//rgya gar skad du/ AR+Ya badz+ra pA Ni ni lAM bar d+ha ratri lo ka bi na ya nA ma tan+ta/ bod skad du/ 'phags pa lag na rdo rje gos sngon po can zhes bya ba 'jig rten gsum 'dul ba'i rgyud/ dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das ri rab kyi byang phyogs lcang lo can gyi pho brang na bzhugs te/ brjod kyis mi lang pa'i lha dang / mi dang / lham yin la sogs pa'i 'jig rten pa dang / byang chub sems dpa' lag na rdo rje la sogs pa la bka' stsal pa/ rigs kyi bu rnams/ ma 'jigs shig /ma skrag cig /ma dang zhig ces gsungs so/ /de nas bcom ldan 'das 'jig rten gsum 'dul ba zhes bya ba'i ting nge 'dzin la snyoms par zhugs nas/ thugs ka'i dpal gyi be'u la 'od zer kha dog gsum las grub pa/ 'od zer kha dog gsum pa'i 'od zer bye ba khrag khrig brgya stong du ma 'jig rten gsum du bkye ste/ thams cad bkug nas slar yang 'od kyis snang bar byas nas/ oM badz+ra tsaN+Da pa tsa du sh+TAn+ta ka ha na da 267b ha pa tsa hUM phaT/ nA ga bi dA ra NA ya phaT/ tiR+Ya bi dA ra NA ye phaT/ pre ta ri 'dar NA ya phaT/ na ra bi dA ra Na ya phaT/ na ra ga Na bi dA ra NA ya phaT/ de pa bi dA ra NA ya phaT/ ces gsungs pas 'jig rten gsum po thams cad kyi lus gas nas sems shel sgong lta bur gnas par gyur to/ /sems yi ge gsum lta bur gnas te/ /oM na zhal gsum phyag drug ste/ /A ni zhal gcig phyag gnyis te/ /hUM ni rgyan dang bral gyur pa/ /rigs ni gsum du gyur pa yin/ /zhes gsungs so/ /de nas rigs gsum du gyur pas ched du brjod pa 'di ched du brjod do/ e ma'o shin tu rnyed dka' ba/ /zhe sdang chen po'i bdag nyid can/ /phyag na rdo rje rnyed dka' ba/ /bdag cag gis ni thob par 'gyur/ /de nas rdo rje 'dzin pa'i rgyal pos 'khor gyi gtso bo rdo rje 'dzin pa thugs bskul ba'i sngags 'di gsungs so/ /badz+ra pA Ni hri da yaM da/ de nas byang chub sems dpa' phyag na rdo rjes bcom ldan 'das la bstod pa/ tad+ya thA/ b+ho b+ho b+han+nA ga a d+hi pa ta ye/ i daM nI lAM ba ra d+ha ra sha rI raM/ badz+ra pA Ni hr-i da yaM/ yaHsa mA ti kra ma tha utshA da naM b+ha bi Sh+ya ti/ bstod pa 'dis bstod pas 'gyur ba bcu gnyis dang / ltas bco brgyad byung bas 'jig rten gyi khams gzhan nas 'byung ba'i lha dang / mi la sogs pa thams cad skrag nas/ dkon mchog gsum la skyabs su mchi'o zhes brjod do/ / 268a @#/ /'jig rten gyi khams gzhan na gnas pa'i bcom ldan 'das kyis rang rang gi gdul bya rnams ma 'jigs shig /mi mjed kyi 'jig rten gyi khams na byang chub sems dpa' phyag na rdo rje bzhugs pas 'jig rten mkhyen pa la bstod pa'i ltas yin gyi zhes gsungs so/ /rang rang gi 'khor dad pa dang ldan pa rnams kyis rang rang gi 'jig rten mkhyen pa la gsol pa/ 'jig rten mkhyen pa/ byang chub sems dpa' de lta bar 'tshal na gnang bar mdzad du gsol/ de nas rang rang gi 'khor rnams rang rang gi ston pa'i 'od la 'jus nas ri rab kyi steng na lcang lo can gyi pho brang gi nang du rang rang gi 'khor dang bcas pa byon no/ /de nas byang chub sems dpa' phyag na rdo rje la mchod pa thams cad kyis mchod de bstod pa byas nas/ byang chub sems dpa' bstod pa yis/ /ngo mtshar ltas kyis 'dir