rgya gar skad du/ AR+Ya san+d+hi mA la mahA tan+t+ra bo d+hi satwa mahA bi ni sh+tsaM ya nirde shAd ma hA ma Ni rat+na kau sha l+ya ni rde sha ma hA pa ri NA maM nA ma rA dzA/ bod skad du/ 'phags pa dgongs pa'i rgyud kyi phreng ba chen po byang chub sems dpa'i rnam par nges pa chen po bstan pa las/ nor bu chen po rin po che la mkhas pa bstan pa yongs su bsngo ba chen po'i rgyal po zhes bya ba/ sangs rgyas dang / byang chub sems dpa' thams cad la phyag 'tshal lo/ /de nas bcom ldan 'das nor bu rin po che rdo rje rin po che'i rtse mo la bzhugs nas byang chub sems dpa'i phyag na rdo rje la 'di skad ces bka' stsal to/ /kye rgyal ba'i sras/ 'di la byang chub la rab tu gnas pa'i byang chub sems dpa' sems dpa' chen po sems can thams cad kyi skyabs byed par 'dod pa/ byang chub sems dpa'i bslab pa'i sdom pa blangs pa/ byang chub tu sems bskyed pa/ snying 312a @#/ /rje'i bdag nyid can/ de bzhin gshegs pa thams cad mnyes par byed 'dod pa/ byang chub sems dpa' chen po'i spyod pa'i tshogs nye bar sogs par 'dod pa/ de bzhin gshegs pa thams cad kyi ye shes rab tu thob par 'dod pa/ sgrib pa med pa'i ting nge 'dzin dang / gzungs dang / rnam par thar ba'i sgo rnams kyis rnam par rtse bar 'dod pa/ nam mkha' mdzod nyid dang / lag na rin chen nyid thob par 'dod pas 'di ltar bsngo bar bya ste/ sangs rgyas bcom ldan 'das rnams dang / sa bcu la rab tu gnas pa'i byang chub sems dpa' rnams dang / rdo rje 'chang rnams bdag la dgongs su gsol/ bdag byang chub tu sems bskyed pa/ lam la rab tu gnas pa ming 'di zhes bgyi ba/ de bzhin gshegs pa thams cad dang / byang chub sems dpa' thams cad la dus thams cad du yong ye 'bul zhing mchi na/ de bzhin gshegs pa mnga' chen po can rnams dang / byang chub sems dpa' sems dpa' chen pos chen po brnyes pa rnams kyis bzhes shing bdag la rtag tu bsod nams kyi stobs chen po dang / ye shes kyis nye bar brtan pa dang / brtson 'grus dang / brtson pa'i bdag nyid dang / zhi ba dang / dul ba dang / nye bar zhi ba'i gnas dang / mngon par shes pa dang / pha rol tu phyin pa 312b rnams yongs su rdzogs par mdzad du gsol/ de'i 'og tu yang 'di skad ces brjod par bya ste/ thugs rje chen po dang ldan pa dag bdag la dgongs su gsol/ /bdag ming 'di zhes bgyi ba/ 'khor bar lhung ba/ 'ching bas bcings pa/ btson rar chud pa/ chos kyi lam stor ba/ nyon mongs pa'i dgra bdo bas mngon par gtses pa/ mgon ma mchis pa/ skyabs ma mchis pa| skyob pa ma mchis pa/ gnas ma mchis pa/ dpung gnyen ma mchis pa/ ston pa ma mchis pa/ lam gol bar zhugs pa/ 'khor ba la mngon du phyogs pa/ mya ngan las 'das pa la rgyab kyis bltas pa/ ngan song la gzhol ba/ ngan song la 'bab pa/ ngan song la bab pa/ mi dge ba'i bshes gnyen dang 'grogs par lhung ba/ dge ba'i bshes gnyen dang bral ba/ sman pa la mi sman pa dang / mthun pa la mi mthun pa dang / dge ba la mi dge bar bzung ba/ slob dpon ma mchis pa/ de bzhin gshegs pa dang / byang chub sems dpa' lta ba la rgyab kyis phyogs pa/ skye ba dang / rga ba dang / na ba dang / 'chi ba dang / mya ngan gyis 'tshe bas gtses pa/ bde ba ma thob pa/ mi skrag pa mthob pa/ mi 'jigs pa ma thob pa/ rtag tu mnyam par ma bzhag pa/ zhi ba dang / dul ba dang / sbyin pa dang / nges pa dang / yang dag par sdom pa dang / bag yod pa dang bral ba/ ting nge 'dzin dang / gzungs dang / sa dang / bzod pa dang / shes 313a @#/ /rab kyi pha rol tu phyin pa rnams la gnas pa dang bral pa/ byams pa dang / snying rje dang / dga' ba dang / btang snyoms la gnas pa dang bral ba/ byang chub sems dpa'i tshul khrims kyi sdom pa rnam gsum la rgyab kyis phyogs pa/ sgrib pa med pa'i ye shes chen po dang bral ba/ shin tu gnas pa'i chos kun du 'byung ba'i rgyu nyid la mi gnas pa/ mngon par shes pa dang bral ba/ stobs rnams ma thob pa/ mi 'jigs pa dang mi ldan zhing mi gnas pa/ mi brjod pa'i chos kyi rjes su 'gro ba'i skabs dang mi ldan pa/ yon tan gyis gyis stong pa/ byang chub kyi yan lag bdun gyi gos kyis ma g.yogs pa/ 'phags pa'i lam yan lag brgyad kyis bgrod pa dang bral ba/ sdug bsngal brgya stong phrag du mas mngon par gtses pa/ rtag tu gdungs pa/ rtag tu dman pa/ rtag tu rmongs pa/ rtag tu mnyam par ma bzhag pa/ rtag tu nyon mongs pa'i rjes su zhugs pa lags na/ thugs rje chen pos dgongs te bdag gi skyabs mdzad du gsol/ bdag gi dpung gnyen mdzad du gsol/ bdag gi byang chub chen po'i lam dang / byang chub kyi lam dang / byang chub kyi tshogs yongs su rdzogs par mdzad du gsol/ de bzhin gshegs pa'i stobs bcu dang / mi 'jigs pa bzhi dang / sangs rgyas kyi chos ma 'dres pa bco brgyad dang / so so 313b yang dag par rig pa bzhi dang / ting nge 'dzin dang / rnam par grol ba dang / gzungs rnams skyabs mdzad du gsol/ bdag gi phun sum tshogs pa thams cad yongs su rdzogs par mdzad du gsol/ yon tan thams cad yongs su rdzogs par mdzad du gsol/ sangs rgyas bcom ldan 'das dang / mthu chen po brnyes pa'i byang chub sems dpa' rnams bdag la dgongs su gsol/ bdag gis sangs rgyas dang / byang chub sems dpa' thams cad la mchod pa dang / bkur sti chen po bgyis nas bdag 'bul lo/ /phyogs bcu'i 'jig rten gyi khams na bkod pa chen po rnams kun du gnas pa'i rin po che sna tshogs kyi rin po che'i gzhal med khang rnams dang / rin po che'i shing ljon pa rnams dang / rin po che'i ri rnams dang / rin po che'i gdan rnams dang / rin po che'i lan kan rnams dang / rin po che'i phreng ba rnams dang / rin po che'i gdugs rnams dang / rin po che'i rgyal mtshan rnams dang / rin po che'i chun po rnams dang / rin po che'i mu tig gi dra ba rnams dang / rin po che'i snod rnams dang / rin po che'i phreng ba rnams dang / rin po che 'bar pa'i tshogs rnams dang / rin po che'i gling brgya dang / nor bu chen po rnams dang / mar me'i sdong bu gtsang ba/ nor bu dang / rin po che sna tshogs kyis spras pas 'tsher ba/ gser gyi tsong tsong mang pos btags pa rnams 314a @#/ /pad+ma 'dzam bu chu bo'i gser gyi ge sar chen po can rnams dang / gser gyi phreng ba rnams dang / gser gyi gzhal med khang rnams dang / rin po che'i sprin rnams dang / rin po che'i 'bru'i char