J106

<head>
<link rel="stylesheet" type="text/css" href="../sub/style.css">
<link rel="stylesheet" type="text/css" href="../sub/cssstyles.css" />
<link rel="stylesheet" type="text/css" href="../sub/w3.css" />

<style>
.button {
  display: inline-block;
  border-radius: 4px;
  background-color: #08088a;
  border: none;
  color: #FFFFFF;
  text-align: center;
  font-size: 12px;
  padding: 10px;
  width: 130px;
  transition: all 0.5s;
  cursor: pointer;
  margin: 5px;
  border-radius: 12px;
}

.button span {
  cursor: pointer;
  display: inline-block;
  position: relative;
  transition: 0.5s;
}

.button span:after {
  content: '\00bb';
  position: absolute;
  opacity: 0;
  top: 0;
  right: -20px;
  transition: 0.5s;
}

.button:hover span {
  padding-right: 25px;
}

.button:hover span:after {
  opacity: 1;
  right: 0;
}
</style>
</head>
<div style="position: fixed; top: 0px; left: 0px; width: 150px; height: 60px; background-color: white">
<img src="../sub/logo.png" alt="rKTs" style="width:135px;height:60px;">
</div>

﻿
<table>
<tr height=50>
<tr>
<td width=150 valign=top>

<button  class="button" style="vertical-align:middle"  onclick="window.close();">Close window</button>
<td>


<table><tr><td><h1>J106</h1><td>(<a href="https://adarsha.dharma-treasure.org/kdbs/jiangkangyur" target="new2">e-text produced by ADARSHA</a>)<br><br><a href="verif2.php?id=J106&coll=lithang">see text in Tibetan script</a></table>54.144a<br><font size=+1>

 @#/ /rgya gar skad du/ Ar+ya shI ba su pa ri prits+tshA nA ma ma hA yA na sU tra/  bod skad du/   'phags pa dpal dbyig gis zhus pa zhes bya ba theg pa chen po'i mdo/  sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das bA ra Na sI na drang srong smra ba</font><hr>54.144b<br><font size=+1>

ri dgas kyi nags na byang chub sems dpa'i dge 'dun dang / nyan thos kyi dge 'dun chen po dang thabs gcig tu bzhugs te/ de nas tshong dpon gyi bu dpal dbyig ces bya ba bA ra Na sI'i grong khyer chen po nas byung nas/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te lan gsum bskor ba byas nas phyogs gcig tu 'dug go/ /phyogs gcig tu 'dug nas tshong dpon gyi bu dpal dbyig gis bcom ldan 'das ga la ba de logs su thal mo sbyar ba btud de bcom ldan 'das la 'di skad ces gsol to/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas ji snyed cig 'das shing gshegs lags/ bcom ldan 'das kyis bka' stsal pa/ tshong dpon gyi bu de bzhin gshegs pa dgra bcom pa yang dag par rdzogs pa'i sangs rgyas dpag tu med grangs med pa 'das shing gshegs te/ dper na gang gA'i klung gi bye ma snyed do/ /gsol pa/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas ji snyed cig skye zhing 'byung bar 'gyur lags/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas ji snyed cig da ltar bzhugs te 'tsho zhing bzhes lags/ bcom ldan 'das kyis bka' stsal pa/ tshong dpon gyi bu de bzhin gshegs pa dgra bcom pa yang dag par rdzogs pa'i sangs rgyas dpag tu med grangs med pa skye zhing 'byung bar 'gyur te/ dper na gang gA'i klung gi bye ma snyed do/ /tshong dpon gyi bu de bzhin gshegs pa dgra bcom pa yang dag par rdzogs pa'i sangs rgyas dpag tu med grangs med pa da ltar bzhugs la 'tsho zhing gzhes te/ dper na gang gA'i klung gi bye ma snyed do/ /de skad ces bka' stsal pa dang / bcom ldan 'das la tshong dpon gyi bu dpal dbyig gis 'di skad ces gsol to/ /bcom ldan 'das de ltar mi brgya'am/ mi stong ngam/ mi 'bum gyis sngon 'bad de btsal bas yang dag par rdzogs pa'i byang chub thob par gyur na/ bcom ldan 'das bdag gis kyang</font><hr>54.145a<br><font size=+1>

