@#/ /rgya gar skad du/ gaN DI sU tra/ bod skad du/ gaN DI'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab 'od ma'i tshal bya ka lan da ka gnas pa na dge slong stong du tshang ba'i dge slong gi dge 'dun chen po dang / byang chub sems dpa'i tshogs chen po dang thabs gcig tu bzhugs te/ thams cad kyang dgra bcom pa/ zag pa zad pa/ bya ba byas pa/ byed pa byas pa/ khur bor ba/ bdag gi don rjes su thob pa/ srid par sbyor ba yongs su zad pa/ yang dag pa'i shes pas sems shin du rnam par grol ba rnams dang / bcom ldan 'das thabs gcig go/ /de'i tshe rgyal po gsal rgyal zhes bya ba stan las langs nas bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ bcom ldan 'das la 'di skad ces gsol to/ /bcom ldan 'das ma 'ongs pa'i dus su rtsod pa'i dus kyi tshe sems can thams cad sdig pa'i sems dang / 'thab pa'i sems dang / 'dod chags dang / zhe sdang dang / gti mug dang kun du ldan pa/ pha rol gyi yul rnams la mchog tu zhen pa/ gcig la gcig za ba la brtson pa/ bcom ldan 'das kyis sngon gsungs pa'i dus 'jig 66.333a par byed pa/ dam pa'i chos spong bar byed pa/ sangs rgyas dang / chos dang / 'dod chags dang bral ba rnams sun 'byin pa de rnams gzhig pa'i thabs gang gis byang chub la mchog tu gzhol bar 'gyur ba'i thabs bstan du gsol/ de skad ces gsol pa dang / bcom ldan 'das kyis bka' stsal pa/ rgyal po khyod sems can thams cad kyi don dang / phan pa dang / bde ba'i phyir dang / sangs rgyas dang / dge 'dun yang dag par bsrung ba'i phyir 'dri bar byed pa legs so legs so/ /de'i phyir legs par rab tu nyon la yid la zung shig ngas bshad par bya'o/ /de nas bcom ldan 'das de'i tshe kun du sgra sgrogs pa zhes bya ba'i ting nge 'dzin la snyoms par zhugs so/ /bcom ldan 'das ting nge 'dzin gang la snyoms par zhugs pa de'i tshe dmyal ba thams cad rgyun chad pa dang / sdang ba'i sems dang ldan pa thams cad kyang sdang ba'i sems dang bral zhing byang chub kyi sems la rab tu gzhol bar gyur pa dang / bcom ldan 'das kyis bka' stsal pa/ gsal rgyal khyod kyis mthong ngam/ kun du thos sam/ shes sam/ rtogs sam/ bcom ldan 'das mthong lags so/ /bde bar gshegs pa mthong lags so/ /khums shing kun du khums la 'tshal zhing rtogs so/ /bcom ldan 'das kyis bka' stsal pa/ gsal rgyal 'di ni sems can thams cad kyi ma sangs rgyas dang / byang chub sems dpa' skyed pa/ nyan thos dang / rang sangs rgyas dang / yang dag par rdzogs pa'i sangs rgyas thams cad kyis phyag byas pa/ mchod pa/ bsams pa/ bsgoms pa/ shes rab kyi pha rol du phyin pa sgra'i gzugs kyis sems can thams cad yongs su skyong bar byed pa/ mu stegs pa thams cad rnam par 'jig par byed pa/ sdang ba'i sems 'dul bar byed pa/ sdig pa'i sems 'joms par byed pa/ zhe sdang ba'i sems rnam par sel bar byed pa/ gti mug gi 66.333b sems rab tu 'jig par byed pa/ 'dod chags kyi sems rnam par spong bar byed pa/ byang chub kyi sems yongs su skyong bar byed pa/ sangs rgyas kyi