rgya gar skad du/ AR+Ya many+dzu shrI shri nA ma aSh+Ta sha ta kaM /bod skad du/ 'phags pa 'jam dpal gyi mtshan brgya rtsa brgyad pa/ 'jam dpal gzhon nur gyur pa la phyag 96a @#/ /'tshal lo/ /shin tu dang ba'i sems kyis su/ /thub la mgo bos phyag 'tshal te/ /sangs rgyas rnams kyis bsngags pa yi/ /mtshan rnams 'dir ni brjod par bgyi/ /gzugs mdzes gzugs dang ldan pa ste/ /gzugs rnams kun gyi bla na med/ /mtshan rnams thams cad kun tu rdzogs/ /'jam dpal dpal gyi dam pa lags/ /bsam gyis mi khyab bsam dang bral/ /mthu rtsal bsam yas rmad du byung / /sku gsung 'phrin las bsam mi khyab/ /de bzhin thugs kyang bsam mi khyab| |stong nyid sgom pa'i bdag nyid can/ /stong pa'i chos dang yang dag ldan/ /stong pa nyid la lhag par mos/ /srid pa gsum po stong par ston/ /thams cad mkhyen cing thams cad gzigs/ /sa rnams kun gyi mchog tu gyur/ /sems can kun gyi mchog tu gyur/ /sems can kun gyis phyag bgyis pa/ /ngan 'gro kun dang de bzhin du/ /mu stegs can rnams thams cad 'joms/ /phas kyi rgol ba tshar gcod pa/ /smra ba'i seng+ge mi yi mchog /dul zhing nyon mongs dgra rnams dang / /sgrib pa dri ma kun mi mnga'/ /sems can thams cad yongs su skyob/ /grol zhing 'jig rten grol mdzad pa/ /ral pa mun dza brtul zhugs 96b can| |tshangs pa tshangs pa'i gnas na bzhugs/ /bgrang nor thogs shing phyag mkhar bsnams/ /dag cing dag pa rnams dang ldan/ /'jam pa'i dbyangs can mnga' bdag mdzad/ /pad+ma las 'khrungs pad+ma can/ /pad+ma'i ze ba'i kha dog 'dra/ /bzhugs pa'i gdan khri pad+ma lags/ /gtsang ma ut+pal sngon po bsnams/ /bsam dag zhi ba'i thugs dang ldan/ /khyod ni sangs rgyas rang sangs rgyas/ /khyod ni dang po'i sangs rgyas lags/ /rdzu 'phrul ldan zhing mnga' dbang brnyes/ /bden pa bzhi dag ston pa po/ /'jig rten skyong ba spyan stong mnga'/ /khyod ni dbang phyug skye rgu'i bdag /khyod ni zhi ba'i sems can rnams/ /kun gyi mnga' bdag yon tan gtso/ /khyod ni khyu mchog skye rgu'i gtso/ /thu bo de bzhin tshe rabs dgongs/ /rnam par 'dren dang 'dul mdzad pa/ /rgyal sras rgyal ba nyid las 'khrungs/ /'od zer stong ldan nyi ma khyod/ /zla ba dang ni phur bu'ang khyod/ /rnam thos bu dang chu lha'ang lags/ /dbang phyug che khyod khyab 'jug khyod/ /klu yi rgyal po mtha' yas khyod/ /de bzhin sde dpon skem byed lags/ /lha min dbang po thags bzang ris/ /mig dmar gza' lag pa sangs/ /spen pa dpa' bo lha kun lags/ /lha rnams kun gyis phyag 97a @#/ /bgyis pa/ /'jig rten chos kyi dri ma bral/ /khyod ni 'jig rten gang zag mchog /'jig rten mkhyen pa 'jig rten rig /ye shes can gyi dam mchog pa/ /dam pa sbyin dang gnas dang skyabs/ /bdud kyi las kyis yongs mi brdzi/ /kha na ma tho mi mnga' zab/ /dge ba'i bshes gnyen kun tu grags/ /khyod ni sman pa zug rngu 'byin/ /mi 'dul kha lo sgyur ba'i mchog /blo gros ldan zhing rtogs dang ldan/ /blo dang ldan zhing mkhas pa lags/ / khyod ni bsod nams dpag bsam shing / /byang chub yan lag me tog brgyan/ /rnam grol 'bras bu phun sum tshogs/ /lus can kun gyi mchog tu gyur| |yid du 'ong zhing yid 'phrog pa/ /sdig pa mi mnga' tshangs par spyod/ /khyod ni mjug ring gza' mchog lags/ /khyod ni drang srong thub pa mchog / khyod ni rgyal tshab dbang bskur ba/ /sa bcu'i dbang phyug gtso bo lags/ /ded dpon 'gro ba rnams kyi gtso/ /mya ngan 'das pa mchog ston bzhin/ /khyod ni nam mkha' sa chu bzhin/ /khyod ni me dang rlung lta bu/ /khyod ni yid bzhin nor bu ltar/ /sems can re ba kun rdzogs mdzad/ /'byung po kun gyis phyag bgyis 97b pa| |rin chen khyod la phyag 'tshal lo/ /'jam dpal gyis ni bka' stsal pa/ /oM wA kye daM na ma swA hA/ ji skad smos pa'i mtshan rnams dang / /rig sngags bcas par 'dzin na ni/ /sdig gyur rnam dag rab tu thob/ /brgya las rtsa brgyad lhag pa'i mtshan/ /skyes bu dus gsum su klog pa/ /de 'dod bsam rgu yid bzhin du| |gdon mi za bar 'grub par 'gyur/ /bzang po'i mtshan rnams dran na ni/ /mtshams med skal pa mnyam pa yi/ /las rnams mi bzad gang byas pa| |de dag thams cad myur du 'byang / /'jig rten pha rol 'pho ba dang / 'jigs pa chen po 'byung ba'i tshe/ /sems can dag pas dran byas na/ /'jam pa'i dbyangs kyang thob par 'gyur/ /blo dang ldan pas dran byas te/ /nges par gnas nas su klog pa/ /sangs rgyas nyid ni 'dod na yang / /thob 'gyur 'di la the tshom med// //'phags pa 'jam dpal gyi mtshan brgya rtsa brgyud pa rdzogs so// // |