mchis pas/ /'jig rten du 'byung dka' ba yis| |tshar gcad rjes bzung bshad du gsol/ /de nas bcom ldan 'das dam tshig rdo rje zhes bya ba'i ting nge 'dzin la snyoms par zhugs nas dbang bskur ba mdzad do/ / a b+hi Shiny+tsa zhes gsungs pas snod dang ldan par byas so/ /'jig rten gsum 'dul ba zhes bya ba'i rgyud las/ gleng gzhi'i le'u ste dang po'o// //de nas 268b bcom ldan 'das rdo rje 'dzin pa la byang chub sems dpa' phyag na rdo rjes mchod pa thams cad kyis mchod de lan gsum du bskor ba byas nas yang dang / yang du phyag byas nas gsol ba btab pa/ sems can kun la phan pa'i phyir/ /bsrung ba rnams kyi mchog gyur pa/ /phyag na rdo rje bsrung pa'i rgyud/ /zhe sdang gtso bos bshad du gsol/ /de nas ston pa rdo rje 'dzin/ /zhe sdang kun gyi rgya mtsho gtso/ /'bar ba drag po spyan yangs pas/ /gsung ni 'di skad bka' stsal to/ /zla ba'i dkyil 'khor la gnas pa'i/ /dbus su phyag na rdo rje bri/ /de mtha' mtshan ma nyi shu bzhi/ /rang dbus sarba duSh+TaM dang / /sde tshan dang po bcwa brgyad dgod/ /dbus mtshan lte bar ming bris la/ /de rnams phyag na rdo rje'i dbus/ /dbus ma'i phyag na rdo rje la/ /bstod pa'i sngags kyis bskor bar bya/ /rdo rje nyi shu rtsa bzhi la/ /klu 'dul sngags kyis bskor bar bya/ /de nas bcom ldan 'das rdo rje 'dzin pas klu 'dul bar byed pa zhes bya ba'i ting nge 'dzin la snyoms par zhugs nas/ sangs rgyas gang gA klung gis gsungs pa'i rig sngags 'di bka' stsal to/ /tad+ya thA| bud+d+ha bud+d+ha/ bi bud+d+ha bi bud+d+ha/ ma hi prAp+ta/ ha ra ha ra nA gA nAM/ pra ha ra pra ha ra nA gA nAM/ ts+tshin+da ts+tshin+da nA ga hr-i da yA naM/ b+hin+da b+hin+da nA ga marmA Ni/ bi shiR+Yan+tu nA ga sha rI raM Ni/ 269a @#/ /bi s+pho Ta ya/ sngags des klu rnams skrag ste/ rang rang gi gnas su 'bros par chas pa las/ nA ga ya nAn zhes gsungs pas lus mi g.yo bar gyur to| |de nas dkon mchog gsum la skyabs su mchi ste/ rang rang gi gnas su dong ngo / /phyi yi phyag na rdo rje la/ /lha srin sngags kyis bskor bar bya/ /gnyis la rigs kyi nag pos brgyan/ /rgyan dang cha lugs tshang ba la/ /dbus nas rim pa ci bzhin du/ /oM dang hUM mtha' pa Ni'i sngags/ /phreng ba bsnams pa bri bar bya/ /oM gyis rdo rje lte bar mtshan/ / hUM gis shes rab lce la mtshan/ /phyi yi lcags ri dag la ni/ /thabs dang shes rab dag kyang bri/ /bsgrub bya rdo rje lte bar bca'/ /gur kum gyis ni bri bar bya/ /yar ngo'i tshes brgyad nas bzung ste/ /bris nas de nub nas bzung ba/ /bcu bzhi bar du bsnyen par bya/ /bcwa lnga'i nub mo bsgrub pa ste/ /dkyil 'khor cha lugs ldan pa la/ /lha snam steng du pus btsugs la/ /cho ga bzhin du bskyed par bya/ /'khor lo dag la bsang byas la/ /'khor lo stong ba nyid du bsgom/ /stong pa nyid las hUM byung ste/ /de zhu ba las rdo rje ni/ /badz+ra pA Nis lte bar mtshan/ /de las 'phro dang 'dus pa las/ /phyag na rdo rje'i skur bskyed la/ /de snying zla ba rdo rjes mtshan/ /rdo rje lte bar hUM mtshan las/ /'od zer spros te gos 269b sngon bsdu/ /de yi mchod pa sna tshogs mchod/ /bstod dang bdun po byas nas kyang / /'od zer dag gis