rgya gar skad du/ AR+Ya sar+b+ba durga ti pa ri sho d+ha ni uSh+NI Sha bi dza ya nA ma d+hA ra Ni/ bod skad du/ 'phags pa ngan 'gro thams cad yongs su sbyong ba gtsug tor rnam par rgyal ba zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /de nas lha'i bu shin tu brtan pa zhes bya ba zhig sum cu rtsa gsum gyi lha rnams kyi nang chos bzang lha'i mdun sa na gnas te/ lha'i gzhal yas khang chen po na lha'i longs spyod chen po dang / lha'i bu mo'i tshogs chen pos bskor nas rtse dga' zhing dga' mgur spyod de/ de lha'i longs spyod myong ba las mtshan mo sgra zhig thos pa/ lha'i bu shin tu brtan pa zhag bdun gyi nyin par 212a @#/ /'chi ba'i dus byed de/ de 'chi ba'i dus byas nas kyang 'dzam bu'i gling du skyes te/ der yang 'gro ba bdun po myong bar 'gyur ro/ /'gro ba bdun po myong nas sems can dmyal bar skye bar 'gyur ro/ /brgya la nam zhig mir skyes par gyur na yang der dbul por 'gyur zhing dmus long du 'gyur ro/ /zhes des thos so/ /de nas lha'i bu des sgra de thos nas 'jig skrag sdangs te spu zing zhes byed par gyur nas des rings pa rings par lha'i dbang po brgya byin ga la ba der song ste phyin nas de nas lha'i dbang po brgya byin gyi rkang pa la phyag 'tshal te brtabs par smra zhing de kyi hud kyi hud ces smre sngags 'don bzhin du lha'i dbang po brgya byin la 'di skad ces smras so/ /lha'i dbang po/ gsan du gsol// lha'i dbang po/ bdag deng lha'i bu mo'i tshogs kyis bskor te lha'i longs spyod kyi dga' bas rtse zhing bde ba myong ba las sgra zhig thos pa/ lha'i bu shin tu brtan pa zhag bdun na 'chi ba'i dus byed par 'gyur te/ 'dzam bu'i gling du skye bar 'gyur ro/ /der yang 'gro ba bdun myong nas sems can dmyal bar skye bar 'gyur ro/ /brgya la nam zhig mir skyes par gyur na yang der de dbul por 'gyur zhing dmus long du yang 'gyur ro/ /zhes thos na/ lha'i dbang po/ de la bdag gis ji ltar bsgrub par bgyi/ de nas lha'i dbang po brgya byin gyis lha'i bu 212b shin tu brtan pa'i tshig de thos nas shin tu ngo mtshar du 'dzin par 'gyur te/ lha'i bu 'dis 'gro ba bdun po gang dag myong bar 'gyur snyam du sems shing cang mi smra bar 'dug pa dang / 'gro ba bdun ni/ phag gi skye gnas dang / khyi dang / wa dang / spre'u dang / sbrul gdug pa dang / bya rgod dang / bya khwa ste/ 'gro ba bdun po de dag shin tu mi gtsang ba za ba myong bar 'gyur ba mthong ngo| /de nas lha'i dbang po brgya byin gyis 'gro ba bdun po de dag mthong nas 'di snyam du e ma lha'i bu 'di sdug bsngal mi bzod pa chen po myong bar 'gyur na/ de bzhin gshegs pa dgra bcom pa yang dag par rdzogs pa'i sangs rgyas ma gtogs par de'i skyabs dang / rten dang / dpung gnyen du 'gyur ba su yod snyam du bsams so/ /de nas lha'i dbang po brgya byin nub mo de'i srod la spos dang / me tog dang / bdug pa sna tshogs dang / gos dang / rgyan sna tshogs la sogs pa khyer nas bcom ldan 'das ga la ba der song ste phyin pa dang / bcom ldan 'das kyi zhabs la mgo bos phyag 'tshal te lan bdun bskor ba byas nas mchod pa chen po byas te bcom ldan 'das kyi spyan