rgya gar skad du/ AR+Ya ba lo ki shwa ra mA te nA ma d+hA ra NI/ bod skad du/ 'phags pa spyan ras gzigs dbang phyug gi yum zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das grong khyer yangs pa can na 'khor chen pos yongs su bskor cing mdun gyis bltas nas bzhugs te/ nyan thos chen po shA ri'i bu la sogs pa dge slong lnga brgya dang / byams pa la sogs pa byang chub sems dpa' sems dpa' 49a @#/ /chen po rab tu mang pos yongs su bskor cing mdun gyis bltas nas bcom ldan 'das gdan bshams pa la bzhugs so/ /'khor der byang chub sems dpa' sems dpa' chen po kun tu bzang po zhes bya ba 'dus te 'dug par gyur pa de rang gi stan las langs nas bla gos phrag pa gcig tu gzar nas pus mo g.yas pa'i lha nga sa la btsugs te bcom ldan 'das kyi zhabs la mgo bos phyag 'tshal nas bcom ldan 'das la 'di skad ces gsol to/ /bcom ldan 'das/ spyan ras gzigs dbang phyug gi ma zhes bgyi ba'i gzungs kyi rig sngags chen mo gsang sngags kyi gzhi 'di 'das pa dang / ma byon pa dang / da ltar byung ba'i sangs rgyas bcom ldan 'das rnams kyis gsungs shing / da ltar gsungs pa/ bcom ldan 'das byang chub sems dpar gyur te byang chub yongs su tshol ba na sems can thams cad rjes su gzung ba dang / don dang / byang chub sems dpa'i don gyi bar gyi phyir sngon gsungs pa/ byang chub sems dpa'i theg pa pa'i rigs kyi bu'am/ rigs kyi bu mo rnams kyi phar gyur pa/ mar gyur pa/ 49b skyabs ma mchis pa rnams kyi skyabs dang / dpung gnyen ma mchis pa rnams kyi dpung gnyen dang / mgon ma mchis pa rnams kyi mgon du gyur pa/ sdig pa thams cad zad par bgyid pa mchis te/ gzungs de thos ma thag tu bsam pa thams cad yongs su rdzogs par 'gyur/ rig sngags thams cad kyang 'grub par 'gyur ro/ /bcom ldan 'das kyis bka' stsal pa/ byang chub sems dpa' sems dpa' chen po/ nga sngon byang chub sems dpar gyur te byang chub yongs su tshol ba na 'jig rten gyi khams gang+gA'i klung gi bye ma snyed kyi pha rol gyi yang ches pha rol na 'jig rten gyi khams bde ba can zhes bya ba de na de bzhin gshegs pa dgra bcom pa yang dag par rdzogs pa'i sangs rgyas 'od dpag med ces bya ba da ltar yang bzhugs te 'tsho zhing gzhes la chos kyang ston to/ /'khor de nyid na bram ze dbang phyug 'od ces bya ba/ byang chub sems dpa'i sa gsum pa thob par gyur pa zhig 'dug pa des spyan ras gzigs dbang phyug gi ma zhes bya ba'i gzungs/ rig sngags kyi rgyal mo chen mo 'di bram ze brgya stong mang po dang / sems can bye ba khrag khrig du ma las 50a @#/ /bsgrags/ bshad/ bstan te/ de dag thams cad kyis gzungs 'di thos ma thag tu sdig pa ltung bar byed pa thams cad las rnam par grol ba dang / skye ba dran par gyur pa ngas dran no/ /byang chub sems dpa' chen po/ de smros shig /phyi ma'i dus na 'jig rten gyi khams kun nas nyon mongs pa can du sems can sdig par byed pa/ mtshams med pa byed pa bye ba khrag khrig 'bum phrag du ma'i sdig pa zad par 'gyur ro/ /phan pa dang bde bar 'gyur/ mgon med pa rnams kyi mgon du 'gyur ro/ /ngas kyang gnang zhing rjes su yi rang ngo / /bcom ldan 'das kyis de skad ces bka' stsal pa dang / de nas byang chub sems dpa' sems dpa' chen po kun tu bzang pos spyan ras gzigs dbang phyug gi ma zhes bya ba'i gzungs kyi rig sngags kyi gsang sngags kyi gzhi 'di dag smras so/ /dkon mchog gsum la phyag 'tshal lo/ /bcom ldan 'das de bzhin gshegs pa 'od dpag med la phyag 'tshal lo/ /byang chub sems dpa' sems dpa' chen po 'phags pa spyan ras gzigs dbang phyug la phyag 'tshal lo/ /de dag la phyag 50b 'tshal nas 'phags pa spyan ras gzigs dbang phyug gi yum zhes bya ba'i gzungs rig sngags chen mo'i gsang sngags kyi gzhi 'di dag brjod bar bya'o/ /bdag la rig sngags 'di grub par gyur cig /tad+ya thA/ i li mi li/ tsi li mi li/ kun tu le kun tu le/ kun tu le si re/ si si re/ bi si re/ bi ra ya/ gau ri/ gan+d+ha ri/ Da mi De/ ma taM gi /puk+ka si/ kaSh+TA ya/ mA la tsaN+DA li/ hu tu mA li ni/ hUM d+hu d+hu mA li ni/ tsi li mi li/ gr-ih+Na sau ma daR+Sha ni/ ku ru tsaN+Da mu khe/ la g+hu mA na yaM te/ AR+Ya dak+Shi Na b+hu dze/ sarba bid+yA nA ma/ pra sA d+ha ne/ sarba bid+yA nA ma/ I shwa ri swAhA/ bklags pas grub pa'i gzungs 'di'i cho ga ni/ 'di yin te| thos ma thag tu las kyi sgrib pa thams cad byang par 'gyur ro/ /'jigs pa thams cad las srung ngo / /dus gsum du bzlas pa byas na/ zhag bdun gyis byang chub sems dpa' kun tu bzang po mthong bar 'gyur ro/ /gzhan du mi sems pa'i yid kyis bzlas pa byas na/ zla ba gcig gis 'phags pa spyan ras gzigs dbang phyug gi ma/ rig pa chen mo bdag nyid ston te/ 'phags pa 'od dpag med kyang mthong ngo / /byang chub las phyir mi ldog par 'gyur 51a @#/ /ro| |skye ba dran pa dang / thos pa 'dzin par yang 'gyur ro/ /gang dang gang du skyes pa de dang der dam pa'i chos dang mi 'bral bar 'gyur ro/ /longs spyod chen por 'gyur ro/ /bcom ldan 'das kyis de skad ces bka' stsal nas byang chub sems dpa' sems dpa' chen po kun tu bzang po dang / byang chub sems dpa' de dag dang / dge slong de dag dang / thams cad dang ldan pa'i 'khor de dag yi rang ste bcom ldan 'das kyis gsungs pa la mngon par bstod do/ /'phags pa spyan ras gzigs dbang phyug gi yum zhes bya ba'i gzungs rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban+d+he ye shes sdes bsgyur cing zhus te skad gsar bcad kyis kyang bcos te gtan la phab pa// // |