//rgya gar skad du/ AR+Ya bi na ya bi ni sh+tsa ya u pa li pa ri pr-id ts+tsha nA ma ma hA ya na sU tra/ bod skad du/ 'phags pa 'dul ba rnam par gtan la dbab pa nye bar 'khor gyis zhus pa zhes bya ba theg pa chen po mdo/ /bam po dang po/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na/ dge slong lnga brgya tsam gyi dge slong gi dge 'dun chen po dang / byang chub sems dpa' stong tha ma pa dang thabs gcig tu bzhugs so/ /de nas bcom ldan 'das kyis byang chub sems dpa' sems dpa' chen po de dag la glang po che'i lta stangs kyis gzigs te bka' stsal pa/ rigs kyi bu dag /khyed cag phyi ma'i tshe phyi ma'i dus na| dam pa'i chos yongs su gzung ba'i phyir/ de bzhin gshegs pas bskal pa bye ba khrag khrig 'bum phrag grangs med par yang dag par bsgrubs pa'i bla na med pa yang dag par rdzogs 222b pa'i byang chub 'di yang dag par gzung ba dang / sems can rnams yongs su smin par bya ba'i phyir thabs dang / tshul dang / bsam pa sna tshogs kyis yongs su bskyang bar su spro/ de nas byang chub sems dpa' sems dpa' chen po byams pa stan las langs te bla gos phrag pa gcig tu gzar nas/ pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das/ bdag ni slad ma'i tshe slad ma'i dus na dam pa'i chos yongs su gzung ba'i slad du/ de bzhin gshegs pas bskal pa bye ba khrag khrig 'bum phrag grangs ma mchis par yang dag par bsgrubs pa'i bla na med pa yang dag par rdzogs pa'i byang chub 'di yang dag par 'dzin par spro lags so/ /byang chub sems dpa' seng ges gsol pa/ bcom ldan 'das/ bdag ni thabs dang / tshul dang / bsam pa sna tshogs kyis sems can rnams yongs su skyong bar spro lags so/ /byang chub sems dpa' lag na rdo rjes gsol pa/ bcom ldan 'das/ bdag ni sems can rnams ngan song du mchi ba las yongs su thar par bgyid par spro lags so/ /'jam dpal gzhon nur gyur pas gsol pa/ bcom ldan 'das/ bdag ni sems can rnams kyis gang zag gi bsam pa yongs su rdzogs par bgyid par spro lags so/ /byang chub sems dpa' ye shes tog gis gsol pa/ bcom ldan 223a @#/ /'das/ bdag ni sems can ma 'tshal ba rnams yongs su smin par bgyid par spro lags so/ /byang chub sems dpa' chos kyi tog gis gsol pa/ bcom ldan 'das/ bdag ni chos kyi sbyin pas sems can rnams yongs su smin par bgyid par spro lags so/ /byang chub sems dpa' zla ba'i tog gis gsol pa/ bcom 'das/ bdag ni yon tan rnams kyis sems can yongs su smin par bgyid par spro lags so/ /byang chub sems dpa' nyi ma'i tog gis gsol pa/ bcom ldan 'das/ bdag ni theg pa bde bas sems can yongs su smin par bgyid par spro lags so/ /byang chub sems dpa' bag tsha ba med pas gsol pa/ bcom ldan 'das/ bdag ni sems can gyi khams mtha' yas pa dag yongs su smin par bgyid pa dang / yongs su 'dzin par spro lags so/ /byang chub sems dpa' bzang skyong gis gsol pa/ bcom ldan 'das/ bdag ni ming 'bras bu mchis par sgrogs pas sems can rnams yongs su smin par bgyid par spro lags so/ /byang chub sems dpa' blo gros mi bzad pas gsol pa/ bcom ldan 'das/ bdag ni smon lam rgya chen pos sems can gyi khams bas par ma 'tshal ba rnams yongs su thar par bgyid par spro lags so/ /byang chub sems dpa' zla 'od gzhon nur gyur pas gsol pa/ bcom ldan 223b 'das| bdag ni bde pa'i yo byad thams cad kyis sems can rnams rab tu 'god par spro lags so/ /byang chub sems dpa' mig bzang gis gsol pa/ bcom ldan 'das/ bdag ni sems can rnams kyi bde ba dang yid bde ba'i rtsa bar nye bar bsgrub par spro lags so/ /byang chub sems dpa' spyan ras gzigs dbang phyug gis gsol pa/ bcom ldan 'das/ bdag ni ngan song dang ngan 'gro dag las sems can rnams yongs su skyob par spro lags so/ /byang chub sems dpa' mthu chen thob kyis gsol pa/ bcom ldan 'das/ bdag ni ngan song dag las ma brgal ba'i sems can rnams sgrol bar spro lags so/ /byang chub sems dpa' tshogs chen gyis gsol pa/ bcom ldan 'das/ bdag ni sems can ma dul pa rnams 'dul ba'i shul nye bar ston par spro lags so/ /byang chub sems dpa' yid bzang gis gsol pa/ bcom ldan 'das/ bdag ni sems can dman pa la mos pa rnams yongs su smin par bgyid par spro lags so/ /byang chub sems dpa' des pas gsol pa/ bcom ldan 'das/ bdag ni sems can shes rab dman pa rnams yongs su smin par bgyid par spro lags so| |byang chub sems dpa' gzi brjid phung pos gsol pa/ bcom ldan 'das/ bdag ni sems can dud 'gro'i skye gnas su skyes pa rnams yongs su smin par bgyid par spro lags 224a @#/ /so| |byang chub sems dpa' nyon mongs pa med pa rtogs par khong du chud pas gsol pa/ bcom ldan 'das/ bdag ni shul yang dag par ston pas sems can rnams yongs su smin par bgyid par spro lags so/ /byang chub sems dpa' mthong dgas \ DGAS\ gsol pa/ bcom ldan 'das/ bdag ni sems can rnams la bde ba'i yo byad tshad ma mchis pa dag nye bar bsgrub par spro lags so/ /byang chub sems dpa' dbang po bzang gis gsol pa/ bcom ldan 'das/ bdag ni sdug bsngal dran par bgyid pas/ sems can rnams yongs su smin par bgyid par spro lags so/ /byang chub sems dpa' rnam par thar pa bsam gyis mi khyab pa la yang dag par zhugs pas gsol pa/ bcom ldan 'das/ bdag ni bsam pa tsam gyis yi dwags kyi 'jig rten du skyes pa'i sems can rnams yongs su thar par bgyid par spro lags so/ /byang chub sems dpa' nyi 'od kyis gsol pa/ bcom ldan 'das/ bdag ni sems can yongs su ma smin pa rnams yongs su smin par bgyid par spro lags so/ /byang chub sems dpa' dri ma med par grags pas gsol pa/ bcom ldan 'das/ bdag ni sems can rnams kyis bsam pa thams cad yongs su rdzogs par bgyid par spro lags so/ /byang chub sems dpa' gzi brjid stobs kyis gsol pa/ bcom ldan 'das/ bdag ni 224b sems can rnams kyi ngan song gi shul 'gums par spro lags so/ /byang chub sems dpa' yid gnyis spong gis gsol ba/ bcom ldan 'das/ bdag ni sems can dman pa la mos pa rnams sgrol bar spro lags so/ /byang chub sems dpa' bag tsha ba med par gnas pas gsol pa/ bcom ldan 'das/ bdag ni sems can rnams bsdu ba'i slad du legs so zhes bgyi ba stsol bar spro lags so/ /byang chub sems dpa' ye shes dpal gyis gsol pa/ bcom ldan 'das/ bdag ni sems can mos pa sna tshogs dang ldan pa rnams mos pa ji lta ba bzhin du yongs su smin par bgyid par spro lags so/ /byang chub sems dpa' gsal ba dpag med kyis gsol pa/ bcom ldan 'das/ bdag ni sems can rnams la 'dus ma bgyis kyi shul nye bar ston par spro lags so/ /byang chub sems dpa' chos thams cad la bag tsha ba med par gnas pas gsol pa/ bcom ldan 'das/ bdag ni mos pa sna tshogs dang ldan pa'i sems can rnams la mos pa ji lta ba bzhin yang dag par ston par spro lags so/ /byang chub sems dpa' rin chen dpal gyis gsol pa/ bcom ldan 'das/ bdag ni sems can rnams la rin po che'i phung po kun du ston par spro lags so/ /byang chub sems dpa' blo gros bzang pos gsol pa/ bcom ldan 'das/ bdag ni gzugs sdug pa ston pas sems can rnams yongs su smin par 225a @#/ /bgyid par spro lags so/ /byang chub sems dpa' dri med gzi brjid kyis gsol pa/ bcom ldan 'das/ bdag ni gcugs pas sems can rnams yang dag bar 'dzin cing yongs su smin par bgyid par spro lags so/ /byang chub sems dpa' nor bu bzang gis gsol pa/ bcom ldan 'das/ bdag ni sngon gyi skye ba rjes su dran par bgyid pas sems can rnams yongs su smin par bgyid par spro lags so/ /byang chub sems dpa' bsod nams 'od zer gyis gsol pa/ bcom ldan 'das/ bdag ni yang dag pa'i smon lam gyis sems can rnams 'dren par spro lags so/ /byang chub sems dpa' dpal bzang pos gsol pa/ bcom ldan 'das/ bdag ni sems can rnams sdug bsngal dag las gtan yongs su thar par bgyid par spro lags so/ /byang chub sems dpa' lag na rin po ches gsol pa/ bcom ldan 'das/ bdag ni sems can rnams rin po che dag gis bde