bkug byas la/ /rang snying rdo rje hUM la thim/ /de la mchod bstod sna tshogs bya/ /rdo rje dag las ye shes kyi/ /me byung rdo rje zhu gyur nas/ /'khor lo'i rnam par gyur par bsam/ /sku ni sku yi rnam pa ste/ /mtshan ma mtshan ma'i rnam par ro/ /sa de bsdus pa gi rti dang / / bsregs pa'i nang du 'khor lo gzhug /de nas byang chub sems dpa' phyag na rdo rjes bstod pa/ sems can rnams la phan gdags phyir/ /ston pa khyab bdag rdo rje 'dzin/ /gdul dka' thams cad 'dul ba yi/ /bsrung ba'i 'khor lo ngo mtshar che/ /'jig rten gsum 'dul ba'i rgyud las/ sa 'og 'dul ba ste le'u gnyis pa'o// //de nas mi mjed kyi 'jig rten gyi khams kyi phyag na rdo rje rnams kyis bcom ldan 'das rdo rje 'dzin pa la mchod pa thams cad kyis mchod nas phyag 'tshal te gsol ba btab pa/ de nas sngags snying kun 'dus pa/ /sems can kun la phan pa'i phyir/ /ston pa dpal ldan rdo rje 'dzin/ /rig sngags gcod byed bshad du gsol/ /de nas ston pa rig sngags gcod/ /gsung ni 'di skad bka' stsal to/ /dang po bsnyen pa bya ba ste/ /mchod rten sngon po brtsigs pa dang / /ras ris la sogs dri bya ste/ /lce yi sgrib pa sbyang ba'i phyir/ /yi 270a @#/ /ge brgya pas bshags par bya/ /de nas tshangs pa'i gnas bzhi bsgom/ /stong pa nyid las 'di gsum mtha'/ /yongs su gyur pas rdo rje ste/ /de la badz+ra pA Nis mtshan/ /lte dbus sngags la lha spro bsdu/ /byas pas phyag na rdo rjer gyur/ /lha yi sku mdog rgyan la sogs/ /rtsa ba'i rgyud las shes par bya/ /bdag nyid thugs ka'i dpal be'u las/ /'od zer 'phros pas bcom ldan bsdu/ /'od zer gnyis pa'i rtse mo las/ /mchod pa rnam pa bcu spros te/ /bcom ldan tshogs la mchod pa bya/ / de nas yang dag bstod byas la/ /'od zer gsum pas snying gar gzhug /snying ga'i mtshan ma zla dkyil thim/ /badz+ra nyi shu gcig dbus gnas/ /de la sngags rgyal bskor bar bya/ /sngags ni rnam pa bzhi ru bshad/ /ming dang don dang spel ba dang / /bzlas pa dag dang rnam pa bzhi/ /bzlas pa rnam pa bcu drug tu/ /rgyud 'di las ni rab tu grags/ /rdo rje yi ni bzlas pa dang / /rin chen pad+ma'i bzlas pa dang / /las kyi bzlas pa bzhi po dag /las bzhi po ni rang bzhin can/ /rang bzhin rdo rje'i bzlas pa dang| |drag po'i las dang zo chun rgyud/ /mgal me'i 'khor lo'i bzlas pa dang / /mda' dang sbrul gyi bzlas pa dang / /'gog pa yi ni bzlas pa dang / /sku bsrungs 270b bka' nyan bzlas pa'o/ /khyab mjug mdung dang tshangs pa'i gzhu/ /mar me lta bu'i bzlas pa'o/ /bzlas pa'i mtshan ma'i rang bzhin te/ /rtag tu lha rnams bum pa yis/ /dbang bskur byed pa byung ba 'am/ /yang na lo brgyad lon pa 'byung / /yang na me tog sngon po ste/ /ma byung na yang dus bsnyen bya/ /de nas bsgrub pa brtsam par bya/ /dkyil 'khor rnam pa bzhi ru bshad/ /zhi rgyas bsdus dang drag po ste/ /'dir ni drag po'i gtso bo'o/ /dkyil 'khor nyams su blang ba'o/ /bla ma lnga ru shes par bya/ /bdag nyid rgyan dang ldan pa la/ /shar gyi phyogs su blta bar bya/ /cho ga gsum gyis dbyung ba'o/ /dpal be'u zhu ba rdo rjer gyur/ /dkyil 'khor dbus kyi lte ba la/ /bcom ldan cho ga bzhin du bskyed/ /ye shes sems