rgya gar skad du/ AR+Ya sarba ro ga pra sha ma ni nA ma d+hA ra Ni/ bod skad du/ 'phags pa nad thams cad rab tu zhi bar byed pa ces bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na| bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas bcom ldan 'das kyi dge slong rnams la bka' stsal pa/ dge slong dag /chos kyi rnam grangs 'di zungs shig/ chongs shig /lhogs shig/ kun chub par gyis shig/ gzhan dag la yang rgya cher yang dag par ston cig /tad+ya thA/ tsa le me/ tsa le me/ paM na ko ki li/ shri ma ti/ kuN+Da le/ dun+du b+he/ in+d+ra ni/ mu khe swAhA/ 'di dag ni/ zas ma zhu ba dang / sbos pa dang / khrag 284b dang mkhris pa 'dres pa dang / gzhang 'brum gyis btab pa dang / gzhan nad can dang / za gu dang / lud pa can dang / rims nad can dang / klad pa na ba dang / gzhogs phyed na ba dang / yi dwags kyis zin pa'i gsang sngags kyi gzhi yin te/ kun dga' bo/ gang gsang sngags kyi gzhi 'di dag las 'gal bar byed pa de ni/ ngas lha dang bcas pa'i 'jig rten na ma mthong ngo / /tshe zad pa ni/ ma gtogs so/ /gsang sngags kyi gzhi 'di dag ni/ de bzhin gshegs pa dgra bcom pa yang dag par rdzogs pa'i sangs rgyas kyis gsungs pa ste/ 'di la sangs rgyas ni/ sems can thams cad kyi mchog go /'dod chags dang bral ba ni/ chos thams cad kyi mchog go /dge 'dun ni| tshogs thams cad kyi mchog go /bden pa'i tshig dang / bden pa'i ngag 'dis bdag gis zos pa dang / 'thung ba dang / 'chos pa dang / myangs pa rnams legs par bde bar zhu bar gyur cig swAhA/ bcom ldan 'das kyis de skad ces bka' stsal nas dge slong de de dag yi rang ste bcom ldan 'das kyis gsungs pa la mngon par bstod do/ /'phags pa nad thams cad rab tu zhi bar byed pa'i gzungs rdzogs so// // |