rKTs


H49

(e-text produced by ACIP)

see text in Tibetan script
367a
//rgya gar skad du/ AR+Ya a mi tA b+ha ba byu ha/ nA ma ma hA yA na sU tra/ bod skad du/ 'phags pa 'od dpag med kyi bkod pa zhes bya ba theg pa chen po'i mdo/ bam po dang po/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na / bcom ldan 'das rgyal po'i khab na bya rgod kyi phung po'i ri la dge slong sum khri nyis stong gi dge slong gi dge 'dun chen po dang thabs gcig tu bzhugs te/ thams cad kyang dgra bcom pa/ zag pa zad pa/ nyon mongs pa med pa/ gnas pa dang ldan pa/ yang dag pa'i shes pas sems shin tu rnam par grol ba/ srid par kun tu sbyor ba yongs su zad pa /
367b
bdag gi don rjes su thob pa/ rnam par rgyal ba dang ldan pa/ dul ba dang zhi ba'i mchog thob pa/ sems shin tu rnam par grol ba/ shes rab shin tu rnam par grol ba/ cang shes pa/ glang po chen po/ mngon par shes pa drug dang ldan pa/ dbang dang ldan par gyur pa/ rnam par thar pa brgyad la bsam gtan pa/ stobs thob pa/ mngon par shes pas mngon par shes pa/ gnas brtan nyan thos chen po sha stag la 'di lta ste/ tshe dang ldan pa kun shes ko'u di n+ya dang / tshe dang ldan pa rta thul dang / tshe dang ldan pa rlangs pa dang / tshe dang ldan pa ming chen dang / tshe dang ldan pa rgyal bzang dang / tshe dang ldan pa grags lha dang / tshe dang ldan pa dri ma med pa dang / tshe dang ldan pa lag bzang dang / tshe dang ldan pa byams ma'i bu gang po dang / tshe dang ldan pa ba glang bdag dang| tshe dang ldan pa lteng rgyas 'od srung dang / tshe dang ldan pa chu klung 'od srung dang / tshe dang ldan pa ga ya 'od srung dang / tshe dang ldan pa gzhon nu 'od srung dang / tshe dang ldan pa 'od srung chen po dang| tshe dang ldan pa shA ri'i bu dang / tshe dang ldan pa mo'u dgal gyi bu chen po dang / tshe dang ldan pa gsus po che dang / tshe dang ldan pa ka pi na chen po dang / tshe dang ldan pa skul byed chen po dang / tshe dang ldan pa ma 'gags pa dang / tshe dang ldan pa grum po dang / tshe dang ldan pa dga' yod dang / tshe dang ldan pa kim pi la dang / tshe dang ldan pa rab 'byor dang / tshe dang ldan pa nam gru dang /
368a
@#/ /tshe dang ldan pa seng ldeng nags pa dang / tshe dang ldan pa ba ku la dang / tshe dang ldan pa legs 'ongs dang / tshe dang ldan pa don yod rgyal po dang / tshe dang ldan pa pha rol son dang / tshe dang ldan pa lam bstan pa dang / tshe dang ldan pa lam phran bstan pa dang / tshe dang ldan pa sgra gcan zin dang / tshe dang ldan pa dga' bo dang / de dag dang gzhan yang mngon par shes pas mngon par shes pa gnas brtan nyan thos chen po sha stag ste/ gang zag gcig ma gtogs pa ni/ 'di lta ste/ slob pa'i lam la gong du bya ba yod pa tshe dang ldan pa kun dga' bo'o/ /byams pa la sogs pa byang chub sems dpa' sems dpa' chen po mang po dang yang thabs gcig go /de nas tshe dang ldan pa kun dga' bo stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de longs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das khyod kyi dbang po rnams ni shin tu dang / zhal gyi mdog ni yongs su dag /pags pa'i mdog ni yongs su byang zhing ser por gda' ste| 'di lta ste/ dper na/ ston gyi gos ser skya yongs su dag pa/ yongs su sbyangs pa/ ser po gda' ba de bzhin du/ bcom ldan 'das kyi dbang po rnams ni shin tu dang / zhal gyi
368b
mdog ni yongs su dag /pags pa'i mdog ni yongs su byang zhing ser por gda' ste/ btsun pa bcom ldan 'das/ 'di lta ste/ dper bgyi na/ 'dzam bu'i chu bo'i gser brgya chad pa mgar ba'am/ mgar ba'i slob ma mkhas pa zhig gi nang du stsal te/ shin tu sbyangs nas la ba ser po'i nang du stsal na shin tu yongs su dag cing yongs su byang la ser por gda' bar 'gyur ro| |de bzhin du bcom ldan 'das kyi dbang po rnams ni shin tu dang / zhal gyi mdog ni yongs su dag /pags pa'i mdog ni yongs su byang zhing ser por gda'o/ /bcom ldan 'das/ bdag gis snga bas kyang ches snga ba na de bzhin gshegs pa'i dbang po 'di ltar dang ba dang / zhal gyi mdog 'di ltar yongs su dag pa dang / pags pa'i mdog yongs su byang zhing ser por gda' ba ma 'tshal to/ /bcom ldan 'das/ de la bdag 'di snyam du bgyid de/ de bzhin gshegs pa de ring 'das pa dang / ma byon pa dang / da ltar byung ba'i de bzhin gshegs pa dgra bcom pa yang dag par rdzogs pa'i sangs rgyas rnams rjes su dgongs shing / de bzhin gshegs pa de ring sangs rgyas kyi gnas pas bzhugs te/ rgyal bar gnas pa dang / thams cad mkhyen pa nyid kyi gnas pa dang / glang po chen po'i gnas pas bzhugs pa snyam bgyid do/ /de skad ces gsol pa dang / bcom ldan 'das kyis tshe dang ldan pa kun dga' bo la 'di
369a
@#/ /skad ces bka' stsal to/ /kun dga' bo/ legs so/ /legs so/ /ci don 'di khyod la lha rnams kyis bsnyad dam/ 'on te sangs rgyas bcom ldan 'das rnams kyis sam/ 'on te bdag rang gi dpyod pa'i shes pas de ltar shes/ de skad ces bka' stsal pa dang / bcom ldan 'das la tshe dang ldan pa kun dga' bos 'di skad ces gsol to/ / bcom ldan 'das/ don 'di ni lha rnams kyis bdag la bsnyad pa yang ma mchis/ sangs rgyas bcom ldan 'das kyis kyang ma lags kyi/ bcom ldan 'das/ bdag rang gi dpyod pa'i 'tshal bas 'di snyam du de bzhin gshegs pa ni de ring 'das pa dang / ma byon pa dang / da ltar byung ba'i de bzhin gshegs pa dgra bcom pa yang dag par rdzogs pa'i sangs rgyas rnams rjes su dgongs shing / de bzhin gshegs pa de ring sangs rgyas kyi gnas pas bzhugs te/ rgyal ba'i gnas pa dang / thams cad mkhyen pa nyid kyi gnas pa dang / glang po chen po'i gnas pas bzhugs so snyam bgyid do/ /de skad ces gsol pa dang / bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo/ khyod kyi rtog pa rgya che ste/ dpyod pa bzang zhing spobs pas dge ste/ kun dga' bo/ khyod skye bo mang po la phan pa dang / skye bo mang po la bde ba'i phyir zhugs pa dang / 'jig rten la snying
369b
brtse ba dang / skye bo'i tshogs phal po che dang / lha dang mi rnams kyi don dang / phan pa dang / bde ba'i phyir khyod de bzhin gshegs pa la don 'di 'dri bar sems pa legs so/ /legs so/ /kun dga' bo| de de bzhin te/ de bzhin gshegs pa dgra bcom pa yang dag par rdzogs pa'i sangs rgyas dpag tu med/ grangs med pa dag gis ye shes mthong ba sdud kyang de bzhin gshegs pa'i ye shes mthong ba la gnod pa med do/ /de ci'i phyir zhe na/ kun dga' bo/ de bzhin gshegs pa'i ye shes mthong ba thogs pa med pa'i phyir te/ kun dga' bo/ de bzhin gshegs pa bzhed na/ bsod snyoms gcig gis bskal pa'am/ bskal pa brgya'am/ bskal pa stong ngam/ bskal pa brgya stong ngam/ de bas kyang lhag par bzhugs kyang de bzhin gshegs pa'i dbang po rnams la nyams pa med do/ /zhal gyi mdog gzhan du 'gyur ba med do/ /pags pa'i mdog la gnod pa med do/ /de ci'i phyir zhe na/ kun dga' bo/ 'di ltar de bzhin gshegs pa ni ting nge 'dzin gyi bde ba'i pha rol tu byon pa'o/ /kun dga' bo/ yang dag par rdzogs pa'i sangs rgyas rnams 'jig rten du 'byung ba shin tu dka' ste/ 'di lta ste/ dper na/ u du ma ba ra'i me tog 'jig rten du 'byung ba dka' ba de bzhin du/ kun dga' bo/ de bzhin gshegs pa dgra bcom pa yang dag par rdzogs pa'i sangs rgyas sems can thams cad kyi don bzhed pa/ phan pa bzhed pa /
370a
@#/ /thugs brtse ba can/ thugs rje chen po la zhugs pa rnams 'jig rten du 'byung ba ni shin tu dka'o/ /kun dga' bo/ gang khyod 'jig rten thams cad kyi slob dpon khong dpa' ba dag 'jig rten du 'byung bar bya ba dang / byang chub sems dpa' sems dpa' chen po rnams kyi don gyi phyir de bzhin gshegs pa la don 'dri bar sems pa de ni de bzhin gshegs pa'i mthu yin no/ /kun dga' bo/ de'i phyir legs par rab tu nyon la yid la gzung zhig dang / ngas khyod la bshad do/ /kun dga' bos bcom ldan 'das de bzhin no zhes gsol te/ bcom ldan 'das kyi ltar nyan pa dang / bcom ldan 'das kyis 'di skad ces bka' stsal to/ /kun dga' bo/ sngon byung ba 'das pa'i dus na 'di nas bskal pa grangs med pa'i yang ches grangs med pa/ shin tu rgyas pa tshang med pa dang / bsam gyis mi khyab par gyur pa de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas mar me mdzad ces bya ba 'jig rten du byung ngo / /kun dga' bo/ de bzhin gshegs pa mar me mdzad kyi snga rol gyi yang ches snga rol du de bzhin gshegs pa 'od ldan zhes bya ba byung ngo / /de'i snga rol gyi yang ches snga rol du de bzhin gshegs pa 'od mdzad ces bya ba byung ngo / /de'i snga rol gyi yang ches snga rol du de bzhin gshegs pa tsan dan
370b
gyi dri zhes bya ba byung ngo / /kun dga' bo/ de bzhin gshegs pa tsan dan gyi dri de'i snga rol gyi yang ches snga rol du de bzhin gshegs pa ri rab lta bu zhes bya ba byung ngo / /de bzhin du de bzhin gshegs pa zla ba'i zhal zhes bya ba byung ngo / /de bzhin gshegs pa dri ma med pa'i zhal zhes bya ba dang / de bzhin gshegs pa mi gos pa zhes bya ba dang / de bzhin gshegs pa 'od dri ma med pa zhes bya ba dang / de bzhin gshegs pa klu zil gyis gnon pa zhes bya ba dang / de bzhin gshegs pa nyi ma'i zhal zhes bya ba dang / de bzhin gshegs pa ri'i rgyal po dbyangs zhes bya ba dang / de bzhin gshegs pa ri rab dbyangs zhes bya ba dang / de bzhin gshegs pa ri rab brtsegs pa zhes bya ba dang / de bzhin gshegs pa gser 'od ces bya ba dang / de bzhin gshegs pa skar ma'i 'od ces bya ba dang / de bzhin gshegs pa baiDUR+Ya snang ba zhes bya ba dang / de bzhin gshegs pa tshangs pa'i dbyangs zhes bya ba dang / de bzhin gshegs pa zla ba zil gyis gnon pa zhes bya ba dang / de bzhin gshegs pa nyi ma'i dbyangs zhes bya ba dang / de bzhin gshegs pa me tog sil ma'i 'od kyi rgyan zhes bya ba dang / de bzhin gshegs pa dpal brtsegs zhes bya ba dang / de bzhin gshegs pa rgya mtsho mchog gi blos rnam par rol pa mngon par mkhyen pa zhes bya ba dang / de bzhin gshegs pa 'od mchog ces bya ba dang / de bzhin gshegs pa spos kyi rgyal po
371a
@#/ /chen por snang ba zhes bya ba dang / de bzhin gshegs pa tha ba dang / dri ma dang / khong khro ba dang bral ba zhes bya ba dang / de bzhin gshegs pa dpal brtsegs zhes bya ba dang / de bzhin gshegs pa rin po che gtong ba zhes bya ba dang / de bzhin gshegs pa yon tan chen po mnga' ba'i blo brnyes pa'i mngon par mkhyen pa zhes bya ba dang / de bzhin gshegs pa 'od kyis nyi zla'i zil du brlag par mdzad ces bya ba dang / de bzhin gshegs pa bai DUR+Ya sbyangs par snang ba zhes bya ba dang / de bzhin gshegs pa sems kyi rgyud kyi blo shin tu rgyas pa mngon par 'phags pa zhes bya ba dang / de bzhin gshegs pa me tog gi phreng ba'i nags kyi rgyal po me tog kun du rgyas pa mngon par mkhyen pa zhes bya ba dang / de bzhin gshegs pa me tog gi 'byung gnas zhes bya ba dang / de bzhin gshegs pa chu zla lta bu zhes bya ba dang / de bzhin gshegs pa ma rig pa'i mun pa rnam par 'joms pa zhes bya ba dang / de bzhin gshegs pa 'jig rten dbang po zhes bya ba dang / de bzhin gshegs pa mu tig byi ru 'dra ba'i gdugs zhes bya ba dang / de bzhin gshegs pa bzhed pa zhes bya ba dang / de bzhin gshegs pa chos kyi blo gros kyis bsgrags pa'i rgyal po zhes bya ba dang / de bzhin gshegs pa seng ge dang rgya mtsho brtsegs pa ltar bsgrags pa'i rgyal po zhes bya ba dang / de
371b
bzhin gshegs pa rgya mtsho ri rab zla ba zhes bya ba dang / de bzhin gshegs pa tshangs pa'i dbyangs kyi nga ro la mngon par dgos pa zhes bya ba dang / de bzhin gshegs pa me tog 'byung zhes bya ba dang / de bzhin gshegs pa sde brnyes zhes bya ba dang / de bzhin gshegs pa nyi zla zhes bya ba dang / de bzhin gshegs pa lhun po brtsegs zhes bya ba dang / de bzhin gshegs pa zla 'od ces bya ba dang / de bzhin gshegs pa dri ma med pa'i spyan zhes bya ba dang / de bzhin gshegs pa ri bo'i rgyal po sgra dbyangs zhes bya ba dang / de bzhin gshegs pa me tog 'od ces bya ba dang / de bzhin gshegs pa me tog gi char rab tu 'thor ba zhes bya ba dang / de bzhin gshegs pa rin po che'i gdugs zhes bya ba dang / de bzhin gshegs pa pad+mas srang mdzes par mdzad ces bya ba dang / de bzhin gshegs pa tsan dan gyi dri zhes bya ba dang / de bzhin gshegs pa rgya spos dri zhes bya ba dang / de bzhin gshegs pa rin po cher snang ba zhes bya ba dang / de bzhin gshegs pa mu khyud ces bya ba dang / de bzhin gshegs pa bkod pa chen po zhes bya ba dang / de bzhin gshegs pa tha ba dang / zhe sdang dang bral ba zhes bya ba dang / de bzhin gshegs pa tshangs pa'i dbyangs zhes bya ba dang / de bzhin gshegs pa rin po che sna bdun gyi char 'bebs pa zhes bya ba dang / de bzhin gshegs pa yon tan chen po mnga' ba zhes bya ba dang / de
372a
@#/ /bzhin gshegs pa ta ma la'i lo ma dang / tsan dan gyi rdzab can zhes bya ba dang / de bzhin gshegs pa me tog mngon par mkhyen zhes bya ba dang / de bzhin gshegs pa mi shes pa rnam par 'joms zhes bya ba dang / de bzhin gshegs pa ral pa can zhes bya ba dang / de bzhin gshegs pa mu tig gi gdugs zhes bya ba dang / de bzhin gshegs pa gser gyi snying po zhes bya ba dang / de bzhin gshegs pa bai DUR+Ya'i snying po zhes bya ba dang / de bzhin gshegs pa me tog chen po zhes bya ba dang / de bzhin gshegs pa chos kyi tog ces bya ba dang / de bzhin gshegs pa rin chen dpal zhes bya ba dang / de bzhin gshegs pa mi'i dbang po zhes bya ba dang / de bzhin gshegs pa 'jig rten dbang po zhes bya ba dang / de bzhin gshegs pa thugs rje can zhes bya ba dang / de bzhin gshegs pa 'jig rten mdzes zhes bya ba dang / de bzhin gshegs pa tshangs pa'i tog ces bya ba dang / de bzhin gshegs pa chos kyi blo gros zhes bya ba dang / de bzhin gshegs pa seng ge zhes bya ba dang / de bzhin gshegs pa seng ge'i blo gros zhes bya ba byung ste/ kun dga' bo/ de bzhin gshegs pa seng ge'i blo gros kyi snga rol gyi yang ches snga rol du de bzhin gshegs pa dgra bcom pa yang dag par rdzogs pa'i sangs rgyas mkhyen pa dang zhabs su ldan pa/ bde bar gshegs
372b
pa 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'jig rten dbang phyug rgyal po zhes bya ba 'jig rten du byung ngo / /kun dga' bo/ de bzhin gshegs pa dgra bcom pa yang dag par rdzogs pa'i sangs rgyas 'jig rten dbang phyug rgyal po de'i bstan pa la dge slong chos kyi 'byung gnas zhes bya ba shas cher dran pa dang ldan pa/ blo gros dang ldan pa/ rtogs pa dang ldan pa/ shes rab dang ldan pa/ brtson 'grus dang ldan pa/ rgya chen po la mos pa zhig byung ngo / /kun dga' bo/ de nas dge slong chos kyi 'byung gnas de stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das de bzhin gshegs pa 'jig rten dbang phyug rgyal po ga la ba de logs su thal mo sbyar ba btud nas/ bcom ldan 'das la phyag 'tshal te/ de'i tshe tshigs su bcad pa 'di dag gis mngon sum du bstod do/ / 'od ni dpag med blo ni mtha' yas mtshungs/ /gzhan gyi 'od ni gang yang mi gsal te/ /nyi zla nor bu sna tshogs 'od rnams ni/ /'jig rten kun na lham me lhan me lags/ /sems can snying po'i gzugs ni mtha' yas te/ /de bzhin sangs rgyas gsung ni mtha' yas dbyangs/ /tshul khrims ting 'dzin shes rab brtson 'grus kyang / /khyod 'dra 'jig rten 'di na gzhan
373a
@#/ /ma mchis/ /zab cing shin tu rgyas pa'i chos brnyes pa/ /sangs rgyas mchog gi thugs ni rgya mtsho bzhin/ /des kyang ston la khengs pa mi mnga' ste/ /tha ba zhe sdang spangs nas pha mthar sgrol/ /ji ltar sangs rgyas mchog gi gzi mtha' yas/ /mi dbang gzi brjid phyogs kun lham mer gda'/ /de ltar bdag kyang sangs rgyas chos rgyal gyur/ /skye rgu rga dang 'chi las rab thar bgyi/ /sbyin dang dul dang tshul khrims bzod brtson 'grus/ /bsam gtan ting 'dzin de bzhin shes rab mchog /brtul zhugs 'di dag bdag gis yang dag blang / /sems can kun skyob sangs rgyas 'gyur bar bgyi/ /byang chub zhi mchog mtshungs med tshol bgyid cing / /sangs rgyas bye ba brgya stong du ma'i phrag /gang+gA'i bye ma lta bur mtha' yas pa/ /mgon po de kun bdag gis mchod par bgyi/ /gang gis rdul dang mnyam pa'i 'jig rten khams/ /de bas gong du mtha' yas zhing gi khams/ /de dag kun du 'od ni rab 'byin pa/ /'di 'dra'i brtson 'grus stobs ni brtsam par bgyi/ /bdag gis zhing yangs gtso bo dam pa mchog /'dus byas 'dir ni brgyan par bgyis nas su/ /mtshungs pa ma mchis mya ngan 'das dbyings bde/ /de yang ma mchis pas ni rnam par sbyang / /phyogs bcu dag nas lhags pa'i sems can rnams/ /der lhags myur du bde la dga' bar gyur/ /
373b