bar bgyid par spro lags so/ /byang chub sems dpa' blo gros kyis gsol pa/ bcom ldan 'das/ bdag ni sems can dbul po rnams kyi dbul ba ma mchis par bgyid par spro lags so/ / byang chub sems dpa' sgrib pa thams cad rnam par sel bas gsol pa/ bcom ldan 'das/ bdag ni sems can rnams nyon mongs pa thams cad las yongs su thar par bgyid 225b par spro lags so/ /byang chub sems dpa' rdo rje 'od kyis gsol pa/ bcom ldan 'das/ bdag ni sems can rnams la shul bzang po nye bar ston par spro lags so/ /byang chub sems dpa' yon tan gzugs ston gyis gsol pa/ bcom ldan 'das/ bdag ni bsam pa thams cad rab tu dga' bar bgyid pas sems can rnams yongs su thar bar bgyid par spro lags so| |byang chub sems dpa' chos mngon par 'phags kyis gsol pa/ bcom ldan 'das/ bdag ni sems can rnams la chos kyi mig rnam par sbyang ba ston par spro lags so/ /byang chub sems dpa' rdo rje'i snying pos gsol pa/ bcom ldan 'das/ bdag ni sems can rnams sgrib pa dag las yongs su thar par bgyid par spro lags so/ /byang chub sems dpa' chos 'byung gis gsol pa/ bcom ldan 'das/ bdag ni chos kyis sems can rnams yongs su thar par bgyid par spro lags so/ /byang chub sems dpa' ci yang min gyis gsol pa/ bcom ldan 'das| bdag ni sems can thams cad kyi nyon mongs pa'i dug thams cad gzhil bar spro lags so/ /byang chub sems dpa' zla mchog gis gsol pa/ bcom ldan 'das/ bdag ni sems can rnams la chos kyi phyogs rab tu ston par spro lags so/ /byang chub sems dpa' seng ge blo gros kyis gsol pa/ bcom ldan 'das/ bdag ni sems can rnams la 226a @#/ /chos kyi sbyin pa stsol bar spro lags so/ /byang chub sems dpa' gzhon nu 'od kyis gsol pa/ bcom ldan 'das/ bdag ni sems can rnams dman pa'i gnas nas yongs su thar par bgyid par spro lags so/ /byang chub sems dpa' sangs rgyas dpal gyis gsol pa/ bcom ldan 'das/ bdag ni shul bzang po ston pas sems can rnams kyi ngan song gi shul 'gog par spro lags so/ /byang chub sems dpa' gser 'od kyis gsol pa/ bcom ldan 'das/ bdag ni lus ston pas sems can rnams yongs su smin par bgyid par spro lags so/ /byang chub sems dpa' bsod nams dpal gyis gsol pa/ bcom ldan 'das/ bdag ni sems can don bgyid pa rnams kyi don bgyid par spro lags so/ /byang chub sems dpa' 'gro ba 'dzin gyis gsol pa/ bcom ldan 'das/ bdag ni sems can rnams kyi sems can dmyal ba'i sgo 'gums par spro lags so/ /byang chub sems dpa' bdud rtsi 'chang gis gsol pa/ bcom ldan 'das/ bdag ni sems can rnams 'khor ba las sgrol bar spro lags so/ /byang chub sems dpa' dra ba can gyi 'od gzhon nur gyur bas gsol pa/ bcom ldan 'das/ bdag ni slad ma'i tshe slad ma'i dus na 'od bstan pas 226b sems can rnams kyi nyon mongs pa rnams rab tu zhi bar bgyid par spro lags so/ /de nas tshe dang ldan pa shA ri'i bus byang chub sems dpa' de dag gis sems can yongs su smin par bya ba'i go cha la 'jug pa bstan pa de lta bu thos nas ngo mtshar dang rmad du byung bar 'dzin par gyur te/ bcom ldan 'das la 'di skad ces gsol to/ /bcom ldan 'das/ kye ma ji tsam du byang chub sems dpa' sems dpa' chen po 'di dag snying rje chen po dang thabs la mkhas pa bsam gyis mi khyab cing / brtson 'grus brtan pa'i go cha chen po bgos pa dang / ji tsam du sems can thams cad kyis thul bar dka' ba dang / gting dpag par dka' ba dang / bsnyen par dka' ba dang / rdzi bar dka' ba dang / zil gyis mi non pa'i gzi brjid dang ldan pa ni ngo mtshar lags te/ bcom ldan 'das/ gzhan yang 'di ltar byang chub sems dpa' sems dpa' chen po gzi brjid zil gyis mi non pa rnams kyi drung du mgo dang / lag pa dang / rkang pa dang / mig slong ba dag mchis te/ dngos po thams cad slong bar bgyid kyang byang chub sems dpa' sems dpa' chen po rnams kun du zhum par mi bgyid/ sgyid lug par mi bgyid cing rab tu spro bar bgyid pa ni bdag ngo mtshar du 'dzin lags so/ /bcom ldan 'das gzhan yang bdag 'di snyam du sems lags te/ sems can gang su dag gis byang chub sems dpa' sems dpa' chen po 227a @#/ /rnams la gnod par bgyis te/ nang dang phyi'i dngos po dag slong bar bgyid pa de dag thams cad ni rnam pa thar pa bsam gyis mi khyab pa la gnas pa'i byang chub sems dpa' sems dpa' chen po sha stag tu 'gyur bar sems lags so/ /de skad ces gsol pa dang / bcom ldan 'das kyis tshe dang ldan pa shA radwa ti'i bu la 'di skad ces bka' stsal to/ /shA ri'i bu/ de de bzhin no/ /de de bzhin te/ byang chub sems dpa' rnams kyi ting nge 'dzin dang / thabs dang / shes rab dang / ye shes kyi spyod yul ni de lta bu yin no// shA ri'i bu/ byang chub sems dpa' rnams kyi yul de ni nyan thos dang / rang sangs rgyas thams cad kyis ma yin no/ /shA ri'i bu/ de la byang chub sems dpa' sems dpa' chen po rnams ni sems can rnams kyi bsam pa yongs su rdzogs par bya ba'i phyir sangs rgyas kyi rnam par 'phrul pa thams cad kun tu ston par byed kyang byang chub sems dpa'i chos nyid las mi g.yo'o// shA ri'i bu/ de la byang chub sems dpa' sems dpa' chen po rnams ni sems can khyim bdag gis rgyags pas myos pa rnams la dbang phyug gis rgyags pa bsal ba'i phyir| khyim bdag gi gzugs nye bar ston par byed do/ /sems can spro bas rgyags shing myos pa rnams la spro ba'i rgyags pa'i rgyags pa bsal ba'i phyir/ tshan po che chen po'i 227b stobs dang / sred med kyi bu'i spro ba'i stobs nye bar ston par byed do/ /sems can mya ngan las 'das pa don du gnyer ba rnams la/ mya ngan las 'das pa'i lam sna tshogs nye bar ston par byed do/ /nyan thos kyi theg pa don du gnyer ba'i sems can rnams la ni/ nyan thos kyi theg pas yongs su mya ngan las bzla ba'i phyir/ nyan thos kyi gzugs nye bar ston par byed do| |rang sangs rgyas kyi theg pa don du gnyer ba'i sems can rnams la ni rten cing 'brel bar 'byung ba la 'jug par bya ba'i phyir rang sangs rgyas kyi gzugs nye bar ston par byed do/ /byang chub don du gnyer ba'i sems can rnams la ni sangs rgyas kyi chos thams cad yang dag par thob par bya ba'i phyir sangs rgyas kyi gzugs nye bar ston par byed de/ shA ri'i bu/ de ltar na byang chub sems dpa' sems dpa' chen po rnams ni thabs sna tshogs kyis sems can gyi khams yongs su smin par byas nas sangs rgyas kyi chos rnams la rab tu 'god par byed do| |de ci'i phyir zhe na/ shA ri'i bu/ de bzhin gshegs pa'i ye shes shin tu mya ngan las 'das pa'i rnam par thar pa ma gtogs par sems can rnams kyi rnam par thar ba gzhan med de/ de'i phyir de bzhin gshegs pa zhes bya ba'i phyir ro/ /de ci'i phyir zhe na/ de bzhin gshegs pas ni de bzhin nyid ji lta ba bzhin 'di thugs su chud de/ de'i phyir 228a @#/ /de bzhin gshegs pa zhes bya ba dang / gdags pa sna tshogs kyis sems can rnams la rnam par rig par mdzad de/ de'i phyir de bzhin gshegs pa zhes bya ba dang / dge ba'i chos thams cad dang ldan pa dang / mi dge ba'i chos thams cad spangs pas de'i phyir de bzhin gshegs pa zhes bya ba dang / sems can bcings pa rnams la thar pa nye bar ston par mdzad pas de'i phyir de bzhin gshegs pa zhes bya ba dang / sems can lam ngan par zhugs pa rnams la lam bzang po nye bar ston par mdzad pas/ de'i phyir de bzhin gshegs pa zhes bya ba dang / stong pa nyid gsung ba dang / stong pa nyid la nges par 'byung bas de'i phyir de bzhin gshegs pa zhes bya ba'i phyir ro/ /shA ri'i bu/ byang chub sems dpa' sems dpa' chen po rnams ni byis pa so so'i skye bo rnam par rmongs pa rnams la yang dag pa'i chos rjes su rtogs par bya ba'i phyir mos pa ji lta ba bzhin du| rnam par rig pa sna tshogs kyi rnam par thar pa nye bar ston par byed kyang byang chub sems dpa'i chos nyid las mi g.yo'o/ /rim gyis byang chub kyi snying po thob par bya ba'i phyir sems can rnams la sgyu ma'i bkod pa