rgya gar skad du/ AR+Ya ma hA shri yAH sU tra/ bod skad du/ 'phags pa dpal chen mo'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das bde ba can na bzhugs so/ /de nas byang chub sems dpa' sems dpa' chen po 'phags pa spyan ras gzigs dbang phyug bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal nas bcom ldan 'das la bskor ba lan gsum byas te phyogs gcig tu 'dug go /de nas bcom ldan 'das 109b kyis dpal chen mo la gzigs nas 'phags pa spyan ras gzigs dbang phyug la 'di skad ces bka' stsal to/ /dpal chen mo'i mtshan bcu gnyis po 'di/ dge slong ngam dge slong ma'am/ dge bsnyen nam/ dge bsnyen ma'am/ de ma yin pa gzhan yang rung ste/ gang gis shes pa dang / gang la la 'chang ba dang / klog pa dang / 'bri ba dang / 'brir 'jug pa de ni/ dbul ba bor te phyug por 'gyur ro/ /de nas 'byung po'i tshogs thams cad kyis de ltar gyur cig ces kun nas gsol to/ /de nas bcom ldan 'das kyis dpal chen mo'i mtshan bcu gnyis po bka' stsal pa 'di lta ste/ dpal ldan ma/ bkra shis ma/ pad+ma'i phreng ba can/ /nor gyi bdag mo/ dkar mo/ grags pa chen mo/ pad+ma'i spyan/ 'od chen mo/ byed pa mo/ zas sbyin ma/ rin po che rab tu sbyin ma/ dpal chen mo/ s+yAd tha the da na/ dzi ni/ g+h+ri Ni/ sarba ar+tha sA d+ha ni/ sha shi ni/ a lak+Sh+mi Ni/ me nA sha ya/ sid+d+h+yan+tu me man+t+ra pa dAH swA hA/ oM b+hr-i ku TI pa ra ma su b+ha ge swA hA/ lan gsum du brjod par bya ste/ gang la la dus gsum du 'don pa de'i mi mthun pa'i phyogs thams cad 'jig par 'gyur ro/ / skal pa bzang po dang ldan par 'gyur ro/ /'byor pa zad mi shes par 'gyur ro/ /mi dang phrad du 'gro ba'i tshe bklags nas phrad pa byas na/ mi des de la bu'i 'du shes skyed par 110a @#/ /'gyur te dga' bar yang 'gyur la ji skad bsgo ba bzhin byed do/ /rtag tu rgyun mi 'chad par bklags na/ tshangs pa bram zes drag shul gyi las byas kyang mi tshugs par 'gyur la/ sangs rgyas mang po la bsnyen bkur byas par yang 'gyur ro/ /bcom ldan 'das kyis de skad ces bka' stsal nas byang chub sems dpa' 'phags pa spyan ras gzigs dbang phyug yi rang ste bcom ldan 'das kyis gsungs pa la mngon par bstod do/ /'phags pa dpal chen mo'i mdo rdzogs so// //rgya gar gyi mkhan po dzi na mi tra dang / zhu chen gyi lots+tsha ba ban+d+he ye shes sdes bsgyur cing zhus te gtan la phab pa/ |