'bad de btsal na ci'i slad du/ de mi thob/ mi rtogs kyis de'i slad du thugs brtse bar dgongs te las dang po pa'i byang chub sems dpas ji ltar bgyi ba dang / ji ltar gnas par bgyi ba dang / ji ltar bsgrub par bgyi ba bcom ldan 'das kyis bdag la de ltar legs par bstan du gsol/ de skad ces gsol pa dang / bcom ldan 'das kyis tshong dpon gyi bu dpal dbyig la 'di skad ces bka' stsal to/ /tshong dpon gyi bu legs so legs so/ /khyod kyis rtog pa mdzes so/ /spobs pa dga'o/ /tshong dpon gyi bu de'i phyir legs par/ rab tu nyon la yid la zung shig dang / las dang po pa'i byang chub sems dpas ji ltar bya ba dang / ji ltar gnas par bya ba dang / ji ltar bsgrub par bya ba ngas khyod la bshad do/ /bcom ldan 'das legs so zhes gsol te tshong dpon gyi bu dpal gyi dbyig bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /tshong dpon gyi bu las dang po pa'i byang chub sems dpas ni nyin cig bzhin du snying thag pa rus pa'i khong nas yid la byas te/ sems can thams cad kyis bsam nas dus gsum du dkon mchog gsum la mchod pa dang rim gro bya ba mi gtang bar bya'o/ /tshong dpon gyi bu gzhan yang las dang po pa'i byang chub sems dpas ni snying thag pa rus pa'i khong nas yid la byas te/ sems can thams cad kyis bsam nas dus gsum du dkon mchog gsum la skyabs su 'gro ba'i yi dam mi gtang bar bya'o/ /tshong dpon gyi bu gzhan yang las dang po pa'i byang chub sems dpas ni snying thag pa rus pa'i khong nas yid la byas te/ sems can thams cad kyis bsam nas 'jig rten gyi khams thams cad du dkon mchog gsum gyis mi stong bar dus gsum du gsol bar gdab pa mi gtang bar bya'o/ /'jig rten gyi khams thams cad du dkon mchog gsum bskal pa du mar gnas par dus gsum du gsol ba gdab par mi gtang bar bya'o/ /'jig rten gyi khams thams cad du sems can thams cad la bskal pa du mar chos bstan par dus gsum du gsol ba gdab par mi gtang bar bya'o/ /'jig rten gyi khams</font><hr>54.145b<br><font size=+1>

thams cad du sems can thams cad la ci nus pa dang / ci lcogs pa dang / ji ltar gsol ba 'debs pa bzhin du theg pa gsum la byang chub tu sems bskyed par dus gsum la du gsol ba gdab pa mi gtang bar bya'o/ /'jig rten gyi khams thams cad kyi khongs su gtogs pa'i sems can thams cad bsgral ba'i phyir dge ba'i rtsa ba thams cad myur zhing rings par yongs su rdzogs par 'gyur bar dus gsum du gsol ba gdab pa mi gtang bar bya'o/ /'jig rten gyi khams thams cad kyi khongs su gtogs pa'i sems can thams cad kyis byang chub gsum thob par 'gyur bar dus gsum du gsol ba gdab pa mi gtang bar bya'o/ /'jig rten gyi khams thams cad kyi khongs su gtogs pa'i sems can ngan 'gror skyes pa thams cad ngan 'gro thams cad nas gdon par dus gsum du gsol ba gdab pa mi gtang bar bya'o/ /'jig rten gyi khams thams cad kyi khongs su gtogs pa'i sems can thams cad kyi sdig pa thams cad spong bar 'gyur bar dus gsum du gsol ba gdab pa mi gtang bar bya'o/ /'jig pa thams cad spong bar 'gyur bar gsol ba gdab pa dang / sdug bsngal ba dang / yid mi bde ba dang / 'khrug pa spong bar 'gyur ba dus gsum du gsol ba gdab pa mi gtang bar bya'o/ /'das pa dang / ma 'ongs pa dang / da ltar byung ba'i sangs rgyas dang / byang chub sems dpa' dang / rang sangs rgyas dang / 'phags pa nyan thos la sogs pa thams cad dang / sems can thams cad kyi dge ba'i rtsa ba thams cad la dus gsum du rjesu yid rang ba mi gtang bar bya'o/ /tshong dpon gyi bu gzhan yang las dang po pa'i byang chub sems dpas ni snying thag pa rus pa'i khong nas yid las byas te/ sems can thams cad kyis bsam nas dus gsum du rdzogs pa'i byang chub tu smon pa dang / bdag nyid sdig pa'i spyod pa la rnam par smod pa dang / sdig pa spyod pa la bshung ba dang / sdig pa las nges par 'byung ba dang / dge ba thams cad 'dod pa dang / dge ba thams cad blang</font><hr>54.146a<br><font size=+1>