rnam pa sna tshogs kyang nye bar ston to/ /shA ri'i bu/ gzhan yang byang chub sems dpa' sems dpa' chen po khyim pa khyim na gnas 228b pas ni sbyin pa gnyis la gnas par bya'o/ /gnyis gang zhe na/ 'di lta ste/ chos sbyin pa dang / zang zing sbyin pa ste/ shA ri'i bu/ byang chub sems dpa' sems dpa' chen po khyim pa khyim na gnas pas ni rjes su chags pa med pa dang / khong khro ba med pas sbyin pa de gnyis la gnas par bya'o/ /shA ri'i bu/ byang chub sems dpa' sems dpa' chen po rab tu byung bar gtogs pas ni sbyin pa chen po bzhi la gnas par bya'o/ /gzhi gang zhe na/ 'di lta ste/ smyu gu sbyin pa dang / snag tsha sbyin pa dang / glegs bam sbyin pa dang / chos sbyin pa la ste| shA ri'i bu/ byang chub sems dpa' sems dpa' chen po rab tu byung bar gtogs pas ni sbyin pa bzhi po de dag la gnas par bya'o/ /shA ri'i bu/ byang chub sems dpa' sems dpa' chen po mi skye ba'i chos la bzod pa thob pas ni gtong ba gsum la gnas par bya'o/ /gsum gang zhe na/ 'di lta ste/ gtong ba dang / gtong ba chen po dang / shin tu gtong ba'o/ /de la gtong ba ni rgyal srid yongs su gtong ba'o/ /de la gtong ba chen po ni chung ma dang / bu dang / bu mo yong su gtong ba'o/ /shin tu gtong ba ni mgo dang| lag pa dang / rkang pa dang / mig dang / pags pa dang / rus pa dang / rkang yongs su gtong ba ste/ shA ri'i bu/ byang chub sems dpa' sems dpa' chen po mi skye ba'i chos 229a @#/ /la bzod pa thob pas ni yongs su gtong ba gsum po de dag la gnas par bya'o/ /shA ri'i bus gsol pa/ bcom ldan 'das/ byang chub sems dpa' rnams 'dod chags kyis mi 'jigs lags sam/ zhe sdang / gti mug gis mi 'jigs lags sam/ bcom ldan 'das kyis bka' stsal pa/ shA ri'i bu/ byang chub sems dpa' rnams kyi kha na ma tho ba chen po dang bcas pa'i nyes pa ni gnyis te/ gnyis gang zhe na/ 'di lta ste/ zhe sdang dang ldan pa dang / gti mug dang ldan pa ste/ shA ri'i bu/ gnyis po de dag ni byang chub sems dpa' rnams kyi kha na ma tho ba chen po dang bcas pa'i nyes pa yin no/ /shA ri'i bu/ de la 'dod chags ni kha na ma tho ba dang bcas pa chung la/ 'bral ba bul ba yin no/ /zhe sdang ni kha na ma tho ba dang bcas pa che la/ 'bral ba myur ba yin no/ /gti mug ni kha na ma tho ba dang bcas pa che la/ 'bral ba bul ba yin no/ /de ci'i phyir zhe na| shA ri'i bu/ 'dod chags ni 'khor ba'i 'khri shing kun du 'dzin pa'i phyir nying mtshams sbyor ba'i sa bon yin pa dang / zhe sdang ni myur du yongs su spong ba'i phyir ngan song du 'gro ba'i rgyur gyur pa yin pa dang / gti mug ni rnam par grol ba dka' ba'i phyir sems can dmyal ba chen po brgyad du rab tu ltung ba'i rgyur gyur pa'i phyir ro/ /shA ri'i bu/ 229b de la byang chub sems dpas nyes pa dang po'i lci ba ni tshogs bcu la dang por bshags par bya'o/ /bud med kyi lag pa nas 'dzin pa'i lag pa'i nyes pa lci ba ni tshogs lnga la bshags par bya'o/ /nyon mongs pa can gyi sems kyis mig gis bltas pa'i nyes pa ni gang zag gcig gam gnyis kyi mdun du bshags par bya'o/ /byang chub sems dpas mtshams med pa lnga dang ldan pa'i nyes pa dang / bud med kyi nyes pa dang / khye'u'i nyes pa dang / lag pa'i nyes pa dang / mchod rten gyi nyes pa dang / dge 'dun gyi nyes pa dang / de las gzhan pa'i nyes pa lci ba rnams ni sangs rgyas bcom ldan 'das sum cu rtsa lnga'i spyan sngar gcig pus nyin mtshan du bshags par bya'o/ /de la bshags pa ni 'di yin te/ bdag ming 'di zhes bgyi ba/ sangs rgyas la skyabs su mchi'o/ /chos la skyabs su mchi'o/ /dge 'dun la skyabs su mchi'o/ /de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phyag 'tshal lo/ /rdo rje snying pos rab tu 'joms pa la phyag 'tshal lo/ /rin chen 'od 'phro la phyag 'tshal lo/ /klu dbang gi rgyal po la phyag 'tshal lo/ /dpa' bo'i sde la phyag 'tshal lo/ /dpal dgyes la phyag 'tshal lo/ /rin chen me la phyag 'tshal lo/ /rin chen zla 'od la phyag 'tshal lo/ /mthong ba don 230a @#/ /yod la phyag 'tshal lo/ /rin chen zla ba la phyag 'tshal lo/ /dri ma med pa la phyag 'tshal lo/ /dpal byin la phyag 'tshal lo/ /tshangs pa la phyag 'tshal lo/ /tshangs pas byin la phyag 'tshal lo/ /chu lha la phyag 'tshal lo/ /chu lha'i lha la phyag 'tshal lo/ /dpal bzang la phyag 'tshal lo/ /tsan dan dpal la phyag 'tshal lo| |gzi brjid mtha' yas la phyag 'tshal lo/ /'od dpal la phyag 'tshal lo/ /mya ngan med pa'i dpal la phyag 'tshal lo/ /sred med kyi bu la phyag 'tshal lo/ /me tog dpal la phyag 'tshal lo/ /de bzhin gshegs pa tshangs pa'i 'od zer rnam par rol pas mngon par mkhyen pa la phyag 'tshal lo/ /de bzhin gshegs pa pad ma'i 'od zer rnam par rol pas mngon par mkhyen pa la phyag 'tshal lo/ /nor dpal la phyag 'tshal lo/ /dran pa'i dpal la phyag 'tshal lo/ /mtshan dpal shin tu yongs bsgrags la phyag 'tshal lo/ /dbang po tog gi rgyal mtshan gyi rgyal po la phyag 'tshal lo/ /shin tu rnam par gnon pa'i dpal la phyag 'tshal lo/ /g.yul las shin tu rnam par rgyal ba la phyag 'tshal lo/ /rnam par gnon pas gshegs pa la phyag 'tshal lo/ /kun nas snang ba bkod pa'i dpal la phyag 'tshal lo/ /rin chen pad mas rnam 230b par gnon pa la phyag 'tshal lo/ /de bzhin gshegs pa dgra bcom pa yang dag par rdzogs pa'i sangs rgyas rin po che'i pad mo la rab tu bzhugs pa ri dbang gi rgyal po la phyag 'tshal lo/ /de dag la sogs pa phyogs bcu'i 'jig rten gyi khams thams cad na/ de bzhin gshegs pa dgra bcom pa yang dag par rdzogs pa'i sangs rgyas ji snyed cig bzhugs te 'tsho zhing gzhes pa'i sangs rgyas bcom ldan 'das de dag thams cad bdag la dgongs su gsol/ bdag gis skye ba 'di dang / skye ba thog ma dang / tha ma ma mchis pa nas/ 'khor ba nas 'khor ba'i skye ba gzhan dag tu sdig pha'i las bgyis pa dang / bgyid du stsal pa dang / bgyid pa la rjes su yi rang ba'am/ mchod rten gyi dkor ram| dge 'dun gyi dkor ram/ phyogs bzhi'i dge 'dun gyi dkor phrogs pa dang / 'phrog tu stsal ba dang / 'phrog pa la rjes su yi rang ba'am/ mtshams ma mchis pa lnga'i las bgyis pa dang / bgyid du stsal pa dang / bgyid pa la rjes su yi rang ba'am/ mi dge ba bcu'i las kyi lam yang dag par blang ba la zhugs pa dang / 'jug tu stsal pa dang / 'jug pa la rjes su yi rang ba'am/ las kyi sgrib pa gang gis bsgribs nas/ bdag sems can dmyal bar mchi ba'am/ dud 'gro'i skye gnas su mchi ba'am/ yi dwags 231a @#/ /kyi yul du mchi ba'am/ yul mtha' 'khob tu skye ba'am/ kla klor skye ba'am/ lha tshe ring po rnams kyi dang du skye ba'am/ dbang po ma tshang bar 'gyur ba'am/ lta ba log pa 'dzin par 'gyur ba'am/ sangs rgyas 'byung ba la mnyes par mi bgyid par 'gyur ba'i las kyi sgrib pa gang lags pa de dag thams cad sangs rgyas bcom ldan 'das ye shes su gyur pa/ spyan du gyur pa/ dbang du gyur pa/ tshad mar gyur pa/ mkhyen par gzigs pa de dag gi spyan sngar mthol lo/ /'chags so/ /mi 'chab bo/ /mi sped do/ /slan chad kyang sdom par bgyid lags so/ /sangs rgyas bcom ldan 'das de dag bdag la dgongs su gsol/ bdag gis skye ba 'di dang / skye ba thog ma dang tha ma ma mchis pa nas 'khor ba nas 'khor ba'i skye ba gzhan dag tu sbyin pa tha na dud 'gro'i skye gnas su skyes pa la zas kha ma gcig tsam stsal ba gang lags pa dang / tshul khrims bsrungs pa'i dge ba'i rtsa ba gang lags pa dang / bdag gis sangs par spyod pa la gnas pa'i dge ba'i rtsa ba gang lags pa dang / bdag gis sems can yongs su smin par bgyis pa'i dge ba'i rtsa ba gang lags pa dang / bdag gi byang chub kyi sems kyi dge ba'i rtsa ba gang lags pa dang / bdag gi bla na med pa'i ye shes kyi dge 231b ba'i rtsa ba gang lags pa de dag thams cad gcig tu bsdus shing bzlums te/ bsdoms nas bla na ma mchis pa dang / gong na ma mchis pa