@#/ /rgya gar skad du/ Ar+ya d+harma mu drA nA ma ma hA yA na sU tra/ bod skad du/ 'phags pa chos kyi phyag rgya zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na/ dge slong lnga stong thams pa'i dge slong gi dge 'dun chen po dang / byang chub sems dpa' sems dpa' chen po rab tu mang po dag dang thabs gcig tu bzhugs te/ de nas tshe dang ldan pa shA ri'i bu bcom ldan 'das kyi mthus stan las langs te/ bla gos phrag pa gcig tu gzar nas pus mo g.yas pa'i lha nga sa la gtsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das rab tu byung ba zhes bgyi na bcom ldan 'das ji tsam gyis na legs par gsungs pa'i chos 'dul ba la dge slong rab tu byung ba 'phags pa 'jig rten las 'das 57.89b pa'i rdzogs par bsnyen pas rdzogs par bsnyen pa lags/ bcom ldan 'das kyis bka' stsal pa/ shA ri'i bu so so'i skye bo'i chos rnams las kyang ma 'das la/ zag pa med pa'i chos rnams kyang ma thob pa de tsam gyis na dge slong legs par gsungs pa'i chos 'dul ba la rab tu byung ba 'phags pa 'jig rten las 'das pa'i rdzogs par bsnyen pas rjogs par bsnyen pa yin te/ de ltar rab tu byung ba gang dag yin pa de dag ni yang dag par rab tu byung ba yin gyi de lta ma yin par rab tu byung ba gang dag yin pa de dag ni log par rab tu byung ba yin no/ /shA ri'i bu dge slong de lta bus ni dad pas byin pa longs spyad par 'os te/ gos dang / zas dang mal cha dang / stan dang / na ba'i gsos sman dang / sman zong rnams longs spyad par 'os so/ /shA ri'i bu gzhan yang brtson pa mi gtong ba'i dge slong gang yin pa de ni gzugs gtong bar mi byed/ tshor ba dang / 'du shes dang / 'du byed rnams dang / rnam par shes pa gtong bar mi byed de/ de tsam gyis na dge slong legs par gsungs pa'i chos 'dul ba la rab tu byung ba 'phags pa 'jig rten las 'das pa'i rdzogs par bsnyen pas rdzogs par bsnyen pa yin te/ de ltar rab tu byung ba gang dag yin pa de dag ni yang dag par rab tu byung ba yin gyi/ de lta ma yin par rab tu byung ba gang dag yin pa de dag ni log par rab tu byung ba yin no/ /shA ri'i bu dge slong de lta bus ni dad pas byin pa longs spyad par 'os te/ gos dang zas dang / mal cha dang / stan dang / na ba'i gsos dang / sman zong rnams longs spyad par 'os so/ /de nas tshe dang ldan pa rab 'byor gyis tshe dang ldan pa shA ri'i bu la 'di skad ces smras so/ /tshe dang ldan pa shA ri'i bu bcom ldan 'das kyis ci la dgongs te/ so so'i skye bo'i chos rnams las kyang ma 'das la/ zag pa med pa'i chos rnams kyang 57.90a ma thob pa de tsam gyis na dge slong legs par gsungs pa'i chos 'dul ba la rab tu byung ba 'phags pa 'jig rten las 'das pa'i rdzogs par bsnyen pas rdzogs par bsnyen pa yin te/ de ltar rab tu byung ba gang dag yin pa de dag ni yang dag par rab tu byung ba yin gyi/ de lta ma yin par rab tu byung ba gang dag yin pa de dag ni log par rab tu byung ba yin no/ /shA ri'i bu dge slong de lta bus ni dad pas byin pa longs spyad par 'os te/ gos dang / zas dang / mal cha dang stan dang na ba'i gsos sman dang / sman zong rnams longs spyod par 'os so zhes de skad bka' stsal/ shA ri'i bus smras pa/ tshe dang ldan pa rab 'byor so so'i skye bo'i chos rnams ni sgyu ma lta bu ste/ de dag ni 'da' bar bya bar mi nus so/ /tshe dang ldan pa rab 'byor so so'i skye bo'i chos rnams ni yongs su ma grub pa ste/ de dag ni 'da' bar bya ba ma yin no/ /tshe dang ldan pa rab 'byor sems can gyi khams ni nang na yang mi dmigs/ phyi rol na yang mi dmigs/ gnyis ka med par yang mi dmigs te/ sems can gyi khams kyi rang bzhin gang yin pa dang / so so'i skye bo'i chos rnams kyi rang bzhin gang yin pa de dag ni 'da' bar bya bar sla ba ma yin no/ /tshe dang ldan pa rab 'byor bcom ldan 'das kyis 'di skad du so so'i skye bo'i chos rnams las kyang ma 'das la zag pa med pa'i chos rnams kyang ma thob pa de tsam gyis na dge slong legs par gsungs pa'i chos 'dul ba la rab tu byung ba 'phags pa'i 'jig rten las 'das pa'i rdzogs par bsnyen pas rdzogs par bsnyen pa yin te/ de ltar rab tu byung ba gang dag yin pa de dag ni yang dag par rab tu byung ba yin gyis/ de lta ma yin par rab tu byung ba gang dag yin pa de dag ni log par rab tu byung ba yin no/ /shA ri'i bu dge slong de lta bus ni dad pas byin pa longs spyad par 'os te/ gos dang / zas dang / 57.90b mal cha dang / stan dang / na ba'i gsos dang / sman zong rnams longs spyad par 'os so zhes gang gsungs pa de yang tshe dang ldan pa rab 'byor gang dag gi rten tam/ gnas med pa de dag ni ji ltar thob par rung / tshe dang ldan pa rab 'byor gal te zag pa med pa'i chos rnams thob tu rung na ni dmigs pa las dgra bcom pa 'byung bar 'gyur ro/ /de bzhin gshegs pa dgra bcom pa yang dag par rdzogs pa'i sangs rgyas rnams kyi chos nyid ni ltos pa med pa ste/ tshe dang ldan pa rab 'byor bcom ldan 'das kyis de la dgongs nas 'di skad du so so'i skye bo'i chos rnams las kyang ma 'das la/ zag pa med pa'i chos rnams kyang ma thob pa de tsam gyis na dge slong legs par gsungs pa'i chos 'dul ba la rab tu byung ba 'phags pa 'jig rten las 'das pa'i rdzogs par bsnyen pas rdzogs par bsnyen pa yin te/ de ltar rab tu byung ba gang dag yin pa de dag ni yang dag par rab tu byung ba yin gyi/ de ltar ma yin par rab tu byung ba gang yin pa de dag ni log par rab tu byung ba yin no/ /shA ri'i bu dge slong de lta bus ni dad pas byin pa la longs spyad par 'os te/ gos dang / zas dang / mal cha dang / stan dang / na ba'i gsos sman dang / sman zong rnams longs spyad par 'os so zhes bka' stsal to/ /de nas tshe dang ldan pa rab 'byor gyis yang tshe dang ldan pa shA ri'i bu la 'di skad ces smras so/ /tshe dang ldan pa shA ri'i bu bcom ldan 'das kyis ci las dgongs te brtson pa mi gtong ba'i dge slong gang yin pa de ni gzugs gtong bar mi byed/ tshor ba dang / 'du shes dang / 'du byed rnams dang / rnam par shes pa gtong bar mi byed de/ de tsam gyis na dge slong legs par gsungs pa'i chos 'dul ba la rab tu byung ba 'phags pa 'jig rten las 'das pa'i rdzogs par bsnyen pas rdzogs par bsnyen pa 57.91a yin te/ de ltar rab tu byung ba gang dag yin pa de dag ni yang dag par rab tu byung ba yin gyi/ de lta ma yin