@#/ /yi dwags kha nas me 'bar ba la skyabs mdzad pa'i gzungs/ de'i tshe bcom ldan 'das yul ser skya na dge 'dun kyi gnas na dge slong gi dge 'dun dang / byang chub sems dpa' grangs med pas yongs su bskor ba la chos ston te/ de'i tshe na tshe dang ldan pa dga' bo bas mtha' zhig na chos yid la byed cing dran pa mngon du bzhag nas 'dug pa las/ de'i nub mo nam gyi cha smad la yi dwags kha nas me 'bar ba zhes bya ba/ gzugs byad mi sdug pa/ shin tu rid cing skem pa/ kha nas me 'bar ba/ mgrin pa mo khab tsam du phra ba/ skra 'dzings pa/ sen mo dang mche ba ring la rno ba shin tu 'jigs su rung ba zhig dga' bo'i drung du 'ongs nas dga' bo la 'di skad ces smras so/ /khyod da ste zhag bdun na tshe'i dus byas te yi dwags kyi khams su skye bar 'gyur ro/ /zhes smras so/ /dga' bos des smras pa thos nas shin tu 'jigs skrag ste yi dwags de la 'di skad ces smras so/ /bdag tshe'i dus byas nas yi dwags kyi khams su skye bar 'gyur ba 'di thabs ci byas na/ sdug bsngal de las yongs su thar par 'gyur/ de nas yi dwags des 218b dga' bo la 'di skad ces smras so/ /gal te khyod kyis sang gi nyin mo la yi dwags gang+gA'i klung gi bye ma khrag khrig brgya stong snyed la gtor ma byin te/ bram ze dang / drang srong brgya stong snyed la yul dbus 'gyur tshal gyi bre tshang ma re re'i zhal zas mchog dam pa phul te/ kho bo'i phyir dkon mchog gsum la mchod pa byas na| tshe ring zhing yi dwags kyi sdug bsngal dang bral te mtho ris kyi lhar skye bar 'gyur ro/ /de'i tshe kun dga' bos yi dwags kha nas me 'bar ba lus mi sdug pa dang / shin tu rid cing skem pa dang / kha nas me 'bar ba dang / mgrin pa mo khab tsam la skra 'dzings pa dang / sen mo dang mche ba ring zhing rno ba yang mthong la/ yid du mi 'ong / mi 'dod pa'i tshig kyang thos nas lus skyi bung zhes byed pa tsam du 'jigs skrag nas 'dug pa las langs te myur bar bcom ldan 'das ga la ba der song ngo / /bcom ldan 'das kyi spyan sngar phyin nas lus smad lnga sa la gtugs te bcom ldan 'das kyi zhabs la spyi bos phyag 'tshal nas lus 'dar bzhin du sdug bsngal gyis gdungs pa'i dpung gnyen mdzad du gsol/ zhes bcom ldan 'das la 'di skad ces gsol to/ / 219a @#/ /bdag bas mtha' zhig na chos yid la bgyid cing mchos pa las/ yi dwags kha nas me 'bar ba zhes bgyi ba de bdag la 'di skad ces mchi'o/ /khyod da ste zhag bdun na nges par tshe'i dus byas te yi dwags kyi khams su skye bar 'gyur ro zhes mchi'o/ /bdag gis de la thabs ci bgyi na/ yi dwags kyi sdug bsngal de las yongs su thar par 'gyur zhes dris na/ des bdag la khyod kyis yi dwags gang+gA'i klung gi bye ma khrag khrig brgya stong snyed la gtor ma byin te/ bram ze dang / drang srong la sogs pa brgya stong snyed la zhal zas mchog dam pa phul na tshe ring bar 'gyur zhes mchi na / bcom ldan 'das/ bdag gis ji lta bur yi dwags dang / drang srong la sogs pa de snyed kyi kha zas 'byor bar 'gyur/ /de nas bcom ldan 'das kyis dga' bo la bka' stsal pa/ khyod 'jigs par ma byed cig /khyod kyis yi dwags gang+gA'i klung gi bye ma khrag khrig brgya stong snyed dang / bram ze dang drang stong la sogs pa la kha zas dang gtor ma mang po 'byor ba'i thabs