rgya gar skad du/ AR+Ya shrI ma hA de bi byA ka ra Na/ bod skad du/ 'phags pa lha mo chen mo dpal lung bstan pa/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig ni/ bcom ldan 'das bde ba can na byang chub sems 103a @#/ /dpa'i dge 'dun chen po 'di lta ste/ byang chub sems dpa' sems dpa' chen po spyan ras gzigs dbang phyug dang / byang chub sems dpa' sems dpa' chen po mthu chen thob pa dang / byang chub sems dpa' sems dpa' chen po sgrib pa thams cad rnam par sel ba dang / byang chub sems dpa' sems dpa' chen po sa'i snying po dang / byang chub sems dpa' sems dpa' chen po kun tu bzang po dang / byang chub sems dpa' sems dpa' chen po nam mkha'i snying po dang / byang chub sems dpa' sems dpa' chen po lag na rdo rje dang / byang chub sems dpa' sems dpa' chen po 'jigs pa thams cad sel ba dang / de bzhin du byang chub sems dpa' sems dpa' chen po dag byed kyi bkra shis thams cad 'dzin pa dang / byang chub sems dpa' sems dpa' chen po bsod nams kyi mtshan thams cad 'dzin pa dang / byang chub sems dpa' sems dpa' chen po nyi zla dang / 'jig rten 'dzin pa dang / byang chub sems dpa' sems dpa' chen po mu stegs kyi bkra shis thams cad 'dzin pa dang / byang chub sems dpa' sems dpa' chen po 'jam dpal gzhon nur gyur pa dang / de la sogs pa bskal pa bzang po'i byang chub sems dpa' sems dpa' chen po thams 103b cad dang thabs cig tu bzhugs so/ /de nas byang chub sems dpa' sems dpa' chen po spyan ras gzigs dbang phyug bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go /lha mo chen po dpal yang bcom ldan 'das kyi thad du song ste phyin nas bcom ldan 'das kyi zhabs la mgo bos phyag 'tshal te lan gsum bskor ba byas nas bde ba can na gnas pa'i byang chub sems dpa' sems dpa' chen po de dag la yang mgo bos phyag 'tshal te phyogs gcig tu 'dug go/ /de nas bcom ldan 'das bsod nams brgya stong du mas brgyan cing / de bzhin gshegs pa bye ba dag gis yongs su bskor te brgya byin dang / tshangs pa dang / 'jig rten skyong ba thams cad kyis bstod cing bsngags so/ /lha mo chen mo dpal la gzigs nas tshangs pa chen po'i gsung gis byang chub sems dpa' sems dpa' chen po spyan ras gzigs dbang phyug la 'di skad ces bka' stsal to/ /spyan ras gzigs dbang phyug /rgyal po'am/ blon po'am/ dge slong ngam/ dge slong ma'am/ dge bsnyen nam/ dge bsnyen ma'am/ bram ze'am/ rgyal rigs sam/ rje'u rigs sam/ dmangs rigs gang la la lha mo chen mo dpal gyi ming brgya 104a @#/ /rtsa brgyad dri ma med par grags pa zhes bya ba'i bstod pa 'di 'chang na/ rgyal rigs kyi rgyal po de'i yul dang / sems can de dag gi 'jigs pa dang / yams kyi nad gnod pa thams cad zhi bar 'gyur zhing chom rkun dang / g.yo can dang / mi dang / mi ma yin pa'i 'jigs pa thams cad 'byung bar mi 'gyur te/ nor dang / 'bru dang / mdzod dang / bang ba thams cad rnam par 'phel bar 'gyur ro/ /rgyal rigs kyi rgyal po de'i khyim du yang dpal nges par gnas par 'gyur ro/ /de nas byang chub sems dpa' sems