rgya gar skad du/ AR+Ya tA ra b+ha T+TA ri ka nA ma aSh+Ta sha ta kaM /bod skad du/ rje btsun ma 'phags ma sgrol ma'i mtshan brgya rtsa brgyad pa/ rje btsun ma 'phags ma sgrol ma la phyag 'tshal lo/ /dpal ldan yid 'ong po Ta la/ /sna tshogs khams kyis rnam par spras/ /sna tshogs ljon pas bkram pa ste/ 76a @#/ /skye gnyis du ma sgra 'byin pa/ /'bab chu sna tshogs ku co che/ /ri dwags sna tshogs 'khrugs pa ste/ /me tog sna tshogs rigs rnams kyis/ /kun tu dri yis bkang ba ste/ /sna tshogs yid 'ong 'bras bur ldan/ /rkang pa drug pa glu yi sgra/ /mi'am ci yis glu snyan len/ /glang chen smyon pas yang dag khengs/ /rig 'dzin grub pa'i tshogs rnams dang / /dri za rnams kyang glu len pa/ /thub pa 'dod chags bral rnams dang / /byang chub sems dpa'i tshogs gzhan dang / /sa bcu'i dbang phyug rnams dang ni/ /'phags ma sgrol sogs lha mo rnams/ /rig pa'i rgyal mo stong rnams kyis/ /rtag tu legs par sten pa'o/ /khro bo'i rgyal po'i tshogs gzhan dang / /rta mgrin la sogs kyis bskor ba/ /sems can kun la phan par brtson/ /bcom ldan 'das ni spyan ras gzigs/ /bzhugs te de phyir dpal dang ldan| |pad+ma'i snying po thub pa'i gdan/ /dka' thub chen po dang ldan pa/ /byams pa dang ni snying rje ldan/ /lha yi 'khor ni chen po la/ /chos gsung po ni yang dag bzhugs/ /de ru nyer 'dug yang dag langs/ /phyag na rdo rje stobs po che/ /mchog tu snying rje dang ldan pas/ /spyan ras gzigs la zhus pa ste/ /rkun po sbrul dang seng+ge 76b me| |glang po stag dang chus 'jigs pa/ /zhi mdzad thub pas sems can rnams/ /'khor ba'i rgya mtshor bying ba rnams/ /'khor ba'i zhags pas bcings pa rnams/ / chags sdang gti mug dri ma las/ /gang gis sems can grol 'gyur ba/ /de gsungs bdag la thub chen po/ /de skad zhus nas bcom ldan 'das/ /'jig rten mgon pos 'di skad gsungs/ /dpal ldan de ni spyan ras gzigs/ /phyag na rdo rjer rab rtogs byed/ /snyan pa'i tshig ni 'di skad gsungs/ /nyon cig gsang ba'i rgyal dbang po| |skyob pa 'od dpag med pa yi/ /smon lam stobs kyis byung ba ste/ /nga yis 'jig rten ma rung shes/ /snying rje che dang ldan pa yis/ /'gro ba 'don par brtson pa mo/ / nyi ma shar ba dang 'dra ba/ /zla ba nya 'dra byed kyi 'od/ /lhar bcas mi dang lha min rnams/ /'di rnams thams cad gsal bar byed/ /'jig rten gsum po g.yo bar byed/ / gnod sbyin srin po 'jigs par byed/ /phyag na ut+pal sngon po bsnams/ /ma 'jigs ma 'jigs zhes brjod ma/ /bar snang du ni 'bar bar gnas/ /'gro ba yang dag gzung don du| |mtshon gyi bskal pa byung ba dang / /'jigs pa sna tshogs 'khrugs don du/ /rgyal ba rnams kyi bdag bskyed de/ /ming rnams dran pa nyid kyis kyang / /sems can thams 77a @#/ /cad bdag gis srung / /sna tshogs 'jigs pa'i rgya mtsho las/ /sems can thams cad bdag gis bsgral/ /des na bdag la 'jig rten du// rgyal ba'i tshogs kyis sgrol mar bsgrags/ /thal mo sbyar ba byas nas ni/ /spyan sngar 'dug ste 'di skad gsol/ /gus dang bcas pas yang dag gnas/ /gang zhig rgyal bas sngon bsgrags pa/ /gsungs shig mtshan brgya rtsa brgyad pa/ /sa bcu'i dbang phyug mgon rnams dang / /byang chub sems dpa' rab dga' ba/ /sdig pa spong byed bsod nams dang / /bkra shis grags pa 'phel bar byed/ / /gter dang nor rnams 'phel byed nyid/ /nad rnams thams cad brlag par byed/ /dpal dang shis pa 'jog par byed/ /nad med tshe ni 'phel bar byed/ /sems can rnams la byams bsgoms la/ /de dag sgrogs shig thub chen po/ /de skad zhus nas bcom ldan 'das/ /spyan ras gzigs dbang rab tu bzhad/ /phyogs rnams thams cad rab gzigs nas/ /'di lta bu yi byams pa spros/ /phyag ni g.yas pas phyag thabs mdzad/ /bsod nams mtshan nyid ldan pa yi/ /de gsungs shes rab shin tu che/ /legs so legs so dka' thub che/ /sems can kun la gcig tu brtse// 77b skal pa chen po'i mi rnams nyon/ /mi rnams gang zhig 'di sgrog pa/ /nor gyi dbang phyug yang dag 'gyur/ /nad rnams thams cad yang dag grol/ /dbang phyug kun dang yang dag ldan/ /dus min 'chi ba nges par 'joms/ /'chi ba bde ba can 'gro ba/ /de rnams bdag gis bshad par bya/ /lha yi dge 'dun