rgya gar skad du/ AR+Ya sarba a b+ha ya pra dA na nA ma d+ha ra Ni/ bod skad du/ 'phags pa thams cad la mi 'jigs pa spyin pa zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa 423b dus gcig na/ bcom ldan 'das yul ma ga d+ha nas yul rgyu zhing a mra'i tshal du gshegs te byon nas a mra'i tshal lus 'phags ri'i dbang po'i brag phug na bzhugs so/ /de nas lha'i dbang po brgya byin bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go /phyogs gcig tu 'dug nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das/ lha ma yin rnams ni/ rab tu gnod par bgyid pa ste/ bcom ldan 'das/ lha ma yin rnams ni/ bdag la yun ring por phyir rgol ba'i dgra lags na/ de las bcom ldan 'das kyis bdag la chos bstan du gsol/ de skad ces gsol pa dang / bcom ldan 'das kyis lha'i dbang po brgya byin la 'di skad ces bka' stsal to/ /lha'i dbang po/ khyod kyis thams cad la mi 'jigs pa sbyin pa'i rig sngags don thams cad byed pa/ 'jigs pa thams cad rab tu zhi bar byed pa/ nad thams cad rab tu zhi bar byed pa| dug thams cad 'jil ba/ mtshon thams cad rengs par byed pa/ rkang med dang / rkang gnyis dang / rkang bzhi pa thams cad rengs par byed pa/ dgra thams cad 424a @#/ /phung par byed pa/ lha dang / nam mkha' lding dang / sbyin byed ma'i bu dang / sha za dang / brjed byed dang / smyo byed dang / bram ze'i srin po dang / 'byung po dang / ro langs dang / bya'i gdon dang / srul po dang / nam gru dang / gnon po'i gdan dang / gnon po dang / brjed byed kyi gdon dang / lha'i gdon dang / klu'i gdon dang / gnod sbyin gyi gdon dang / dri za'i gdon dang / mi 'am ci'i gdon dang / log 'dren gyi gdon dang / ma mo'i gdon phung bar byed pa/ mdangs 'phrog pa dang / zas su phreng ba za ba dang / zas su spos za ba dang / zas su me tog za ba dang / zas su bdug pa za ba dang / zas su khrag 'thung ba dang / zas su rnag 'thung ba dang / zas su mi gtsang ba za ba rnams dang / zas su gcin 'thung ba rab tu phung bar byed pa/ rims nad thams cad dang / rlung las gyur pa dang / mkhris pa las gyur pa dang / bad kan las gyur pa dang / 'dus pa las gyur pa dang / 'gro ba drag shul spyod pa rab tu 'jigs par byed pa/ 'thab pa dang / rtsod pa dang / 'gyed pa dang / mtshang 'dru ba thams cad rab tu zhi bar byed pa 'di zungs shig dang / thams cad la mi 'jigs pa sbyin pa'i rig sngags bshad par bya'o/ /tad+ya thA/ a De ma De pra ma 424b De| pra me di ri/ go la me/ po le po le/ moT+Te mo ta/ baT+Te/ ba raT+Te/ kha ra Ne/ ga Na ga Ne/ ga Na pra ga Ne/ mo Ne/ pra ti mo Ne/ kA li pra kA li tsaN+Da/ ma hA tsaN+De/ pra ti tsaN+De/ be ge a ti be ge /so na/ go na/ mo hA/ pra mo hA/ bra ma Ta/ nA sha ni/ pra nA da sha ni/ d+ha ba ni/ pra d+ha ba ni/ ba la ga ni/ pra ba la ga ni/ nr-i t+ye ni/ pra ni t+ya ni/ kro d+ha ni/ pra ti kro d+ha ni/ ha na ha na/ bi ha na bi ha na/ sarba du Sh+Ta pra duSh+TaM nA sha ya/ sarba a b+ha ya pra de/ bdag 'khro dang bcas pa 'jigs pa thams cad dang / gnod pa thams cad dang / nad 'go ba thams cad las srungs shig/ srungs shig /gnas 'dir bdag gi don thams cad 'grub par gyur cig/ de lta bas na/ khi di khi di/ tsum b+he/ sarba sid+d+hi hi de ra te/ na maH sarba bud+d+ha nAn swAhA/ lha'i dbang po/ thams cad la mi 'jigs pa sbyin pa'i rig sngags tshig bzhi bcu rtsa gcig po 'di skud pa la mdud de bcings sam/ skra la mdud pa por ra ma| bzlas brjod byas sam/ yungs kar ram/ gi wang la lan gcig bsngags te bskus sam/ go cha la bsngags na/ mtshon gyis mi tshugs/ dug gis ma yin/ rims nad kyis ma yin/ nyin gcig pas ma yin/ nyin gnyis pas ma yin/ nyin gsum pas ma yin/ nyin bzhi pas ma yin/ mes ma yin/ gsang sngags kyis ma yin/ 425a @#/ /ro langs kyis ma yin/ dug gis ma yin/ nad kyis ma yin te/ chus 'chi ba'i dus byed par mi 'gyur ro/ /rig sngags dang / gsang sngags sbyor ba sgrub pa thams cad sbyor ba rnams kyis ma grub pa rnams grub par byed do/ /sbyar te grub pa rnams gzhan gyis mi tshugs par byed do/ /pha rol gyis bcings pa las grol bar byed do/ /gzhan gyis rig sngags gcod par byed do/ /bdag gi rig sngags 'phel bar byed do/ /gdon thams cad phung bar byed do/ /gdon gang gis mi gtong na yang / de'i mgo ardza ka'i dog pa bzhin du tshal pa bdun du 'gas so/ /de nas lha'i dbang po brgya byin de nyid du mi snang bar gyur to/ /bcom ldan 'das kyis de skad ces bka' stsal nas lha'i dbang po brgya byin yi rang ste bcom ldan 'das kyis gsungs pa la mngon par bstod do/ /'phags pa thams cad la mi 'jigs pa sbyin pa zhes bya ba'i gzungs rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lo ts+tsha ba ban+d+he ye shes sdes bsgyur cing zhus te/ skad gsar bcad kyis kyang bcos nas gtan la phab pa/ |