dpa' chen po de dag gis tshig 'di skad ces gsol to/ /bcom ldan 'das/ /gsung 'di legs par bka' stsal pa legs so legs so/ /legs te/ gang dag lha mo chen mo dpal gyi ming rnams 'dzin pa dang / thos nas kyang sgrub par bgyid pa de dag gi yon tan dang / pan yon ni/ /de dag lags so/ /de nas byang chub sems dpa' sems dpa' chen po 'phags pa spyan ras gzigs dbang phyug gis bcom ldan 'das la 'di skad ces gsol to/ / bcom ldan 'das/ lha mo dpal gyis dge ba'i rtsa ba gang du bskyed pa lags/ bcom ldan 'das kyis bka' stsal pa/ lha mo chen mo dpal gyis de bzhin gshegs 104b pa gang+gA'i klung gi bye ma snyed la dge ba'i rtsa ba bskyed de/ spyan ras gzigs dbang phyug /sngon byung ba 'das pa'i dus na 'jig rten gyi khams rin po che las byung ba zhes bya ba na de bzhin gshegs pa rin po che'i me tog yon tan gyi rgya mtsho bai DUR+Ya dang / gser gyi ri bo mdog mdzes gser 'od dpal zhes bya ba 'jig rten du byung ste/ de bzhin gshegs pa mang po gzhan dag la yang lha mo chen mo dpal gyis dge ba'i rtsa ba bskyed do/ /de bzhin gshegs pa'i mtshan 'di dag kyang lha mo chen mo dpal de'i dge ba'i rtsa ba rnam par 'phel ba dang / 'grub par byed pa dang / rtag tu rjes su 'brang ba yin te/ de dag ni/ 'dir lha mo dpal yang dag par brjod pa dang / sdig pa thams cad sel ba dang / nyes sdig thams cad med par byed pa dang / lus thams cad dri ma med par byed pa dang / nor dang / 'bru rnams 'du zhing 'phel bar byed pa dang / dbul ba gcod par byed pa dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po thams cad 'dun par byed cing 'gugs par byed pa dang / yams kyi nad dang / gnod pa dang / 'thab pa dang / 'khrug pa dang / 'gyed pa dang / rtsod pa thams cad zhi bar byed pa dang / pha rol tu phyin pa drug sgrub par 105a @#/ /byed pa'o/ /'di lta ste/ de bzhin gshegs pa dpal stug po la phyag 'tshal lo/ /de bzhin gshegs pa rin po che'i me tog yon tan gyi rgya mtsho bai DUR+Ya dang / gser gyi ri bo mdog mdzes gser 'od dpal la phyag 'tshal lo/ /de bzhin gshegs pa gang+gA'i mu stegs kyi sgo thams cad bkra shis kyi dpal la phyag 'tshal lo/ /de bzhin gshegs pa tsan+dan gyi me tog gzi brjod skar ma'i 'od kyi dpal la phyag 'tshal lo/ /de bzhin gshegs pa kun tu snang ba g.yul las rnam par rgyal ba'i dpal la phyag 'tshal lo/ /de bzhin gshegs pa yon tan rgya mtsho snang ba'i dkyil 'khor gyi dpal la phyag 'tshal lo/ /de bzhin gshegs pa chos kye cho 'phrul rgyal mtshan shugs kyi dpal la phyag 'tshal lo/ /de bzhin gshegs pa skar 'od zhi ba'i spos snang dpal la phyag 'tshal lo/ /de bzhin gshegs pa sems can gyi bsam pa zhi bar mdzad pa'i sku'i dpal la phyag 'tshal lo/ /de bzhin gshegs pa smon lam rgya mtshos snang ba'i dpal la phyag 'tshal lo/ /bcom ldan 'das de bzhin gshegs pa shin tu yongs su brjod pa mtshan gsol dpal la phyag 'tshal lo/ /de bzhin gshegs pa phyir mi ldog pa'i 'khor lo rin po che'i gnas 105b kyi dpal la phyag 'tshal lo/ /de bzhin gshegs pa nyi