//rgya gar skad du/ Ar+ya 39.165a b+ha ga ba ti pra dz+nyA pA ra mi tA pany+tsA sha ti ka / bod skad du/ 'phags pa bcom ldan 'das ma shes rab kyi pha rol tu phyin pa lnga bcu pa/ /sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong gi dge 'dun chen po dang /[ ]byang chub sems dpa'i dge 'dun chen po dang thabs gcig tu bzhugs te/ brgya byin dang / tshangs pa dang / 'jig rten skyong ba dang / lha dang /[ ]klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / dge slong dang / dge slong ma dang / dge bsnyen dang / dge bsnyen ma du ma dag dang yang thabs gcig go/ /de nas bcom ldan 'das kyis tshe dang ldan pa rab 'byor la bka' stsal pa/ rab 'byor gang la la zhig nyan thos kyi sa la slob par 'dod pa dang /[ ]rang sangs rgyas kyi sa la slob par 'dod pas shes rab kyi pha rol tu phyin pa 'di nyid mnyan par bya/ gzung bar bya/ bcang bar bya/ klag par bya/[ ]kun chub par bya'o/ /byang chub sems dpa' thabs la mkhas pa dang ldan pas sangs rgyas dang / byang chub sems dpa'i chos thams cad yang dag par bsgrub pa'i phyir shes rab kyi pha rol tu phyin pa 'di nyid la mngon par brtson par bya'o/ /de ci'i phyir zhe na/ rab 'byor 'di ltar byang chub sems dpa' sems dpa' chen pos gang la bslab par bya ba dang / rnal 'byor du bya ba sangs rgyas dang byang chub sems dpa'i chos thams cad shes rab kyi pha rol tu phyin pa 'di nyid du rgya cher bstan pa'i phyir ro/ /bla na med pa yang dag par rdzogs pa'i byang chub la slob par 'dod pas kyang shes rab kyi pha rol tu phyin pa 'di nyid mnyan par bya/ gzung bar bya/[ ]bcang bar bya/ klag par bya kun chub par bya'o/ /byang chub sems dpa' thabs la mkhas pa dang ldan pas sangs rgyas dang byang chub sems dpa'i chos thams cad yang dag par bsgrub pa'i phyir shes rab kyi pha rol tu phyin pa 'di nyid la mngon par brtson par bya'o/ /de ci'i phyir zhe na/ rab 39.165b 'byor 'di ltar byang chub sems dpa' sems dpa' chen pos gang la bslab par bya ba dang / rnal 'byor du bya ba sangs rgyas dang byang chub sems dpa'i chos thams cad shes rab kyi pha rol du phyin pa 'di nyid du rgya cher bstan pa'i phyir ro/ /rab 'byor dge ba'i chos byang chub kyi phyogs rnams dang / nyan thos kyi chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs rgyas kyi chos rnams gang dag yin pa de dag thams cad ni shes rab kyi pha rol du phyin pa'i nang du chud cing 'dus te 'ub la yang dag par gzhol ba yin no/ /rab 'byor gyis gsol pa/ bcom ldan 'das shes rab kyi pha rol du phyin pa la bslab par bya/ rnal 'byor du bya ste/ nyan thos kyi sa la slob par 'dod pa dang / rang sangs rgyas kyi sa la slob par 'dod pas shes rab kyi pha rol du phyin pa 'di nyid dang / sangs rgyas kyi chos rnams dang / byang chub sems dpa'i chos rnams kyang mnyan par bya/ gzung bar bya/ bcang bar bya/[ ]klag par bya/ kun chub par bya'o/ /dge ba'i chos byang chub kyi chos rnams dang / nyan thos kyi chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs rgyas kyi chos rnams gang dag yin pa rnams shes rab kyi pha rol tu phyin pa'i nang du chud cing 'dus te 'ub la yang dag par gzhol ba yin no zhes bgyi ba de dag gang lags/[ ]bcom ldan 'das kyis bka' stsal pa/ rab 'byor 'di lta ste sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol du phyin pa dang / nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang /[ ]'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid 39.166a dang /[ ]dor ba med pa stong pa nyid dang / rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / dngos po med pa stong pa nyid dang / ngo bo nyid stong pa nyid dang / dngos po med pa'i ngo bo nyid stong pa nyid dang / dran pa nye bar gzhag pa bzhi dang / yang dag pa'i spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad dang / 'phags pa'i bden pa bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar kyis gnas pa'i snyoms par 'jug pa dgu dang / rnam par thar pa'i sgo stong pa nyid dang / mtshan ma med pa dang / smon pa med pa dang / mngon par shes pa rnams dang / ting nge 'dzin rnams dang / gzungs kyi