par rab tu byung ba gang dag yin pa de dag ni log par rab tu byung ba yin no/ /shA ri'i bu dge slong de lta bus ni dad pas byin pa longs spyod par 'os te/ gos dang / zas dang / mal cha dang / stan dang / na ba'i gsos sman dang / sman zong rnams longs spyad par 'os so zhes de skad bka' stsal/ shA ri'i bus smras pa/ tshe dang ldan pa rab 'byor bcom ldan 'das kyis chos nyid las dgongs nas 'di skad du brtson pa mi gtong ba'i dge slong gang yin pa de ni gzugs gtong bar mi byed/ tshor ba dang / 'du shes dang / 'du byed rnams dang / rnam par shes pa gtong bar mi byed ces bka' stsal to/ /tshe dang ldan pa rab 'byor chos kyi dbyings ni nang na yang mi dmigs/ phyi rol na yang mi dmigs/ gnyi ga med par yang mi dmigs so/ /nang gdags pa ni gdags su med pa dang skye ba med pa'i gdags pa'o/ /de ltar na sems can gyi khams mnyam pa nyid kyis chos kyi dbyings mnyam pa nyid do/ /chos kyi dbyings mnyam pa nyid kyis sems can gyi khams mnyam pa nyid do/ /de ltar na sems can gyi khams dang chos kyi dbyings 'di ni gnyis su med de gnyis su byar med do/ /gang la gnyis su med pa de gnyis su byar med pa de la ni gsal ba yang med/ gzhag pa yang med do/ /gang la gsal ba yang med/ gzhag pa yang med pa de ni 'das pa 'am 'thob par byar mi nus te/ tshe dang ldan pa rab 'byor bcom ldan 'das kyis de la dgongs nas 'di skad du brtson pa mi gtong ba'i dge slong gang yin pa de ni gzugs gtong bar mi byed/ tshor ba dang / 'du shes dang / 'du byed rnams dang / rnam par shes pa gtong bar mi byed de/ de tsam gyis na dge slong legs par gsungs pa'i chos 'dul ba la rab tu byung ba 'phags pa 57.91b 'jig rten las 'das pa'i rdzogs par bsnyen pas rdzogs par bsnyen pa yin te/ de ltar rab tu byung ba gang dag yin pa de dag ni yang dag par rab tu byung ba yin gyi/ de lta ma yin par rab tu byung ba gang dag yin pa de dag ni log par rab tu byung ba yin no/ /shA ri'i bu dge slong de lta bus ni dad pas byin pa longs spyad par 'os te/ gos dang / zas dang / mal cha dang / stan dang / na ba'i gsos sman dang / sman zong rnams longs spyad par 'os so zhes bka' stsal to/ /dogs pa med pa'i dge slong ni dogs pa khas mi len to/ /yi ge med cing yi ge las 'das pa'i dge slong gang yin pa de ni bgrang ba las bstan par mi nus la/ de la ni 'ong ba yang med/ 'gro ba yang med/ 'greng ba yang med/ 'dug pa yang med/ nyal ba yang med do/ /rtog pa can ma yin pa'i dge slong ni brtags pa la longs spyod pa'o/ /rtog pa can gyi dge slong ni ma brtags pa la longs spyod pa ste/ tshe dang ldan pa rab 'byor bcom ldan 'das kyis de la dgongs nas de tsam gyis na dge slong legs par gsungs pa'i chos 'dul ba la rab tu byung ba 'phags pa 'jig rten las 'das pa'i rdzogs par bsnyen pas rdzogs par bsnyen pa yin te/ de ltar rab tu byung ba gang dag yin pa de dag ni yang dag par rab tu byung ba yin gyi/ de lta ma yin par rab tu byung ba gang dag yin pa de dag ni log par rab tu byung ba yin no/ /shA ri'i bu dge slong de lta bus ni dad pas byin pa longs spyad par 'os te/ gos dang / zas dang / mal cha dang / stan