sngar 'dug nas lha'i bu shin tu brtan pa'i 'gro ba bdun po dag bcom ldan 'das la zhib tu gsol to/ /lha'i dbang po brgya byin gyis 'gro ba bdun po de dag gsol ma thag tu de nas bcom ldan 'das kyi gtsug tor nas 'od zer sna tshogs byung 213a @#/ /ste| des phyogs bcu'i 'jig rten gyi khams kyi gnas thams cad kun nas snang bar byas te slar log nas bcom ldan 'das kyi zhal gyi sgor zhugs so/ /de nas bcom ldan 'das kyis 'dzum pa mdzad nas lha'i dbang po brgya byin la 'di skad ces bka' stsal to/ /lha'i dbang po/ gtsug tor rnam par rgyal ba zhes bya ba'i gzungs de bzhin gshegs pas spyi bo nas dbang bskur ba/ ngan 'gro thams cad yongs su sbyong ba/ sgrib pa dang sdug bsngal bar skye ba thams cad 'jig par byed pa/ sems can dmyal ba dang / byol song gi skye gnas dang / gshin rje'i 'jig rten thams cad yongs su sbyong ba/ bde 'gro'i lam du 'jog pa yod de/ lha'i dbang po/ de lta bas na gtsug tor rnam par rgyal ba zhes bya ba'i gzungs ngan 'gro thams cad yongs su sbyong ba thos ma thag tu sgrib par 'gyur ba'i sdug bsngal gyi rang bzhin sna tshogs shin tu mang po 'jig par byed do/ /skye ba yongs su dag pa'i rgyud thob par 'gyur ro/ /tshe rabs thams cad du yang tshe rabs dran par 'gyur ro/ /sangs rgyas kyi zhing nas sangs rgyas kyi zhing du 'gro bar 'gyur ro/ /lha'i 'jig rten nas lha'i 'jig rten du 'gro bar 'gyur te/ lha'i gnas sum cu rtsa gnyis kyi bar du 'gro bar 'gyur ro/ /lha'i dbang po/ de brjod ma thag tu tshe zad pa yang tshe phyir nur bar 213b 'gyur ba'i las thob par 'gyur ro/ /lus dang ngag dang yid kyi las yongs su dag pa bsags pa bde bar reg pa la gnas pas gnas par 'gyur ro/ /de bzhin gshegs pa thams cad kyang de la gzigs so/ /de dag de la rtag tu rgyun mi 'chad par srung ba dang / bskyab pa dang / sba bar mdzad par 'gyur ro/ /byang chub sems dpa' thams cad kyang de la sems par 'gyur/ brjod pa tsam gyis sems can dmyal ba dang / dud 'gro'i skye gnas dang / gshin rje'i 'jig rten dang / yi dwags kyi yul thams cad skem par 'gyur/ rnam par 'jig par 'gyur/ rnam bar 'thor bar 'gyur/ rnam par sel bar 'gyur/ stong par 'gyur ro/ /de ltar de la sangs rgyas kyi zhing thams cad dang / lha'i gnas thams cad dang / byang chub sems dpa'i gnas thams cad kyi sgo rnams phye bar 'gyur ro/ /de gang 'dod pa der 'jug par 'gyur ro/ /de nas bcom ldan 'das la lha'i dbang po brgya byin gyis 'di skad ces gsol to/ /bcom ldan 'das/ gzungs de bka' stsal du gsol/ sems can thams cad kyi srog la sman gdags pa bshad du gsol/ de nas bcom ldan 'das kyis lha'i dbang bo brgya byin gyis gsol ba btab pa mkhyen nas gzungs 'di dag bka' stsal to/ /oM na mo b+ha ga ba te sar+b+ba trai lokya pra ti paM shiSh+TA ya bud+d+ha ya te na maH/ tad+ya thA/ oM b+h+rUM b+h+rUM b+h+rUM/ sho 214a @#/ /d+ha ya sho d+ha ya/ bi sho d+ha ya bi sho d+ha ya/ a sa ma sa man+ta a ba b+hA sa s+pha ra Na ga ti/ ga ga na swa b+hA ba bi shud+d+he/ a b+hi Shiny+tsan+tu maM/ sar+b+ba ta thA ga tAH su ga ta ba ra ba tsa na/ a mr-i ta a b+hi Shek+Shai ra/ ma hA mu