sems 'phel bar byed pa/ sangs rgyas 'byung ba bsten par byed pa/ 'thab pa dang / 'gyed pa dang / 'khrug pa dang / rtsod pa dang / sdug bsngal ba dang / rmi lam ngan pa dang / kun 'dul ba thams cad 'jig pa/ glo bur gyi nad dang / 'chi ba zhi bar byed pa dang / dus ma yin par 'chi ba dang / rims la sogs pa zhi bar byed pa/ pha rol gyi dpung 'dul bar byed pa/ bdud rnam par 'jig par byed pa/ gdung ba sel bar byed pa/ skal ba bzang po yang dag par 'phel bar byed pa/ tshe dang nad med pa ster bar byed pa/ 'chi ba'i 'jigs pa zhi bar byed pa/ thar pa dang dpal 'phel bar byed pa/ gang gis thos nas rjes su yi rang ba de la yid bzhin gyi nor bu ltar 'bras bu rab tu ster ba/ yum shes rab kyi pha rol du phyin pa gaN DI'i gzugs kyis bzhugs so zhes thos pa dang / gsal rgyal sems dang ba skyes nas yang bcom ldan 'das la 'di skad ces gsol to/ /bcom ldan 'das 'di'i tshad ni ji tsam lags/ mdog ni ci 'dra ba lags/ bye brag ni du zhig lags/ brdung ba ni ci lta ba lags/ gang gis brdung bar bgyi/ gang gi tshe gang gi dus na ji srid du brdung bar bgyi/ ji ltar gzhag par bgyi/ de skad ces gsol pa dang / bcom ldan 'das kyis bka' stsal pa/ 'byor par 'dod pas shing rnams ni/ /rab tu 'bad de brtag par bya/ /tsan dan bil ba pa la sha /a shwad tha dang tsan dan dmar/ /rgya star ta la king shu ka /shing sha pa dang ta ma la/ /a mra star bu skyu ru ra/ /ting ti sa ra a sho ka /'di dag thams cad med na yid/ /'o se las ni 'bad de bya/ /rgyal po 'bad pas thams cad du/ /'di dag med na mi bya'o/ /tshad med shing ngan las byas dang / /brdungs dang sgra ni 66.334a mi 'byung ba'i/ /sangs rgyas yum 'di brdungs na ni/ /yul 'khor 'tshe ba nges par 'byung / /gtsug lag khang du dge slong rnams/ /de bzhin blo ni mi mthun dang / /nye bar gdung ba 'byung 'gyur zhing / /rnam pa du mar rtsod par 'gyur/ /mu stegs can gyi dbang 'gyur zhing / /bdud kyang 'byung bar 'gyur ba yin/ /gdug pa'i klu ni du ma yis/ /'bru rnams kyang ni nyams par byed/ /rgyal khams 'dir mang sems can rnams/ /rnam par 'jig pa nyid du 'gyur/ /gtsug lag khang yang 'jig 'gyur zhing / /chos kyang nub par 'gyur ba yin/ /bdud kyi lha rnams dge slong gi/ /dge 'dun shin du ma bsdams byed/ /de ltar yang dag shes nas kyang / /legs par yongs su brtags te bya/ /tshad ni chung ngu sor brgyad kyi/ /brgyad cu rtsa bzhi nyid bya zhing / /zheng du sor ni drug bya ste/ /'phangs su yang ni gnyis bya'o/ /sor mo'i tshigs kyi tshad dag gis/ /zur bzhir tshad ni gnyis pa yin/ /legs mnyam nyid ni shin du gsal/ /rtse gnyis sbal pa'i mgo bzhin no/ /de nas rdung bar byed pa yang / /shing de nyid las bcad de bya/ /sor bcu gnyis kyi tshad dag la/ /zlum zhing rtse gnyis ne'u le'i mgo/ /chang zungs tshad kyang de bzhin te/ /shin du 'jam dang rtsibs mnyam par/ /gang phyir de brdungs gzhan dgongs pa/ /'og tu'ang de yi khri bya ba/ /gtsug lag khang gi sgo stengs sam/ /yang na dbus ma'i steng