dpa' spyan drangs la/ /dpal be'u zhu yi dbus su bsgrub bya gzhag /hUM las skyed pa'i phur bu ni/ be'u hUM dang ni/ /ye shes sems dpa'i thugs dkyil las/ /sngags kyi 'khor lo bskor bar bya/ /de yi dbus su bsgrub bya gzhag /hUM las bskyed pa'i phur bu ni/ /de yi lce las brten par bya/ /gu gul nag po'i spos kyis ni/ /de yi sna nas bdug par bya/ /sngags rgyal nA ga por nas ni/ /mA ra dzi ha gzhug par bya/ /de ni rigs ngan thod par gzhug /mchod rten 271a @#/ /'og tu mnan par bya/ /de steng dug gsum mgo bo ni/ /oM AHhUM/ dar dkar gcig gis phur byas la/ /rim pa dang por gzhug par bya/ /de steng rim pa lnga pa la/ /sha chen la sogs lnga po dag /hUM traM hriHA a/ ra rog kha ru gzhug par bya/ /rim pa bzhi pa dag la ni/ /'khor lo gzhug par bya ba de/ /yaM las rlung dang raM las me/ /de steng 'khor lo rtsibs brgyad bri/ /de steng nyi ma zla ba ste/ /'khor lo dbus kyi lte ba la/ /dgra bo'i mgo bo thur bstan bri/ /de yi snying gar ming bri'o/ /'khor lo yi ni rtsibs brgyad de/ /rtsibs la sngags kyis bskor ba bya/ /ming las bsgrub bya hUM las ston/ /'og gi las ni gnyis kyang bri/ /khra dang spyang gi la sogs pa'i/ /thod par gzugs brnyan bcug nas ni/ /yungs kar dag gis brab byas la/ /rang gi 'og tu gnan par bya/ /gu gul nag po'i spos dag gis/ /de yi sna nas bdug par bya| |seng ldeng phur bu sor bzhi pa/ /gdab pa'i sngags kyis lce la gdab/ /rdo rje rgya gram dag gis ni/ /de yi bug pa dgab par bya/ /nya dang 'byung po'i nyi ma la/ /phur bu bskul zhing yungs kar brdeg /de nas rig sngags 'chang de rnams kyis ched du brjod pa 'di ched du brjod do/ /e ma'o ston pa khyad par 'phags/ /e ma'o thabs 271b kyang khyad par 'phags/ /e ma'o 'khor yang khyad par 'phags/ /khyad par 'phags pa ngo mtshar che/ /'jig rten gsum 'dul ba'i rgyud las/ sa bla 'dul ba'i le'u ste gsum pa'o|| ||de nas 'jig rten gyi khams gzhan nas byon pa'i bcom ldan 'das 'khor dang bcas pas mchod cing phyag 'tshal nas gsol ba btab pa/ bsad pa las kyi 'khor lo 'di/ /sa steng 'dul bar bya ba'i phyir/ /rdo rje chen pos bshad du gsol/ /de nas ston pa rdo rje 'dzin/ /gsung ni 'di skad bka' stsal to/ /rdo rje slob dpon smod pa dang / /theg pa chen po spong ba ni/ /bsdu ba'i dngos por bsdu bar bya/ /de yang dbang du ma gyur na/ /khams gsum sems can thams cad ni/ /sangs rgyas skur ni bsams nas su/ /de yis gsad bsgom nyes pa bsgrag /zhal gsum phyag drug rdo rje 'dzin/ /snying ga nas ni spros byas la/ /de yis bsrung dang 'jig rten lha/ /zhags pa dag gis drangs nas ni/ /oM badz+ra tsaN+Da sarba duSh+TaM be sha dzaH/ /mtshon cha dag gis bcad la sogs/ /oM badz+ra tsaN+Da sarba duSh+TAM ta ka ha na da ha pa tsa hUM phaT/ klu yi bzlas pa 'bum byas te/ /nya dang 'byung po'i nyi ma la/ /bdag nyid rgyan dang ldan byas la/ /rdzas dang sngags kyis bsrung bar bya/ /bzhi mdo lha khang dus nam phyed/ /sngags kyi rgyal po bzlas 272a @#/ /byas te/ /de nas 'khor lo bri bar bya/ /steng 'khor 'og 'khor dug shing gis/ /dga' dang legs pa'i sems kyis bri/ /ras ma nyams la kur bum mchog /dbus su phyag na