dra/ man+d+ra pa daiHA ha ra A ha ra/ ma ma A yuHsan+d+hA ra Ni/ sho d+ha ya sho d+ha ya/ bi sho d+ha ya bi sho d+ha ya/ ga ga na swa b+hA ba bi shud+d+he/ uSh+NI Sha bi dza ya pa ri shud+d+he/ sa ha sra rasmi saM tso di te/ sar+b+ba ta thA ga ta a ba lo ki ni/ ShaT+phA raM mi tA pa ri pU ra Ni/ sar+b+ba ta thA ga ta mA te da sha b+hU mi pra tiSh+Thi te/ sar+b+ba ta thA ga tA hri da ya a d+hiSh+ThA na a d+hiSh+Thi te/ mu dre mu dre/ mahA mu dre/ badz+ra kA ya saM ha ta na/ pa ri shud+d+he/ sar+b+ba karma A ba ra Na bi shud+d+he/ pra ti ni brda ya/ ma ma A yur bi shud+d+he/ sar+b+ba ta thA ga tA sa ma ya a d+hiSh+ThA na a d+hiSh+Thi te/ oM mu ne mu ni/ ma hA mu ni/ bi mu ni bi mu ni/ mahA bi mu ni/ ma ti ma ti/ ma hA ma ti/ ma ma ti/ su ma ti/ ta thA ga tA/ b+hU ta ko Ti/ pa ri shud+d+he bi s+phu Ta/ shud+d+he shud+d+he/ he he/ dza ya dza ya/ bi dza ya bi dza ya/ sma ra sma ra/ s+pha ra s+pha ra/ s+phA ra ya s+phA ra ya/ sar+b+ba bud+d+hA a d+hiSh+ThA na a d+hiSh+ThI te/ shud+d+he shud+d+he/ bud+d+he bud+d+he/ badz+re badz+re ma hA badz+re/ su badz+re/ badz+ra gar+b+he/ dza ya gar+b+he/ bi dza ya gar+b+he/ badz+ra dz+wA la gar+b+he/ badz+ra ud b+ha ba/ badz+ra saM b+ha be/ badz+re bidz+rA ni/ badz+ram+b+ha ban+tu/ ma ma shi rI raM sarba satwA nAny+tsa kA ya pa ri 214b shud+d+hir b+h+ra ba tuM/ sa dA me sar+b+ba ga ti pa ri shud+d+hi sh+tsa/ sar+b+ba ta thA ga tA sh+tsa mAM sa ma shwa sa yan+tu/ bud+h+ya bud+h+ya/ sid+h+ya sid+h+ya/ bo d+ha ya bo d+ha ya/ bi bo d+ha ya bi bo d+ha ya/ mo tsa ya mo tsa ya/ bi mo tsa ya bi mo tsa ya/ sho d+ha ya sho d+ha ya/ pi sho d+ha ya bi sho d+ha ya/ sa man+tu/ mo tsa ya mo tsa ya/ sa man+ta rasmi pa bi shud+d+he/ sar+b+ba ta thA ga tA hri da ya a d+hiSh+ThA na a d+hiSh+ThI te/ mu dre mu dre| ma hA mu dre ma hA mu dre man+d+rA pa daiHswAhA/ lha'i dbang po/ gtsug tor rnam par rgyal ba zhes bya ba'i gzungs/ ngan 'gro thams cad yongs su sbyong ba/ sdig pa dang / las dang / sgrib pa thams cad rnam par sbyong ba/ bde 'gro'i lam thams cad du 'gro ba dang / ngan 'gro thams cad rnam par 'jig par byed pa 'di ni/ sangs rgyas bcom ldan 'das gang+gA'i klung 'bum phrag bye ba phrag brgyad cu rtsa brgyad kyi bye ma snyed dag gis gsungs pa/ byin gyis brlabs pa/ rjes su yi rang bar mdzad pa/ de bzhin gshegs pa thams cad kyi ye shes kyi phyag rgyas btab pa ste/ sems can thams cad bde 'gror 'gro bar bya ba dang / ngan 'gror lhung ba rnams bzlog pa dang / sems can dmyal ba dang / dud 'gro'i skye gnas dang / gshin rje'i 'jig rten la sogs pa sdug bsngal gyi gnas thams cad du sdug bsngal zhing nyam nga bar gyur pa rnams dang / sdug bsngal gyi rgya mtshor lhung ba'i sems can rnams 215a @#/ /rnam par grol bar bya ba'i phyir gsungs pa'o/ /de bzhin du sems can tshe thung zhing skal ba chung ba dang / smad pa dang / bsam pa nyams pa dang / sems can lam las nyams pa rnams kyi don du gzungs 'di 'dzam bu'i gling du bzhag go /lha'i dbang po/ khyod kyis gzungs 'di zungs la lha'i