ma'i dkyil 'khor 'od 'phags pa dpal la phyag 'tshal lo/ /de bzhin gshegs pa brtson 'grus grangs med pa la yang dag par rdzogs pa'i dpal la phyag 'tshal lo/ /de bzhin gshegs pa dpag tu med pa'i gser mchog snang ba'i dpal la phyag 'tshal lo/ /de bzhin gshegs pa gsung gi yan lag thams cad kyi sgra dbyangs kyi dpal la phyag 'tshal lo/ /de bzhin gshegs pa shes rab sgron ma grangs med pa'i 'od kyi tog gi dpal la phyag 'tshal lo/ /de bzhin gshegs pa sred med kyi bu'i brtul zhugs kyi cho ga lhun po'i dpal la phyag 'tshal lo/ /de bzhin gshegs pa tshangs pa'i dpal la phyag 'tshal lo/ /de bzhin gshegs pa dbang phyug chen po'i dpal la phyag 'tshal lo/ /de bzhin gshegs pa nyi zla'i 'od dpal la phyag 'tshal lo/ /de bzhin gshegs pa zab mo'i chos kyi 'od kyi rgyal po'i dpal la phyag 'tshal lo| |de bzhin gshegs pa nam mkha'i sgron ma 'od bzang dpal la phyag 'tshal lo/ /de bzhin gshegs pa nyi 'od tog gi dpal la phyag 'tshal lo/ /de bzhin gshegs pa spos kyi sgron ma'i dpal la phyag 'tshal lo/ /de bzhin gshegs pa rgya mtsho'i snying po las byung ba'i dpal la phyag 'tshal lo/ /de bzhin gshegs pa sprul pa'i 'brug sgra snyan pa'i dpal la phyag 106a @#/ /'tshal lo/ /de bzhin gshegs pa chos kyi snang ba thams cad bkod pa'i dpal la phyag 'tshal lo/ /de bzhin gshegs pa shing gi rgyal po ltar skyes pa'i dpal la phyag 'tshal lo/ /de bzhin gshegs pa rin chen 'od 'phro ri bo'i dpal la phyag 'tshal lo/ /de bzhin gshegs pa ye shes 'od 'phro rgya mtsho'i dpal la phyag 'tshal lo/ /de bzhin gshegs pa smon lam chen po'i shugs kyi dpal la phyag 'tshal lo/ /de bzhin gshegs pa sprin chen po'i dpal la phyag 'tshal lo/ /de bzhin gshegs pa dran pa'i tog gi rgyal po la phyag 'tshal lo/ /de bzhin gshegs pa dbang po tog gi rgyal mtshan gyi rgyal po'i dpal la phyag 'tshal lo/ /de bzhin gshegs pa nor dang 'bru thams cad sdud pa'i dpal la phyag 'tshal lo/ /de bzhin gshegs pa zhi ba 'dren pa'i dpal la phyag 'tshal lo/ /de bzhin gshegs pa phun sum tshogs pa 'gugs pa'i dpal la phyag 'tshal lo/ /de bzhin gshegs pa'i mtshan 'di dag rim gror byas te bcang bar bya'o/ /bklag par bya'o/ /de ltar byas na/ rigs kyi bu'am/ rigs kyi bu mo de'i bsod nams shin tu mang du bskyed par 'gyur ro/ /lha mo chen mo dpal de bzhin gshegs pa thams cad kyis lung bstan te/ lha mo chen mo dpal khyod ma 106b 'ongs pa'i dus na 'jig rten gyi khams dpal chen po rin po ches brgyan pa zhes bya bar de bzhin gshegs pa dgra bcom pa yang dag par rdzogs pa'i sangs rgyas dpal nor bu rin po che las byung ba zhes bya bar 'gyur te/ 'jig rten gyi khams de yang lha'i rin po che sna tshogs kyis brgyan par 'gyur ro/ /'jig rten gyi khams der de bzhin gshegs pa de nyid snang bar mdzad par 'gyur la/ 'jig rten gyi khams de na gnas pa'i byang chub sems dpa' de dag kyang rang las 'od 'byung zhing tshe dpag tu med par 'gyur ro/ /nam mkha' las kyang sangs rgyas dang / chos dang / dge 'dun gyi sgra 'byung bar 