ba dang / tshe rabs tshe rabs su yang dkon mchog gsum la bsnyen bskur bya bar gsol ba gdab pa dang / gcig tu nges par rnam par dag pa'i dge ba'i spyad pa spyod par gsol ba gdab pa dang / yang dag par rdzogs pa'i byang chub kyi tshogs yongs su rdzogs par bya bar gsol bar gdab pa dang / sangs rgyas kyi chos thams cad 'thob par gsol bar gdab pa dang / chos kyi 'khor lo bskor bar gsol ba gdab pa dang / bskal pa du mar chos bstan par gsol ba gdab pa mi gtang bar bya'o/ /tshong dpon gyi bu gzhan yang las dang po pa'i byang chub sems dpas ni pha ma la gnod pa med pa dang / bu dang / chung ma dang / bran pho dang / bran mo dang / las byed pa dang / 'o shos 'tsho ba dang / mdza' bo dang / blon po dang / nye du dang / rgan rabs la gnod pa med par ji ltar mos pa dang / ci nus par dus dus su sbyin pa sbyin par bya'o/ /tshong dpon gyi bu gzhan yang las dang po pa'i byang chub sems dpas ni bslab pa'i gzhi lnga la gnas zhing 'dug pa dang / brtan por 'dug pa dang / mi lhod par 'dug par bslab par bya'o/ /gal te bslab pa'i gzhi lnga la slob mi nus na yang / des bzhi'am/ gsum 'am/ gnyis sam de'i nang nas bslab pa'i gzhi cig tsam la yang bslab par bya'o/ /gal te bslab pa'i gzhi cig tsam la slob kyang mi nus na de sdig pa'i las mi dge ba gang dang gang kun tu spyod pa de la zhen pa ma yin pa dang / drag po ma yin pa'i sems dang / mi dga' ba zhen pa dang / lhod pa dang / yang ba'i sems dang / don gyi dbang dang / dgos pa'i dbang gis spyad par bya ste/ de mi dge ba bcu'i las khro ba'i dbang du gyur pa dang / 'khon du 'dzin pa'i dbang du gyur pa dang / dga' ba dang mchog tu dga' ba'i dbang du gyur pas kun tu spyad par mi bya'o/ /kun tu spyad par 'dod pa na yang rnam par smad par bya/ rnam par bshung bar bya'o/ /spyod cing 'dug pa na yang rnam par smad par bya/ rnam par bshung bar bya'o/ /spyad zin pa na yang rnam par smad par bya/ rnam par bshung bar bya'o/ /so sor bshags par bya'o/ /nges par 'byung bar</font><hr>54.146b<br><font size=+1>

bya'o/ /legs pa dge ba ci yang rung ba zhig /kun tu spyod pa na ni des ni de la sems zhen pa dang / drag po'i sems dang / tshim pa dang / mgu ba dang / lhod pa ma yin pa dang / yang ba ma yin pa dang / bar chad med pa dang / dad pa dang / dga' ba dang / dang ba dang / mchog tu dga' ba'i dbang du gyur pa'i sems kyis kun tu spyad par bya'o/ /kun tu spyod par 'dod pa na yang snying thag pa rus pa'i khong nas yid la byas te/ sems can thams cad kyis bsam nas sems can thams cad bsgral ba'i phyir dang / dgrol ba'i phyir dang / dbugs dbyung ba'i phyir dang / yongs su mya ngan las bzla ba'i phyir dang / thams cad mkhyen pa nyid thob par bya ba'i phyir dang / sangs rgyas kyi chos thams cad yongs su rdzogs par bya ba'i phyir bla na med pa yang dag par rdzogs pa'i byang chub tu yongasu bsngo bar bya'o/ /des dge ba kun tu spyod pa 'das pa dang / ma 'ongs pa dang / da ltar byung ba thams cad la yang snying thag pa rus pa'i khong nas yid la byas te/ sems can thams cad kyis bsam nas/ mngon par bsdus te bzlum nas rjes su yi rang bar bya'o/ /rjes su yid rang ba'i mchog dang / phul dang / gtso bo dang / rab dang / rab mchog dang / gya nom pa dang / dam pa dang / mnyam pa med pa dang / mi mnyam pa dang / mnyam pa dang / namakha' dang mnyam pa dang / mya ngan las 'das pa dang / mnyam pa'i rjes su yid rang bas rjes su yid rang bar bya'o/ /rjes su yid rang nas kyang dge ba kun tu spyad pa de yang sangs rgyas dang / byang chub sems dpa' dang / rang sangs rgyas dang / nyan thos thams cad la dbul bar bya'o/ /phul nas kyang sems can thams cad dang / thun mong du bya zhing sems can thams cad bsgral ba'i phyir dang / dgrol ba'i phyir dang / dbugs dbyung ba'i phyir dang yongs su mya ngan las bzla ba'i phyir dang / sangs rgyas kyi chos thams cad yongs su rdzogs par bya ba'i phyir dang / thams cad mkhyen pa nyid 'thob par bya ba'i phyir nyin gcig bzhin du dus gsum du bla na med pa yang dag par rdzogs pa'i byang chub tu</font><hr>54.147a<br><font size=+1>