sangs rgyas tshad ma 'di ni bdag gi dbang / /ma log brtson 'grus stobs ni bskyed par 'tshal/ /phyogs bcu'i 'jig rten mi chags mkhyen pa can/ /mkhas pa de dag rtag tu bdag sems mkhyen/ /bdag ni mtshams med mchis te rtag gnas bgyi/ /smon lam stobs las log par yong mi bgyi/ /kun dga' bo/ de nas dge slong chos kyi 'byung gnas des/ bcom ldan 'das de bzhin gshegs pa 'jig rten dbang phyug rgyal po la tshigs su bcad pa 'di dag gis mngon par bstod nas 'di skad ces gsol to/ /bcom ldan 'das/ bdag ni bla na med pa yang dag par rdzogs pa'i byang chub mngon par rdzogs par 'tshang rgya bar 'tshal te/ yang dang yang bla na med pa yang dag par rdzogs pa'i byang chub tu sems bskyed cing yongs su bsngo ba bgyid na/ ci nas kyang bdag myur du bla na med pa yang dag par rdzogs pa'i byang chub mngon par rdzogs par 'tshang rgya ba dang / 'jig rten du de bzhin gshegs pa mi mnyam pa dang mnyam par 'gyur ba de lta bu'i chos bcom ldan 'das kyis bdag la legs par bstan du gsol/ rnam pa gang dag gis bdag gi sangs rgyas kyi zhing gi yon tan gyi rgyan bkod pa phun sum tshogs pa yongs su 'dzin par 'gyur ba'i rnam pa de yang bcom ldan 'das kyis bdag la yongs su brjod du gsol/ kun dga' bo/ de skad ces gsol pa dang / bcom ldan 'das de bzhin gshegs pa
374a
@#/ /'jig rten dbang phyug rgyal pos dge slong chos kyi 'byung gnas de la 'di skad ces bka' stsal to/ /de'i phyir dge slong khyod bdag nyid kyi sangs rgyas kyi zhing gi yon tan gyi rgyan bkod pa phun sum tshogs pa yongs su gzung zhig /des gsol pa/ bcom ldan 'das/ bdag spro ba ma mchis so/ /de bzhin gshegs pa gzhan dag gis sangs rgyas kyi zhing gi yon tan bkod pa'i rgyan phun sum tshogs pa gang thos nas bdag gis rgyan bkod pa thams cad yongs su rdzogs par 'gyur ba bcom ldan 'das kyis bshad du gsol/ kun dga' bo/ de nas de bzhin gshegs pa dgra bcom pa yang dag par rdzogs pa'i sangs rgyas 'jig rten dbang phyug rgyal po des dge slong de'i bsam pa mkhyen nas don bzhed pa phan pa bzhed pa thugs brtse ba can gyi thugs brtse ba nye bar gzung ste/ sangs rgyas kyi tshul mi gcad pa'i phyir sems can rnams la thugs rje chen po bskyed nas lo bye ba tham par sangs rgyas bye ba khrag khrig brgya stong phrag brgyad cu rtsa gcig gi sangs rgyas kyi zhing gi yon tan gyi rgyan bkod pa phun sum tshogs pa rnam pa dang bcas/ yul phyogs dang bcas/ gzhi ci las gyur pa dang bcas par yang dag par rab tu bshad do/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ bcom ldan 'das 'jig rten
374b
dbang phyug rgyal po de'i sku tshe'i tshad ji tsam zhig thub par 'gyur/ de skad ces gsol pa dang / bcom ldan 'das kyis tshe dang ldan pa kun dga' bo la 'di skad ces bka' stsal to/ /de bzhin gshegs pa 'jig rten dbang phyug rgyal po de'i tshe'i tshad ni bskal pa bye ba khrag khrig brgya stong phrag bzhi bcu tham pa thub par gyur to/ /kun dga' bo/ de nas dge slong chos kyi 'byung gnas des sangs rgyas bye ba khrag khrig brgya stong phrag brgyad cu rtsa gcig po de dag gi sangs rgyas kyi zhing gi yon tan gyi rgyan bkod pa phun sum tshogs pa gang yin pa de dag thams cad sangs rgyas kyi zhing gcig tu yongs su bzung nas/ bcom ldan 'das de bzhin gshegs pa 'jig rten dbang phyug rgyal po de'i zhabs la mgo bos phyag 'tshal te/ bskor ba byas nas bcom ldan 'das de'i gan nas song ngo / /gang du yang bskal pa lngar sangs rgyas kyi zhing gi yon tan gyi rgyan bkod pa phun sum tshogs pa shin tu tha gru che ba/ shin tu gya nom pa/ sngon phyogs bcu'i 'jig rten gyi khams thams cad du ma byung ba dag kyang yongs su bzung bar gyur to/ /smon lam shin tu rgya chen po yang btab bo/ /kun dga' bo/ de ltar dge slong chos kyi 'byung gnas des sangs rgyas bye ba khrag khrig brgya stong phrag brgyad cu rtsa gcig po de dag gi zhing phun sum tshogs pa gang brjod pa de bas kyang sangs rgyas kyi zhing phun sum tshogs pa ches lhag par tha gru che ba/ ches gya
375a
@#/ /nom pa/ ches dpag tu med pa yongs su bzung ste/ bcom ldan 'das 'jig rten dbang phyug rgyal po ga la ba der song ste/ phyin nas bcom ldan 'das de'i zhabs la mgo bos phyag 'tshal te/ 'di skad ces gsol to/ /bcom ldan 'das/ bdag gis sangs rgyas kyi zhing gi yon tan gyi rgyan bkod pa phun sum tshogs pa yongs su bzung lags so/ /kun dga' bo/ de skad ces gsol pa dang / de bzhin gshegs pa 'jig rten dbang phyug rgyal po des dge slong chos kyi 'byung gnas de la 'di skad ces bka' stsal to/ /de'i phyir de bzhin gshegs pa yang rjes su yi rang ba mdzad kyi dge slong gis smros shig /'di ni de'i dus yin gyi/ 'khor dga' bar gyis shig /mgu ba skyed cig /seng ge'i sgra sgrogs shig /de thos nas byang chub sems dpa' sems dpa' chen po dag da ltar dang / ma 'ongs pa'i dus na sangs rgyas kyi zhing phun sum tshogs pa smon lam gyi gnas 'di lta bu yongs su 'dzin par 'gyur/ yongs su rdzogs par byed par 'gyur ro/ /kun dga' bo/ de nas dge slong chos kyi 'byung gnas des de'i tshe bcom ldan 'das de la 'di skad ces gsol to/ /de'i slad du ji ltar bdag bla na med pa yang dag par rdzogs pa'i byang chub tu mngon par rdzogs par sangs rgyas pa'i tshe sangs rgyas kyi zhing de'i yon tan gyi rgyan bkod pa bsam gyis mi khyab pa
375b
dang ldan par 'gyur ba'i bdag gi smon lam gyi khyad par bcom ldan 'das kyis bdag la gsan du gsol/ bcom ldan 'das/ gal te bdag gi sangs rgyas kyi zhing de na sems can dmyal ba dang / dud 'gro'i skye gnas dang / yi dwags kyi yul dang / lha ma yin gyi ris mchis par gyur pa de srid du bdag bla na med pa yang dag par rdzogs pa'i byang chub tu mngon par rdzogs par 'tshang rgya bar mi bgyi'o/ /bcom ldan 'das/ gal te bdag gis sangs rgyas kyi zhing der sems can gang dag skyes par gyur pa de dag de nas shi 'phos nas sems can dmyal ba'am/ dud 'gro'i skye gnas sam/ yi dwags kyi yul lam/ lha ma yin gyi ris su mi ltung bar gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing der sems can gang dag skyes pa de dag thams cad 'di lta ste/ gser gyi kha dog tu kha dog gcig par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing de na lha dang / mi tha dad pa dag gda' bar gyur par gzhan du na kun rdzob kyi tha snyad tsam du ming dang brdas lha dang mi zhes bgyi ba'i grangs su mchi bar ma gyur pa de srid du bdag bla na med pa yang dag par rdzogs
376a
@#/ /pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing der sems can gang dag skyes par gyur pa de dag thams cad gal te tha na sems kyi skad cig thang cig la sangs rgyas kyi zhing bye ba khrag khrig brgya stong 'da' ba'i rdzu 'phrul la dbang dam pa'i pha rol du son par ma gyur pa de srid du bdag bla na med pa yang dag par rdzogs pa'i byang chub tu mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing der sems can gang dag skyes par gyur pa de dag thams cad tha na bskal pa bye ba khrag khrig brgya stong rjes su dran pa'i tshe rabs dran par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing der sems can gang dag skyes par gyur pa de dag thams cad tha na 'jig rten gyi khams bye ba khrag khrig brgya stong mthong ba'i lha'i mig thob par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing der sems can gang dag skyes par gyur pa de dag thams cad tha na sangs rgyas kyi zhing bye ba khrag khrig brgya
376b
stong du cig car chos nyan pa'i lha'i rna ba thob par ma gyur pa de srid du bdag bla na med par yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing der sems can gang dag skyes par gyur pa de dag thams cad tha na sangs rgyas kyi zhing bye ba khrag khrig brgya stong du gtogs pa'i sems can rnams kyi sems kyi spyod pa yongs su 'tshal bar pha rol gyi sems 'tshal ba la mkhas par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing der sems can gang dag skyes par gyur pa de dag tha na rang gi lus la yongs su 'dzin pa'i 'du shes 'ga' zhig bskyed na yang de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag gi sangs rgyas kyi zhing der sems can gang dag skyes par gyur pa de dag thams cad yongs su mya ngan las 'das pa chen po'i bar du 'di lta ste/ yang dag pa nyid la nges par ma gyur pa de srid du bdag bla na med pa yang dag par rdzogs pa'i byang chub tu mngon par rdzogs par 'tshang rgya bar mi bgyi'o/ /bcom ldan 'das/ gal te bdag bla na med pa yang dag par rdzogs pa'i byang
377a
@#/ /chub tu mngon par rdzogs par sangs rgyas pa'i tshe/ sangs rgyas kyi zhing de na sems can 'ga' zhig gis nyan thos rnams kyi tshad kyi grangs rnyed par 'gyur pa lta na/ tha na stong gsum gyi stong chen po'i 'jig rten gyi khams su gtogs pa'i sems can thams cad rang sangs rgyas su gyur pa la/ bskal pa bye ba khrag khrig brgya stong du bgrangs te grangs rnyed par gyur na yang de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag bla na med pa yang dag par rdzogs pa'i byang chub mngon par rdzogs par sangs rgyas pa'i tshe/ sangs rgyas kyi zhing der bdag gi 'od tha na sangs rgyas kyi zhing bye ba khrag khrig brgya stong gi tshad kyi tshad dang ldan par gyur na yang de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag bla na med pa yang dag par rdzogs pa'i byang chub mngon par rdzogs par sangs rgyas pa'i tshe/ sangs rgyas kyi zhing de na smon lam gyi dbang ma gtogs par sems can rnams kyi tshe'i ched la chad mchis par gyur pa de srid du bdag bla na med pa yang dag par rdzogs pa'i byang chub tu mngon par rdzogs par 'tshang rgya bar mi bgyi'o/ /bcom ldan 'das/ gal te
377b
bdag byang chub thob pa'i tshe tshe'i tshad tha na bskal pa bye ba khrag khrig brgya stong du bgrangs bas mthar phyin par gyur na yang de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na sems can rnams la mi dge ba'i ming mchis par gyur na yang de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing dpag tu ma mchis pa dag na sangs rgyas bcom ldan 'das grangs ma mchis pa dpag tu ma mchis pa dag ming yongs su brjod par ma gyur tam/ bsngags pa mi brjod dam / bstod pa mi brjod dam/ grags pa mi brjod pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sems can gang dag 'jig rten gyi khams gzhan dag tu bla na med pa yang dag par rdzogs pa'i byang chub tu sems bskyed nas bdag gi ming thos te| sems rab tu dang bar gyur la/ bdag rjes su dran pa de dag la gal te 'gum pa'i dus nye bar gnas pa'i tshe bdag dge slong gi dge 'dun gyis yongs su bskor cing mdun du bdar
378a
@#/ /ba'i mdun du 'di lta ste/ g.yeng ba ma mchis pa'i sems kyis gnas par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing grangs ma mchis pa/ dpag tu ma mchis pa dag na sems can gang dag gis bdag gi ming thos nas sangs rgyas kyi zhing der skye bar bgyi ba'i slad du sems gtong zhing dge ba'i rtsa ba rnams kyang yongs su bsngo bar bgyid na mtshams ma mchis pa bgyid pa dang / dam pa'i chos spong ba'i sgrib pas bsgribs pa'i sems can rnams ma gtogs par de dag tha na sems bskyed pa'i 'gyur ba bcus sangs rgyas kyi zhing der skye bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing der sems can gang dag skyes par gyur pa de dag thams cad skyes bu chen po'i mtshan sum cu rtsa gnyis dang ldan par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing der
378b
sems can gang dag skyes par gyur pa/ byang chub sems dpa' sems dpa' chen po go cha chen po bgos pa/ 'jig rten thams cad kyi don du go cha bgos pa/ 'jig rten thams cad kyi don la brtson pa/ 'jig rten thams cad yongs su mya ngan las bzla ba la mngon par brtson pa/ 'jig rten gyi khams thams cad du byang chub sems dpa'i spyad pa spyod par 'tshal ba/ sangs rgyas thams cad la phu dud bgyi bar 'tshal ba/ sems can gang+gA'i klung gi bye ma snyed bla na med pa yang dag par rdzogs pa'i byang chub la dgod par 'tshal ba yang gong ma'i spyod pa la mngon du phyogs pa/ kun tu bzang po'i spyod pas nges par byung ba rnams kyi smon lam gyi khyad par ma gtogs par de dag thams cad bla na med pa yang dag par rdzogs pa'i byang chub tu skye ba gcig gis thog par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe/ sangs rgyas kyi zhing der sems can gang dag skyes par gyur pa de dag thams cad snga dro gcig bzhin sangs rgyas kyi zhing gzhan dag tu mchis la/ sangs rgyas brgya phrag mang po dang / sangs rgyas stong phrag mang po dang / sangs rgyas brgya stong phrag mang po dang / sangs rgyas bye ba phrag mang po nas sangs rgyas bye ba khrag khrig brgya stong phrag mang po dag la
379a
@#/ /'di lta ste/ sangs rgyas kyi mthus bde bar sbyar ba thams cad kyis bsnyen bkur bgyid par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na byang chub sems dpa' de dag 'di lta ste/ gser ram/ dngul lam/ nor bu'am/ mu tig gam/ bai DUR+Ya'am/ dung ngam/ man shel lam/ byi ru'am/ shel lam/ spug gam/ rdo'i snying po'am/ mu tig dmar po la sogs pa gang yang rung ba'am/ rin po che thams cad dam/ me tog dang / spos dang / phreng ba dang / byug pa dang / bdug pa dang / phye ma dang / gos dang / gdugs dang / rgyal mtshan dang / ba dan dang / mar me thams cad dang / glu dang / gar dang / rol mo'i dbyangs sgra'am/ rnam pa ji lta bu dag 'tshal bar gyur nas dge ba'i rtsa ba rnams bskrun pa rnam pa de lta bu de dag sems bskyed ma thag tu gal te de dag la byung bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing der sems can gang dag skyes par gyur pa de dag thams cad thams cad mkhyen pa nyid
379b
dang ldan pa'i chos kyi bka' mchid mchi bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang brgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na byang chub sems dpa' gang dag 'di snyam du bdag cag 'jig rten gyi khams 'di na gnas bzhin du sangs rgyas kyi zhing grangs med dpag tu med pa dag tu sangs rgyas bcom ldan 'das rnams la 'di lta ste/ na bza' dang / zhal zas dang / gzims cha dang / snyun gsos kyi sman dang / yo byad rnams dang / me tog dang / bdug pa dang / spos dang / phreng ba dang / byug pa dang / phye ma dang / na bza' dang / gdugs dang / rgyal mtshan dang / ba dan rnams dang / glu dang / gar dang / sil snyan dang / rin po che rnam pa tha dad pa'i char rnams kyis bsti stang du bgyi ba dang / bla mar bgyi ba dang / rim gror bgyi ba dang / mchod par bgyi bar sems bskyed la/ de dag gis sems bskyed ma thag tu gal te 'di ltar sangs rgyas bcom ldan 'das de dag gis thugs brtse ba nye bar bzung ste/ mchod pa de dag bzhes par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing der sems can gang dag skyes par
380a
@#/ /gyur pa de dag thams cad sred med kyi bu dang / rdo rje ltar mkhregs pa'i lus dang / mthu thob par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na rgyan gyi kha dog sems can 'ga' zhig gis lha'i mig gis mtha' blta na yang sangs rgyas kyi zhing 'di'i gzi brjid ni 'di lta bu'o/ /kha dog ni 'di lta bu'o/ /'byor pa ni 'di lta bu'o zhes kha dog tha dad pa dag 'tshal bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na thams cad kyi nang nas byang chub sems dpa' gang dge ba'i rtsa ba chung ba des kyang byang chub kyi shing dpag tshad stong drug brgya tsam du mthong bar 'tshal bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na byang chub sems dpa' gang lung nod pa dang / kha ton bgyid par gyur pa de dag thams cad so so yang dag par rig pa thob par ma gyur pa de srid du bdag bla na med
380b
pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing der sems can gang dag skyes par gyur pa de dag thams cad shes rab dang spobs pa mtha' yas pa thob par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing der gang na kun du sangs rgyas kyi zhing dpag tu ma mchis/ grangs ma mchis/ bsam gyis mi khyab/ mtshungs pa ma mchis/ tshad ma mchis pa dag kun du gda' ba 'di lta ste/ dper bgyi na/ shin tu phyis pa'i me long gi dkyil 'khor la bzhin gyi dkyil 'khor gda' ba de lta bu'i 'od gsal bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na sa'i steng nas bzung ste bar snang gi bar las lha dang mi'i yul las shin tu 'das pa'i gdug pa rigs bzang po de bzhin gshegs pa dang / byang chub sems dpa' la 'os pa dag dri rab tu bda' ba'i pog snod rin po che sna tshogs las bgyis pa brgya stong dag nas rtag tu gdugs par ma gyur pa de srid du bdag bla na med pa yang dag par
381a