sgo rnams dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / byams pa chen po dang / snying rje chen po dang /[ ]sangs rgyas kyi chos ma 'dres pa bcwa brgyad dang / rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa nyid dang / rang byang chub nyid dang / thams cad shes pa nyid dang / lam gyi rnam pa shes pa nyid dang / rnam pa thams cad mkhyen pa nyid do/ /rab 'byor de dag ni dge ba'i chos byang chub kyi phyogs rnams dang / nyan thos kyi chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs rgyas kyi chos rnams gang dag yin pa rnams shes rab kyi pha rol tu phyin pa'i nang du chud cing 'dus te 'ub la yang dag par gzhol ba rnams yin no/ /rab 'byor gyis gsol pa/[ ]bcom ldan 'das 'di ltar dge ba'i chos byang chub kyi phyogs rnams dang /[ ]nyan thos kyi chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs 39.166b rgyas kyi chos rnams gang dag lags pa de dag shes rab kyi pha rol tu phyin pa'i nang du chud cing 'dus te/[ ]'ub la yang dag par gzhol ba ni bcom ldan 'das kye ma a la la shes rab kyi pha rol tu phyin pa 'di zab pa lags so/ /bcom ldan 'das kyis bka' stsal pa/[ ]rab 'byor shes rab kyi pha rol tu phyin pa shin du dben pa'i phyir ro/ /rab 'byor gyis gsol pa/ bcom ldan 'das kye ma a la la shes rab kyi pha rol tu phyin pa 'di ni gting dpag dka' ba lags so/ /bcom ldan 'das kyis bka' stsal pa/ rab 'byor shes rab kyi pha rol tu phyin pa shin du rnam par dag pa'i phyir ro/ /rab 'byor gyis gsol pa/ bcom ldan 'das kye ma a la la/ a la la/ shes rab kyi pha rol du phyin pa 'di nam mkha' dang mtshungs pa lags so/ /bcom ldan 'das kyis bka' stsal pa/ rab 'byor shes rab kyi pha rol du phyin pa shin du rnam par dag pa'i phyir te/ rab 'byor de bas na shes rab kyi pha rol du phyin pa ni nam mkha' lta bu yin no/ /rab 'byor gyis gsol pa/[ ]bcom ldan 'das kye ma a la la/ a la la/ shes rab kyi pha rol tu phyin pa 'di ni mi brtson pas rtogs par dka' ba lags so/ /bcom ldan 'das kyis bka' stsal pa/ rab 'byor de de bzhin te/ de de bzhin no/ /ji skad smras pa bzhin te/ shes rab kyi pha rol tu phyin pa ni mngon par mi brtson pa dang /[ ]dge ba'i rtsa ba chung ba dang / yid mi gzhungs pa dang / don du mi gnyer ba dang / thos pa dang mi ldan pa dang / shes rab chung ba dang / sdig pa'i grogs pos zin pa dang / sdig pa'i grogs po dang 'dre ba mang ba dang /[ ]sdig pa'i grogs pos 'dzin du bcug pa dang / dang ba tsam dang ldan pa dang /[ ]dad pa tsam dang ldan pa dang / las dang po pa dang skal ba med pa'i tshul can dang / yongs su mi 'dri ba'i rang bzhin can dang / shes rab 'chal par 'gyur ba byas pa dang / le lo can dang / brtson 'grus chung ba dang / snying stobs chung ba dang / mos pa chung ba dang / dge ba'i chos de dag la mngon par mi brtson 39.167a pas mos par dka' ba ste/ rab 'byor de lta bas na shes rab kyi pha rol tu phyin pa ni mos par dka' ba zhes bya'o/ /rab 'byor gzhan yang rigs kyi bu 'am/ rigs kyi bu mo gang la la zhig shes rab kyi pha rol tu phyin pa zab mo 'di nyan tam/[ ]'dzin tam/ 'chang ngam/ klog gam/ kun chub par byed dam/ gzhan dag la yang rgya cher yang dag par ston na des 'das pa dang / ma byon pa dang / da ltar byung ba'i sangs rgyas bcom ldan 'das rnams kyi byang chub bzung ba yin no/ /rab 'byor de lta bas na/ rigs kyi bu 'am/ rigs kyi bu mo gang lhag pa'i bsam pa phun sum tshogs pa myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas rgyun mi 'chad par shes rab kyi pha rol du phyin pa mnyan par bya/ gzung bar bya/ bcang bar bya/ klag par bya/ kun chub par bya ste/ des na myur du bla na med pa yang dag par rdzogs pa'i byang chub mngon par 'tshang rgya bar 'gyur ro/ /bcom ldan 'das kyis de skad ces bka' stsal nas tshe dang ldan pa rab 'byor dang / dge slong de dag dang / byang chub sems dpa' de dag dang / lha dang / mi dang / lha ma yin dang / dri zar bcas pa'i 'jig rten yid rangs te/ bcom ldan 'das kyis gsungs pa la mngon par bstod do/ /'phags pa bcom ldan 'das ma shes rab kyi pha rol tu phyin pa lnga bcu pa rdzogs s+ho//[ ] |