nyams/ /de tshe dngos grub nye ba yang / /phyir ldog 'gyur bar gdon mi za/ /dad pa brtan pos bsgrubs pa na/ /nam mkha' med par gyur na yang / /sngags kyi dngos grub med mi srid/ /lha dang drang srong gis bshad pa'i/ /rig sngags bslu ba mi srid na/ /'dod chags bral bas bshad pa yi/ /gsang sngags sbyor bas bslu ba ni// 421b ma byung 'gyur bar mi 'gyur ro/ /chos nyid bsam gyis mi khyab pa'i/ /don la the tshom med pa yis/ /mkhas pa la ni dngos grub nye/ /yang na blun po dad pa brtan/ /de la sbyor ba'i dngos grub nye/ /rtog cing dpyod pa'i rtog ge ba/ /de la sgrub pa'i dngos grub ring / /bla mas man ngag bstan byas kyang / /slob ma yid gnyis za gyur na/ /de la dngos grub ring bar bshad/ /bla mas man ngag spas byas kyang / /slob ma yid gnyis mi za zhing / /bla ma'i man ngag dam pa zhes/ /gces spras byas na 'grub par nges/ /de yi phyir na sngags pa yis/ /rang gi yid gnyis spang ba'i phyir/ / bla ma mnyes par bya ba gces/ /bsnyen bkur byas na nus mthu che/ /gsang ste brjod pas bar chad med/ /yon tan phul ba byas pas ni/ /rang sems rin chen rnam gnyis 'gyur/ /rin chen gnyis las grub par 'byung / /dkon par gyur pas sngags pa brjod/ /bsngags na yon tan 'byung 'gyur te/ /bsngags pa dag ni ma byas na/ /ji ltar yid bzhin nor bu yang / /gang gis bsngags pa ma byas pa/ /de la 'dod don mi ster ro/ /dad pa sangs rgyas dad pa chos/ /dad pa dge 'dun dad pa ma/ /dad pa bla ma dad pa pha/ / dad pa lam chen dad pa dru \?\/ /dad pa yid bzhin nor bu ste/ /dad pa gsang sngags dngos grub nyid/ /dad pa bsod nams nor yin te/ /de yi phyir na sngags pa yis/ /rang 422a @#/ /sems dad pa bskyed pa'i phyir/ /gzhan la gus ba mchog tu bkur/ /dbal gshin rje gshed nag bo'i 'khor lo bskor ba'i cho ga las/ las kyi rgyud dang grogs bsten pa'i rtog pa ste gsum pa'o// //gshin rje gshed nag po'i rgyud rtog pa gsum pa rdzogs so// |