@#/ /rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na me tog dri rab tu bda' ba tha dad pa'i char rtag tu 'bab par gyur pa dang / rol mo'i dbyangs sgra'i nga ro yid du mchi ba'i sprin rtag tu sgra 'byung bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe bdag gi 'od kyis 'jig rten gyi khams grangs ma mchis/ bsam gyis mi khyab/ mtshungs pa ma mchis pa dag tu sems can gang dag la gsal bar gyur pa de dag thams cad lha dang mi las shin tu 'das pa'i bde ba dang ldan par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe kun du sangs rgyas kyi zhing dpag tu ma mchis/ grangs ma mchis/ bsam gyis mi khyab/ mtshungs pa ma mchis/ tshad ma mchis pa dag tu byang chub sems dpa' dag gis bdag gi ming thos te/ thos ma thag pa las byung ba'i dge ba'i rtsa bas tshe brjes nas byang chub kyi snying po'i mtha'i bar du gzungs thob par ma gyur pa de srid du bdag bla na med pa
381b
yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe kun du sangs rgyas kyi zhing grangs ma mchis/ bsam gyis mi khyab/ mtshungs pa ma mchis/ tshad ma mchis pa dag na bud med gang dag gis bdag gi ming thos nas rab tu dang ba skyes te/ byang chub tu sems bskyed par gyur la/ bud med kyi lus la smod par gyur te/ de dag tshe brjes nas gal te bud med kyi lus lan gnyis thob par gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing dpag tu ma mchis/ grangs ma mchis/ bsam gyis mi khyab/ mtshungs pa ma mchis/ tshad ma mchis pa dag na sems can gang dag gis bdag gi ming thos par gyur la/ ming thos pa tsam gyis byang chub kyi snying po'i mtha'i bar du tshangs par spyod par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe phyogs bcu kun du sangs rgyas kyi zhing dpag tu ma mchis/ grangs ma mchis/ bsam gyis mi khyab/ mtshungs pa ma mchis/ tshad ma mchis pa dag na sems can gang dag gis bdag gi ming thos pa
382a
@#/ /la yan lag lnga'i phyag bgyi bas phyag 'tshal ba dang / de dag byang chub sems dpa'i spyad pa spyod pa na lha dang bcas pa'i 'jig rten gyis bsti stang du bgyi bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing de na byang chub sems dpa' gang chos gos 'khru'am/ skems sam/ 'drub bam/ 'tshed pa'i las bgyid par gyur la/ chos gos rin po che sar pa khre'u tshang rigs bzang ba de bzhin gshegs pas gnang ba dag sems bskyed ma thag tu bgos par bdag gis 'tshal bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing der sems can gang dag skyes ma thag tu 'di lta ste/ dper na/ dge slong dgra bcom pa yongs su gdung ba ma mchis pa/ bsam gtan gsum pa la snyoms par zhugs pa lta bur bde ba rnam pa de lta bu thob par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe
382b
sangs rgyas kyi zhing der byang chub sems dpa' gang dag skyes par gyur pa de dag sangs rgyas kyi zhing gi yon tan gyi rgyan bkod pa rnam pa ji lta bu dag 'dod par gyur pa rnam pa de lta bu dag rin po che'i shing sna tshogs las 'tshal bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe byang chub sems dpa' sangs rgyas kyi zhing gzhan du skyes pa dag gis bdag gi ming thos la/ dbang po ma tshang pa med pa thob par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe/ sangs rgyas kyi zhing gzhan na gnas pa'i byang chub sems dpa' dag gis bdag gi ming thos ma thag tu shin tu rnam par phye ba zhes bgyi ba'i ting nge 'dzin thob par ma gyur pa dang / byang chub sems dpa' ting nge 'dzin de la gnas nas skad cig gcig 'das pa tsam gyis sangs rgyas bcom ldan 'das dpag tu ma mchis/ grangs ma mchis/ bsam gyis mi khyab/ mtshungs pa ma mchis/ tshad ma mchis pa dag mthong la/ ting nge 'dzin de bar ma dor chab 'tshal bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par
383a
@#/ /'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sems can dag gis bdag gi ming thos la/ thos ma thag pa las byung ba'i dge ba'i rtsa bas sems can rnams byang chub kyi mtha'i bar du rigs bzang po'i rigs su skye ba thob par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe 'di las gzhan du gyur pa'i sangs rgyas kyi zhing rnams su byang chub sems dpa' gang dag gis bdag gi ming thos par gyur la/ de thos ma thag pa las byung ba'i dge ba'i rtsa bas byang chub kyi mtha'i bar du thams cad byang chub sems dpa'i spyod pa la dga' ba dang / mchog tu dga' ba'i dge ba'i rtsa ba dang phrad par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe 'di las gzhan du gyur pa'i 'jig rten gyi khams rnams su byang chub sems dpa' gang dag gis bdag gi ming thos ma thag tu kun gyi rjes su song ba zhes bgyi ba'i ting nge 'dzin thob par ma gyur pa dang / byang chub sems dpa' dag ting nge 'dzin de la gnas nas skad cig gcig
383b
'das pa tsam gyis sangs rgyas bcom ldan 'das grangs ma mchis/ dpag tu ma mchis/ bsam gyis mi khyab/ mtshungs pa ma mchis/ tshad ma mchis pa dag la bsti stang bgyid la/ ting nge 'dzin de byang chub kyi snying po'i mtha'i bar du bar ma dor cha ba 'tshal bar ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing der sems can gang dag skyes par gyur pa de dag chos bstan pa rnam pa ji lta bu nyan 'tshal bar gyur pa chos bstan pa rnam pa de lta bu sems bskyed ma thag tu thos par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing gzhan dag tu byang chub sems dpa' gang dag gis bdag gi ming thos pa de dag bdag gi ming thos ma thag tu bla na med pa yang dag par rdzogs pa'i byang chub las phyir mi ldog par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /bcom ldan 'das/ gal te bdag byang chub thob pa'i tshe sangs rgyas kyi zhing gzhan dag tu byang chub sems dpa' gang dag gis bdag gi ming thos par gyur pa de dag gi ming thos ma thag tu bzod pa dang po dang /
384a
@#/ /gnyis pa dang / gsum pa thob par ma gyur pa dang / sangs rgyas kyi chos rnams las phyir mi ldog par ma gyur pa de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bgyi'o/ /kun dga' bo/ de nas dge slong chos kyi 'byung gnas des smon lam gyi khyad par rnam pa 'di lta bu 'di dag bstan nas sangs rgyas kyi mthus de'i tshe tshigs su bcad pa 'di dag gsol to/ /gal te dag gis byang chub thob tshe smon lam mchog /khyad par 'phags pa rnam pa 'di 'drar ma gyur na/ /stobs bcu mnga' ba mtshungs pa ma mchis sbyin pa'i gnas/ /mi yi seng ge sems can snying por bdag ma gyur/ /gal te bdag zhing rnam pa de 'drar ma gyur la/ /sems can dbul mang nor mang stsal par ma gyur cing / /sdug bsngal gyur pa'i mi dag bde bar ma bgyis par/ /mi yi rgyal po dkon mchog tu ni bdag ma gyur/ / bdag ni byang chub snying por nye bar mchis pa'i tshe/ /phyogs bcu dag gi zhing rnams mang po tha gru che/ /mtha' yas dag tu myur du ming grags ma gyur par/ /'jig rten mgon po stobs brnyes par ni bdag ma gyur/ /byang chub mtshungs med zhi ba yang dag tshol ba na/ /dran dang blo gros rtogs pa rnam par nyams gyur cing / /gal te bdag ni 'dod pa'i longs spyod spyod gyur
384b
na| |'jig rten ston pa stobs brnyes par ni bdag ma gyur/ /shin tu rgyas 'od mtshungs pa ma mchis mtha' yas pa/ /phyogs dang phyogs mtshams mgon po'i sangs rgyas zhing kun khyab| |'dod chags zhe sdang gti mug thams cad rab zhi zhing / /sems can dmyal bar dong ba'i me rnams zhi bar bgyi/ /shin tu mdzes shing yangs pa'i mig ni phyi nas su/ /mi rnams kun gyi mun nag rnam par bsal bar bgyi/ /dal ba med pa dag ni ma lus bsal nas su/ /gzi brjid mtha' yas mtho ris lam du gzung bar bgyi/ /sngon gyi spyod pa yongs su dag par spyad nas ni/ /mkha' la nyi zla'i 'od ni lam me ma lags shing / /nor bu'i tshogs dang me dang lha yi 'od rnams kyang / /mi yi seng ge'i 'od kyis thams cad zil gyis mnan/ /skyes bu mchog gyur sdug bsngal rnams kyi gter gyur te/ /phyogs mtshams phyogs na de 'dra'i gzugs ni ma mchis shing / /dge ba brgya stong dag ni rab tu rdzogs gyur nas/ /'khor na'ang mchis te sangs rgyas seng ge'i sgra bsgrag go /sngon gyi rgyal ba rang byung dag la gus bgyis te/ /brtul zhugs dka' thub bye ba dpag med spyad nas ni/ /ye shes phung po dam pa mchog rab btsal nas su/ /smon lam stobs ni rdzogs bgyis sems can snying por 'gyur/ /ji ltar bcom ldan 'das ye shes gzigs pa chags mi mnga'/ /mi yi dbang po 'dus byas rnam gsum rab
385a
@#/ /mkhyen pa/ /bdag kyang mtshungs pa ma mchis sbyin gnas mkhas pa dang / /mi rnams nang na mi yi 'dren pa mchog gyur cig / mi dbang bdag gis byang chub rab tu thob nas ni/ /gal te smon lam 'di 'dra 'di dag 'grub ce na/ /stong gi 'jig rten khams 'di rab tu g.yos gyur cing / /lha yi tshogs kyis mkha' las me tog char phob cig /sa yang rab tu g.yos te me tog char yang bab/ /nam mkha' las kyang sil snyan rnams kyi sgra yang byung / /lha yi tsan dan mdzes pa dag gi phye ma yang / /mngon par 'thob bar gyur te 'jig rten sangs rgyas 'gyur// //bam po gnyis pa/ kun dga' bo/ dge slong chos kyi 'byung gnas byang chub sems dpa' sems dpa' chen po de smon lam phun sum tshogs pa rnam pa de lta bu dang ldan te/ kun dga' bo/ smon lam phun sum tshogs pa rnam pa 'di lta bu dang ldan pa'i byang chub sems dpa' ni nyung ngo / /smon lam rnam pa 'di lta bu dag 'jig rten du byung ba nyung ste/ nyung du zad kyi/ ye med pa ni ma yin no/ /kun dga' bo/ dge slong chos kyi 'byung gnas des bcom ldan 'das de bzhin gshegs pa 'jig rten dbang phyug rgyal po de'i spyan sngar lha dang bcas pa'i 'jig rten bdud dang bcas pa dang / tshangs pa dang bcags pa/ dge sbyong dang bram ze'i skye dgu dang bcas pa/ lha dang mi dang lha ma
385b
yin du bcas pa'i mdun du smon lam gyi khyad par rnam pa de lta bu de dag bstan nas yang dag pa ji lta ba bzhin du sgrub pa la gnas par gyur te/ de sangs rgyas kyi zhing yongs su dag pa dang| sangs rgyas kyi zhing gi che ba nyid dang / sangs rgyas kyi zhing tha gru chen po rnam pa de lta bu de dag ni sgrub/ byang chub sems dpa'i spyad pa ni spyod cing / lo bye ba khrag khrig brgya stong dpag tu med/ grangs med/ bsam gyis mi khyab/ mtshungs pa med/ gzhal du med/ tshad med/ brjod du med par lan 'ga' yang 'dod pa dang / gnod sems dang / rnam par 'tshe ba'i rnam par rtog pas rnam par rtog par ma gyur/ lan 'ga' yang 'dod pa dang / gnod sems dang / rnam par 'tshe ba'i 'du shes bskyed par ma gyur/ lan 'ga' yang gzugs dang / sgra dang / dri dang / ro dang / reg bya'i 'du shes bskyed par ma gyur te/ gzhon nu des shing 'grogs na bde ba dang / dang du len pa'i rang bzhin can dang / dgang sla ba dang / gsol ba dang / 'dod pa chung ba dang / chog shes pa dang / rab tu dben pa dang / zhe sdang med pa dang / rmongs pa med pa dang / drang ba dang / mi dman pa dang / g.yo med pa dang / sgyu med pa dang / ngang tshul bzang ba dang / mnyen pa dang / snyan par smra ba dang / rtag tu brtson pa dang / dkar po'i chos yongs su tshol ba la brtson pa mi 'dor bar gyur te/ sems can thams cad kyi don du
386a
@#/ /smon lam chen po yang dag par bsgrubs par gyur to/ /sangs rgyas dang / chos dang / dge 'dun dang / slob dpon dang / mkhan po dang / dge ba'i bshes gnyen la gus pa dang bcas shing byang chub sems dpa'i spyod pa la rtag tu go cha bgos te/ drang ba dang / mnyen pa dang / tshul 'chos pa med pa dang / kha gsag med pa dang / yon tan dang ldan zhing sems can thams cad dge ba'i chos thams cad yang dag par 'dzin du 'jug pa'i sngon du ni 'gro/ stong pa nyid dang / mtshan ma med pa dang / smon pa med pa dang / mngon par 'du bya ba med pa dang / skye ba med pa dang / 'gag pa med pa'i gnas pas ni gnas te/ nga rgyal med cing ngag legs par bsrungs par gyur to/ /byang chub sems dpa'i spyad pa spyod pa na des ngag gi las 'byung ba gang bdag dang gzhan dang gnyis ka la gnod par 'gyur ba rnam pa de lta bu spangs nas/ ngag gi las gang bdag dang gzhan dang gnyis ka la phan par 'gyur ba de la brtson par gyur te/ de ltar shes bzhin can du gyur cing grong dang / grong khyer dang / grong brdal dang / yul 'khor dang / rgyal po'i pho brang 'khor rnams su 'jug pa na nam yang gzugs dang / sgra dang / dri dang / ro dang / reg bya dang / chos la rjes su chags pa dang / khong khro ba med par gyur to/ /de byang chub sems dpa'i
386b
spyad pa spyod pa na bdag nyid kyang sbyin pa'i pha rol tu phyin pa la spyod cing / gzhan yang de nyid yang dag par 'dzin du bcug go /bdag nyid kyang tshul khrims dang / bzod pa dang / brtson 'grus dang| bsam gtan dang / shes rab kyi pha rol tu phyin pa la spyod cing / gzhan yang de nyid yang dag par 'dzin du bcug go /gang dag dang ldan na gang dang gang du skyes pa de dang der gter bye ba khrag khrig brgya stong du mas las 'byung bar 'gyur ba rnam pa de lta bu'i dge ba'i rtsa ba rnams yang dag par bsgrubs par gyur to/ /de byang chub sems dpa'i spyad pa spyod pa na sems can bye ba khrag khrig brgya stong grangs med dpag tu med pa gang dag ngag gi las kyis mthar phyin par sla ba ma yin pa de snyed bla na med pa yang dag par rdzogs pa'i byang chub la bkod do/ /sangs rgyas bcom ldan 'das grangs med dpag tu med pa de snyed la/ na bza' dang / zhal zas dang / gzims cha dang / snyun gyi gsos sman dang / yo byad rnams dang / bde bar sbyar ba la reg par gnas pa thams cad kyis bsti stang du byas/ bla mar byas/ rim gror byas/ mchod par byas so/ /sems can ji snyed rab tu smin par byas pa dang / tshong dpon dang / khyim bdag dang / blon po dang / rgyal rigs dang / bram ze'i rigs shing sA la chen po lta bu dag la rab tu bkod pa de dag kyang tshig gis bstan pas mthar phyin par sla ba ma yin no/ /de bzhin du 'dzam bu'i gling gi dbang
387a
@#/ /phyug nyid dang / 'khor los bsgyur ba nyid dang / 'jig rten skyong ba nyid dang / brgya byin nyid dang / rab 'thab bral nyid dang / yongs su dga' ldan nyid dang / rab 'phrul dga' nyid dang / dbang sgyur nyid dang / lha'i rgyal po nyid dang / tshangs pa chen po nyid la rab tu bkod do/ /sangs rgyas bcom ldan 'das grangs med dpag tu med pa de snyed la bsti stang du byas/ bla mar byas/ rim gror byas te/ mchod nas chos kyi 'khor lo rab tu bskor bar bya ba'i phyir gsol ba btab pa de dag kyang ngag gi las kyis bstan pa mthar phyin par sla ba ma yin no/ /de byang chub sems dpa'i spyad pa spyod pa na/ bskal pa bye ba khrag khrig brgya stong dpag tu med/ grangs med/ bsam gyis mi khyab/ mtshungs pa med/ gzhal du med| tshad med/ brjod du med par kha nas lha'i las shin tu 'das pa'i tsan dan dri rab tu zhim pa'i bsung 'byung ba dang / spu'i khung bu thams cad nas me tog ut+pa la'i bsung 'byung ba dang| 'jig rten thams cad na gzugs bzang zhing mdzes la blta na sdug pa dang / kha dog bzang po rgyas pa mchog dang ldan pa dang / mtshan dang dpe byad bzang pos lus legs par brgyan pa dang / de'i rin po che'i rgyan thams cad dang / gos dang chos gos mngon par bsgrub pa thams cad dang / me tog dang / spos dang / bdug pa dang / phreng ba dang / byug pa dang /
387b
gdugs dang / rgyal mtshan dang / ba dan mngon par bsgrub pa thams cad dang / rol mo'i dbyangs sgra dang glu dbyangs mngon par bsgrub pa thams cad kyang spu'i khung bu thams cad dang / lag pa gnyis nas 'byung ba dang / zas dang / skom dang / bza' ba dang / bca' ba dang / bldag pa dang / ro bro ba mngon par bsgrub pa thams cad dang longs spyod dang yongs su spyad pa mngon par bsgrub pa thams cad kyang lag pa gnyis nas zag cing 'byung bar 'gyur ba rnam pa de lta bu'i dge ba yang dag par bsgrubs so/ /kun dga' bo/ de ltar dge slong chos kyi 'byung gnas de sngon byang chub sems dpa'i spyad pa spyod pa na/ yo byad thams cad la dbang ba'i pha rol tu phyin par gyur to/ /de skad ces bka' stsal pa dang / bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ ci lags/ byang chub sems dpa' sems dpa' chen po chos kyi 'byung gnas de bla na med pa yang dag par rdzogs pa'i byang chub mngon par rdzogs par sangs rgyas te/ yongs su mya ngan las 'das lags sam/ 'on te mngon par rdzogs par sangs rgyas ma rgyas sam/ 'on te de ltar byung ba na mngon par rdzogs par sangs rgyas te/ da lta na bzhugs la 'tsho zhing gzhes te chos kyang ston/ bcom ldan 'das kyis bka' stsal pa/ kun dga' bo/ de bzhin gshegs pa de ni 'das pa yang ma yin/ ma 'ongs pa
388a