dang / gong ma'i yang gong mar yongs su bsngo bas bla na med pa yang dag par rdzogs par rdzogs pa'i byang chub tu yongs su bsngo bar bgyi'o/ /ji ltar 'das pa'i sangs rgyas bcom ldan 'das rnams kyis yongs su bsngos pa dang / ji ltar ma 'ongs pa'i sangs rgyas bcom ldan 'das rnams yongs su bsngo bar 'gyur ba dang / ji ltar da ltar byung ba'i sangs rgyas bcom ldan 'das rnams da ltar yongs su bsngo bar mdzad pa de ltar bdag gis kyang yongs su bsngo bar bgyi'o/ /sdig pa thams cad bshags so/ /bsod nams thams cad la rjes su yi rang ngo / /sangs rgyas thams cad la gsol ba 'debs so/ /bdag gi ye shes bla na med pa'i mchog tu gyur cig /mi mchog rgyal ba gang dag da ltar bzhugs pa dang / /gang dag 'das pa dag dang de bzhin gang ma byon/ /yon tan bsngags pa mtha' yas rgya mtsho 'dra kun la/ /thal mo sbyar ba bgyis te skyabs su nye bar mchi/ /shA ri'i bu/ de ltar byang chub sems dpas sangs rgyas bcom ldan 'das sum cu rtsa lnga po de dag la sogs pa de bzhin gshegs pa thams cad dang ldan pa'i yid la byed pa dag gis sdig pa thams cad rnam par dag par bya'o/ /de ltar sdig pa thams cad rnam par dag pa de la sangs rgyas bcom 232a @#/ /ldan 'das de dag nyid kyang sems can rnam par thar bar bya ba kho na'i phyir zhal nye bar ston par mdzad do/ /de bzhin du byis pa so so'i skye bo 'khrul pa rnams yongs su smin par bya ba'i phyir tshig 'bru rnam pa sna tshogs nye bar ston par byed kyang chos kyi dbyings las kyang mi g.yo la sems can mos pa sna tshogs dang ldan pa rnams mos pa ji lta ba bzhin du/ rnam par thar bar bya ba'i phyir smon lam yongs su rdzogs par byed do/ /shA ri'i bu/ de la byang chub sems dpa' sems dpa' chen po snying rje chen po'i ting nge 'dzin la snyoms par zhugs pa ni sems can yongs su smin par bya ba'i phyir/ sems can dmyal ba dang / dud 'gro'i skye gnas dang / gshin rje'i 'jig rten dang / lha ma yin gyi 'gro ba nye bar ston par byed do/ /byang chub sems dpa' sems dpa' chen po bkod pa chen po'i ting nge 'dzin la snyoms par zhugs pa ni sems can yongs su smin par bya ba'i phyir/ khyim bdag gi gzugs nye bar ston par byed do/ /byang chub sems dpa' sems dpa' chen po mchog gi ting nge 'dzin la snyoms par zhugs pa ni sems can yongs su smin par bya ba'i phyir/ 'khor los bsgyur ba'i gzugs nye bar ston par byed do/ /byang chub sems dpa' sems dpa' chen po gzi brjid drag po'i ting nge 'dzin la snyoms par zhugs pa ni 232b sems can yongs su smin par bya ba'i phyir/ brgya byin dang / tshangs pa'i gzugs nye bar ston par byed do/ /byang chub sems dpa' sems dpa' chen po rtse gcig pa'i ting nge 'dzin la snyoms par zhugs pa ni sems can yongs su smin par bya ba'i phyir/ nyan thos kyi gzugs nye bar ston par byed do/ /byang chub sems dpa' sems dpa' chen po gnyis su med pa'i ting nge 'dzin la snyoms par zhugs pa ni/ sems can yongs su smin par bya ba'i phyir rang sangs rgyas kyi gzugs nye bar ston par byed do/ /byang chub sems dpa' sems dpa' chen po zhi ba'i ting nge 'dzin la snyoms par zhugs pa ni/ sems can yongs su smin par bya ba'i phyir yang dag par rdzogs pa'i sangs rgyas kyi gzugs nye bar ston par byed do/ /byang chub sems dpa' sems dpa' chen po chos thams cad la dbang bsgyur ba'i ting nge 'dzin la snyoms par zhugs pa ni sems can yongs su smin par bya ba'i phyir mos pa ji lta ba bzhin du gzugs nye bar ston par byed de/ shA ri'i bu/ de ltar na skyes bu dam pa rnams ni sems can yongs su smin par bya ba'i phyir/ la lar ni brgya byin gyi gzugs/ la lar ni tshangs pa'i gzugs / la lar ni 'khor los bsgyur ba'i gzugs nye bar ston par yang byed la/ chos kyi dbyings las kyang mi g.yo'o/ /de ci'i phyir zhe na/ 'di lta ste/ byang chub sems dpa' ni sems can 233a @#/ /yongs su smin par bya ba'i phyir mos pa sna tshogs dang ldan pa'i sems can rnams la rnam par rig pa'i gzugs rnam pa sna tshogs nye bar ston par byed kyang de la bdag tu dmigs pa yang med/ sems can du dmigs pa yang med la/ sems can rnams la 'gro ba sna tshogs kyi gzugs nye bar ston par yang byed pa'i phyir ro| |shA ri'i bu/ 'di ji snyam du sems/ ri dwags kyi rgyal po seng ge'i sgra skad gang yin pa de/ byi las bzod par nus snyam mam/ shA ri'i bus gsol pa/ bcom ldan 'das/ de ni mi bzod lags so/ /bcom ldan 'das kyis bka' stsal pa/ shA ri'i bu/ 'di ji snyam du sems/ spos kyi glang po che'i khal gang yin pa de bong bus bzod par nus snyam mam/ shA ri'i bus gsol pa/ bcom ldan 'das/ de ni mi bzod lags so/ /bcom ldan 'das kyis bka' stsal pa/ shA ri'i bu/ 'di ji snyam du sems/ /brgya byin dang / tshangs pa dag gi gzi brjid kyi rgyal po gang yin pa de mi dbul pos bzod par nus snyam mam/ shA ri'i bus gsol pa dang / bcom ldan 'das/ de ni mi bzod lags so| |bcom ldan 'das kyis bka' stsal pa/ shA ri'i bu/ 'di ji snyam du sems/ bya'i rgyal po nam mkha' lding gi pha rol gnon pa gang yin pa de/ bya rgod kyi phru gus bzod par 233b nus snyam mam/ shA ri'i bus gsol pa/ bcom ldan 'das/ de ni mi bzod lags so/ /bcom ldan 'das kyis bka' stsal pa/ shA ri'i bu/ de bzhin du byang chub sems dpa' rnams kyis sems dpa' ba dang / dge ba'i rtsa ba'i stobs bskyed pa las byung zhing shes pa las rnam par byung ba'i nyes pa gang yin pa dang / nyes pa 'gyod pa'i gnas sangs rgyas mthong ba'i ting nge 'dzin la snyoms par 'jug pa thob pas rnam par sbyong ba gang yin pa de ni sems can thams cad dang / nyan thos dang / rang sangs rgyas kyi theg pa pa thams cad kyis rnam par sbyong bar mi nus so/ /byang chub sems dpa' ni sangs rgyas bcom ldan 'das de dag gi mtshan 'dzin cing yongs su brjod pa dang phung po gsum pa'i chos kyi rnam grangs nyin lan gsum mtshan lan gsum brjod pas nyes pa bgyid pa'i gnas la nges par 'gyur zhing ting nge 'dzin kyang thob par 'gyur ro// //bam po gnyis pa ste tha ma'o/ /de'i tshe na tshe dang ldan pa nye bar 'khor nang du yang dag 'jog las langs nas/ bcom ldan 'das ga la ba der song ste phyin pa dang / bcom ldan 'das kyi zhabs la mgo bos phyag 'tshal te| bcom ldan 'das la lan gsum bskor ba byas nas phyogs gcig tu 'dug go /phyogs gcig tu 'dug nas/ bcom ldan 'das la tshe dang ldan pa nye bar 'khor gyis 'di skad 234a @#/ /ces gsol to/ /bcom ldan 'das/ 'di na bdag gcig pu dben par mchis nas nang du yang dag par bzhag pa na sems la yongs su rtog pa 'di lta bu 'di skyes lags/ bcom ldan 'das kyis nyan thos kyi theg pa pa dang / rang sangs rgyas kyi theg pa pa rnams la ni so sor thar pa'i sdom pa/ lhag pa'i tshul khrims kyi bslab pa yongs su dag pa bcas la/ bcom ldan 'das kyis byang chub sems dpa'i theg pa pa rnams kyis ni srog gi phyir yang bslab pa yongs su mi gtong ngo zhes gsungs lags na/ bcom ldan 'das/ yongs su mya ngan las 'das sam bzhugs kyang rung ste/ nyan thos kyi theg pa pa rnams kyi so sor thar pa'i sdom pa ni ji ltar brjod par bgyi/ rang sangs rgyas kyi theg pa pa rnams kyi so sor thar pa'i sdom pa ni ji ltar brjod par bgyi/ theg pa chen po la yang dag par zhugs pa'i byang chub sems dpa' rnams kyi so sor thar pa'i sdom pa ni ji ltar brjod par bgyi/ bcom ldan 'das kyis bdag ni 'dul ba 'dzin pa rnams kyi mchog lags par bka' stsal na/ ci nas kyang bdag gis bcom ldan 'das las 'dul ba la mkhas pa mngon sum du thos shing mngon sum du bzung nas mi 'jigs pa thob cing 'khor rnams la rgya cher yang dag par ston par 'gyur ba de ltar/ bcom ldan 'das kyis bdag la rgya cher yang dag par bstan du gsol 234b bar bgyi lags so snyam ste/ bcom ldan 'das/ bdag gcig pu dben par gnas nas nang du yang dag par bzhag pa na/ sems la bdag de bzhin gshegs pa'i spyan sngar mchis la 'dul ba rnam par gtan la