@#/ /rgya gar skad du/ d+h+wa dzA gran na ma ma hA sU tram/ bod skad du/ mdo chen po rgyal mtshan mchog ces bya ba/ dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das yul spong byed du yul rgyu zhing gshegs pa na yangs pa can du byon nas/ yangs pa can gyi spre'u rdzing gi 'gram gyi khang pa brtsegs pa'i gnas na bzhugs so/ /de'i tshe na yangs pa can gyi tshong pa rab tu mang po yul rdo 'jog tu tshong par bya ba'i phyir yul rdo 'jog tu 'gro bar chas pa'i yangs pa can gyi tshong pa rab tu mang po dag gis/ bcom ldan 'das yul spong byed du yul rgyu zhing gshegs pa na yangs pa can du byon nas/ yangs pa can gyi spre'u'i rdzing gi 'gram gyi khang pa brtsegs pa'i gnas na bzhugs so zhes thos so/ /thos nas kyang tshogs nas tshogs dang / mang po nas mang por lhags shing 'dus te yangs pa can nas byung nas/ bcom ldan 'das ga la ba der dong ste lhags nas/ bcom ldan 'das kyi zhabs la mgo bos phyag 'tshal te phyogs gcig tu 'khod pa dang / bcom ldan 'das kyis yangs pa can gyi tshong pa rab tu mang po phyogs gcig tu 'khod pa dag la chos kyi gtam yang dag par bstan/ yang dag par 'dzin du bcug /yang dag par gzeng bstod/ yang dag par rab tu dga' bar mdzad do/ /rnam grangs 66.288b du mar chos kyi gtam yang dag par bstan/ yang dag par 'dzin du bcug /yang dag par gzeng bstod/ yang dag par rab tu dga' bar mdzad nas cang mi gsung bar bzhugs so/ /de nas yangs pa can gyi tshong pa rab tu mang po dag stan las langs te/ bla gos phrag pa gcig tu gzar nas/ bcom ldan 'das ga la ba de logs su thal mo sbyar ba btud de/ bcom ldan 'das la 'di skad ces gsol to/ /btsun pa bdag cag ni yangs pa can gyi tshong pa rab tu mang po yul rdo 'jog tu 'jal tshong bgyi ba'i slad du/ yul rdo 'jog tu mchi bar chas pa lags na/ bcom ldan 'das dge slong gi dge 'dun dang thabs gcig tu sang bdag cag gi sdum par gdugs tshod gsol bar ci gnang / bcom ldan 'das kyis yangs pa can gyi tshong pa rab tu mang po dag la cang mi gsung bas gnang bar mdzad do/ /de nas yangs pa can gyi tshong pa rab tu mang po dag gis bcom ldan 'das kyis cang mi gsung bas gnang bar rig nas/ bcom ldan 'das kyis bka' stsal pa la mngon par bstod cing rjes su yi rang nas/ bcom ldan 'das kyi zhabs la mgo bos phyag 'tshal te/ bcom ldan 'das kyi spyan snga nas phyir dong ngo / /de nas yangs pa can gyi tshong pa rab tu mang po dag gis de nyid kyi mtshan mo bza' ba dang bca' ba gtsang zhing bsod pa dag legs par sbyar nas nang par sngar langs te/ gdan dag bshams shing / chu ra dag kyang bzhag nas/ bcom ldan 'das la btsun pa gdugs tshod sbyar te/ dus la bab lags na/ bcom ldan 'das kyis da de'i dus la bab par dgongs su gsol zhes spyan 'dren gyis spyan drangs so/ /de nas bcom ldan 'das snga dro sham thabs dang chos gos gsol te/ lhung bzed bsnams nas dge slong gi tshogs 66.289a kyis yongs su bskor cing / dge slong gi dge 'dun gyis mdun du bdar nas yangs pa can gyi tshong pa rab tu mang po dag gi bkad sa ga la ba der gshegs te byon nas/ dge slong gi dge 'dun gyi gung la gdan bshams pa de nyid la bzhugs so/ /de nas yangs pa can gyi tshong pa rab tu mang po dag gis bcom ldan 'das kyi zhabs la mgo bos phyag 'tshal te phyogs gcig tu 'khod pa dang / bcom ldan 'das kyis yangs pa can gyi tshong pa rab tu mang po phyogs gcig tu 'khod pa dag la 'di skad ces bka' stsal to/ /tshong pa dag gal