@#/ /yang ma yin gyi/ de bzhin gshegs pa de bla na med pa yang dag par rdzogs pa'i byang chub mngon par rdzogs par sangs rgyas nas da ltar na bzhugs te 'tsho zhing gzhes la chos kyang ston te/ 'di nas nub phyogs su sangs rgyas kyi zhing bye ba khrag khrig brgya stong na 'jig rten gyi khams bde ba can na de bzhin gshegs pa dgra bcom pa yang dag par rdzogs pa'i sangs rgyas 'od dpag med ces bya ste/ byang chub sems dpa' sems dpa' chen po tshad med pa dag dang / nyan thos mtha' yas pa dag gis yongs su bskor zhing mdun du bdar te/ sangs rgyas kyi zhing phun sum tshogs pa mtha' yas pa dang ldan no/ /de'i 'od ni dpag tu med de/ de ni sangs rgyas kyi zhing 'di snyed cig dang / sangs rgyas kyi zhing brgya phrag 'di snyed cig dang / sangs rgyas kyi zhing stong phrag 'di snyed cig dang / sangs rgyas kyi zhing brgya stong phrag 'di snyed cig dang / sangs rgyas kyi zhing bye ba phrag 'di snyed cig dang / sangs rgyas kyi zhing bye ba brgya phrag 'di snyed cig dang / sangs rgyas kyi zhing bye ba stong phrag 'di snyed cig dang / sangs rgyas kyi zhing bye ba brgya stong phrag 'di snyed cig dang / sangs rgyas kyi zhing bye ba khrag khrig brgya stong phrag 'di snyed cig khyab par byas te 'dug go zhes mtha'i tshad rtogs par sla ba ma yin no/ /kun dga' bo/ 'on kyang mdor bstan na shar phyogs su sangs
388b
rgyas kyi zhing bye ba khrag khrig brgya stong phrag gang+gA'i klung gi bye ma snyed dag bcom ldan 'das 'od dpag med de'i 'od kyis rtag tu khyab bo/ /de bzhin du lho dang / nub dang / byang dang / 'og dang / steng dang / phyogs mtshams kyi phyogs re re yang sangs rgyas kyi zhing bye ba khrag khrig brgya stong phrag gang+gA'i klung gi bye ma snyed dag bcom ldan 'das de bzhin gshegs pa 'od dpag med de'i 'od kyis rtag tu khyab ste/ sangs rgyas bcom ldan 'das rnams kyi sngon gyi smon lam gyi byin gyi rlabs kyis 'od 'dom gang ba dang / 'dom do pa dang / gsum pa dang / bzhi pa dang / lnga pa dang / bcu pa dang / nyi shu pa dang / sum cu pa dang / bzhi bcu pa dang / lnga bcu pa dang / 'od dpag tshad bcu pa dang / 'od dpag tshad brgya pa dang / 'od dpag tshad stong pa dang / 'od dpag tshad brgya stong pa nas 'od dpag tshad bye ba khrag khrig brgya stong phrag du ma'i 'od kyis 'jig rten gyi khams kyi bar du khyab par gyur te/ gnas pa ni ma gtogs so/ /kun dga' bo/ dpe gang gis bcom ldan 'das de bzhin gshegs pa 'od dpag med de'i 'od kyi tshad gzung ba'i dpe gzhag pa med de/ kun dga' bo/ rnam grangs des na de bzhin gshegs pa de 'od dpag med ces bya ste/ 'od dpag tu med pa dang / snang ba dpag tu med pa dang / 'od thug pa med pa dang / 'od chags pa med pa dang / 'od thogs pa med pa dang / 'od rtag tu gtong ba dang / lha'i
389a
@#/ /nor bu'i 'od dang / thogs pa med pa'i 'od zer gyi rgyal po'i 'od dang / chags par 'gyur ba'i 'od dang / dga' bar 'gyur ba'i 'od dang / mchog tu dga' bar 'gyur ba'i 'od dang / tshim par 'gyur ba'i 'od dang / lta bar 'gyur ba'i 'od dang / 'brel bar 'gyur ba'i 'od dang / bsam gyis mi khyab pa'i 'od dang / mtshungs pa med pa'i 'od dang / mi'i dbang po dang / lha'i dbang po zil gyis gnon pa'i 'od dang / nyi ma dang zla ba zil gyis gnon zhing mog mog por byed pa'i 'od dang / 'jig rten skyong ba dang / brgya byin dang| tshangs pa dang / gnas gtsang ma dang / dbang phyug chen po dang / lha thams cad zil gyis gnon cing mog mog por byed pa'i 'od dang / mdor bsdu na 'od thams cad kyi pha rol tu phyin pa zhes bya'o/ /de'i 'od de ni dri ma med pa shin tu rgyas pa lus la bde ba skyed pa/ sems dga' bar byed pa/ lha dang / lha ma yin dang / klu dang / gnod sbyin dang / dri za dang / nam mkha' lding dang / lto 'phye chen po dang / mi 'am ci dang / mi dang / mi ma yin pa rnams la dga' ba dang / mchog tu dga' ba dang / bde ba bskyed pa/ sems can dge ba'i bsam pa can rnams la dge ba dang / yang ba dang / rtogs pa dang / mkhas pa dang / blo dang / mchog tu dga' ba byed pa'o/ /kun dga' bo/ rnam grangs 'dis sangs rgyas kyi zhing gzhan mtha' yas mu
389b
med pa dag de bzhin gshegs pas yongs su gang ste/ bskal par de bzhin gshegs pa 'od dpag med de'i mtshan gyi las rgyur byas pa dang / 'od phun sum tshogs pa las brtsams te brjod kyang mtshan bstan pa dang / 'od phun sum tshogs pa'i yon tan gyi mtha' yang rtogs par mi nus la/ de bzhin gshegs pa'i mi 'jigs pa yang rgyun chad par mi 'gyur ro/ / de ci'i phyir zhe na/ kun dga' bo/ 'di lta ste/ bcom ldan 'das 'od dpag med de'i 'od kyi yon tan 'byor pa dang / de bzhin gshegs pa'i shes rab dang / spobs pa bla na med pa dang / de gnyis ka yang grangs med dpag tu med cing bsam gyis mi khyab la mu med pa'i phyir ro/ /kun dga' bo/ de bzhin gshegs pa 'od dpag med de'i nyan thos kyi dge 'dun dpag tu med de| nyan thos bye ba phrag 'di snyed cig ce'am/ nyan thos bye ba brgya phrag 'di snyed cig ce'am/ nyan thos bye ba stong phrag 'di snyed cig ce'am/ nyan thos bye ba brgya stong phrag 'di snyed cig ce'am/ gtams phrag 'di snyed cig ce'am/ dkrigs phrag 'di snyed cig ce'am/ khrag khrig phrag 'di snyed cig ce'am/ ther 'bum phrag 'di snyed cig ce'am/ mi 'khrugs pa phrag 'di snyed cig ce'am/ rnam 'deg phrag 'di snyed cig ce'am/ rgyun 'bab phrag 'di snyed cig ce'am/ rgyal ba phrag 'di snyed cig ce'am/ dpag tu med pa phrag 'di snyed cig ce'am/
390a
@#/ /grangs med pa phrag 'di snyed cig ce'am/ bgrang du med pa phrag 'di snyed cig ce'am/ mtshungs pa med pa phrag 'di snyed cig ce'am/ bsam gyis mi khyab pa phrag 'di snyed cig ces de'i tshad gzung bar sla ba ma yin no/ /kun dga' bo/ 'di lta ste/ dper na/ dge slong mo'u dgal gyi bu chen po'i rdzu 'phrul la dbang thob pa de 'dod na stong gsum gyi stong chen po'i 'jig rten gyi khams na skar ma'i gzugs ji snyed yod pa de dag thams cad nyin zhag gcig gis bgrang pa de lta bu'i rnam pa'i rdzu 'phrul dang ldan pa bye ba khrag khrig brgya stong yod par gyur la/ de dag las gzhan mi byed par lo bye ba khrag khrig brgya stong du de bzhin gshegs pa 'od dpag med kyi nyan thos dang po 'dus pa bgrangs kyang de dag gis brgya'i char yang bgrangs par mi 'gyur te/ stong dang / brgya stong dang / cha dang / dpe dang / rgyu'i bar du yang bgrangs par mi 'gyur ro/ /kun dga' bo/ 'di lta ste/ dper na/ rgya mtsho chen po zabs su dpag tshad brgyad khri bzhi stong yod pa/ khyon dpag tu med pa la mi la la zhig gis skra tshal pa brgyar bshags pa'i rtse mos chu thigs pa gcig blangs na/ kun dga' bo/ 'di ji snyam du sems/ gang skra tshal pa brgyar bshags pa'i rtse mos chu'i thigs pa gcig blangs pa dang / gang rgya mtsho chen po'i chu'i phung po phyi na las pa de
390b
gnyis gang mang / gsol pa/ bcom ldan 'das/ dpag tshad stong yang rgya mtsho chen po bas nyung lags na/ skra tshal pa brgyar bshags pa'i rtse mos chab thigs pa gcig blangs pa lta smos kyang ci 'tshal/ bcom ldan 'das kyis bka' stsal pa/ kun dga' bo/ chu'i thigs pa gcig lta bur ni/ bcom ldan 'das de bzhin gshegs pa 'od dpag med kyi nyan thos dang por 'dus pa la mo'u dgal gyi bu 'di lta bu'i dge slong rnams kyis lo bye ba khrag khrig brgya stong du bgrangs te 'di snyed gcig go zhes grangs kyis chod pa lta bu yin no/ /rgya mtsho chen po'i chu'i phung po phyi na las pa lta bu ni grangs kyis ma chod pa lta bu yin na/ nyan thos 'dus pa gnyis pa dang / gsum pa rnams lta smos kyang ci dgos te/ bcom ldan 'das de'i nyan thos kyi dge 'dun ni de ltar mtha' yas mu med de/ de ni dpag tu med do/ /zhes bya ba'i grangs su 'gro ba yin no/ /kun dga' bo/ bcom ldan 'das de bzhin gshegs pa 'od dpag med de'i tshe'i tshad kyang dpag tu med de/ bskal pa 'di snyed cig ce'am/ bskal pa brgya phrag 'di snyed cig ce'am/ bskal pa stong phrag 'di snyed cig ce'am/ bskal pa brgya stong phrag 'di snyed cig ce'am/ bskal pa bye ba khrag 'di snyed cig ce'am/ bskal dbye ba brgya phrag 'di snyed cig ce'am/ bskal pa bye ba stong phrag 'di snyed cig ce'am/ bskal pa bye ba brgya stong phrag 'di snyed cig ces bya
391a
@#/ /ba nas bskal pa bye ba khrag khrig brgya stong phrag 'di snyed cig go zhes bya ba'i bar du tshe'i tshad rtogs par sla ba ma yin no/ /kun dga' bo/ bcom ldan 'das de bzhin gshegs pa 'od dpag med de'i sku tshe'i tshad de ltar dpag tu med de/ de'i phyir de bzhin gshegs pa de tshe dpag med ces bya'o/ /kun dga' bo/ bcom ldan 'das de bzhin gshegs pa 'od dpag med de bla na med pa yang dag par rdzogs pa'i byang chub mngon par rdzogs par sangs rgyas nas ji ltar da ltar 'jig rten gyi khams 'di na / bskal pa'i grangs dang / bskal pa bgrang ba'i brdar btags pa de lta bu'i bskal pa bcu lon no/ /kun dga' bo/ bcom ldan 'das 'od dpag med kyi 'jig rten gyi khams bde ba can zhes bya ba ni 'byor ba/ mod pa/ bde ba/ lo legs pa/ nyams dga' ba/ lha dang mi mang pos gang ba'o/ /kun dga' bo/ 'jig rten gyi khams de na sems can dmyal ba med do| |dud 'gro'i skye gnas med do/ /yi dwags kyi yul med do/ /lha ma yin gyi ris med do/ /mi khom par skye ba med do/ /'jig rten gyi khams bde ba can na snang ba'i rin po che gang yin pa de dag ni 'jig rten na mi spyod do/ /kun dga' bo/ 'jig rten gyi khams bde ba can de ni spos sna tshogs dri rab tu zhim pa ngad ldang ba'i me tog dang 'bras bu sna tshogs 'byor
391b
pa'o| |rin po che'i shing ljon pas legs par brgyan pa'o/ /de bzhin gshegs pa'i sprul pa'i bya rnam pa sna tshogs sgra yid du 'ong ba can gyi tshogs kyis brgyan pa'o/ /kun dga' bo/ rin po che'i shing ljon pa de dag ni kha dog tha dad pa/ kha dog du ma/ kha dog brgya stong phrag du ma yod pa'o/ /kun dga' bo/ de na rin po che'i shing ljon pa gser gyi kha dog lta bu dang / gser gyi rang bzhin dag yod do/ /dngul gyi kha dog lta bu dang / dngul gyi rang bzhin dag yod do/ /bai DUR+Ya'i kha dog lta bu dang / bai DUR+Ya'i rang bzhin dag yod do/ /shel gyi kha dog lta bu dang / shel gyi rang bzhin dag yod do/ /spug gi kha dog lta bu dang / spug gi rang bzhin dag yod do/ /mu tig dmar po'i kha dog lta bu dang / mu tig dmar po'i rang bzhin dag yod do/ /rdo'i snying po'i kha dog lta bu dang / rdo'i snying po'i rang bzhin dag yod do/ /kha cig ni gser dang / dngul dang / rin po che sna gnyis pa dag yod do/ /gser dang / dngul dang / bai DUR+Ya dang / rin po che sna gsum pa dag kyang yod do/ /gser dang / dngul dang / bai DUR+Ya dang / shel dang / rin po che sna bzhi pa dag kyang yod do/ /gser dang / dngul dang / bai DUR+Ya dang / shel dang / spug dang / rin po che sna lnga pa dag kyang yod do/ /gser dang / dngul dang / bai DUR+Ya dang / shel dang / spug dang / mu tig dmar po dang / rin po che sna drug pa dag kyang yod do/ /gser dang / dngul
392a
@#/ /dang| bai DUR+Ya dang / shel dang / spug dang / mu tig dmar po dang / rdo'i snying po dang / rin po che sna bdun pa dag kyang yod do/ /kun dga' bo/ de na gser gyi shing ljon pa rnams kyi rtsa ba dang / sdong po dang / yal ga dang / lo ma dang / 'dab ma dang / me tog rnams gser gyi rang bzhin la/ rtsa ba rnams dngul gyi rang bzhin no/ /dngul gyi shing ljon pa rnams kyi rtsa ba dang / sdong po dang / yal ga dang / lo ma dang / 'dab ma dang / me tog rnams dngul gyi rang bzhin la/ 'bras bu rnams bai DUR+Ya'i rang bzhin no/ /bai DUR+Ya'i shing ljon pa rnams kyi rtsa ba dang / sdong po dang / yal ga dang / lo ma dang / 'dab ma dang / me tog rnams bai DUR+Ya'i rang bzhin la/ 'bras bu rnams shel gyi rang bzhin no/ / shel gyi shing ljon pa rnams kyi rtsa ba dang / sdong po dang / yal ga dang / lo ma dang / 'dab ma dang / me tog rnams shel gyi rang bzhin la/ 'bras bu rnams spug gi rang bzhin no| |spug gi shing ljon pa rnams kyi rtsa ba dang / sdong po dang / yal ga dang / lo ma dang / 'dab ma dang / me tog rnams spug gi rang bzhin la/ 'bras bu rnams mu tig dmar po'i rang bzhin no/ /mu tig dmar po'i shing ljon pa rnams kyi rtsa ba dang / sdong po dang / yal ga dang / lo ma dang / 'dab ma dang / me tog rnams mu tig dmar po'i rang bzhin la /
392b
'bras bu rnams rdo'i snying po'i rang bzhin no/ /rdo'i snying po'i shing ljon pa rnams kyi rtsa ba dang / sdong po dang / yal ga dang / lo ma dang / 'dab ma dang / me tog rnams rdo'i snying po'i rang bzhin la| 'bras bu rnams gser gyi rang bzhin no/ /kun dga' bo/ shing ljon pa kha cig ni rtsa ba rnams gser gyi rang bzhin la/ sdong po rnams dngul gyi rang bzhin/ yal ga rnams bai DUR+Ya'i rang bzhin/ lo ma rnams shel gyi rang bzhin/ 'dab ma rnams spug gi rang bzhin/ me tog rnams mu tig dmar po'i rang bzhin/ 'bras bu rnams rdo'i snying po'i rang bzhin no/ /kun dga' bo/ shing ljon pa kha cig ni rtsa ba rnams dngul gyi rang bzhin la/ sdong po rnams bai DUR+Ya'i rang bzhin/ yal ga rnams shel gyi rang bzhin/ lo ma rnams spug gi rang bzhin/ 'dab ma rnams mu tig dmar po'i rang bzhin/ me tog rnams rdo'i snying po'i rang bzhin/ 'bras bu rnams gser gyi rang bzhin no/ /kun dga' bo/ shing ljon pa kha cig ni rtsa ba rnams bai DUR+Ya'i rang bzhin la/ sdong po rnams shel gyi rang bzhin/ yal ga rnams spug gi rang bzhin/ lo ma rnams mu tig dmar po'i rang bzhin/ 'dab ma rnams rdo'i snying po'i rang bzhin/ me tog rnams gser gyi rang bzhin/ 'bras bu rnams dngul gyi rang bzhin no/ /kun dga' bo/ shing ljon pa kha cig ni rtsa ba rnams shel gyi rang bzhin la/ sdong po rnams spug gi rang bzhin /
393a
@#/ /yal ga rnams mu tig dmar po'i rang bzhin/ /lo ma rnams rdo'i snying po'i rang bzhin/ 'dab ma rnams gser gyi rang bzhin/ me tog rnams dngul gyi rang bzhin/ 'bras bu rnams bai DUR+Ya'i rang bzhin no/ /kun dga' bo/ shing ljon pa kha cig ni rtsa ba rnams spug gi rang bzhin la/ sdong po rnams mu tig dmar po'i rang bzhin/ yal ga rnams rdo'i snying po'i rang bzhin/ lo ma rnams gser gyi rang bzhin/ 'dab ma rnams dngul gyi rang bzhin/ me tog rnams bai DUR+Ya'i rang bzhin/ 'bras bu rnams shel gyi rang bzhin no/ /kun dga' bo| shing ljon pa kha cig ni rtsa ba rnams mu tig dmar po'i rang bzhin la/ sdong po rnams rdo'i snying po'i rang bzhin/ yal ga rnams gser gyi rang bzhin/ lo ma rnams dngul gyi rang bzhin/ 'dab ma rnams bai DUR+Ya'i rang bzhin/ me tog rnams shel gyi rang bzhin/ 'bras bu rnams spug gi rang bzhin no/ /kun dga' bo/ shing ljon pa kha cig ni rtsa ba rnams rdo'i snying po'i rang bzhin la/ sdong po rnams gser gyi rang bzhin/ yal ga rnams dngul gyi rang bzhin/ lo ma rnams bai DUR+Ya'i rang bzhin/ 'dab ma rnams shel gyi rang bzhin/ me tog rnams spug gi rang bzhin/ 'bras bu rnams mu tig dmar po'i rang bzhin no/ /kun dga' bo/ shing ljon pa kha cig ni rtsa ba rnams rin po che sna bdun gyi rang bzhin la/ sdong po
393b
rnams kyang rin po che sna bdun gyi rang bzhin/ yal ga rnams kyang rin po che sna bdun gyi rang bzhin/ lo ma rnams kyang rin po che sna bdun gyi rang bzhin/ 'dab ma rnams kyang rin po che sna bdun gyi rang bzhin/ me tog rnams kyang rin po che sna bdun gyi rang bzhin/ 'bras bu rnams kyang rin po che sna bdun gyi rang bzhin no/ /kun dga' bo/ shing ljon pa de dag thams cad kyi rtsa ba dang| sdong po dang / yal ga dang / lo ma dang / 'dab ma dang / me tog dang / 'bras bu rnams ni 'jam pa/ reg na bde ba/ dri zhim pa dag go /rlung gis bskyod na de dag las snyan cing yid du 'ong ba'i sgra 'byung ste/ mnyan pa dang mthun zhing mnyan pas chog mi shes pa'o/ /kun dga' bo/ sangs rgyas kyi zhing de ni rin po che sna bdun gyi shing ljon pa rnam pa de lta bu dag gis gang ste/ mtha' na rin po che sna bdun gyi chu shing gi sdong po dang / rin po che'i shing ta la'i phreng gis yongs su bskor to/ /thams cad kyang gser gyi dra bas khebs pa'o/ /kun du rin po che sna bdun gyi pad+ma rnams kyis khebs pa'o/ /de na pad+ma'i tshad dpag tshad phyed pa tsam yang yod/ dpag tshad kyi tshad tsam yang yod/ dpag tshad gcig dang / gnyis dang / gsum dang / bzhi dang / lnga'i tshad tsam yang yod/ dpag tshad bcu'i bar gyi tshad tsam dag kyang yod do/ /rin po che'i pad+ma thams cad las kyang 'od zer bye ba stong phrag sum cu rtsa drug drug 'byung ngo / /'od zer gyi rtse mo
394a
