//rgya gar skad du/ AR+Ya sing ha pa r-i pr-its+tshA nA ma ma hA yA na sU tra/ bod skad du/ 'phags pa seng+ges zhus pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong stong nyis brgya lnga bcu'i dge slong gi dge 'dun chen po dang thabs gcig tu bzhugs te/ byang 76a @#/ /chub sems dpa'i dge 'dun chen po dang yang thabs gcig go /thams cad mkhyen cing thams cad gzigs/ /rgyal ba gang zag mtshungs pa med/ /rgyal po ma skyes dgra yi bu/ /seng ge zhes ni grags pa zhig /tshong dpon bu mo lnga brgya yis/ /mdun du bdar te lhan cig tu/ /rgyal po'i khab nas de byung nas/ /rgyal po'i 'byor ba chen po yis/ /gser las byas pa'i gdugs thogs te/ /rdzogs sangs rgyas kyi gan song nas/ /zhabs la mgo bos phyag 'tshal te/ /lnga brgya po yi gdugs de dag /tshang bar thub pa che la phul/ /kun kyang byang chub don du zhugs/ /rdzogs sangs rgyas kyi mthu yis ni/ /de dag mi 'jigs skyes gyur nas/ /seng ges thal mo sbyar byas te/ /rdzogs sangs rgyas la zhus pa ni/ /byang chub sems dpa'i spyod pa gang| |de ni 'dren pas bdag la gsungs/ /gang gis mdzes par 'gyur ba lags/ /gang gis rdzus te skye bar 'gyur/ /skye ba dran par ji ltar 'gyur/ /thub pa chen pos lung bstan gsol/ /de dag lhag bsam ye shes kyis/ /mkhyen nas sangs rgyas lung bstan pa/ /byang chub sems dpa'i spyod gang zhes/ /khyod kyis dris pa de bstan to/ /bzod pa yis ni mdzes par 'gyur/ /tshangs par spyad pas brdzus te skye/ /chos kyi sbyin pas skye ba dran/ /gzhon nu de ltar shes par gyis/ /gang gis sum cu rtsa gnyis mtshan/ /dpe byad bzang po brgyad 76b cu dang / /gser mdog 'dra ba'i lus 'gyur zhing / /de mthong sems can dga' bar 'gyur/ /sbyin pa kun gyis mtshan du 'gyur/ /byams pas de bzhin dpe byad bzang / /sems can kun la sems mnyam pas/ /rgyal ba gser gyi mdog 'drar 'gyur/ /gzungs ni gang gis thob par 'gyur/ /gang gis ting 'dzin skye 'gyur lags/ /gzung ba'i tshig tu gang gis 'gyur/ /thub pa chen pos bstan du gsol/ /chos la bzod pas gzungs rnams thob/ /sems bsgoms pas ni ting 'dzin skye/ /kyal ba'i tshig rnams spangs byas na/ /gzung bar 'os pa'i tshig tu 'gyur/ /dran dang ldan par ji ltar 'gyur/ /thub pa ji ltar blo gros ldan/ /ji ltar chos spyad 'gyur ba lags/ /skyes bu dam pa mkhas cis 'gyur/ /g.yo med pas ni dran ldan 'gyur/ /don la sems pas blo gros ldan| |gus dang bcas pas chos spyod 'gyur/ /chos kyi mtshan nyid rtogs pas mkhas/ /'jig rten mgon po'i spyan sngar ni/ /las gang gis ni skye bar 'gyur/ /'jig rten mgon gyi mngon sum du| |zhu ba zhu bar ji ltar 'gyur/ /gang gis chos kyi sbyin pa la/ /nam yang bar chad mi byed pa/ /de ni des na myur rab tu/ /'jig rten mgon dang phrad par 'gyur/ /gang gis mi khom spong bar 'gyur/ /gang gis bzang 'gror mchi 'gyur lags/ /skye ba kun du skye ba na/ /bag mchis par ni ji ltar 'gyur/ /dad pas mi khom spong bar 'gyur/ /tshul khrims kyis ni bzang 'gror 'gro/ /stong pa 77a @#/ /nyid ni bsgom byas na/ /rtag tu bag dang ldan par 'gyur/ /thub pa byang chub sems dpa' rnams/ /ji ltar las rnams dag par 'gyur/ /ji ltar bdud kyi rnyis mi thogs/ /ji ltar chos kyis phongs 'gyur spong / /rnam par grol bas las rnams dag /brtson 'grus kyis ni bdud 'dul 'gyur/ /ci smras de bzhin byed pas na/ /chos kyis phongs pa spong bar 'gyur/ /ka la ping ka'i sgra snyan dang / /tshangs pa'i dbyangs 'drar ji ltar 'gyur/ /thub pa mos pa sna tshogs kyis/ /sems can rnams ni gang gis dga'/ /bden par smra bas tshangs pa'i dbyangs// ngag rtsub spangs pas sgra snyan 'gyur/ /kyal pa'i tshig dang phra ma rnams/ /spangs pas sems can dga' bar 'gyur/ /ji ltar tshe ring 'gyur ba lags/ /bro nad nyung bar ji ltar 'gyur/ /rnam par 'dren pa gang gis na/ /g.yog 'khor rnams ni mi phyed 'gyur/ /gsod pa mi byed tshe ring 'gyur/ /mi 'tshe bas ni nad nyung 'gyur/ /mi mthun pa dag sdum byas na/ /g.yog 'khor rnams ni mi phyed 'gyur/ /don rnams ji ltar 'grub 'gyur lags/ /gang gis longs spyod nyams mi 'gyur/ /gang dang gang du skye ba der/ /dbang cher grags par ji ltar 'gyur/ /chags pa med pas don rnams 'grub/ /ser sna med pas longs spyod 'phel/ /gang dang gang du skye ba der/ /phrag dog med pas dbang cher grags/ /ji ltar lha yi mig thob 'gyur/ /lha yi rna ba ji ltar thob/ /sems 77b can 'chi 'pho skye ba dag /'dren pa gang gis 'tshal bar 'gyur/ /mar me byin pas mig thob 'gyur/ /rol mo'i sgra yis rna ba dag /'chi 'pho skye shes ye shes kyis/ /de bas de ltar 'grub par 'gyur// 'dren pa byang chub sems dpa' yi/ /zag pa gang gis bas par 'gyur/ /tshe rabs snga dran cis 'gyur lags/ /rdzu 'phrul ci yis thob par 'gyur/ /bzhon pa byin pas rdzu 'phrul thob/ /dran pa bsgoms pas rjes su dran/ /mtha' gnyis rab tu spangs byas na/ /zag pa zad par reg par 'gyur/ /gang gis zhing ni phun sum tshogs/ /cis ni dge 'dun phun sum tshogs/ /gang gis phun sum tshogs 'od 'gyur/ /gang gis phyogs bcur lhang nger gda'/ /smon lam gyis ni phun sum zhing / /bsdu bas dge 'dun phun sum tshogs/ /'dir ni rin chen gdugs phul bas/ /phyogs bcur lhang nge snang bar 'gyur/ /chos rnams thams cad bsdu ba ni/ /chos gang gis ni 'thob par 'gyur/ /gang dang gang du skye ba der/ /byang chub sems dpa' dga' ba 'thob/ /sems can thams cad thar bya'i phyir| |byang chub don du sems btud pa/ /des na chos rnams bsdu ba'ang thob/ /des ni dga' ba'ang 'thob par 'gyur/ /bslab pa ci 'drar bslabs pa dang / /sems ni ci 'drar bsgoms pa yis// thub pa chen po khyod 'dra ba'i/ /ston pa thams cad mkhyen par 'gyur/ /sems can ma lus thams cad la/ /mnyam pa'i sems nyid bslabs pa dang / /mnyam par sems ni bsgoms pas na/ / 78a @#/ /thams cad zil gnon rgyal bar 'gyur/ /skye ba kun du byang chub sems/ /rmi lam na yang sems de ni/ /'dor mi 'gyur na ma nyal tshe/ /smos ci 'tshal ba gang gis 'gyur/ / grong dang grong khyer rnams su'am/ /gang du gnas pa'i yul rnams su/ /byang chub la ni yang dag 'dzud/ /de na sems 'dor mi 'gyur ro/ /gang dang gang du skye bar yang / /ji lta stobs ni cher 'gyur zhing| |rtag tu mthu yis 'phags pa dang / /bdud rnams bye bas mi tshugs 'gyur/ /'dir ni snying po lnga byin zhing / /skrag