dbab pa yongs su zhu'o/ /snyam pa de lta bu'i yongs su rtog pa skyes par gyur lags na/ de'i slad du bcom ldan 'das de bzhin gshegs pas dge slong gi 'khor dang / byang chub sems dpa'i 'khor chen po 'dus pa la 'dul ba rnam par gtan la dbab pa rgya cher bstan du gsol/ de skad ces gsol pa dang / bcom ldan 'das kyis tshe dang ldan pa nye bar 'khor la 'di skad ces bka' stsal to/ /nye bar 'khor/ de'i phyir khyod kyis nyan thos kyi theg pa pa rnams kyi bslab pa ni sbyor ba gzhan dang / lhag pa'i bsam pa gzhan gyis yongs su dag pa yin par smros shig /theg pa chen po la yang dag par zhugs pa'i byang chub sems dpa' rnams kyi bslab pa yang sbyor ba gzhan dang / lhag pa'i bsam pa gzhan gyis yongs su dag pa yin par smros shig /de ci'i phyir zhe na/ nye bar 'khor/ nyan thos kyi theg pa pa rnams kyi sbyor ba yang gzhan/ lhag pa'i bsam pa yang gzhan la/ theg pa chen po la yang dag par zhugs pa'i byang chub sems dpa' rnams kyi sbyor ba yang gzhan| lhag pa'i bsam pa yang gzhan yin pa'i phyir ro/ /nye bar 'khor/ de la nyan thos kyi theg pa pa'i tshul khrims yongs su dag pa gang yin pa de ni theg pa chen po la yang dag par zhugs 235a @#/ /pa'i byang chub sems dpa'i tshul khrims yongs su ma dag pa nyid dang / shin tu 'tshal ba'i tshul khrims nyid yin la/ theg pa chen po la yang dag par zhugs pa'i byang chub sems dpa'i tshul khrims yongs su dag pa nyid gang yin pa de ni nyan thos kyi theg pa pa'i tshul khrims yongs su ma dag pa nyid dang / shin tu 'chal pa'i tshul khrims nyid yin no/ /de ci'i phyir zhe na/ nye bar 'khor/ 'di la nyan thos kyi theg pa ni de'i skad cig tsam yang srid par skye ba len par mi byed do/ /de ni nyan thos kyi theg pa pa'i tshul khrims yongs su dag pa nyid yin la/ de ni theg pa chen po la yang dag par zhugs pa'i byang chub sems dpa'i tshul khrims yongs su ma dag pa nyid dang / shin tu 'chal ba'i tshul khrims nyid yin pa'i phyir ro/ /nye bar 'khor/ theg pa chen po la yang dag par zhugs pa'i byang chub sems dpa'i tshul khrims yongs su dag pa nyid gang yin pa de ni nyan thos kyi theg pa pa'i tshul khrims yongs su ma dag pa nyid dang / shin tu 'chal pa'i tshul khrims nyid du gyur pa gang zhe na/ nye bar 'khor/ 'di la theg pa chen po la yang dag par zhugs pa'i byang chub sems dpa' bskal pa tshad med grangs med par srid par skye ba len kyang sems yongs su mi skyo zhing yongs su mi skyo ba de ni theg pa chen po la yang dag par zhugs pa'i byang chub sems dpa'i tshul khrims yongs su dag pa nyid yin la/ de ni nyan thos kyi theg pa pa'i tshul khrims yongs su ma dag pa 235b nyid dang / shin tu 'chal pa'i tshul khrims nyid yin no/ /nye bar 'khor/ de lta bas na khyod kyis theg pa chen po la yang dag par zhugs pa'i byang chub sems dpa' rnams kyi bslab pa ni rjes su bsrung ba dang bcas pa yin par smros shig /nyan thos kyi theg pa pa rnams kyi bslab pa ni rjes su bsrung ba med pa yin par smros shig /theg pa chen po la yang dag par zhugs pa'i byang chub sems dpa' rnams kyi bslab pa ni bcos su yod pa yin par smros shig /nyan thos kyi theg pa pa rnams kyi bslab pa ni bcos su med pa yin par smros shig /theg pa chen po la yang dag par zhugs pa'i byang chub sems dpa' rnams kyi bslab pa ni ring du rjes su zhugs pa yin par smros shig /nyan thos kyi theg pa pa rnams kyi bslab pa ni mthar chags pa yin par smros shig /nye bar 'khor/ 'di la ji ltar na theg pa chen po la yang dag par zhugs pa'i byang chub sems dpa' rnams kyi bslab pa rjes su bsrung ba dang bcas pa yin la/ nyan thos kyi theg pa pa rnams kyi bslab pa rjes su bsrung ba med pa yin zhe na/ nye bar 'khor/ 'di la theg pa chen po la yang dag par zhugs pa'i byang chub sems dpas ni sems can gzhan dag dang / gang zag gzhan dag gi sems kyi rjes su 'jug par bya dgos la/ nyan thos kyi theg pa pa rnams ni mi dgos te/ nye bar 'khor/ rnam grangs des na theg pa chen po la yang dag par zhugs pa'i byang chub sems dpa' rnams kyi bslab pa ni rjes su bsrung ba dang bcas pa yin la/ 236a @#/ /nyan thos kyi theg pa pa rnams kyi bslab pa ni rjes su bsrung ba med pa yin no/ /nye bar 'khor/ ji ltar na theg pa chen po la yang dag par zhugs pa'i byang chub sems dpa' rnams kyi bslab pa bcos su yod pa yin la/ nyan thos kyi theg pa pa rnams kyi bslab pa bcos su med pa yin zhe na/ nye bar 'khor/ 'di la theg pa chen po la yang dag par zhugs pa'i byang chub sems dpa' ni gal te snga dro'i dus kyi tshe nyes pa byung la/ gung tshigs kyi dus kyi tshe thams cad mkhyen pa nyid kyi sems dang ma bral bas gnas par byed na/ theg pa chen po la yang dag par zhugs pa'i byang chub sems dpa'i tshul khrims kyi phung po yongs su ma gtugs pa kho na yin no/ /gal te gung tshigs kyi dus kyi tshe nyes pa byung la/ phyi dro'i dus kyi tshe thams cad mkhyen pa nyid kyi sems dang ma bral bas gnas par byed na theg pa chen po la yang dag par zhugs pa'i byang chub sems dpa'i tshul khrims kyi phung po yongs su ma gtugs pa kho na yin no| |gal te phyi dro'i dus kyi tshe nyes pa byung la mtshan mo'i thun dang po la thams cad mkhyen pa nyid kyi sems dang ma bral bas gnas par byed na/ theg pa chen po la yang dag par zhugs pa'i byang chub sems dpa'i tshul khrims kyi phung po yongs su ma gtugs pa kho na yin no/ /gal te mtshan mo'i thun dang po la nyes pa byung la/ mtshan mo'i gung thun la thams 236b cad mkhyen pa nyid kyi sems dang ma bral bas gnas par byed na theg pa chen po la yang dag par zhugs pa'i byang chub sems dpa'i tshul khrims kyi phung po yongs su ma gtugs pa kho na yin no/ /gal te mtshan mo'i gung thun la nyes pa byung la/ mtshan mo'i thun tha ma la thams cad mkhyen pa nyid kyi sems dang ma bral bas gnas par byed na/ theg pa chen po la yang dag par zhugs pa'i byang chub sems dpa'i tshul khrims kyi phung po yongs su ma gtugs pa kho na yin no/ /nye bar 'khor/ de ltar na theg pa chen po la yang dag par zhugs pa'i byang chub sems dpa' rnams kyi bslab pa ni bcos su yod pa yin te/ de la ni byang chub sems dpas 'gyod pa'i kun nas ldang ba ha cang bskyed par mi bya zhing / ha cang yid la gcags par yang mi bya'o/ /nye bar 'khor/ de la nyan thos kyi theg pa pa yang dang yang du nyes pa byung na ni nyan thos kyi theg pa pa'i tshul khrims kyi phung po nyams pa dang / rab tu nyams pa dang / yongs su gtugs pa yin par rig par bya'o/ /de ci'i phyir zhe na/ nyan thos kyi theg pa pas ni nyon mongs pa thams cad spang pa'i phyir mgo dang gos la me 'bar ba lta bur bya dgos pa'i phyir te/ de ltar na nyan thos kyi theg pa pa lhag pa'i bsam pas yongs su mya ngan las 'da' bar 'dod pa rnams kyi bslab pa ni bcos su med pa yin no/ /nye bar 'khor/ ji ltar na theg pa chen po la yang dag par zhugs pa'i byang chub sems dpa' rnams kyi bslab pa ring du 237a @#/ /rjes su zhugs pa yin la/ nyan thos kyi theg pa pa rnams kyi bslab pa mthar chags pa yin zhe na/ nye bar 'khor/ 'di la gal te theg pa chen po la yang dag par zhugs pa'i byang chub sems dpa' bskal pa gang+gA'i klung gi bye ma snyed du 'dod pa'i yon tan lnga po dag gis rtse ba dang / dga' ba dang / dga' mgur spyad pa byas kyang byang chub kyi sems mi gtong na/ theg pa chen po la yang dag par zhugs pa'i byang chub sems dpa'i bslab pa yongs su ma gtugs pa kho na yin par rig par bya'o/ /de ci'i phyir zhe na/ nye bar 'khor| theg pa chen po la yang dag par zhugs pa'i byang chub sems dpa' byang chub kyi sems de nyid kyis legs par yongs su zin pa ni rmi lam na yang nyon mongs pa rnams kyis kun tu reg par mi 'gyur ba'i dus kyang yod/ skabs kyang yod par 'gyur ba dang / nye bar 'khor/ yang