@#/ /thams cad las kyang sangs rgyas kyi sku gser gyi kha dog can skyes bu chen po'i mtshan sum cu rtsa gnyis mnga' ba bye ba stong phrag sum cu rtsa drug drug 'byung ste| de dag shar phyogs su 'jig rten gyi khams grangs med dpag tu med pa dag tu gshegs nas sems can rnams la chos ston to/ /de bzhin du lho dang / nub dang / byang phyogs dang| 'og dang / steng dang / phyogs mtshams rnams su 'jig rten gyi khams tha dad pa grangs med dpag tu med pa dag tu gshegs nas sems can rnams la chos ston to/ /kun dga' bo/ sangs rgyas kyi zhing de na ri nag po rnams ye med de/ ri thams cad kyang rin po che'i ri sha stag go /ri'i rgyal po ri rab thams cad dang / khor yug dang / ri'i rgyal po khor yug chen po thams cad dang / mtsho chen po rnams med do/ /sangs rgyas kyi zhing de ni kun du mnyam pa/ nyams dga' ba/ lag mthil ltar mnyam pa/ sa phyogs rin po che rnam pa sna tshogs kyis spras pa'o/ /de skad ces bka' stsal pa dang / bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ rgyal chen bzhi'i ris kyi lha ri rab kyi ngos la gnas pa dang / sum cu rtsa gsum pa'i lha ri rab kyi rtse mo la gnas pa de dag gang na gnas/ bcom ldan 'das kyis bka' stsal pa/ kun dga' bo/ 'di ji
394b
snyam du sems/ 'di na ri'i rgyal po ri rab kyi gong ma 'thab bral gyi lha rnams dang / dga' ldan dang / 'phrul dga' dang / gzhan 'phrul dbang byed dang / tshangs ris dang / tshangs pa'i mdun na 'don dang / tshangs chen nas 'og min gyi bar gyi lha rnams gang na gnas/ gsol pa/ bcom ldan 'das/ las kyi rnam par smin pa dang / las mngon par 'du bgyid pa bsam gyis mi khyab bo/ /bcom ldan 'das kyis bka' stsal pa/ kun dga' bo/ las kyi rnam par smin pa dang / las mngon par 'du byed pa bsam gyis mi khyab pa ni rnyed par rung gi /sangs rgyas bcom ldan 'das rnams kyi dge ba dang / rdzu 'phrul dang / byin gyi rlabs bsam gyis mi khyab pa ni sus kyang mtha' ma/ tshad rtogs pa'am/ bsam par mi nus te/ gzhan du na sangs rgyas kyi yul bsam gyis mi khyab po zhes rab tu 'byed do/ /de ltar sems can bsod nams byas pa dang / dge ba'i rtsa ba bskyed pa'i bsod nams dang ye shes dang / rdzu 'phrul dang / 'byor pa bsam gyis mi khyab pa dag sangs rgyas kyi zhing der 'byung ngo / /gsol pa/ bcom ldan 'das/ bdag ni de la dogs pa'am/ yid gnyis sam/ the tshom ma mchis te/ bdag ni ma 'ongs pa'i sems can rnams kyi dogs pa dang / yid gnyis dang / the tshom bsal ba'i slad du de bzhin gshegs pa la don 'di yongs su zhu'o/ /bcom ldan 'das kyis bka' stsal pa/ kun dga' bo/ legs
395a
@#/ /so| |legs so/ /de lta bu ni khyod kyi bya ba yin no/ /kun dga' bo/ 'jig rten gyi khams bde ba can de na chu klung rnam pa sna tshogs dag 'bab ste/ de na chu klung chen po kha tshon dpag tshad tsam dag kyang yod de/ dpag tshad bcu dang / nyi shu dang / sum cu dang / bzhi bcu dang / lnga bcu'i bar dang / kha tshon dpag tshad brgya stong gi tshad tsam dag kyang yod de/ zabs su ni dpag tshad bcu gnyis pa dag go /chu klung de dag thams cad kyang spos dri rab tu zhim pa sna tshogs kyi chur 'bab cing rin po che'i me tog sil ma'i tshogs dag 'bab pa dag go /sgra dbyangs snyan pa tha dad pa sna tshogs dang yang ldan pa dag go /kun dga' bo/ chu klung chen po de dag las lha'i glu dbyangs yan lag bye ba brgya stong dang ldan pa'i sil snyan dag mkhas pa rnams kyis byas pa bas lhag pa'i sgra yid du 'ong ba 'byung ste/ chu klung chen po de dag las rnam pa 'di lta bu'i sgra 'byung ba ni zab pa dang / kun du shes par bya ba dang / rnam par shes par bya ba dang / brdzun pa ma yin pa dang / rna bar bde ba dang / snying du 'ong ba dang / dga' bar bya ba dang / snyan pa dang / yid du 'ong ba dang / mnyan pas chog mi shes pa dang / mnyan pa dang mthun pa dang / mi rtag pa dang / zhi ba dang / bdag med ces bya ba dang / mnyan na bde ba ste/ de dag sems can de dag gi rna ba'i
395b
dbang po la grag go /kun dga' bo/ chu klung chen po de dag gi 'gram gnyis ni rin po che'i spos kyi shing ljon pa dag gis gang ste/ de dag la yal ga dang / lo ma dang / me tog dang / dog pa sna tshogs 'phyang ngo / /de na sems can gang dag chu klung gi 'gram de dag tu zang zing med pa'i lha'i dga' ba dang / rtse ba myong bar 'dod pa de dag chu klung de dag tu 'jug pa'i tshe/ 'dod na chu long bu nub tsam du gnas so/ /'dod na chu pus mo nub tsam dang / 'dod na rked pa nub tsam dang / 'dod na mchan khung nub tsam dang / 'dod na mid pa nub tsam du chu gnas par 'gyur te/ lha'i dga' ba dag kyang 'byung ngo / /der sems can gang dag chu grang bar gyur cig snyam du 'dod na yang de dag la bsil bar 'gyur ro/ /gang dag dro bar gyur cig snyam du 'dod na yang de dag la dro bar 'gyur ro/ /gang dag bsil ba dang / dro bar gyur cig snyam du 'dod na yang de dag la chu de bsil ba dang dro bar 'gyur te/ bde bar 'gyur ro/ /chu klung chen po de dag ni lha'i shing ta ma la'i lo ma dang / a ka ru dang / dus kyi rjes su 'brang ba dang / rgya spos dang / tsan dan sprul gyi snying po dang / spos mchog gis bsgos pa'i chus yongs su gang ste 'bab pa/ lha'i me tog ut+pa la dang| pad+ma dang / ku mu ta dang / pad+ma dkar po dang / dri rab tu zhim pa dag gi me tog gis khebs pa/ khol khol dag na bya ngang pa dang / gzhad dang / khrung khrung dang / ngur pa dang / ka
396a
@#/ /ran da ba dang / ne tso dang / ri skegs dang / khu byug dang / ku na la dang / ka la ping ka dang / rma bya la sogs pa sgra yid du 'ong ba dang ldan pa/ de bzhin gshegs pas sprul pa'i bya'i tshogs kyis bsten pa/ ngang pa dang / ngang pa'i rgyal po rnams kyis mdzes par byas pa dang / 'bab stegs bde ba/ 'dam rdzab med pa/ gser gyi bye ma bdal ba dag go /de na gang gi tshe sems can de dag bdag cag gi bsam pa 'di 'dra ba yongs su rdzogs par gyur cig snyam du 'dod pa de'i tshe de dag gi bsam pa de lta bu dag chos dang ldan par yongs su rdzogs par 'gyur ro/ /kun dga' bo/ chu de las yid du 'ong ba'i sgra 'byung ba gang yin pa des sangs rgyas kyi zhing der thams cad dang ldan pa'i 'khor la go bar byed do/ /de na sems can gang dag chu ngogs na 'khod pa dag sgra 'di bdag cag gi rna ba'i dbang po la grags par ma gyur cig ces 'dod na de de dag gi lha'i rna ba'i dbang po la grags par mi 'gyur ro/ /gang sgra rnam pa ji lta bu thos par 'dod pa de rnam pa de lta bu'i sgra yid du 'ong ba thos so/ /'di lta ste/ sangs rgyas kyi sgra dang / chos kyi sgra dang / dge 'dun gyi sgra dang / pha rol tu phyin pa'i sgra dang / sa'i sgra dang / stobs kyi sgra dang / mi 'jigs pa'i sgra dang / sangs rgyas kyi chos ma 'dres pa'i sgra dang / mngon par shes pa'i sgra dang /
396b
so so yang dag par rig pa'i sgra dang / stong pa nyid dang / mtshan ma med pa dang / smon pa med pa dang / mngon par 'du bya ba med pa dang / ma skyes pa dang / ma byung ba dang / dngos po med pa dang / 'gag pa med pa'i sgra dang / zhi ba dang / rab tu zhi ba dang / nye bar zhi ba'i sgra dang / byams pa chen po dang / snying rje chen po dang / dga' ba chen po dang / btang snyoms chen po'i sgra dang / mi skye ba'i chos la bzod pa dang / dbang bskur ba'i sa rab tu thob pa'i sgra dag thos so/ /des sgra rnam pa de lta bu thos nas dga' ba dang / mchog tu dga' ba rgya chen po thob bo/ / dben pa dang ldan pa dang / 'dod chags dang bral ba dang ldan pa dang / zhi ba dang ldan pa dang / 'gog pa dang ldan pa dang / chos dang ldan pa dang / byang chub yongs su 'grub pa'i dge ba'i rtsa ba dang ldan pa'i sgra 'byung ngo / /kun dga' bo/ 'jig rten gyi khams bde ba can na mi dge ba'i ming med do/ /sgrib pa'i sgra yang yong med do/ /ngan song ngan 'gro rnam par ltung ba'i sgra yang yong med do/ /sdug bsngal gyi sgra yang yong med do/ /kun dga' bo/ de na sdug bsngal yang ma yin/ bde ba yang ma yin pa'i tshor ba'i sgra yang med na/ sdug bsngal dang / sdug bsngal gyi sgra lta ga la yod/ kun dga' bo/ mdor bsdu na rnam grangs 'dis 'jig rten gyi khams de bde ba can zhes bya ste/ rgyas par ni ma yin no/ /kun dga' bo/ rgyas par byed
397a
@#/ /na| bskal pa'am bskal pa las lhag par zad zad du 'jig rten gyi khams bde ba can gyi bde ba'i rgyu yongs su brjod kyang bde ba'i rgyu de dag gi mtha' rtogs par mi nus so/ /kun dga' bo/ 'jig rten gyi khams bde ba can der sems can gang dag skyes pa dang / skye ba dang / skye bar 'gyur ba de dag thams cad kyang gzugs dang / kha dog dang / stobs dang / mthu dang / chu zheng dang / dbang dang / bsod nams bsags pa dang / mngon par shes pa dag dang / gos dang / rgyan dang / skyed mos tshal dang / gzhal med khang dang / khang pa brtsegs pa yongs su spyad pa rnam pa de lta bu dag dang / gzugs dang / sgra dang / dri dang / ro dang / reg bya yongs su spyad pa rnam pa de lta bu dag dang / longs spyod dang / yongs su spyad pa rnam pa de lta bu thams cad dang ldan te/ dper na/ gzhan 'phrul dbang byed kyi lha rnams dang 'dra'o/ /kun dga' bo/ 'jig rten gyi khams bde ba can gyi sems can dag kham gyi zas za ba rags pa'i kha zas mi za'i/ kha zas rnam pa ji lta bu 'dod pa rnam pa de lta bu 'byor pa nyid du shes te/ lus tshim par 'gyur/ gzugs tshim par 'gyur ro/ /zhes de dag yang lus la 'jug par mi byed do/ /de dag lus tshim nas spos kyi rnam pa ji lta bu 'dod pa de lta bu'i lha'i spos kyi rnam pa dag gis sangs rgyas kyi
397b
zhing thams cad bdugs par 'gyur ro/ /de na gang dri de la snom par mi 'dod pa de la spos dri'i 'du shes dang / bsgos pa tsam yang 'byung bar mi 'gyur ro/ /de ltar gang dag spos dang| phreng ba dang / byug pa dang / phye ma dang / gdugs dang / rgyal mtshan dang / ba dan dang / sil snyan rnam pa ji lta bu dag 'dod pa de dag gi rnam pa de lta bu de dag gis sangs rgyas kyi zhing de thams cad yongs su khyab par 'gyur ro/ /de dag gos kha dog tha dad pa/ kha dog brgya stong du ma ci 'dra ba 'dod pa de lta bu'i gos rin po che dag gis sangs rgyas kyi zhing de thams cad yongs su khyab par 'gyur zhing lus la bgos par bdag nyid kyis shes so/ /de dag 'di lta ste/ mgo bo'i rgyan nam/ rna ba'i rgyan nam/ mgul pa dang / lag pa dang| rkang pa'i rgyan 'di lta ste/ cod pan dang / rna cha dang / gdu bu dang / dpung rgyan dang / do shal dang / se mo do dang / rna rgyan dang / sor gdub dang / gser gyi tsong tsong dang / ska rags dang / gser gyi dra ba dang / mu tig gi dra ba dang / rin po che thams cad kyi dril bu g.yer kha'i dra ba dang / rgyan ji lta bu 'dod pa rnam pa de lta bu'i rgyan rin po che brgya stong du mas spras pa 'di lta ste/ rin po che'i shing ljon pa la 'phyang bas sangs rgyas kyi zhing de gang bar mthong ste/ rgyan de dag gis bdag brgyan par yang shes so/ /de dag gang kha
398a
@#/ /dog dang / rtags dang / dbyibs dang / chu zheng gi bar dang / rin po che sna tshogs kyi ba gam brgya stong gis brgyan pa rin po che'i khri lha'i ras bcos bu sna tshogs bting ba/ sngas khra bo bzhag pa dang ldan pa'i gzhal med khang ji lta bu 'dod pa de lta bu'i gzhal med khang de dag de dag gi mdun du 'byung ste/ de dag rin po che'i gzhal med khang grub pa de dag gi nang na lha'i bu mo bdun stong bdun stong gis yongs su bskor zhing mdun gyis bltas nas 'khod de/ rtse zhing dga' la dga' mgur spyod do/ /'jig rten gyi khams de na lha dang mi rnams tha dad pa med de/ gzhan du na kun rdzob kyi tha snyad kyis lha dang mi zhes bya ba'i grangs su 'gro ba ni ma gtogs so/ /kun dga' bo/ 'di lta ste/ dper na/ 'khor lo'i bsgyur ba'i rgyal po'i mdun na mi ma rabs dang / mi za ma ni lam me ma yin/ lhan ne ma yin/ lhang nge ma yin zhing mi 'jigs pa ma yin la 'od gsal ba ma yin no/ /de bzhin du gzhan 'phrul dbang byed kyi lha rnams kyi mdun na lha'i dbang po brgya byin yang 'di lta ste/ skyed mos tshal dang / gzhal med khang dang / gos dang / rgyan dang / dbung dang / rdzu 'phrul dang / cho 'phrul dang / dbang phyug gis lam me ma yin/ lhan ne ma yin/ lhang nge ma yin te/ chos mngon par rtogs pa dang / chos la yongs su spyod pa ni ma gtogs so/ /
398b
kun dga' bo/ de la gzhan 'phrul dbang byed kyi lha rnams ci 'dra ba de 'dra bar bde ba can gyi 'jig rten gyi khams kyi mi rnams blta bar bya'o/ /kun dga' bo/ 'jig rten gyi khams bde ba can de na snga dro'i dus nye bar gnas pa'i tshe phyogs bzhi kun nas 'khrugs shing kun du 'khrugs pa'i rlung ldang ste/ de dag gis rin po che'i shing ljon pa bkra ba/ blta na sdug pa/ kha dog tha dad pa/ kha dog du ma yod pa/ lha'i spos dri rab tu zhim pa sna tshogs kyis bsgo sa pa de dag bskyod/ kun du bskyod/ bsgul/ kun du bsgul nas de dag la sa me tog rnam pa mang po yid du 'ong ba'i bsung can blta na sdug pa dag rin po che'i sa chen po de la 'brul te/ me tog de dag gis sangs rgyas kyi zhing de kun du mi 'greng ba bdun srid du bkram par 'gyur ro/ /'di lta ste| dper na/ skyes bu sa la me tog 'grems mkhas pa zhig gis lag pa gnyis kas bkram ste mnyam par bkod na shin tu bkra zhing blta na sdug go /de bzhin du me tog bsung dang / kha dog tha dad pa dang ldan pa de dag gis sangs rgyas kyi zhing de kun du mi 'greng bdun tsam du khyab par 'gyur ro/ /me tog gi rnam pa de dag ni 'jam pa ste/ dpe tsam du na gos ka tsa lin da ltar reg na bde ba'o| |de dag ni rkang pa 'jog pa na sor bzhi tsam gyis dma' bar 'gyur zhing / rkang pa 'degs pa na sor bzhi tsam gyis mtho bar 'gyur ro/ /snga dro'i dus 'das nas me tog de dag kyang ma
399a
@#/ /lus par med par 'gyur te/ de'i 'og tu sangs rgyas kyi zhing bde ba dang / nyams dga' ba dang / dag par 'gyur zhing me tog snga ma rnams kyis rnyogs pa med par 'gyur ro/ /de nas yang phyogs bzhi kun nas rlung langs te/ gang sngon ma byung ba'i me tog sar pa dag mngon par 'thor ro/ /snga dro ji lta bar nyi ma'i gung dang / phyi dro'i dus kyi tshe dang / mtshan mo yang srod dang / nam gyi gung dang / tho rangs kyang de bzhin no/ /spos dang / dri sna tshogs kyis bsgos pa'i rlung de dag langs nas sems can de dag la reg na 'di lta ste/ dper na/ dge slong 'gog pa la snyoms par zhugs lta bu'i bde ba dang ldan par 'gyur ro/ /kun dga' bo/ sangs rgyas kyi zhing de na de bzhin gshegs pas bsnyad pa ma gtogs par me dang / nyi ma dang / zla ba dang / gza' dang / rgyu skar dang / skar ma'i gzugs dang / mun pa mun nag gi ming du gdags pa yong med do/ /nyin mo dang mtshan mor gdags pa yang yong med do/ /khyim yongs su 'dzin pa'i 'du shes kyang yong med do/ /kun dga' bo/ 'jig rten gyi khams bde ba can de na dus dus su lha'i spos chu'i sprin gyi char mngon par 'bab bo/ /lha'i me tog kha dog thams cad dang ldan pa dag dang / lha'i rin po che sna bdun dang / lha'i tsan dan gyi phye ma dang / lha'i gdugs dang / rgyal mtshan dang / ba
399b
dan gyi char mngon par 'bab bo/ /lha'i bla re dag kyang 'dzin to/ /lha'i rin po che'i gdugs rnga ma'i bsil yab dang bcas pa dag kyang nam mkha' la 'dzin to/ /lha'i rol mo'i dbyangs sgra dag kyang sgrogs shing lha'i bu mo dag kyang gar byed do/ /kun dga' bo/ sangs rgyas kyi zhing der sems can gang dag skyes pa dang / skye ba dang / skye bar 'gyur ba de dag thams cad mya ngan las 'das kyi bar du yang dag pa nyid du nges par 'gyur ro/ /de ci'i phyir zhe na/ de ni 'di lta ste/ ma nges pa dang / log pa nyid du nges pa'i phung po gnyis rnam par bzhag pa'am/ gdags pa med pa'i phyir ro/ /kun dga' bo/ mdor bsdu na rnam grangs 'dis 'jig rten gyi khams de bde ba can zhes bya ste rgyas par ni ma yin no/ /kun dga' bo/ rgyas par bstan na ni bskal pa zad zad du 'jig rten gyi khams bde ba can gyi bde ba'i rgyu rnams yongs su brjod kyang bde ba'i rgyu de dag gi mtha' rtogs par mi nus so/ /de nas de'i tshe bcom ldan 'das kyis tshigs su bcad pa 'di dag bka' stsal to/ /sems can thams cad bde bar gshegs gyur la/ /dam pa'i don mkhas ye shes rnam dag ste/ de dag bskal pa'am 'on te lhag par ni/ / bde ba can gyi bsngags pa rab brjod kyang / /bsngags pa'i phreng ba rab tu brjod pa na/ /bskal pa bye ba de dag zad 'gyur gyi/ /bde ba can gyi bsngags pa mthar mi phyin/ /de dag spobs pa
400a
@#/ /pa'ang zad par 'gyur ma yin/ /gang gis phra rab rdul snyed 'jig rten khams/ /bshig cing btags te rdul du byas gyur pa/ /de bas mang ba'i 'jig rten khams kyi rnams/ /rin chen bkang ste sbyin pa byin pa ni/ /gang gis dpag tu med pa'i 'od mtshan dang / /bde ba can gyi yon tan khyad 'phags rnams/ /thos nas dga' ste thal mo sbyor byed pa/ /bsod nams 'di yi char yang 'gyur ma yin/ /de lta bas na de bzhin gshegs pa de'i/ /yon tan thos nas mgu dang dad skyes la/ /bde ba can gyi 'jig rten khams mchog tu| |'gro bar bya phyir mos pa drag po bskyed/ /gang gis bde ba can gyi 'jig rten gyi/ /ming thos pa yi bsod nams de la ni/ /zhing mchog tha gru chen po de dag kun/ /cha dang dper yang 'gyur ba ma yin no/ /gang dag rgyal ba'i bka' dang shes rab can/ /de dag de bas bsod nams mang du 'gyur/ /don dam thob phyir dad pa rtsa ba ste/ /de lta bas na thos nas yid gnyis sol/ /kun dga' bo/ 'jig rten gyi khams bde ba can gyi yon tan dang bsngags pa de ltar dpag tu med do/ /kun dga' bo/ phyogs bcu'i phyogs re re yang sangs rgyas kyi zhing gang+gA'i klung gi bye ma snyed dag na sangs rgyas bcom ldan 'das gang+gA'i klung gi bye ma snyed dag bcom ldan 'das de bzhin gshegs pa 'od dpag med de'i mtshan yongs su brjod
