shis par brjod pa'i tshigs su bcad pa/ dkon mchog gsum la phyag 'tshal lo/ /lha yi bkra shis don sgrub cing / /phyogs rnams bkra shis byed pa des/ /khyod kyi don rnams grub gyur cig /thams cad myur du 'thun par shog /phreng ba mgo la 'dug pa ltar/ /lag pa g.yas na dpal yod shog /g.yon na'ang dpal ni gnas gyur cig /yan lag kun na'ang dpal yod shog /tshong pa dag ni nor tshol zhing / /phyogs bcu dag tu 'gro ba rnams/ /rnyed pa chen po rnyed gyur cing / /de dag bde ba skyid par shog /dgos pa la la gang gi phyir/ /shar phyogs su ni 'gro ba na/ /gang dag phyogs der gnas pa yi/ /rgyu skar khyed la skyong gyur cig /smyin drug dang ni snar ma dang / / 107.248b mgo dang lag dang nam so dang / /rgyal dang skag ces bya ba ste/ /de dag rnams ni shar phyogs pa/ /rgyu skar bdun po de dag ni/ /'jig rten skyong ba grags ldan pa/ /shar phyogs logs na yod ces bstan/ /de dag khyod la kun tu srungs/ /de dag bdag po rgyal po ni/ /yul 'khor srung zhes grags pa ste/ /de ni dri za kun gyi bdag /nyi ma lhan cig srung bar shog /de la bu ni mang yod la/ /mkhas shing ming yang 'thun pa ste/ /dgu bcu rtsa gcig zad par yang / /dbang po zhes bya stobs po che/ /de rnams khyed la nad med cing / /shis par lhag par skyong gyur cig /shar phyogs logs kyi phyogs cha na/ /lha mo gzhon nu brgyad yod de/ /rgyal dang rnam par rgyal ma dang / /don grub ma dang mi pham dang / /dga' mchog ma dang dga' sde dang / /dga' can ma dang dga' 'phel ma/ /de dag khyed la nad med cing / /shis par lhag par skyong bar shog /shar phyogs logs kyi phyogs cha na/ /gzhi 'dzin ces bya'i mchod rten yod/ /rgyal ba skyob pa dgra bcom pa/ /de rnams kyis ni bzhugs shing mkhyen/ /de yang khyed la nad med cing / /shis par lhag par skyong gyur cig /phyogs na khyed cag bde bar shog /khyed cag sdig par ma gyur cig /lha rnams kun gyis rab bsrungs nas/ /nor rnams rnyed de ldog par shog /dgos pa la la gang gi phyir/ /lho phyogs su ni 'gro ba na/ /gang dag phyogs der gnas pa yi/ /rgyu skar khyed la skyong gyur cig /mchu dang gre dang dbo dang ni/ /me bzhi nag pa lnga pa yin/ /sa ri dang ni sa ga ste/ /de dag rnams ni lho phyogs pa/ /rgyu skar bdun po de dag ni/ /'jig rten skyong ba grags ldan pa/ /lho phyogs logs na yod ces bstan/ /de dag khyed la kun tu srungs/ /de dag bdag po rgyal po ni/ /'phags skyes po zhes bya bar brjod/ /de ni grul bum kun gyi bdag /gshin rje lhan cig srung bar shog /de la bu ni mang yod la/ /mkhas shing ming yang 'thun pa ste/ /dgu bcu rtsa dgu cig zad par yang / /dbang po zhes bya stobs po che/ /de rnams khyed la nad med cing / /shis par lhag par skyong gyur cig /lho phyogs logs kyi phyogs cha na/ /lha mo gzhon nu brgyad yod de/ /dpal ldan ma dang grags ldan ma/ /grags pa thob dang grags 'dzin dang / /legs par langs dang rab snga dang / /legs par sad dang bde sgrub ma/ /de dag khyed la nad 107.249a med cing / /shis par lhag par skyong bar shog /lho phyogs logs kyi phyogs cha na/ /pad ma zhes bya'i mchod rten yod/ /rtag tu gzi brjid kyis kyang 'bar/ /rtag tu thams cad gsal byed pa/ /de yang khyed la nad med cing / /shis par lhag par skyong gyur cig /phyogs na khyed cag bde bar shog /khyed cag sdig par ma gyur cig /lha rnams kun gyis rab bsrungs nas/ /nor rnams rnyed de ldog par shog /dgos pa la la gang gi phyir/ /nub phyogs su ni 'gro ba na/ /gang dag phyogs der gnas pa yi/ /rgyu skar khyed la skyong gyur cig /lha mtshams dang ni snron dang yang / /brtson 'grus brtan ldan snums dang