rdo rje la/ /dpral ba snying ga lkog ma ru/ /yi ge gsum bkod sku gsum ste/ /rgyan dang cha lugs tshang bar bri/ /'khor yug thams cad duSh+TaM bri/ / zhabs dang spyi bo g.yas dang g.yon/ /zla ba nyi ma dbus su ni/ /rgyal po bzhi yi mtshan ma bri/ /mtshams bzhir rdo rje'i gdan la hUM/ /'khor yug la ni shes rab thabs/ / hUM las dam tshig sems dpa' la/ /ye shes spyan drangs mchod de zhu/ /'og 'khor sbal nag yan lag lnga/ /snying dang drug tu ming rus gzhug/ phyogs bzhir rtsibs la mtshams bzhir thod/ /rtsibs dang thod par ming rus te/ /khor yug gnyis la bstod pas bskor/ /sbal khar hri las 'od byung ba/ sa bdag klu chen bkug ste mchod/ /mchod pa'i rdzas ni 'o ma sogs/ /de nas bsgral bya dgug bya ste/ /sku gsung thugs la legs gnas pa/ /ming dang rus la bstim ste bzhag /thod pa las srin hUM las bskyed/ /de la sbyor ba legs par bya/ /klu la dam bdar mchod pa bya/ /phur pas phyogs mtshams gcad par bya/ /'og mas phyogs su drangs na 272b 'grub/ /de nas gsol ba 'debs pa rnams/ /ngo mtshar nas ched du brjod pa/ rmad byung chen po chos rnams la/ /rnam par mi rtog ngo bo nyid/ /chos rnams rang bzhin dag pa la/ kun rdzob tu yang bshad pa mtshar| /de nas thog mar gyur pa'i 'khor rnams 'jig rten gyi khams gzhan nas byon pa'i ston pa 'khor dang bcas pa la/ /mtho 'tshams nas bcom ldan 'das rdo rje 'dzin pas gnod byed thams cad zlog pa zhes bya ba'i ting nge 'dzin la snyoms par zhugs nas/ oM badz+ra pA Ni hr-i da ya gsungs pas gzhan nas byon pa'i ston pa 'khor dang bcas pa'i thugs bskul nas/ tad+ya thA/ hUM phaT/ nA ga bi dA ra NA ya phaT/ nA got+sa da nA ya phaT/ nI lAM ba sa nA ya phaT/ a pra ti ha ta pa la pa ra kra mA ya phaT/ kri tAn+tA ya phaT/ p-i tAn+ta rU pA ya phaT/ ro Sha NA ya phaT/ tra sa nA ya phaT/ kuM b+haN+Ta ut+sA da nA ya phaT/ pre ta pi shA tsa bi nA sha ka rA ya phaT/ yak+Sha a pasmA ra bi nA sha ka rA ya phaT/ ha sa ha sa/ dA ra dA ra/ mA ra ya mA ra ya/ nA sha ya nA sha ya/ sarba big+h+nAn bi nA sha ka rA ya phaT/ sarba sha trUM saM g+ha bi na sha ka rA ya phaT/ nI lAM ba ra d+ha ra badz+ra pA Ni rA dz+nyA pa ya ti swAhA/ gsungs pa tsam gyis dang po'i 'khor rnams skrag par gyur te ched du brjod pa/ e ma'o ston pa byin rlabs che/ /e ma sngags kyi nus pa che/ /e ma che ba'i nyon 273a @#/ /mongs che/ /'khor rnams mnyam pa nyid du gnas/ /'jig rten gsum 'dul ba'i rgyud las/ sa steng 'dul ba'i le'u ste bzhi pa'o// // de nas mi mdzed kyi 'jig rten gsum dang / 'jig rten gyi khams gzhan nas byon pa'i 'jig rten gsum po rnams bcom ldan 'das rdo rje 'dzin pa la mchod pa dang / bstod pa byas te rang rang gi gnas su dong ngo / /de nas rdo rje 'dzin pas byang chub sems dpa' phyag na rdo rje la rgyud 'di 'das pa'i sangs rgyas thams cad kyis gsungs pa 'di chongs shig/ lhogs shig/ ces gsungs so/ /'jig rten gsum 'dul ba'i rgyud las/ yongs su gtad pa'i le'u ste lnga pa'o/ /'jig rten gsum 'dul ba'i rgyud rdzogs so// //rgya gar gyi mkhan po dI paM ka ra dang / zhus chen gyi lots+tsha ba dge slong rin chen bzang pos bsgyur ba'o// |