400b
do/ /bsngags pa gsung ngo / /grags pa rab tu sgrogs so/ /yon tan brjod do/ /de ci'i phyir zhe na/ sems can gang dag kha cig gis bcom ldan 'das 'od dpag med de'i mtshan thos la/ thos nas kyang tha na sems bskyed pa gcig tsam zhig bsam pa thag pa nas dad pa dang dga' ba bskyed pa de dag thams cad bla na med pa yang dag par rdzogs pa'i byang chub las phyir mi ldog pa'i phyir ro/ /kun dga' bo/ sems can gang dag kha cig ni de bzhin gshegs pa de rnam pas yang dang yang yid la byed pa dang / dge ba'i rtsa ba mang po dpag tu med pa bskyed pa dang / byang chub tu sems yongs su bsngos te/ 'jig rten gyi khams der skye bar smon lam 'debs pa de dag 'chi ba'i dus nye bar gnas pa na de bzhin gshegs pa dgra bcom pa yang dag par rdzogs pa'i sangs rgyas 'od dpag med de dge slong gi tshogs du mas yongs su bskor zhing mdun gyis bltas nas bzhugs par 'gyur te/ de dag gis bcom ldan 'das 'od dpag med de mthong nas rab tu dang ba'i sems kyis shi 'phos te/ 'jig rten gyi khams bde ba can de nyid du skye bar 'gyur ro/ /kun dga' bo/ rigs kyi bu'am rigs kyi bu mo gang la la dag gis tshe 'di nyid la de bzhin gshegs pa 'od dpag med mthong yang ci ma rung snyam du sems ba des bla na med pa yang dag par rdzogs pa'i byang chub tu sems bskyed la/ lhag pa'i bsam pa'i rgyud kyis sangs
401a
@#/ /rgyas kyi zhing der skye bar bya ba'i phyir sems yang dag par btang ste/ dge ba'i rtsa ba rnams bskyed par bya zhing yongs su bsngo bar bya'o/ /kun dga' bo/ gang dag yang de bzhin gshegs pa de yang yid la byed cing dge ba'i rtsa ba mang po dpag tu med pa rgyun du bskyed la/ sangs rgyas kyi zhing der sems yang dag par gtod pa de dag 'chi ba'i dus nye bar gnas pa na/ de bzhin gshegs pa dgra bcom pa yang dag par rdzogs pa'i sangs rgyas 'od dpag med de'i kha dog dang / dbyibs dang / chu zheng dang / zham 'bring ba dge slong gi dge 'dun ci 'dra ba de 'dra ba'i sangs rgyas kyi sprul pa dag mdun du gnas par 'gyur te/ de dag de bzhin gshegs pa mthong bas rab tu dang ba la dmigs pa'i ting nge 'dzin de dang / brjed pa med pa'i dran pas shi 'phos nas sangs rgyas kyi zhing de nyid du skye bar 'gyur ro/ /kun dga' bo/ sems can gang dag de bzhin gshegs pa de tha na sems bskyed pa gcig tsam rjes su dran par byed cing sangs rgyas kyi zhing der skye bar 'dod la/ chos zab mo dag 'chad pa na dga' ba 'thob cing sgyid lug pa med la/ mi 'gong mi zhum zhing tha na sems bskyed pa gcig tsam de bzhin gshegs pa 'od dpag med de yi da la byed de/ 'dod pa yang bskyed na de dag rmi lam na de bzhin gshegs pa 'od dpag med de
401b
mthong zhing 'jig rten gyi khams bde ba can du skye bar 'gyur/ bla na med pa yang dag par rdzogs pa'i byang chub las phyir mi ldog par yang 'gyur ro/ /kun dga' bo/ de bzhin gshegs pa de dag don gyi dbang de gzigs nas phyogs bcu'i 'jig rten gyi khams grangs med dpag tu med pa dag na de bzhin gshegs pa 'od dpag med de'i mtshan kyang yongs su brjod do/ / bsngags pa yang gsung / bstod pa yang sgrogs so/ /kun dga' bo/ phyogs bcu'i phyogs re re nas kyang byang chub sems dpa' gang+gA'i klung gi bye ma snyed dag de bzhin gshegs pa 'od dpag med de la blta ba dang / phyag bya ba dang / bsnyen bkur bya ba dang / yongs su dri ba bya ba dang / byang chub sems dpa'i tshogs de dang / sangs rgyas kyi zhing gi yon tan gyi rgyan bkod pa phun sum tshogs pa'i khyad par de dag blta ba'i phyir sangs rgyas kyi zhing der 'dong ngo / /de nas de'i tshe bcom ldan 'das kyis don 'di nyid rgyas par gsung zhing / tshigs su bcad pa 'di dag bka' stsal to/ /'dren pa 'od dpag med kyi sangs rgyas la/ /phyag bya'i phyir ni shar gyi sangs rgyas zhing / /mtha' yas gang+gA'i klung gi bye snyed nas/ /rdzogs pa'i byang chub sems dpa' de dag lhags/ /de dag me tog kha dog tha dad pa/ /dri zhim yid 'ong mang po snyim thogs te/ /tshe dpag med pa lha dang mis mchod pa/ /mi yi 'dren pa mchog la rab tu 'thor/ /
402a
@#/ /'dren pa 'od dpag med kyi sangs rgyas la/ /phyag bya'i phyir ni de bzhin lho nub dang / /byang phyogs sangs rgyas zhing rnams ji snyed nas/ /rdzogs pa'i byang chub sems dpa' de dag lhags/ /de dag spos kyi kha dog tha dad pa/ /dri zhim yid 'ong mang po snyim thogs te/ /tshe dpag med pa lha dang mis mchod pa/ /mi yi 'dren pa mchog la rab tu 'thor/ /byang chub sems dpa' mang po de dag gis/ /mchod pa byas te dpag med 'od zhabs la/ /phyag 'tshal bskor ba byas nas 'di skad du/ /sangs rgyas zhing ni ngo mtshar mdzes zhes 'dzer/ /dga' zhing mgu ba'i sems ni gzhal yas kyis/ /de dag gis ni me tog snyim gtor nas/ /'dren pa de yi spyan sngar 'di skad du/ /bdag cag zhing yang 'di 'drar gyur ces smras/ /de dag me tog snyim pa gtor ma thag /de tshe dpag tshad brgya pa'i gdugs gyur te/ /legs par brgyan zhing yu ba bkra bas mdzes/ /sangs rgyas sku la kun tu khebs pas gnas/ /byang chub sems dpa' de dag de bzhin du/ /bsnyen bkur byas nas dga' ste 'di skad du/ /gang dag gis ni mi mchog mtshan thos pa/ /sems can de dag rnyed pa legs rnyed 'dzer/ /sangs rgyas zhing 'dir bdag cag lhags pas na/ /bdag cag gis ni sngon rnyed legs par rnyed/ /bskal pa stong du ston pas gang bsgrubs pa/ /rmi lam lta bu'i zhing ni
402b
ci 'dra ltos/ /'od ni dpag med gzi brjid dpag med pa/ /sku tshe dpag med dge 'dun dpag med pa/ /byang chub sems dpas bskor zhing mdzes gyur pa/ /sangs rgyas bsod nams phung po mchog la ltos/ /de nas tshe dpag med kyis 'dzum mdzad nas/ /'od 'phro bye ba khrag khrig sum cu drug /de dag zhal gyi dkyil 'khor nas byung ste/ /zhing stong bye ba dag ni khyab par mdzad/ /'od 'phro de dag thams cad slar log ste/ /'dren pa'i spyi gtsug der ni nub par gyur/ /de tshe 'od 'phro nub par gyur nas ni/ /lha dang mi rnams dga' ba rab tu skyed/ /de nas sangs rgyas sras po grags chen po/ /spyan ras gzigs kyi dbang phyug de langs te/ /gang slad 'jig rten mgon po 'dzum mdzad pa/ /bcom ldan de yi rgyu dang rkyen gang lags/ /sems can mang 'grol phan pa thugs brtse can/ /don dam mkhas pa de ni lung bstan gsol/ /gsung mchog yid du mchi ba de thos nas/ /sems can dag ni dga' ba'i sems su 'gyur/ /'jig rten khams mang byang chub sems dpa' dag /sangs rgyas blta slad bde can 'dir mchi ba/ /de dag thos nas dga' ba cher bskyed de/ /myur du zhing 'di rnam par blta bar 'gyur/ /rgya chen zhing 'dir lhags par gyur nas kyang| |lha yi mig dang lha yi rna ba dang / /tshe rabs dran dang blo gros mkhas mchog dang / /rdzu 'phrul stobs kyang myur du thob par 'gyur/ /sangs rgyas tshe dpag med kyis lung bstan pa/ /ngas ni sngon
403a
@#/ /tshe smon lam 'di skad btab/ /sems can gang gis nga yi ming thos na/ /nga yi zhing du rtag tu 'ong bar shog /nga yi smon lam bzang po de rdzogs pas/ /'jig rten khams mang dag nas sems can 'ong / /de dag nga yi zhing du lhags nas ni/ /de dag skye ba gcig las phyir mi ldog /de phyir byang chub sems dpa' gang zhig 'dir/ /bdag gi zhing yang 'di 'drar gyur pa dang / /bdag gi ming dang sgra dang lta bas kyang / /sems can mang po grol bar bya 'dod pa/ /de ni myur du rings par la gor du/ /bde ba can gyi 'jig rten khams song la/ /'od dpag med kyi gan du song nas ni/ /sangs rgyas bye ba stong la mchod pa gyis/ /rdzu 'phrul stobs kyi zhing mang song nas ni/ /sangs rgyas bye ba mang la mchod bya ste/ /bde bar gshegs la mchod pa byas nas kyang / /dro khar bde ba can du slar yang 'ong // //bam po gsum pa ste tha ma'o/ /kun dga' bo/ de bzhin gshegs pa dgra bcom pa yang dag par rdzogs pa'i sangs rgyas 'od dpag med de'i byang chub kyi shing ni 'phang du dpag tshad stong drug brgya yod pa/ yal ga dang / lo ma dang / 'dab ma dpag tshad brgyad brgya tshun chad du 'phyang ba/ rtsa ba'i sboms dang khrun dpag tshad lnga brgya yod pa/ rtag tu lo ma chags pa/ rtag tu me tog chags pa/ rtag tu 'bras bu chags pa/ kha dog tha dad pa/ kha dog brgya
403b
stong du ma yod pa/ lo ma tha dad pa/ me tog tha dad pa/ 'bras bu tha dad pa/ rgyan sna tshogs kyis brgyan pa/ zla ba lta bur snang ba'i nor bu rin po ches yongs su gsal ba/ brgya byin thogs pa'i nor bu rin po ches rnam par spras pa/ yid bzhin gyi nor bu rin po ches gang ba/ rgya mtsho'i nor bu rin po che mchog gis shin tu rnam par spras pa/ kha dog lha'i las 'das pa/ gser gyi skud pa 'chang ba/ se mo do mdzes pa dang / rin po che'i chun po dang / rgyan phreng dang / do shal chig rkyang dang / mu tig dmar po'i rgyan phreng dang / mu tig sngon po'i rgyan phreng dang / seng ge'i kha nas 'phyang ba'i ska rags kyi tshogs yod pa/ rin po che'i skud pa dang / rin po che thams cad dang / dung gis mngon par spras pa/ gser gyi dra ba dang / mu tig gi dra ba dang / rin po che thams cad kyi dra ba dang / dril bu g.yer kha'i dra bas bla rer bres pa/ chu srin dang / bkra shis pa dang / g.yung drung 'khyil ba dang / zla gam lta bus legs par brgyan pa/ nor bu 'khrol ba dang| gser dang rin po che'i rgyan thams cad kyis brgyan pa/ sems can gyi bsam pa'i rnam par rig pa ji lta ba bzhin du legs par brgyan pa'o/ /kun dga' bo/ byang chub kyi shing de rlung gis bskyod na sgra dbyangs 'byung ba gang yin pa des 'jig rten gyi khams tshad med pa go bar byed do/ /kun dga' bo/ de la byang chub kyi shing gi sgra de sems can gang dag gi rna lam du grag
404a
@#/ /pa de dag byang chub kyi mtha'i bar du rna nad kyis mi btab par shes par bya'o/ /sems can dpag tu med/ grangs med/ bsam gyis mi khyab/ mtshungs pa med| gzhal du med/ tshad med/ brjod du med pa gang dag gi mig lam du byang chub kyi shing de snang ba de dag byang chub kyi mtha'i bar du nam yang mig nad kyis mi btab par shes par bya'o/ /kun dga' bo/ sems can gang dag byang chub kyi shing de'i dri tshor ba de dag kyang byang chub kyi mtha'i bar du nam yang sna nad kyis mi btab par shes par bya'o/ /sems can gang dag byang chub kyi shing de'i 'bras bu'i ro myong ba de dag thams cad kyang byang chub kyi mtha'i bar du nam yang lce nad kyis mi btab par shes par bya'o/ /byang chub kyi shing de'i 'od kyis sems can gang dag la khyab par gyur ba de dag kyang byang chub kyi mtha'i bar du nam yang lus la nad kyis mi btab par shes par bya'o/ /kun dga' bo/ sems can gang dag byang chub kyi shing de chos nyid du nges par sems pa de dag kyang de nas bzung ste byang chub kyi mtha'i bar du nam yang sems mi g.yeng par shes par bya'o/ /sems can de dag thams cad ni byang chub kyi shing de mthong ma thag tu bla na med pa yang dag par rdzogs pa'i byang chub las phyir mi ldog par 'gyur ro/ /de bzhin gshegs pa tshe dpag med de nyid kyi sngon gyi smon lam gyi byin gyi rlabs
404b
dang / sngon gyi rgyal ba la lhag par bya ba byas pa dang / sngon gyi smon lam dang spyod pa shin tu rdzogs pa dang / shin tu bsgoms pa dang / mi nyung ba dang / ma tshang ba med pas 'di lta ste/ sgra'i rjes su 'gro ba dang / rjes su mthun pa dang / mi skye ba'i chos la bzod pa dang / bzod pa rnam pa gsum 'thob bo/ /kun dga' bo/ byang chub sems dpa' gang dag sangs rgyas kyi zhing der skyes pa dang / skye ba dang / skye bar 'gyur ba de dag thams cad skye ba gcig gis thogs pa gyur nas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur te/ smon lam gyi dbang ni ma gtogs so/ /byang chub sems dpa' de dag ni seng ge'i sgra chen po sgrogs pa/ go cha chen po bgos pa/ sems can thams cad yongs su mya ngan las bzla ba la mngon par brtson pa sha stag go /kun dga' bo/ sangs rgyas kyi zhing de na nyan thos gang dag 'khod pa de dag ni 'od 'dom gang ba sha stag go /byang chub sems dpa' gang dag 'khod pa de dag ni 'od dpag tshad bye ba brgya stong pa sha stag ste/ /byang chub sems dpa' gang 'od kyis 'jig rten gyi khams de rtag tu rgyun mi 'chad par khor yug tu snang bas khyab par byed pa gnyis ni ma gtogs so| |de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ byang chub sems dpa' sems dpa' chen po de gnyis kyis ming ci zhes
405a
@#/ /bgyi| bcom ldan 'das kyis bka' stsal pa/ kun dga' bo/ de gnyis la gcig gi ming ni byang chub sems dpa' sems dpa' chen po spyan ras gzigs dbang phyug ces bya'o/ /gcig gi ming ni mthu chen thob ces bya ste/ kun dga' bo/ de gnyis ni sangs rgyas kyi zhing 'di nas shi 'phos nas sangs rgyas kyi zhing der skyes so| |kun dga' bo/ byang chub sems dpa' gang dag sangs rgyas kyi zhing der skyes pa de dag thams cad ni skyes bu chen po'i mtshan sum cu rtsa gnyis dang ldan pa/ lus yongs su rdzogs pa| bsam gtan dang mngon par shes pa la mkhas pa/ shes rab kyis rab tu dbye ba la mkhas pa/ dbang po rno ba/ dbang po bsdams pa/ kun shes pa'i dbang po dang ldan pa/ ma zhum pa/ dbang po mi g.yo ba/ bzod pa thob pa/ yon tan mtha' yas pa mu med pa sha stag go /kun dga' bo/ byang chub sems dpa' gang dag sangs rgyas kyi zhing der skyes pa de dag thams cad ni sangs rgyas mthong ba dang mi 'dra la ba/ byang chub kyi mtha'i bar du log par mi ltung ba'i chos can sha stag ste/ de dag thams cad 'di nas nye bar bzung nas nam yang tshe rabs mi dran par mi 'gyur gyi tshe rabs dran par 'gyur te/ gang dag dper na/ da ltar gyi nga bzhin du snyigs ma lnga'i dus na gang gi tshe sangs rgyas bcom ldan 'das dag
405b
'jig rten du 'byung bar 'gyur ba de lta bu'i bskal pas bkrugs pa dag tu gnas par sngon smon lam btab pa rnams ni ma gtogs so/ /kun dga' bo/ byang chub sems dpa' gang dag sangs rgyas kyi zhing der skyes pa de dag thams cad snga dro gcig bzhin 'jig rten gyi khams gzhan dag tu dong nas sangs rgyas bye ba khrag khrig phrag du ma la bsnyen bkur byed de/ de dag rnam pa 'di lta bu'i me tog dang / bdug pa dang / mar me dang / spos dang / phreng ba dang / byug pa dang / phye ma dang / gos dang / gdugs dang / rgyal mtshan dang / ba dan dang / sil snyan dang / glu dbyangs dang| rol mo'i dbyangs sgra dag gis mchod par bya'o snyam du ji lta ji ltar sems bskyed cing / ji ltar 'dod pa rnams de dag gis sems bskyed ma thag tu sangs rgyas kyi mthus rnam pa de lta bu'i mchod pa'i yo byad thams cad lag pa nas 'byung bar 'gyur te/ de dag gis me tog nas rol mo'i dbyangs sgra'i bar de dag gis sangs rgyas bcom ldan 'das de dag la mchod pa byed la/ dge ba'i rtsa ba mang po tshad med/ grangs med pa dag kyang bskyed cing gsog go /gal te me tog gi skon bu rnam pa 'di lta bu lag pa nas 'byung bar gyur cig ces 'dod na yang de dag gis sems bskyed ma thag tu lha'i me tog kha dog tha dad pa/ dri tha dad pa/ dri du ma yod pa'i skon bu dag lag pa nas 'byung ste/ de dag gis skon bu'i me tog rnam pa de lta bu de dag
406a
@#/ /sangs rgyas bcom ldan 'das de dag la 'thor/ mngon par 'thor/ mngon par rab tu 'thor ro/ /skon bu'i me tog gtor ba de dag thams cad las nang gi chung du gang yin pa de yang steng gi bar snang la dpag tshad bcu'i tshad tsam gyi me tog gi gdugs su 'gyur te/ phyi ma shos ma gtor gyi bar snga mas la mi ltung ngo / /de na skon bu'i me tog gtor ba gang steng gi bar snang la dpag tshad nyi shu'i tshad tsam gyi gdugs su 'gyur ba yang yod/ dpag tshad sum cu dang / bzhi bcu'i tshad tsam yang yod/ steng gi bar snang la me tog gi gdugs dpag tshad brgya stong gi tshad kyi bar tsam du 'gyur ba dag kyang yod do/ /de na gang dag dga' ba dang mchog tu dga' ba rgya chen po bskyed cing / sems dga' ba chen po thob pa de dag dge ba'i rtsa ba grangs med dpag tu med pa bskyed nas sangs rgyas bye ba khrag khrig brgya stong phrag mang po la bsnyen bkur byas te/ snga dro gcig la slar log nas 'jig rten gyi khams bde ba can du gnas so/ /bcom ldan 'das de bzhin gshegs pa tshe dpag med de'i sngon gyi smon lam gyi byin gyi rlabs kyis yongs su zin pa dang / sngon chos mnyan pa byin pa dang / sngon gyi rgyal ba la dge ba'i rtsa ba bskyed pa dang / sngon gyi smon lam 'byor zhing yongs su rdzogs pa dang / mi nyung ba dang / shin tu rnam par phye ba dang /