theg pa chen po la yang dag par zhugs pa'i byang chub sems dpas ni srid pa gcig gis nyon mongs pa thams cad zad par mi byed de/ byang chub sems dpa' dge ba'i rtsa ba yongs su smin pa rnams kyi nyon mongs pa dag ni rim gyis zad par 'gyur ba dang / nyan thos kyi theg pa pa dge ba'i rtsa ba yongs su smin pa mgo dang gos la me 'bar ba lta bur byed pas ni de'i skad cig tsam yang srid par skye ba bskyed par mi bya ba'i phyir te/ 237b nye bar 'khor/ de ltar na theg pa chen po la yang dag par zhugs pa'i byang chub sems dpa' rnams kyi bslab pa ni ring du rjes su zhugs pa yin la/ nyan thos kyi theg pa pa rnams kyi bslab pa ni mthar chags pa yin no/ /nye bar 'khor/ de lta bas na khyod kyis theg pa chen po la yang dag par zhugs pa'i byang chub sems dpa' rnams kyi bslab pa ni rjes su bsrung ba dang bcas pa dang / bcos su yod pa dang / ring du rjes su zhugs pa yin par smros shig /nyan thos kyi theg pa pa rnams kyi bslab pa ni rjes su bsrung ba med pa dang / bcos su med pa dang / mthar chags pa yin par smros shig /de ci'i phyir zhe na/ nye bar 'khor/ bla na med pa yang dag par rdzogs pa'i byang chub ni tshogs chen po dang ldan pa yin pas na/ theg pa chen po la yang dag par zhugs pa'i byang chub sems dpa' gcig tu skyobs ni bskal pa tshad med grangs med par mtshams sbyor zhing 'khor bar sla pa ma yin pa'i phyir te/ nye bar 'khor/ de bzhin gshegs pa dgra bcom pa yang dag par rdzogs pa'i sangs rgyas kyis don gyi dbang de gzigs pas na theg pa chen po la yang dag par zhugs pa'i byang chub sems dpa' rnams la gcig tu skyo ba'i gtam mi gsung / gcig tu 'dod chags dang bral ba'i gtam mi gsung / gcig tu yid 'byung ba'i gtam mi gsung bar dga' ba dang / mchog tu 238a @#/ /dga' ba dang ldan pa'i gtam gsung ngo / /zab pa dang / kun nas nyon mongs pa can ma yin pa dang / phra ba dang / brtags pa dang / 'gyod pa med pa dang / kun nas ldang ba med pa'i gtam gsung ngo / /thogs pa med pa dang / sgrib pa med pa dang / stong pa nyid kyi gtam gsung ste/ de dag gis gtam de dag thos nas mngon par dga' zhing 'khor bas yongs su mi skyo ba dang / bla na med pa yang dag par rdzogs pa'i byang chub chags pa med pa yang yongs su rdzogs par byed do/ /de nas bcom ldan 'das la tshe dang ldan pa nye bar 'khor gyis 'di skad ces gsol to/ /bcom ldan 'das/ nongs ba gang lags pa de dag las kha cig ni 'dod chags dang mtshungs par ldan pa lags/ kha cig ni zhe sdang dang mtshungs par ldan pa lags/ kha cig ni gti mug dang mtshungs par ldan par gsungs pa lags na/ bcom ldan 'das/ de dag las ci 'dod chags dang mtshungs par ldan pa'am/ 'on te zhe sdang dang mtshungs par ldan pa'am/ 'on te gti mug dang mtshungs par ldan pa'am/ gang zhig theg pa chen po la yang dag par zhugs pa'i byang chub sems dpa'i nongs pa shin tu lci bar 'gyur ba lags/ de skad ces gsol pa dang / bcom ldan 'das kyis tshe dang ldan pa nye bar 'khor la 'di skad ces bka' stsal to/ /nye bar 'khor/ gal te theg 238b pa chen po la yang dag par zhugs pa'i byang chub sems dpa' la 'dod chags dang mtshungs par ldan pa'i nyes pa bskal pa gang+gA'i klung gi bye ma snyed du byung bar gyur la/ zhe sdang dang mtshungs par ldan pa'i nyes pa gang yin pa de ni gcig gcig byung bar gyur na yang / byang chub sems dpa'i theg pa tshad mar byas na zhe sdang dang mtshungs par ldan pa'i nyes pa gang yin pa de ni 'dod chags dang mtshungs par ldan pa'i nyes pa de dag pas ches nyes pa lci bar 'gyur ro/ /de ci'i phyir zhe na/ nye bar 'khor/ zhe sdang ni sems can yongs su gtong bar 'gyur ba yin la/ 'dod chags ni sems can sdud par 'gyur ba yin te/ nye bar 'khor/ de la sems can sdud par 'gyur ba'i nyon mongs pa gang yin pa de la ni byang chub sems dpa'i sgyu bag dang / 'jigs pa med la/ sems can yongs su gtong bar 'gyur ba'i nyon mongs pa gang yin pa de la ni byang chub sems dpa'i sgyu bag dang / 'jigs pa yod pa'i phyir ro/ /nye bar 'khor/ yang de bzhin gshegs pas 'dod chags ni 'bral ba bul la| kha na ma tho ba dang bcas pa chung ba dang / zhe sdang ni 'bral ba myur la/ kha na ma tho ba dang bcas pa che ba dang / gti mug 'bral ba bul la/ kha na ma tho ba dang bcas pa che bar gsungs pa gang yin pa de la/ nye bar 'khor/ 'bral ba bul la kha na mtho ba dang bcas pa chung ba gang yin pa de ni byang chub sems dpa'i nyon mongs pa ma yin par blta'o/ /'bral ba myur la kha na ma tho ba dang bcas pa che ba 239a @#/ /gang yin pa de ni byang chub sems dpa'i nyon mongs pa yin pas/ rmi lam na yang 'dod par mi bya'o/ /nye bar 'khor/ de lta bas na khyod kyis byang chub sems dpa' rnams la 'dod chags dang mtshungs par ldan pa'i nyes pa gang de dag yin pa de dag la ni byang chub sems dpa'i sgyu bag dang / nyes pa med pas de dag thams cad ni nyes pa ma yin par smros shig| zhe sdang dang mtshungs par ldan pa'i nyes pa gang dag yin pa de dag la ni byang chub sems dpa'i sgyu bag dang / nyes pa yod pas de dag thams cad ni nyes pa yin par smros shig/ nye bar 'khor| de la byang chub sems dpa' gang dag thabs la mi mkhas pa de dag ni 'dod chags dang mtshungs par ldan pa'i nyes pa dag 'jigs par byed la/ zhe sdang dang mtshungs par ldan pa dag gis ni 'jigs par mi byed do/ /byang chub sems dpa' gang dag thabs la mkhas pa de dag ni zhe sdang dang mtshungs par ldan pa'i nyes pa dag gis 'jigs par byed la/ 'dod chags dang mtshungs par ldan pa dag gis ni 'jigs par mi byed do/ /de nas 'jam dpal gzhon nur gyur pa 'khor de nyid du 'dus par gyur te 'dug pa des bcom ldan 'das la 'di skad ces gsol to/ /bcom ldan 'das/ shin tu dul ba'i chos thams cad la 'dul ba ci zhig mchis/ de skad ces gsol pa dang / bcom ldan 'das kyis 'jam dpal gzhon nur gyur pa la 239b 'di skad ces bka' stsal to/ /'jam dpal/ gal te byis pa so so'i skye bo rnams kyis chos thams cad shin tu dul bar shes na ni de bzhin gshegs pa yang dang yang du 'dul ba 'cha' bar mi mdzad pa zhig na/ gang gi phyir sems can rnams kyis mi shes pa de'i phyir/ de bzhin gshegs pa yang chos thams cad shin tu dul ba rtogs par bya ba'i phyir rim gyis bya ba'i 'dul ba 'cha' bar mdzad do| |de nas bcom ldan 'das la tshe dang ldan pa nye bar 'khor gyis 'di skad ces gsol to/ /bcom ldan 'das/ 'jam dpal gzhon nur gyur pa 'di 'dul ba rnam par gtan la dbab pa bstan pa bshad pa 'di la ci yang mi ston lags na/ bcom ldan 'das/ de'i slad du bcom ldan 'das kyis 'jam dpal gzhon nur gyur pa 'di bstan pa 'ga' zhig legs par ston par mdzad du gsol| de nas bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal/ dge slong nye bar 'khor 'dul ba la mkhas pa nyan par 'dod kyi/ shin tu dul ba las rtsoms la khyod spobs par gyis shig /de nas 'jam dpal gzhon nur gyur pas tshe dang ldan pa nye bar 'khor la 'di skad ces smras so/ /btsun pa nye bar 'khor/ chos thams cad ni shin tu dul ba ste| rang gi sems gdul ba'i phyir shin tu dul ba kun du ston to/ /chos thams cad ni kun nas nyon mongs pa can ma yin pa ste/ bdag mi dmigs pa'i phyir 'gyod pa 'dul ba kun du ston to/ /chos thams 240a @#/ /cad ni phyin ci ma log pa ste/ rang bzhin gyis yongs su dag pa'i phyir shin tu dul ba kun du ston to/ /chos thams cad ni de bzhin nyid kyi mtha'i sgo yin te| bslab pa la rlom sems med par bya ba'i phyir bslab pa yongs su dag pa kun du ston to/ /chos thams cad ni rnam par mi rtog pa dang / blang ba med pa dang / dor ba med pa ste/ bsam gyis mi khyab pas chags pa med pa nyid du kun du ston to/ /chos thams cad ni chags pa med pa dang / gnas med pa ste/ yun ring du mi gnas pa'i phyir 'gro ba thams cad yongs su dag pa kun du ston to/ /chos thams cad ni nam mkha'i