@#/ /rgya gar skad du/ a ni t+ya ta sU tra/ bod skad du/ mi rtag pa nyid kyi mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na dge slong gi dge 'dun chen po dang thabs gcig tu bzhugs te/ de nas bcom ldan 'das kyis dge slong rnams la bka' stsal pa/ dge slong dag chos bzhi po 'di dag ni 'jig rten thams cad la sdug pa/ dben pa/ phangs pa/ yid du 'ong ba/ mngon par dga' bar bya ba'o/ /bzhi gang zhe na/ dge slong dag nad med pa ni 'jig rten thams cad la sdug pa/ dben pa/ phangs pa/ yid du 'ong bar mngon par dga' bar bya ba'o/ /nad med pa de'i mtha' yang nad yin te/ dge slong dag nad ni 'jig rten thams cad la mi sdug pa/ mi dben pa/ mi phangs pa/ yid du mi 'ong ba mngon par dga' bar bya ba ma 67.169b yin pa'o/ /dge slong dag lang tsho ni 'jig rten thams cad la sdug pa/ dben pa/ phangs pa/ yid du 'ong ba mngon par dga' bar bya ba'o/ /lang tsho 'di'i mtha' yang rga ba yin te/ dge slong dag rga ba ni 'jig rten thams cad la mi sdug pa/ mi dben pa/ mi phangs pa/ yid du mi 'ong ba/ mngon par dga' bar bya ba ma yin pa'o/ /dge slong dag 'byor pa ni 'jig rten thams cad la sdug pa/ dben pa/ phangs pa/ yid du 'ong ba mngon par dga' bar bya ba'o/ /'byor pa de'i mtha' yang rgud pa yin te/ dge slong dag rgud pa ni 'jig rten thams cad la mi sdug pa/ mi dben pa/ mi phangs pa/ yid du mi 'ong ba/ mngon par dga' bar bya ba ma yin pa'o/ /dge slong dag srog ni 'jig rten thams cad la sdug pa/ dben pa/ phangs pa/ yid du 'ong ba mngon par dga' bar bya ba'o/ /srog de'i mtha' yang 'chi ba ste/ dge slong dag 'chi ba ni 'jig rten thams cad la mi sdug pa/ mi dben pa/ mi phangs pa/ yid du mi 'ong ba/ mngon par dga' bar bya ba ma yin pa'o/ /bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad bka' stsal to/ /nad med mi rtag lang tsho rtag ma yin/ /'byor pa mi rtag srog kyang rtag ma yin/ /skye bo mi rtag nyid kyis nyen gyur na/ /'dod pa'i yon tan dga' ba ji ltar skye/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do/ /mi rtag pa nyid kyi mdo/ rdzogs so// // rgya gar gyi mkhan po su ren dra bo d+hi dang / zhu chen gyi lo ts+tsha ba ban de zhang ye shes sdes bsgyur cing zhus nas skad gsar cad kyis kyang bsnan nas gtan la phab pa/ / |