nga la yod kyi/ /yid blong bar ma byed cig /de nas bcom ldan 'das kyis dga' bo la 219b bka' stsal pa/ nga la gzungs sngags gzi brjod tshad med pa'i dbang du gyur pa'i 'od zer rnam par rgyal ba'i shugs zhes bya ba yod de/ /gang zhig gis gzungs 'di brjod na/ yi dwags gang+gA'i klung gi bye ma khrag khrig brgya stong snyed dang / bram ze dang drang srong la sogs te mang po'i kha zas dang gtor ma mchog dmag 'gyur te/ de dag la sogs pa gcig kyang kha zas yul dbus 'gyur tshal gyi bre tshad mas bcal pa'i bre bdun snyed thob par 'gyur ro/ /dga' bo/ nga yang bram zer gyur pa na byang chub sems dpa' spyan ras gzigs dbang phyug dang / de bzhin gshegs pa dbang sgyur yon tan zhes bya ba las gzungs 'di thos bas na/ de'i dbang gis yi dwags tshad med pa snyed dang / drang srong mang po la kha zas dang / gtor ma byin par gyur te/ yi dwags kyi khams su skyes pa de dag kyang sdug bsngal las rnam par grol nas mtho ris kyi lhar skyes par gyur to/ /dga' bo/ /khyod kyis zungs shig /bsod nams dang tshe'i tshad kyang 'phel zhing skye bar 'gyur ro/ /de'i tshe bcom ldan 'das kyis dga' bo la gzungs sngags 'di bka' stsal to/ /na maH sarba ta thA ga ta a ba lo ki te/ saM b+ha ra saM b+ha ra hUM/ 220a @#/ /bcom ldan 'das kyis dga' bo la bka' stsal pa/ rigs kyi bu'am/ /rigs kyi bu mo gang la la zhig tshe ring bar 'dod dam/ bsod nams che zhing 'phel ba dang / sbyin pa'i pha rol tu phyin pa myur du yongs su rdzogs par bya bar 'dod na/ rtag tu snga dro'i dus sam/ /yang na dus thams cad du byas kyang bar chad du 'gyur ba med do/ /snod gtsang ma'i nang du chu gtsang ma blugs la chan nam/ /phye'am/ 'khur ba la sogs pa bcung zad cig btab ste lag pa g.yas pa snod kyi steng du bzhag ste gzungs 'di la lan bdun bsngags nas de bzhin gshegs pa bzhi'i mtshan nas brjod par bya'o// de bzhin gshegs pa rin chen mang la phyag 'tshal lo/ /de bzhin gshegs pa rin chen mang gi mtshan nas brjod pa'i byin gyi rlabs kyis yi dwags thams cad skye ba mang po'i ser sna byas pa mi dge ba'i las bcom zhing / bsod nams yongs su rdzogs par 'gyur ro/ /de bzhin gshegs pa gzugs dam pa la phyag 'tshal lo/ /de bzhin gshegs pa gzugs dam pa'i mtshan nas brjod pa'i byin gyi rlabs kyis yi dwags mang po byad gzugs mi sdug 220b pa bcom zhing gzugs dang mtshan phun sum tshogs par 'gyur ro/ /de bzhin gshegs pa sku 'byams klas la phyag 'tshal lo/ /de bzhin gshegs pa sku 'byams klas kyi mtshan nas brjod pa'i byin gyi rlabs kyis yi dwags mang po'i skom pa spangs shing tshim par 'gyur te/ sbyin pa'i gnas yid bzhin du za ba dang chog cing 'grangs par 'gyur ro/ /de bzhin gshegs pa 'jigs pa dang bral ba la phyag 'tshal lo/ /de bzhin gshegs pa 'jigs pa dang bral ba'i mtshan nas brjod pa'i byin gyi rlabs kyis yi dwags mang po 'jigs pa thams cad dang bral te yi dwags kyi khams zhi bar 'gyur ro/ /bcom ldan 'das kyis dga' bo la bka' stsal pa/ rigs kyi bu la sogs pas de bzhin gshegs pa'i mtshan nas brjod de byin gyis brlabs pa'i 'og tu se gol lan gsum byas te gtor ma'i snod blangs nas lag pa brkyang ste sa gtsang mar blug par bya'o/ /de ltar gtor ma byin par byas na/ phyogs bzhi nas