te khyed cag dgon par son pa na 'jigs pa 'am/ bag tsha ba 'am/ spu zing zhes byed pa skye bar gyur na/ de'i tshe khyed kyis 'di ltar bcom ldan 'das de ni de bzhin gshegs pa dgra bcom pa yang dag par rdzogs pa'i sangs rgyas/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu gdul bya'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das yin no zhes nga rnam pa las yang dag par rjes su dran par gyis shig /tshong pa dag de'i tshe khyed kyis nga rnam pa las yang dag par rjes su dran par byas na 'jigs pa 'am/ bag tsha ba 'am/ spu zing zhes byed pa 'byung bar 'gyur ba gang yin pa de med par 'gyur ro/ /gal te nga mi dran na yang bcom ldan 'das kyi chos ni legs par gsungs pa yang dag par mthong ba/ nad med pa/ dus chad pa med pa/ nye bar gtong ba 'di mthong ba la don yod pa/ mkhas pa rnams kyis rang gis rig par bya ba yin no zhes chos rnam pa las yang dag par rjes su dran par gyis shig /tshong pa dag de'i tshe khyed kyis chos rnam pa lngas yang dag par rjes su dran par byas na 'jigs pa 'am/ bag tsha ba 'am/ spu zing zhes byed pa 'byung bar 'gyur ba 66.289b gang yin pa de med par 'gyur ro/ /gal te chos mi dran na yang bcom ldan 'das kyi nyan thos kyi dge 'dun ni legs par zhugs pa/ rigs par zhugs pa/ drang por zhugs pa/ 'thun par zhugs pa/ chos kyi rjes su 'thun pa'i chos la zhugs pa/ chos kyi rjes su 'thun par spyod pa ste/ dge 'dun la rgyun du zhugs pa'i 'bras bu mngon sum du bya ba'i phyir zhugs pa dag kyang yod/ dge 'dun la rgyun du zhugs pa dag kyang yod/ dge 'dun la lan cig phyir 'ong ba'i 'bras bu mngon sum du bya ba'i phyir zhugs pa dag kyang yod/ dge 'dun la lan cig phyir 'ong ba dag kyang yod/ dge 'dun la phyir mi 'ong ba'i 'bras bu mngon sum du bya ba'i phyir zhugs pa dag kyang yod/ dge 'dun la phyir mi 'ong ba dag kyang yod/ dge 'dun la dgra bcom pa nyid kyi 'bras bu mngon sum du bya ba'i phyir zhugs pa dag kyang yod/ dge 'dun la dgra bcom pa dag kyang yod de/ de dag ni skyes bu zung bzhi dang / skyes bu gang zag brgyad yin te/ bcom ldan 'das kyi nyan thos kyi dge 'dun de ni tshul khrims phun sum tshogs pa/ ting nge 'dzin phun sum tshogs pa/ shes rab phun sum tshogs pa/ rnam par grol ba phun sum tshogs pa/ rnam par grol ba'i ye shes mthong ba phun sum tshogs pa kun du sbyin pa'i 'os su gyur pa/ rab tu sbyin pa'i 'os su gyur pa/ thal mo sbyar ba'i 'os su gyur pa/ phyag bya ba'i 'os su gyur pa/ bsod nams kyi zhing bla na med pa/ 'jig rten gyi yon gnas yin no zhes dge 'dun rnam pa las yang dag par rjes su dran par gyis shig /tshong pa dag de'i tshe khyed kyis dge 'dun rnam pa las yang dag par rjes su dran par byas nas 'jigs pa 'am/ bag tsha ba 'am/ spu zing zhes byed pa 'byung bar 'gyur ba gang yin pa de med par 'gyur ro/ / 66.290a tshong pa dag sngon lha dang lha ma yin gyi g.yul nye bar gnas par gyur pa na lha'i dbang po brgya byin gyis sum cu rtsa gsum pa'i lha rnams la smras pa/ grogs po dag gal te khyed cag lha dang / lha ma yin gyi g.yul du zhugs pa na/ 'jigs pa 'am/ bag tsha ba 'am/ spu zing zhes byed pa skye bar gyur na/ de'i tshe khyed kyis nga'i rgyal mtshan mchog rnam par rgyal byed yang dag par rjes su dran par gyis shig /de'i tshe khyed kyis nga'i rgyal mtshan mchog rnam par rgyal byed yang dag par rjes su dran par byas na 'jigs pa 'am/ bag tsha ba 'am spu zing zhes