rgya gar skad du/ AR+Ya sarba 433a @#/ /an+ta ra saM gra sa d+hA ra Ni man+t+ra/ bod skad du/ 'phags pa bar du gcod pa thams cad sel ba'i gzungs sngags/ sangs rgyas dang / byang chub sems dpa' thams cad la phyag 'tshal lo/ /bcom ldan 'das kyis byang chub sems dpa' sems dpa' chen po phyag na rdo rje la bka' stsal pa/ phyag na rdo rje/ gzungs sngags 'di su 'dzin pa dang / 'chang ba dang / bzlas brjod byed pa de la ni/ dug dang / mtshon gyis 'chi ba dang / ltogs pa dang / mtshon brgyab pa dang / gcan gzan ma rungs pas za ba dang / mes tshig pa dang / chur 'chi ba dang / 'go ba'i rims gzhan yang ba dang / mdze'i nad dang / gsor mi rung ba'i nad yang ba dang / g.yang la lhung ba dang gzhan gyi byad dang / zas kyis brnangs pa dang / bdag rang gis gsod pa dang / de ltar gshis ngan du 'chi ba bcu gsum gyis rkyen byed par mi 'gyur ro/ /phyag na rdo rje/ gzungs sngags 'di su 'dzin pa dang / 'chang ba dang / bzlas brjod byed pa de la ni/ sa dang nam mkha' la gnas pa'i bgegs dregs pa can ma rungs pa rnams kyis kyang glags rnyed par mi 'gyur ro/ /phyag na rdo rje/ gzungs sngags 'di su 'dzin pa dang / 'chang ba dang / bzlas brjod byed pa de la las kyi sgrib pa dang / 433b nyon mongs pa'i sgrib pa dang / shes bya'i sgrib pa thams cad byang shing dag ste/ bde ba can gyi 'jig rten du skye bar 'gyur ro/ /oM badz+ra tsaN+Da ma hA ro Sha Na hUM phaT/ a pra ti ha ta ba la hUM phaT/ sarba big+h+naM an+ta ra ya bi nA sha ka ra mA ra ya hUM phaT/ ces brgya rtsa brjod na 'grub bo/ /nges par 'grub bo/ /zhes gsungs so/ /'phags pa bar du gcod pa thams cad sel ba'i gzungs rdzogs so// // |