la mi 'jigs byin na ni/ /gang dang gang du skye bar yang / /des na stobs ni cher 'gyur te/ /rtag tu mthu yis 'phags pa dang / /bdud rnams bye bas mi tshugs so/ /byang chub sems dpa'i spyod pa de/ /'jig rten mgon gyis mngon sum du/ /lung bstan pa 'di thos nas su/ / seng ge yid ni dga' bar gyur/ /seng ge grogs dang lhan cig tu/ /'di skad kyi ni tshig smras te/ /spyod pa brtan pa 'di la ni/ /bdag cag rjes su bslab par bgyi/ /de nas sangs rgyas 'dzum mdzad de/ / stong gsum po yang g.yos gyur nas/ /ma pham pas ni sangs rgyas la/ /ji zhig slad du 'dzum mdzad pa/ /thub chen lung bstan gsol zhes zhus/ /de skad zhu ba zhus pa dang / /ma pham pa la sangs rgyas kyis/ /'di skad ces ni bka' stsal to/ /gang gis phyir ni 'dzum mdzad pa/ /ma pham nga las 'dir nyon cig /sangs rgyas bye ba brgyad cu dang / /gzhan yang khrag khrig phrag bcu la/ /byang 78b chub don du 'dus nas ni/ /mi yi 'dren pa rnams la mchod/ /rdzogs pa'i sangs rgyas rkang gnyis mchog /mar me mdzad pa tshun chad du/ /bram ze'i khye'u 'di dag rnams/ /nga yis yongs su smin par byas/ /snang ba chen zhes bya ba yi/ /bskal pa chen por 'byung 'gyur te/ /de dag bskal pa gcig de la/ /rnam par 'dren par 'gyur ba ste/ /ye shes tog gi rgyal mtshan zhes/ /'jig rten 'dren pa rnams su 'gyur/ /'od dpag med kyi bkod pa ltar/ /de dag gi yang de 'drar 'gyur/ /byams pa nas ni bzung nas su/ /bskal pa sum brgya tshang bar ni/ /de yi bar du dus kun du/ /rtag tu sangs rgyas phrad par 'gyur/ /'di dag byang chub thob pa yi/ /ming ni gang su thos pa rnams/ /de dag thams cad 'jig rten du/ /kun mkhyen gang zag mtshungs med 'gyur/ /gang zhig lung bstan 'di thos nas/ /mos pa skyed par byed pa ni/ /'jig rten gsum po 'di dag ni/ /de dang mtshungs pa'i bsod nams med/ /gang gis bskal pa drug stong du/ /sangs rgyas zhing rnams thams cad du// rin chen rnams kyis bkang byas nas/ /byang chub phyir 'dir byin pa bas/ /gang gis chos kyi rnam grangs 'di/ /thos nas byang chub phyir 'jug na/ /sngar smos pa yi bsod nams kyis/ /grangs dang char yang mi phod do/ /chos 'di bshad pa'i tshe na ni/ /'jig rten mgon po'i mthu yis ni/ /lha rnams me tog char pa 'bebs/ /stong gsum po yang g.yos par gyur/ /seng+ge grogs dang bcas 79a @#/ /pa yis/ /mngon par shes pa lnga thob nas/ /nyin bdun bar du mchod byas te/ /bstan pa la ni rab tu byung / /de dag kun gyis ting 'dzin 'thob/ /zad mi shes kyi gzungs kyang 'thob/ /sems can rnams kyi don byed de/ /sangs rgyas chos la 'dzud par byed/ /chos kyi rnam grangs 'di bstan pa na sems can bye ba phrag brgyad cu byang chub mchog la zhugs so/ /bcom ldan 'das kyis 'di skad ces bka' stsal nas/ seng+ge grogs dang bcas pa dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las/ 'phags pa seng ges zhus pa'i le'u zhes bya ste/ 'dus pa sum cu rtsa bdun pa rdzogs so// //rgya gar gyi mkhan po dA na shI la dang / mu ne warma dang / zhu chen gyi lots+tsha ba ban de ye shes sdes bsgyur cing zhus te skad gsar bcad kyis kyang bcos nas gtan la phab pa'o// |