rgya gar skad du/ shrI de wi kA li nA ma aSh+Ta sha ta ka /bod skad du/ dpal lha mo nag mo'i mtshan brgya rtsa brgyad pa/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das bya rgod kyi phung po'i ri la bzhugs te/ rgyu dang 'bras bu'i byang chub sems dpa' thams cad la bden pa'i mtshan rnams ston par mdzad do/ /de'i tshe dpal lha mo nag mo chen po yang bcom ldan 'das kyi thad du song ste lan gsum bskor ba byas nas bcom ldan 'das kyi spyan sngar phyogs gcig tu 'dug go /de nas byang chub sems dpa' seng+ge brtson 'grus kyis bcom ldan 'das la 'di skad ces gsol to/ /bcom ldan 'das/ byang chub sems dpa' srin mo'i cha lugs kyis 'jig rten pa'i don mdzad pa'i mtshan gyi rnam grangs 205b ji lta bu lags zhes gsol pa dang / bcom ldan 'das kyis byang chub sems dpa' seng+ge brtson 'grus la dgongs nas dpal lha me nag mo la gzigs te 'di skad ces gsungs so/ /thos bsam sgom la cher gnas pa'i/ /rgyu 'bras rkyen gyis bdag nyid can/ /'gro la phan mdzad mkhas pa'i mchog /dpal ldan lha mo nag mo 'phags/ /byang chub sems dpa' sprul pa ste/ /sa ltar rten pa'i gzhir gyur pa/ /yon tan sdud byed chu dang 'dra/ /byang chub smin byed me lta bu/ /dge ba'i 'du byed rlung ltar g.yo/ /shes rab rnam dag nam mkha' ste/ /khyod ni 'byung ba chen po 'dra/ /'byung po phal chen rnams kyis bstod/ /bsod nams ye shes rab bsags pa'i| |las dang rnam smin dag la mkhas/ /nga rgyal gzugs kyis 'dul pa goms/ /shes rab snying rje'i lam du 'gro/ /khyod ni bum pa bzang lta bu/ /dper na yid bzhin nor bu'i chu/ /kun la phan pa'i dpag bsam shing / /nyi ma 'dra bar khyod la gsal/ /zla ltar gsal ba'i thugs mnga' zhing / /ming ni ri bong rwa dang 'dra/ /rang gi rgyud ni 'khor lo 'dra/ /u dum ba ltar khyod dkon yang / /bdud rtsi lta bur yongs tshim mdzad/ /'gro ba kun gyi bdag mo lags/ /rang bzhin med pa'i chos kyang 206a @#/ /ston| |chu dang nam mkha'i tshub ma ltar/ /gdul bya'i srid gsum cis kyang 'dul/ /dus gsum rgyal ba'i bstan pa skyong / /dam pa rnams dang yang dag gcig /dam pa rnams kyi lam du 'gro/ /lha mo ma mo gnod sbyin mo/ /srin mo klu mo sha za mo/ /bdud mo 'byung mo grul bum mo/ /khrag mo rngam tshul glog 'gyu ma| |rlung mo nag mo 'jigs byed ma/ /mkha' 'gro gtum mo zhing sgrol ma/ /zhi rgyas dbang dang drag po'i 'dul/ /dkar ser ljang nag dmar yang ston/ / rnam pa brgyad kyis dbyibs kyang 'byung / /'gro ba drug po'i tshul yang ston/ /phung po lnga yang brjod par nus/ /dbang po tshim byed yul lnga'ang ston/ /rten cing 'brel pa'i spyod pa mkhas/ /yul can rnams ni gsod la mkhas/ /de bzhin dag rnams gsod pa dang / /lus can rnams ni gsod la brtson/ /sems ni gsod pa med la mkhas/ /'khor ba las ni ring du song / /de bzhin du gshegs pas lung bstan te/ /byang chub sems dpa'i mtshan rnams dang / /'jig rten skyong mdzad dpal ldan ma/ /dam chos 'dzin pa rnams la byams/ /oM AH hUM shrI de wi kA la sa ma ya dzaH DA ki ni DA ya sa ma swA ha/ ming brgya rtsa brgyad gang 206b 'dzin pa/ /yon tan brgya rtsa brgyad kyang thob/ /dmyal ba'i sdug bsngal myong mi 'gyur/ /yi dwags gnas su mi skye zhing / /byol song skye bas thogs mi 'gyur/ /lus 'phags gnas su skyes pa na/ /thog la sogs pa mi 'bab cing / sgra mi snyan du rlung gis min/ /de bzhin ba lang spyod du yang / /chu dang rlabs kyis khyer mi nus/ /'dzam bu'i gling du gang skyes pa/ /sna tshogs gnod pas nyen mi 'gyur/ /'dod pa'i lha rnams gnas su yang / /skyes nas chos la dga' bar 'gyur/ /bsam gtan bzhi yi skye gnas su/ /tshad med bzhi ni 'phel bar 'gyur/ /gzugs med gnas ni bzhi por yang / /don med na ni mi skye ste/ /'du shes med par nam yang min| |'phags pa bzhugs pa'i gnas rnams su/ /khams gsum tshul gyis bdag don spyod/ /rtag tu yul la chags mi 'gyur/ /sems la 'dzin par mi byed de| |nyon mongs rtsa ba drug po dang / /de bzhin nye ba nyi shu dang / /mtshams med lnga yang byang bar 'gyur/ /bskal pa grangs med mang por yang / /mi khom brgyad du skye mi 'gyur/ /mu stegs rtsod pa zlog pa dang / /mthu stobs phun sum tshogs ldan zhing / /tshe ring nad med dpal dang ldan/ /sdug bsngal bskal pa mang por yang / / 207a @#/ /nam yang 'khor bar mi ltung zhing / /mya ngan 'das pa thob bya'i phyir/ /nyan thos sa rnams non pa dang / /rten 'brel bcu gnyis shes par bya| |byang chub sems dpa'i sa rnams ni/ /rab dga' dri med 'od byed 'phro/ /sbyang dka' mngon gyur ring du song / /mi g.yo legs pa chos kyi sprin/ /sangs rgyas sa chen bla na med/ /bcu gnyis po yang thob 'gyur te/ /kun tu 'od dang bdud rtsi 'od/ /nam mkha'i 'od dang rdo rje'i 'od/ /rin chen 'od dang pad+ma'i 'od/ /las kyi 'od dang dpe med sa/ /dpal ldan sa dang shes rab 'od/ /thams cad mkhyen dang rang rig ste/ /bcu gnyis sangs rgyas sa rnams kyang / /'di tshe byung na myur du thob/ /sa rnams ma thob par du yang / /'gro ba rnams la phan pa dang / /shes rab snying rje ldan gyur cing / /chos la dga' ba rnams kyis srung / /dngos grub thob ste de bzhin gshegs/ /rin chen las byung thob par 'gyur/ /dpal ldan byang chub sems dpa' dang / /dpal ldan lha mo nag mo yi/ /ming brgya rtsa brgyad gang 'dzin pa/ /yon tan brgya rtsa brgyad thob ste/ /sku gsung thugs ni grub nas kyang / /khams gsum chos kyi rgyal por 'gyur/ /zhes gsungs pa dang / byang chub 207b sems dpa'i 'khor de dag dang / dpal lha mo nag mo chen mo rnams ngo mtshar du gyur te bcom ldan 'das kyis gsungs pa la rjes su yi rang zhing mngon par bstod do/ / dpal lha mo nag mo chen mo'i mtshan brgya rtsa brgyad pa yon tan dang bcas pa rdzogs so// // |