rgya gar skad du/ AR+Ya badz+ra pA Ni aSh+Tot+ta ra sha ka nA ma d+hA ra NI man+t+ra sa hi ta/ bod skad du/ 'phags pa lag na rdo rje'i mtshan brgya rtsa brgyad pa gzungs sngags dang bcas pa/ byang chub sems dpa' sems dpa' chen po lag na rdo rje la phyag 'tshal lo/ /de nas byang chub sems dpa' lag na rdo rjes rang gi snying po smras pa/ oM badz+ra tsaN+Da sarba duSh+TaM ta ka/ ha na da ha pa tsa hUM phaT/ de nas gzungs 'di bshad ma thag tu sa chen po g.yos par gyur te/ bgegs dang / log 'dren thams cad kyang skrag nas nyam thag pa'i skad phyung ngo / /dkyil 'khor chen por 'dus pa thams cad kyang ha ha zhes 'dzer to/ /lha la sogs pa rig sngags 'chang chen po rnams kyis kyang rgyan gyi char chen po phab bo/ /bcom ldan 'das kyis kyang zhal 'dzum bzhin du rdo rje 'chang la gzigs nas bka' stsal 80a @#/ /pa/ sdang ba sel ba dang / 'khor 'di dag ha cang skrag par ma byed cig /rdo rje 'chang gis gsol ba/ /bcom ldan 'das/ /bdag gi gzungs 'di ni/ / mchog tu gsang ba lags so/ /rig sngags thams cad kyi mchog dang / bgegs thams cad zlog pa dang / sdang ba thams cad zlog pa dang / sdang ba thams cad sel ba dang / dam pa stsol ba dang / 'byor pa stsol ba dang / sdang ba rnams dga' bar bgyid pa dang / thos na don mchis pa dang / brjod na don mchis pa dang / bsnyen bkur bgyis na don mchis pa dang / stobs bskyed pa dang / /gzugs bzang bar bgyid pa dang / spobs pa bskyed pa dang / dbang phyug thob par bgyid pa dang / nor dang ldan par bgyid pa dang / dbang bgyi pa dang / sdang ba 'joms pa dang / snang ba 'jig par bgyid pa dang / dug sel ba dang / rgyal bar bgyid pa dang / dga' bar bgyid pa dang / mchog tu dga' bar bgyid pa dang / dang bar bgyid pa dang / nga rgyal 'joms pa dang / pha rol pham par bgyid pa dang / sdig pa zhi bar bgyid pa dang / nongs par bgyid pa spyod pa dang / 'dod chags la sogs pa'i nyon mongs pa zhi bar bgyid pa dang / mtshams ma mchis pa zlog pa dang / rmi lam ngan pa zhi bar bgyid 80b pa dang / bkra mi shis pa zhi bar bgyid pa dang / dpal bskyed pa dang / skal ba bzang por bgyid pa dang / sems can thams cad dga' bar bgyid pa dang / gzhan la dbang bgyid pa dang / ci 'tshal ba stsol ba dang / yon tan thams cad phun sum tshogs par bgyid pa dang / char ches pa dang / char mi 'bab pa dang / dus kyi gnod pa rab tu zhi bar bgyid pa lags te/ g.yul chen po dang / mi nad chen po dang / rtsod pa chen po dang / mi ma lags pa la sogs pa'i 'jigs pa dang / sdang ba dang / byad stems dang / ro langs kyi sbyor ba chen po dang / skrod pa dang / srog 'jig pa'i tshe dang / 'jigs pa chen po byung ba na nang par langs nas lus khrus bgyis la/ gos dkar po 'tshal kha shar phyogs su bltas la bcom ldan 'das rdo rje 'chang gi gdong du blta zhing lan bdun brjod na/ /brjod pa tsam gyis 'jigs pa thams cad las thar bar 'gyur zhing / grub pa chen po yang thob par 'gyur la/ thams cad du yang rgyal bar 'gyur te/ sems can rnams la srung ba dang / skyob pa dang / sped pa ni/ /gzungs chen mo 'di las lhag pa ma mchis so/ /de nas 'khor thams cad ngo mtshar rmad du gyur nas rdo rje 'chad la mtshan 81a @#/ /brgya rtsa brgyad kyis mngon par bstod pa/ rdo rje sems dpa' sems dpa' che/ /rdo rje rgyal po bde ba che/ /rdo rje 'jigs pa dgyes pa che/ /rdo rje snying po stobs po che/ /rdo rje 'khrug pa zhags pa che/ /snying rje chen po stobs po che/ /rdo rje 'jigs byed 'jigs par mdzad/ /rdo rje hUM gi hUM lags te/ /rdo rje sa 'og 'jigs pa po/ /chags pa'i rdo rje chags pa che/ /chags pa'i zhags pa mgyogs pa che/ /phyag dmar phyag ni ring ba ste/ /spyan dmar spyan dang ldan pa lags/ / rdo rje mthon ka mthon ka che/ /mthon mthing dbu skras brgyan pa lags/ /ral gri sngon po ral gri che/ /dkyil 'khor sngon po'i dkyil 'khor can/ /mthon ka'i spyan te dbu sngo ba/ /'od chen mthon ka'i 'od dang ldan/ /rdo rje sngon po stobs mi mtshungs/ /rdo rje spro ba'i stobs che ba/ /khro bo'i rdo rje khro bo che/ /sel mdzad khro bo'i rgyags pa sel/ /khros pa'i spyan ni rab tu gtod/ /khro bo bgegs rigs sel bar mdzad/ /gzhu bsnams zhags pa bsnams pa ste/ /rdo rje'i mdas ni nges par 'gums/ /dbyug thogs rdo rje'i ral gri bsnams/ /rdo rje'i zhags pas rab tu 'joms/ /rdo rje'i 'khor lo 'khor lo che/ /'jigs pa'i sgra sgrog rab tu 81b tu khro| |sna tshogs sku ste thig les bris/ /gzi brjid skyed pa grags mdzad pa/ /bzod par dka' ba reg mi bzod/ /sdig dang bgegs rnams gcod mdzad pa/ /drag po chen po rdo rje khro/ /sgyel byed drag po sgyel bar mdzad/ /gting dpag dka' ba ring du gshegs/ /rin chen rgya mtsho rab tu dga'/ /rgya mtsho lhun po'i dpung dang ldan/ /dam pa'i ti se lhun po'i rtse/ /gad rgyangs chen pos bzhad pa po/ /spyod yul bskal pa grangs med gsum/ /rig sngags 'chang mchog rdo rje can/ /rig sngags 'chang chen mnga' bdag lags/ /na bza' lcang lo rtsa dmar gsol/ /mthon ka na bza' mthon la dgyes/ /srin po srung po drag po ste/ /me tog phreng ba'i rgyan la dgyes/ / nyi ma chen po nyi ma'i 'od/ /'od zer brgya phrag rab tu 'gyed/ /grol mdzad mgon po ston pa po/ /rab mchog rab mchog rnams kyis mchod/ /mgrin chen mgrin pa'i mdog sngo ba/ /mgur bzang zhal bzang dam pa lags/ /cod pan chen po rdo rje'i 'od/ /phun sum tshogs ldan sems dag pa/ /ye shes che ldan srung ba che/ / rlung dmar lags te spyod yul ring / /gtso bo sgrol mdzad pha rol gshegs/ /'jigs las sgrol ba rab 'jigs pa/ /rgya chen gtsug na nor bu thogs/ /mtshon 82a @#/ /cha chen po sna tshogs mtshon/ /'jig rten gsum gyi tshul chen gcig /gsum gzigs rtse gsum gtsug phud gsum/ /'dod pa'i lha ste snang chen mtshan/ /za ba po ste 'jigs par mdzad/ /mtho ba sku mchog zhal gsum pa/ /tsham tshom med de srin las byung / /rtag par dkar dgyes dus 'byor ba/ /rgyu skar rgyal rigs 'phel bar mdzad/ /rgyal po sngags 'chang chen po ste/ /bgegs kun dbang phyug mkhas pa lags/ /baiDUR+Ya ltar dri med sku/ /mdzes shing stobs skyed sna tshogs stobs/ /dga' ba skyed pa dga' bar mdzad/ /dkon mchog gsum po 'dzin pa'i mchog /lha chen dpa' bo chen po ste/ /brtan po dpa' bo lham me ba/ /bde ba chen po 'ching ba gcod/ /dam du 'ching ba'i rtsal mnga' ba/ /mtshon cha che rdzogs cod pan can/ / rig sngags 'chang gi tshogs dga' ba/ /pad+ma chen po phyag ring ba/ /pad+ma las byung pad+ma'i mdog /nag po chen po 'byung po che/ /gtum chen thog thog chen po ste| |rlung chen bzhad mo 'byung ba dang / /rdo rje mtshon cha brgya rdzogs pa/ /rtul phod thub dka' brtson pa ste/ /'byung po chen po tshogs kyi rje/ /zhi ba dbang po rdo rje'i 82b mtshon| |brag gi rtse mo rnam par 'gems/ /rgyal ba'i sras po gzugs che ba/ /rdo rje yi ni dkyil 'khor rgyan/ /rdo rje lcags mdas sreg mdzad pa/ /rdo rje mdas ni rnam par sbyong / /rdo rje don yod rdo rje'i dbang / /rdo rje bzang po rdo rje'i rtsal/ /ye shes dam pa theg pa che/ /thabs brnyes pa snying rje chen po lags/ /rdo rje chen po rtsed mo can/ / spyan bzang rnam par gzigs pa po/ /rdo rje dril bu rnam dag sbyan/ /mdza' bo sdug pa dam tshig mkhyen/ /rdo rje chen po mgon po ba/ /rdo rje sa 'og 'jigs par mdzad/ rdo rje chen po gad rgyangs sgrog /me tog chun po 'od gsal ba/ /dag pa zas gtsang sras kyi sras/ /des pa skal bzang gtsang ba lags/ /sna tshogs can te lha kun mchog /rdo rje'i dpung gi dkyil 'khor ldan/ /rdo rje gtsug sdug shes rab can/ /rdo rje bkod pa rab tu mdzes/ /mdzes pa shin tu rnam par dag /bskal pa'i rlung chen lta bu lags/ /dpa' bo gsang ba chen po 'chang / /rig sngags 'chang gi mchog gis rjed/ /gsang ba po ste gsang ba gsung / /skyes pa bud med tshogs dga' ba/ /rdo rje thog thog sgra chen sgrog /rdo rje'i sgra de rnam par 'joms/ /rdo rje'i lcags kyu dgyes pa che/ /rdo rje 'bar ba cher 'bar ba/ /nor bu spras pa'i na 83a @#/ /bza' gsol/ /spos dang me tog phreng gis brgyan/ /dbu yi snyan cha gdub kor btags/ /sangs rgyas bstan pa ston pa po/ /rgyal po sangs rgyas kun dang mnyam/ /dbang phyug chen po grags pa che/ /dkyil 'khor slob dpon dkyil 'khor can/ /sangs rgyas dkyil 'khor ston pa po/ /dbu rgyan cod pan kun nas bcings/ /sna tshogs rgyan gyis brgyan pa lags/ /de ltar rdo rje dbang phyug mgon/ /mtshan brgya rtsa brgyad dag gis bstod/ /de nas rdo rje don yod pas gsungs pa/ rdo rje gsang bas brgyan pa yi/ /rdo rje mtshan brgya rtsa brgyad 'di/ /ming ni rdo rje don yod 'byung / /sdang ba thams cad zlog byed pa/ /ming ni brgya rtsa brgyad pa 'di/ /dad pas gang zhig 'chang byed pa/ /grub pa thams cad thob 'gyur zhing / /nyes pa kun las rnam par grol/ /lag na rdo rje stobs po che| |rtag tu phyi bzhin 'brang bar 'gyur/ /lag na rdo rje'i yon tan che/ /gang zhig nang par langs nas brjod/ /de ni sdig pa kun las grol/ /ngan 'gro kun las thar par 'gyur/ /gsang sngags thog mar smos pa 'di/ /su zhig nangs par langs nas brjod/ /rgyal po blon po grong khyer pa/ /gnyen rnams kyang ni dga' 83b par 'gyur/ /bstod pa'i mchog 'di su 'don pa/ /'jig rten thams cad de dbang 'gyur/ /sdig pa thams cad zad pa dang / /tshe dang bsod nams 'phel bar 'gyur/ /ji ltar 'dod pa dam pa bzhin/ /bde ba de yis thob par 'gyur/ /gang zhig nang par langs nas ni/ /lag na rdo rje'i drung du brjod/ /de ni ji ltar 'dod pa dang / /ldan 'gyur 'di la the tshom med| |ming brgya rtsa brgyad 'don pa la/ /bgegs dang log 'dren thams cad dang / /'jigs byed rgyal po rnams kyis kyang / /zil gyis gnon par mi nus so/ /shes rab can ni gang zhig gis/ /ming brgya rtsa brgyad mchog bton na/ /gzugs bzang stobs ni skye ba dang / /bde ba 'phel ba de yis 'thob/ /gang zhig ming brgya rtsa brgyad 'di/ /nges par gnas shing gtsang mar 'don/ /mdor na yon tan rgyas pa yi/ /bde ba de yis thob par 'gyur/ /'phags pa lag na rdo rje'i mtshan brgya rtsa brgyad pa gzungs sngags dang bcas pa rdzogs so// // |