'gyur ro/ /sangs rgyas kyi zhing der byang chub sems dpa' gang dag skye bar 'gyur ba de dag thams cad kyang pad+ma'i snying po dag las skye bar 'gyur ro zhes lung bstan to/ /de la ming brgya rtsa brgyad dri ma med pa lta bu zhes bya ba'i bstod pa rgyun chags bcu gnyis gang zhe na/ 'jigs pa med pa spyan ras gzigs dbang phyug /lha mo chen mo dpal gyi ming rnam par nyon cig /'di lta ste/ de bzhin gshegs pa thams cad kyis dbang bskur ba/ lha thams cad kyis dbang bskur ba/ de bzhin gshegs pa thams cad kyi yum/ lha thams cad kyi ma/ de bzhin gshegs pa thams cad kyi dpal/ byang chub sems dpa' thams cad kyi dpal/ 107a @#/ /'phags pa nyan thos dang / rang sangs rgyas thams cad kyi dpal/ tshangs pa dang / khyab 'jug dang / dbang phyug chen po rnams kyi dpal/ lha la sogs pa thams cad kyi dpal/ gnas thams cad yod pa'i dpal/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po thams cad kyi dpal/ rig sngags 'chang dang / lag na rdo rje dang / rdo rje 'chang thams cad kyi dpal/ 'jig rten skyong ba bzhi dang / lnga'i dpal/ gza' brgyad dang rgyu skar nyi shu rtsa brgyad kyi dpal lo/ /oM nyi ma'i bu mo'am/ yum rig byed bzhi'i dpal/ bkra shis ma/ sems can gyi ma/ rnam par rgyal ma/ gang+gA ma/ mu stegs thams cad ma/ bkra shis thams cad ma/ dri ma med par byed pa'i dpal/ sdig pa thams cad 'phrog ma/ rgyags byed ma/ zla ba'i dpal/ nyi ma'i dpal| gza' thams cad kyi dpal/ seng+ge la zhon ma/ pad+ma'i mchog 'bum gyis bkab ma/ pad+ma/ pad+ma las byung ma/ pad+ma la gnas ma/ pad+ma 'dzin ma/ pad+ma dang ldan ma/ rin po che 'od 'bar ba'i phreng ba du ma dang ldan ma/ nor sbyin ma/ dkar mo/ dkar mo chen mo/ lag dkar ma/ bkra shis thams cad 'dzin ma/ bsod nams thams cad bsags pa'i 107b lus can ma/ shes nyin gyi bu mo/ lag pa 'bum ldan ma/ mig 'bum ldan ma/ mgo 'bum ldan ma/ nor bu rnam pa sna tshogs kyi cod pan dang ldan ma/ gzugs bzang ma/ kun gyi gzugs can ma/ grags ma/ shin tu grags ma/ zhi ma/ sprin 'dra ba'i skra gtsang ma/ zla ba ltar mdzes ma/ dge ma/ dge byed ma/ sems can thams cad la mngon du phyogs pa'i dpal/ 'phags pa me tog gi dpal/ me tog gi dbang phyug ma/ ri'i rgyal po ri rab thams cad kyi dpal/ chu klung dang / mtsho thams cad kyi dpal/ chu dang rgya mtsho thams cad kyi dpal/ mu stegs thams cad mngon du phyogs pa'i dpal/ sman dang / rtswa dang / nags tshal dang / nor dang / 'bru thams cad kyi dpal/ gser sbyin ma/ zas dang / skom spyin ma/ 'od gsal ma/ snang ma/ lus gtsang ma/ de bzhin gshegs pa thams cad kyi dbang bsgyur ma/ lha'i tshogs thams cad la mngon du phyogs ma'i dpal/ gshin rje dang / chu lha dang / lus ngan dang / brgya byin la sogs pa'i dpal/ sbyin byed ma/ longs spyod ma/ gzi brjid ma/ gzi brjid ldan ma/ phun sum tshogs ma/ 'byor pa ma/ rnam par 'phel ma/ mthong ma/ chos kyi dpal ma/ khyab 'jug la brten ma/ ku mu da la gnas ma/ gnod sbyin ma/ bzod sbyin ma/ mthu rtsal gyi gnas ma/ dag byed dang bkra shis 108a @#/ /thams cad kyi lag ldan ma/ bkra mi shis pa thams cad 'jig byed ma/ bsod nams thams cad sdud pa'i dpal/ sa thams cad dang rgyal po thams cad kyi dpal/ rig sngags 'chang gi rgyal po thams cad kyi dpal/ 'byung po dang / gnod sbyin dang / srin po dang / yi dwags dang / sha za dang / grul bum dang / lto 'phye chen po thams cad kyi dpal/ lha'i gnas dang / lha thams cad kyi dpal/ bzlas brjod dang bzlas brjod du bya ba dang / sbyin sreg dang sbyin sreg tu bya ba dang / bkra shis thams cad kyi dpal/ 'od ldan ma/ mchog dga' ma/ skal pas 'gyur ma/ drang srong thams cad dga' bar brjod pa'i dpal/ bud med thams cad kyi gnas/ kun gyi gtso mo dpal gyi mchog /mi'am ci mo thams cad dang / lha ma yin mo thams cad kyi dpal gyi mchog /kha na ma tho ba med pa'i gnas na 'dug ma/ yid 'ong ma sim byed ma/ lus ngan la sdug ma/ chos kyi rgyal po'i dpal/ oM sdug bsngal thams cad las rnam par gzigs shing sgrol cig /thar bar mdzod cig /bsod nams kyi tshogs thams cad bdag la mngon du gyur bar mdzod cig swA hA/ oM gang+gA sarba tir+tha mu khe swA hA/ oM sarba bi tre swA hA/ sarba maM ga la d+hA ra Ni swA hA/ tsa tu re be da sarba nak+Sha 108b tra| gA hA ga /nA hA ga /nA d+hA mUrta ye swA hA/ brah+mA ya swA hA/ biSh+Nu ye swA hA/ ru drA ya swA hA/ bi shwa mu khA ya swA hA/ oM gri ni gri na sarba kAR+Ya sA d+ha ni/ si ni si ni/ A bA hA/ de ba hA/ bai shra ma NA ya swA hA/ su bar+Na/ d+ha na d+h+ya n+ya/ A kaR+Sha N+yai swA hA/ sarba pu N+yai swA hA/ shrI he ba te A kaR+Sha N+yai swA hA/ sarba pA paM na sha myai swA hA/ sarba a lak+Sh+mi pra sha ma n+yai swA hA/ sarba ta thA ga ta a b+hi She ka ye swA hA/ sarba de ba ta a b+hi mu kha shri ye a yur ba la par+Na ke ra ye swA hA/ sarba ba ti twa maM ga la ha sta ya swA hA/ siM ga ba ha na ne swA hA/ pad+ma saM b+hu ta ye swA hA/ sarba kra ti ka khord bi nA sha ne swA hA/ 'jigs pa med pa spyan ras gzigs dbang phyug /gang la la lha mo chen mo dpal gyi ming nyes sdig thams cad med par byed pa/ sdig pa thams cad 'joms par byed pa/ bsod nams thams cad sdud par byed pa/ bkra mi shis pa thams cad med par byed pa/ dpal dang / bde ba dang / skal pa bzang po thams cad sdud par byed pa 'di dag dang / de bzhin gshegs pa'i mtshan 'di dag 'chang ba dang / klog par byed pa des nang par langs te gtsang par byas la sangs rgyas thams cad la me tog dang bdug pa gsol nas lha mo chen mo dpal la yang tsan+dan gyi bdug pa phul te bklags na/ des dpal thams cad mthong bar 'gyur/ /bde ba dang / yid bde ba thams cad thob par 'gyur/ lha thams 109a @#/ /cad kyang srung ba dang / bskyab pa dang / sbed pa byed par 'gyur/ /de'i dgos pa thams cad 'grub par 'gyur ro/ /bcom ldan 'das kyis de skad ces bka' stsal nas byang chub sems dpa' 'jigs pa med pa spyan ras gzigs dbang phyug dang / lha mo chen mo dpal de dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ / 'phags pa lha mo chen mo dpal lung bstan pa rdzogs so// // |