yongs su bsngo bar bya'o/ /des ka shi ka'i gos dang / tsan dan dang / a ga ru'i bdug pa la sogs pa dang / yo byad rnam pa sna tshogs nyams su myong ngam/ 'dod pa'i yon tan lnga la dga' mgur spyod dam/ lam du 'gro ba 'am/ 'du byed dam/ bya ba thams cad byed pa na yang bla na med pa yang dag par rdzogs pa'i byang chub tu 'dun pa dang / dad pa dang / don du gnyer ba dang / smon pa de 'ba' zhig rtag tu rgyun mi chad par rjesu dran par bya'o/ /yid la bya'o/ /bsgom par bya'o/ /lan mang du bya'o/ /de ltar byas na de sdig pa mi dge ba kun tu spyod pa rnams la sems lhod par 'gyur/ yang bar 'gyur/ chung bar 'gyur/ srab par 'gyur/ gsog tu 'gyur ro/ /legs par dge ba'i las kun tu spyod pa rnams la ni sems zhen par 'gyur/ drag par 'gyur/ mi lhod par 'gyur/ mi yang bar 'gyur/ mi chung bar 'gyur ro/ /de sdig pa mi dge ba kun tu spyod pa rnams la lhod par 'gyur/ yang bar 'gyur/ chung bar 'gyur/ srab par 'gyur/ gsog du 'gyur/ med par 'gyur ba dang / legs pa dge ba'i rtsa ba kun tu spyod pa rnams la sems zhen par gyur pas srid pa'i 'gro ba gang dang phrad pa dag du chung bar mi 'gyur ro/ /'khu ba dang / gsod pa dang / 'ching ba dang / rnam par 'tshe ba gang yin pa rnams legs par spang ba dang / 'jig rten gyi khams mtha' yas mu med pa'i khongs su gtogs pa'i sems can mtha' yas mu med pa rnams kyis thog ma med pa'i dus nas bsags pa dus mtha' yas par nyams su myong bar 'gyur ba'i skye ba dang / rga ba dang / na ba dang / 'chi ba'i sdug bsngal dang / mi sdug pa dang phrad pa dang / sdug pa dang bral ba'i sdug bsngal ba dang / 'dod pas phongs pa'i sdug bsngal dang / lha dang mi dang / lha ma yin dang / dud 'gro dang / yi dgas dang / sems can dmyal ba'i sdug bsngal dang / 'dod chags dang / zhe sdang dang / gti mug gi sdug bsngal gcad par bya ba dang / dgag par bya ba dang / rnam par zhi bar bya ba'i phyir zhugs pa dang / byams pa'i</font><hr>54.147b<br><font size=+1>