mtha' la gnas pa ste/ dngos po dang bral ba'i phyir rang bzhin med pa nyid kun du ston to/ /chos thams cad ni tha dad du bya ba med par gyur pa ste/ sngon gyi mtha' dang / phyi ma'i mtha' dang / da ltar byung ba mi dmigs pa'i phyir dus gsum mnyam pa nyid kun du ston to/ /chos thams cad ni gdags pa dang bral ba ste/ sems mnyam pa nyid du spyod pa'i phyir the tshom spang pa kun du ston to/ /btsun pa nye bar 'khor/ de ni sangs rgyas bcom ldan 'das rnams kyi rjes su rtogs pa chos kyi dbyings shin tu dul ba yin te/ rigs kyi bu dang rigs kyi bu mo gang dag chos nyid 'di la ma mos pa de dag ni/ de bzhin gshegs pa'i bslab pa las ring du gyur pa yin no/ /de nas bcom ldan 'das la 240b tshe dang ldan pa nye bar 'khor gyis 'di skad ces gsol to/ /bcom ldan 'das/ 'jam dpal gzhon nur gyur pa ni gang dang gang ston pa de dag thams cad bsam gyis mi khyab pa kho na las brtsams te ston lags so/ /de skad ces gsol pa dang / bcom ldan 'das kyis tshe dang ldan pa nye bar 'khor la 'di skad ces bka' stsal to/ /nye bar 'khor/ 'jam dpal gzhon nur gyur pa'i chos ston pa ni rnam par grol ba'i rgyu mthun pa yin te/ bsam gyis mi khyab pa nyid la ma brten par rnam par grol ba med pas na/ de'i phyir 'jam dpal gzhon nur gyur pa ni rnam par rtog pa thams cad dang bral ba dang / sems pa la mos pa lhag pa'i nga rgyal can rnams kyi lhag pa'i nga rgyal med par bya ba'i phyir chos ston to/ /de nas bcom ldan 'das la tshe dang ldan pa nye bar 'khor gyis 'di skad ces gsol to/ /bcom ldan 'das/ dge slong sems gang dang mtshungs par ldan na lhag pa'i nga rgyal can lags/ de skad ces gsol pa dang / bcom ldan 'das kyis tshe dang ldan pa nye bar 'khor la 'di skad ces bka' stsal to/ /nye bar 'khor/ 'di la dge slong gal te 'dod chags spang bar sems na lhag pa'i nga rgyal la spyod pa yin no/ /gal te zhe sdang spang ba dang / gti mug spang bar sems na lhag pa'i nga rgyal la spyod pa yin no/ /gal te 'dod chags kyi chos kyang gzhan la/ sangs rgyas kyi chos kyang 241a @#/ /gzhan no zhes de snyam du sems na lhag pa'i nga rgyal la spyod pa yin no/ /gal te zhe sdang gi chos kyang gzhan la/ sangs rgyas kyi chos kyang gzhan pa dang / gti mug gi chos kyang gzhan la/ sangs rgyas kyi chos kyang gzhan no zhes de snyam du sems na lhag pa'i nga rgyal la spyod pa yin no/ /gal te dga' ba la sems na lhag pa'i nga rgyal la spyod pa yin no/ /bya ba la sems na lhag pa'i nga rgyal la spyod pa yin no/ /rnam par grol ba la sems na lhag pa'i nga rgyal la spyod pa yin no/ /stong pa nyid la sems na lhag pa'i nga rgyal la spyod pa yin no/ /mtshan ma med pa la sems na lhag pa'i nga rgyal la spyod pa yin no/ /smon pa med pa la sems na lhag pa'i nga rgyal la spyod pa yin no/ /mngon par 'du bya ba med pa la sems na lhag pa'i nga rgyal la spyod pa yin no/ /skye ba med pa la sems na lhag pa'i nga rgyal la spyod pa yin no/ /dngos po med pa la sems na lhag pa'i nga rgyal la spyod pa yin no/ /gal te chos rnams yod do snyam du sems na lhag pa'i nga rgyal la spyod pa yin no/ /chos thams cad mi rtag go snyam du sems na lhag pa'i nga rgyal la spyod pa yin no/ /chos thams cad stong pa la yang bya ba ci yod ces de snyam du sems na lhag pa'i nga rgyal la spyod pa yin no/ /de ni nyan thos kyi theg pa pa'i lhag pa'i nga rgyal yin no/ /de la byang chub sems dpa'i theg pa pa'i lhag pa'i 241b nga rgyal gang zhe na/ gal te bdag gis thams cad las khyad par du 'phangs pa sangs rgyas kyi ye shes la sems bskyed do zhes de snyam sems na lhag pa'i nga rgyal la spyod pa yin no/ /gal te pha rol tu phyin pa drug la spyad par bya'o zhes de snyam sems na lhag pa'i nga rgyal la spyod pa yin no/ /gal te shes rab kyi pha rol tu phyin pa la nges par 'byung ba yin par sems te/ de snyam du sems na lhag pa'i nga rgyal la spyod pa yin no/ gal te 'di ni zab pa'o/ /'di ni zab pa ma yin no zhes de snyam sems na lhag pa'i nga rgyal la spyod pa yin no/ /gal te 'dis ni rnam par dag par 'gyur la/ 'dis ni rnam par dag par mi 'gyur ro zhes de snyam sems na lhag pa'i nga rgyal la spyod pa yin no/ /gal te 'di dag ni sangs rgyas kyi chos so/ /'di dag ni rang sangs rgyas kyi chos so// 'di dag ni nyan thos kyi chos so zhes de snyam sems na lhag pa'i nga rgyal la spyod pa yin no/ /gal te 'di ni rigs so/ /'di ni mi rigs so zhes de snyam sems na lhag pa'i nga rgyal la spyod pa yin no| |gal te 'di ni kun nas nyon mongs pa can yin no/ /'di ni kun nas nyon mongs pa can ma yin no zhes de snyam sems na lhag pa'i nga rgyal la spyod pa yin no/ /gal te 'di ni lam yin no/ /'di ni lam ma yin no zhes de snyam sems na lhag pa'i nga rgyal la spyod pa yin no/ /gal te myur du bla na med pa yang dag par rdzogs pa'i byang chub tu mngon par 'tshang rgya bar bya'o zhes de snyam sems 242a @#/ /na lhag pa'i nga rgyal la spyod pa yin no/ /gal te chos thams cad ni bsam gyis mi khyab pa yin pas 'di la bsam par bya ba med do zhes de snyam sems na lhag pa'i nga rgyal la spyod pa yin no/ /gal te bla na med pa yang dag par rdzogs pa'i byang chub ni bsam gyis mi khyab pa yin pas bsam par bya ba ci yang med do zhes de snyam sems na dmigs pa chen po yin te/ de ni byang chub sems dpa'i theg pa pa'i lhag pa'i nga rgyal yin no/ /de skad ces bka' stsal pa dang / bcom ldan 'das la tshe dang ldan pa nye bar 'khor gyis 'di skad ces gsol to/ /bcom ldan 'das/ ji tsam gyis na dge slong lhag pa'i nga rgyal ma mchis pa lags/ de skad ces gsol ba dang / bcom ldan 'das kyis tshe dang ldan pa nye bar 'khor la 'di skad ces bka' stsal to/ /nye bar 'khor/ dge slong gang thams cad mkhyen pa'i ye shes kyis rgyu mthun pa bsam gyis mi khyab pa nyid la mngon par zhen par mi byed na| de ni shin tu lhag pa'i nga rgyal med pa yin no/ /de nas bcom ldan 'das bsam gyis mi khyab pa de nyid rgya cher ston cing de'i tshe tshigs su bcad pa 'di dag bka' stsal to/ / gang dag bsam yas chos rnams 'di shes pa'i/ /mi rnams de dag rtag tu bde ba yin/ /chos dang chos min rnam rtog med pa ste/ /thams cad sems kyi spros pas phye ba 242b yin/ /thams cad bsam yas thams cad byung min pas/ /dngos dang dngos med shes pa rnam par zhig /byis pa gang dag sems kyi dbang song ba/ /de dag srid pa bye ba brgyar sdug bsngal/ /dge slong gang dag bsam yas yod min pa'i/ /sangs rgyas mi mchog de sems tshul bzhin min/ /rtog pa'i dbang gis sangs rgyas rnam par brtags/ /rtog pa de yang nam yang byung ma yin/ /gang dag chos rnams stong la sems byed pa'i/ /byis pa de dag lam ngan zhugs pa yin/ /chos rnams stong pa yi ges brjod pa ni/ /de dag yi ge med par ye shes bstan/ /gang dag zhi zhing rab zhi'i chos sems pa'i/ /sems dpa' de yang nam yang byung ma yin/ /spros kun sems kyi rnam par rtog yin te/ /de phyir chos rnams bsam yas rtogs par gyis/ / chos 'di thams cad sems med sems pa med/ /ji srid mi sems de srid stong pa yin/ /mi gang stong la sems par byed 'dod pa/ /bsam yas kun la phyir zhing sims pa yin/ /mig ni thams cad ldan na mthong 'gyur te/ /mig gis gzugs rnams mthong ba gang yin pa'ang / /mtshan mo rkyen rnams med na mthong mi 'gyur/ /de phyir ldan dang bral ba rnam rtog yin/ /mig ni snang lam brten te yid 'ong dang / /yid du mi 'ong sna tshogs gzugs mthong bas/ /de ltar ldan las brten te mthong bas na/ /de phyir mig gis nam yang 243a @#/ /mthong ba med/ /yid du 'ong ba'i sgra grags gang yin pa/ /de yang nam yang nang du zhugs pa med/ /der 'gro dmigs su yod pa ma yin te/ /rtog pa'i dbang gis sgra rnams byung ba yin/ /chos rnams 'di dag yi ge'i sgra skad kyis/ /grangs dang tha snyad gdags par bstan pa yin/ /chos dang chos min nam yang yod min yang / /skye bo byis pa rnams la de mi snang / /sbyin pa'i bsngags pa 'jig rten ngas brjod kyang / /ser sna'i chos de'ang dmigs su yod ma yin/ /de ltar rgyal ba'i chos rnams bsam yas te/ /de yang dmigs med de yang mthong ba med/ /tshul khrims bya pa dag pa ngas bshad kyang / /'chal pa'i tshul khrims mkha' la lag pa bzhin/ /tshul khrims ngan pa thams cad mkha' 'dra ste/ /gang dag tshul bzang de yang de dang 'dra/ /bzod pa gya nom nga yis bshad byas kyang / /de yi rang bzhin na ma yang mthong ba med/ /'di na chos 'ga'ang 'khrug pa yod min yang / /bzod pa de yang rgyal bas rab tu bshad/ /nyin mtshan bag yod bya phyir nga yis ni/ /mi nyal dam pa bsngags pa brjod byas te/ /bskal pa brgya snyed brtson 'grus bskyed byas kyang / /'phel bar mi 'gyur zad pa yod ma yin/ /bsam gtan rnam thar ting 'dzin gya nom pa'i/ /ji bzhin sgo dag 'gro la bstan byas te/ /'di la chos 'ga'ang zad pa yod min yang / /de dag cha shas phye 243b ste rab tu bstan/ /shes rab chos rnams shes par gyis shig ces/ /shes rab lhag mthong blo gros ngas bstan kyang / /rang bzhin rang bzhin med pa nam du yang / /shes par mi nus de yang nges par bstan/ /rab dben mchog shes sbyangs la dga' gyis zhes/ /dka' thub ngan pa 'jig rten ngas bshad kyang / /mchog shes yongs su mi 'thob gang yin pa/ /chos de 'dir ni dmigs su yod ma yin/ /sems dmyal 'jigs pa nga yis bstan byas te/ /sems can stong phrag du ma skyob byas kyang / /gang dag shi 'phos ngan song drag 'gro ba'i/ /'gro ba de dag nam yang yod ma yin/ /gang dag ral gri mda' chen mtshon 'byin pa'i/ /gnod pa byed pa yod pa ma yin te/ /rtog pa'i dbang gis ngan song de dag na/ /lus la 'bab mthong de na mtshon cha med/ /sna tshogs yid dga' me tog kha bye zhing / /gser gyi khang mchog 'bar ba yid 'ong ba/ /'di na de la'ang byed pa 'ga' med de/ /de dag rtog pa'i dbang gis bzhag pa yin/ /rtog pa'i dbang gis 'jig rten rnam brtags te/ /'du shes 'dzin pas byis pa rnam par bye/ /'dzin dang 'dzin med de yang byung min te/ /yongs su rtogs pa sgyu ma smig rgyu bzhin/ / 'gro don byang chub phyir ni sems bskyed ces/ /spyod mchog khyad par 'phags pa bstan byas kyang / /byang chub nam yang dmigs su yod min te/ /'dod pa gang yin de yang yod ma yin/ /sems 244a @#/ /ni rang bzhin 'od gsal rnam dag cang / /rngul med rngul bral dri ma med par gsungs/ /byis pa yod pa min la rnam rtog pa/ /chags gyur sdang bar 'gyur zhing rmongs par 'gyur/ /mnyam gzhag gya nom chos ni thob 'gyur na/ /'dod chags yod min sdang med rmongs pa'ang med/ /'dod chags bral zhing rnam par grol ba'i chos/ /kun gzhir ma gyur mya ngan 'das pa thob/ /mkha' 'dra'i chos rnams 'di dag shes gyur na/ /zhing brgya rnams su thogs med 'gro 'gyur zhing / /de dag yid kyang chags pa med 'gyur bas/ /de phyir thogs med lam ni bskyed par gyis/ /bskal pa brgya phrag mang por spyad byas shing / /sems can brgya phrag mtha' yas grol byas kyang / /nam yang sems can dmigs su yod min zhing / /zad pa'ang yod min mtha' yas gyur pa'ang med/ /ji ltar sgyu ma mkhan gyis 'jig rten na/ /sems can brgya phrag mang po sprul byas te/ /sprul pa de dag thams cad bsad gyur kyang / /sgyu ma de dag bsad pa yod min ltar/ /'gro ba 'di kun sgyu ma'i rang bzhin te/ /'di la mtha' ni nam yang dmigs su med/ /gang dag de ltar mtha' yas mos byed pa| |de dag 'jig rten na ni tshor ba med/ /gang dag rang bzhin med chos 'di shes pa/ /dpa' bo de dag 'jig rten mya ngan 'da'/ /'dod pa'i yon tan spyod kyang chags med cing / 244b chags pa rnam spangs sems can 'dul bar byed/ /'di na sems can 'ga' med srog med kyang / /mi dbang rnams ni sems can phan pa mdzad/ /sems can yod ma yin yang don mdzad pa// de dag rnams kyi de ni dka' ba che/ /ji ltar chang pa bcangs te byis pa la/ /ston cing lag tu yod ces brjod byas nas/ /de yis chang pa stong pa mthong nas ni/ /byis pa de ni cho nges ngu ba ltar/ / de bzhin sangs rgyas bsam gyis mi khyab pa/ /sems can tshul la mkhas shing mkhyen pa rnams/ /chos rnams 'di dag gsob gsog mkhyen gyur nas/ /'jig rten dag la dngos po bstan pa ston/ /shin tu dga' ba'i bstan pa 'di la ni/ /khyim pa'i rtags spangs rab tu 'byung gyis la/ /'bras bu yod pa'i mchog tu 'gyur gyis zhes/ /thugs rje can gyis de skad bstan pa'ang mdzad/ /khyim pa'i rtags spangs rab tu byung gyur nas/ /'bras bu thams cad thob par 'gyur yang ni/ /chos kyi rang bzhin dag la gzhal byas na/ /'bras bu kun med 'bras bu thob pa'ang med| |'on kyang 'bras bu thob pa thob gyur pa/ /kye ma mi mchog thugs rje ldan pa yi/ /rgyal bas rigs pa shin tu legs bshad ces/ /de dag ngo mtshar che ba skye bar 'gyur/ /de ltar zhi ba'i chos rnams de dag la/ /'di dag dbang po bsam gtan rnam dag dang / /stobs dang byang chub yan lag zhi ba zhes/ /ming dang tshig stong snyed kyi bstan pa mdzad/ /dbang po 245a @#/ /'ga' yang ma skyes stobs kyang min/ /byang chub yan lag zhi ba'ang ma skyes te/ /chos 'di gzugs can ma yin gzugs med kyang / /'jig rten dag la shes pa'i stobs kyang bshad/ /'gro ba rnams la thob pa ngas bshad pa/ /de kun mtshan ma rnam par spangs pa yin/ /'di na gang dag bdag gis thob sems pa/ /de ni ma thob thob par rlom sems byed/ /'jig rten dag na gang dag ngoms med pa/ /de la thob pa 'ga' yang yod ma yin/ /thob dang thob med 'gro la ston mdzad pa/ /gang gis de ltar shes pa de thob yin/ kun las khyad zhugs 'bras bu thob pa yi/ /sems can de ngas sems can med par bstan/ /de la sems can nam yang dmigs med de/ /sems can med na gang gis 'thob par 'gyur/ /zhing dngos gang la sa bon yod min pa/ /de la myu gu skye ba med pa ltar/ /de bzhin sems can nam yang dmigs su med/ /sems can med la thob pa ga la yod/ /sems can 'di kun mya ngan 'das pa ste/ /'di la rtsa ba nam yang dmigs su med/ /gang zhig chos tshul 'di la mos gyur pa/ /de ngas lhag med mya ngan 'das par bstan/ /sangs rgyas brgya mang yang dag 'das gyur pa/ /de dag gis kyang sems can kun ma btul/ /gal te sems can 'ga' 'dir byung gyur na/ /de dag nam yang mya ngan 'da' mi 'gyur/ / 245b de ltar lam 'di sgrib pa yod min te/ /de la nam yang chags pa yong ma yin/ /gang dag chos nyid 'di la mos gyur pa/ /de dag yid ni sred la chags mi 'gyur/ /bcom ldan 'das kyis tshigs su bcad pa bsgrubs pa bstan pa 'di bshad pa na/ dge slong lhag pa'i nga rgyal can nyis brgya len pa med par zag pa rnams las sems rnam par grol lo/ /byang chub sems dpa' drug khris ni mi skye ba'i chos la bzod pa thob par gyur to/ /de nas bcom ldan 'das la tshe dang ldan pa nye bar 'khor gyis 'di skad ces gsol to/ /bcom ldan 'das/ chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ nye bar 'khor/ de'i phyir khyod kyis chos kyi rnam grangs 'di 'dul ba rnam par gtan la dbab pa zhes bya ba gzung zhig /sems can thams cad yang dag par 'joms pa zhes bya bar yang gzung zhig /bcom ldan 'das kyis de skad ces bka' stsal pa dang / tshe dang ldan pa nye bar 'khor dang / 'jam dpal gzhon nur gyur pa dang / byang chub sems dpa' de dag dang / dge slong de dag dang / thams cad dang ldan pa'i 'khor de dang / lha dang mi dang lha ma yin dang / dri zar bcas pa'i 'jig rten yi rangs te bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs kyi le'u stong phrag brgya pa 246a @#/ /las/ 'dul ba rnam par gtan la dbab pa nye bar 'khor gyis zhus pa'i le'u zhes bya ste/ 'dus pa nyi shu bzhi pa rdzogs so// //rgya gar gyi mkhan po dzi na mi tra dang / pradz+nyA barma dang / su ren+d+ra bo d+hi dang / zhus chen gyi lots+tsha ba ban+d+he ye shes sde la sogs pas bsgyur cing zhus te gtan la phab pa// |