rnams dang / rin po che'i snying po can gyi khang bzang rtsig pa nor bu rab mchog sna tshogs kyis spras pa/ rin po che'i lan kan can rnams dang / rig sngags 'chang chen po'i skyed mos tshal nyams dga' ba rnams dang / gnas nyams dga' ba rnams dang / gzhal med khang nyams dga' ba rnams dang / skyed mos tshal nyams dga' ba rnams dang / lha'i nye bar spyad pa nyams dga' ba yongs su ma spyad pa ji snyed mchis pa de dag thams cad sangs rgyas dang / byang chub sems dpa' thams cad la 'bul lo/ / gang dag 'dzam bu'i gling na mchis pa'i sman rnam pa sna tshogs pa rnams dang / bcud kyis len gyi rigs rnams dang / gang dag dus thams cad pa'i nor bu dang / gang dag zhal zas ro zhim po phun sum tshogs pa khyad par du 'phags pa rnams dang / gang dag dri bda' ba'i ljon shing rnams dang / tsan+dan gyi ljon shing rnam pa sna tshogs dus kyi rjes su 'brang ba dang / tsan+dan dmar po rnams dang / rtag tu me tog dang ldan pa'i nags tshal chen po rnams dang / spos kyi ngad rgyas pa yid du mchi ba'i dri gda' ba'i ljon shing gi rigs rnams dang / 314b gang dag dpag bsam gyi shing bdag gi ma mchis shing yongs su 'dzin pa ma mchis pa rnams dang / gang dag rgya mtsho'i nor bu rnam pa sna tshogs dang / yid bzhin gyi nor bu rnams dang / gang dag ri lhun po dang / ti se dang / spos kyi ngad ldang dang / ma la ya dang / 'bigs byed dang / man dA ra dang / rdo rje'i ri la sogs pa'i rin po sna tshogs kyi zom rnams la/ rin po che sna tshogs kyi khang pa brtsegs ma rnams dang / rin po che sna tshogs kyi phug rnams dang / rin po che sna tshogs kyi brag rnams dang / rin po sna tshogs kyis gzhi brtan pa rnams dang / rin po che sna tshogs kyi gzhal med khang rnams dang / rin po che sna tshogs kyi phung po rnams dang / rin po che sna tshogs kyi them skas rnams dang / nor bu rin po che sna tshogs kyi ka ba rnams dang / rin po che sna tshogs kyi khang pa'i tshar rnams dang / nor bu bai DUR+Ya sna tshogs kyi sgron ma rnams dang / gang dag lha yul gyi gzhal med khang blta na sdug pa rnams dang / gang dag lha yul gyi lha'i grong khyer gyi gzhal med khang yongs su bzung ba ma mchis pa rnams dang / gang dag lha yul gyi me tog blta na sdug pa rnams dang / gang dag lha yul gyi glu dbyangs kyi cha spyad rnams dang / gzhal med khang stong rnams kyi tshar rlung gis bskyod pa sgra snyan pa 'byin pa rnams dang / rol mo'i cha spyad kyi rnam pa ma dkrol bar rang sgra snyan par 'byin pa rnams 315a @#/ /dang / gang dag lha yul gyi bya'i tshogs gzhal med khang stong pa rnams na gnas shing skad snyan pa 'byin pa rnams dang / gang dag rin po che'i sprin sgra dbyangs chen po snyan par 'byin pa rnams dang / gang dag lha'i nor bu rnams dang / gang dag glu dbyangs rnams dang / gang dag dri bda' ba'i me tog gi ljon shing rnams dang / phreng ba'i ljon shing rnams dang / spos kyi ljon shing rnams dang / rgyal mtshan gyi ljon shing rnams dang / ba dan gyi ljon shing rnams dang / rin po che'i ljon shing yongs su longs ma spyad pa de dag thams cad sangs rgyas dang / byang chub sems dpa' thams cad la 'bul lo/ /gang dag sangs rgyas kyi spyan gyis gzigs pa'i 'jig rten gyi khams thams cad na mchod pa chen po'i sprin me tog gi sprin rnams dang / dri'i sprin rnams dang / phreng ba'i sprin rnams dang / bdug pa'i sprin rnams dang / lhab lhub kyi sprin rnams dang / byug pa'i sprin rnams dang / rin po che'i gdugs kyi sprin rnams dang / rin po che'i rgyal mtshan gyi sprin rnams dang / rin po che'i ba dan gyi sprin rnams dang / rin po che'i gos kyi sprin rnams dang / rin po che'i ljon shing gi sprin rnams dang / rin po ches bkang ba'i snod kyi sprin rnams dang / rin po che nor bu chen po spungs pa'i sprin rnams dang / rin po che rnam pa sna tshogs kyi sprin rnams dang / mar me'i snod 315b stong gi 'jig rten gyi khams kyi tshad tsam la dri zhim po'i 'bru mar gyis yongs su bkang zhing snying po'i ras ri rab brgya'i tshad tsam rab tu 'bar ba rnams sangs rgyas bcom ldan 'das thams cad dang / byang chub sems dpa' thams cad la 'bul lo/ /de dag thams cad la gsol ba ni byang chub kyi snying por gshegs pa dang / bdud 'dul ba dang / mngon par byang chub pa dang / chos kyi 'khor lo bskor ba dang / yongs su mya ngan las 'da' bar bzhed pa de dag rnams la sems can rnams kyi don du bskal pa mang por bzhugs par gsol lo/ /ci ltar de bzhin gshegs pa rnams kyi sa mi dmigs par bzhugs te bsngos pa ltar bdag gis bsod nams thams cad bla na med pa yang dag par rdzogs pa'i byang chub tu yongs su bsngo bar bgyi'o/ /de bzhin gshegs pa thams cad dang / byang chub sems dpa' thams cad dang / sems can thams cad kyi bsod nams la rjes su yi rang ngo / /sdig pa thams cad kyang so sor bshags so| |oM sma ra sma ra/ bi mA na ska ra mahA dza ba hUM/ de'i 'og tu ci ltar 'dod pa bzhin lha rdzas kyi mchod pa chen po'i sprin rnams de bzhin gshegs pa thams cad kyi spyan sngar 'byung bar 'gyur ro/ /rigs kyi bu'am rigs kyi bu mo gang la la zhig sangs rgyas dmigs pa yid la byed pas yongs su bsngo ba chen po'i 'khor lo 'di nyin par ram/ mtshan mo 'don na/ de'i 316a @#/ /sdig pa rnams yongs su zad par 'gyur zhing nyon mongs pa thams cad kyang bsrangs par 'gyur ro/ /gong du smos pa'i yon tan rnams kyang 'thob par 'gyur ro| |lan cig bzlas brjod par byas na tshangs pa brgya'i bsod nams 'thob par 'gyur ro/ /rmi lam na yang rtag tu de bzhin gshegs pa rnams chos ston pa mthong bar 'gyur ro/ / rig sngags rnams kyang yang dag par grub par 'gyur ro/ /rdo rje 'chang gis yongs su gzung bar yang 'gyur ro/ /ji ltar 'dod pa'i sangs rgyas kyi zhing rnams su'ang skye bar 'gyur ro|| ||'phags pa dgongs pa'i rgyud kyi phreng ba chen po byang chub sems dpa'i rnam par nges pa chen po bstan pa las/ nor bu chen po rin po che la mkhas pa bstan pa yongs su bsngo ba chen po'i rgyal po rdzogs so// //kha che'i mkhan po d+harmA ka ra dang / lots+tsha ba ban+de dpal 'byor gyis bsgyur ba las/ rgya gar gyi mkhan po bid+yA ka ra pra b+ha dang / zhu chen gyi lo ts+tsha ba ban+de dpal brtsegs kyis bsgyur cing zhus te gtan la phab pa// // |