sems su gyur pa dang / snying rje chen po'i sems su gyur pa dang / go cha chen po bgos pa dang / theg pa chen po la zhugs pa dang / sangs rgyas kyi chos rgya chen po la mos pa dang / sangs rgyas dang / chos dang / dge 'dun gyi gdung mi 'chad par nges par byed pa'i phyir sdig pa mi dge ba kun tu spyod pa rnams yongs su 'grib par 'gyur ba dang / chung bar 'gyur ba nas srab pa'i bar du 'gyur ro/ /legs pa dge ba kun tu spyod pa rnams ni 'phel bar 'gyur ba nas dpag tu med pa'i bar du 'gyur ro/ /de nas byang chub sems dpa'i bsam pa sogs shing sgom pa yang yongasu rdzogs pa dang / sra ba dang / brtan pa dang / rdo rje lta bur 'gyur ro/ /tshong dpon gyi bu de lta na las dang po pa'i byang chub sems dpa' de go rims 'di lta bus mthar gyis srid pa 'di dang / srid pa phyi ma dang / srid pa lan grangs gzhan dag la sdig pa mi dge ba kun tu spyod pa 'grib par byed pa dang / chung ngur byed pa nas gsog tu byed pa'i bar dang / legs pa dge ba kun tu spyod pa 'phel bar 'gyur ba nas dpag tu med pa'i bar du 'gyur ba dang / byang chub sems dpa'i bsam pa yang sogs shing sgom par byed de/ legs pa dge ba kun tu spyad pa rnams yongs su smin pas myur du bla na pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /de nas de'i tshe yul da ra da nas da ra da'i rgyal po sin du gi ri zhes bya ba'i bu bcom ldan 'das la blta ba dang / phyag bya ba dang / bsnyen bkur bya ba'i phyir bA ra Na sir song nas de bcom ldan 'das dang thag mi ring ba zhig na 'dug par gyur to/ /de nas da ra da'i rgyal po sin du gi ri'i bu stan las langs te/ bla gos phrag pa gcig tu gzar nas/ pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das khyod kyis legs par bka' stsal to/ /bde bar gshegs pa khyod kyis legs par bka' stsal to/ /bcom ldan 'das byang chub kyi sems kyi gsol bar 'debs shing</font><hr>54.148a<br><font size=+1>

snying thag pa rus pa'i khong nas yid la bgyis te/ sems can thams cad kyis bsam nas dus gsum du gsol ba 'debs shing brjod pa gang lags pa de tsam yang bcom ldan 'das yang dag par rdzogs pa'i byang chub kyi tshogs 'phel bar 'gyur zhing yang dag par rab tu 'phel bar 'gyur/ sogs par 'gyur/ grangs ma mchis par bgyid/ byang chub sems dpa'i bsam pa yang sogs shing sgom pa dang / yongs su rdzogs par 'gyur zhing sra ba dang / brtan pa dang rdo rje lta bur 'gyur na gong du rtsol zhing brtson pa mi gtong ba lta ci smos lags/ bcom ldan 'das bdag kyang snying thag pa rus pa'i khong nas yid la bgyid de/ sems can thams cad kyis bsam nas sems can thams cad bsgral ba dang / dgrol bar bgyi ba dang / dbugs dbyung ba dang / yongs su mya ngan las bzla ba dang / sangs rgyas kyi chos thams cad yongs su rdzogs par bgyi ba dang / thams cad mkhyen pa nyid thob par bgyi ba'i slad du yang dag par rdzogs pa'i byang chub tu smon lam 'debs te/ sems can ma rgal ba rnams sgrol ba/ ma grol ba rnams 'grol ba/ dbugs ma phyin pa rnams dbugs 'byin pa/ yongasu mya ngan las ma 'das pa rnams yongasu mya ngan las zlo ba'i sangs rgyas su gyur cig /yang dang yang du lan brgyar brnan te/ mtha' yas pa mtha' yas par bla na med pa yang dag par rdzogs pa'i byang chub tu smon lam 'debs lags so/ /de nas tshong dpon gyi bu dpal dbyigs gis kyang de'i rjes thogs su de bzhin du bla na med pa yang dag par rdzogs pa'i byang chub tu smon lam btab bo/ /bcom ldan 'das kyis de skad ces bka' stsal nas/ tshong dpon gyi bu dpal dbyig dang / da ra da'i rgyal po'i bu dang / byang chub sems dpa' de dag dang / dge slong de dag dang / lha dang / mi dang / lha ma yin dang / dri zar bcas pa'i 'jig rten yid rangs te/ bcom ldan 'das kyis gsungs pa la mngon par</font><hr>54.148b<br><font size=+1>

bstod do/ /'phags pa dpal dbyig gis zhus pa zhes bya ba theg pa chen po'i mdo/ rdzogs so// // rgya gar gyi mkhan po su ren tra bo d+hi dang / pradz+nyA bar ma dang / zhu chen gyi lots+tsha ba ban de ye shes sde la sogs pas bsgyur cing zhus te gtan la phab pa/ / </font><hr>

</table>