du bya/ / de yi rab gnas bya ba ni/ /shin du brtan pa'i chos kyi sku/ /skyed pa ma yin 'jig byed min/ /gdod nas ma skyes pa dge ba/ /de ltar rab gnas byas nas ni/ /de ni spyan dbyer gyur pa yin/ /gaN DI spyan dbye byas nas kyang / /de 'og gtsug lag khang kun du/ /klu bdun gyis ni brgyan pa ltar/ /bskyed pa'i rim gyis brdung bar bya/ /de 'og dkon mchog gsum la ni/ /phyag byas nas ni brdung bya zhing / / shang rtsa 66.334b lan gsum brjod pas ni/ /chos kyi rnga rnams brdung bar bya/ /me tog gis ni de bzhin khrus/ /zan za nyi ma 'char nub tshe/ /dus gsum la ni lan gsum ste/ /sku khrus tshe na lan gnyis bsngags/ /glo bur gnod pa char mi 'bab/ /de bzhin 'thab dang rtsod pa dang / /glog dang gnod pa chen po dang / /gnas brtan rnams ni spyan 'dren dang / /nad dang mu ge zhi ba'i phyir/ /ma 'tshol rim gyis brdung bar bya/ /dge slong rnams dang dge tshul gyis/ /dus rnams rtag tu brdung ba ste/ /gso sbyong la ni gnas tshe yi/ /dge bsnyen gyis kyang brdung bar bya/ /mtshan nyid thams cad rdzogs pa dang / /klu bdun gyis ni brgyan par bya/ /rgyal po gang tshe yul 'khor du/ /gaN DI de ni grag gyur pa/ /der ni dpal dang grags pa dang / /'dod pa dang ni lo legs 'gyur/ /pha rol dpung gis 'jigs med cing / /'bru rnams kyang ni nyams mi 'gyur/ /sangs rgyas byin brlabs 'byor pa yis/ /der ni bdud rnams 'dul bar 'gyur/ /chos kyi rnga ni srid rtser bcas/ /kun nas rab tu g.yo bar 'gyur/ /dmyal dang yi dgas 'jig rten rnams/ /'jig par 'gyur bar the tshom med/ /thams cad sangs rgyas rtag dad cing / /thams cad chos la gzhol bar 'gyur/ /des ni dge 'dun 'dul bar ldan/ /mkhas pa rnams kyang 'phel bar 'gyur/ /'dod chags zhe sdang gti mug rnams/ /der ni nub par 'gyur ba yin/ /rgyal po tshe ring chos ldan zhing / /bde ba dag dang ldan par 'gyur/ /rgyal po gtsug lag khang kun du/ /chos kyi rnga ni brdungs pa yis/ /sgra ni gang gi rna ba yi/ /lam dag tu ni grag gyur cing / /dus bzhi dag tu thos ma ni/ /de rnams byang chub thob par 'gyur/ /gang zhig snying nas yid rang pa/ /de ni grol 'gyur the tshom med/ /gaN DI'i mdo ni lan cig thos/ /mi de skye ba dran 66.335a par 'gyur/ /gang na mdo sde'i mchog 'di gnas/ /yul 'khor der yang 'byor par 'gyur/ /dus kun du ni gnas pa dang / /klog gam yang na mchod par byed/ /'di ni yid la 'dzin byed pa/ /sdig pa las ni grol bar 'gyur/ /bcom ldan 'das kyis de skad ces bka' stsal pa dang / rgyal po gsal rgyal bcom ldan 'das la yang dang yang du phyag byas nas song ngo / /bcom ldan 'das kyis de skad ces bka' stsal nas/ thams cad dang ldan pa'i 'khor de dang / lha dang mi dang / lha ma yin dang / nam mkha' lding dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /gaN DI'i mdo rdzogs so// // rgya gar gyi mkhan po d+ham+ma shrI b+ha dra dang / lo ts+tsha ba dge slong tshul khrims yon tan gyis bsgyur/ zhu chen gyi lo ts+tsha ba dge slong rin chen bzang pos bcos te gtan la phab pa/ |