bu shin tu brtan pa la sgrogs shig / bsgrags nas kyang gdon pa dang / kha ton du bya ba dang / bsam pa dang / bsgom pa dang / dran par bya ba dang / mchod pa dang / gzung ba dang / kun chub par bya ba la de sbyor bar gyis shig dang / de ltar lha'i gnas thams cad na 'khod pa'i lha'i bu rnams dang / 'dzam bu'i gling pa'i sems can rnams kyi don dang / phan pa dang / bde ba'i phyir gzungs kyi phyag rgya dang / gsang sngags 'di dag khyod la gtad do/ /de'i phyir lha'i dbang po khyod kyis gzung bar bya'o/ /lha'i dbang po/ gzungs 'di thos ma thag tu bskal pa brgya stong du bsags pa'i las kyi sgrib pa yongs su byang bar 'gyur ro/ /skye bar skye ba rnam pa sna tshogs sems can dmyal ba dang / dud 'gro'i skye gnas dang / gshin rje'i 'jig rten dang / yi dwags kyi yul dang / lha ma yin gyi ris dang / 'di lta ste/ gnod sbyin dang / srin po dang / 'byung po dang / sha za dang / srul po dang / lus srul po dang / khyi 215b dang / rus sbal dang / sbrul dang / gcan gzan khro bo dang / bya dang / sbrang bu dang / sbrang ma dang / sdig sbrul dang / grog sbur la sogs pa'i srog chags kyi rigs su phyis mi skye bar shes par bya'o/ /gzhan du na de bzhin gshegs pa dang phrad pa dang / byang chub sems dpa'i rigs su skye ba ni/ ma gtogs so/ /de rigs chen po 'di lta ste/ bram ze'i rigs shing sA la chen po lta bu'am/ rgyal rigs shing sA la chen po lta bu'am/ tshong dpon gyi rigs shing sA la chen po lta bur skye'o zhes da smra'o/ /lha'i dbang po/ de ltar na gzungs 'di'i mthus byang chub kyi snying po la mthar thug gi bar du skye ba yongs su dag pa chen po 'thob ste/ lha'i dbang po/ gzungs 'di ni/ de ltar mthu che ste/ lha'i dbang po gzungs 'di ni/ de ltar mthu che ba/ phan yon che ba/ mthu stobs che ba/ dge zhing shis pa yin te/ lha'i dbang po/ sems can rnams kyi don gyi phyir gtsug tor rnam par rgyal ba zhes bya ba'i gzungs ngan 'gro thams cad yongs su sbyong ba 'di bzhag go /'di lta ste/ dper na/ nor bu rin po che nyi ma'i snying po shin tu dri ma med pa nam mkha' ltar yongs su dag pa 'od gsal ba ni/ 'od zer gyi snang bas 'bar zhing 'dug go /lha'i dbang po/ de bzhin du sems can de yang gos pa med par shes par bya'o/ /'di lta ste/ dber 216a @#/ /na| 'dzam bu'i chu bo'i gser ni/ dri ma med pa/ shin tu yongs su dag pa/ shin tu mnyen pa/ shin tu sdug pa'o/ /lha'i dbang po/ de bzhin du sems can de yang shin tu yongs su dag par rig par bya ste/ tshe rabs gzhan du yang de bzhin du skye bar 'gyur ro/ /lha'i dbang po/ gang na gzungs 'di rab tu ston pa dang / bye brag tu na yi ger 'drir 'jug pa dang / 'dzin pa dang / klog pa dang / gdon pa dang / kha ton du byed pa dang / mchod pa dang / kun chub bar byed pa dang / nyan pa dang / 'dzin par 'gyur ba der 'gro ba thams cad yongs su dag bar 'gyur/ sems can dmyal ba thams cad rgyun chad par 'gyur ro/ /lha'i dbang po/ gzungs 'di yi ger bris te rgyal mtshan gyi rtse mor gzhag par bya/ ri mthon po'am/ khang pa mthon po'am/ mchod rten gyi srog shing gi steng du gzhag par bya'o/ lha'i