byed pa de 'byung bar 'gyur ba gang yin pa de med par 'gyur ro/ /gal te nga'i mi dran na yang lha'i bu dbang ldan gyi rgyal mtshan mchog yang dag par rjes su dran par gyis shig /de'i tshe khyed kyis lha'i bu dbang ldan gyi rgyal mtshan mchog yang dag par rjes su dran par byas na 'jigs pa 'am/ bag tsha ba 'am/ spu zing zhes byed pa 'byung bar 'gyur ba gang yin pa de med par 'gyur ro/ /gal te lha'i bu dbang ldan gyi mi dran na yang lha'i bu chu lha'i rgyal mtshan mchog yang dag par rjes su dran par gyis shig /de'i tshe khyed kyis lha'i bu chu lha'i rgyal mtshan mchog yang dag par rjes su dran par byas na 'jigs pa 'am/ bag tsha ba 'am/ spu zing zhes byed pa 'byung bar 'gyur ba gang yin pa de med par 'gyur ro/ /tshong pa dag de bzhin du gal te khyed cag kyang dgon par son pa na 'jigs pa 'am/ bag tsha ba 'am/ spu zing zhes byed pa skye bar gyur na de'i tshe khyed kyis 'di ltar bcom ldan 'das de ni de bzhin gshegs pa dgra bcom pa yang dag par rdzogs pa'i sangs rgyas/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu gdul bya'i kha lo sgyur ba/ bla na med pa lha dang mi rnams kyi ston pa/ sangs rgyas bcom ldan 'das yin 66.290b no zhes nga rnam pa las yang dag par rjes su dran par gyis shig /tshong pa dag de'i tshe khyed kyis nga rnam pa las yang dag par rjes su dran par byas na 'jigs pa 'am/ bag tsha ba 'am/ spu zing zhes byed pa 'byung bar 'gyur ba gang yin pa de med par 'gyur ro/ /gal te nga mi dran na yang bcom ldan 'das kyi chos ni legs par gsungs pa/ yang dag par mthong ba/ nad med pa/ dus chad pa med pa/ nye bar gtong ba/ 'di mthong ba la don yod pa/ mkhas pa rnams kyis rang gis rig par bya ba yin no zhes chos rnam pa las yang dag par rjes su dran par gyis shig /tshong pa dag de'i tshe khyed kyis chos rnam pa las yang dag par rjes su dran par byas na 'jigs pa 'am/ bag tsha ba 'am/ spu zing zhes byed pa 'byung bar 'gyur ba gang yin pa de med par 'gyur ro/ /gal te chos mi dran na yang bcom ldan 'das kyi nyan thos kyi dge 'dun ni legs par zhugs pa/ rigs par zhugs pa/ drang por zhugs pa/ 'thun par zhugs pa/ chos kyi rjes su zhugs pa'i chos la zhugs pa/ chos kyi rjes su 'thun par spyod pa ste/ dge 'dun la rgyun du zhugs pa'i 'bras bu mngon sum du bya ba'i phyir zhugs pa dag kyang yod/ dge 'dun la rgyun du zhugs pa dag kyang yod/ dge 'dun la lan cig phyir 'ong ba'i 'bras bu mngon sum du bya ba'i phyir zhugs pa dag kyang yod/ dge 'dun la lan cig phyir 'ong ba dag kyang yod/ dge 'dun la phyir mi 'ong ba'i 'bras bu mngon sum du bya ba'i phyir zhugs pa dag kyang yod/ dge 'dun la phyir mi 'ong ba dag kyang yod/ dge 'dun la dgra bcom pa nyid kyi 'bras bu mngon sum du bya ba'i phyir zhugs pa dag kyang yod/ dge 'dun la dgra bcom pa dag kyang yod de/ de dag ni skyes bu zung bzhi dang / skyes bu gang zag brgyad yin te/ bcom ldan 'das kyi nyan thos kyi dge 'dun de ni tshul khrims phun 66.291a sum tshogs pa/ ting nge 'dzin phun sum tshogs pa/ shes rab phun sum tshogs pa/ rnam par grol ba phun sum tshogs pa/ rnam par grol ba'i ye shes mthong ba phun sum tshogs pa/ kun du sbyin pa'i 'os su gyur pa/ rab tu sbyin pa'i 'os su gyur pa/ thal mo sbyar ba'i 'os su gyur pa/ phyag bya ba'i 'os su gyur pa/ bsod nams kyi zhing bla na med pa/ 'jig rten gyi yon gnas yin no zhes dge 'dun rnam pa las yang dag par rjes