406b
shin tu bsgoms pas smon lam btab pa 'grub pa/ kun dga' bo/ byang chub sems dpa' gang dag sangs rgyas kyi zhing der skyes par gyur pa de dag thams cad ni thams cad mkhyen pa nyid dang ldan pa'i chos kyi gtam smra ba dag go /sangs rgyas kyi zhing de na sems can gang dag yongs su 'dzin pa'i 'du shes 'ga' yang mi bskyed do/ /de dag thams cad sangs rgyas kyi zhing de kun du 'chag cing rnam par rgyu ba na dga' ba dang / mi dga' ba mi bskyed do/ /'gro ba na yang ltos pa med pa nyid du 'gro'i/ ltos pa dang bcas par ni ma yin no/ /'di lta ste/ dngos po yongs su 'dzin pa dang / gnas kyi sems dang / sems de lta bu dag de dag la yod med do/ /kun dga' bo/ byang chub sems dpa' gang dag 'jig rten gyi khams bde ba can der skyes pa de dag la gzhan gyi 'du shes med/ rang gi 'du shes med/ bdag gi 'du shes med/ 'thab pa med/ rtsod pa med/ mi mthun pa med/ mi mnyam pa'i sems med de/ de dag ni sems can thams cad la sems mnyam pa dang / phan pa'i sems dang / byams pa'i sems dang / mnyen pa'i sems dang / 'jam pa'i sems dang / dge ba'i sems dang / rab tu dang ba'i sems dang| brtan pa'i sems dang / sgrib pa med pa'i sems dang / 'khrug pa med pa'i sems dang / rnyog pa med pa'i sems dang / shes rab kyi pha rol tu phyin pa la spyad pa spyod pa'i sems
407a
@#/ /dang| sems kyi rgyud sgyu ma'i rang bzhin la blo rab tu zhugs pa/ shes rab rgya mtsho chen po dang mnyam pa/ blo ri rab dang mtshungs pa/ yon tan du ma bsags pa| byang chub kyi yan lag yang dag par 'gro bas rnam par brtsen pa/ sangs rgyas yang dag par 'gro ba la mngon par brtson pa/ sha'i mig rab tu rnam par 'byed pa/ lha'i mig mngon par bsgrub pa/ shes rab kyi mig rtogs par khong du chud pa/ chos kyi mig gi pha rol tu son pa/ sangs rgyas kyi spyan sgrub cing 'chad de ston pa/ rgya cher yang dag par rab tu ston cing chags pa med pa'i ye shes mngon par sgrub pa/ khams gsum mnyam pa nyid du mngon par brtson pa/ sems dul ba/ sems zhi ba/ chos thams cad mi dmigs pa dang ldan pa/ kun 'byung ba'i nges pa'i tshig la mkhas pa/ chos kyi nges pa'i tshig dang ldan pa/ gsal ba dang mi gsal ba la mkhas pa/ tshul dang tshul ma yin pa'i gnas la mkhas pa/ 'jig rten pa'i gtam la mi lta bar gnas pa/ 'jig rten las 'das pa'i gtam rnams kyi snying po rtogs pa/ chos thams cad yongs su tshol ba la mkhas pa/ chos thams cad rang bzhin gyis nye bar zhi bar shes pas gnas pa/ dmigs pa med pa'i spyod yul ba/ ci yang med pa/ len pa med pa/ sems pa med pa/ phung po med pa/ len pa med pas shin tu rnam
407b
par grol bar nyon mongs pa med pa/ mngon par shes pa rnams la thug pa med par gnas pa/ rtsa ba med pa la gnas pa/ sems chags pa med pa/ zhum pa med pa/ chos zab mo rnams la mngon par brtson pa/ sgyid lug pa med pa/ sangs rgyas kyi ye shes rtogs par dka' ba la 'jug pas/ 'phags pa bgrod pa gcig pu'i lam rjes su thob pa/ the tshom med pa/ dogs pa las brgal pa| shes pa gzhan gyi dring la mi 'jog pa/ lhag pa'i nga rgyal med pa/ ye shes kyis mngon par 'phags te ri rab dang mtshungs pa/ 'khrugs pa med pa'i blos rgya mtsho dang 'dra ba/ shes rab kyi 'od dang dkar zhing shin tu dkar la dag cing dge ba'i sems dang / gser btso ma'i kha dog 'dra bar snang zhing 'od 'byung ba'i yon tan gyi mchog gis nyi zla'i 'od las shin tu 'das pa/ sems can thams cad kyi dge ba dang / mi dge ba bzod pas sa dang mtshungs pa/ nyon mongs pa'i dri ma 'khru bar 'bab pas chu dang 'dra ba/ chos thams cad la rlom sems su byed pa dang / nyon mongs pa sreg pa'i phyir me'i phung po dang mtshungs pa/ 'jig rten thams cad la mi chags pa'i phyir rlung dang 'dra ba/ chos thams cad nges par phigs pa dang thams cad du ci yang med pa'i phyir nam mkha' dang mtshungs pa dang / 'jig rten thams cad kyis mi gos pa'i phyir pad+ma dang 'dra ba/ chos dang chos ma yin pa mngon par sgrogs pas dus kyi rjes su 'brang ba'i
408a
@#/ /'brug chen po dang mtshungs pa/ chos kyi chu'i char mngon par 'bebs pas char ba chen po dang 'dra ba/ tshogs chen po zil gyis gnon pas khyu mchog dang mtshungs pa/ sems shin tu mchog tu dul bas glang po che chen po dang 'dra ba/ shin tu dul bas rta cang shes bzang po dang mtshungs pa/ rtsal dang mi 'jigs pas skrag pa med pa'i phyir ri dwags kyi rgyal po seng ge dang 'dra ba/ sems can thams cad yongs su skyod pas shing gi rgyal po n+ya gro da dang mtshungs pa/ phas kyi rgol ba thams cad kyis mi g.yos pas ri'i rgyal po ri rab dang 'dra ba/ byams pa tshad med pa bsgoms pas nam mkha' dang mtshungs pa/ dge ba'i chos thams cad kyi dbang du bya ba'i sngon du 'gro bas tshangs pa chen po dang 'dra ba| gnas su gsog pa med pas bya dang mtshungs pa/ phas kyi rgol ba thams cad rnam par 'joms pas bya'i rgyal po nam mkha'i lding dang 'dra ba/ 'byung bar dka' ba'i phyir u dum wa ra'i me tog dang mtshungs pa/ glang po che ltar shin tu mnyam par bzhags pas rnam par g.yeng ba med pa/ dbang po rmugs pa med pa/ rnam par gtan la 'bebs pa la mkhas pa/ bzod pa dang des pa mang ba/ pha rol phun sum tshogs par smon pas phrag dog med pa/ chos kyi gtam rnams la 'jigs pa med pa/ chos yongs su tshol bas ngoms mi
408b
myong ba/ tshul khrims kyis bai DUR+Ya dang 'dra ba/ thos pa rin po che'i 'byung gnas dang mtshungs pa/ chos kyi rnga sgra chen pos sgra snyan pa/ chos kyi rnga chen po brdung ba/ chos kyi dung chen po 'bud pa/ chos kyi rgyal mtshan chen po bsgreng ba/ chos kyi ba dan chen po 'dzin pa/ chos kyi sgron ma chen po rab tu 'bar bar byed pa/ shes rab kyis rnam par lta ba rmongs pa med pa/ zhe sdang med pa/ tha ba btul ba/ dag pa/ dring ba med pa/ brkam pa med pa/ yang dag par 'geng ba la dga' ba/ gtong ba btang ba/ sbyin pa la lag brkyang ba/ chos dang zang zing yang dag par 'gyed pa la dga' ba sbyin pa la ser sna med pa/ 'dres pa med pa/ yid 'jigs pa med pa/ chags pa med pa/ brtan pa/ dpa' ba/ gces par 'dzin pa/ mos pa dang ldan pa/ ngo tsha shes pa dang ldan pa/ zug rngu phyung ba| gtan pa med pa/ mngon par shes pa thob pa/ des pa/ 'grogs na bde ba/ don byed pa/ 'jig rten gsal bar byed pa/ 'dren pa/ dga' ba'i 'dod chags dang / rjes su chags pa dang / khong khro ba spangs pa/ dag pa/ mya ngan dang bral ba/ dri ma med pa/ dri ma gsum spangs pa/ mngon par shes pas rnam par brtsen pa/ rgyu'i stobs can/ smon lam gyi stobs can/ mi dman pa/ gya gyu med pa/ sangs rgyas bye ba khrag khrig brgya stong phrag mang po la dge ba'i rtsa ba bskyed pa/ nga rgyal gyi zug rngu bton pa/ 'dod chags dang / zhe sdang dang / gti mug dang bral ba/ dag pa/ dge
409a
@#/ /ba la mos pa/ rgyal ba/ dam pas bsngags pas 'jig rten na mkhas pa/ sbyangs pa'i ye shes yang dag par bsgrubs pa/ rgyal bas bstod pa/ sems dga' ba dang ldan pa/ rtul phod pa/ sran thub pa/ mnyam pa med pa/ tha ba med pa/ gzhal du med pa/ rdul med pa/ 'dus pa rgya che ba/ khyu mchog tu gyur pa/ bden pa smra ba/ blo dang ldan pa/ dran pa dang ldan pa/ blo gros dang ldan pa/ rtogs pa dang ldan pa/ shes rab kyi mtshon cha'i lag cha can/ bsod nams dang ldan pa/ 'od dang ldan pa/ tha ba dang / dri ma dang / khong khro ba dang bral ba/ chos la rtag tu brtson pa/ chos thams cad la thos brgya mtsho lta bur gyur pa sha stag go /kun dga' bo/ mdor bsdu na sangs rgyas kyi zhing de'i byang chub sems dpa' rnams ni 'di lta bu sha stag ste/ rgyas par bya na gal te de bzhin gshegs pa tshe'i tshad bskal pa bye ba khrag khrig brgya stong du gnas pas bstan kyang skyes bu dam pa de dag gi yon tan gyi mtha' bstan pa mi nus la/ de bzhin gshegs pa'i mi 'jigs pa yang rgyun chad par mi 'gyur ro/ /de ci'i phyir zhe na/ kun dga' bo/ 'di lta ste/ byang chub sems dpa' de dag gi yon tan rnams dang / de bzhin gshegs pa'i shes rab kyi spobs pa bla na med pa de gnyis ka yang bsam gyis mi khyab cing mtshungs pa med pa'i phyir ro/ /kun dga' bo/ longs la nub
409b
phyogs su phyogs te me tog gtor la thal mo sbyor te/ gang na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas 'od dpag med rdul med cing rnam par dag pa bzhugs shing 'tsho la gzhes shing chos kyang ston pa'i phyogs der phyag 'tshol cig/ de'i mtshan de yang sgrib pa med par phyogs bcur grags te/ phyogs re re na yang sangs rgyas bcom ldan 'das gsung chags pa mi mnga' zhing gsung thogs pa mi mnga' ba gang+gA'i klung gi bye ma snyed dag lan 'ga' lan 'ga' ma yin par bsngags pa brjod cing bstod de snyan ba gsung ngo / /de skad ces bka' stsal ba dang / bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ bdag de bzhin gshegs pa dgra bcom pa yang dag par rdzogs pa'i sangs rgyas 'od dpag tu med pa de dang / tshe dpag tu med pa de dang / byang chub sems dpa' sems dpa' chen po sangs rgyas bye ba khrag khrig brgya stong mang po la dge ba'i rtsa ba bskrun pa de dag la lta 'tshal lo/ /tshe dang ldan pa kun dga' bos tshig 'di smras ma thag tu de nas de'i mod la/ de bzhin gshegs pa dgra bcom pa yang dag par rdzogs pa'i sangs rgyas de'i phyag gi mthil nas 'od gang gis sangs rgyas kyi zhing bye ba brgya stong snang bas khyab par 'gyur ba de lta bu'i 'od phyung ngo / /de'i tshe sangs rgyas kyi zhing bye ba brgya stong thams cad
410a
@#/ /ni ri nag po'am/ rin po che'i ri'am/ lhun po'am/ lhun po chen po'am/ btang bzung ngam/ btang bzung chen po'am/ khor yug gam/ khor yug chen po'am/ rtsig pa'am/ ka ba'am/ shing ljon pa stug po'am/ skyed mos tshal lam/ gzhal med khang ngam/ lha dang mi gang su dag yod pa de dag thams cad las de bzhin gshegs pa 'od dpag med de'i 'od kyis thal bar gyur cing zil gyis non par gyur to/ /'di lta ste/ dper na/ nyi ma shar nas mi zhig 'od ma gang tsam na 'dug pa la mi zhig blta ba de bzhin du| de'i tshe 'di lta ste/ sangs rgyas kyi mthu dang / 'od de yongs su dag pa'i phyir dge slong dang / dge slong ma dang / dge bsnyen dang / dge bsnyen ma dag dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / mi dang / mi ma yin pa dag sangs rgyas kyi zhing 'di nas /de bzhin gshegs pa dgra bcom pa yang dag par rdzogs pa'i sangs rgyas 'od dpag med ri'i rgyal po ri rab ltar sangs rgyas kyi zhing thams cad nas mngon par 'phags te/ phyogs thams cad zil gyis mnan nas lha ma me lhan ne lhang nger mdzes pa de dang / byang chub sems dpa'i tshogs chen po dang / dge slong gi dge 'dun de la blta'o/ /'di lta ste/ dper na/ sa chen po 'di chu
410b
gcig tu gyur na/ de la shing ljon pa rnams med/ ri rnams med/ gling rnams med/ rtswa dang shing gel ba dang / sman dang / nags tshal rnams med/ chu klung rnams med cing / ngam grog dang| g.yang sa rnams mi snang ste/ gzhan du na sa chen po rgya mtsho gcig tu gyur pa ni ma gtogs so/ /de bzhin du sangs rgyas kyi zhing de na nyan thos rnams kyi lus las mngon par 'grub pa'i 'od 'dom gang ba dang / byang chub sems dpa' rnams kyi 'od dpag tshad bye ba brgya stong yod pa ma gtogs par gzhan rtags sam/ mtshan ma cung zad med do/ /bcom ldan 'das/ de bzhin gshegs pa dgra bcom pa yang dag par rdzogs pa'i sangs rgyas 'od dpag med des nyan thos kyi tshogs de dang / byang chub sems dpa'i tshogs de zil gyis mnan nas phyogs thams cad du gsal bar kun du snang ngo / /de'i tshe 'jig rten gyi khams bde ba can der byang chub sems dpa' dang / nyan thos dang / rang sangs rgyas thams cad dang / lha dang / mi de dag thams cad dang / 'jig rten gyi khams mi mjed 'di dang / de bzhin gshegs pa shAkya thub pa dge slong gi dge 'dun chen pos bskor zhing chos ston pa yang snang ngo / /de nas bcom ldan 'das kyis byang chub sems dpa' sems dpa' chen po mi pham pa la bka' stsal pa/ mi 'pham po khyod kyis sangs rgyas kyi zhing de'i yon tan gyi rgyan bkod pa phun sum tshogs pa 'di dang /
411a
@#/ /steng gi par snang la kun dga'i ra mnyam dga' ba dag dang / nags tshal nyams dga' ba dag dang / skyed mos tshal nyams dga' ba dag dang / chu klung dang / rdzing bu nyams dga' ba dag dang / rin po che'i me tog pad+ma dang / ku mu da dang / pad+ma dkar pos gang ba dag dang / 'og tu sa'i steng nas bzung ste/ 'og min gyi gnas kyi bar gyi nam mkha'i ngos la me tog bkram pa dang / me tog gi phreng ba skun du mdzes par byas pa dang / rin po che sna tshogs bkra ba'i phreng gis gang ba dang / de bzhin gshegs pas sprul pa'i bya sna tshogs kyis bsten pa mthong ngam/ gsol pa/ bcom ldan 'das/ mthong lags so/ /bcom ldan 'das kyis bka' stsal pa/ mi pham pa khyod kyis 'di las gzhan pa'i bya'i tshogs sangs rgyas kyi zhing thams cad sgras go bar byed cing / des byang chub sems dpa' de dag rtag tu sangs rgyas rjes su dran pa dang mi 'bral bar gyur pa dag mthong ngam/ gsol pa/ bcom ldan 'das/ mthong lags so/ /bcom ldan 'das kyis bka' stsal pa/ mi pham pa khyod kyis sangs rgyas kyi zhing 'di na sems can 'di dag gzhal med khang dpag tshad brgya stong yod pa dag tu zhugs te/ bar snang la chags pa med par 'gro ba dag mthong ngam/ gsol pa/ bcom ldan 'das/ mthong lags so/ bcom ldan 'das kyis
411b
/bka' stsal pa/ mi pham pa/ 'di ji snyam du sems/ gzhan 'phrul dbang byed kyi lha rnams dang / 'jig rten gyi khams bde ba can du skyes pa'i mi rnams tha dad du bya ba yod dam/ gsol pa/ bcom ldan 'das/ bdag gis ni tha dad du bgyi ba gcig kyang yang dag par rjes su ma mthong ste/ 'jig rten gyi khams bde ba can de'i mi rnams ni rdzu 'phrul che ba'i bar du lags so/ /bcom ldan 'das kyis bka' stsal pa/ mi pham pa khyod kyis 'jig rten gyi khams bde ba can de na mi kha cig pad+ma chen po dag gi mngal na gnas pa mthong ngam/ gsol pa/ bcom ldan 'das/ 'di lta ste/ dper na/ sum cu rtsa gsum dang / 'thab bral gyi lha rnams gzhal med khang dpag tshad lnga bcu pa'am/ dpag tshad brgya pa'am/ dpag tshad lnga brgya pa rnams su zhugs te/ rtse dga' zhing dga' mgur spyod pa de bzhin du/ bcom ldan 'das/ bdag gis 'jig rten gyi khams bde ba can de'i mi kha cig pad+ma chen po dag gi mngal na gnas par mthong lags so/ /bcom ldan 'das/ de na sems can brdzus te 'byung ba gang dag pad+ma rnams la skyil mo krung bcas te 'byung ba dag kyang mchis na/ bcom ldan 'das/ kha cig pad+ma'i mngal na gnas pa dang / kha cig pad+ma la skyil mo krung bcas nas brdzus te 'byung ba de'i rgyu ni gang lags/ rkyen ni gang lags/ bcom ldan 'das kyis bka' stsal pa/ mi pham pa/ byang chub sems dpa' gang
412a
@#/ /dag sangs rgyas kyi zhing gzhan dag na gnas te/ tho tshom du lhung ba'i sems kyi 'jig rten gyi khams be ba can du skye ba bya ba'i phyir dge ba'i rtsa ba rnams bskyed pa de dag ni de na mngal na gnas so/ /gang dag the tshom med cing som nyi ma med de/ 'jig rten gyi khams bde ba can du skye bar bya ba'i phyir dge ba'i rtsa ba rnams bskyed la sangs rgyas bcom ldan 'das rnams kyi ye shes chags pa med pa la yid ches shing dad la mos pa de dag ni pad+ma rnams la skyil mo krung bcas nas brdzus te byung ngo / /mi pham pa/ byang chub sems dpa' sems dpa' chen po sangs rgyas kyi zhing gzhan na gnas pa gang dag de bzhin gshegs pa dgra bcom pa yang dag par rdzogs pa'i sangs rgyas 'od dpag med la blta ba dang / phyag bya ba dang / bsnyen bkur bya bar sems bskyed cing the tshom mi bskyed la/ sangs rgyas kyi ye shes chags pa med pa la som nyi med cing rang gi dge ba'i rtsa ba yang gsog pa de dag ni skyil mo krung bcas nas brdzus te 'byung bar 'gyur te/ 'di lta ste/ dper na/ byang chub sems dpa' skyes nas ring po ma lon pa gzhan dag dang 'dra bar yud tsam gyis lus rnam pa de lta bur 'gyur ro/ /mi pham pa/ shes rab kyi khyad par dang / shes rab kyi rim pa dang / 'di lta ste/ the tshom du lhung ba'i 'du shes yid la byed pas 'di ltar
412b