dang / na ba'i gsos sman dang / sman zong rnams longs spyad 'os so zhes bka' stsal to/ /de nas bcom ldan 'das kyis tshe dang ldan pa shA ri'i bu la legs so zhes bya ba byin te/ shA ri'i bu legs so legs so/ /khyod kyis ji skad bstan pa bzhin du ngas de las dgongs nas bstan pa yin te/ 'di ni legs par gsungs pa'i chos 57.92a 'dul ba la rab tu byung ba yin no/ /shA ri'i bu phyag rgya 'dis mngon pa'i nga rgyal can brtag par 'dod pas ni phyag rgya de'i mdun du brjod par bya'o/ /shA ri'i bu shin du brtags pa ni phyag rgya 'dis ni mngon pa'i nga rgyal can mang po brtag par nus so/ /chos kyi rnam grangs 'di bstan pa na dge slong bdun brgya len pa med par zag pa rnams las sems rnam par grol lo/ /srid pa tha ma pa'i dge slong brgya ni chos kyi rnam grangs 'di la ma zhugs shing ma rtogs la ma mos nas stan las langs te dong ngo / /dge slong lnga ni spong ba byas shing bzlog pa byas nas rang gi lus dang bcas te sems can dmyal ba chen por lhung ngo / /bcom ldan 'das kyis bka' stsal pa/ shA ri'i bu ngas kye ma chos 'di ni 'jig rten thams cad dang mi mthun no snyam ste/ de la dgongs nas de skad bstan mod kyi 'on kyang gang dang yang mi mthun pa med de/ shA ri'i bu dper na mi la la zhig gnyid kyis log pa'i rmi lam du skye bo phal po che'i mdun du khyed la ngas chos bshad par bya'o/ /chos de yang 'jig rten thams cad dang mi mthun no zhes tshig tu smra na/ shA ri'i bu 'di ji snyam du sems/ chos de dang mi mthun pa gang dag yin pa'i mi de dag yod pa yin nam/ gsol pa/ bcom ldan 'das de ni ma mchis lags so/ /bcom ldan 'das kyis bka' stsal pa/ shA ri'i bu de bzhin du nga yang kye ma chos 'di ni 'jig rten thams cad dang mi mthun no zhes de skad du yang ston la de 'jig rten de yang yang dag par ma mthong ngo / /'jig rten med pa la ni chos kyang bgrang du med do/ /'jig rten gdags pa yang med do/ /shA ri'i bu 'jig rten thams cad dang mi mthun pa zhes bya ba ni chos rnams ma 'dres shing chos rnams 'dre ba med pa la bya bar gsungs so/ /gsol pa/ bcom ldan 'das ma 'dres 57.92b pa zhes bgyi ba'i tshig gi don gang lags/ bka' stsal pa/ shA ri'i bu ma 'dres pa zhes bya ba ni chos rnams ro gcig par gdags pa yin te/ gcig pu kho na yang ma yin/ tha dad pa kho na yang ma yin no/ /shA ri'i bu ma 'dres pa zhes bya ba de ni stong pa nyid kyi tshig bla dgas so/ /gsol pa/ bcom ldan 'das stong pa nyid ces bgyi ba'i tshig gi don gang lags/ bka' stsal pa/ shA ri'i bu stong pa nyid ces bya ba ni gdags su med pa'o/ /gang gdags su med pa de ni gdags par mi nus so/ /gang gdags par mi nus pa de ni 'jig rten pa yang ma yin/ 'jig rten las 'das pa yang ma yin no/ /shA ri'i bu gang 'jig rten pa yang ma yin/ 'jig rten las 'das pa yang ma yin pa de ni stong pa nyid ces bya'o/ /bcom ldan 'das kyis de skad ces bka' stsal nas/ tshe dang ldan pa shA ri'i bu dang / dge slong gi dge 'dun thams cad dang / byang chub sems dpa' sems dpa' chen po de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa chos kyi phyag rgya zhes bya ba theg pa chen po'i mdo rdzogs so// // |