su dran par gyis shig /tshong pa dag de'i tshe khyed kyis dge 'dun rnam pa las yang dag par rjes su dran par byas na 'jigs pa 'am/ bag tsha ba 'am/ spu zing zhes byed pa 'byung bar 'gyur ba gang yin pa de med par 'gyur ro/ /de nas yangs pa can gyi tshong pa rab tu mang po dag gis sangs rgyas la sogs pa dge slong gi dge 'dun bde bar bzhugs par rig nas rang rang gi lag nas bza' ba dang / bca' ba gtsang zhing bsod pa dag legs par bstabs shing yang dag par tshim par byas so/ /rnam grangs du mar rang rang gi lag nas bza' ba dang / bca' ba gtsang zhing bsod pa dag legs par bstabs shing yang dag par tshim par byas nas bcom ldan 'das gdugs tshod gsol cing / lhung bzed bzhag ste/ phyag bcabs par rig nas stan shin du dma' ba dag blangs te chos mnyan pa'i phyir bcom ldan 'das kyi spyan sngar 'khod do/ /de nas bcom ldan 'das kyis yangs pa can gyi tshong pa rab tu mang po dag gi sbyin pa de la rjes su yi rang ba 'dis rjes su yi rang par mdzad do/ /tshong pa zas dang skom dag gis/ /dge slong dge 'dun bshos gsol ba/ /rab tu shes nas gtong ba yi/ /blo ldan 'phags pa gang byed bzhin/ /sbyin pa bde legs rjod pa 'di/ /tshong pa khyed kyis byin pas na/ /khyed cag don gang legs 'dod pa'i/ /khyed kyi don de rtag grub shog /khyed kyi 66.291b rkang gnyis bde legs shing / /khyed kyi rkang bzhi bde legs shog /khyed cag lam zhugs bde legs shing / /phyir ldog pa na'ang bde legs shog /mtshan mo bde legs nyin bde legs/ /nyi ma'i gung la bde legs shing / /khyed cag kun du bde legs la/ /khyed la sdig pa ma 'byung shig /ji ltar zhing ni phun sum la/ /sa bon phun sum tshogs btab cing / /char pa phun sum tshogs gyur na/ /lo tog phun sum tshogs par 'gyur/ /gnas med phun sum tshogs gyur cing / /skye ba phun sum tshogs gyur la/ /rgyas pa phun sum tshogs gyur na/ /lo tog phun sum tshogs 'gyur ltar/ /de bzhin tshul khrims phun tshogs la/ /kha zas phun sum tshogs byin zhing / /phun sum tshogs phyir de byas na/ /phun sum tshogs pa 'grub par 'gyur/ /de phyir phun sum tshogs 'dod cing / /phun tshogs don gnyer gang zag gis/ /shes rab phun tshogs bsten gyur na/ /des ni phun sum tshogs pa 'grub/ /de phyir bla med sangs rgyas dang / /chos dang dge 'dun dag la ni/ /brtan pa dad pa skyed byed pa/ /de sems phun sum tshogs par 'gyur/ /rig dang zhabs su ldan pa la/ /phun sum tshogs pa'i sems thob nas/ /dge ba'i las rnams byed gyur pa/ /de ni phun sum tshogs pa'i las/ /'jig rten yang dag bzhin shes na/ /lta ba phun sum tshogs pa 'thob/ /'phags shing mthong ba phun tshogs na/ /yid ni phun sum tshogs par 'gyur/ /dri ma thams cad bcom byas shing / /mya ngan 'das pa phun sum thob/ /sdug bsngal zad par byed pa de/ /de yi don ni phun sum yin/ /de nas bcom ldan 'das kyis yangs pa can gyi tshong pa rab tu mang po dag la chos kyi gtam yang dag par bstan/ yang dag par 'dzin du bcug /yang dag par gzeng bstod/ yang dag 66.292a par rab tu dga' bar mdzad do/ /rnam grangs du mar chos kyi gtam yang dag par bstan/ yang dag par 'dzin du bcug /yang dag par gzeng bstod/ yang dag par rab tu dga' bar mdzad nas gdan las bzhengs te gshegs so/ /mdo chen po rgyal mtshan mchog ces bya ba rdzogs so// // rgya gar gyi mkhan po 'dzi na mi tra dang / pra dz+nyA warma dang / zhu chen gyi lo ts+tsha ba ban de ye shes sde la sogs pas bsgyur cing zhus te gtan la phab pa/ / |