//rgya gar skad du/ b+ha ga wa ti pradz+nyA pA ra mi ta hr-i da ya/ bod skad du/ bcom ldan 'das ma shes rab kyi pha rol tu phyin pa'i snying po/ bam po gcig go/ bcom ldan 'das ma shes rab kyi pha rol tu phyin pa la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab bya rgod phung po'i ri la dge slong gi dge 'dun chen po dang / byang chub sems dpa'i dge 'dun chen po dang thabs gcig tu bzhugs te/ de'i tshe bcom ldan 'das zab mo snang ba zhes bya ba'i chos kyi rnam grangs kyi ting nge 'dzin la snyoms par zhugs so/ /yang de'i tshe byang chub sems dpa' sems dpa' chen po 'phags pa spyan ras gzigs dbang phyug shes rab kyi pha rol tu phyin pa zab mo spyod pa nyid la rnam par lta zhing / phung po lnga po de dag la yang rang bzhin gyis stong par rnam par lta'o/ /de nas sangs rgyas kyi mthus/ tshe dang ldan pa shA ri'i bus/ byang chub sems dpa' sems dpa' chen po 'phags pa spyan ras gzigs dbang phyug la 'di skad ces smras so/ /rigs kyi bu 'am/ rigs kyi bu mo gang la la shes rab kyi pha rol tu phyin pa zab mo spyod pa spyad par 'dod pa des 45b ji ltar bslab par bya/ de skad ces smras pa dang / byang chub sems dpa' sems dpa' chen po 'phags pa spyan ras gzigs dbang phyug gis che dang ldan ba sha radwa ti'i bu la 'di skad ces smras so/ shA ri'i bu/ rigs kyi bu'am/ rigs kyi bu mo gang la la shes rab kyi pha rol tu phyin pa zab mo spyod pa spyad par 'dod pa des 'di ltar rnam par blta bar bya ste| phung po lnga po de dag kyang rang bzhin gyis stong par rnam par yang dag par rjes su blta'o/ /gzugs stong pa'o/ /stong pa nyid gzugs so/ /gzugs las stong pa nyid gzhan ma yin| stong pa nyid las kyang gzugs gzhan ma yin no/ /de bzhin du tshor ba dang / 'du shes dang / 'du byed rnams dang / rnam par shes pa rnams stong pa'o/ /shA ri'i bu| de lta bas na/ chos thams cad stong pa nyid de/ mtshan nyid med pa/ ma skyes pa/ ma 'gags pa/ dri ma med pa/ dri ma dang bral ba med pa/ bri ba med pa/ gang ba med pa'o| |shA ri'i bu/ de lta bas na/ stong pa nyid la gzugs med/ tshor ba med/ 'du shes med/ 'du byed rnams med/ rnam par shes pa med/ mig med/ rna ba med| sna med/ lce med/ lus med/ yid med/ gzugs med/ sgra med/ dri med/ ro med/ reg bya med/ chos med do/ /mig gi khams med pa nas/ yid kyi khams 46a @#/ /med| yid kyi rnam par shes pa'i khams kyi bar du yang med do/ /ma rig pa med/ /ma rig pa zad pa med pa nas/ rga shi med/ rga shi zad pa'i bar du yang med do/ /sdug bsngal ba dang / kun 'byung ba dang / 'gog pa dang / lam med/ ye shes med/ thob pa med/ ma thob pa yang med do/ /shA ri'i bu/ de lta bas na/ byang chub sems dpa' rnams thob pa med pa'i phyir/ shes rab kyi pha rol tu phyin pa zab mo la brten cing gnas te/ sems la sgrib pa med pas skrag pa med de/ phyin ci log las shin tu 'das nas mya ngan las 'das pa'i mthar phyin to/ /dus gsum du rnam par bzhugs pa'i sangs rgyas thams cad kyang shes rab kyi pha rol tu phyin pa la brten nas/ bla na med pa yang dag par rdzogs pa'i byang chub tu mngon par rdzogs ba sangs rgyas so/ /de ltar bas na shes rab kyi pha rol tu phyin pa'i sngags/ rig pa chen po'i sngags/ bla na med pa'i sngags/ mi mnyam pa dang / mnyam pa'i sngags/ sdug bsngal thams cad rab tu zhi bar byed pa'i sngags/ mi brdzun pas na bden par shes par bya ste/ shes rab kyi pha rol tu phyin pa'i sngags smras pa/ tad+ya thA/ ga te ga te pA ra ga te/ pA ra saM ga te/ bo d+hi swAhA/ shA ri'i bu/ de 46b lta bas na/ byang chub sems dpa' sems dpa' chen pos/ de ltar shes rab kyi pha rol tu phyin pa zab mo la bslab par bya'o/ /de nas bcom ldan 'das ting nge 'dzin de las bzhengs te/ byang chub sems dpa' sems dpa' chen po 'phags pa spyan ras gzigs dbang phyug la legs so zhes bya ba byin nas/ legs so/ /legs so| |rigs kyi bu/ de de bzhin no/ /rigs kyi bu/ de de bzhin te/ ji ltar khyod kyis bstan pa de bzhin du/ shes rab kyi pha rol tu phyin pa zab mo la spyad par bya ste/ de bzhin gshegs pa rnams kyang rjes su yi rang ngo / /bcom ldan 'das kyis de skad ces bka' stsal nas/ tshe dang ldan pa sha ra dwa ti'i bu dang / byang chub sems dpa' sems dpa' chen po 'phags pa spyan ras gzigs dbang phyug dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /bcom ldan 'das ma shes rab kyi pha rol tu phyin pa'i snying po zhes bya ba'i mdo rdzogs so// //rgya gar gyi mkhan po bi ma la mi tra dang / lots+tsha ba dge slong rin chen sdes bsgyur cing / zhus chen gyi lots+tsha ba dge blo dang / 47a @#/ /nam mkha' la sogs pas zhus te gtan la phab pa/ dpal bsam yas lhun gyis grub pa'i gtsug lag gi dge rgyas bye ma gling gi rtsig ngos la bris pa dang zhus dag legs par bgyis so// |