bdag la nyon/ /'di la rjes su yi rang gis/ /legs par bsngams par 'gyur la bstod/ /oM/ /dge ba can ni gzi brjid che/ /'jig rten gso byed snyan pa che/ /dbyangs can ma ni spyan yangs ma/ /shes rab dpal dang blo 'phel ma/ /gso byed ma dang rgyas byed ma/ swA hA/ oM gyi rnam par 'dod gzugs ma/ /sems can kun la phan par brtson/ /g.yul las sgrol byed rgyal ba mo/ /lha mo shes rab pha rol phyin/ /'phags ma sgrol ma yid 'ong ma/ /rdza rnga dung can rgyas pa po/ /rig pa'i rgyal mo tshig snyan ma/ /zla ba'i gdong can dkar mo che/ /mi pham gos ni ser mo can/ /sgyu ma chen mo dkar mo che/ /stobs po che la pha rol phyin/ /rtsub mo chen mo gtum chen mo/ /sdang ba'i sems kyis brlag byed ma/ / rab tu zhi ba zhi ba'i gzugs/ /rnam par rgyal ba 'bar ba'i 'od/ /glog gi phreng ba'i rgyal mtshan can/ /ral gri 'khor lo gzhu thogs mtshon/ /'chol byed rengs 78a @#/ /byed nag mo che/ /mtshan mo nag mo mtshan spyod ma/ /srung byed rmongs byed zhi ba mo/ /mdzes ma dge ma 'dra ba'i lding / /tshangs pa mo dang rig byed ma| |gsang ba mo ni brag phug gnas/ /bkra shis don byed zhi ba mo/ /skyes gnas rig byed yid mgyogs ma/ /thod pa can ni shugs chen mo/ /tshangs ma bden ma gzhan mi rgyal/ /ded dpon chen mo snying rje gnas/ /chud zos pa la lam rab ston/ /mchog ster ster byed ston pa mo/ /bud med gzugs la dpag med gnon/ / ri khrod ma dang rnal 'byor ma /grub ma gtum ma bdud rtsi ma/ /des ma nor ma bsod nams ma/ /skal chen skal bzang mdzes ston ma/ /mthar byed skrag byed 'jigs byed ma/ /drag dang brtul zhugs chen mo ma/ /'gro la gcig tu phan par brtson/ /skyabs byed gus la gsong po ma/ /ngag gi dbang phyug zhi phra ma/ /rtag par kun 'gro rjes 'gro ma/ /don kun sgrub byed bzang po ma/ /gsad byed gso byed nor ster ma/ /mi 'jigs bsod nams go ta ma/ /spyan ras gzigs dbang bdag nyid skyes/ /mtshan brgya rtsa brgyad 'di dag ni/ /phan par byed par grags pa ste/ /mchog tu rmad byung gsang ba'o/ /lha yul na yang rnyed dka' ba/ /skal 78b bzang bskal pa dang ldan byed/ /dug ni thams cad nyams byed pa/ /nad ni thams cad zhi byed ma/ /sems can kun la bde ster ma/ /blo ldan gang zhig lan gsum klog / mnyam bzhag gtsang sbra byas pa yis/ /des ni dus mi ring ba ru/ /rgyal srid dpal yang thob par 'gyur/ /rtag tu sdug pa'ang bde bar 'gyur/ /bkren pa phyug por 'gyur ba'o/ /rmongs pa shes rab chen por 'gyur/ /yid gzhungs 'gyur bar the tshom med/ /bcings pa bcings las grol bar 'gyur/ /tha snyad las kyang rgyal bar 'gyur/ / dgra bo bshes por 'gyur ba ste/ /rwa can dang ni mche ba can/ /dog pa'i 'thab mo rgyal dka' dang / /sna tshogs 'jigs pa 'khrugs pa las/ /mtshan ni 'di rnams dran pa yis// 'jigs pa kun las sgrol bar byed/ /dus min 'chi la sgrol bar byed/ /skyes bu snyan pa thob par byed/ /mir ni skye ba don dang bcas/ /de gcig pu yi phan yon gyis/ /gang zhig 'dir ni sngar langs nas| |skyes bu gang zhig sgrog byed pa/ /de yi dus ring tshe dang ldan/ /mi ni dpal gyis dga' 'gyur te/ /lha dang klu dang gnod sbyin dang / /dri za dang ni lus srul po/ /'byung po gshed byed srin po dang / /ma mo rtsub pa'i sems ldan pa/ /gnod sbyin mo dang yi dwags byed/ /smyo byed dang ni gdon chen rnams/ /grib gnon dang ni brjed byed dang / /sha za 79a @#/ /la sogs pa rnams dang / /ro langs la sogs sna tshogs rnams/ /skul byed gzhan sems sdang ba rnams/ /grib ma yang ni 'gom mi 'gyur// ji ltar slar ni mchod par 'gyur/ /sdang ba'i sems can 'ching bar 'gyur/ /nad la sogs pas thebs mi 'gyur/ /phyug cing longs spyod yon tan ldan/ /bu dang tsha bo 'phel bar 'gyur/ /blo ldan skye ba dran par 'gyur/ /rigs dang ldan zhing mthong dgar 'gyur/ /gzi brjid dang ldan zhing tshig gsal ba/ /bstan bcos thams cad rig par 'gyur/ /dge bshes bsnyen bkur yang dag bsten/ /byang chub sems kyis brgyan pa dang / /gang dang gang du skyes pa der/ /rtag tu sangs rgyas kyis mi spong / / dpal ldan 'phags pa spyan ras gzigs dbang phyug gis gsungs pa rje btsun ma 'phags ma sgrol ma'i mtshan brgya rtsa brgyad pa rdzogs so// // |