lhags pa'i yi dwags gang+gA'i klung gi bye ma khrag khrig brgya stong snyed so so nas yul dbus 'gyur tshal gyi bre tshad mas bcal ba'i bre bdun bdun thob par 'gyur ro/ /kha zas de dag yid dwags kyi yid bzhin du za ba 221a @#/ /dang / chog 'grangs pa dang / yi dwags kyi khams spong ba dang / mtho ris kyi lhar skye bar 'gyur ro/ /dga' bo/ gal te dge slong pha'am/ dge slong ma'am/ dge bsnyen nam/ dge bsnyen ma gang zhig rtag tu gzungs 'dis kha zas la bsngags te yi dwags la sbyin pa byin na bsod nams tshad med pa snyed yongs su rdzogs par 'gyur zhing / de nas sangs rgyas bye ba khrag khrig brgya stong snyed la mchod pa byas pa'i bsod nams dang khyad par med de| tshe ring ba dang / bsod nams dang / mdangs dang / stobs skye zhing 'phel ba dang / dge ba'i rtsa ba yongs su rdzogs pa dang / mi ma yin pa dang / gnod sbyin dang / srin po dang / yi dwags ma rungs pa thams cad kyis gtse zhing gnod par byed mi nus pa dang / gzhan la gzi brjid tshad med pa dang ldan par 'gyur ro/ /gal te gang zhig bram ze dang / drang srong la sbyin pa byed 'dod na/ kha zas yongs su dag pa snod gcig gi nang du bkang ste gzungs sngags lan bdun bzlas te 'bab chu gtsang mar gtor na/ de ltar byas pas lha rdzas kyi zhal zas mchog dam par gyur te/ des na bram ze dang / drang srong de dag kyang 221b sngags kyis btab pa'i zas thob nas sngags kyi byin gyis so so nas sngon chad ci dang ci la dga' zhing mos ba'i dge ba'i rtsa ba'i bsod nams su yongs su 'gyur bas| so so nas mthun par dus gcig tu de la tshe ring ba dang / mdangs dang / stobs su ldan te bde zhing skyid par gyur cig ces smon lam 'debs so/ /gzhan yang mi de sems bsam pa bzhin du mthong ba dang / thos pa'i sgo nas yongs su dag cing / shes pa mi nor ba dag tshangs pa'i lha'i spyod pa mchog dang ldan zhing yongs su rdzogs par 'gyur/ gzhan yang sangs rgyas bcom ldan 'das gang+gA'i klung gi bye ma khrag khrig brgya stong snyed la mchod pa byas pa'i bsod nams dang 'dra ste/ phas kyi rgol ba thams cad kyis gnod pa mi nus par 'gyur ro/ /gal te dge slong pha'am/ dge slong ma'am/ dge bsnyen pha'am/ dge bsnyen ma gang zhig sangs rgyas dang / chos dang / dge 'dun la mchod pa byed par 'dod na/ spos dang / me tog dang / zhal zas dam pa la gzungs sngags 'di lan nyi shu rtsa gcig tu bzlas te dkon mchog gsum la dbul bar bya'o/ /de nas rigs kyi bu pho dang / rigs kyi bu mo des phul ba'i zhal zas de lha rdzas kyi 222a @#/ /zhal zas su gyur te phyogs bcu'i 'jig rten gyi khams na sangs rgyas dang / chos dang / dge 'dun la mchod pa byas par 'gyur ro| |de nas bstod pa dang / gsol ba gdab pa dang / rjes su yi rang ba'i bsod nams dang ldan par 'gyur te/ rtag tu sangs rgyas bcom ldan 'das kyis bsngags shing dgongs par 'gyur ro/ /lha mang pos rtag tu srung zhing skyob pa dang / sbyin pa'i pha rol tu phyin pa yang rdzogs par 'gyur ro/ /dga' bo/ khyod kyis 'di rjes su chos bzhin yid la byas te sems can thams cad kyis mthong zhing thos par bya ba'i phyir yongs su rgyas par ston cig dang / bsod nams tshad med pa thob par 'gyur ro/ /yi dwags kha nas me 'bar ma la skyabs mdzad pa'i gzungs rdzogs so// // |