@#/ /rgya gar skad du/ AR+Ya sarba kar+m+ma A ba ra Na bi sho d+ha ni nA ma d+hA ra NI/ bod skad du/ 'phags pa las kyi sgrib pa thams cad rnam par sbyong ba zhes bya ba'i gzungs/ bcom ldan 'das mi 'khrugs pa la phyag 'tshal lo/ /na mo rat+na tra yA ya/ oM kaM ka ni kaM ka ni/ ro tsa ni ro tsa ni/ tro Ta ni tro Ta ni/ trA sa ni trA sa ni/ pra ti ha na pra ti ha na/ sarba karma pa raM pa rA Ni me swAhA/ gzungs sngags 'di'i cho ga ni/ 'di yin te/ rtag tu bzlas brjod byas na/ las gcig nas gcig tu brgyud pa thams cad rnam par dag par 'gyur ro/ /dus gsum du bzlas brjod byas na/ mtshams med pa lnga yang byang bar 'gyur ro/ /lan gcig bzlas brjod byas na/ ltas ngan pa dang / rmi lam ngan pa dang / bkra mi shis pa rnams med par 'gyur ro/ /lus la 'chang ngam/ glegs bam la bris nas mgul du thogs te 'chang na/ dus ma yin par 'chi ba rnams gtan du 'byung bar mi 'gyur ro/ /gang zhig snying rjes non te ri dwags dang / bya dang / mi dang / mi ma yin pa rnams kyang rung ste 'chi ba'i rna khung du brjod na/ de ngan song du 'gro bar mi 'gyur ro/ /yang na shi ste dus las 'das na shi 'phos pa'i ming nas smos te de'i phyir byams pa dang snying rjes lan brgya'am/ stong ngam/ 'bum brjod na/ 361b sems can de sems can dmyal bar skyes su zin kyang de'i mod la thar par 'gyur ro/ /sa'am/ til lam/ yungs kar ram/ chu gang yang rung ba la bzlas brjod byas te shi ba'i lus la gtor ram/ khrus byas nas de'i 'og tu bsregs pa'am/ yang na mchod rten gyi nang du bcug ste bzhag la/ rig sngags kyang bris nas mgo la btags na/ de ngan song du skyes pa yang zhag bdun gyis gdon mi za bar thar te bde 'gro mtho ris kyi 'jig rten du skye bar 'gyur ba'am/ yang na rang gi smon lam gyi dbang gis skye bar 'gyur ro/ /gang zhig zla ba nya ba'i tshe khrus byas la gtsang mar byas te dus gsum du gos brje zhing kha zas mi za ba'am/ yang na kha zas dkar bag bza' zhing / sku gdung dang ldan pa'i mchod rten bskor bzhin du gang gi ming dang ldan pas lan 'bum bzlas brjod byas na/ de ngan song nas thar te gnas gtsang ma'i lha'i ris su skyes nas sgrub pa po'i thad du 'ongs te mchod par byed cing lus kyang ston la/ legs so zhes bya ba yang byin nas lan gsum bskor ba byas te mi snang bar 'gyur ro/ /de'i ming bris la gzungs sngags bzlas brjod byed cing mchod rten 'bum byas la/ gdugs dang / rgyal mtshan dang / ba dan la sogs pas legs par mchod nas rgya mtsho chen po dang / 362a @#/ /yang na chu klung du btang na/ des sems can dmyal ba la sogs pa nas thar par 'gyur ro/ /yang na de ltar mchod pa byas nas mjug tu lam gyi bzhi mdor mchod rten chen po byas te gdugs dang / rgyal mtshan dang / ba dan la sogs pas legs par mchod la/ 'phags pa'i dge 'dun la yang mchod ston gsol nas yon yang phul te legs par mchod nas che ge mo zhig gi dge ba'i rtsa bar gyur cig /'di kho nas bde 'gro mtho ris kyi 'jig rten du skye bar gyur cig /ces kyang shes par byas na/ de kho na bzhin du skyes nas lus kyang ston cing legs so zhes bya ba yang byin nas mi snang bar 'gyur ro/ /mtshams med pa lnga byed byed pa'am/ dam pa'i chos spong ba'am/ 'phags pa la skur pa btab pa yang rung ste 'chi gar rtsig pa la gzungs sngags 'di bris pa mthong na yang de'i las kyi sgrib pa thams cad zad par 'gyur na/ 'don pa dang / bzlas brjod byas pa lta ci smos/ de bzhin gshegs pa de nyid byon nas 'di skad du rigs kyi bu tshur nga'i gan du shog ces kyang gsung bar 'gyur ro/ /'phags pa las kyi sgrib pa thams cad rnam par sbyong ba zhes bya ba'i gzungs rdzogs so// // |