ni/ /chu stod chu smad byi bzhin dang / /gro bzhin de ni bdun pa yin/ /rgyu skar bdun po de dag ni/ /'jig rten skyong ba grags ldan pa/ /nub phyogs logs na yod ces bstan/ /de dag khyed la kun tu srungs/ /de dag bdag po rgyal po ni/ /mig mi bzang zhes bya bar shes/ /de ni klu rnams kun gyi bdag /chu lha lhan cig srung bar shog /de la bu ni mang yod la/ /mkhas shing ming yang 'thun pa ste/ /dgu bcu rtsa gcig zad par yang / /dbang po zhes bya stobs po che/ /de dag khyed la nad med cing / /shis par lhag par skyong gyur cig /nub phyogs logs kyi phyogs cha na/ /lha mo gzhon nu brgyad yod de/ /rna cha skra 'dres ma dang ni/ /pad ma dkar dang skya reng dang / /cha med gcig dang dgu pa dang / /rol dang gnag dang stabs myur srid/ /de dag khyed la nad med cing / /shis par lhag par skyong bar shog /nub phyogs logs kyi phyogs cha na/ /nub ces bya ba'i ri bo yod/ /nyi ma zla ba gnyis ka'ang nub/ /nub pa'ang khyed la nor sbyin 'gyur/ /de yang khyed la nad med cing / /shis par lhag par skyong gyur cig /phyogs na khyed cag bde bar shog /khyed cag sdig par ma gyur cig /lha rnams kun gyis rab bsrungs nas/ /nor rnams rnyed de ldog par shog /dgos pa la la gang gi phyir/ /byang phyogs su ni 'gro ba na/ / gang dag phyogs der gnas pa yi/ /rgyu skar khyed la skyong gyur cig /mon gru~M dang ni mon gre dang / /khrums stod dang ni khrums smad dang / /nam gru dang ni tha skar dang / /bra nye ste ni bdun pa yin/ /rgyu skar bdun po de dag ni/ /'jig rten skyong ba grags ldan pa/ /byang phyogs logs 107.249b na yod ces bstan/ /de dag khyed la kun tu srungs/ /de dag bdag po rgyal po ni/ /mi la zhon pa lus ngan po/ /gnod sbyin kun gyi bdag po ste/ /nor bzangs lhan cig srung bar shog /de la bu ni mang yod la/ /mkhas shing ming yang 'thun pa ste/ /dgu bcu rtsa gcig zad par yang / /dbang po zhes bya stobs po che/ /de dag khyed la nad med cing / /shis par lhag par skyong gyur cig /byang phyogs logs kyi phyogs cha na/ /lha mo gzhon nu brgyad yod de/ /rab chags lha mo gtong lha mo/ /sa dang de bzhin pad ma can/ /rgyal po che la nyer gnas dang / /re dang khrel yod dpal ldan ma/ /de dag khyed la nad med cing / /shis par lhag par skyong bar shog /byang phyogs logs kyi phyogs cha na/ /spos ngad ldang ba'i ri bo yod/ /gnod sbyin 'byung po rnams kyi gnas/ /rtse mo sna tshogs blta na sdug /de yang khyed la nad med cing / /shis par lhag par skyong gyur cig /phyogs na khyed cag bde bar shog /khyed cag sdig par ma gyur cig /lha rnams kun gyis rab bsrungs nas/ /nor rnams rnyed de ldog par shog /rgyu skar nyi shu rtsa brgyad po/ /phyogs bzhi dag na bdun bdun gnas/ /lha yi bu mo sum bcu gnyis/ /phyogs bzhi dag na brgyad brgyad gnas/ /dge sbyong brgyad dang bram ze brgyad/ /yul rnams na ni grong rdal brgyad/ /dbang por bcas pa'i lha brgyad rnams/ /de dag khyed la kun tu srungs/ /khyed cag 'gro na'ang bkra shis gyur/ /ldog pa na yang bkra shis shog /gnyen la lta ba bkra shis shog /gnyen gyis lta ba'ang bkra shis shog /dbang bcas gnod sbyin rgyal chen dang / /dgra bcom pa dag snying brtse bas/ /thams cad du ni bkra shis dang / /bdud rtsi shis pa thob par shog /tshangs pa dang ni de bzhin nor rgyas dang / /zag pa med pa rnam par grol rnams dang / /klu dang gnod sbyin rtag tu snying rjes srungs/ /ston brgya mtshungs par tshe ni skyong bar shog /'phags pa rgya cher rol ba'i mdo'i tshong dpon ga gon dang bzang po'i le'u las 'byung ba shis par brjod pa'i tshigs su bcad pa/ rdzogs s+ho// // |