dbang po/ dge sbyong ngam/ dge slong ma'am/ dge bsnyen nam/ dge bsnyen ma'am/ de las gzhan pa'i rigs kyi bu'am/ rigs kyi bu mo gang gis rgyal mtshan gyi rtse mor bzhag pa mthong ngam/ de dang de nye bar gnas par gyur na/ tha na de'i grib mas phog gam/ de'i rdul rlung gis btab pas phog na yang lha'i dbang po/ sems can de la sdig pa thams cad dang / ngan 'gror 'gro ba'i 'jigs 216b pa thams cad mi 'byung ngo / /sems can dmyal ba dang / dud 'gro'i skye gnas dang / gshin rje'i 'jig rten dang / yi dwags dang / lha ma yin gyi ris thams cad du mi skye bar 'gyur ro| |lha'i dbang po/ sems can de ni/ de bzhin gshegs pa thams cad kyis lung bstan cing bla na med pa yang dag par rdzogs pa'i byang chub las phyir mi ldog par rig par bya'o/ / lha'i dbang po/ mchod pa dang / rim gro byed cing me tog dang / bdug pa dang / spos dang / me tog phreng ba dang / byug pa dang / gdugs dang / rgyal mtshan dang / ba dan dang / rgyan rnams kyis brgyan par byed pa dang / lam gyi bzhi mdor mchod rten byas te gzungs 'di bzhag pa la thal mo sbyor ba'am/ phyag 'tshal ba'am/ bskor ba byed pa lta ci smos te/ lha'i dbang po/ sems can de ni/ sems can chen por rig par bya'o/ /de bzhin gshegs pa'i sras su rig par bya'o/ /chos kyi gnas su rig par bya'o/ /de bzhin gshegs pa'i mchod rten du rig par bya'o/ /de nas chos kyi rgyal po gshin rje nub mo nam langs nas bcom ldan 'das ga la ba der song ste bcom ldan 'das la lha'i me tog dang / gos dang / rgyan la sogs pas mchod pa dang / bsti stang byas nas des bcom ldan 'das la lan bdun bskor ba byas nas bcom ldan 'das kyi zhabs la gtugs nas 'di skad ces gsol 217a @#/ /to| |bcom ldan 'das/ gzungs 'di ni/ mthu che zhing phan yon che ba lags te/ bcom ldan 'das/ bdag kyang rtag tu rgyun mi 'chad par sems can de'i slad bzhin du 'brang zhing kun tu bsrung ba dang / yongs su bskyab pa'i slad du gnas par bgyi'o/ /sems can dmyal ba thams cad las de bzlog par bgyi'o/ / bcom ldan 'das/ bdag ni/ byas pa gzo bar bgyid cing byas pa mi gzo bar mi bgyid do/ /de nas rgyal po chen po bzhis bcom ldan 'das la lan gsum bskor ba byas te bcom ldan 'das la 'di skad ces gsol to/ /bcom ldan 'das/ gzungs 'di'i cho ga zhib mo dang / bgyi ba'i cho ga'i tshul rgyas par bshad du gsol/ de nas bcom ldan 'das kyis rgyal po chen po bzhi po dag la 'di skad ces bka' stsal to/ /nyon cig dang gzungs 'di'i bya ba'i tshul bshad par bya'o/ /sems can tshe thung ba'i don gyi phyir rigs kyi bu'am/ rigs kyi bu mos tshes bco lnga'i zla ba nya la khrus byas te lan stong rtsa brgyad bzlas brjod byas na/ nges sems can tshe zad pa de'i tshe phyir nur nas nad thams cad dang bral bar 'gyur ro/ /sgrib pa thams cad rnam par dag pa thob par 'gyur ro/ /sems can dmyal ba la sogs pa ngan 'gro thams cad las 217b yongs su thar par 'gyur ro/ /tha na dud 'gro'i skye gnas su song ba'i srog chags bya'i rna lam du gzungs 'di'i sgra bsgrag par bya ste/ des ni/ de'i ngan 'gro'i tha ma yin par rig par bya'o| |gang zhig nad chen pos btab ste sman pa