lo lnga brgyar sangs rgyas mthong ba las yongs su nyams shing / byang chub sems dpa' mthong ba dang / chos mnyam pa dang / chos kyi gtam dang / dge ba'i spyod pa dang / dge ba phun sum tshogs pa thams cad las yongs su nyams pa'i shes rab yongs su nyams pa dang / shes rab chung ba la ltos/ mi pham pa/ 'di lta ste/ 'di lta ste/ dper na/ rgyal po rgyal rigs spyi bo nas dbang bskur ba la khri mon gser dang / beDU R+Ya thams cad kyis spras pa/ dar dang / phreng ba dang / lnga ldi'i tshogs dpyangs pa/ tshon sna tshogs kyis bla re bres pa/ ras bcos bu gting ba| me tog gi sil ma sna tshogs bkram pa/ bdug pa rgya chen pos gdugs pa/ khang bzang dang / bsil khang dang / skar khung dang / kha khyer dang / rta babs dang / ba gam rin po che sna tshogs thams cad kyis brgyan pa/ gser dang rin po che'i dril bu g.yer kha'i dra bas bres pa/ gru bzhi lham pa/ ka ba bzhi zug pa/ sgo bzhi btod pa/ them skas bzhi bcas pa zhig yod la/ rgyal po de'i bu nyes pa zhig gi phyir khri mon der bcug ste/ 'dzam bu'i chu bo'i gser gyi khong sgril du bcug la/ der de'i khri bshams te stan ko ni ka bting ba la/ bar tshangs can dang| pa la li ka bting ste/ yul ka ling ka'i ras kyis gding ba bting la/ de'i steng du dar bting ste/ g.yas g.yon gnyis su rten ma dmar po bzhag la/ bkra ba/ blta na sdug pa de la de
413a
@#/ /'dug kyang rung / nyal yang rung / de'i zas skom gtsang ma bsod ba rnam pa mang po du ma bshams na/ mi pham pa/ 'di ji snyam du sems/ rgyal po'i bu de yongs su spyad pa rgya che ba yin nam/ gsol pa/ bcom ldan 'das/ rgya che lags so/ /bcom ldan 'das kyis bka' stsal pa/ mi pham pa/ 'di ji snyam du sems/ des de'i ro myang bar byed dam/ mid par byed dam/ des dga' ba 'thob bam/ gsol pa/ bcom ldan 'das/ de ni ma lags te/ nongs pa gang gi slad du rgyal pos khri mon der stsal pa/ de las thar par 'tshal zhing rigs bzang po rigs bzang po'i gzhon nu dang / blon po dang / btsun mo'i 'khor dang / tshong dpon dang / khyim bdag dang / khams kyi rgyal po'am/ gang gis khri mon de las yongs su thar par 'gyur ba yongs su tshol te/ bcom ldan 'das/ rgyal po'i bu de btson ra de na dga' ba ma mchis shing rgyal pos ma gnang gi bar du mi thar ro/ /bcom ldan 'das kyis bka' stsal pa/ mi pham pa/ de bzhin du byang chub sems dpa' gang dag the tshom du lhung bas dge ba'i rtsa ba bskyed cing sangs rgyas kyi ye shes mi mnyam pa dang / mnyam pa'i ye shes la som nyi za ba de dag sangs rgyas kyi mtshan thos pa de dang / sems dang ba tsam des 'jig rten gyis khams bde ba can der skye yang pad+ma rnams la skyil mo krung
413b
bcas shing brdzus te 'byung ba ma yin gyi/ pad+ma rnams kyi mngal na gnas pa myong ste/ de dag de la skyed mos tshal dang / gzhal med khang du 'du shes shing gnas te/ bshang gci med/ mchil ma med/ snabs med/ yid dang mi mthun pa mi 'byung mod kyi/ lo lnga brgyar sangs rgyas mthong ba dang / chos mnyan pa dang / byang chub sems dpa' mthong ba dang / 'bel ba'i chos kyi gtam rnam par nges pa dang / dge ba'i chos spyod pa thams cad dang bral ba yin te/ de dag de na mngon par mi dga' zhing mgu ba mi 'thob kyi/ sngon gyi nyes pa zad nas de dag pad+ma'i mngal nas 'byung ste| de dag de nas byung yang steng ngam/ 'og gam/ thad kar byung ba mi shes so/ /mi pham pa/ 'di ltar lo lnga brgyar sangs rgyas bye ba khrag khrig brgya stong mang po la bsnyen bkur bya ba dang / dge ba'i rtsa ba mang po grangs med/ tshad med/ dpag tu med pa dag bskyed par bya ba dang / sangs rgyas kyi chos dpag tu med pa yongs su gzung bar bya ba de thams cad kyang the tshom za ba'i nyes pas bsgrubs par ma gyur pa la ltos/ mi pham pa/ the tshom gyis byang chub sems dpa' rnams la gnod pa chen po ji tsam du 'gyur ba la ltos/ mi pham pa/ de lta bas na byang chub sems dpa' dag gis the tshom yongs su spangs te/ byang chub tu sems bskyed la myur du sems can thams cad la phan pa dang bde ba'i stobs bskyed pa'i mthu thob par bya ba'i phyir/ gang na bcom ldan
414a
@#/ /'das de bzhin gshegs pa dgra bcom pa yang dag par rdzogs pa'i sangs rgyas 'od dpag med bzhugs pa'i 'jig rten gyi khams bde ba can du skye bar bya ba'i phyir dge ba'i rtsa ba rnams yongs su bsngo bar bya'o/ /de skad ces bka' stsal pa dang / bcom ldan 'das la byang chub sems dpa' mi pham pas 'di skad ces gsol to/ /bcom ldan 'das/ sangs rgyas kyi zhing 'di nas byang chub sems dpa' yongs su grub pa dang / sangs rgyas kyi zhing gzhan dag gi sangs rgyas bcom ldan 'das rnams kyi gan nas ji snyed cig 'jig rten gyi khams bde ba can du skye bar 'gyur/ bcom ldan 'das kyis bka' stsal pa/ mi pham pa/ byang chub sems dpa' yongs su grub pa bye ba khrag khrig phrag bdun cu rtsa gnyis sangs rgyas kyi zhing 'di nas 'jig rten gyi khams bde ba can du skye bar 'gyur te/ sangs rgyas bye ba khrag khrig brgya stong phrag mang po la dge ba'i rtsa ba bskyed pas phyir mi ldog par yongs su 'grub na dge ba'i rtsa ba de bas chung ngu rnams lta smos kyang ci dgos/ de bzhin gshegs pa bzod par dka' ba'i gan nas byang chub sems dpa' bye ba khrag khrig phrag bco brgyad 'jig rten gyi khams bde ba can du skye bar 'gyur ro/ /byang shar gyi phyogs mtshams na de bzhin gshegs pa dkon mchog 'byung gnas zhes bya ba bzhugs te/ de'i gan
414b
nas byang chub sems dpa' bye ba phrag dgu bcu 'jig rten gyi khams bde ba can du skye bar 'gyur ro/ /de bzhin gshegs pa skar ma'i 'od kyi gan nas byang chub sems dpa' bye ba phrag nyi shu rtsa gnyis 'jig rten gyi khams bde ba can du skye bar 'gyur ro/ /de bzhin gshegs pa dbyangs dpag med kyi gan nas byang chub sems dpa' bye ba phrag nyi shu rtsa lnga 'jig rten gyi khams bde ba can du skye bar 'gyur ro/ /de bzhin gshegs pa 'jig rten gyi sgron ma'i gan nas byang chub sems dpa' bye ba phrag drug cu 'jig rten gyi khams bde ba can du skye bar 'gyur ro/ /de bzhin gshegs pa klu zil gyis gnon pa'i gan nas byang chub sems dpa' bye ba phrag drug cu rtsa bzhi 'jig rten gyi khams bde ba can du skye bar 'gyur ro/ /de bzhin gshegs pa rdul bral 'od kyi gan nas byang chub sems dpa' bye ba phrag nyi shu rtsa lnga 'jig rten gyi khams bde ba can du skye bar 'gyur ro/ /de bzhin gshegs pa seng ge'i gan nas byang chub sems dpa' khri brgyad stong 'jig rten gyi khams bde ba can du skye bar 'gyur ro/ /de bzhin gshegs pa dpal brtsegs kyi gan nas byang chub sems dpa' bye ba khrag khrig phrag brgyad cu rtsa gcig 'jig rten gyi khams bde ba can du skye bar 'gyur ro/ /de bzhin gshegs pa mi'i dbang po'i gan nas byang chub sems dpa' bye ba khrag khrig phrag bcu 'jig rten gyi khams bde ba can du skye bar 'gyur ro/ /de bzhin gshegs pa stobs mngon par shes pa'i gan nas byang chub sems dpa' nyis khri nyis stong 'jig rten gyi khams bde ba can du skye bar 'gyur ro/ /de bzhin gshegs pa me tog rgyal
415a
@#/ /mtshan gyi gan nas byang chub sems dpa' brtson 'grus thob pa 'jug pa gcig gis yang dag par zhugs pa nyi ma brgyad pa gcig gis bskal pa bye ba khrag khrig brgya stong phrag dgu bcu rtsa dgu'i 'khor ba bsnyil ba bye ba phrag nyi shu rtsa lnga 'jig rten gyi khams bde ba can du skye bar 'gyur ro/ /de bzhin gshegs pa 'bar ba'i bdag po'i gan nas byang chub sems dpa' bye ba phrag bcu gnyis 'jig rten gyi khams bde ba can du skye bar 'gyur ro/ /de bzhin gshegs pa mi 'jigs pa brnyes pa'i gan nas byang chub sems dpa' bye ba phrag drug cu rtsa dgu de bzhin gshegs pa 'od dpag med de la blta ba dang / phyag bya ba dang / bsnyen bkur bya ba dang / yongs su dri ba dang / yongs su dri bar bya ba'i phyir 'jig rten gyi khams bde ba can du skye bar 'gyur ro/ /mi pham pa/ rnam grangs de lta bus de bzhin gshegs pa gang dag gi gan nas byang chub sems dpa' de dag 'jig rten gyi khams bde ba can du de bzhin gshegs pa 'od dpag med de la blta ba dang / phyag bya ba dang / bsnyen bkur bya ba'i phyir 'dong ba'i de bzhin gshegs pa de dag gi mtshan bskal pa bye ba khrag khrig tshang bar brjod kyang mtha' rtogs par mi nus so/ /mi pham pa/ gang dag de bzhin gshegs pa dgra bcom pa yang dag par rdzogs pa'i sangs rgyas 'od dpag med kyi mtshan thos pa'i sems can de dag rnyed pa ji snyed cig legs par rnyed pa la ltos/ sems can gang dag de bzhin gshegs pa 'od dpag med de la than sems dad pa gcig tsam
415b
rnyed pa dang / chos kyi rnam grangs 'di las dad pa mi phyed pa de dag ni dman pa la mos par mi 'gyur ro/ /mi pham pa/ de lta bas na khyod mos par bya/ khyod kyis khong du chud par bya ste/ lha dang bcas pa dang / bdud dang bcas pa dang / tshangs pa dang bcas pa dang / dge sbyong dang bram ze'i skye dgu dang bcas pa'i 'jig rten gyi mdun du chos kyi rnam grangs 'di gzung ba dang / bcang ba dang / bklag pa dang / kun chub par bya ba dang / gzhan dag la yang rgya cher yang dag par bstan par bya ba dang / bsgom pa la mngon par dga' bar bya'o/ /mi pham pa/ chos kyi rnam grangs 'di nyid zhag gcig tsam yang bzung zhing bcas te bklags shing kun chub par byas la/ bsam pa thag pa nas gzhan dag la yang rgya cher yang dag par bshad par bya'o/ /tha na glegs bam la legs par bris te bcang bar bya zhing de la ston pa'i 'du shes kyang bskyed par bya'o/ /gang zhig sems can dpag tu med pa dag myur du bla na med pa yang dag par rdzogs pa'i byang chub las phyir mi ldog pa la dgod pa dang / bcom ldan 'das de bzhin gshegs pa tshe dpag med de la blta ba dang / bdag nyid kyang sangs rgyas kyi zhing gi yon tan gyi rgyan bkod pa phun sum tshogs pa khyad par du 'phags pa yongs su gzung bar 'dod pa des chos kyi rnam grangs 'di mnyan pa'i phyir stong gsum gyi stong chen po'i 'jig rten gyi khams mes yongs su gang ba las brgal te/ chos kyi rnam grangs 'di mnyan par bya'o/ /thos nas kyang g.yor ma lhung ba'i rgyud kyis bsam pa thag pa nas rjes su
416a
@#/ /dga' bar bya'o/ /chos kyi rnam grangs 'di gzung ba dang / kun chub par bya ba dang / bcang ba dang / yi ger bri ba dang / bsgom pa'i phyir brtson 'grus rlabs po che chen po brtsam par bya'o| |tha na ba gcig 'jos pa de srid du yang gzhan dag la brjod par bya'o/ /stong gsum gyi stong chen po'i 'jig rten gyi khams mes yongs su gang ba de brgal nas kyang 'gyod pa dang ldan pa'i sems gcig kyang bskyed par mi bya'o/ /de ci'i phyir zhe na/ mi pham pa/ 'di ltar byang chub sems dpa' bye ba khrag khrig phrag du ma dag chos kyi rnam grangs rnam pa 'di lta bu 'di nyan cing bla na med pa yang dag par rdzogs pa'i byang chub las phyir mi ldog pa'i phyir ro/ /ma 'ongs pa'i dus na dam pa'i chos rab tu rnam par 'jig pa'i bar du chos kyi rnam grangs rgya chen po rnam pa 'di lta bu sangs rgyas thams cad kyis yang dag par bsngags pa/ sangs rgyas thams cad kyis bstod pa/ sangs rgyas thams cad kyis gnang ba/ thams cad mkhyen pa'i ye shes chen po myur du bsgrub pa 'di gang dag gi rna lam du grags pa'i sems can de dag ni rnyed pa shin tu legs pa rnyed cing dge ba'i rtsa ba rnams bskyed pa dang / sngon gyi rgyal ba la lhag par bya ba byas pa dang / sangs rgyas kyi byin gyi rlabs kyis byin gyis brlabs par 'gyur ro/ /thos nas kyang dga' ba dang / mchog tu dga' ba rgya chen po thob pa dang / 'dzin pa dang / 'chang ba dang / klog pa dang / kun chub par byed pa dang / gzhan dag la yang rgya cher yang dag par rab tu ston pa dang / bsgom pa la dga' bar
416b
'gyur ba dang / tha na yi ger bris te mchod pa byed pa de dag kyang bsod nams mang du bskyed par 'gyur te/ de bgrang bar sla ba ma yin no/ /mi pham pa/ de ltar na ngas de bzhin gshegs pa'i mdzad pa de byas pa yin te/ khyod kyang da the tshom med par brtson par gyis shig /sangs rgyas kyi ye shes chags pa med cing sgrib pa med pa la som nyi ma za cig /rnam pa thams cad kyi mchog dang ldan pa'i rin po che'i btson rar chud da re/ mi pham pa/ sangs rgyas 'byung ba rnyed par dka'o/ /chos bstan pa rnyed par dka'o/ /dal ba phun sum tshogs pa rnyed par dka'o/ /mi pham pa/ ngas khyod la dge ba'i rtsa ba thams cad kyi pha rol tu phyin pa bsnyed kyi/ da khyod kyis mngon par sbyor la sgrubs shig /mi pham pa/ chos kyi rnam grangs 'di chud mi za bar bya ba'i phyir yongs su gtad pa chen po bya'o/ /sangs rgyas kyi chos mi nub par bya ba'i phyir brtson par gyis shig /de bzhin gshegs pa'i bka' ma 'khrugs par gyis shig /yun ring por gnod pa dang / mi phan pa dang / mi bde ba dang / sdug bsngal ba dang / log par ltung bar gyur ta re/ de nas de'i tshe bcom ldan 'das kyis tshigs su bcad pa 'di dag bka' stsal to/ /bsod nams dag ni ma byas pa/ /'di 'dra 'di dag thos mi 'gyur/ /dpa' bo gang dag don grub pa/ /de dag gsung 'di thos par 'gyur/ /gang gis 'od mdzad 'jig rten mgon/ /rdzogs pa'i sangs rgyas mthong nas ni/ /gus dang bcas pas chos thos pas/ /de dag dga' ba dam pa 'thob/ /lta ba can dang dman
417a
@#/ /dang zhum rnams kyis/ /sangs rgyas chos la dad pa rnyed mi nus/ /gang dag sngon gyi sangs rgyas mchod byas pa/ /de dag 'jig rten mgon gyi spyad la slob/ /dper na skyes bu yong ba mun khung na/ /lam yang mi shes bstan par ga la nus/ /de ltar nyan thos thams cad sangs rgyas kyi/ /ye shes mi rtog sems can gzhan ci smos/ /sangs rgyas kyis ni sangs rgyas yon tan mkhyen/ /lha klu lha min gnod sbyin nyan thos min/ /sangs rgyas ye shes rab tu bshad pa ni/ /rang sangs rgyas kyi lam yang 'di ma yin/ /gal te sems can thams cad bde bar gshegs// ye shes rnam dag don la mkhas gyur te/ /de dag bskal pa 'am 'on te lhag par ni/ /sangs rgyas gcig gi yon tan rjod byed kyang / /de dag rab tu mya ngan 'das gyur gyi/ /bskal pa bye ba mang por rab brjod kyang / /sangs rgyas ye shes tshad med mi 'gyur te/ /de ltar rgyal ba'i yon tan ngo mtshar to/ /de bas mkhas pa rig pa'i rang bzhin mi/ /gang zhig nga yi tshig la yid ches te/ /rgyal ba'i ye shes phung po dbang byas te/ /sangs rgyas nyid kyis mkhyen ces tshig tu brjod/ /brgya lam na ni mi yi lus rnyed la/ /brgya lam na ni sangs rgyas 'byung bar 'gyur/ /dad dang shes rab yun ring rnyed par 'gyur| /de bas don thob bya phyir brtson 'grus bskyed/ /gang zhig chos mchog 'di 'dra thos nas ni/ /bde gshegs dran pa dga' ba 'thob par 'gyur/ /gang zhig sangs rgyas byang chub
417b
mos bskyed pa/ /de dag 'das pa'i dus na deng dang shes/ /chos kyi rnam grangs 'di bshad pa na sems can bye ba phrag bcu gnyis chos rnams la chos kyi mig rdul dang bral zhing dri ma med pa rnam par dag go / bye ba phrag nyi shu rtsa bzhis ni phyir mi 'ong ba'i 'bras bu thob bo/ /dge slong brgyad brgya ni len pa med pa'i zag pa rnams las sems rnam par grol lo/ /byang chub sems dpa' bye ba phrag nyi shu rtsa lnga ni mi skye ba'i chos la bzod pa thob bo/ /lha dang mi'i skye dgu bye ba khrag khrig brgya stong phrag bzhi bcu ni sngon sems ma bskyed pa las bla na med pa yang dag par rdzogs pa'i byang chub tu sems bskyed nas bcom ldan 'das de bzhin gshegs pa 'od dpag med la blta ba dang / phyag bya ba dang / bsnyen bkur bya ba'i phyir bde ba can du skye bar dge ba'i rtsa ba rnams yongs su bsngo bar byed do/ /de dag thams cad der skyes nas kyang mthar gyis byang chub sems dpa'i spyod pa yongs su rdzogs par byas te/ sangs rgyas kyi zhing gzhan dag tu de bzhin gshegs pa 'jam pa'i dbyangs zhes bya bar bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /de bzhin gshegs pa mar me mdzad las bzod pa thob ste/ bla na med pa yang dag par rdzogs pa'i byang chub las phyir mi ldog pa bye ba khrag khrig phrag brgyad cu de bzhin gshegs pa 'od dpag med kyis sngon byang chub sems dpa'i spyad pa spyod pa na/ bla na med pa yang dag par rdzogs pa'i byang chub tu yongs su smin par byas pa de dag kyang 'jig
418a
@#/ /rten gyi khams bde ba can du skyes te/ sngon gyi smon lam dang / spyod pa yongs su rdzogs par 'gyur ro/ /de'i tshe stong gsum gyi stong chen po'i 'jig rten gyi khams 'di rnam pa drug tu g.yos te/ cho 'phrul rnam pa sna tshogs kyang kun du snang ngo / /me tog man da ra ba dag kyang sa la pus mo nub tsam du bkram par gyur to/ /lha dang / mi'i sil snyan rnams kyang rab tu grag par gyur to/ /'og min gyi gnas kyi bar du yang rjes su yi rang ngo zhes bya ba'i sgra grag par gyur to/ /bcom ldan 'das kyis de skad ces bka' stsal nas/ byang chub sems dpa' sems dpa' chen po mi pham pa dang / tshe dang ldan pa kun dga' bo dang / thams cad dang ldan pa'i 'khor de dag dang / lha dang / mi dang / lha ma yin dang dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs stong phrag brgya pa las/ de bzhin gshegs pa 'od dpag med kyi sangs rgyas kyi zhing gi bkod pa'i le'u zhes bya ste/ le'u lnga pa rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban de ye shes sdes ba sgyur cing zhus/ te skad gsar bcad kyis kyang bcos nas gtan la phab pa// //bkra shis//