thams cad kyis bye brag ma phye ba de yang nad de las yongs su thar par 'gyur ro/ /de'i ngan 'gror skye ba thams cad kyang rgyun chad par 'gyur ro/ /shi 'phos nas kyang 'jig rten gyi khams bde ba can du skye bar 'gyur ro/ /de nyid de'i mngal gyi gnas tha ma yin par rig par bya'o/ /gang dang gang du skyes pa de dang der pad+ma'i snying po kho na las brdzus te skye bar 'gyur ro/ /tshe rabs thams cad du yang tshe rabs dran par 'gyur ro/ /sems can sdig pa byed pa gang dag shi ba'i dus byas pa de dag gi don du gzungs yungs kar dag la lan nyi shu rtsa gcig yongs su brjod de/ de dag gi rus gong rnams kyi steng du gtor na/ de dag dmyal ba'am/ dud 'gro'i skye gnas sam/ gshin rje'i 'jig rten nam/ yi dwags sam/ de las gzhan ngan 'gro rnams su skyes par gyur kyang rung ste/ de dag gzungs 'di'i mthus ngan 'gro de dag las thar par 'gyur ro| |de dag las thar nas kyang lhar skye bar 'gyur ro/ /su zhig 'di nyin gcig bzhin du lan nyi shu rtsa re re yongs su brjod pa de 'jig rten mang po'i mchod pa'i 'os su 'gyur ro/ / 218a @#/ /tshe ring bar 'gyur ro/ /bde ba myong bar 'gyur ro/ /rtag tu spro ba dang ldan pa dang| mya ngan las 'das pa chen po thob par 'gyur ro/ /shi 'phos nas kyang 'jig rten gyi khams bde ba can du skye bar 'gyur ro/ /de nas kyang sangs rgyas kyi zhing tha dad pa sna tshogs su 'gro par 'gyur ro/ /der yang de bzhin gshegs pa thams cad dang phrad par 'gyur/ /de bzhin gshegs pa thams cad kyis kyang dbugs 'byin par 'gyur/ de bzhin gshegs pa thams cad kyis lung ston par 'gyur ro/ /sangs rgyas kyi zhing thams cad du yang 'jig rten la snang bar byed par 'gyur ro/ /lha'i dbang po/ thabs 'dis ni/ 'gro ba thams cad kyang sems can dmyal ba la sogs pa'i 'gro ba thams cad las yongs su thar par 'gyur ro/ /de dag gi 'gro ba thams cad kyang yongs su dag cing tshe ring bar yang 'gyur ro/ /lha'i dbang bo/ song la lha'i bu blo gros shin tu brtan pa la gzungs 'di rjes su ston la sgrogs shig /lha'i dbang po/ des na zhag bdun na lha'i bu shin tu brtan pa'i 'gro ba thams cad yongs su dag cing tshe ring bar 'gyur ro/ / stobs che bar 'gyur ro/ /de nas lha'i dbang po brgya byin gyis de bzhin gshegs pa las rjes su bstan pa 'di blangs te de'i gnas su phyin nas lha'i bu shin tu brtan pa la 218b gzungs 'di byin no/ /de nas lha'i bu des nyi ma bdun ba'i bar du nyin drug mtshan drug tu gzungs 'di la brtson par byas pa na de'i bsam pa thams cad phun sum tshogs pa 'di lta ste/ ngan 'gro las ni/ yongs su thar/ bde 'gro'i lam la yang dag gnas/ tshe ring bar yang gyur nas a la la sangs rgyas/ a la la chos/ a la la gzungs 'di lta bu 'jig rten du byung ste| des bdag 'jigs pa chen po las yongs su thar par gyur ro/ /zhes ched du brjod pa ched du brjod do/ /'phags pa ngan 'gro thams cad yongs su sbyong ba gtsug tor rnam par rgyal ba zhes bya ba'i gzungs rdzogs so// //rgya gar gyi mkhan po dzi na mi tra dang / su ren+d+ra bo d+hi dang / zhu chen gyi lo ts+tsha ba ban+d+he ye shes sdes bsgyur cing zhus te gtan la phab pa/ / |